تجمع امهات العالمية الامريكية

[bella bambina]

هاي أمهات . إي اشعليج ريمان تروحين الشعب بأيام الأسبوع ولدج اسم الله عليه بالكيجي بدون مبالغة توني خلصت من متابعة واجبات عيالي مو تدريس بس واااااااااااااجبات حرام عليهم اليهال يرجعون البيت الساعة 3 على ما يتغدون ويبدلون صارت الساعة 4 يقعدون قعدة وحدة على الواجبات واذا فيه دراسة ويبونا نومهم مبجر .ريمان عليكم بالعافية بس حاولي تستانسين بهالأيام كثر ما تقدرين قبل لا يستلمونكم بالواجبات

 

[Fouz]

السلام عليكم
شلونكم أمهات ان شاءالله بخير

 

[ملكة بيتها]

شلونكم مامات ....شخباركم حبايبي مريت أسلم ما عليه غاطسه مع بنتي وواجباتها ...
وريمان طلعات نص الأسبوع كثري منها والله إنج باجر بتصيرين مثلنا نتشفق على الويك إند أكثر من اليهال ...

 

[mr000]

سلام أمهات اشلونكم الخميس هاف داي علشان الريبورت ينتهي الدوام 11 يابولكم عيالكم الورقه! الله يستر من الريبورت بس ماخذوا امتحانات وايد مادري اشلون بيقيمونهم يعني العربي والدين ماامتحنوا خير شر!والله اللي عيالهم بالكي جي استانسوا بأحلى أيام حياتكم آنا من دش ولدي غريد 1 بعد ماكو طلعه ألا بالويك أند لا وحتى بالوك أند أقعد أدرسه حق الكويزات والتستات! تصدقون أن اللي بالحكومه مرتاحين أكثر والناس علبالهم اللي يدخلون عيالهم بخاص مرتاحين ولايدرسونهم!!

 

[mr000]

فوز اشلونج شخبارج! ملكه اشلونج الله يعينج على مجابل بنتج والواجبات شوفي هو بالأبتدائي لازم هالمجابل بس والله ييب فايده يعني كلما صار مستوى الياهل قوي وتمكن من الأساسيات الانجليزي والرياضيات تالي خلاص بالميدل سكول ترتاحين وحتى قبل يعني على غريد 4أو 5 يبتدون يعتمدون على نفسهم آنا أشوف بنات حماي في مدرسة الخليج بالأبتدائي يمكن غريد 3و4 يسوون واجباتهم ويدرسون بروحهم حتى بنت أخوي بالأنجليزيه بسلوى! كراميلا أشلونج والله متى ماناسبج الوقت حق السفر سافري ولاتحاتين دوام ولدج! ريمان شخبار ولدج بدى يتعود عالمدرسه؟ اشلون طريقتهم بالأكل ياكل داخل الصف ولا بروحهم بالبريك؟ آنا من ألحين أحاتي بنت ولدي شكلي بداوم معاها لي راحت الpre k

 

[ReeMaN]

سلام امهات شخباركم ان شاء الله بخير حبايبي

اي والله صاجين بكلامكم بس انا عندي احلى طلعه الويك اند تحسين الطلعه لذيذه عقب تعب عيالكم اسوع كامل واهو حيله بالواجبات والامتحانات والدراسه

انا نفسج مروو ولدي باجر طلعته بال11 ان شاء الله مادري ليش بيمشون على نظام الرزنامه القديمه

كاراميلا سالتلج التسجيل ومايدرون متى بس صاجه اليوم مالت التسجيل تقول الاهالى زعلانين لان يبون عيال الكي جي 1 يداومون ويتحلطمون على قرار الوزاره شهالخبه على المرض

بيل كل المدارس جذي ماكو رحمه على اليهال يدون من الدوامات بالثلاث وسيدا يحلون واجباتهم ويدرسون مايمديهم يترفهون وان طلعتى معاهم مشوار الا ناموو بالسياره

 

[mr000]

سلام أمهات اشلونكم! ريمان باجر الله يعينا عالزحمه لأن كل المدرسه يطلعون مع بعض بنفس الوقت بس يمكن أخف شويه من العام لأنه الحضانه وكي جي 1 بعدهم مو مداومين!العام كنت أوصل عند المدرسه من 11 ألا ربع علشان أحصل مكان قريب من المدرسه أوقف أنطره!وبالنسبه حق الواجبات بالأبتدائي بعد أنسي نومة الظهر علشان تقعدين معاه حق الواجبات قبل لايدوخ وينام العصر وهو موكاتب واجباته!!

 

[ReeMaN]

مروو ابسالج منو هذا الامريكي اللي يوقف الصبح عند مدخل السيارات ويسلم بايده؟؟؟ طويل عنده كرش شوي؟؟ امبيه اليوم سلم علي ومارديت عليه جان يوقف عند دريشتى ويسلم بايده يعنىغصبن عليج ردي السلام والله يتنى الضحكه على شكله هههه

 

[mr000]

هذا السوبر انتندنت اليديد مادري شيسمونه يمكن مدير عام المدرسه أسمه مايكل بل لما يوزعون عليهم أوراق دايما تشوفين توقيعه تحت يحليله متعلم يوقع بالعربي جنه واحد بأولى ابتدائي توه يتعلم يكتب أسمه تحسين راسم الأسم رسم تروالي بالنسبه لهم الخط العربي جنه كتابة الفراعنه! العام كان في واحد غيره هذاك وايد راز عمره بس هذا شوي ويدش من الدريشه آنا أول يوم دوام هم جذي يانا عند السياره وقال أسمه ومركزه بس مد أيده بيسلم جان أنقز ولدي وأقوله مد أيدك سلم مابيه يسلم علي!

 

[caramella]

هلا والله مرووو إي والله شكلي جذي إنشالله ماني مناطرتهم شكلهم مو قادرين عالوزاره آنا ساعات أبيه يداوم مل من قعدة البيت و ساعات أقول أريح لي عشان لا أفزع من الصبح
يا حلوها بنت ولدج من الحين تحاتينها إهي السنه اليايه إنشالله بري كي جي ؟؟؟؟
ريمان ما قصرتي يا حبيبتي سددتي الرسوم؟ ماشين حسب خطة الرسوم اللي أول ما خصموا أي شي ؟؟؟ الله يوفق وليدج
شيقول أي مدرسه مرتاح معاها هذي ولا القبليه؟؟؟؟؟
يحليله هالمدير الأمريكي ما قالوله عن عاداتنا إن مو كل الحريم يصافحون رياييل

 

[ReeMaN]

هلا مروو ياحليله هالسوبر صج سوبر اي يمكن لان يعرفج رايحه وراده على المدرسه ...

كاراميلا ماخصمو شي ليش يخصمون.. انا دافعه اول مانجح بالاختبار 400 وحسب لي شي قبل الا 400 ماجريه شنو ودفعت 745 القسط الاول .... بس ياحلو نفسيات هالابلات داخل المدرسه ماشالله عليهم يشرحون القلب الكل يرحب فيج والابتسامه ماتفارقهم ....
وتوا الناس ماقدر احكم من الحين يبيله وقت سالينى هالسؤال عقب شهر اذا الله عطانا عمر ان شاء الله

بس امس مس غاده قالت ان ولدي يفهم عليها بالانجليزي ب يس اور نو بس محادثه مايشارك ,,,, نفس المشكله بالمدرسه القبليه

 

[ReeMaN]

مروو مو ملاحظه اليوم الصبح الجو بارد مو نفس كل يوم جنى بنشتي مبجر هالسنه؟؟؟ وشفت اليوم بطابور الابتدائي جم بنيه لابسه جاكيت بس النوع الخفيف مساكين اكيد صفوفهم بارده عليهم ... السؤال يقول يصير اخذ له جاكيت كحلي على ذوقي والا لازم من المدرسه وعليه شعار المدرسه بعد؟؟ظ

 

[caramella]

أكيد توه مبجر ريمان بس اللي أقصده متقبل المدرسه ولا يحن يبي مدرسته القبليه
يا حبيبي بس لازم يشارك كلميه بالأنجليزي بالسياره عن المواضيع اللي تكلموا فيها
يخصمون عشان داوموا عقب شهر من الوقت اللي المفروض يداومون فيه
تهقون على الحضانه و كيجي 1 يبون المبلغ كامل إذا داوموا بعد عيد الأضحى !!

 

[bella bambina]

هاي أمهات اشلونكم مو تنسون باجر نص يوم دراسي كالعادة آخر خميس من كل شهر . ريمان آنا أحط حق عيالي جاكيت داخل الصف اذا حسو ببرودة يلبسونه المدرسة يقولون لج يلبس جاكيت أو فيست المدرسة الكحلي ويقدر يلبس بالشتا فوقه كوت أي لون و آنا عموما عمري ما لبستهم جاكيت المدرسة يلبسون جاكيتات ديزني أطلبهم بالنت ومطرز عليهم الاسم لأنهم دايما يضيعون أغراضهم أو عادي جاكيتاتهم ملوت غاب أو زارا المهم شي يدفي

 

[mr000]

هلا والله ريمان أي والله الجو براد الصبح حتى ماشغلت مكيف السياره اليوم وأشوف حتى الصبيان الكبار لابسين فيست وبعضهم جاكيت خفيف مثل ماقلتي! هذا الجاكيت الخفيف هو مال التريننق آنا العام كنت شاريه حق ولدي هالسنه بعدي ماشريت ملابس الرياضه ألا الصيفي! بالنسبه حق الملابس يمكن مع الصغار مايدققون بالألوان أو اذا عليه شعار المدرسه أو لأ مادري عنهم بس بالمتوسطه لأ مايرضون لازم لبسهم بس الجاكيت آنا العام شريتله كحلي ساده من السالميه أثقل من جاكيتهم وكان يلبسه عادي ماقالوله شي لأنه بشهر 1 برد موت جاكيتهم مايدفي!!

 

[bella bambina]

مروو آنا بنتي هذي ثامن سنة لها بالمدرسة عمرها محد كلمها على لبس واهيه طول السنة تلبس بلايز بولو أي ماركة وجاكيتات ملونة وتكرمين جواتي ملونة بس على قولتج يمكن الأكبر يكلمونهم

 

[mr000]

بيلا هالسنه قالي ولدي مومشكله الجوتي تكرمين يكون غير الأسود يمكن علشان الناظر تغير مادري بس والله العام كنت شاريتله جوتي أسود وفيه خطوط خضر من ثاني يوم يي قالي اليوم كلموني عن الجوتي ممنوع ياأسود أو أبيض وانبطت جبدي لأنه شاريتله 2 وكلهم داخل فيهم ألوان ثانيه يعني أخضر وفضي وكانوا غاليين ورحت شريتله غيرهم! بس على كلامه يقول هالسنه عادي! آنا أشوف ناس يلبسون جاكيتات ملونه وأقوله شوفهم يقولي لاممنوع يعطونا ديتينشن بالبريك! والله مادري بالضبط آنا أشتريله جاكيت كحلي ساده وجوتي أسود وخلاص!

 

[ملكة بيتها]

السلام مامات ..مروو ....صاجه أهم مرحله هي الإبتدائي لازم نجابلهم عدل في هالمرحله علشان يعتمدون على أنفسهم تالي ...
كارميلا ...شخبارج حبيبتي نصيحه سافري غيري جو ..
ريمان ...مشكلتج مع ولدج نفس مشكلتي مع بنتي بس الحمد الله مع مدرستها الإنجليزي الحاليه حسيت بتغيير الله يوفق وليدج ...

 

[ReeMaN]

صباح الخير ...

طافكم امهااااااااااات اليوم الفير ولدي ياني يقولي يما برداااااااان انا من قال لى هالكلمه طقيييييييت على راسي قلت خلالالالالالالاص ولدي حايشته الخنازير لمست راسه والا حار بس مو وايد وسيدا طرنا فيه مستشفى هادي عالخمس ونص الفير شافه الطبيب قال معاه احتقان ببلاعيم وبدايه نشله قلتله يعنى مو الخنازير قال لا لالا قلت الحمدلله واي صج تصرررررررقعت الصبح عطانى شراب حق النشله ايروس و مضاد حيوي حق بلاعيمه ... وطبعا غيبته والا جان استنفاااااااااار بالمدرسه ....

والله بيلا شكلي بسوي مثلج بحط جاكيت بالمدرسه متى مااستبرد يلبسه ....
شخبارج ملكه مامات الحمدلله ان بنيتج صارت احسن بالانجليزي وانشالله تساعدنى مدرسته معاه

 

[caramella]

السلام أمهات
هلا والله ملكه إنشالله ناوية لي على سفرة بس أخلص ال 40
ريمان ما يشوف شر وليدج يا حرام الحين موسم الصفري تغيير الجو ديري بالج عليه حبيبي ما يشوف شر إنشالله
ولا تحاتينه وليديج عالمشاركه إنشالله معاهم بيصير بلبل هذا واجبهم إن يعلمونه انه ينطلق بالكلام
بيلا والله خوش فكره إن إسمهم مطرز عالجاكيت وجاكيتاتهم دافين ؟؟؟؟
ممكن السايت بليز خل أطلب حق ولدي منهم