تجمع اولياء امور مدرسة الخليج الانجليزية في السالمية

[روحي تحب]

وبالنسبه للموضوع اللي طرحته عاد ويه جني حرقت الموضوع ناويه انزله بشكل موضوع بعدين علشان كل الامهات يشاركون بس ماعليه


بالنسبه لي لانه وايد من اهل ريلي ورفيجاتي توه السنتين اللي طافوا نقلوا عيالهم من الخليج للمدارس الامريكيه بس علشان تكون الهاي سكول اسهل عليهم وماعندهم ولله الحمد اي مشاكل فكان عندي عادي بالنسبه لي علشان جذيه وديت ولدي السنه اللي طافت للعالميه وكنت ابي انقله اهو واخته بنتي متقبله عادي اما ولدي لأ وعيالي اثنينهم تنطبق عليهم الشروط وولدي امتحن وياب نتيجه بس موراضي ينتقل يمكن اذا كبر يرضي بالنسبه لي غلطت لما ماسالت قبل لا اسجله عن الفرق بالنظام لانه اصلا وقتها كنا تونا راجعين من بريطانيا وبنرد نسافر محنا عارفين امورنا كعايله والمدرسه الوحيدها للي قبلت ولدي اهي الخليج لانه رجعنا شهر 8 وكانوا ببلشون الدراسه واغلب المدارس مخلص تسجيلها والامريكيه مداومه اصلا فماكان الا اني اتقبل الواقع ومشت الايام ولانه حتى الريسبشن اضطرينا انه نسافر لفتره و ييت بعدها بنقله زوجي عيا وقال خليه واذا تخبط نقليه لانه اللي اعرفه الامريكيه اسهل بوايد كنظام المهم ولدي ولله الحمد ماشي وماعنده مشاكل ولو انه شوي بدا يعر بس اخاف عليه من مرحلة الهاي سكول اخاف يتخبط وما اييب معدل مثل وايد ناس نعرف عيالهم والسبه النظام البريطاني مثل الثانويه العامه اما الامريكي مثل المقررات قبل اذا تذكرونه هذا اسهل تشبيه الضغط بالسنه الاخيره على الطالب بالبريطاني مثل العامه

اما كاهتمام وانضباط وشده على الطلبه بشهادة الكل يقولون انه البريطاني افضل

والحين آنا مخليه ولدي بس افكر بالمستقبل واخاف اذا كبر يصير الموضوع اصعب واصعب

وبس دوختكم وآنا موكله امري لله والله مايخيب رجاي ويمشي ولدي وما احتاج اني انقله

وسلامتكم:33_1185028183:

 

[mr000]

سلام أمهات الخليج اشلونكم! روحي تحب ان شاءالله لي مشاركه بموضوعج بس خل أروح أنام شويه وأرد أشارك أخاف ألحين أقط خيط وخيط من التعب!

 

[عزيزتى]

روحي تحب -- انا نفس حالتج مرة اقول انقلة ومرة اقول حرام ينزلونة سنة وصاجة بتشبيهج للثانوية العامة فعلا نفس نظامهم
من 8 تبدى توضح الصورة وتشوفين المواد كيمياء فزياء احياء تاريخ فرنسي ----- احس وايد مواد بس من 9 يبدون يختارون
المواد وانا قريت شروط جامعة الكويت يبون 8مواد للتخرج 5منها مواد عليمة غير الماث علشان يعدونهم قسم علمي
ويجمعون درجات ال8مواد بعدين يقسمونهم على 8 علشان يحسبون المعدل
وحاطين كل تقدير ودرجتة a=95\b85وعليج الحسبة
يعني لازم يشدون حيلهم واييبون امتيازات علشان المعدل
هذا على حسب الي فهمتة وياريت ام مشعل توضح لنا بعد علشان الكل يستفيد

 

[عزيزتى]

روحي تحب == بالنسبة حق امتحان الدين انا بركز على الدروس الاخيرة واراجع الباجي
بس لاحظت شغلة ان المعلومات تكون في مخهم بس مايفهمون صيغة السؤال خاصة علل مع اني اقولة اذكر السبب \قول ليش
ابسطها له بس بالامتحان ينسى ويجاوب شي ثاني

 

[mr000]

سلام أمهات الخليج! سوررررري نسيت الموضوع كلش! آنا اليوم المغرب كنت أكلم مرت أخوي بنتها بمدرسة الكويت الأنجليزيه بغريد5 وتقولي أنه وايد هومووركات وباجر عندها امتحان عربي ودين بنفس اليوم وأنهم بالمدرسه ألحين قاعد يسوون لهم ريفيو حق الأختبارات بس بشكل عام النظام محتاج دراسه مركزه! المهم النتيجه اللي وصلتلها وتناقشت مع ولدي فيها بخصوص بنته أنه بصراحه النظام الأنجليزي قوي وممتاز بس مو كل طفل يقدر عليه أوكي يقدرون وينجحون وبعدين بالثانويه اشلون ماكو فايده أذا ماتتخرج بنسبه عاليه تدخلها كليه زينه أو تخصص زين وبعدين اللغه القويه مطلوبه يعني بنت أخوي ماعندها مشكله لغتها الأولى انجليزي ماتعرف حتى تتكلم عربي لأن أمها موكويتيه بس اللي مثل عيالنا أعتقد صعب عليهم! ماأدري أحنا بدينا نتفق على أنه يدخلها أمريكيه من الكي جي وخلاص ولاندخل بمتاهات النقل من نظام لي نظام ولاينزلونها صف وبعدين حتى لو التأسيس قوي ليش نعرضها لضغط زياده بالدراسه والهوم ووركات من الأبتدائي! مادري هذا رايي وياريت تفيدوني من خبرتكم وتجربتكم مع عيالكم يعني أذا كانت مو بالصعوبه اللي آنا متصورتها ومايحتاجون مجابل وايد ياريت تعطوني فكره لأن ولدي شكله متردد وحاب النظام الأنجليزي!!

 

[دلوله المزيونه]

ولدي كان يمكان هههههه في مدرسه يغشون في الربورت على ان المستوى ممتاز اوجيد جدا اكتشفت ان المستوى ضعيف من خلال امتحانات قبول في مدارس بريطانيه لما شفت ان مدرسته اكثر الوقت ست فري علمت اولياء الامور الي كانوا غافلين وفعلا الاكثريه انقلوا من المدرسه اعذروني عن اسمها وانقبل بفضل الله بالمدرسه هذي بعد التقويه في العطله ولحد الان وانا في دوامت التقويه للسنين الي فاتته ومعاي امل انه راح يتقوى باصراري وحبه لان يتعلم والمدرسه لها دور لكن ولدي قلبه يحن لمدرسته الاوليه وهذاشي عادي موافقيني بالراي ومع هذا محتاجه مدرس ساينس لاني تعبت بالتدريس وماافهم لتدريس الساينس ولي عندها رقم مدرس مشكوره لا تقولون من المدرسه لان عندي للانجليزي اشرايكم بقصتي مادري ليش مااشبك على وقتكم ولكم حبي

 

[lyale]

السلام امهات الخليج جميعا ومرووو خصوصا ورحي تحب انا بعد ولهت عليكم
بصراحه الموضوع حلو وبتكلم بالي اعرفه انا مجربه مدرستين مدرسة عيالي سابقا الانجلش بلاي قروب نظام انجليزي ومدرستهم حاليا الامريكيه ثنائية اللغه وهي نظام امريكي وثنائيه فا وايد صعبه شايفتها لان المواد مكثفه بالعربي والانكليزي وياخذون التربيه الوطنيه بالعربي ومادة الهيستري بالانكليزي وبيبلشون الكورس الثاني معاهم فرنسي وامتحانات وكويزات كل اسبوع فا صعب وحتي النظام الامريكي والانكليزي في مدارس قويه ومدارس ضعيفه
وهمم عندي اختي بنتها بالخليج واخوان زوجي سابقا بالخليج وهم واحد فيهم ما كمل الثانوي من صعوبتها
وبالنسبه للمدارس اذا كان فيها مدرسين متخصصين ومنهج قوي اكيد بتكون المدرسه القويه
وبالنسبه للبلاي قرووب مادري المدرسه احبها بس قدر الله وماشاء فعل المهم اما مر يمها يحوشني احساس قريب وهم عيالي واااااااو مدرستنا القديمه ويتذكرون اهما كانو باي قرووب وليومكم يحبونها وهذي ميزه ان حببت عيالي بالدراسه
وعن النقل من مدرسه لمدرسه بصراحه ما دري يضر الطفل احيانا وبتتعبين معاه حتي لو المدرسه الي راح ينتقل لها اضعف مثلا من مدرسته حراام ينتقل الياهل من مدرسه قويه وهو ماشي فيها الي مدرسه اسهل علي قولتكم لان بنظري احنا دخلنا عيالنا خاص علشان يستفيدون موو علشان يمشون وبس فالاختيار لازم من البدايه يكون صحيح علشان ما تحتارون بالنقل بعدين ويظل النقل لظروف قاهره فقط

 

[روحي تحب]

سلام امهات ومشكورين كلكم حبايبي على التفاعل

شوفوا آنا ما اقدر احكم ليلحين بس امس سالت وايد ناس نقلوا عيالهم وقلتلهم عندكم مشاكل قالوا اللي نقلوا ماعندهم مشاكل لانه عيالهم موافقين عادي بس اللي نقلوهم ثنائية اللغه مثل دسمان ابتلشوا بالعلوم مايعرفون خصوصا انه بالعربي اما اللي راحوا امريكان عاديه مثل العالميه والدوليه يقولون ماعندهم مشاكل الا بالانظباط لانه الامريكيه شوية تسيب ووحده السنه خريجه تقولي خالتي آنا اهلي نقلوني من year8 الحين قلت حق اهلي نقلوا خواني ابجر احسن وتقول وايد حبت النظام الامريكي اكثر من البريطاني تقول قلت ليش اهلي ما دخلوني من زمان بس هم النظام البريطاني علمني على الانظباط وبالنسبه لخوانها الاولاد بالذات وطبعا حست بفرق عقب الbsk لانهم وايد شديدين

بالنسه لي عيالي ماينزلون سنه على حسبة النظام الامريكي وهذا شوي يشجع وكل كلامكم صح من واقع تجاربكم وتصدقون بالاول والاخير يعتمد على الطالب

ليال ....وصاجه والله بس صارت غصبن علي مو بكيفي وهذا درس لازم كل ام تتعلم منه انه تاخذ قرار من البدايه علشان تتحاشى هذا الموضوع ..وآنا وايد متحسفه احس عيالي بيتحملون غلطة الظروف واختلاف الراي بيني وبين ابوهم

عزيزتي ...اي والله صاجه صيغة الاسئله وايد صعبه ولدي خاره بالامتحان والسبه ماكان حافظ صيغة الاسئله مثل الكتاب كان حافظ الشرح اللي المدرسه عطته اياه بالكلاس ويختلف عن الكتاب والله يسهل انشاء الله على المرحله اليايه

اما بالنسبه للموضوع والله يا اختي الدنيا كل مالها وتصير صعبه جامعة الكويت صايره ماتبي تقبل احد صار الاتجاه كله للجامعات الخاصه ما ادري شبصير على عيالنا بوقتهم

مروو .. وليش ولدج حاب النظام البريطاني ؟؟

بس شلون ما ابي اظلم عيالي الباجي ولانه صعب يكون عندي كذه واحد بمدارس مختلفه وبنظام مختلف

يعني اقارن بنتي بعيال رفيجاتي اللي بالعالميه بنتي مرتاحه اكثر بالنسبه للواجبات بس هذيلاك مستمتعين اكثر لانه الاسلوب مختلف احنا كله جد وهم داخل اللعب بالدراسه فمستمتعين اكثر منها ومقوين شخصيتهم بالبرزنتيشن والبروجكت

واي صح تذكرت شغله حماتي الحين بنتها بمدرسه بامريكا تقول لما ترد بتدخلها بريطاني قلتلها ليش تقول اقوى وجربت الامريكي ماينفع لبنتي كله بتلعب ويبيلها شده شفتوا شلون اقولكم يعتمد على الطالب

ورفيجتي توها ردت من امريكا بناتها الثنتين بجريد 1 و2 دخلتهم bsk هم تقول ابي انظباط عقب امريكا وتسيبهم وتقول لدرجه انه عيالي تعلموا يراددوني تقول المدرسه بامريكا تقولها انتي ليش مسيطره على بنتج وايد وتخلينها تخاف منج وتحسبلج حساب خليها تعبر عن رايها الحر وتقولها حتى لو تطقج عادي لما تكبر تتعلم انه هذا غلط عاد رفيجتي ههههه تقول شصبرني ليهمتى بصبر لما يصيرون ب6 يعني تقول كلش مافي لاتربيه ولا ادب طبعا هذا ماينطبق على اللي بالكويت بس حبيت اسولف لكم عن تجاربهم وقراراتهم


وسامحوني وايد طولت عليكم شسوي احب القرقه خصوصا بهالموضوع اللي مازمني

 

[mr000]

السلام عليكم اشلونكم أمهات الخليج!روحي تحب بالنسبه حق موضوعج وسؤالج ليش ولدي حاب النظام البريطاني الله يسلمج هو أول سنه بالجامعه دش هندسه تالي حول طب مساعد مع انه شاطر وماشي بالهندسه بس شنسوي بالعيال يقول مورغبتي وانتوا ضغطتوا علي المهم ان من ملاحظته لطلبة المدارس الاجنبيه اللي كانوا معاه سواء بالهندسه أو الطب لأن كان ياخذ مواد تشريح وغيرها من كلية الطب يقول أغلبهم من مدارس بريطانيه وشطار بس مو كلهم يعني قصده مو كل المدارس طلبتهم شطار بعضهم بس اللغه مساعدتهم لأنه درسوا بالأنجليزي ومواد الأحياء والفيزيا والكيميا هم دارسينها بآخر سنه بالثانويه فسهله عليهم بس بنفس الوقت كان معاه طلبة مدارس اجنبيه يقولي والله ضعاف بالرياضيات والفيزيا كان ولدي يقعد يشرح لهم اشلون يحلون المسائل وبعضهم حتى ماقدروا يكملون وحولوا كليات ثانيه يعني بس كانوا أقوياء بالأنجليزي وطبعا هذا يوفر عليهم وقت بالدراسه يعني آنا ولدي بقى يدرس طب بالخارج بس ماصار أبوه مارضى لظروف وهو رفض يدرس طب بالكويت وطبعا كنت قبلها من المتوسط وآنا كله أدخله معاهد انجليزي على أساس أنه بيدخل طب وبيدرس بره فكان قوي بالأنجليزي ومع هذا حاشته صعوبه بالجامعه كان يسهر طول الليل علشان يترجم الدرس ويفهمه تالي يحفظه وهذا ياخذ من وقته وايد وعنده بحوث وهوم ووركات وامتحانات فهذا جهد مضاعف بينما طلبة المدارس الخاصه ماعندهم مشكله باللغه ولا ابلمواد العلميه اللي درسوها بآخر سنه بالثانويه علشان جذي هو يقول ودي بنظام بريطاني بس مثل ماقلتلج مو كل المدارس مستواها قوي وأكيد في مدارس أمريكيه هم قويه وطلبتها يدشون طب وهندسه وهو بالأول والأخير يعتمد على جهد الطالب حتى لو ياي من الحكومه!يعني آنا ماأقلل من شأن المدارس الأمريكيه! وآسفه عالقرقه! يوم القرقه العالمي

 

[روحي تحب]

هلا مروو ....يالغاليه والله احلى قرقه وحلوه يوم القرقه العالمي هههههه والله انتي ماتدرين انتي شلون غاليه عندنا ومشاركاتج تفيدنا كل يوم اكثر واكثر بحياتنا ولا هانوا باجي الامهات بس لانه بحكم خبرتج الله يعطيج الصحه والعافيه يارب ويعينج ويعينا على تعليم عيالنا
الله يخليلج وليدج ويبلغج فيه انشاء الله ويطرح فيه البركه اهو وعياله يارب وتشوفين حفيدتج خريجه وعروس بعد
وصاجه والله بكل كلمه قلتيها ومعلومات مفيده لنا والله......والله يسهل على كل عيالنا يارب

انزين آنا ملاحظه شغله وهالسؤال لكل الامهات شلون شايفين عيالكم بالآكسنت بالنسبه لي ولدي يوم كان صغير كنا بفتره ببريطانيا وكان بالkg فلته حق اللي بعمره اما السنوات اللي بعدها صار عادي والسبه انهم مايتكلمون بالمدرسه انجليزي واغلب الطلبه كويتيين وعرب فما يمارسون اللغه مثل بعض المدارس بصراحه استغربت كلامه ونطقه مافيه اكسنت نهائيا سالته يقول المدرسه بس تعدل لنا اذا نطقنا غلط بس عادي طول الوقت نسولف بالكويتي اما بyear1 لأ كانت المدرسه تجبرهم يتكلمون مع بعض انجليزي والسنوات اللي بعدها المدرسين مو مهتمين حق هالمسلئه فانتوا شرايكم تهمكم هالشغله ولا لأ بالنسبه لي تهمني وقاعده احاول معاه انه يقوى محادثته برا بس بصراحه ماشاءالله يفز قلبي واسمي على بعض عيال المدارس الامريكيه لما اشوفهم يتكلمون بآكسنت امريكي صج البرتش صعب ادري بس على الاقل نحس انه عيالنا لغتهم الاجنبيه قويه لأ آنا ماعندي هالاحساس بس يقوونهم بالقراءه يعني ماشاء الله بالقراءه قوي بعد تقييم مدرسته

(بصراحه راح تضحكون علي بس بقول اللي بقلبي من يوم آنا صغيره وآنا امنية حياتي عيالي يكون الآكسنت مالهم مثل طلال الياقوت ) وعلى قولته يقول عيالي كلهم بمدارس حكوميه بس اللي يسمعهم يتكلمون يقولون كانهم بامريكا يعني المدرسه مو حكم والله ما ادري )

صج يوم القرقه العالمي الحين اللي يشوف مشاركاتي يقول هذي شفيها اليوم :krkrkr:

 

[lyale]

روحي تحب شلونج انا بالنسبه لعيالي بمدرسة الامريكيه ثنائية اللغه والعلوم يدرسون بالانكليزي سينس وما عندهم مواد عربي الا العربي والاسلاميه القران والتربيه الوطنيه واضافه عليها هيستري بالانكليزي والماث والسينس والانكليزي مادتين ريدنغ ورايتنغ ووايد مكثفين علي الانكليزي وفرنسي بعد يبدون معاهم من قريد ن
بس رفيجتج حاطه عيالها باي مدرسه الا يقول لها اطق الام عاديي هذي وين بالضبط

 

[روحي تحب]

ليوله ...هلا والله حبوبه والله حبوبه مدرسه دسمان اللي قالولي العلوم بالعربي

وبالنسبه لأي مدرسه رفيجتي توها يايه من امريكا ومدرسه عيالها هناك مو بالكويت الحمد الله تقول شفت العجب منهم خربوا بناتي علي تقول آنا بالبيت اربي ويردون من المدرسه متغيره كل مفاهيمهم عاد والله هذا كلامها والله الشاهد علي

اما حماتي الحين هم بامريكا ما صادفتها مشكله مثل رفيجتي

 

[lyale]

اي صاجه يمكن لان المدرسه بامريكا وبتكون مخلوطه مع الطلبه وشوفي طلبتهم من اي بيئه يايين اساسا المجتمع الامريكي يختلف عن المجتمع الكويتي بالمفاهيم فا شلون اذا مراهقين وسن حرج بيتاثرون بعض
اي دسمان غير عن مدرسة عيالي نظامها تراا في اختلاف بين المدارس مدرسة عيالي والبيان السينس بالانكليزي

 

[دلوله المزيونه]

السلام للجميع

 

[ملكة بيتها]

شلونكم أمهات ،،،يوم القرقه العالمي ولا دريت ؟؟؟؟
مروو يالغاليه شلونج وشلون ولدج الله يحفظه ؟؟؟ يا حلو قرقتج وكلامج مروو أنا أرتاح لكلامج اللي يطمن لأنه مبني على تجارب اللي حوليج وخبرتج مع أولادج والحلو بكلامج دايما إنج تسوين مقارنه بين النظام البريطاني والأمريكي بس مقارنه عادله لكل نظام يعطيج العافيه حبيبتي
وربي يوفق ولدج وحفيدتج وتفرحين فيهم
ليال شلونج حبيبتي وشلون عيالج وشلون دوام ولدج اليوم ؟؟؟ ليال أنا مثلج بنتي كانت بالبلاي جرووب وهي كمدرسه أنا كنت أحبها وبنتي كذلك والحين بنتي تاخذ نفس اللي كانت تاخذه بالكي جي 2 عندهم بالنسبه للماث واللغه كانت تعرف الساوند للأحرف كلها ونفس الشي كانت تقرأ قصص عندهم بس كانو أسبوعيا والقرآن حافظه أغلب قصار الصور اللي الحين تاخذهم وكان عندهم كتب للماث والعربي واللإنجلش يعني مو ووركس بيبر يعني في منهج ماشين عليه عدل ...بس بنتي الماث تكروت عليها لأنهم ابتدوا بالجمع والطرح بعد الكورس الثاني فماكان عندهم مدرسه بس كان عندهم المساعده اللي بصف هي اللي تشرح فأحس بنتي شوي الحين الماث كانت شوي واجهتها صعوبه فيه بس الحمد الله الحين أحسن
روحي تحب ..شلونج يالغاليه ؟؟؟ بالنسبه للأكسنت أحس بنتي وايد الأكسنت تحسن عندها وربعها صج عرب بس يتكلمون بالانجلش على طول حتى لما يكونون بالبريك وقامت تتكلم معاي بالإنجلش على طول ...وأنا أحب الأكسنت الإنجليزي أحبه من قبل كنت أتابع مسلسلات إنجليزيه على البرنامج الثاني (ولما اسمع أحد يتكلم بريتش أحس ببروده وورد وردي وجو لندني .....أقول الحين ضحكي )

 

[mr000]

سلام أمهات الخليج اشلونكم! بعد عمري روحي تحب من طيبج والله ماتقصرين والله يوفق عيالج ويبلغج فيهم! الله يسلمج بالنسبه حق اللغه والأكسنت والله ولدي ولا جنه بمدرسه أجنبيه أول شي لأنه مدرسته اللي كان فيها بالحضانه والروضه لي ثانيه ابتدائي كانت ثنائيه و تأسيسها مو قوي ومدرساتهم أغلبهم عرب تالي راح مدرسه ثانيه طلبتها 99% كويتيين يعني لي غريد 6 ماكو تركيز وايد عاللغه ولا الأكسنت! من ناحية الفرق بين النظام البريطاني والأمريكي بالشده والأنضباط آنا أسمع أنه النظام البريطاني ستريكت أكثر بس ماأدري هل هو بس بالتدريس وألا حتى بتعامل المدرسين والأداره مع الطلبه ! آنا شخصيا لاحظت بمدرسة ولدي العالميه المدرسين يسولفون مع الطلبه ويتغشمرون معاهم بس مو تسيب وألا فوضى بالدرس لا والله عندهم ديتنشن على كل شي!بس من ناحية سلوكيات الطلبه والله صدقيني على تربية الأهل مو المدرسه اللي تحدد سلوك الطالب لو تشوفين ولدي ولا كأن طالب مدرسه أمريكيه نفس أخوانه اللي درسوا بالحكومه حتى مره السكرتيره تقولي الطلبه عندنا عادي يطلعون مع بعض بالويك أند بنات وصبيان قلتلها لاأحنا مانرضى بهالشي!بس اللي عايشين بره الكويت الله يعينهم على تربية عيالهم هناك سواء بأمريكا أو بريطانيا لأن اسلوب تربيتهم غير والحريه والأنفتاح اللي عندهم حتى بريطانيا تغيرت بالسنوات الأخيره عن قبل 15 أو 20 سنه وهالشي لاحظته بسفراتي وأعرف وحده عايشه مع زوجها هناك تقول وايد صعب تربية عيال مراهقين هناك مع أنهم متدينين وملتزمين وتودي عيالها كل أحد مدرسه اسلاميه بس هم خايفه على عيالها وخاصه البنت عمرها 17 سنه يعني لما تمنعها انها تروح حفلات عيد ميلاد أوكريسمس لأن الحفلات مختلطه البنات يشيشونها ويقولون لها أنتي كبرتي ليش أهلج يتحكمون فيج وليش ماعندج بوي فريند تصوري حتى المدرسات يقولون لها أنتي خلاص وصلتي الجامعه طلعي بسكن منفصل عن أهلج!

 

[mr000]

ملكه سوري توني أشوف ردج اشلونج شخبارج حبيبتي والله تسلمين والله يخليلج بنيتج! مو آنا الله يسلمج على ماأكتب جنه موضوع تعبير وبطيئه بالكتابه وعلى ماينزل الرد ألا 10 مشاركين ومسولفين مع بعض وقاعد يتناقشون بموضوع غير وآنا داشه عرض! ميخالف الكبر شين! عاد والله توها الفلبينيه اللي بستاربكس مذركير تسألني هذي بنتج عن بنت ولدي قلتلها لا حفيدتي تقولي ماأصدق انتي still young قلتلها الله يجبر بخاطرج!!

 

[ملكة بيتها]

هههه مروو حبيبتي ضحكتيني على سالفه عشر يسولفون على ما ينزل الرد وبعدج شباب لا تقولين شذي شوفي أنا مو كبيره وايد ولا صغيره وايد وسط وأنا أصلا كل من يشوفني يصغرني 10 سنين هههه بس مره كنت مع أختي اللي أصغر مني بسنتين وهي كانت حامل بعد وكانت تجهز حق ولادتها وكنت مشتطه معاها ههه الفلبينيه تقول حق إختي إنتي ماما وايد زين حسبالها أنا أمها شنو حسرت فيني خخخخخخخخ لأن الله يسلمج أختي بعد ما تعطينها عمرها لازم تشيلين 20 سنه من عمرها إحنا بنات الكويت جذي ما أدري ليش كلنا ما تبين علينا السنين وإن شاء الله نظل دوم جذي ما يبين علينا

 

[روحي تحب]

السلام امهات ياحلوكم وياحلو سوالكم

ملكه...هلا فيج يالغاليه بخير حبيبتي دامج بخير عاد تصدقين توه كنت بسجل بنتي الصغيره بحضانة ببلاي جروب ووناسه لما شفتج انتي وليال تمدحونها بس متردده لانها صغيره عمرها سنتين وشوي

والله فرحت يوم قلتيلي انه بنتج تحسن الآكسنت عندها الله يتمم عليها يارب ويتحسن اكثر واكثر والفال لبنيتي بس آنا بنتي لأ والله ضايق خلقي اصلا قامت تتكلم سوري مرات تقولي بكره يعني باجر ومصري تقولي عربيه يعني سياره ههههه ومايتكلمون انجليزي بالبريك مع بعض اما بالنسبه لي ماعندي اي مشاكل ولله الحمد بالنسبه للدراسه يمكن بس شوي مرات بالعربي كنطق الحرف بس لانه بنتي اصلا ماكانت تتكلم عربي صح كله انجليش والحين تعدل كلامها الحمد لله وبصراحه بشهادة مدرسة العالميه لما شافوا مستوى بنتي بالريسبشن قالولي اللي تاخذه احنا عيالنا ياخذونه بجريد 2 حتى انتقدوا النظام البريطاني انه ليش جذيه يضغطون على الطالب وحشي معلومات وبس قمت قلتلهم بالنسبه لنا عادي لانه الياهل مخه نظيف وممكن يستوعب عادي الا اذا اثبت انه هذا النظام فوق طاقته ومستواه ذيك الساعه الاهل لازم يتدخلون مبجر علشان ماتضيع سنينه

وعلى طاري آكسنت البريتش يحلوج والله اي والله حتى آنااحبه ويذكريني بريحة لندن بس احس صعب على عيالي انهم يضبطونه حتى لما عشنا فتره هناك آنا وريلي نحاول نلقط بعض الكلمات ننطقها مثلهم نقوم نضحك على بعضنا شلون نقلدهم وهم ماكنا نقدر هناك لانه في لهجات مختلفه على حسب مثل السكوتلنديين بصراحه غصب الحق علشان افهم ههههه

وكل وحده فينا اكيد عندها احلام وآمال فحياتها حق عيالها تبي تحققهم زي حلاتنا خخخخ يعني على سالفة المسلسلات وآنا طلال الياقوت وماادري شبيطلع وياي بالمستقبل بعد خخخخخ

 

[روحي تحب]

مروو .... يالغاليه والله انج صاجه بكل كلمه تقولينها

الله يحفظ وليدج انشاء الله ويبلغج فيه ويبعد عنه عيال السوء

والله يتمم عليه ويحفظه لج انشاء الله والله يعطيج الصحه والعافيه و توج صغيره عادي آنا اختي عمرها 39 وعندها احفاد محد يصدق ترى لما يشوفها ماشاء الله جنهم خوانها و موشرط بالعمر والاهم من هذا كله روحج الطيبه حتى الفلبينيه عرفت تقدر صح ههههه

وعلى قولة ملكه اي والله الحمد الله الكويتيات دايما يبينون اصغر من عمرهم ياحلوكم والله