تبين عيالج يصيرون مميزين .. تعالي هني فيدي واستفيدي

[عبق البنفسج]

أمواج البحر
مشكورة عالتوضيح أختي
صح كلامج

شيماء المطيري
شهالأبلة بعد؟؟
نصيحة روحي كلميها وقوليلها انا معلمة عيال يغسلون بماي وصابون وانتي قاعدة تخربين تربيتي وتعلمينها شغلات غلط وانتو المفروض بمدرسة تعلمونهم الصح مو الغلط .. الخ

 

[opera]

عبق البنفسج توني كاتبه رد على سالفت الايباد

شوفي انا ماني تربويه ولا متخصصه بعلم نفس الطفل


بس اللي انا اشوفه انه الياهل بهالعمر يكون غض و خلاياه بعدها ترفه وبطور النمو

وكلنا نعرف مضار هالاجهزه عالياهل وعلى اجهزة الجسم


فانا اشوووف انه لازم انمي جسمه وقدراته العقليه والحسيه والحركيه والفكريه باشياء ملموسه

مثل الالعاب التعليميه و الحركيه اللي منها يشغل تفكيره و يحرك جسمه ويبتعد عن اشياء تضر اعصابه وعيونه

 

[عبق البنفسج]

شموسة كيوت
امممم بنسبة لي ما أجذب عليهم بس أهول لهم السالفة :d
مثلاً البيبسي علمتهم انه يعور البطن وصج البيبسي مضر بالصحة بس هما ماراح يعرفون شنوو مضاره على العظام فأقولهم يعور البطن ..
والحلاو الصيني كله ألوان صناعية ومواد حافظة فلو مهما أقولهم ان الألوان الصناعية مضرة بالصحة ماراح يستوعبون فأقولهم ان بطنا يعورنا ونصير مرضى اذا كليناه ونفس الشي بنسبة حق مطاعم الفاست فود قبل كنت أعطيهم بالاسبوع مرة وحدة وقبل سنة وشي بنتي صار فيها نزلة معوية وطاحت بالمستشفى وقبلها بيوم كانت ماكلة ماكدونالدز فقتلها هذا كلا من الماكدونالدز وقتلها حقها وحق خواتها ان ماكدونالدز يعور البطن ويخلينا نطيح مرضى ومن هالسوالف وقتلهم كيفكم اذا تبون تاكلونه كيفكم بس انا مالي شغل اذا طحتوو مرضى وقمتوو ترجعوون فعقبها كرهوو هالمطاعم ..

opera
بنسبة للآي بود حاطتلهم كلا برامج تعليمية وصج تعلموو شغلات حلوة منها ..
بس صح كلامج الجهاز مضر على أجهزة الجسم .. بس شنسوي اذا ما العبوو بالآي بود يبون تلفزيون أو غيره وكلهم نفس الشي

 

[عبق البنفسج]

تذكرت شغلة وودي أفيدكم فيها ..
طبعاً أكثرنا عيالنا يحبون الأندومي وفي يهال يعشقونه مثل عيالي وعادي عندهم لوو تغدوو وتعشوو اندومي والعصر اندومي والأندونيسية الي كانت عندي شغالة تسوي لهم اندومي المهم قبل سنتين أو أكثر شوي قريت بالانترنت عن مضار الأندومي فقلت بقطعه عن عيالي بس شلووون ..
أول شي قررت اني أغير مكان الأندومي بالمطبخ وقتلهم ان الأندومي خلص واذا رحت الجمعية بشري لكم وقلت حق الخدامة اكلي انتي الاندومي ولا تعطينهم وخلاص نسووو السالفة وعقب سالفة الماكدونالدوز قتلهم ان حتى الاندومي يعور البطون والحمد الله افتكينا من الأندومي

 

[أمواج البحر]

زين سويتي عبق

انا ماحب الاندومي ومادش بيتي ابداااا

ولانهم يحنون علي يبون يذوقونه ... يشوفون الدعايه وتبتدي الحنه

فاستبدله بشوربة مع معكرونيه العاديه او الشعريه

و وااااااااااايد حبوها الحمدلله

 

[ام اغلى الناس]

ما شاء الله
الله يخليهم لكم
انا للحين ولدي صغير اسم الله عليه
بس ان شاء الله يطلع مؤدب و هادي
لاني اشوف ناس واجد عيالهم بمدارس خاصه و غاليه و بالاخير مو محترمين
لا تنسون بنات تدخلونهم دورات بالمسجد لتعليم القران
و بالمعهد بالصيف لتقوية الانجليزي
و الادعيه و الرقيه على نفسهم

 

[love love]

اب اب

يعطيكم العاافيه


بنات ودي اعلم بنتي قران قلت السور القصيره مثلا المعوذات بس اهي مشكلتها نطقها بالعربي مو عدل اخاف اعلمها وتحرف الايه من غير قصد
ومرات اقول بالعكس يمكن القران يقوي عربيتها وشدها عالاحرف لانه حروفها مو مضبووطه
تهقون ابدي قبل لا تنام اقراها كل يوم نفس السوره يمكن تلقطه؟؟ واشغل لها من فتره لي الثانيه العفاسي يقول السوره؟؟؟

مادري شرايكم هالفكره الي يتلي تنفع؟

 

[opera]

love love

يقولج احسن فتره للحفظ اهي وقت النوم او اول مايقعد من النوم لانه يتركز بالعقل الباطن

كل يوم اقريلها وانتي تنومينها .. ومع الايام بتشوفينها احفظتهم وتقول معاج

 

[عبق البنفسج]

أمواج البحر
زين سويتي ...
عاد مادري على شنوو يحبون الاندومي .. الحمد الله عالنعمة

ام اغلى الناس
شاكرة لج مشاركتج ونصايحج المفيدة ..
صح كلامج لازم نعلم عيالنا الرقية والأدعية وحفظ القرآن

love love
جم عمر بنتج؟؟
براييي ابدي معاها أول شي بالمسجلة .. خليها كل يوم تسمع القرآن قبل لا تنام وعقب اسبوعين خليها تحفظ ..

opera
صح كلامج أحسن فترة للحفظ هي قبل النوم

 

[انوثة من حرير]

انا علمت بناتي مايعتمدون على الخدم تبي شي تقولي او تخدم نفسها هي الي تيب نفسها ماي او اي شي سهل عليها قاعدة اعلمهم على مسولية خواتها انها دير بالها على خواتها الصغار والعكس مخلية الخدامة للبيت وتلاحظ بنتي الصغيرة
بنات الخدم دمار لعيالنا ديروا بالكم من الخدم بذات الاثيوبية حتى لوكانت تهبل جدامج اعرف يهال لعبة بنفسية عيالهم والام مو حاسة والله يكسرون خاطري هاليهال الي دايم مع الخدامة عبق البنفسج وامواج البحر وللجميع الامهات شنو دور الخدامة مع عيالكم

 

[جلكسيه اس 3]

اناااا بقعد قعده حق اعيالي
بس المشكله عندي معهد

صاارلي جم يوم اعلم ولدي على الحمام
واعلمهم يقطون الوصخ
في الزباله
واقول حق ولدي
لما اقولك شي قول ان شاء الله
اشوفه صاير احسن من اول
وقاعده اعلمهم يقولون بسم الله والحمدلله

وان شاء الله ارجع لكم مره ثااانيه
بنااات بسالكم بنتي عمرها سنتين اعلمها على الحمام
ولا توا الناس

 

[أمواج البحر]

انوثه ... والله الخدم شر لا بد منه

بس الحمدلله اعتمادي على الخدم للطباخ و التنظيف

و عندي وحده مخليتها للتوينز عمرهم سنه ونص

بس من ارد من الدوام تييبهم على طول

الكبار اسم الله عليهم معتمدين على روحهم

بس شغله وحده اذا بغو شي من المطبخ يقولون للخدم

لان ما احب اليهال يدشون المطبخ

سبحان الله يلعبون بسجين بالجباريت

وحاطه ثلاجه صغيره بالصاله فيها ماي وعصاير وخفايف ..ز عشان اذا بغو هالسوالف تكون قريبه منهم

الحمدلله خدمي وايد زينين ... والله يهديهم ويحنن قلبهم على عيالي

 

[love love]

عبق البنفس عمرها 3 اسم الله عليها

اوبرا اي صح اتذكر هالحزه كنا نحفظ اول لوووول

 

[jakoora2008]

بنات حبيت اشاركم بغيت اسال امواج البحر اتقول عن الاب خلهم يحترمونك مو يخافون منك فبغيت اعرف اشلون الاب يشارك بتربيه الاولاد ويخليهم يحترمونه ويحسبونله حساب ودي اعرف اشلون

 

[هلوكيتي]

اب اب اب للفايدة

 

[عبق البنفسج]

انوثة من حرير
صح الي قاعدة تسوينه لازم اليهال يتعلمون يعتمدون على نفسهم
بنسبة لدور الخدامة عندي .. بما اني جريب السنة ماعندي خدامة فأنا أسويلهم كل شي .. وقبل السنة كان عندي أندونيسية وهي أول خدامة تكون عندي .. أيامها بس بنتي الصغيرة تروح المدرسة فتقعد الصبح تلبسها وتوكلها ويظلون عندها بناتي الثنيتين الي مايروحون مدرسة والصغيرة قبل لا أسكن عند أمي كنت أوديها كل يوم حق أمي لأني ما أحط بيبي أقل من سنتين عند الخدامة .. ولما أرد من الدوام تكون موكلتهم لأني أرد من الدوام الساعة 3 وشي وعقب أنا أستلم العيال أسبحهم أو مرات هي تكون مسبحتهم وعقب هي تروح تسوي شغلها وأنا أجابلهم واذا بغيت أنام أخليهم يطالعون تلفزيون بالصالة أو أعطيهم ألوان وأروح آخذي قيلولة بوساعة وبليل أنا وياها نعطيهم العشى ..
يعني هي تقريباً تجابل العيال وقت دوامي بس وعقب الدوام أحاول أكون معاهم بأكثر وقت ممكن..

سكرتير مستقبليه
حلو الي قاعدة تعلمينه لأن الياهل بسرعة يستوعب ويتعلم وهو صغير ..
بنسبة حق تعليم الحمام حق عمر السنتين والله في بنات قدرو يعلمون عيالهم بس أنا دايماً أعلمهم لما يكملون الثلاث سنين
أنا حاولت أعلمهم عقب السنتين بس وايد تعبت ووقفت وعلمتها عقب الثلاث سنين وتجاوبت معاي بسرعة

أمواج البحر
زين تسوين حاطة ثلاجة صغيرة حق اليهال .. أنا ماعندي مكان بالصالة جان حطيتلهم بس عالعموم انا دايماً أطلعلهم عصير وماي وشغلات جذي أحطلهم ااياه بالصالة

love love
عادي بهالعمر يغلطوون بالأحرف بس اذا استمرت لي عقب سنتين ثلاث وديها عند اخصائي .. عندي بنتي عمرها 4 سنين ونص الأحرف ماتنطقها عدل تعرف تحجى وتقول كل شي بس الأحرف ماتقولهم عدل فكلمت الروضة وقالة ان في اخصائية تمرهم وقالولها عن بنتي فقالت عادي بس اذا استمرت بهالشغلة لي ثانية روضة يعني لي عقب عمر 5 سنين هني لازم يشوفها اخصائي
وعادي أنا أحفظها آيات وماشية معاي

jakoora2008
حتى انا ودي أعرف
شلون أخليهم يحترمون أبوهم ومايخافون منه ..

هلوكيتي
ناطرين مشاركتج

 

[opera]

يتراوالي احترام الابو اهو اللي يسويه

يعني في ابهات تلاقينه بس يدش البيت نفسيه وصراخ و طق بالعيال وياويله اللي يحاجيه هذا صايرلهم عنتر اكيد بيخافون منه


اما الابو اللي يدش البيت و يسلم على عياله و يسولف معاهم ويلعب معاهم ووقت الجد يصير جد هذا اللي يحترمونه


والام دورها انه تقول حق عيالها وتعلمهم مثلا يستأذنون منه اذا بيطلعون او ياخذون رايه بشي و تعلمهم يحبونه و مايزعجونه بوقت راحته وتعلمهم حتى لو ماكان بالبيت يدقون عليه يستأذنونه ( وهالشي يعلمهم انه بغيابه وحضوره ما يتغير شي )

 

[opera]

الحين انا عندي سؤال شلون تخلين الياهل عيونه مليانه او مثل مانقول شايف خير

يعني انا اشوف في يهال ماشالله على اهاليهم مو مقصرين معاهم بشي و كل شي يعطونهم و يشترون لهم بس فوق كل هذا عيونهم ضيجه ويطالعون اللي بيد غيرهم

و في يهال اهلهم حارمينهم من كل شي وهمن عيونهم ضيجه

وفي يهال ما شالله تلاقينه يقتنع بلللي عنده



انا عن نفسي دايما احبب ولدي بالشي اللي عنده وحتى لو يه وقالي ماما ابي نفس فلان او مرات يبجي يبي لعبه بيد غيره

امسكه و احاول اقنعه انه الشي اللي عنده حلو ومميز

حتى مرات يكون يبجي على لعبه مثلا عند ولد حماتي .. اشوف حماتي تاخذ اللعبه وتعطيه .. انا شسوي ارد اللعبه جدامه واقولها لا تعطينه مايبي
واقنعه انه اهو عنده العاب وايد حلوه و اذكره بلعبه يحبها

 

[رفرف]

الموضوع اينن وايد استفدت منه ..

انا بناتي 7 و4 سنين ..
معلمتهم اول ما نركب السيارة لازم دعاء الركوب نقوله جماعي واهمه يذكروني .. وبعدين لازم قرآن نحفظ شوية بالسيارة وبعدين نشغل ديفيدي او اي شي ثاني ..
طبعا شكرا ولو سمحت واسفة هذولي من صغرهم متعلمينهم ..
السلام اول ما ندخل مكان على الكل بس ليلحين مرات لازم اذكرهم ولا يلهون مع اليهال واللعب
معلمتهم ما يتقبلون اي كبير يمد ايده عليهم او يقولهم كلمة مو زينة مهما كان لأني انا وابوهم ما نمد ايدنا عليهم ولا نسبهم والله سبحانه وتعالى كرمنا لا احنا حيوانات ولا بهايم فما نتقبل احد يسمينا باسماء الحيوانات .. (مرة خالة ابوها سبتها قالت لها اسم من اسماء الحيوانات حشاكم جان تقولها هالكلمة عيب مو زينة ولو سمحتي انا الله خلقني انسانة مو حيوانة .. يعني ردت بأدب وخذت حقها)
معلمتهم ان المسلم من سلم المسلمون من لسانه ويده .. ما نمد ايدنا على احد بدون سبب .. ولا نقول كلام مو زين ما نسب ولا نعيب على خلقة الله ولا نجرح احد ..
معلمتهم ان ما نقول الله يقطك بالنار (مادري من وين متعلمينها عسى ما احد سوا شي الا قالوله الله يقطك بالنار) لأن الله سبحانه وتعالى خالقنا ويحبنا ما يقط الاطفال ابدا بالنار لأنهم احباب الله ..
لي بغينا نطلع اهمه يختارون ملابسهم ويشاوروني ويركبون عليها الاكسسوارات والشوز
علمتهم ان لهم راي ويناقشوني بحدود الأدب ..
علمتهم ان الام والابو اهم 2 في الدنيا .. وان كل وحدة مالها الا اختها صديقتها وحبيبتها واختها وعزوتها وما تبدي احد عليها ..
علمت الكبيرة تخاف على الصغيرة وتحاتيها ولما تعبر الشارع تمسك ايدها ولما تركب السيارة تركب اختها اول .. والصغيرة تطيع الكبيرة
علمتهم يتشاركون باغراضهم برغبتهم بس يبقى لكل وحدة خصوصيتها ...
علمتهم ناكل الاكل المفيد والصحي ..
علمتهم يعتمدون على نفسهم ويقررون قرارتهم بروحهم ويتحملون نتيجتها .. اللي ما تتغدا كيفها ماكو سناك .. اللي ما تلبس كيفها ما تروح معانا .. وهلم جرا ..
هذا اللي اذكره الحين

 

[أمواج البحر]

الحين انا عندي سؤال شلون تخلين الياهل عيونه مليانه او مثل مانقول شايف خير

يعني انا اشوف في يهال ماشالله على اهاليهم مو مقصرين معاهم بشي و كل شي يعطونهم و يشترون لهم بس فوق كل هذا عيونهم ضيجه ويطالعون اللي بيد غيرهم

و في يهال اهلهم حارمينهم من كل شي وهمن عيونهم ضيجه

وفي يهال ما شالله تلاقينه يقتنع بلللي عنده



انا عن نفسي دايما احبب ولدي بالشي اللي عنده وحتى لو يه وقالي ماما ابي نفس فلان او مرات يبجي يبي لعبه بيد غيره

امسكه و احاول اقنعه انه الشي اللي عنده حلو ومميز

حتى مرات يكون يبجي على لعبه مثلا عند ولد حماتي .. اشوف حماتي تاخذ اللعبه وتعطيه .. انا شسوي ارد اللعبه جدامه واقولها لا تعطينه مايبي
واقنعه انه اهو عنده العاب وايد حلوه و اذكره بلعبه يحبها

هذا اللي قلت عنه .. القناعه

لما الياهل يقنع باللي عنده خلاص ماراح تكون عينه ضيجه

عندي ولدي البجر الله يحفظه ويخليه

عنده قناعه رهييييييييييبه ... لدرجة اني في بعض المرات اخجل من نفسي جدامه

وسبحان الله اخوانه تعلموا من قناعته

لما الياهل من صغره يتعلم بانه يقتنع باللي عنده خلاص ماراح يطالع اللي بايد غيره