تجمع امهات العالمية الامريكية

[mr000]

سلام امهات شفتوا الورقه اللي توزعت اليوم 4فبراير دوام كامل مو هاف داي وراح يتوزع الريبورت بالفتره الثانيه! بعدين 9يونيو هاف داي لأنه آخر يوم دوام للطلبه! عاد شيذكرنا لي ذاك اليوم!! بعدين اللي مادفع باقي الرسوم خل يدفع عندكم لي 31/1! بس هذا اللي فالحين فيه يطلبون الفلوس!! بعد سمعوا آخر خبر منو حطوا كاونسلر حق الميدل سكول؟؟؟؟؟ بيبي الغانم بنت نوره الغانم... فوز جان تبين تطلعين اللي بقلبج درعمي عليها بالطابق الثاني...ولدي يقول هذا الناظر مايكل بل يقول نوره الغانم يات لندن علشان تقابلني حق الوظيفه... قلتله خو ماتييبه الكويت وتقعده بفندق تالي تشوفه يصلح والا مايصلح.. أكيد تسافر تسوي المقابلات بره... ماتاخذني معاها أروح أتسوق علما هي تخلص شغلها وتدور مدرسين!!

 

[mr000]

كراميلا جيكي أيميلاتج... فتحوا ugg في بيستر فيليج..ولدي ألحين بمطار لندن عنده تقريبا 7 ساعات أقوله أطلع روح أكسفورد يقولي مالي خلق تعبان ماتسوى واااااي بقيته يمي أنتفه... لو آنا جان أترس جنطتين بهال7 ساعات!!أوف بط جبدي!!

 

[bella bambina]

السلام أمهات
هلا مروو قلبي متروس مادري شقول أمس كلمت رفيجتي بأمريكا كانو عيالها بال bsk بالكويت والحين بمدارس حكومية بأمريكا تقول ماكو مقارنه بينا وبينهم اليهال مستانسين وخطتهم ومنهجهم عجيب لا وببلاش ويومين بس يعطونهم واجب حق البيت وباجي الأسبوع يخلصون واجباتهم بالمدرسة ولما اسألت عن عيالي قلت لها الحمدلله زادو الأسعار ودلول مساعدة مصريه تدرسها وولدي كل يوم أبلة العربي ورقة درسو حق الاملاء وركزو عليه انزين جان دخلته مدرسة حكومية وحطيت له مدرسين لأني غصب ألقى وقت أدرس اخته الكبيرة وأتابع واجباته والبروجكتس ملوتهم نوصل البيت فوق الثلاث متى يتغدون ويكتبون واجباتهم ويدرسون ولازم ألقى وقت أحفظه املاء العربي والله فراغه شنو الميزه ورا دفع الفلوس صج ليقالو يامن شرا له من حلاله عله :0bee2e8d89:
ان شاء الله يوصل ولدج بالسلامه

 

[bella bambina]

هلا والله ليالي اي هذي مدرستنا صاجه والله فرق بس حسره علينا هذي دبي بكل شي اسبقونا ما شاء الله عليهم

 

[bella bambina]

اليوم شفت ريمان ما شاء الله عليها صادتني مع اني كنت ناويه أركز بس دلول كالعاده تطلع من الصف جنها خروف مسلسل هدوه تفتلت تروح صف بنت اخوي طبعا ريمان مسويه تمويه تقول انها متينه واهيه ما شاء الله جسمها متناسق فرصه سعيده ريمان وعقبال ما نلتقي بمرو وكراميلا

 

[bella bambina]

هاي فوز اشلونج واشلون بنيتج ؟ دلول تقول اليوم بعد قعدوها بالساد جير أوكي أدري انها شيطانه بس مو معقوله كل يوم بيحطونها بهالكرسي وأكيد بتكون بعيده عنهم يعني ما راح يركزون عليها بيهملونها وخلاص دام شافو ان هالطريقه ما يابت نتيجه لازم يدورون طريقه ثانيه بليز سالي بنتج ليش قعدو دلول بالساد جير ؟ حرام كسرت خاطري تقول قلت آيم سوري بس ما ردوني مكاني

 

[mr000]

أهلين بيلا والله شوفي آنا من كان ولدي بغريد 1 بالغانم ماشفنا الراحه ووديته التكامل بعد أزيد صج لما يقول آنا حياتي كلها دراسه والله ساعات أقول خل ولدي يودي بنته الحكومه وخل نفتك لأنه بصراحه خاصة لي غريد 6 سنوات التأسيس تعب تعب ومجابل وحنه وماكو طلعه ولاراحه حتى بالويك اند كنت أقعد أدرسه... بيلا مع ولدي صبي أمريكي أبوه يشتغل هني بالجيش دايما يقول حق ولدي ياريت أرجع مدارس أمريكا الدراسه كلش مو شي هني.. مثل ماقالت رفيجتج يقوله احنا هناك ماندرس وايد بالبيت فترة العصر هذي نروح نوادي واكتيفيتيز وارجع اسوي شويه هوم وورك بس هني لما أسوي جذي f على طول!

 

[mr000]

آنا اعتقد ان المدرسه الأمريكيه مالت السفاره متبعين طريقة أمريكا بالدراسه لأن وايد طلبه أجانب طلعوا راحوا لها وحتى هالصبي اللي مع ولدي يقوله آنا خلاص بروح لها مابي العالميه اصدقائه اللي راحوا هناك مستانسين يمكن بعد علشان يكونون كلهم أمريكان مع بعض مو مثل العالميه أغلبها كويتيين وعرب! والله مادري شقولج بس شوفي آنا أعرف وحده ولدها بالخليج عمرها مافتحت معاه كتاب ولاحفظته ولااملاء حاطتله مدرسه تييله يوميا تدرسه وتساعده بالواجبات لما وصل غريد 5 تالي خلاص اعتمد على نفسه وألحين أخته بغريد 2 نفس الشي بس عاد حطيلج ميزانيه فوق الرسوم مدرس خاص بالبيت...

 

[Fouz]

صباح الخير أمهات شلونكم
بسألكم عوار السيقان شي طبيعي والا لأ، أمس ما قدرت أمشي قعدت أبجي من العوار ولاوديت بنتي ولا قدرت أيبها من الألم مادري شمنه، احس ريولي متيبسة و شادة حيل :0bee2e8d89:

ليالي شفت السايت، المدرسات كلهم من نورث اميريكا و العرب بس حق الدين و العربي، بس رسومهم أغلى منا شوية بس على الصور اللي حاطينها تستاهل

 

[Fouz]

هلا مرو، أمس خالتي يابت بنتي فما خذت الفولدر اللي فيه الاوراق، و ان شاءالله على الاحد أكون دزيت الكتاب حق نورة الغانم بس ادعو لي أصير أحسن و أقدر أسوق ، و اذا على الرياييل طفارتهم السوق عكسنا ما نشبع من السوقة و المشترى مع ان الكبتات فايضة و الملابس تتوزع بالليبل مالها مادري ليش شارينهم اذا مو عاجبينا، و بالنسبة حق المدرسة انا اشوف كل مكان فيه بلا بس انا احكم على المدرسة اذا ما اشوف استجابة من الادارة او اشوف بنتي كارهة المدرسة اهني اعرف ان المكان ما يصلح، و انتي بحكم تجربتج شفتي تعاسة المدارس اللي قبل، و المشاكل اللي صايرة الحين لازم نوصلها حق الادارة لان اذا بننتقد بروحنا عمرهم ماراح يعرفون خصوصا ان فلوسهم واصلة و ماكو شكاوي

خليني اقولج عن الكتاب اللي دزيته أول السنة، انا ما اقولج ان كل شي صار بيرفكت بس انا شفت تغيير، موظفة الاستقبال نفسها تهبل و حبوبة عكس اللي كانو قبل يالله يتكلمون، الويب سايت قاموا يحطون فيه اخر الاخبار و أمس شفتهم مغيرينه بالمرة، البدالة نوعا ما صارت أحسن صار في احد يرد ، اللي اقصده لازم نوصل استياءنا من اللي قاعد يصير علشان نقدر نحكم اذا اهما مهتمين والا لأ، والله المستعان

 

[Fouz]

بيلا شخبارج ، شفتي ريمان شلون بتقص علينا، ماكو فايدة كونان ما تبينا نصيدها تقول متينة!!!! يالله يا ريمان الحين احنا 2 قلنا لج راينا ننطر كاراميلا و مرو عاد ذيك الساعة اخذي اللاب توب و وريه حق كل واحد يقولج متينة

بيلا سألت بنتي، تقول دلال شريت العصير و حذفت القوطي بالارض هذا اللي قدرت أطلعه منها، بس تقول ما قعدوها بالساد جير مع اني سألتها أكثر من مرة تقول لأ الظاهر ما انتبهت

و طولي بالج على الوضع الحالي والله لو بالحكومة جان شاب راسج من اللي بيصير حق اليهال، انا روضة المنطقة لازقة في بيتي و المنطقة من أرقى مناطق الكويت يعني اليهال اللي فيها المفروض يكونون راقين لا تشوفينهم بالهدة يتحاذفون و بالنهاية كلميهم ةالله ماكو شي الا الاغاني، و غير بعض المدرسات اللي مالهم خلق عمرهم و اذا الناظرة تعبانة كملت السالفة، تصدقين ولد اخوي كان يدرس بالحكومة بالابتدائي عاد لما خذاه اخوي و الا على ويهه اثر طراق جان يسئله منو طلع مدرس ولده بصف ولد اخوي و الظاهر متهاوشين، راح اخوي المدرسة طبعا كلام فاضي و المدرس رده كان بمنتهى الوقاحة و ما نكر انه طقه بس كا قال السبب طبعا السبب معروف علشان ولده، يحلف اخوي يقول رحت المدرسة من الصبح و نطر المدرس عند الباب جان يقضب ولده و يطقه طراق مثل ما انطق ولده اهني المدرس استخف، ما يرضون على عيالهم و يرضون على عيال الناس

اللي اقصده كتبوا اللي عندكم و وصلوه لهم، لان تغيير المدارس هم يأثر على اليهال و البلوة انج ما تضمنين مستوى المدرسة الا اذا جربتيها بنفسج

و أكيد ماكو مقارنة بين الكويت و امريكا، شوفي الاوادم شلون تحترم بعض مو اهني استغفر الله كل واحد يبي يتهاوش، مستشفياتهم غير مطاعمهم غير تدخلين المحل لو الطابور فيه 50 واحد الكل ينطر و ما يتجاوز غيره، الموضوع موضوع حضارة و احترام مع الاسف مو موجود في ناس وايد و أولهم اللي يتجاوزون الطابور مال دخلة المدرسة، أكو وحدة قااااااااااااااااااثتني تيي اخر الناس و ترز روحها غصب تبي تدخل والله ذاك اليوم شكلت عليها بالهرن تخيلوي تأشرلي هههههه جني انا الغلطانة جان أقولها لأ ما تطوفين عاد كيفه اللي وراي بيطوفها على راحته بس انا لا و الف لا

 

[ReeMaN]

صباح الخير امهاتى شخباركم ؟؟

ها مروو شخبارج بشرينا شلون حفيدتج اليوم انشالله صارت احسن هالكتكوته؟؟؟ اكيد ولدج وصل بالسلامه وانشالله من شافته طابت ....

وصاجه كاراميلا يمكن مرضت من فراق ابوها وايد اسمع ييهال طول السنه مايمرضون ماشالله عليهم ومن تسافر الام او الابو وتكون

وايد متعلقه فيه تمرض ...... مع ان ولدج مو مال تسافرين معاه سياحه مرووو شكله مايونس بالسوق ولا له خلق السوق

ليالي وملكه مامات شخباركم حبيباتى من زمان ماطليتو علينا شلون عيالكم مع الدراسه

 

[ReeMaN]

الف سلامات فووز ماتشوفين شر يالغاليه يمكن معاج نقص كالسيوم اتذكر لما كنت حامل بالشهر بالساس كنت اموووت عوار لما امشي من

فخذي حييييييييل يعورنى جنى شد عضلي راجعت الدكتوره قالت نقص كاالسيوم وعطتنى حبوب وقالت تحملي الالم الين الولاده وفعلا ماراح

مني الييييين ولدت بالسلامه ....

فوز امس شفت بيلا ياحلوها اتهبل اول ماسلمت جان تطالع وين متينه هههههه اقولها مخشوشين بالكورسيه صاجه بنتها جنها دورا ماشالله عليها

فوز جربي كتبي كتاب حق نوره الغانم وشوفي ردها وانشالله خير علينا ....

احنا قلنا بنخلي ولدي قريد 1 بنفس المدرسه واذا صار نفس البلبله بالمدرسين كل شوي مغيرين المدرسين ويتغربلون الطلبه بسبتهم لا والله

بنشوف له مدرسه ثانيه ....

 

[ReeMaN]

مساء الخير يالحلوات

شخباركم شفيكم اليوم ماكو حس فوز مااشتغل معاي الويب سايت الظاهر تجربه .......

شلونكم مع البرد الحين مع ان الظهر كان حر وصاجه مروو الجو يمررض برررد الصبح وحر الظهر ويرد يبرد الجو بالليل
عاد اليوم العجيري يقول من الاسبوع الياي يبدي ايينا البرد القوي الى اخر شهر 2

 

[mr000]

سلام أمهات اشلونكم!فوز سلامات هذا العوار بالريول تشنج من نقص الكالسيوم مثل ماقالت ريمان لازم تقولين حق الطبيب يوصف لج حبوب كالسيوم... وآنا قايلتلكم دردعوا حليب ولبن وكل شي فيه كالسيوم!!فوز أكيد آنا ماراح استعيل بقرار النقل خل يروح الثانويه وبشوف الوضع بعد ماكو أحد انقرص كثري جربت الأسوأ من قبل... وبصراحه كلمة الحق تنقال يمكن صج ولدي متضايق من كثرة الدراسة والأمتحانات بس مرتاح نفسيا من المدرسه واسلوب المدرسين بالتعامل يعني بس مالت العربي اللي قال عنها عصبيه ونفسها خايسه... وأمس بالتيوترينج درسته مدرسة من الهاي سكول تدرس ماث يقولي وايد زينه... حتى لما شافت كتابه قالتله ترى نفس الدروس راح تاخذونها بغريد9 بس بتوسع أكثر شوي يعني طمنته لايخاف من الهاي سكول!ريمان مشكوره عالسؤال أي والله الحمدلله شوي خفت حرارتها وشوي بدت تصحصح وولدي رجع الصبح وصج مسكينه نفسيتها أحسن وتحاول شوي تاكل جدامه علشان يقولها عفيه بنتي حلوه وألا صارلها 3أيام صايمه كلش! وي ريمان كلش مو خبر سالفة البرد أحنا بدون برد وعيالنا طاحوا مراضه!!

 

[mr000]

فوز وبيلا انتوا سمعتوا عن سوالف مدارس الحكومه ويمكن تشوفونهم بالهده بس آنا عايشتهم وجربتهم بعيالي 3 درسوا وتخرجوا من الحكومه هذا غير أني اشتغلت بالمدارس 20 سنه... بصراحه شي لايقارن.. بلاوي بلاوي خاصه بمدارس الصبيان تلاقينها من منو والا منو من الصبيان وشطانتهم واخلاقهم الزفت وألا من بعض المدرسين ومعاملتهم السيئه واسلوبهم اللي مايناسب ناس تربويين... آنا ألحين الحمدلله عيالي تخرجوا وافتكينا بس قاعده أشوف معاناة خواتي مع مدارس عيالهم...يامشاكل مع الصبيان وألا مع المدرسين يعني كلش مو مرتاحين!! الحمدلله رب العالمين خل نقضب مينونا أحسن!!

 

[bella bambina]

السلام أمهات اشلونكم ؟
مرو الحمدلله على سلامة ولدج
فوز سلامتج ما تشوفين شر بالضبط نفس ما قالو لج مروو وريمان عندج نقص كالسيوم حاولي تعوضينه وخاصة اذا ناوية ترضعين
فوز آنا وزوجي كذا مرة رحنا الادارة وكل سنه على شي وقالبت نورة الغانم والعام كذا مرة قابلت مستر ديف الناظر وآنا أدري ماكو مكان كامل وعلى قولتكم عارفة الحكومه صار لي 12 سنه بمدارس حكوميه وعشان جذي ما دخلت عيالي مدارس حكومه وآنا على الأشياء اللي مضايقتني من العالمية تظل أرتاح لها وما أحب التغيير بس مو هاين علي أشوف المدرسة تتدهور ومن سيء الى أسوأ حسافه المدرسه من أقدم مدارس الكويت فلازم يقدمون خدمات أفضل من جذي الله كريم بس طبعا اذا درى ريلي ان المساعدة المصريه اهيه اللي بتظل ليآخر السنه تدرس اليهال بيروح يشتكي ما قلت له ليلحين أدري بيعصب وبيروح يتهاوش وطبعا ما قلت له ان بنته يوميا يقعدونها بالساد جير

 

[Fouz]

صباح الورد أمهات شخباركم

ريمان و مرو و بيلا مشكورين و الشر ما ييكم ان شاءالله و فعلا اللي فيني كله من نقص الكالسيوم لاني ما أشرب حليب أبد استغفر الله ما احبه

عاد ما صار لها اسبوعين من خلصت المضاد ، الحين قاعدة أعطيها تايلنول و اشوف حرارتها تنزل الحمدلله، ما قدرت أوديها أمس الطبيب من عوار ريولي و هم ما ودي يعطونها مضاد مرة ثانية، باجر ماني موديتها المدرسة و ان شاءالله تصير احسن اليوم

ريمان شخبارج و صاجة بيلا يا حلوها اذكر من شفتها ارتحت لها ماشاءالله ويهها سمح، و ان شاءالله أبلغكم بأي تطورات من نورة الغانم

مرو الحمدلله على سلامة ولدج و ان شاءالله حفيدتج تصير أحسن عقب شوفة ابوها الله لا يحرمهم من بعض، و بلاوي الحكومة الله يبعدنا عنها لعبوا بنفسية اليهال، يعني انتي تربين عيالج على الادب و الاحترام و مع الاسف يعتبرون الاحترام خوف و ضعف و يصير الياهل مطقاقة الصبيان يعني لازم يصير ماسون و نجري علشان يمشي معاهم، و انتي أدرى منا باللي يصير بحكم شغلج مرو

بيلا شلونج، والله كلامج عدل، المفروض مستوى المدرسة يرتفع او على الاقل يظل مستواها مثل ما اهو، و بعدين كلمي مس مروة عن الساد جير قوليلها شوفوا حل ثاني مو معقولة شهرين يقعدونها فيه، و اذا ما شفتي تطور قولي حق ريلج من حقه يقول اللي بخاطره عاد أحلى شي طريقة الرياييل هههه تدرين دايما اذا الادارة حريم يحسبون حساب الريال و العكس بالعكس

 

[mr000]

سلام أمهات اشلونكم!فوز ماتشوف شر بنيتج والله مشكله هاليهال مع المرض اليوم بنت ولدي ردت جنها أول يوم حراره وصدرها أخس من قبل ماجنها ماخذه مضاد حيوي 4 أيام ودوا الكحه بيخلص والله تنكدت ضاق خلقي عليها وشوي واتهاوش مع أبوها أقوله خل نوديها الطبيب مره ثانيه يقولي ماله داعي يعني شنو بيعطونها وموزين تاخذ مضاد مره ثانيه.. المشكله أنها ماتاكل ولاتشرب حليب كلش... الله كريم!!بيلا والله روحي وكلمي مدرسة بنتج قوليلها ليش مافكرت تغير اسلوبها معاها يعني ليش كله عقاب ليش ماتشجعها بكلام حلو وهديه بسيطه.. يعني مثلا قطت قوطي العصيرتكلمها بطريقه حلوه انها تشيله اشدعوه عاد هذي ياهل بالعكس راح تستانس لما تشجعها! الله يرحم أيام دوامي بالروضه كل خميس آنا بسوق السالميه أو سوق المعلم واترس كيس اشكبره من هالألعاب ودفاتر التلوين والأستيكرز وكبابيس وكلشي يخطر على بالج والله انه اييب نتيجه مع اليهال أحسن من العقاب.. والله كسرت خاطري بنتج عفيه روحي كلمي مدرستها!

 

[bella bambina]

السلام أمهات اشلونكم ؟
مشكورين ريمان وفوز انتو الأحسن وبدون مجاملة ارتحت لكم وحاسة جني أعرفكم من زمان وفرصة طيبه تعرفت عليكم سلامتها بنتج فوز ما تشوف شر اذا قاعدة تنزل حرارتها مع التايلنول صبري عليها بس اذا ما تحسنت بعد 3 أيام لازم تودينها الطبيب نفس الشي بنيتكم مروو اذا تتحسن بدون مضاد طبعا يكون أحسن لأنه يهلك الجسم ويضعف المناعه
ان شاء الله مروو أكلم أبلتها باجر