تجمع امهات العالمية الامريكية

[bella bambina]

فوز اهمه مبدأهم دهنا بمكبتنا يعني بييبون اي مساعده من نفس المدرسه ابتدائي متوسط أو ثانوي آنا هذي ما أعتبرها مشكله المشكله ان بيخلون مساعده تدرس لو هذا اللي نبيه جان خليت بنتي بأي روضة خاصه آنا دافعه هذا المبلغ لأني أبي مدرسات مؤهلات ودارسين مو بس مدرسة والسلام ولا كنت خليتها مع مربيتها بالبيت تدرسها الحروف والأرقام بدال هالعباله

 

[mr000]

سلام أمهات اشلونكم! فوز وبيلا ميخالف حبايبي صلوا عالنبي وهدوا ترى آنا أزيد منكم قاعده أشب وأطفي ولدي هذي ثالث مدرسه له الصبي وصل الثانويه ووين مانطقها عويه كل مدرسه الناس تمدحها وعيالهم يتأسسون عدل وآنا لي نقلت لها ولدي تتخربط ويطلعون المدرسين الزينين والأداره تتغير..... والله آنا البارحه مانمت حدي منقثه عندي مشاكل ثانيه.. وهالسياره اللي طاحت بجبدي وكل يوم ريلي يروح يتهاوش مع الشركه... واليوم فشيت خلقي في ولدي زفيته زف بالسياره بس قال مالي خلق التقويه وقتها متأخر ماأرجع ألا 4ونص... والله كسر خاطري بس شسوي بعد ألحين ياهم مدرس يديد ومن أول حصه موفاهمين له يعني بنرد على سالفة أول السنه....والله فوز زين تسوين كتبي كتاب حق المديره وخل يحسون أن الأهالي متضايقين وياريت آنا لي خلق أقعد أكتب جان كتبتلها عن المتوسط بعد بس بصراحه مالي خلق عمري...والله آنا اللي مصبرني أني جربت مدارس أسوأ وقاعده أسمع عن مدارس أسوأ وحتى المدارس الزينه واللي يقولون عنها ممتازه وقويه لابد تلاقين أحد يشتكي من شي...الله كريم

 

[حضاره]

ساء الخير امهات العالميه اشلونكم

00تشاتكم واصل الصفحه الثانيه00

اب لعيونكم

 

[mr000]

السلام... تسلمين حضاره.. الامهات لاهين بالعيال.. وريمان مادري وينها ردت اختفت

 

[bella bambina]

السلام أمهات
مشكوره حضارة عسى الله لا يخلينا منج
اللهم صلي وسلم على سيدنا محمد صاجه مروو كل المدارس فيها مشاكل بس يحق لنا نعرف ليش المدرسين ينحاشون من المدرسه ولدي كان من المفروض ياخذ سباحه من شهر 12 وكل يوم يودي الملابس ويرد يقول لي ما ودونا بعدين قالت لي بنتي ان المدرسه تركت المدرسة وليلحين ما خذو سباحه ومدرسين ولدج كل يوم يتغيرون واحنا نفس الشي لا وحلهم بيخلون مساعده مصريه تدرسهم !!!!!!!!!!! السنه أبلتين بدنيه طلعو من المدرسه وناظر الابتدائي انتقل ومدرس بنتي العام اشزينه ما كنت أحتاج أدرسها لأنها ترد البيت فاهمه سافر
والله حسافه يعني صايرين شطار دفعنا كل المبلغ اللي علينا السنه وحجزنا حق السنه اليايه :eh_s(14):

 

[mr000]

السلام امهات اشلونكم! صاجه بيلا والله شي يحر توه ولدي يكلمني من اسكتلندا يقولي الماستر باستراليا ب2000 دينار الجامعه قلتله الللله واحنا ندفع حق متوسطه واخرطي 2900 وسنه اليايه 3الاف وشوي ... مادري اصحاب المدارس علبالهم احنا نخم فلوسنا من الشارع!!آنا توني أقول حق ريلي حدي معاهم السنه اليايه ان شفت الوضع نفسه بنقله خلااااص

 

[Fouz]

السلام عليكم
شخباركم أمهات

مرو اللهم صلي و سلم عليه و صدقيني انا قاعدة أحاول ما أحر عمري و أقول ان شاءالله خيرة و الامور تتعدل بس اللي حارني انهم مو قاعدين يعطون مبررات مثل الناس، يعني انا لو ما بيلا قالت لي ان مس سومالي مشت والله ما عندي خبر، يعني لو انا والدة بالسلامة و غيري كان يوديها و اييبها جان من وين أدري شاللي يصير هناك، على الاقل يبلغونا يجتمعون فينا يوضحون اللي صاير
والله اليوم غصب طالعة من البيت بس قلت بعرف اللي صاير و شفت بيلا و قالت لي والله ضاق صدري و انا الحين ابي منو يشيل عني ما شاءالله العد التنازلي بدا و لازم أزهب أغراضي قبل لا أدخل شهري ، يعني وين فيني شدة عبالة و مداحر استغفر الله

أرد و أقول ان ماكو مكان كامل و حتى لو رحنا مدرسة ثانية شيضمن لي ما تصير فيها سوالف أردى من اللي احنا فيه، لان انتو الثنتين عيالكم بالمدرسة و ما شفتوا هالخلل الا هالسنة، معناته عندهم مشكلة و لازم يحلونها، الكل قاعد ينحاش لازم فيه سبب

الحين ماكو عندي الا أضعف الايمان اني أكتب كتاب حق نورة الغانم و أشوف شتقول، من أكتبه راح أحطه لكم علشان اللي يحب يكتب لها يكون عنده فكرة و كل ما زادت الكتب راح تحس بحجم المشكلة و سلامتكم

استغفر الله أول اذا دخلنا نسولف و نستانس الحين كلنا نشتكي لاحول ولا قوة الا بالله، عسى الله يعدي هالسنة على خير و الياي يكون أحسن من اللي فات

 

[Fouz]

بيلا و مرو خلونا نطول بالنا و نوسع صدرنا و ان شاءالله ربي يكتب اللي فيه الخير

انا أستأذن بروح أنام علشان يمديني أشبع نوم، تصبحون على خير و هذي ابتسامة

 

[ملكة بيتها]

شلونكم مامات ..حبايبي لا تكدرون خاطركم إن شاء الله التغيير يكون للأفضل يمكن هالمدرسين عليهم شكاوي أو كانوا بفتره تقييم إنتوا حاولوا تستفسرون من الإداره أفضل ...وطرت على بالي شغله يمكن تكون عقودهم انتهت أو شي جذي وهم مو حابين يظلون ..تفائلوا إن شاء الله خير

 

[mr000]

ان شاءالله ماكو الا كل خير بنطوف هالسنه بالطول وألا بالعرض وبنشوف شتقول المديره والله كريم! يعني شوفي هو فيه ايجابيات الواحد ماينكرها مثلا لما داوم ولدي وقال التيوتر سافر ورحت المدرسه كلمت السكرتيره قالتلي زين انج كلمتيني لأن بصراحه المدرس مرض وسافر بسرعه فماندري اذا فيه طلبه ماكمل حصصهم حسب الكونتراكت يعني لازم انتوا تقولون لنا وراح نحط لكم مدرس غيره وعلى طول تالي دقت علي قالتلي كلمت لكم مدرسه ثانيه وشنو الايام اللي تناسبكم... يعني بمدارس ثانيه يمكن مايهتمون وتطول السالفه أكثر... والله اذكر بمدرسة ولدي الأوليه دفعت حق التيوترينج حق الماث وكان بغريد 5 وراح حصتين ولااستفاد فوضى وطلبه وايد بالصف وكان وقتها نص السنه قبل الامتحانات وهذا قاعد يدرسهم مال اول السنه وولدي يقول ازعاج والمدرس ماله خلق والله ماراح عقبها وراحت فلوسنا!!

 

[ملكة بيتها]

صاجه مروو ..يعني المدرسه حريصه على مصلحه الطلبه وطالما الإداره تستجيب للأهالي فهذا يبشر بخير في مدارس كلش هالشي ما يدور عندهم هما بس الفلوس ووعود للأهالي من غير استجابه ..إن شاء الله هالسنه وهالكورس يتيغير للأفضل .

 

[mr000]

سلام امهات اشلونكم!آنا ليلحين مونايمه تونا رادين من المستشفى مودين بنت ولدي فيها حراره! وماجنه مستشفى خاص زحمه جدامنا 13 ياهل ولا اللي أخرنا بعد السالفه اللي صارت لنا يعني على حظنا قراده لما يي دورنا تونا بندش الا الناس اللي قبلنا وهم طالعين سكروا باب الغرفه حيل جان ينقفل الباب عالدكتور!!! وساعه وهم يعابلون فيه لاهو قادر يفتحه من داخل ولا الممرض قادر يفتحه من بره ولا نافع مفتاح ولادرنفيس و5 متكودين عالباب عالفاضي وريلي يقول ألحين بيي برفس الباب اكسره شنو هذا مستشفى مافيه فني صيانه يعني بالله انقفل على مريض بالغرف ماكو احد يطلعه وكنا خلاص تونا بنروح جان ينفتح الباب!يالله نشوفكم باجر عندي ساعه ونص انام بس!

 

[bella bambina]

صباح الخير أمهات
مشكورة والله ملكه على مواساتج وان شاء الله نكون متفائلين وكل شي يتغير للأفضل
مروو سلامتها بنيتكم ما تشوف شر واي الله يعينكم قاعدين بالمستشفى ليلفجر وصج كل المستشفيات صايرة خواره حكومه وخاص ونادر ما تلاقين دكتور فاهم والله لما الواحد يسافر صج يتحسر على مستشفيات الكويت

 

[Fouz]

صباح الخير أمهات، شخباركم

ملكة مشكورة على كلامج الطيب، و ان شاءالله الياي يكون أحسن

مرو ما تشوف شر بنيتكم، الجو ما يرحم الكبار شلون اليهال، الصبح برد موت الظهر حر جنه صف، بالبيت اذا ما شغلتي التكييف حر و اذا شغلتيه يمدة، و على قولة بيلا ماكو فرق بالمستشفيات خاص والا حكومة كله نطرة، اذكر من اسبوعين لما بنتي تعبت رحت العيادة الساعة 5 و جدامي 19 أقولها متى وصلوا ماشاءالله

بيلا شخبارج و شلون دلال، ان شاءالله نتفاءل لان القهر ماراح اييب نتيجة

ريمان و كاراميلا شخباركم من زمان عنكم

 

[bella bambina]

هلا والله فوز دلول تقول i am sorry miss somali left the school because i dont listen to her حسبالها اهيه اللي مطفشتها

 

[mr000]

بيلا وعليه كسرت خاطري بنتج مسكينه كله حاسه بالذنب كلما راحت مدرسه علبالها بسبتها!

 

[Fouz]

شلونكم أمهات

وعليه عليها دلال نفس الكلام قالته عن مس ميرنا حبيبتي والله قوليلها مو منج كا مس مروة تحبج يا حسرتنا عسى ما تروح مس مروة و تكمل السالفة هههه

مرو شخبارج و شلون بنيتكم عسى نزلت حرارتها و ما تحتاج مضاد

أبشركم اليوم شفت ريمان و سلمنا على بعض عاد حسافة بيلا كنت توني مسلمة على بيلا، ان شاءالله فرصة ثانية نشوف بعض

ريمان حرام عليج وين متينة، عاد تصدقين من زمان كنت أشوفج و أقول هالبنية ويها مو غريب علي أحس اني أعرفج دارسة بنفس المدرسة مادري بس أكيد شايفتج من قبل، عموما فرصة سعيدة و ان شاءالله تيي الفرصة نشوف كاراميلا و مرو

 

[mr000]

ريمان اشفيج عسى ماشر ماتدشين بس تطل وتطلع والله قمت احاتي اخاف زعلانه! فوز اشلون عرفتي ان هي ريمان؟واي اشمعنى آنا ماأشوف أحد عاد الظهر رحت أخذت ولدي بس حدي بالسياره!فوز والله قاعد نعطيها مضاد حيوي وماتخلينا وتجفت وحاله وتزوعه والله مشكله هاليهال! وأبوها توه يقولي تكنسلت طيارته وماراح يرجع باجر! بيلا حرام فهمي بنتج أن مو منها مسكينه! يقولي ولدي الكاونسلر طلعوه لأنه يخلي الصبيان يقعدون عنده ويفوتون الحصص قلتله ماعليك من حجي الصبيان هو وايد ستريكت وأصلا من العام كان يقول ماراح يظل هالسنه العام مره قالي الناظر وايد شديد ومو متفهم وعنده قرارات غلط والله الظاهر هو اللي مطفشهم!

 

[Fouz]

أهلين مرو
الف لا باس عليها و ان شاءالله تصير أحسن، و الله يعينكم على الادوية اذا الطعم ما ياز لهم يخلونج تينين على ما ياخذونه، و الله يرجع ولدج بالسلامة ان شاءالله
الله يسلمج بما ان ريمان عرفتنا انا و بيلا قلت لها اذا شفتينا تعالي لان احنا ما نعرفج، عاد اليوم و انا بطلع جان تيي يمي وحدة بنفس المواصفات اللي قالت عنها طويلة ماشاءالله و متحجبة بس ما عليج منها مسوية تمويه تقول متينة، و سلمت علي و سلمت عليها كلها ثواني و قلت لها ان شاءالله فرصة ثانية تتعرفين على بيلا لان بيلا كانت توها ماشية، و مرو انتي ما تشوفينا لان طلعة عيالنا الساعة 1 و انتو 2 و نص بس ان شاءالله يكتمل النصاب فيج و بكاراميلا
والله احتمال تكون وجهة نظرج صح ان الناظر منحش الأمة لان اللي قاعد يصير مو طبيعي، بس ان شاءالله نحصل الجواب الشافي

 

[ReeMaN]

سلااااااااااام امهات العالميه شخباركم ؟؟؟

مرووو انا والله مااختفيت كل يوم ادش بس المنتدى مو راضي يدز الكلام الظاهركلامي وايد قوي عليه ههههه كلام الملوك