اتعرفون شي عن الــ Bento ؟ حركات وأكلات غريبة ..حياكم معاي ..

[milkshake]

هذي اهو شكل البيض بعد ما تقطعينه باستخدام القطاعة اللي حطيتها فوق ..وتقدرين اتسوين عيون وفم للراس الأصفر فيبين انه كتكوت طالع من البيضة..تقدرين تستخدمين الحبة السودة..



والحين راح اشرح لكم طريقة حلوة لعمل البيض ..تطلع في النهاية بالشكل هذا



الطريقة..اتيبين ملة (إناء) صغير وتحطين فيه بلاستك بس النوع اللي يستحمل الحرارة وتلاقينه ينباع في السوبرماركت..وتكسرين بيضة فوق البلاستك هذا..وتضيفين زيت زيتون او اي نوع زيت اتحبين ( انا ذوبت اشويت زبدة وضفتها فوق البيضة ) وحطي شويت ملح واذا اتحبين نوع بهارات ابراحتج..وسكري البلاستك وربطيه باحكام وخليه على جنب تقريبا نص ساعة



وبعدين حطي ماي في قدر وخليه يغلي بعدين حطي البيض المغلف في داخله لين ما تشوفين البياض ابتدا يتشكل مثل الصورة أعلاه..وشيليه متى ما حسيتي الصفار استوا بالطريقة اللي تحبينها ..البعض يحب الصفار مايع اشوي والبعض ايحبه جامد..المهم ان عينج لازم اتكون دوم على الكيس..ولما اتشيلينه خليه فترة لحد ما يبرد وبعدين بطلي الكيس وحطيه على التوست وبالعافية..

 

[milkshake]

حطيت لكم فوق صورة لبعض اشكال قطاعات السندويش .. وقلت لكم من قبل ان اليابانيين لتوفير الوقت..يقومون بتقطيع السندويشات ووضعها في الفريزر لكسب الوقت.. طبعا انا مافضل هذي الطريقة لكني باشرحها لكم يمكن بعضكم يستفيد منها خاصة للأمهات العاملات او اللي ماعندهم خدم يساعدونهم في البيت..





طبعا مو كل المكونات تصلح انها تتخزن في الفريزر..يعني الشغلات اللي مسموح انج اتحطينها في السندويشات وتفرزنينها اهي:
- الموز (سواء عليه عصير حامض لمنعه من التحول الى اللون البني او بدون)
- الجزر (مطبوخ أو ني)
- جبن سلايس (الشرائح)
- الجام
- شوكولاتة نوتيلا
- الطماطم
- زبدة الفستق
- المشروم أو الفطر (سواء مطبوخ او ني ولكن يجب ان يجفف جيدا عن الماء)
- انواع اللحوم المطبوخة (المارتديلا والببروني وغيرها)
- الخضروات الخضراء المطبوخة فقط مثل السبانخ

الحشوات اللي ممنوع انج اتحطينها في السندويشات وتفرزنينها (اتحطينها في الفريزر)
- الجبنة السائلة
- الخيار الني
- الخضروات الخضراء بجميع انواعها اذا كانت نية
- العسل
- المايونيز

طبعا شفتو في الصورة شلون طريقة لف السندويشات..لازم تنلف كل قطعة ابروحها باحكام باستخدام البلاستيك ثم يوضع الكل في علبة محكمة الاغلاق .. ويفضل اثناء التقطيع واللف اتكونين لابسة قفاز عشان البكتيربا..
ولما اتطلعينه من الفريزر اذا اتحبين سخنيه على الشواية او خليه على حاله في علبة غدا أولادج ومع الوقت راح تصبح حرارته مناسبة حتى حلول وقت الأكل في المدرسة..

 

[milkshake]

في هذي الصورة.. البنتو وايد بسيط بس بعد كيوت لليهال وللأمهات المستعيلين..طبعا مثل ما قلت لكم قبل التزيينات تنلصق فوق السندويش باستخدام الجبن السائل او العسل او غيرها..



والحين باعرفكم على أداة يديدة وحلوة وايد..طبعا اللي على اليمين هذي الــ Egg molds التي تكلمنا عنها من قبل..انا قصدي على اللي في اليسار .. هذي الله يسلمكم تكسرين فيه البيضة وتحطين الاضافات اللي تحبين (ملح فلفل اسود وزبدة مذابة مثلا) وتحطينه في الماكرويف ..


شوفو البيضة شلون شكلها يمي يمي ...

 

[milkshake]

حركات بنتو..بسيطة وحلوة ..شوفو معاي ..



عجبتني حركة البسكويت..جبن مقطع على شكل قلب وملصوق فوق البسكويت بجبن سائل



شوفو ترتيب السندويش



هذا بنتو سهل وحلو بعد ومكوناته:



لفائف بف باستري بالسوسج



بسكويت محطوط فوقه سالمون بس تقدرين اتغيرينه لشرائح جبن او مارتديلا وتلصقينهم بجبن سائل او حطي لبنة بتطلع ألذ



هذا الارنوب المصنوع من التفاح وعلمتكم طريقته من قبل



وهذا كاسترد وتقدرين تستبدلينه بجلي او محلبية أرز وغيرها..

 

[milkshake]

في هذي البنتو عجبني انهم امسويين عيون وفم للسندويش المقطع على شكل قط باستخدام الجام



وهذي شي عجبني وايد وحطيته من ضمن خطتي الخمسية القادمة ..



شفتو الملال الصغيرة ؟؟ اتجنن صح..
دورت عن اسمها بالانجليزي طلع Tostitos Baked Scoops وينباع امغلف الى جانب اكياس الشبس العادية وهذي صورته



للحين ما لقيت منه في اسواقنا فيا ليت اللي عندها فكرة وين يبيعونه اتقولي ..

والطريقة سهلة..

وتقدرين اتعغيرين من المكوانت المحشية



جيبي صينية فرن وحطي فوقها الفويل (الألمنيوم)

صفي الــTostitos

وتقدرين تحشينها فول مثل ما اهم اموسيين وشويت طماطم وجبن..

وحطيه في الفرن بس شغليه من فوق بس ..

انا افكر احشيه بحمسة طماطم مجففة مفرومة مع بقدونس وشويت بصل وباذنجان مفروم وشويت اوريغانو.. وتقدرون تبدعون بالحشوات ..

 

[milkshake]

صج شكلها لذييذ صح؟؟ ناوية عليهاحق فطور ارمضان..

طريقة اعداد كور السبانخ..
المكونات:
1 جزرة متوسطة الحجم
2 بصل أخضر
ملح
4 الى 6 اكواب بقسماط مفتت
سبانخ الكمية حسب الرغبة
2 بيضات

الطريقة:
بشري الجزر مع البصل ثم ضعيه في الفرامة وافرميه جيدا
ثم اضيفي الملح
ثم السبانخ
اضيفي البيض
اضيفي البقسماط بالتدريج
ولما تكتمل العجينة شكلي الكور باليد او تقدرين تستخدمين سكوب الآيسكريم وحطيه في اوراق الكب كيك بعد ان ترشيها برش عدم الالتصاق (او شويت زيت زيتون اتمشي الحال) وحطيه في الفرن حتى يستوي لونه ذهبيا..
وهني وعافية..

 

[hmama]

مشكوره بعد عمري

 

[milkshake]

وهذي حركة واايد سهلة وحلوة..أكيد بتعجبكم..شويت ألوان وشويت فن .. اتحطينه حق اعيالج وأكيد راح ياكلونه على طول..

 

[milkshake]

مشكوره بعد عمري

العفو اختي الغالية

 

[milkshake]

وهذي حركات حلوة انسويها بالفواكه



اتقطعين مجموعة متنوعة من الفواكه الى مكعبات وترتبينها على هذا الشكل



وتقدرين اتسوين ابتسامة اتفاحة ..حلوة صح
الطرقة انج اتقطعين التفاحة عادي الى 4 او ثمانية اقسام
اتقرشين 2 او 4 من هذه القطع وتتركين الباقي بالقشر
تمسكين احدى القطع اللي بقشرها
وتسوين فيها حفرة من جانب القشر بدون ما توصلين للطرف الثاني ..يعني لا تثقبينها
وبعدين تاخذين قطعة من التفاح المقشر وتضعينه في الحفرة التي حفرتيها في القطعة السابقة..
وبس بعدين باستخدم السكين سوي الاسنان...
انشالله فهمتو شرحي ..

 

[milkshake]

الله يعيج الف عافييه موضوع روعه روعه روعه

بس بسال عن كور العيش لما تحطينهم بالفريز مايتغير الطعم ؟​

اختي سامحيني ما انتبهت حق سؤالج..
لا حبيبتي انا جربت منهم كمية اصغيرة حق ارمضان سويت من الويك اند اللي طاف وطلعته من يومين عشان اضوقه ما تغير الطعم..اهم شي انج اتغلفين كل قطعة ابروحها جيدا وبعدين اتحطينها في علبة بلاستيكية محكمة الاغلاق..وتقدرين اتسخنينه في المايكرويف قبل التقديم..

 

[milkshake]

ابداااااااااااااااااااااع يعطيك العافيه

من ذوقج اختي وماقصرتي ..

 

[aloyaa]

تسلمين وما قصرتي صج أشكال تشجع على الأكل

 

[milkshake]

رووووووووووووووووووعه

موضوووع مميز ومتعوب عليه


يعطيج العافية حبيبتي

يعطيج العافيه
موضوعج يهبببببل
يبيله دايسو خل نتفنتق باللنش بوكس بعد رمضان

صراحه الموضووع حده عجييب..
ومو شرط حق الاطفال..
ممكن حركات تفنتق حق الريوق وحق السحور خاصة ياينا رمضان..

مشكووورة اختي العزيزة ماقصرتي..

مشكوووووووووووره اختي اول مره اشوف جذي

مشكورين خواتي على مروركم واحرجتوني باطرائكم..

 

[milkshake]

تسلمين وما قصرتي صج أشكال تشجع على الأكل

من ذوقج حبيبتي

 

[milkshake]

شوفو اهني الاعواد فيها حبات طماطم وجبن مقطع



ممكن تستخدمين جبن كرافت المعلب طعمه أحلى

 

[ضحكة الدنيا]

خووووش موضوع
مشكوووووووورره حبيبتى

 

[milkshake]

خووووش موضوع
مشكوووووووورره حبيبتى

حياج الله اختي

 

[شمس؟]

حبيبتي انتي

انا قريت موضوعج بالليل قلت يا صبح اطلع واطير على دايسو اللي عندنا بالدوحة واشتري من اللي قلتيه كله ولا في اشكال ثانية تينن حق البيض المقلي طابي صغير على اشكال يقلي البيضة على بطة وعلى وردة وعلى هابي فيس

بصراحة تميت ادعيلج على هالموضوع الروعه

واسمحيلي بطرشة حق رفيجاتي بالاميل

مشكورة يا الغلا

 

[فجوره الحلوه]

بااك .. واو حركات حلوووه

يعطيييج الف عافيه .. موفقه حبيبتيي