تجمع امهات العالمية الامريكية

[umhomood]

مروو اى عطوا ولدى جدول امتحانات العربى واللى يدرسه العربى استاذ عصام الله يعين الجميع وييسر امرهم 000

 

[mr000]

سلام أمهات اشلونكم!! أم حمود أي والله ناطرين الأجتماع علشان أشوف راي المدرسين أذا يحتاج ولدي تيوترينج حق أي ماده أحطله من ألحين قبل الريبورت الثاني ولأن أحيانا ماتحصلين مدرسين زينين يكونون مرتبطين مع طلبه بس والله العام آخر شهرين تقريبا لما الكاونسلر مستر ماريو ماحصل لي مدرس حق التيوترينج كانوا كلهم مشغولين فقالي فيه تقويه خلال الدوام يروح بحصة الآرت أو الpe وكانت المدرسه وايد زينه تراجع معاهم قبل كل امتحان وتشرح لهم والله ياريت فيه جذي هالسنه أحسن من التقوية بعد الدوام العام تأذينا بالتوصيل العصر!

 

[umhomood]

اشلونكم انهات العالمية 00 مروو اعذرينى اسم المدرسة اللى كلمتها العام وشكيت لها اسمها مس نهال دفراوى مو مس وفاء 00 ياليت والله يرضون يعطون التوتر خلال الدوام ونرتاح انا عيالى مايدشون البيت الا الساعة 3 او 3 الا ربع كل يوم والوقت قصير ما يمدى انا جربت التوتر اول العام وقبله وبصراحة قلبى كان يتقطع عليهم يطلعون من الصبح ويردون اربع ونص او خمس وهذا وايد عليهم 00 مروو اسمعى شصار الصبح لما قعد حمود من النوم انا العام وهالسنة ما نى عارفة شصار فينى جنه عطونى عين فى اهتمامى ومتابعتى لعيالى ما قمت اكلم مدرسينهم وما اقعد معاهم ادرسهم واتابعهم وهذا وايد اثر عليهم والحين تعودوا ما يبونى اعرف شىء وخصوصا الصغير قام يخش عنى سوالفه وما يجاوبونى لما اسالهم 00 المهم قلت حق حمود انا عندى مدرسة رفيجتى فى المدرسة تقول لى كل شىء اول باول جان يقول على انا ماما انتى اصلا تدشين المنتدى وتعرفين قلت له المنتدى من وين يعرف ان مس سارة الغربلى اللى كانت تدرس العام ماتدرس هالسنة ومن وين عرفت ان مس وفاء اللى درستك العربى تدرس غريد 8 ومن وين اعرف مستر شكرى اللى من ساوث افريقيا مو عربى00 تعالى شوفى الحجى كل شوى يعطينى اسم مدرسة 0 وانا اقول له اى علشان تعرف انى هالسنة راح اكون متابعة اول باول 000

 

[mr000]

سلام اشلونكم أمهات! أم حمود آنا والله بنتي اسم الله عليها مادريت عنها يمكن من 4 ابتدائي ولاأدرسها حدي أروح بالأجتماعات والحمدلله شاطره وشايله عمرها لي تخرجت بس هذا لالالالا ماينغفل عنه من دش المتوسطه قام يخش عني مثلا وين ورقة الأمتحان ماعطيتني أوقعها قال ناسيها باللوكروطبعا هالسوالف كان يسويها بالتكامل بس هني مايحصل له لأنه المدرسه تلزمهم يردون الورقه موقعه والشي الثاني اليديد عليه أنه فيه مدرسين بصراحه وايد متعاونين مثل مس أسينبيرج مالت العام ومستر شيكري هذا أول بأول يدزلي أيميل أذا فيه أمتحان أو أي تقصير وولدي مره برمضان موقايلي أنه عنده واجب مو كامل وعطاه ديتينشن وقايله لازم نوقع عالورقه مالت الديتينشن وطبعا من الخوف مايابها وبنفس اليوم دزلي مستر شيكري أيميل قالي السالفه فولدي تدوده وفهمته أنه لايخش أي شي مره ثانيه لأنه المدرسين يدزون لي بس آنا بوصي باقي المدرسين بالأجتماع أنه يكون فيه تواصل بالأيميل لأنه مادري اشقاعد يصير في باقي المواد!

 

[ReeMaN]

سلام امهات شخباركم انشالله بخير ؟

ماشالله خوش مواضيع تكلمتو فيها ... يعطيكم ال فعافيه حبيباتى ولدي اول سنه له بالمدرسه ومااقدر احكم على مدرساته من الحين

بس مدارسه العربي اسمها مس ماهي اقول حق ولدي اسمها مها يقول نوو اسمها ماهي

روحي تحب اول الايام احسهم مهتمين من ناحيه الاستعدادات للمرض بس الاسبوع اللي فات كل يوم اسال ولدي فحصوكم اليوم يقول اي

هالاسبوع كل يوم اساله يقول لا ماسوو لنا شي بس نغسل ايدنا وايد.... الظاهر مو ملحقين على الفحص كل يوم مادري شسالفتهم

بنت خالتى ولدها في المدرسه الدوليه قريد 2 صار فيه انفلونزا الخنازير انشالله في تحسن بحالته

والله يبعد عنا شر الامراض

اليوم طرشو لنا روقه الانشطه بس ترددنا ان شاركه بالانشطه الوضع مايسمح لان ولدي يبي كاراتيه وسباحه الكاراتيه من كي جي الى قريد 12 اخاف يتعادي من احد الله لايقوله يكون مريض.... والسباحه الجو بارد مو وقته .... انشالله بموسم ثاني نشاركه

وانتو يالامهات العالميات سجلتو عيالكم في اى نشاط؟؟

 

[QUMAR]

أنا اليوم أشاور ولدي اللي بغريد 1
أقوله تري بشركك بالكراتيه عشان تعرف تدافع عن نفسك
بس انت بروحك تروح الجيم تنزل لا أنا ولا بابا معاك
انا قلت هالكلمه أشوفه جنه خق خخخخخخخخخخخخ
بس ما علي منه بشركه ان شاء الله

 

[ReeMaN]

شخبارج قمر ...

والله زين سويتي تشركينه برياضه الكاراتيه انا وايد احبها لان تعطي الشخص ثقه بالنفس .... ان شاء الله السنه اليايه اشركه بالكراتيه

 

[umhomood]

مروو00 الله يحفظ ولدك ويحميه ويحفظ عيال الجميع ترى ولدى حمود ما كان يخش على شىء ابد بس من راح صف 6 وشاف الفرق بين الابتدائى والمتوسط صار اسم الله عليه يتاثر باصدقائه وكل واحد يقول سره حق الثانى لدرجة انه مرة يانى يقول ماما كل واحد عنده وحدة يحبها ويسالونى ربعى منو تحب ما ادرى شقول واخاف يقولون عنى ياهل لان ماعندى وحدة احبها و مثل ما قلت لك انا ماادرى شصار فينى العام كله تعبانة وعصبية وما لى خلق اقعد معاهم وكنت اطلب منهم اهو واخوه انه كل واحد يسوى واجباته بنفسه واهو الحين عمره 12 سنة ونصف اسم الله عليه بس مؤدب ويتاثر اذا علاماته نزلوا لدرجة انه راح لاستاذ العربى اليوم وقال له شنو الاشياء اللى انا ضعيف فيها وطلب منه اوراق قواعد علشان يدرسها بالبيت وقال له مو متوفر عندى الحين فقلت له يسوى بحث بالاشياء اللى ما يعرفها ويارب يعين الجميع00 ريمين ولدك صاج المدرسة اسمها مس ماهى واصلا مصرية ومحجبة ترى تهبل وخوش مدرسة واغلب المدرسات فى الروضة اكثر من ممتازين 000

 

[mr000]

سلام أمهات اشلونكم! آنا ولدي ماياب ورقة الأنشطه بس مو مهم لأني ماراح أسجله كافي دوامهم طويل ووراه دراسه وواجبات وامتحانات وايد! أم حمود بالنسبه حق العربي أذا عندج أحد من عيال خواتج بالمتوسط بالحكومه أو تعرفين مدرسه بالحكومه بالمتوسطه أخذي منهم أوراق العربي ترى يعطونهم مذكره أو أوراق شرح ومراجعه للقواعد وايد زينه! ليش ماتشترين له كتاب المرشد أو الشامل مال جمعية المعلمين أو مكتبة العجيري في شرح وحل لأسئلة كتاب العربي وايد تساعده آنا أشتريله العربي والدين علشان حتى لو براجع معاه حق الأمتحان يكون جدامي أجابات صحيحه!!وحتى لما يسوي الواجب ومايعرف شي يقدر يرجع للكتاب هذا!!

 

[umhomood]

مشكورة وايد مروو جزاك الله خير والله باكر ان شاء الله اروح جمعية المعلمين واشتريله الشامل 000 وياليت تطمنينا على ولدك وزوجك يارب يكونون احسن 00 امهات شلونكم وشلون عيالكم ياليت الاخبار طيبة000

 

[mr000]

أم حمود بالنسبه حق موضوع اختلاطهم بالبنات آنا ولدي كلش مو مهتم بهالسالفه أول شي لأن تربية أبوه وايد شديده لدرجة أني أقول حق ولدي عادي لوسألت مره بنت عن واجب أو درس ماقلتلك سولف معاها أو تعرف عليها يقولي لأ لأ ماأحب أكلمهم وبعدين هو متعود من التكامل أنهم مفصولين عن البنات واللي يمر عند صفوف االبنات ياخذ ديتينشن فوايد كان يخاف من هالسالفه مع أني ماأأيد هالأسلوب يعني الأعتدال حلو وكلشي راجع حق تربية الأهل وهو من الحضانه معاه بنات بالصف يعني بس سنه وحده بصف 6 اللي فصلوهم بعدين نقلته العالميه فاذا كان الأختلاط له سلبياته فمن رايي حتى الفصل بينهم بهالطريقه والعقاب جنه مسوي جريمه اذا مر بالساحه وقت فرصة البنات أو مر عند صفوفهم هذا غلط اشدعوه ماله داعي المهم أني نقلته وافتكينا!بس على فكره هو قالي العام أنه في صبيان عندهم هالسوالف وفي عندهم بنت صديقها واحد من الهاي سكول يعني يقصد تكلمه بالتلفون وبالبريك وكان مستغرب اشلون البنت تسوي جذي وماتخاف فهمته و قلتله كل واحد وتربيته!

 

[mr000]

أم حمود لاتروحين جمعية المعلمين يبيعونهم بمكتبات الجمعيات آنا شفتهم بمشرف بس للأمانه قبل كم يوم ماكان العربي موجود مال 8 قالي لأنه كتب العربي متغيره فاتصلت من الوسيط بالمايسترو يوصل لج لي البيت وطلبت منه العربي والدين آنا كنت أطلب منه حق بنتي بالثانويه بس احتمال يكون كتاب صف7 العربي متوفر بمكتبة الجمعيه وخل أنبهج حق شغله علشان لاتطيحين بغلطتي آنا طلبت من المايسترو الطبعه اليديده وتالي لما شفت كتاب ولدي ألا طبعة 2008/2009يعني المدرسه مو قاعد يدرسونهم كتاب العربي اليديد مال هالسنه ! واذا تبين رقم المايسترو أدزلج أياه!!باجر الصبح بمر مكتبة مشرف أول ماتفتح و اذا شفت العربي مال7 أقولج!

 

[ReeMaN]

صباح الخير

كيف حالكم ؟؟؟ مشكورين مروو وام حموود على تبادل المعلوماات استفدنا منكم للاجيال القادمه ان شاء الله

ويعطيكم الف عافيه والله يوفق عيالكم وتشوفونهم تخرج امتياز مع مرتبة الشرف

 

[mr000]

سلاااااام أمهات ريمان شخبارج اشهالصدفه؟ أنتي بالدوام؟

 

[mr000]

آنا عندي بريك ألحين قبل لاتقعد بنت ولدي تالي أنشغل معاها لي الظهر! عادة هالحزه ماأحصل أحد منكم!! أم حمود ترى ماكو بمشرف العربي لا حق 7 ولا8 أذا تبين سألي بجمعيات ثانيه أو العجيري 22618415 أو الأكيد عند المايستروا أييبه لج لي البيت24726393 بس كتاب المايسترو مو المرشد مال جمعية المعلمين لأ مال مطبعتهم بروحهم!!

 

[mr000]

اليوم بالجريده كاتبين في مدرسه أجنبيه بصباح السالم مافيها أي احتياطات لأنفلونزا الخنازير ولاتعقيم ولافحص للطلبه والنتيجه طلع عندهم كذا حاله!! أعتقد ماكو بصباح السالم غير التكامل!!

 

[mr000]

كراميلا أطلب منج طلب؟؟ عفيه غيري الصوره توني أنتبه لها! ان شاءالله ماكو ألا العافيه! آنا بس شفتها ضاق خلقي تعودنا على الآيس كريم الملون انزين ميخالف أيسكريم كاكاو بسكوت كيك أي شي بس غيريها!!! اذا مايضايقج الطلب

 

[ReeMaN]

هلا مروو شخبارج حبيبتى لا ماخذه اجازه هاليومين راحه واستجمام

مروو في الرؤيه بصباح السالم وبعدين اغلب المدارس الحين فيها حالات انفلونزا الخنازير ... الله يكافينا الشر

 

[mr000]

أي صاجه ريمان نسيت مدرسة الرؤيه بس تروالي نسيبه المطوع حريصه ماأعتقد تاركتهم جذيه! بس مثل ماقلتي لاخاص ولا حكومه المدارس أغلبها مبتلشه وقاعد يطلع عندهم حالات الله يعينهم!

 

[caramella]

السلام عليكم أمهات
إشلونكم
يعطيكم العافيه خوش معلومات تناقشتوا فيها عن المعلمين بالمدرسه و إنشالله الكل يستفيد من هالمعلومات
مروو حبيبتي غاليه و الطلب رخيص بس والله لا تلوميني لي الحين تعبانه نفسيا والله و آنا غيرت الصورة لأن الآيس كريم يذكرني بنساتي
إنشالله قريبا بغير الصورة