قصتي الحقيقيه مع المرض .. تابعوني وادعولي قصه خاصه فيني (ام كتكوت)

[بطه فيها نطه]

اجر وعافيه يالغاليه ... طحنتي قلبي

الله يفرح قلبك ويشافيك ويثبتك على دينه ...

 

[رحاب]

لا حول ولا قوة إلا بالله​

 

[روزيتا]

فى تكمله؟

 

[شمع تحترق]

في وحده بركن الطلبات اطلبت موضوعج و انا مار اسمج على بالمول فسويت سيرج على اسمج و لقيت الموضوع


و ياريت ما لقيته صار لي 3 ايام ضايق خلقي عليج


حبيبتي قدر الله و ما شاء فعل

كملي ناطرينج يا الغاليه

و الكباريه كلهم بموضوعج عفستينا

 

[BlackRose]

كله اجر ياام كتكوت



ماكو بارت؟؟؟؟؟؟؟؟؟؟؟؟؟؟؟؟؟؟؟؟؟؟؟؟

 

[روزالكويت]

لاحول ولاقوه الا بالله
وربي شي عظيم اللي مريتي فيه موسهل ربي يثبتج ويخلي لج ابوج وامج وريلج وولدج ياعمري والله صج عورت قلبي القصه ..
ربي يشفيج ويعافيج يارب
ناطرينج تكملين على احر من الجمر

 

[FOZQ8]

واااي مووصج
الله يتمم عليج الصحه والعافيه ولا يعود ذيج الأيام
الله يحفظج انتي وعايلتج من كل مرض

ناطره نااطره التكمله

 

[أم منصـ 85 ـور]

ماني قادره أعلق .. قمت أشوف كل شي ولا شي جدام معاناتج .. الله يآجرج يارب ويخليلج وليدج وريلج .. وأهلج ..

 

[كويتيه مذهله 87]

ناطرييييييييييييينج

لا طولين

 

[وردة-الكويت]

ناطرينج ياقلبي

 

[ام كتكوت]

الجزء 14

والله بنات الممرضه قالت لي i will pray 4 u

يعني راح ادعي لج والله الحمدلله الكل يدعي لي محد قصر حتن المسيحيات يدعون لي

والحمدلله بنفس اليوم يانا قرار يديد انه فيه تمارين العصر بعد........

يعني توه هالقرار بس الدكاتره غير مو نفس اللي الصبح وان هالشي مو اجباري يعني على راحة المريض بس الصبح اجباري (بس اذكر رحت يومين وبس )

المهم قلت لزوجي ان فيه تمارين العصر قالي لاتضغطين على روحج بس انا محتاجه اني اضغط على روحي عشان اطلع بسرعه من الكابوس اللي انا فيه

6 شهور موشوي .... 6 شهور المفروض اكون مع وليدي

6 شهور خلاص اكون طالعه من الشر وارد لدوامي يعني خلاص خلصت اجازة الوضع والامومه

6 شهور بعضهم يحملون مره ثانيه وينسون الحمل الاول والولاده الاولى !!

وانا ليما الحين اكره سيره الحمل ................:0bee2e8d89:

الا على طاري الحمل .... تعالو انا لمن الحين مايتني الدوره ... تكرمون ....... متخيلين ؟؟؟؟؟؟؟؟؟؟؟؟؟!!!!!

6 شهور وانا والده وليما الحين مايتني الدوره لييييييييييييييش؟؟؟ شالسبب ؟؟؟؟؟؟؟؟؟؟ غريبه

انا اللي اعرفه بعد الاربعين تنزل الدوره تكرمون وانا لما الحين مانزلت صج ناسيتها

المهم قلت حق السستر ثاني يوم وهي تسبحني مثل كل يوم ............:eh_s(22):

قلت لها سستر ترى مافي دوره ( وينهم من زمان مايسئلوني ولا لاحظو هالشي )

المهم راحت يابت لي قوطي مال التحليل عشان اتبول فيه تكرمون عشان يتأكدون من ان مافي حمل


المهم وطلعت النتيجه وانا اتريق وقالو لي مافي حمل ......!!انا طبعا توقعت 200% مافيه حمل

يعني شلون بحمل عقب اللي صارلي اصلا جرح الولاده ليما الحين مفتووووووووووح والله العظيم مفتوح شلعوا روحي وهم يدخلون الفتايل ويلصقون بهالبلاستر لمن طاح جلدي

المهم

لمن يت السستر تبي تغير الجرح قلت لها ليمتى بيتم هذا الجرح مفتوح متى يلتأم وارتاح ؟؟

قالت ان شالله يلتأم ...... سألتني انتي معاج سكر...... قلت لها لا هذا اللي بقى ماصار فيني

المهم تخيلو بنفس اليوم طبعا تو الناس :eh_s(14):

قالو لي وصل دورج تروحين غرفه خصوصيه لج بروحج

: (

خصوصيه ....... بروحي .......... بروحي بروحي ....... ابتعد عن ام فهد ... وعن فلانه وفلانه ...... خلاص تعودت عليهم مابي اتركهم

فكرت شويه قلت لهم مابي الغرفه ابي اتنازل عنها لفلانه (مره كبيره بالعمر كانت تكسر الخاطر )

والمره استانست وايد ودعت لي والحمدلله يارب هي تستحقها اكثر مني لان وايد تتأذى بروحة الحمام تكرمون ومحد معاها بروحها

وتطورت حالتي ان قمت اقعد ع الويل جير بروحي

يعني يثبتون التاير بريك وانا اقوم بروحي ( مع الجبيره الصناعية طبعاااا ) واقعد بروحي ع الكرسي


الحمدلله كما يليق لجلال وجهك وعظيم سلطانك


وهالخطوه فادتني باشياء وايد ومنها اني قمت تكرمون اروح الحمام بمساعده خدامتي

وانتقل من مكان لي مكان بالويل جير بدل السرير : (

وبيوم رحت الجناح اللي قبالنا (( جناح الاطفال )) :0bee2e8d89::yaaaaaarb:

شنو اشووووووووووف شنو اشوووووووووف

هوايل

والله العظيم بنات اذا ماعندكم شغل روحو شوفو وطلووو على الاطفال وربي تحمدون الله على الصحه والعافيه الف مره

1- شفت توأم متشابهين امهم يابتهم مشلولين بسبب خطأ طبي وهدتهم وتخلت عنهم ومعاهم خدامه فلبينيه والله ارحم من امهم

2- شفت طفله مصريه ورب الكعبه تبجي تبي تمشي موقادره وانا اشوفها تترجى امها تمسكها عشان تمشي

3- شفت ولد صغييييير نايم مايحرك الا عيونه اول مانولد طايح على الارض ومنشل (الله يشافيه يارب)

شفت وشفت وشفت حالات تبجي حتن الصخر ....

وبالاخير مريت ولد كانو كاتبين عنه بالجرايد لقوه بالشارع قاطينه وهو استغفر الله شوي موصاحي

لمن دخلت

قالي انتي شنو اسمك؟؟

قلت له ام حسن

قالي انا احبك ام حسن

(يمكن عمره 9 سنوات )

وحاطينه بقفص مثل ال......... مسكين

يقولي افتحي السجن والله اعطيج من حلاوي : (

قلت له ماقدر حبيبي

جان يقولي عطيني موبايلج

قلت ليش ؟؟

جان يقول بدق على ابوي

(ماعنده ابو )

قلت لها اوكي مادري ليش كسر خاطري وعطيته التلفون



خمطه مني وقام يتعبث ويطقطق بالدقم بس دشت السستر حذفه وكسره

كسر خاطري والله شكله يعور القلب وهو بالقفص ايه والله قفص حتن كان لونه ازرق سماوي ماانساه وللبنات قفص وردي حديد طبعا

والاطفال يبجون من كل صوب موقادرين يمشووووووووووووون

اشوف الامهات يسولفون مع بعض وضايق خلقم على عيالهم ملولين يايبين هدومهم واكلهم وكل شي نفس ام فهد حتى تلفزيونهم يايبينه

واااااااااااااااااي

طلعت طلعت مابي ادش هني مره ثانيه ابي اعتبره حلم وخلاص بطلع من هالباب يتسكر مابي افتحه مره ثانيه

بس ماقدرت كل يوم ايدي تاخذني بدون شعووووور ايي وازور الولد : (

اللي مره خمط تلفوني ودق على رفيجتي بالغلط

رفيجتي اللي مادقت تسأل عني مره بالغلط

رد يكلمها يقولها منو انتي تعالي اخذيني طلعيني من اهني

:0bee2e8d89:

ترجيته يرد لي تلفوني الا لمن يت السستر انقذتني وردته لي ولا رفيجتي مسكرته حذفت رقمها من تلفوني ومن حياتي كلها

لان بنات وقت الشدات تعرفين منو اللي يحبج ومنو اللي مايحبج

رديت الجناح اير كرسيي بايدي تعبت وايد تعبت .. بس الحمدلله ايدي تحسنت وتعدلت بس مجرد الكهربا اللي احس فيها بكل ثانيه والخدور العجيب اللي فيها كأنه احساس لمن الايد تخدر شلون ؟؟ انا ايدي جذي 24 ساعه بس احسن من اول

رديت جناحي ولا فيه زوار من اهلنا

استانسو من شافوني اتمشى بدل لا انا نفس اول كله منسدحه

يايبين لي حلاو وككاو .......وسولفو معاي وراحو : (

وزعت الحلاو على الجناح كله

دخلنا شهر 1 صار يوم الاربعااااااااااااااا

يت المصريه اللي حفتني : ) قالت يابنتي خلاص اليوم راح ارجع لبيتي والحمدلله :eh_s(2):

خنقتني العبره والله تعلمت عليها شلون بفارقها ............!!

دقيت على زوجي على اساس اليوم الاربعا يوم طلعتنا

عشان الويك اند ......... ادق ..... ادق مايرد

ضاق خلقي لان مابي اضيع اي دقيقه من هاليوم داخل المستشفى ......

نطرت نص ساعه ودقيت

ماايرد : (

ساعه

ساعتن

صار المغرب

دقيت على بيتهم ردت خالتي جان تقولي والله نايم : (

قلت لها اليوم الاربعا ليش ماقعد

جان تقولي مايصير هم اهو تعبان خليه يرتاح شويه (انصدمت )

اول مره خالتي تكلمني بهالطريقه ضاق خلقي وايد صكت فيني الدنيا

بهاللحظه دق زوجي شتت الافكار

جان يقولي انا ماقدر اليوم اخذج !!!!!!!!!!!!!!!! وهاتك ياصياااااااااااااح ليش!!!!!!!!!!!!!!

وقعدت احن عليه والله ماانسى هاليوم صرخ علي


يقولي بس مليييييييييييييييت والله مليييييييييييييييييييييت

يالله متى تمشين رحمينا ......

ارحمك ؟؟؟؟؟؟ استغفر الله ....... الله كريم انا هذا اللي صارلي كله عشان ايبلك ولد يشيل اسمك : (

صبرت شويه قعد ادعي ربي يسخره لي خلاص هونت مابي اطلع بس لايقلب علي ويمل مني

بس الحمدلله دعائي ياب نتيجه شوي ولا الاقيه دخل علي

شفته جني والله ياهل شايف امه

شهقت قلت له وايد تأخرت مابي اقعد اهني

قالي ترى اروح اهون اخذج

قلت له خلاص اخذني وبرد السبت المهم رديت قلت له مابي اروح بيت ابوك اليوم امك زعلانه مني

بس لمن رحنا بالغصب طبعا خالتي حسيتها ندمت انها كلمتني وحسيت انهم متكلمين مع بعض والله بموضوعي

بهاليومين ماطلعت من الدار وانا افكر واحلم بالكوابيس

ورديت المستشفى مره ثانيه

للسجن

وهذي حالتي يقعدوني كل يوم نص الليل من عز نومي حق الضغط والحراره

كل يوم الصبح تسبح ... ريوق .. دوا ... تمارين .. ملل تفكير ... نوووووووم

لمن ياني الفرج


يالله


اي نعم الفرج ........... اوله ............

باجر ان شالله بقولكم شصار معاي عقب 7 شهووووووووووووووووووووووووووووور


والدم اللي شفته اللي خلاني ابجي من الفرح

اسمحولي بنات باجر اكمل واعطي الجزء حقه باذن الله

ولاتنسوني بالدعاء الطيب الله يعوضني من اللي شفته من ضيييييييييم ومشكووووووورين

 

[^kloOot^]

نااااااااطرينج




والله عواااااااااااااااااااااااااااااار قلب

 

[كويتيه مذهله 87]

ناطريينج لا طولين نبي الجزء طويل علشان تخلصين بسرعه

 

[FOZQ8]

أمبيه اليهال كاسرين خاطري ياربي الله يشاافيهم
انا ما حب جو المستشفيات واستغرب شلون في ناس دوامهم وكل يوم يشوفون اشياء تعور القلب
الله يعوضج خير وأجر وعافيه حبوبه ناطرينج باجر

 

[b6o6a]

اوكي ناطرينج

واي لما ريلج قال مليت

 

[مطيريه ماركه]

ام كتكوت ناطرينج لا تطولين هذاني قاطة كتابي ومقابلة قصتج

 

[ஹ ăli & řawan]

عواااار قلب كملي متااابعييييييينج وناااطريمج حبيبتي

 

[ام كتكوت]

مطيريه حبيبتي لاتزعليني منج عاد اهم شي دراستج امانه

بنات حبيباتي والله نهايه قصتي عجبه بس لاتنسون تدعوووووووووولي

اوعدكم قريب النهايه ... كلشي ولا زعلكم عاد

 

[مطيريه ماركه]

خلاص ام كتكوت بروح اكمل دراستي

كلللش الا زعلج

 

[srsr]

قصتج عواااار قلب باجر عندي دوام وتوني اشوف موضوعج فتحته وماقدرت اسكرة اللى لمن اشوف النهاية
الله يهداج جان كملتي القصة اكيد الحين بحلم بالباجي انا من النوع اللي يتاثر بسررررعة
بس اجر وعافية حبيبتي اللي صارلج موشويه والله سبحانه عطاج قوة تحمل كبيرة وهذا بحد ذاته نعمه من الله سبحانه
اللي مريحني شوي انج الحين قاعدة تكتبين لنا يعني اكيد انتي بخير انشاء الله اقص على روحي علشان انام الساعة الحين ثنتين ونص وانشالله اكون احساسي صح ومابقى على صلاة الفير شيء وبدعيلج حبيبتي من كل قلبي عسى الله يعوضج عن كل شيء حسيتي فية من الم وحرمان وخوف اوحشة وياس وكآبه مادري جني شخصت حالتج يمكن علشان تاثرت وايد وتخيلت نفسي مكانج بكل لحظة مريتي فيها عسى الله لايعودها من ايام
وناطرتج تكملين خليني ارتاح