تجمع امهات العالمية الامريكية

[umhomood]

السلام عليكم امهات 00 ريمان سلامة ولدك مايشوف شر اكيد تغير الجو السبب وعلى فكرة لاتنسين تكتبين اسمه على البلوفر او الجاكيت اللى راح تتركينه فى المدرسة او حتى اللى يلبسه دايما 00 مروا ان شاء الله الربورت زين انا ولدى حمود بالسابع قبل لا يدش البيت مو راضى ينزل من السيارة يقول حق ابوه كلمها لاتعصب على مدرس العربى معطيه دى انا مستغربة لانه وايد زين بالعربى ماشاء الله عليه واقول يمكن السبب انه غاب كم يوم ؟ بس ناوية اتصل واكلم المدرس الاحد ان شاء الله 00 ومو عارفة اهم بدوا دروس التقوية ولا لا والله يعينا ويعينكم على تدريسهم00

 

[mr000]

سلام أمهات شلونكم ريمان مايشوف شر البطل لاتخافين هذا من تغير الجو! أم حمود آنا اليوم من شفت ويه ولدي وهو يايني السياره عرفت أن أكو بلوه بالريبورت أطالع إلا d‏ بالماث وc‏ بالعربي عاد هو العام كلهb‏ بالمواد آنا بكلم مستر ماريو الكاونسلر عن تيوتر حق الماث لأن ولدي يقول معاه صبي بدى ياخذ حصص تقويه!

 

[ReeMaN]

الشر ما ايكم مشكورين امهات على ردودكم اللي تبرد الجبد والحمدلله من العصر احس صار احسن شوي ردت روحه وصار له خلق يلعب اشوي ....

مروو وام حموود مساكين عيالكم ماينلامون على ضيقه الخلق انحكرو ببيوتكم بالعطله فوق هذا العلامه مو زينه الله يعوضهم انشالله علامه احسن من هالعلامات وان شاء الله يتخرجون باعلى الدرجات يارب ؟ طيب مروو من اى وقت يبدون يعطونهم انذارات؟؟ الحين والا نص الكورس؟

 

[اي اسم]

سلام ريمان شلونج
وسلامة ولدج ...ما يشوف شر
ما في اخبار عن روضتكم متى الدوام عندكم؟

 

[mr000]

هلا والله ريمان ديري بالج على ولدج من الجو ومن التكييف و قصري عالسنترال قبل لاتسبحينه ونشفي شعره عدل لايحوشه برد!! والله مادري ريمان عن الانذارات ؟ الحمدلله ماقط عطوا ولدي انذارات كان يقول العام أنه يعطون اللي ياخذ fأكثر من ماده! والله مادري يتعمدون مايحطون درجات زينه علشان نسجلهم بالتيوترينج بعد هم يربحون مو شويه الشهر ب100 تقريبا أذا حصتين بالأسبوع وعادة الأهل يستمرون بالتيوترينج لما يشوفون الياهل تتحسن درجاته!بس والله هوعالمدرس العام مدرسته الماث كانت ممتازه وايد رفعت مستواه بالماث حتى آخر السنه معطينه شهادة تفوق بالماث معقوله ألحين فجأه ياخذ D والعربي المدرسات يدققون أكثر من المدرس الريال وكله تقولهم أنتوا موشطار وضعاف بالعربي يعني بالعقل طلبة مدرسه أجنبيه شنو تتوقع منهم بكل المدارس الأجنبيه الطلبه ضعاف بالعربي!

 

[ReeMaN]

هلا والله اى اسم الحمدله بخير الله يسلمج انتى شخبارج مع الابدااع انشاءالله مرتاحه ولو ان هالسؤال توا الناس عليه بس شلونج مع جو المدرسه ؟ ولدي هالاسبوع داوم و انتو اتوقع الاسبوع الياي ان شاء الله يداومون الكي جي 2

هلا مروو امقصر التكيف عندنا لا اهو حار ولا بارد الجو عادي جدا اقولج من قعدنى ولدي بالليل ماسك ايده وينفض قال لي يما بردااااااااااااان
عرفت انه مريض لان شقتنا مو بارده ولا كان سابح الا اللهم غسلت ويهه وايده وريوله لان المغرب كان حده دايخ وماله خلق يتسبح..
خوش حركات ينزلون الدرجات عشان يتسجلون بالتيوترنج

 

[bella bambina]

هاي أمهات صباح الخير آنا دايما تعب الأسبوع كله يطلع علي يوم الخميس قضيت اليوم أتقلب بالفراش .ريمان سلامته ولدج ما يشوف شر عادي لأن الجو صفري عيالي تمرضو بالدور بعطلة العيد وعلى طول حطي له جاكيت بالصف لأن صفوفهم باردة كاراميلا آنا ما أعرف حق الانترنت توني مبلشة أبطل المنتدى(غشيييييمة)اختي اختصاصها طلبات فتطلب لي ملابس حق اليهال من كذا محل من أمريكا والجاكيتات من موقع ديزني وحتى جناط الأكل والقمصان يطرزون عليهم الأسامي بس تستخدم فيزا أمريكية ويدزونهم عن طريق أراميكس مرة اختي الثانية طلبت بفيزا كويتية رفضو طلبها

 

[bella bambina]

مروو و أم حمود لا تحاتون درجات عيالكم هذا بروجرس ريبورت عشان يخرعونهم ويشدون حيلهم أكثر ان شاء الله تتحسن درجاتهم بالريبورت كارد

 

[ملكة بيتها]

ريمان ما يشوف شر وليدج لا تخافين حبيبتي الحين الجو جو أمراض

 

[ReeMaN]

مساء الخي صيقاتي الغاليات

مشكووورين ماقصرتو والله الشر ماايكم واليوم الحمدلله ولدي وايد احسن من امس الله يعينا على هالجو المتقلب

 

[ReeMaN]

هاو هاو هاو شهالبدليه اللي ماصارت ولا استوت
قصدي

مساء الخير صديقاتي الغاليات

 

[bella bambina]

هاي أمهات ومساء الخير صديقتنا الغالية ريمان الحمدلله ان ولدج صار أحسن وما تشوفون شر ان شاء الله

 

[mr000]

السلام عليكم اشلونكم أمهات! بيلا أنتي موظفه؟ آنا قبل لا أتقاعد كان يصير فيني نفس الشي كل ويك أند تلاقيني تعبانه وجسمي يعورني وساعات أحس مثل الصخونه سبحان الله كل ويك أند نفس الحاله بس من تقاعدت الحمدلله اختفت هالشغله بالمره!! الله يسلمكم قبل شوي لاقيت وحده من صديقاتي بالصيدليه جان تقول ولدها بغريد4 بمدرسه انجليزيه قبل يومين دقوا عالأبو قالوله ولدك فيه حراره تعال أخذه وبالمره طلعوا أخته معاه المهم وداه أبوه الطبيب قال معاه احتقان ابلاعيمه وحراره ويكح وهو اساسا فيه ربو وقالهم اذا مانزلت الحراره خلال 3أيام نحوله الأمراض الساريه يسوي تحليل أحتمال انفلونزا الخنازير ومسكينه خايفه وتحاتي تقول موقاعده أطلعهم مجمعات ولاأماكن ألعاب حدهم المدرسه وبيت يدتهم وهم ماسلم الولد! بس ان شاءالله مايطلع فيه الأنفلونزا!!

 

[mr000]

ريمان الحمدلله على سلامة ولدج وصج هالأيام كل بيت فيه أحد مريض من الجو! بقيت أسألكم أمهات عن الفيتامينات اللي قلتوا عنها حق اليهال آنا شريت من هذاmr tumee بس بنت ولدي حدها يومين كلت منه تالي قامت تقطه فاليوم شريت لها شراب على طعم البرتقال جنه أسمه ملتي بلس مادري هذا زين؟؟ واذا مجربينه من قبل لاحظتوا أنه يفتح شهية الياهل؟؟ آنا والله ودي يفتح شهيتها لأنها كلش ماتاكل شهيتها ضعيفه حتى حجمها صغير وضعيفه بس أمها ماتبي تقول أخاف تمتن وايد حتى ماأقتنعت اني اشتريلها الفيتامين ألا لما قلتلها يقوي مناعتها قبل الشتا علشان لاتمرض وايد!!مادري انتوا شنو تجربتكم مع الفيتامينات حق عيالكم؟؟؟؟؟

 

[mr000]

أمهات بقيت أسأل اللي عيالهم من زمان بالعالميه آنا أسمع من ولدي هالسنه والعام أن فيه كذا طالب وطالبه ينتقلون من عندهم لي الais

 

[bella bambina]

هلا مروو آنا صار لي 12 سنة بالتدريس باقي شوية على التقاعد بس والله ما أتعب بالمدرسة كثر ما أتعب بالبيت مع عيالي.لما كانت بنتي صغيرة كانت ما تاكل ( والله ليلحينها ما تاكل)وديتها كذا دكتور وحتى لما سافرنا استراليا كانو يقولون لا تحاتين مادام ترضع رضاعة طبيعية وبس كانو يعطونها أدوية فاتحة للشهية وما تغير شي فقال لي الدكتور مو الكل يتأثر وطلعو عيالي كلهم أكلهم قليل لأن اللي يرضعون طبيعي غالبا ما يطلعون اكيلين

 

[mr000]

sorry دزيت الرد قبل لاأكمله! يعني موفاهمه هل هي أحسن بالمستوى من العالميه آنا سامعه أنها وايد قويه ويمكن الأجانب بالذات يحبون ينتقلون لها لأنه فيها أجانب وايد أكثر من العالميه بس لايكون مستوى المدرسه بدى يتغير عن قبل!!

 

[mr000]

بيلا والله هذي مسكينه مارضعتها أمها حتى 3 أشهر مع أنها ماخذه أمومه 6 أشهر! وصح آنا بنتي الوحيده بين أخوانها اللي رضعت طبيعي لي 9 أشهر لأن كان الغزو وآنا معاها مو بالدوام والحمدلله صحتها زينه كانت ماتمرض وايد بس تصدقين ضعيفه عمرها مامتنت من كانت صغيره ليلحين صار عمرها 19 ووزنها 44 بس!

 

[ملكة بيتها]

مروو أنا رضعت بنتي ولله الحمد سنتين لأنها ما تقبلت الصناعي كلش وايد كانت معدتها ما تحمل الحليب الصناعي وهي صج شهيتها عاديه بس وايد ضعيفه ولما كنت أفرأ عن فوايد الرضاعه إنها تحمي من أمراض السمنه وطبعا تقوي المناعه

 

[caramella]

السلام أمهات
بيلا يحليلج يديده عالنت ما قصرتي يقطعونهم بالعافيه عيالج إنشالله
ريمان الحمدلله على سلامة وليدج
مرووو ais اللي بميدان حولي ما ادري السالميه ؟؟؟؟ ما أدري آنا لما دشبتها صوب الأداره ما إرتحت حسيت إنها مدرسة زلمات مبناها حيل قديم عاد ما أدري عن مستوى المدرسه