تجمع اولياء امور مدرسة الخليج الانجليزية في السالمية

[عزيزتى]

انا كلة اقول لهم تبون سيار كشخة ومعاش قوي بيدكم درسو عدل ودايما قوليلة انت شلطر وشجعية وما الومج اعرف وحدة اتعبت علية وتالي ماياب نسبة ودخلتة الاسترالية بس تبية يخلص الجامعة وللحين تدفع
انا احاتي نفسج اخاف بالاخير مايمشون ويضيع تعبنا واهما الحين ما يعرفون مصلحتهم بس بعدين يتحسفون بس دام انج مجابلتة الله بعوضج خير وانشاالله يشد حيلة انا احس لما يشوفون بعينهم الريبورت مو زين ينقرصون

 

[ملكة بيتها]

سلام أمهات شلونكم حبايبي
روحي تحب ...شلونج يالغاليه وعليهم بالعافيه اليهال البيتزا داي شوي غيروا الروتين اليومي
مروو...اسم الله عليج حبيبتي من القهر وإن شاء الله قلبج شباب ..من كلامج حسيت ولدج هو مكون فكره عن نفسه إنه مو شاطر وما يستاهل يكون دكتور ..بس عليج إنج تشجعينه وأنا عارفه إنتي مو مقصره معاه بس خلي اللي حوليه أبوه وخوانه هم دايما يشجعونه ويخلونه يثق بقدراته يعني إذا هو شاطر بماده ثانيه بينيله طالما إنت شاطر بهذي الماده أنا عندي ثقه تنجح بالماده اللي إنت ما تحبها ( ما تحبها بس مو معناته إنت مو شاطر فيها )يعني لو تدرسها وتتقبلها بتييب نتايج عاليه بإذن الله ومن هالكلام ..وهم ذكريه بالجامعه وإنه جو حلو وعرفيه على المهن وإختلافهم وإنه لازم يكون عنده طموح لأنه ولد ومستقبله راح يأثر باجر على مستقبل عياله ومن هالكلام اللي يحسسه بمسؤوليه ...وربي يوفقه ويرفع راسج وتشوفينه ما خذ الشهاده الكبيره

 

[mr000]

والله ملكه لساني طاح اقطع وآنا أقول هالكلام طول الوقت وأعطيه أمثله شوف عمك وشوف أخوك وشوف الثاني اللي ماشد حيله اشلون متحسف وتعبان بوظيفته بس ماأشوف هالكلام مأثر فيه!

 

[ملكة بيتها]

صاجه مروو الحين ما يستوعب هالكلام تالي بيحس فيه وإن شاء الله ما يطول على ما يستوعبه ويفهمه عدل وإن شاء الله الحين من عقب الريبورتس أنا متأكده بيشد حيله إن شاء الله ..وربي يوفقه ويفرح قلبج قولي آمين

 

[روحي تحب]

امهات شلونكم

ماعليه يامروو انشاء الله هالريبورت يصحيه تصدقين بسن ولدج اغلبهم يمر الياس عليهم بس ماعليه فتره وتعدي الله كريم انشاء الله والله مايضيعلج تعب انشاء الله ولا اي ام يارب ويوفق عيالنا كلهم ماعليه احنا بندعيلهم ونتعب معاهم والباجي على رب العالمين لايضيق خلقج كافي انتي واثقه انج ماقصرتي وحارمه روحج علشانه وآنا معاج بنفس الحال حتى ولدي يقولي قلتله هذا دوري كام علشان ماتقول محد درسني ومحد نصحني ولا احد جابلني لا سمح الله او المدرسه تشك بلحظه من اهتمامنا او انه احنا مهملين احنا نسوي اللي علينا والدور الباجي عليك بعدما اقدر امتحن بدالك ولا اقدر ادخل المعلومات غصب بمخك ( عاد لو اقدرجان سويتها ) هههههه

الله كريم انشاء الله وكل من بياخذ نصيبه وسهلي الامور وخليها على الله وآنا مو بس قاعده اقول هالكلام لج لا والله هالكلام لي بالاول قبل ما انصح فيه احد وتالي حق اي ام تعاني وتعبانه

بس جني قلبتها دراما هههههه .....اقول عاد لما تقرون مشاركتي عقبها ابي ابتسامه كبيره والدنيا ماتسوى

 

[mr000]

الله كريم روحي تحب مثل ماقلتي نسوي اللي علينا والله يوفقهم! بس الله يعينكم انتوا بالنظام البريطاني الظاهر امتحاناتكم اليايه كبيره يعني قصدي كميتها كبيره علشان نهاية الفصل مو مثلنا يمتحنون بكل chapter لأنه أشوف أخوي بنته توها ب5 وعندهم استنفار وبالويك اند ماطلعوا طول الوقت أمها قاعده تدرسها مع أنها شاطره ولغتها الأولى انجليزي حتى ماتعرف تتكلم عربي يعني الدراسه بالأنجليزي سهله عليها!

 

[روحي تحب]

اي والله يامروو الله كريم حبوبه ...واذا على النظام البريطاني صج حالة استنفار مثل بيت اخوج الله يعينهم ويعينا كلنا يارب
بس تدرين للاسف آنا ليلحين ما اعرف الفرق بين النظام البريطاني والنظام الامريكي بس الكل يقولي انه النظام الامريكي اسهل لانه آنا وزوجي اختلفنا على هالشغله آنا كنت ابي مدرستكم واهو يبي الخليج وآخر شئ مشت كلمته ههههه وقالي فاي يوم تحسين بضعف حوليه بس ولدي مو راضي يبي مدرسته وبنتي ارتبطت باخوها وآنا ليلحين الوضع ماشي بس آنا اخاف من السينير ووايد من اهلنا على8 year حولوهم امريكان ويقولون صج اسهل يعني والله كريم وقالولي انه الامريكان من year6 يبدون الطلبه مو مع بعض تصير كل ماده كلاسها بروح فقوليلي من خبرتج شرايج ؟؟ عن قريب راح انزل موضوع بهالخصوص

 

[روحي تحب]

ملكه .... يالغاليه ماتشوف شر بنيتج حبيبتي الله يطمنج عليها ماعليها الاالعافيه انشاء الله

 

[mr000]

سلام أمهات الخليج اشلونكم ! اليوم عيالكم يحليلهم يايبينهم المركز العلمي آنا كنت موديه حفيدتي هناك وألا أشوف يمكن 4 باصات مالوت الخليج ويهال وايد أعتقد أنهم مرحلة الريسيبشن أو الكي جي قاعدين يلعبون ويراكضون بره وياكلون ومدرساتهم معاهم بس والله عجبتني نقطه مهمه أنه المدرسات كلهم بريتيش ماشفت وحده عربيه وآنا أسمع الأمهات عندنا بالعالميه يقولون عيالهم بالكي جي بعضهم مدرساتهم عرب فشكلي بغير رايي وبدخل حفيدتي الخليج لي غريد 4 أو 5 تالي نحولها أمريكيه!! روحي تحب شوفي هو النظام البريطاني تأسيسه قوي بس من غريد 7 يعتبر هاي سكول والأمتحانات تيي من بريطانيا وناس وايد يخافون يكون صعب على عيالهم ومااييبون نسبه عاليه بالتخرج فينقلونهم أمريكيه وفي ناس عادي يكملون!

 

[lyale]

السلااام بامهات الخليج
انا بدخل بالموضوع سواء مدرسه يريطانيه او امريكيه التحويل صعب فاا الي يدخل عياله مدرسه يكمل فيها
لان التحويل من نظام لنظام صعب وهذاا انا الي عانيته يوم ييت احول عيالي وهم بعدهم ما دخلو القريدات كانوو نظام بريطاني فا كنت اعاني مع المدارس الامريكيه لان لهم قانون فااا لازم تحدودون النظام من البري كي جي وما تدخلون بمتاهات التحويل

 

[mr000]

صاجه ليالي أذا كان النقل من مدرسه لي مدرسه وبنفس النظام يخسبق الياهل فمابالج من نظام لي نظام آنا ولدي تخسبق ليش نقلته 3 مدارس وكلهم نظام أمريكي وتقريبا نفس الكتب بس مستوى المدرسه والتدريس يختلف وآنا عموما أخاف أوهق الياهل بنظام بريطاني أدري أنه صعب وضغط عالياهل مع أن تأسيسهم قوي ومثل ماقلتي تالي لي يينا بننقلها بعد بينزلونها صف وآنا أول وحده كنت أنصح الأمهات بكل موضوع عن المدارس الخاصه أنهم يختارون مدرسه قويه ويكملون فيها لي التخرج ولحد يسوي غلطتي!

 

[lyale]

صاجه المدارس البريطانيه في منها القوي وفي منها الضعيف نفس مدرسة عيالي سابقا بس انا الي اعرف ان الخليج وايد قويه واخوان زوجي كانو فيها واحد تخرج وهو وايد صغير يمكن 16 سنه والثاني ما قدر يكمل فيها لان مو شاطر بس اتوقع اذا بدخلين بنت ولدج لازم تجابلينها عدل لان صعبه ومرحلة الثانوي تكون وايد اصعب وهم في سنه اخيره لي يخلصون بعمر صغير يدرسون ببريطانيا والله مو ذاكره بس هذا من الي اذكر يوم تخرج اخو زوجي قالوله لازم تدرس سنه تمهيديه للجامعه تكون يا ببيريطانيا او عندهم بس اذا عندهم وهذا الي اسواه يرووح بس وقت الامتحان والامتحانات كانت تي من بريطانيا له ويدرس بمعهد اهما طرشو له ويمتحن بالمدرسه

 

[عزيزتى]

صاجين امهات وايد صعب الحين 8ياخذون مواد العلمي كيمياء واحياء وفيزياء الي كنا ندرسها في ثالثة ثانوي وكتب كاملة

مروو-- انا ابلة بنتي كويتية بس امها مدرسة بالمدرسة والاكسنت مالها ممتاز والحلو فيها انها تكلم اولياء الامور عربي

 

[سيدة الكويت]

السلام عليكم بنات العالميه شخباركم

شلونج مرو هههههههههههههههههههه الله يعينا ما يندرى عن المستقبل وحده اعرفها ولدها متخرج من مدرسه خاصه واخرتها يدخل معهد تجارى صج قهر والله على قولتهم الذكى ذكى

المهم تعرفون مدرسه ماث ابيها تراجع حق عيالى يوم الأمتحان؟؟؟؟؟؟؟؟؟؟؟؟؟؟؟؟

 

[mr000]

سلام أمهات الخليج اشلونكم تذكرون السي دي اللي قلت لكم عنه مال جدول الضرب آنا شفته اليوم بمذركير السالميه أول ماتدشين عند ايرلي ليرننج الألعاب وعندهم بعد سي دي الألفابيتس والأرقام أخذت حق بنت ولدي والله اعتقد راح ينفع عيالكم اللي بالكي جي لأنه حتى الصغيره عندي استانست تردد وراه الأحرف!

 

[ملكة بيتها]

سلام أمهات شلونكم
روحي تحب...مروو ...الله يسلمكم من كل شر الحمد الله بنتي أحسن وشكرا على سؤالكم
أنا أوافق مع ليال ومروو إن الطالب لازم ما ينتقل من مدرسه ونظام إلى نظام آخر لأن حتى المدارس البريطانيه ما يتبعون نفس المنهج وهذا راح يشتت الطالب ويضعف تحصيله العلمي ..
مروو ..ترى صحيح أغلب المدرسات بالخليج بريتش بس أنا شفت مدرسات عرب بس بالنسبه ليير ون لأني لما أمر آخذ بنتي أشوف باقي الصفوف كل الصفوف مدرساتهم أجانب ولا وحده عربيه اللهم للغه العربيه والإسلاميه ..والتيشر أسستنت بصف بنتي أعتقد سوري أو لبناني بس الأكسنت بريتش وشكرا على معلومه الشريط باجر أنا رايحه التعليم المبكر وترى أنا شفت بعد في مكتبه بليلى جاليري تحت عندهم كتاب جدول الضرب ومعاه سي دي ...

 

[mr000]

عزيزتي العام كانت مدرسة ولدي الانجلش كويتيه بنت الغربللي بس ماتتكلم عربي بالمره وتشوفينها تقولين اجنبيه والأكسنت بريتش بس في مدارس يحطون عرب وهم يكلمون اليهال بالعربي

 

[دلوله المزيونه]

السلام عليكم امهات ما تشوف شر بنتك ملكة بيتها حتى انا ولدي من عقب روحة الاكواريم يوم الخميس جاني مرتفعه حرارته واتهاب لوز واليوم انشاء الله يداوم حبيبي ماتهنى بالويك اند والله يسهل على عيالنا ثقوا بالله ان ما فيه مكان للعلم الا ويستفاد منه والنقل يضيع الطالب وياخذ وقت علما يتاقلم الا اذا كانت المدرسه ضعيفه في المستوى مثل ما صار مع ولدي

 

[ملكة بيتها]

دلوله المزيونه ...شكرا حبيبتي على سؤالك وما يشوف شر ولدج حبيبي طلعت من عينه روحته الأكواريوم ..وصح كلامج النقل من مدرسه إلى مدرسه برأيي إلا إذا كان الطالب في مدرسه مو قويه هني لازم يتم نقله لمدرسه أقوى عشان مستقبله وممكن تقولينا تجربتج مع ولدج عشان نستفيد

 

[روحي تحب]

شلونكم امهات وشخباركم

الله يعين الامهات على فترة الامتحانات اليايه ويسهل على عيالنا كلهم يارب

سيدة الكويت .....هلا فيج بس شكلج مضيعه بس شفتي مروو حسبالج تجمع العالميه هههههه يالغاليه والله ماعندي فكره عن مدرسين ولا جان فدتج وحياج


ليال ...واخيرا شهالغيبه ؟؟ شخبارج
مروو .....مشكوره حبوبه اليوم بروح اشوفه وماقصرتي ومنكم نستفيد الله لايحرمنا منج

عزيزتي....شلونج وشخبارج بالنسبه للتربيه الاسلاميه استغربت ليش الامتحان بكل الدروس حتى اللي امتحنوا فيهم اما اللغه العربيه لأ بس بالدروس اللي مامتحنوا فيهم ؟؟؟؟ والله يعينا

ملكه .....الحمد الله على سلامتها زين اللي تطمنتي عليها
دلوله المزيونه....مايشوف شر وليدج والحمد الله على سلامته وولدج كان باي مدرسه وهل اللي بمرحله year6 ولا غيره الله يحفظه

امهات شلون الجاكيتات الشتويه وايد تضايقت كلش ماعجبوني بصراحه النوعيه كلش مو ممتازه ومشيت باللبس العادي بس ماتوقعت الجاكيتات جذيه والسنه اللي طافت شريت من مارك سبنسر يشبهون جاكيتاتهم بس نوعيه ممتازه ماخلوا ولدي يداوم فيهم لانه الشعار مو موجود انزين وفروا نوعيه جيده وإحنا مستعدين نشتريها كل سنه قاعدين ايبون اسوأ من السنه اللي قبلها .....شريتهم وآنا متضايقه بس شسوي حتى بنتي تقول ماما وايد خشن كلمتهم امس قالولي المديره تقول مايصير مدام الملابس متوفره ماعندكم حجه انكم تلبسونهم شئ ثاني


ومشكورين امهات على كل آرائكم بالنسبه للموضوع اللي طرحته