تجمع امهات العالمية الامريكية

[omlolo]

بنات شلونكم وشخباركم
انا اليوم رحت المدرسه اسأل عن تسجيل ال كي جي 1 يزاكم الله خير اللي قلتولي روحي
تصدقون انا داقه تلفون قالولي تعالي شهر 3
رحت اليوم جان تقولي بدينا تسجيل وبسرعه ييبي الاوراق لان خلاص مافي وقت قلتلها بس انا دقيت قالولي 3 جان تقولي لا غلطانين
اشوه اني رحت دعيتلكم والله من كل قلبي وادعولي يقبلون ولدي يارب

 

[mr000]

omlolo ان شاءالله يقبلون ولدج وترتاحين..موفقه ان شاءالله.. انصحج تعاملي مع وحده بالتسجيل اسمها جيهان وايد حبوبه وويهها سمح وخدومه!مكانها تقريبا ثاني وحده بالويه أول ماتدشين!!

 

[ReeMaN]

هلا والله امهات العالميه شخباركم حبيباتي انشالله بخير شلون حفيدتج مرو عسى خفت عنها الكحه وولدج اشلونه اليوم انشالله احسن

بيلا شخبارج عساج بخير شلون بنتج بالصف هاليومين انشالله ماعاقبوها بالتايم اوت ..... فوز شلونج شلون رويلاتتج انشالله احسن ؟ رحتى الطبيب ؟

ولدي الحمدلله احسن مافيه حراره بس كحه وغيبته هاليومين انشالله باجر يداوم ....

جولي الكويت مثل ماقالت ام لولو بدو التسجيل ولحقو عليهم وانشالله يقبلونهم وتشاركونا بتجمعنا ... ام لولو انا مع مروو روحي حق جهان وساليها على امتحان القبول راح تساعدج بطريقه اسئلتهم انشالله ... اتصدقين مروو اموت عليها هالجيهان اتهبل صج خدووووومه و مرات امر اسلم عليها وعندج ريم بعد حليوه بس اغلب تعاملنا مع جيهان ولا اشتهي اطل بويه هاله ماادري شلون حاطينها رئيسه قسم التسجيل ..

كاراميلا صنج مصختيها يالله عاد ردي علينا .....

 

[ReeMaN]

مروو الولد اللي اخذ الفرنسي يمكن عنده خلفيه بلفرنسي ويعرف له وسووله اختبار وقدر يكمل مع اللي بصفه ..

بس جنى احسن ماياخذ فرنسي احسه صعب ... اتذكر ايام الثانويه اخذت فرنسي كانت ماده اختياريه مو اجباري اخذته اسبوع وانسحبت من الماده ماااعرفت اركب كلميتن على بعض اغص وانا اتكلم نفسهم

 

[mr000]

أهلين ريمان لا التكامل ماكان عندهم فرنسي حتى العام لما نقلت ولدي العالميه حق 7 شفت أم رفيجه بالتكامل يعني هم راح 7 هناك تقولي قالولنا هالسنه راح ياخذون فرنسي وصارلهم شهرين ليلحين مابدوا يعني متأكده هالولد ياي 6 مو ماخذ فرنسي من قبل! مادري ريمان آنا عكسج أحب الفرنسي وأحس أنه أسهل من الأنجليزي تدرين أحنا على وقتنا الثانويه العامه وايد تدريسهم أقوى يعني درسناه سنتين بس قمنا عادي نكتب مواضيع انشاء ونفهم حق الترجمه والانجليزي شوفي كم سنه ندرسه وهم لغتنا تعتبر ضعيفه خاصه بالمحادثه مع ان بالثانويه اشكثر درسونا قواعد وتعبير وهم بالجامعه وكنت آخذ درجات كامله بس هم مانفعنا وايد... دايما أحس جني انتصار الشراح في مسرحية باباي لندن لما قالتلها أمها وع عليج هذا وانتي متخرجه من الجامعه وكلمتين على بعض منتي عارفه تقولين!!

 

[mr000]

بصراحه الله يعين الطلبه كلهم موبس ولدي اللي يروحون تيوترينج لي الساعه 4 أو 4 ونص آنا قاعده نفس وقته الساعه6 ألا ربع والله خلاص طفت بطاريتي دخت بنام اشلون هو لازم يكون منتبه طول اليوم ودراسه وامتحانات وتقويه بعد الدوام ومن يرجع البيت قلناله يلا أدرس ماكو وقت حتى يرتاح... يعني صج المدارس الأجنبيه مافيها دلع ولاراحه!!

 

[bella bambina]

مساء الخير أمهات
جولي آنا ما أعرف سوالف سايت وهالأشياء آنا أكتب uas وبس بعدين أختار اللي بالكويت ( عادي غشيمه )
هلا والله ريمان لا ما قعدوها بالساد جير هاليومين على حسب ما تقول لي الله أعلم
مروو وريمان سلامتهم عيالكم ما يشوفون شر
فوز شفتي المساعدة الأمريكيه اليديده بنتي الكبيرة تقول كانت مساعدة صفهم السنه خذينا منهم مس سومالي ونحشناها الله يستر هذي اشبيصير فيها فقيرة

 

[ReeMaN]

مساء الخير يالغاليات شفتو المطر شحلااااااااته تبارك الرحمن

مروو هالباي باي لندن على كثر مااطالعها مااشبع منها جنى اشوفها من اول مره

هلا بيلا الشر ماايج مشكوره ياقلبي .... وانشالله هالمدرسه اليديده اتصير احسن من اللي راحت وتثبت الى اخر السنه انشاءالله

 

[mr000]

سلام أمهات اشلونكم!

 

[Fouz]

شلونكم أمهات شخباركم

بيلا اذا انتي موجودة الحين بليز قوليلي شنو طلباتهم حق باجر، انا اذكر يلبسون تريننغ و يبون كبوس ،، أكو شي بعد؟ لاني ما لقيت الورقة و مشكورة مقدما
اي شفت المدرسة الامريكية و الله يستر ما تتقبس بهالصف و تنحاش، ان شاءالله يكون فيها خير و يستفيدون منها اليهال

ريمان شلونج و الحمدلله ان ولدج صار أحسن و بيداوم باجر، الله يسلمج رحت الطبيب و زاد لي جرعة الكالسيوم و قالي احط مطارة دافية تحت ريولي مكان الألم و الحمدلله وايد خف العوار


جولي حياج الله و هذا السايت مال المدرسة
http://uas.edu.kw/
و التسجيل حسب ما قالت ام لولو ابتدى

أم لولو الله يسهل الامور و ان شاءالله ينقبل ولدج و انا كاتبة اسئلة المقابلة بالتفصيل عاد اخذي فرة بالموضوع و تلاقينه ان شاءالله


مرو شخبارج، صاجة الله يعينهم، انا اليوم نمت الصبح مع اني ناوية أمر مذركير ابي جم شغلة بس والله ماكو نوم بالليل تكرمون كل شوي ابي حمام، عاد طلعت الساعة 11 و نص و مريت بلازا و قبل طلعتهم من المدرسة رحت لأن توصلين بخمس دقايق، على طاري الفرنسي ما اعرف شي فيه ولا عمري درسته، ودي اخذ دورة بخدمة المجتمع ملوت الجامعة يمكن اتعلم شي

 

[mr000]

سلام أمهات! زين سويتي فوز رحتي بلازا لأنه فيه شغلات وايد حق اليهال والله ذكرتيني فيه خل أروح باجر أشوف حق الصغيره ماقلت لكم شسمها( داليا)! أقولج فوز أذا فيج حيل روحي باجر مجمع مريم بالسالميه المحل اللي بالسرداب أسمه السرداب فيه ملابس أطفال كل الماركات وتحصلين حق بنتج واعتقد حتى حق البيبي.. عنده تنزيلات وايد تلاقين شغلات حلوه! حتى حق الأولاد! بيلا ريمان روحوا شوفوه!!والله ذكرني بمحل بليز مام اللي بلندن !!

 

[Fouz]

صباح الورد أمهات
الجو عجيب برة، بس ان شاءالله ما يكون برد وايد على اليهال و عسى يستانسون بالرحلة اليوم
شخبارج مرو، الله يخليلكم داليا و ان شاءالله تشوفون لها اخت او اخو قريب، السرداب مال مجمع مريم حلو و تحصلين فيه شغلات، و الحين الكل مسوي خصم هذاك الاسبوع لحظة من فضلك 75% و اذا افتريتي عدل تطلعين اشياء تسوى لان الغالب تحسينهم مو زود لان الناس ماشاءالله ما تخلي شي

 

[bella bambina]

صباح الخير أمهات اشلونكم واشلون عيالكم ؟
فوز توني أبطل المنتدى وأصلا ناسيه سالفة الرحلة ولا حطيت لها شي بس الجو دافي ومافيه شمس ويمكن يكنسلون الرحله عشان المطر الله يسلمج أمس كان بالي مشغول متأخره علي 10 أيام وآنا عمري ما تأخرت علي سويت 3 تحاليل بالبيت ما فيه حمل بس قمت أوسوس رحت سويت تحليل دم الحمدلله مو حامل بس غريبه عوار بظهري وجسمي وارم وطايحه بالدارسين والزنجبيل والأناناس وماكو شي ان شاء الله بالويك اند اروح الطبيب

 

[jolie_q8]

صباح الخير

مشكورين على السايت

انا قاعدة افكر انقل عيالي من التكامل للعالميه عندي واحد يروح ثانيه - والثاني ثروح ثالث

ابي نصايحكم ,, وخاصه حق الامهات اللي ناقلين عيالهم ,, يسوون لهم اختبار قبول ؟

والا عادي اسجلهم على طول

انا توقعت التسجيل شهر 3 ! اذا جذيه بروح الاحد ان شاءالله

بس ياليت تفيدوني

اذا بتسألون ليش ابي انقلهم من مدرستهم ,,

لانه ماحس انهم بمدرسه خاصه ,, اولا اكرف معاهم ,,بالتدريس وثاني شي ماحس انه في اهتمام وثالث شي صفوفهم صارت زحمه

رابع شي انشطتهم محدوده !

هذي العيوب اللي اشوفها بمدرستهم الحاليه ,, ابي تفيدوني ,, شلون الوضع عندكم خاصه للامهات اللي بعمر عيالي

ومشكورين وماقصرتو

 

[omlolo]

مشكورين بنات ماقصرتوا
انا رحت اليوم اودي الاوراق قالولي نطري اخر الشهر اندق عليج على المقابلة
واللي رحتلها اسمها ريم
ان شاء الله نخلص على خير والله ودي ينقبل وافتك مالي مقاقه الف على باجي المدارس

 

[Fouz]

هلا بيلا شخبارج
لا تحاتينها وايد لانها ما راح تييج من كثر المحاتاة، و دام حللتي ماكو حمل فماكو الا الخير، عاد الزنجبيل وحدة بوحدة
توني مكلمة رفيجتي هم ولدها رايح الحديقة اهما بالابداع، و ان شاءالله ما يكنسلون الرحلة وعليه بنتي مشتطة بنروح الجنقل قلت لها مو جنقل مو راضية تقتنع

هلا جولي
يمكن بيلا تفيدج لان عيالها صغار الله يحفظهم، انا بنتي بكي جي ون يعني ما نقلتها من مدرسة ثانية، و ريمان ولدها بكي جي تو ناقلته من مدرسة ثانية و مرو بعد ناقلة ولدها بس ماشاءالله قريد 8 اذا مو غلطانة، بس اهما يسوون اختبار قبول حق الكل و على حسب المرحلة، ان شاءالله يفيدونج الخوات، و اذا تبين تودين الاوراق ترى الادارة يداومون السبت لي الساعة 12

أم لولو زين سويتي انج رحتي و ان شاءالله تبشرينا بقبول ولدج، لقيتي اختبار القبول اللي انا كاتبته و الا لأ؟

 

[Fouz]

مرو و ريمان و كاراميلا شخباركم

ريمان عسى داوم ولدج اليوم و كحته خفت عن أول

كاراميلا من غير شر من زمان عنج، طمنينا حتى لو تكتبين شلونكم و بس

الحين بروح المدرسة بختار الصور و ادفع رسوم الحجز، كل يوم أقول اليوم يا اوصل متأخرة يا أكون ناسية الاوراق ، قلت دام اني فاضية بروح الحين أحسن

 

[omlolo]

هلا بيلا شخبارج
لا تحاتينها وايد لانها ما راح تييج من كثر المحاتاة، و دام حللتي ماكو حمل فماكو الا الخير، عاد الزنجبيل وحدة بوحدة
توني مكلمة رفيجتي هم ولدها رايح الحديقة اهما بالابداع، و ان شاءالله ما يكنسلون الرحلة وعليه بنتي مشتطة بنروح الجنقل قلت لها مو جنقل مو راضية تقتنع

هلا جولي
يمكن بيلا تفيدج لان عيالها صغار الله يحفظهم، انا بنتي بكي جي ون يعني ما نقلتها من مدرسة ثانية، و ريمان ولدها بكي جي تو ناقلته من مدرسة ثانية و مرو بعد ناقلة ولدها بس ماشاءالله قريد 8 اذا مو غلطانة، بس اهما يسوون اختبار قبول حق الكل و على حسب المرحلة، ان شاءالله يفيدونج الخوات، و اذا تبين تودين الاوراق ترى الادارة يداومون السبت لي الساعة 12

أم لولو زين سويتي انج رحتي و ان شاءالله تبشرينا بقبول ولدج، لقيتي اختبار القبول اللي انا كاتبته و الا لأ؟

هلا والله من اليوم ادور مشاالله ووايد صفحات
حبيبتي ماتذكرين بأي صفحة حاطه الامتحان ومشكوورة وايد ياقلبي

 

[Fouz]

أم لولو خليني أشوفه لج و أحطه مرة ثانية ان شاءالله الاقيه الحيم

 

[Fouz]

أم لولو هذي مشاركتي السنة اللي فاتت

يالله زهبوا روحكم حق التفاصيل

الله يسلمكم قاعدة من الساعة 6 جنه انا اللي عندي امتحان و قعدت أساحل فيها ساعة علشان تقوم و ما تتعسر وقت المقابلة و عقب الحنة و المساحل قعدت



لما اقعدت قالت لي ابي صبغ اظافر قلت حااااااااااااااااااااضر بس اهم شي المزاج يكون عدل وتالي وكلتها و شربت حليب الكاكاو لان على ما تخلص المقابلة الا حضانتها متريقيين


وصلنا مكتب التسجيل الساعة 8:30 و المقابلة 9 المهم ما بقى شي ما وعدتها فيه جان تقولي ابي pop corn هههه والله قنوعة جان أقولها انا خاشته بالسيارة و اذا جاوبتي عدل اعطيج اياه مادري ما ترسوا عينها الالعاب و الكاكاو اللي ترس السيارة

و انا انطر طلعت لي وحدة أجنبية و شعرها اسود ملفلف و قالت لي دقيقة و اييج،،، جان أقول الله يستر عسى مو هذي الناشفة مالت ريمان،، دخلنا و قامت تسألها و اللي عندي ابد و لا حرف بصراحة ينيييت جان تقولي dont worry
تالي اسألتها جم عمرج جان تسويلها بايدها 3 ما تبي تنطق و بعد جهد جهيد قامت ترد عليها بس بصوت يادوب ينسمع
الاسئلة كانت:
1- جم عمرج

2- عطتها puzzle فيه أحجام مختلفة من elephants و قالت لها رتبيهم في مكانهم،، تالي حطت لها 3 أحجام و قالت لها عطيني الكبير بعدين الصغير تالي الميديم

3- عطتها شكل نجمة وقالت لها شنو هذي و بعدين طلعت لوحة فيها أشكال و قالت لها تسوي ماتش و تحطها على النجمة اللي باللوحة

4- تالي اسألتها عن الاشكال مربع بيضاوي مثلث مستطيل دايموند عاد بنتي عندها عقدة triangle o rectangle نطقهم نفس الشي فوايد تتخربط بينهم

5- بعدين دور الألوان توريها اللون و تخلي بنتي تجاوب

6- تالي تييب خرز كبار مع خيط و توريها شلون تدخله و تقولها دخليهم كلهم ( كانو ثلاث خرزات كبار)

7- يابت ماعون فيه جلاليب ملوت الهدوم و قالت لها شيلي واحد واحد و حطيهم بالماعون الثاني

8- علقت 6 جلاليب على طرف الصحن و قالت لها عدي و انتي تأشرين على الجلاليب

9- حطت صور مختلفة و قالت لها وين السيارة وين الشوكة وين الفراولة.....اخر شي قالت لها وين الدلاق جان تأشرلها بنتي جان تسألها do we eat socks?? بتشوفها تفهم ولا بس حافظة الاشكال

10- اخر شي كتبت لها اسمها و قالت لها شنو هذا جان تقولها الاسم قالت لها منو هذي فأشرت على روحها

قالت لها روحي اختاري اي لعبة على ما أكلم امج سألتني عن عدد الاخوان المشاكل الصحية المشاكل الاجتماعية شنو هواياتها شنو كتابها المفضل شنو اللغة اللي تتكلمون فيها بالبيت

و قبل لا نطلع ورتها ستيكرز و قالت لها اختاري و لزقته على ايدها و سوت لها هاي فايف و قالت خلال الاسبوع ندق عليكم و توكلنا على الله

عسى ما مليتوا؟؟؟؟؟ هذي كانت المقابلة بالتفصيل


اجمالا بنتي سوت زين بالنسبة لي لانها كانت مرتبكة و مستحية بس اللي تقابلها كان بالها طويل و اكيد فاهمة الوضع

و الله كريم ان شاءالله ربي يكتب اللي فيه الخير


ان شاءالله تفيدج الاسئلة أم لولو