تجمع امهات العالمية الامريكية

[Fouz]

السلام عليكم أمهات
شخباركم كلكم ان شاءالله بخير
أول شي ابي اتشكر من كل اللي سأل عن بنتي و ان شاءالله الشر ما ييكم و يحفظ عيالكم و بنتي بفضل الله صارت أحسن
و ابي اتشكر من خواتي اللي رشحولي اسماء المطاعم صراحة العشا كان يبيض الويه، مشكورين و لا خلا ولا عدم ان شاءالله
و ماشاءالله الموضوع عامر لازم أقراه بالتفصيل علشان أستفيد

 

[bella bambina]

هاي أمهات اشلونكم ؟ العام اشتركت بنتي بوايد أنشطة وأغلبهم كانو خوارة يمكن لأنهم رخصو الأسعار !!اشتركت بالطبخ وشي مثل الكشافة والسباحة ما كانت ذاك الزود المدرب زين بس المساعدة كانت نحيسة وتصرخ على عيالنا بس حبت كرة السلة وأظن السنة ماعندهم وقبل سنتين كانت الأنشطة أحلى بنتي كانت مشتركة بالتزلج على الجليد كان حلو بس عموما عيالنا يطلعون متأخر ومع الأنشطة كان اليوم يضيع ما يمديهم ياكلون ويكتبون واجباتهم

 

[umhomood]

السلام عليكم امهات تو زوجى وصله مسج ان فى 18 حالة انفلونزا الخنازير فى وزارة التربية واخبار بو راشد تقول ان فيه 4 حالات مؤكدة وراح وسكروا صف لمدة اسبوع 00 وامس فى جريدة الوطن فيه خبر يقول ان اللقاح اللى الكل ناطره ممكن يؤدى الى الوفاة واليوم الوزير الساير راد ومعلق على الكلام 00 الله يحفظ الجميع ويبعد عن الكويت واهلها وكل المسلمين هذا البلاء000

 

[umhomood]

مروو بالنسبة لاختلاطهم بالبنات انا ما عندى اى مشكلة فيه لانه مثل ما قلتى الاول والاخيير التربية فى البيت والمتابعة من الاهل 00 و من يوم ما كان ولدى فى نيرسرى وانا اعرف اسامى كل اصدقاءه البنات والاولاد واسال وايد واعرف طبيعة كل واحد فيهم 000 وولدى من النوع الخجول ما يرضى يكلم اى وحدة وانا احاول اخليه يكون عادى معاهم واردد عليه انه كل البنات اللى معاك مثل خواتك وما فى مشكلة تكلمهم بس بحدود الادب 000 بالنسبة للتكامل انا معاك براى الشخصى انه ما فى داعى للعقاب جنه مسوى جريمة اذا مر عند البنات 000 وعن كلامه عن البنت الى تكلم الولد فى الهاى سكول بصراحة فى بنات يسوون العجب الله يهديهم واشوف جراتهم اكثر من الاولاد 00 مرة اخوى راح يجيب اولادى من المدرسة علشان كان عندنا ظرف وما قدرنا نجيبهم قعد يتحلطم ويعلق على المدرسة انها مو زينة لان البنات اللى شافهم والاولاد فرى رد عليه زوجى وقال هذى مدرسة مثلها مثل غيرها فيها الزين والشين ومو معنى هذا ان الادارة سبب فى قلة ادبهم والمسؤؤل الاهل اللى غافلين عن اولادهم 000 وجزاك الله خير على موضوع الشامل اتصور موجود فى الدسمة بجمعية المعلمين 00

 

[mr000]

السلام أمهات اشلونكم! خوش صوره كراميلا!! عدل كلامج أم حمود عن المدرسه الأهل مسؤولين بالدرجه الأولى عن تصرفات عيالهم وتربيتهم مو المدرسه والكتب مثل ماقلت لج موجودين بمكتبات الجمعيات بس العربي ماكان موجود!! انزين ماعطوهم ورقه عن الأجتماع يعني من الساعه كم لي الكم ولدي يقول من بداية الدوام 7ونص لي ال2 ومافي دوام للطلبه بس أنتي تاخذين عيالج معاج؟؟ آنا أشوف طلبه أييون مع أهلهم بس ولدي مايرضى أيي معاي مع أن أحسن أيي ويسمع راي المدرسين بنفسه!!

 

[mr000]

بيلا اشلونج اشلون عيالج مع الدوام؟فوز اشلونج شخبارج سلامتها بنتج والجو هالشهر كله جو مرض الياهل ينام مافيه شي ويقعد مريض وحراره!!

 

[mr000]

أم حمود على سالفة أنفلونزا الخنازير والمدارس هذا الشي متوقع مع دوام الطلبه وكل ماداوموا مرحله نتوقع يطلع بينهم حالات بس الفرق بين الحكومه والخاص اسلوب تعامل المدرسه والأهالي لما يكتشفون حالات يعني مثل اللي صار اليوم بالجهرا ماله داعي الفزع والربكه والبجي والأهالي تارسين المدرسه وهوشه مع الأداره جنه منتشر طاعون بالمدرسه مايسوى بس خرعة الطالبات بعد هذيله ثانويه كبار بس لو ابتدائي أكيد بيخافون أكثر ماله داعي كلش الpanic أغلب المدارس الخاصه طلع فيها بس الطرفين تعاملوا بهدوء!

 

[bella bambina]

هلا والله مروو الحمدلله تونا خلصنا واجبات ودراسة الله يعينا باجر يعطونهم البروغرس ريبورت احنا الاجتماع حقنا الاسبوع الياي مادري اذا انتو نفسنا احنا كل ولي أمر ينقي الوقت اللي يناسبه ويوقع على الجدول المعلق بمدخل الادارة وكل ولي أمر من حقه ربع ساعة

 

[umhomood]

السلام عليكم ان شاء الله الجميع بخير بيلا فى الجدول يوم 11 اكتوبر اجتماع المرحلة المتوسطة ويوم 15 اجتما ع المرحلة الابتدائية ومثل ما قلتى كل ولى امر له 15 دقيقة بس ما يكفون لكن اسالوا يمكن احد يعتذر من اولياء الامور ويكون فى وقت زيادة عن ال15 دقيقة مروو اهو مو شرط يجى ولدك معاك بس عن تجربة الاحسن انه يروح ويسمع الملاحظات اللى يقولها الاستاذ عنه جدامه 000 وبالنسبة لموقف الاهالى بالجهراء يذكرنا بالخوف اللى مر علينا بس احنا كنا اهون و اعقل مع انه اول مدرسة داومت بالكويت واول مدرسة طلع فيها المرض مدرسة اولادنا 000

 

[umhomood]

امبييييييييييه يمكن اكون سيئة نية باللى افكر فيه بس شفتوا اغلب اللى يهولووووووووون ويصرخون يطلبون انه اولادهم يعطلون لحد ما يوصل الدواء بس يوافقون الوزارة على طلبهم راح تلقون اكثرهم يسافرون ويترسون المطار جنه المرض بس موجود بالمدارس 00 امهات منى فيكم تشوف عمرو اديب فى اوربت او معتز الدمرداش فى المحور؟؟؟ امانة تشوفون الصور اللى يحطونها عن مدارسهم والصفوف الدراسية بدون مبالغة 4 او اكثر على طاولة وحدة وفوق بعض والوسخ والقذارة ما تقولون مدارس الله يلطف فيهم 000 والله احنا ولله الحمد بنعمة وخير الله لايحرمنا يارب 000

 

[mr000]

أم حمود ماعطونا ورقه حق الأجتماع علشان نختار الوقت آنا أذكر العام بس أول اجتماع اللي سألونا عن الوقت أذا مو متلخبطه بينهم وبين التكامل تالي باقي الأجتماعات جنه كان عادي المجال مفتوح طول اليوم! والله بحاول هالمره اخذه معاي الأجتماع!

 

[umhomood]

مروو انا سالت ولدى اى ساعة نروح جان يقول لى الاستاذ قال شوف اول اذا اهلك موافقين يجون راح نقول لكم اى وقت ومثل ما قلتى اهم عادة يعطون اوراق بالوقت ويطلبون منا نوقع اذا نجى اولا او نطلب وقت غيره بس هالمرة ما جاب الورقة بس يمكن باكر يكون فى خبر 00 حبيت اسالك باكر درس داون دى حق المتوسطة لانه ولدى قال للى جذى 000

 

[mr000]

أي آنا هم ولدي قالي باجر دريس داون داي!آنا باجر بدق على سكرتارية الميدل سكول أسأل عن وقت الأجتماع ماراح أنطر لي يرجع لأنه يوصل متأخر تالي ماأقدر أدق أسألهم!

 

[اي اسم]

سلام ريمان شلونج وشرايج بمدرسة ولدج الحالية؟
ان شا الله عاجبتج؟

 

[umhomood]

صباح الخير امهات 00 مروو انا حبيت اقولك انه عطوهم ورقة اجتماع اولياء الامور ووتعتمد على تقسيم الصفوف مثل 7- 4 - 1 وحددووا الاجتماع حق كل شعبة وقت بس فى اللنش تايم ما فى اجتماع بريك للمدرسين ويارب اكون واضحة فى التوقيت 000 على فكرة ما اعجبتنى طريقتهم احس الابتدائى والعام وايد احسن ونشوف يارب خير0

 

[fayoona74]

ياجماعة قولوللي شنو ايجابيات المدرسة وشنو سلبياتها من واقع تجربتكم فيها

 

[mr000]

السلام عليكم! أم حمود آنا توني دقيت عالمدرسه كلمتني صفاء سكرتيرة الميدل سكول قالت مافيه ورقه حق غريد 8 عندكم طول اليوم من 7و40 دقيقه لي 2 و40 دقيقه ماعدا اللنش تايم مثل ماقلتي ورديت سألتها يعني ماكو وقت محدد حق كل صف قالت لأ!!أفكر أروح الصبح مبكر يكون مافي أولياء أمور وايد وألا بالعكس تعتقدين أييون الصبح وايد تالي يروحون دواماتهم؟؟؟

 

[mr000]

أختي فيونا آنا ولدي صج بالمتوسطه بس صارله سنه بس بالمدرسه ماكان فيها من الروضه فيمكن الأمهات اللي عيالهم درسوا فيها من الروضه يفيدونج أكثر بس بالنسبه لي لأن ولدي جرب مدرستين قبلها فهذي ارتحنا لها أكثر يعني شوفي كل مدرسه فيها سلبيات وايجابيات حتى المدرسه اللي ولدي طلع منها وماكانت عاجبتنا فيها بعض الشغلات الأيجابيه بس كانت سلبياتها أكثر فنقلت ولدي منها! أعطيج مثال هني بالعالميه المرحله المتوسطه ماعندهم اختبار نهاية الفصل الأول اللي يدرسون له دروس الكورس الأول كلها لأ عادي اختبارات شهريه لي الكرسمس تالي يبتدي الكورس الثاني ماعدا الدين والعربي! بس لما كان ولدي قبلها بالتكامل كان عندهم هالنظام نفس الحكومه اختبارات نهاية الفصل الأول واختبارات نهاية الفصل الثاني يمتحن باللي درسه طول الفصل! ومن ناحية التأسيس واللغه طبعا العالميه أقوى ولدي ليلحين ماعنده نص لغتهم لأنه ماتأسس عندهم!!

 

[سمبوسه2]

السلام عليكم خواتي حبيت أسالكم الطالب بالعالمية ما يدرس الكتاب كامل حق الامتحان؟

 

[mr000]

لا أختي بمرحلة المتوسطه ماعندهم هالنظام مثل الحكومه أنه يدرس دروس الفصل الأول حق امتحان نص السنه أو يدرس الكتاب كله حق آخر السنه بس حسب كلام السكرتيره أنه بالثانويه بلى راح يكون فيه امتحانات نص السنه وامتحانات آخر السنه! بس حاليا بالمتوسطه مافيه بس امتحانات شهريه وامتحانات قصيره وكويزات اسبوعيه وبنهاية كل شهر فيه ريبورت! آنا ماأقدر أقول لج عن الأبتدائي لأنه ولدي مادرس الأبتدائي بالعالميه!