تجمع اولياء امور مدرسة الخليج الانجليزية في السالمية

[دلوله المزيونه]

روحي تحب وعزيزتي مشكورين على الترحيب وهلا فيكم اكثر والله انا عندي في year 6 واليوم توزع الربورت وحده ضاق خلقي من الدرجات لكن الصج اني ما درست الا اخر الايام للامتحان لان كله لاهيين بالهوم وورك والاسبلنك مسكين العربي والتربيه الاسلاميه غافلين عنه لكن اظن المدرس مايوصل مادته للطلبه لان اكثر جهد لازم منه والباقي على الطالب في البيت

 

[ملكة بيتها]

دلوله المزيونه ....حياج الله بالتجمع ما عليه حبيبتي هذا أول تقرير إن شاء الله التقارير اليايه تكون أفضل وربي يوفق عيالج .

 

[mr000]

سلام أمهات الخليج اشلونكم!ملكه شخبارج! دلوله المزيونه آنا ولدي بنظام أمريكي مو انجليزي غريد8 بس كلهم يبتدون يصعبون من غريد 6 فالله يعينكم أنتوا ميخالف لايضيق خلقج! آنا لما كان ولدي بغريد 6 ييت مدرستكم بقيت أنقله بس كان بشهر 10 يعني بعد شهر ونص من بداية الدراسه وسووله اختبار وانقبل بس آنا هونت لما قالي ترى راح تشوفين درجاته تنزل لأنه مومتعود عالنظام الأنجليزي وبعدين عندهم بغريد 6 اختبارات توصل من بريطانيا بنهاية الفصل الأول وتتصلح هناك ويدزون لهم النتيجه وعلى أساسها الطلبه يتوزعون على الصفوف حسب مستوياتهم بس مافي رسوب يعني مايعيد السنه فأذكر قالي أنهم يختارون أحسن المدرسين حق غريد 6 والمدرسين يبذلون جهد كبير في تدريس الطلبه ويعطونهم هوم ووركات واختبارات وايد بالحصص علشان يقوون مستوى الطلبه لأنه الأختبار ياي من بريطانيا وهذا تحدي بالنسبه لهم يعني قصده أنه مايبون تطلع نتايج المدرسه موزينه وقعد يقولي عن نتايج المدرسه بالماث والساينس والأنجلش مقارنة بمدارس بريطانيا اللي امتحنوا نفس الأختبارات معاهم والله نسب مدرسة الخليج مرتفعه ماشاءالله كله85% و87% بس الأنجلش جنه بال70% وهو بنفسه يقول أن هذا شي طبيعي لأنها مو اللغه الأولى للطلبه يعني زين منهم !ونتايجهم دليل على أنه مدرسينهم تدريسهم قوي! ومن ناحية العربي والدين ترى الحال من بعضه حتى ولدي جذي لأنه بصراحه ماكو وقت حق العربي والدين يادوب يكتب الواجب المواد الثانيه ماخذه كل وقته وترى أغلبية الطلبه بالمدارس الأجنبيه مستواهم جذي بالعربي لأنه هم بعد تدريسهم مو قوي مثل الحكومه بالعربي يعني الغلط مو من عيالنا!!بس العبره بالنهايه يعني ان شاءالله تشوفينه تالي بالجامعه الدراسه وايد سهله عليه بالمواد العلميه اللي بالأنجليزي مثل الهندسه والطب والكمبيوتر لأنه تأسيسهم قوي ولغتهم قويه!

 

[mr000]

الله ياآنا قرقه توني أشوف الرد اشطوله! ميخالف عذروني انسى نفسي لما أكتب!

 

[عزيزتى]

يا حلو قرقتج مروو
صاجة العربي والدين اهما الضحية ما في وقت لهم
بعد لما يكبرون وتزيد موادهم احس مايمدي يحلون شي رغم انهم من 7يخففون الواجبات وايد لانهم يحتاجون وقت للدراسة
انا هالسنة لاحظت ان الكيميا والفيزياء الي يبدون فيهم من 8نفس الي درسناهم في الثانوي تشعيب العلوم احس مبجر عليهم والكتب متينة موهينة
حتى الدين وايد فية حفظ لانهم يطلبون استدلال بالايات والاحاديث حق الاجابة يعني وايد حفظ

 

[عزيزتى]

:ada:امهات الخليج وصل جدول الامتحانات \الكورس الاول بيخلص
ماشاالله طار الوقت بسرعة
شدو حيلكم

 

[عزيزتى]

دلولة -ملكة --- ماكو حل الا انكم اتدرسونهم في الويك اند

 

[ملكة بيتها]

عزيزتي ...شكرا عالنصيحه الحمد الله بنتي مستواها ممتاز بالدراسه ما عندي مشكله معاها ما عدى النسيان بالماث بس ما عندها ذيك المشكله اللي تأثر على مستواها الحمد الله ...

 

[ملكة بيتها]

مروو ....الحمد الله بنتي الحمد الله وياحلوها من قرقه

 

[mr000]

سلام أمهات الخليج اشلونكم! بقيت أسأل عطلة الكريسمس عندكم كم مدتها؟ أحنا العام كانت شهر وهالسنه مخلينها 17 يوم بس ...أوف باطين جبدي وسألت أخوي عن مدرسة بنته الكويت الأنجليزيه بسلوى قالي عطلتهم شهر... اشمعنى أحنا غير... عاد ألحين أظل أتحلطم لي يوم الأحد أروح أسألهم لييييييش! والله ماله معنى قلنا عالأقل نرتاح من التوصيل والأمتحانات ... وبعدين احنا مداومين أول ناس 26/8....

 

[ملكة بيتها]

مروو ...عطلتنا بتكون من 16/12 ..إلى 4\ 1...يعني أقل من شهر تقريبا ثلاث أسابيع ..
إنتو صج أول ناس داوموا بس ليش إجازتكم جذي وعشان ليش يعني لا تأخرتوا بمنهج ولا شي ؟؟؟؟
وصج أنا ناطره إجازه بنتي بفارق الصبر نبي نرتاح من التدريس شوي وهذا أنا بنتي بأولى ..الله يعينكم

 

[mr000]

ملكه زين أنتوا نفسنا أحنا من 17/12 ألى 4/1 ترى حتى أنتوا مقصرين عطلتكم كلهم كانوا قبل شهر الأجازه ليش جذي؟؟؟؟؟

 

[ملكة بيتها]

ما أدري عنهم ليش يعني ؟؟؟ الحين أنا بتحلطم ليما يوم الأحد ليش قصروا الإجازه شالحكمه ؟؟؟

 

[دلوله المزيونه]

مرووو وملكه بيتها ولجميع الخوات السلام عليكم اتمنى العطله تجي لوتكون اسبوع راضيه لان معناها الامتحانات خلصت على خير وافتكينا من القلق وانا دايما خايفه لايوصل القلق من الامتحانات الي عندي لولدي حتى ما يؤثر عليه في فترة الامتحانات وهذا شي مهم مع اني خايفه عليه من الانجليزي لان مستواه ضعيف والله مع اني مو مقصره معاه

 

[روحي تحب]

السلام امهات شلونكم يالغاليات ....اي والله عساه تجمع عامر يارب
عزيزتي ...يامطول الغيبات يا مكثر الغنايم ههههه اشتقنالج يا ناظرتنا ...ماعليه الوكيله ملكه غطت غيابج
عاد تدرين ولدي ماياب جدول الامتحانات

ملكه ... بالعافيه حبيبتي البيتزا اي والله حتى آنا بنتي وايد مستانسه ومشكوره على الدعوه

دلوله....طوفي ترى الحال من بعضه خذيت اسبوعين ادرس دين وعربي وآنا اعطيهم حقهم حالهم حال كل المواد بس للاسف ولدي السنه حتى المدرسه متصله تقولي كل المدرسات يقولون ولدج مستواه قوي كانه بمدرسسه عربيه شفيه هالسنه وآنا وابوه منصدمين من النتايج بس ماعليه بالنسبه لي اتمنى يعوض نتايجه بالامتحانات اليايه .... اي والله اذا على سالفة القلق الحال من بعضه والله يسهل لاتحاتين ومشكوره ولج عطله سعيده

مروو....والله ياحلوها من قرقره يالغاليه عاد كلامج كله حكم ودرر والله لايحرمنا من هالقرقره

 

[روحي تحب]

امهات والله آنا وايد فاقده زهر وردي عسى يارب المانع خير وتدخل وتطمنا عليها ( اشتقنالج يازهر )

الفرسان ال3 و زوزو الحلوه وام مشعل وينكم لاتطولون الغيبات انتوا بعد

 

[mr000]

روحي تحب بعد قلبي ميخالف تحملوا القرقه هذي خلاصة 26 سنه من الحنه والرنه وتدريس العيال بس ساعات تتعبين وتطلع النتايج بالعكس مادري شنسوي آنا ولدي هذا اللي ب8 منتكس صار من الأحسن لي الأسوأ درجاته تضيق الخلق هالشهر خايفه يستمر جذي لي آخر السنه تالي اشبسوي بالهاي سكول راح تكون أصعب!شعري شيب منه والله حتى حواجبي توني أدري حتى الحواجب تشيب !

 

[روحي تحب]

ويه بعد عمري والله نحبج ونموت فقرقتج الله يعطيج العافيه ويبلغج فيهم وتشوفين نتيجة هالتعب وصاجه والله مرات ماتشوفين نتيجه بس شنسوي احنا نسوي اللي علينا والباجي على الله ولا انشاء الله فتره وتعدي مع وليدج ويبرد قلبج بهالنتايج حاولي تقعدين معاه وتخلينه يفكر بالمستقبل نتايجه تراكميه لازم يتعب على نفسه شوي والله يسهل بالهاي سكول الا مبرد قلبج انشاء الله واذا على الشيب ماعليه شيب الشعر ولا القلب اسم الله على قلبج والله ياخذ بيده انشاء الله ويلتفت لنفسه لازم تييهم عره هالعيال الله يعينا على الاجيال اليايه

 

[عزيزتى]

روحي تحب== تصدقين امتحان الدين اول امتحان 22نوفمبر
بعدين املاء العربي والتعبير والفهم والاستيعاب 25نوفمبر
مروو== هالسن وايد صعب الله يعينج مثل ماقالت روحي فترة وتعدي دايما ذكري بالجامعة والتخصص الي يحبة وانة يحتاج نسبة لازم يتعب عليها من الحين واللة يسهل

 

[mr000]

عزيزتي والله هو مره يقول بصير مثل عمي دكتور وبدرس بالطب مثل أخوي وتالي يرد يقول لابس هذا صعب بس حق الشطار حيل آنا راح أتوظف بوظيفه عاديه مومشكله المهم معاش وبس ..... آنا من القهر قمت أشب وأطفي قلتله شوف دكتور وألا خمام اللي دفعته لك بال12 سنه راح تسددهم على داير مليم ....والله ..أدفع دم قلبي وحارمه روحي وتالي ماله خلق يدرس!!