تجمع امهات العالمية الامريكية

[mr000]

بيلا ماتشوف شر بنتج وأحسن ودوها دكتورها يشوفها مثل ماقلتي آنا هم لاحظت بنت ولدي صارلها أسبوع كله تحط أصبعها داخل حلجها وتقول يعور خاصه لما تاكل وهم موكلشي تاكله تقول يعور وتقط الأكل آنا قلت أكيد قاعد يطلعلها أسنان (الطواحن)

 

[bella bambina]

الشر ماييج مروو
فوز آنا رايي من راي مروو صح تييبين لج شغالة ثانية حق البيبي وتكون مربيه حق اليهال أحسن من ممرضه لأن اتضح لي انهم خواره واختي فلبينياتها وايد أفهم من الممرضات اللي يابتهم قبل يومين ولدها مصخن والممرضه ما تدري عنه دخلت شغالتها وشافته مصخن وقاست حرارته ولا فوق ال 38 والممرضه ولا بالبال

 

[Fouz]

شلونكم أمهات
بيلا سلامتها دلال ما تشوف شر ان شاءالله/ و دكاترة المستوصف بين كل 10 دكاترة تلقين واحد بس اللي يفهم للأسف، ذاك اليوم ريلي كان تعبان و حرارة و جسمه متكسر، الدكتور يقوله من شنو تتوقع هالعوار!!!! ما شاءالله لو يدري شمنه شحقه يايك

مرو انا باخذ أمومة و أساسا عندنا اجازة الصيف يعني ما أداوم الا نهاية سبتمبر ان شاءالله يكون الياهل غدا شره، و طبيعة دوامي مو لازم أكون موجودة الصبح فخطتي اني اقعد مع الياهل لما تنظف الخادمة البيت و تالي اروح الدوام عاد تتفرغ حق الياهل على ما أرجع لان شقتي ما تتحمل خدامتين قطيعة انا وحدة و ملوعة جبدي ما كو شي مو فاجة عينها عليه هالمرة أييب ثنتين عساني ما احتاجهم، و اذا تأزمت اييب وحدة من خدم أمي الصبح تنظف و تمشي

بيلا والله مو بشارة سالفة الممرضات يعني هم فلوسهم شكثر و ما يهتمون و ان شاءالله الياهل الثاني يكون أسهل يا رب، اذا دلال صارت زينة ان شاءالله ترى دزوا ورقة عادي يلبسون اللي يبون و طلعتهم 10:45

 

[ReeMaN]

سلام امهات شخباركم حبايبي

مروو مابغو يطلعونهم رحله.... مساكين من داومو ماودوهم مكان ...

بيلا ماتشوف شر بنتج اذا تعرف تتمضمض عطيها ماي وملح يعتبر مطهر واذا مو بكتريا راح تأشر لج على المكان وين يعورها بالضبط لان راح يحرها الملح اشوي عشان تعرفين وين يعورها بالضبط عقبها عطيها ماي عادي تتمضمض فيها تروح الحروره ....

فوز رايي من راي بيلا الشغاله احسن لان راح تتعلم على الياهل وتاخذ عليه عقب جم شهر لاداومتى انشالله اتصير حنينه عليه لان مربيته

وتعبانه معاه وتعرف له احسن لج من الممرضات مالهم قلب على الياهل ....

بكرا داون دريس دي يلبسون على كيفهم .... ومطلوب للي يحب ايب مع عياله كوكيز حق الصف هذا بالنسبه حق صف ولدي مادري عن عيالكم

 

[mr000]

صاجه فوز والله كثرة الخدم موشي بالبيت خاصه أذا شقه.. آنا مابديت أحط 2 ألا لما يبت آخر ياهل لأنه كله بين عيالي 4 سنين يعني مايكون فيه ياهلين بالبيت وآنا اللي أطبخ وأوصيها ماتجيس شي بالشقه لي أرجع من الدوام والله تلاقيها فرصه تحط راسها وتنام مع الياهل طول النهار بس صج ماارتحت ألا بالبيت الخدم تحت صادين عن ويهي..... بيلا اشلونها بنتج ألحين وديتوها حق دكتورها؟

 

[Fouz]

هلا والله ريمان، بصراحة انا ما احب الخدم جبال ويهي و مكاني ما يتحمل احط ثنتين، مثل ما قالت مرو اذا البيت عود اي والله ثنتين معقولين خصوصا انا ما أطبخ لان طباخ حمولتي يطبخ و بنتي اسم الله عليها مو صغيرة و بالمدرسة يعني الخادمة ما عندها الا تجابل الياهل على ما ارجع و تنظيف البيت ما يبيله ذاك الوقت خصوصا اذا انتي موجودة تصير هبة ريح بس اذا انا بالدوام الله يسلمج تغسل الحمام نص ساعة عاد اللي يسمع يقول ماكو ربعة مو فاركتها بس يتمططون على الفاضي، و العصر انا موجودة ما عندها الا تكوي الملابس و الله يعافي الغسالة و النشافة يعني تحط فيهم الهدوم و الكواي تالي

هذا رايي مرو، اذا زادوا الخدم تزيد الربادة و بيقعدون يهذرون و يحابلون التلفزيون و يكشتون بالدنيا و كل وحدة تحط اللوم على الثانية، بنظري وحدة كافي خاصة اذا ماكو طبخ و المكان مو وايد كبير و على الياهل يكون ان شاءاللله غادي شره على ما أرجع أداوم و لا أحط لي ثنتين على قلبي، بس والله من الكلام اللي شفته وايد ترددت على سالفة الممرضة عموما عسى الله يسهل الامور و تمر فترة النفاس على خير

 

[mr000]

فوز أنتي سألي عن الممرضات اللي من المستشفى نفسه.. مع أنه اللي عرفته من أخوي أنها ماكانت تيي طول اليوم يعني بس لي الظهر.. بس هم كانت تساعد الأم وتسبح الياهل وتشوف صحتها لأنه اعتقد كان فيها بوصفار أول الأيام!!اليوم كلموهم عن الرحله وخذوا طلباتهم عن الوجبات بس مادري ليش مقيدينهم ألا من ماكدونالد يعني اللي مايحب كيفه يشتري من مطعم ثاني خاصه أن قايلين لهم ييبوا معاكم فلوس حق الأكل والألعاب.. وهم لو مخلينهم يروحون بلبس الرياضه أريح لهم بالحركه واللعب من اليونيفورم

 

[mr000]

سلام أمهات وينكم اليوم نايمين مبجر... لبسوا عيالكم عدل باجر ترى بره برررد بررررد!

 

[caramella]

السلام أمهات
إشلونكم و شخباركم
وعليه دلوول ما تشوف شر إنشالله أخاف فيها فطريات باللثه ؟؟؟
جيكيكان العوار إذا فيه نقط بيض أتوقع هذا فطريات
عاد هذا يذبح من الألم إنشالله يا رب مو فطريات
ياكم البرد و أخيرااااااا ها إشلونكم مع البرد مستانسين إنشالله
لبسوا عيالكم زيييين دفوهم عدل و ديروا بالكم عليهم

 

[mr000]

سلام أمهات اشلونكم.. كراميلا اشلونج واشلون ولدج ألحين...أي والله مامدى يانا البرد ألا ردوا العيال يستمرضون.. اليوم ماطلعت وصلت ولدي وداه أبوه لأنه الصغيره ردت صخنت فمابقيت أهدها...!! بيلا أشلون بنتج ألحين ... ريمان وفوز أشلون عيالكم.. عسى ألبسوا عدل عن البرد...

 

[Fouz]

صباح الورد أمهات شخباركم

بيلا شلونج ،، بشرينا عن دلال ان شاءالله كلت شي و صارت أحسن، طمنينا عليها

مرو شخبارج، لا والله مو نايمين مبجر بس ما فتحت اللاب توب بالليل، ان شاءالله يستانس ولدج بالرحلة بس غريبة يلزمونهم من وين يشترون!!! اذا فلوسه وياه خلاص يشتري من وين ما يبي، و اليوم يننتني بنتي على ما لبست مع ان من امس اختارت شنو بتلبس بس اليوم قالت مو عاجبني و ما رضت تلبس دسوس تقول اكو جرح بايدها و يعورها، علشان تشوفين الجرح يبيلج مكبر بس اذا ما تبي تلبس طلعت لها 100 عذر

ريمان شلونج، احنا ما قالولنا نييب شي، عليهم بالعافية صف ولدج و ان شاءالله نشوفكم اليوم بحاول أييب بنتي اذا حسيت اني مو تعبانة

كاراميلا عاش من شافج، بشرينا شلون وليدج؟؟ عسى خلص المضاد و صار أحسن، ما يشوف شر ان شاءالله، اي والله أخيرا يانا شوية برد، بندش شهر 2 و ما حسينا بالشتا، انتي ديري بالج على نفسج و على ولدج هناك البرد ما يرحم و ان شاءالله تردون بالسلامة

 

[bella bambina]

صباح الخير أمهات
مرو وريمان وفوز وكراميلا مشكورين على السؤال عن دلول والشر ماييكم انشاء الله
دلول وداها زوجي المستشفى لثتها ملتهبة وايد ما أدري اشلون ما شافتها طبيبة المستوصف عطاها دوا يقوي المناعه ونوعين جل واحد حمايه والثاني علاج طبعا أمس بعد ما رضت تحط شي بحلجها بس تشرب حليب وغصب تبطل حلجها فما حطينا الدوا عدل قال اذا تظل بدون اكل لازم تنام بالمستشفى يحطون لها درب بس امس تتحرك بالبيت عقب ما شربت الحليب عطاها شوية طاقه بس مافيها قوه تروح المدرسه وطبعا ميته قهر من طبيبة المستوصف ودي أروح أشتكي عليها بس ماصار عندي وقت

 

[Fouz]

أهلين بيلا
ألف لا باس عليها و ما تشوف شر ان شاءالله
عطيها روب اللي على نكهات اذا تحب أو ايس كريم يتراوالي سهل بالاكل و ان شاءالله تصير أحسن اليوم و تاكل لها شي

 

[bella bambina]

هلا والله فوز الشر ماييج حبيبتي المشكلة دلول أكلها وايد صعب ما تاكل الا روب سادة وقال الدكتور لا تعطونها روب يمكن عشان فيه شوية حموضه وشريت كاسترد وبودينغ جم نوع محد من عيالي يحب ياكل هالأشياء وعندي بالبيت برد فانيليا تحبه بس ما رضت تاكل تقول يعور والله اليوم عورت قلبي شافتنا طالعين وقامت تبجي تبي تروح المدرسه امس شريت لها وايد هدايا عطيتها وحده عشان تسكت

 

[ReeMaN]

مساء الخير امهات العالميات شلووونكم مع البرد اليوم صج صج صج برد الصبح لبست ولدي كووت ....مع الصبح مافي ازدحام بس الساعه عشر ونص ماشالله زحمه مو طبيعيه....

بيلا شلون بنتج اليوم انشالله احسن ثلجي العصاير اللي تحبها وخليها تاكله مثل البرد يبرد لثتها

سلامات حفيدتج مروو مسيكينه توها طالعه من مرض الله يشفيها

فوز شلونج الحين انشالله احسن ... عموما اغلب اليهال يستعسرون الصبح خاصه الجو باااااارد واي الماي الفير صقققققعه ودج تردين

فراشج وتلحفين ... عسى راحت بنتج عقب مااختارت اللي تبيه

 

[Fouz]

هلا والله ريمان، صاجة طلعتهم اليوم زحمة مو طبيعية و أبيخ شي اذا سكروا عليج و نزلوا
اي أشوة اقتنعت باللي تبيه و راحت المدرسة و من ناحية البرد بصراحة يا شين القومة الصبح تقعدين الياهل و الود ودج تنامين يمه

مرو سلامتها حفيدتج توني انتبه لما قريت رد ريمان

بيلا أشوة ان هاليومين اجازة و يمديها تتعافى ان شاءالله و ما تظل بروحها يضيق خلقها، ، عندهم رحلة الجزيرة الخضرا بتاريخ 18 فبراير زين يسوون خل يونسون اليهال، و اذا ما اخذتي الفولدر مالها يبون أشياء بحرف t هالاسبوع و الاسبوع اللي وراه حرف h

كاراميلا الحين أصور لج الورقة علشان تقرين التفاصيل

 

[mr000]

سلام أمهات اشلونكم.. ماتشوف شر بنتج بيلا.. مسكينه عورت قلبي.. صج لو ترضى تاكل روب الفواكه أو الدانيت يعطيها طاقه أو كورن فليكس تخلونه يذوب بالحليب أو تشرب عصير منجا بارد.. مشكله اليهال مع الأكل لما يمرضون.. بنت ولدي لما تمرض حتى الحليب ماترضى تشربه تشوفينها حتى ماتقدر تمشي..ريمان آنا قلتله أنت أخذ فلوسك وهناك اشترلك من مطعم ثاني .هم خذوا عليهم 3دنانير حق وجبه وتذكره...

 

[Fouz]

كاراميلا هذي ورقة الاسبوعين اليايين






لازم تحددين موعد الاجتماع اذا بتكونين موجودة ان شاءالله، و تحديد الموعد يبدي من الاحد ان شاءالله، اذا تبين أكتب لج الموعد قوليلي تقدرين تدزين التفاصيل على الخاص اذا تحبين

 

[caramella]

السلام أمهات
إشلونكم و شخباركم
مشكورين عالسؤال على ولدي
والله الحمدلله ولدي بعده عالمضاد و أمس شفت الدكتور قالي إذا مو لي هالدرجه ضروري إنج تردين لا تردين خلينا نتابعه هني شوي بعدين ردي لأنهم بعدهم قاعدين يتابعون مزارع الدم ملوته فا قررت إني أرجع مع ريلي لأن اخاف ارد و يصير فيه شي تالي اتحسف
ما تشوف شر حفيدتج مرووو وعليه توها قايمه من مرض
مرووو هم حلو ماكدونالدز ليش ولدج ما يحبه ولا مو عاجبته سالفة إنهم حادينه على هالمطعم
تصدقون آنا بديت الاحظ شي عالمدرسه بس إنشالله ما يكون ظني جذي
أحسهم دايما يشجعون الصناعات الأمريكيه
تذكرون في بداية السنه لما عطونا ورقة الطلبات ؟؟؟
والله بلا مبالغه كل الأشياء اللي طالبينها من ماركه معينه صناعة أمريكا يعني أغلب الأشياء اللي شريتها صناعة امريكا ما عدا الكلينكس طبعا
مسكينه بنيتج بيلا والله دكاترة المستوصفات عديمين إحساس حرا عليكم طفله تعبانه ما تعرفين تطلين بحلجها عدل
حبيبتي فوز ما قصرتي على تصوير الأوراق
أدري أذيتج بس ممكن طلب صغير
آنا ودي بنسخة الإسبوع اللي فات و هالإسبوع بالإنجليزي عشان اقدر اسوي سيرج على كل بند و أطلع إشلون طريقة تعليمه عشان اعلمه
مثلا القصه اسوي عنها سيرج و اقراها له سامحيني فوز اذيتج بس غذا تقدرين مو لازم
فوز ما اعتقد راح ارجع قبل هالتاريخ مال الإجتماع
اليوم إخوي راح ودى الأبليكيشن مال حجز السنه اليايه
آنا دازته من قبل جم يوم دفع باجي رسوم السنه و رسوم السنه اليايه قالوله ما راح نأكد حجز الكرسي إلا لما الوالدين يكتبون الأبليكيشن و يدزونه قبل 31/1 ولا يعتبر الكرسي مو محجوز حتى لو دافع 350 المهم إخوي دفع ذاك اليوم ودز لي الأبليكيشن بالإيميل طبعناه و عبيناه و ردينه دزيناه له بالإيميل
و تمت العمليه الحمدلله وداه اليوم و إرتحنا من سالفة حجز الكرسي

 

[Fouz]

أهلين كاراميلا و ان شاءالله يتعافى ولدج و ما عليه الا العافية يا رب
أفا عليج ما طلبتي شي الحين أحط لج النسخة اللي بالانجليزي
هذي نسخة هالاسبوع





عطيني دقايق اشوف ورقة الاسبوع اللي فات بفولدرها و أنزلهم لج