يااااااااااااااااا ربي
الله يهديكم بنات على هالردود !!
اللي مو مصدقه القصه ليش تردين !!
عموما
أنا حاولت أرسل نصايحي برساله خاصه و ما صار للأسف , لكن بكتبه في الموضوع عسى الغير يستفيد
السلام عليكم ورحمة الله و بركاته
أختي الحبيبه .. بداية حديثي أحب أقولج ، أنا قريت موضوعج كااااااااامل و قريت جميع الردود و حبيت أساعدج باللي أقدر عليه ، ما ننكر انج صنعتي هالشي بنفسج ، و هالشي انتي عارفته و ما نحتاج نكرر هالموال
لكن أول شي مثل ما قالت لج وحده من الخوات لازم تحطين ببالج ان الطلاق ممكن يكون بنسبة 90% و ممكن ما يكون بنسبة 10%
أنا ما اقولج لا تتفائلين حيل ولكن حطي حيلج و أملج على هالنسبه الضئيله وخلي املج بالله كبير ، قبل كل شي اذا مستعده تسوين اللي بقولج عليه ركزي معاي و اذا مو مستعده يا قلبي لا تتعبين نفسج و عيونج بقراءة المكتوب
دامج كملتي يعني ناويه تسوين اللي بقوله ..اجل ركزي معاي
حبيبنا محمد عليه الصلاة و السلام قال : كل ابن آدم خطائون و خير الخطائين التوابين
أولا : انتي أخطأتي لكنج بديتي بدايه صحيحه , تبتي توبه نصوحه و عندج استعداد انج تغيرين من نفسج , هذا اللي فهمته من حديثج في الموضوع و هذا اللي زوجج يبيه طبعا
لكني أحب أنبهج لشغله : ربي يقول : " و إذا سألك عبادي عني فإني قريب " ، تعرفين شنو يعني قريب !!، ( و نحن أقرب إليه من حبل الوريد )، الله أقرب لج من حبل الوريد .. لا تشكين همج للناس و تنسين رب هالناااس
كرري بدعاائج : :{أمن يجيب المضطر إذا دعاه ويكشف السوء}اكشف ما بي من سوء، الله اعلم بحالج و ربي لانه يحبج بلاج عشان ترجعين له و تتوبين
بدعائج لا تقولين : يا رب عندي هم كبير و لكن كرري :
" ياااااا هم عندي رب كبييييييير " ،" ياااااااا هم عندي رب كبيبييييير " ، " ياااااا هم عندي رب كبيييييييييييير "
ربي أرحم فيج من عباده ، في الثلث الأخير من الليل افرشي سجادتج و ادعي و طلعي كل اللي بقلبج , اسجدي و ادعي الى آذان الفجر والله ربي كرييييييم كرييييييييم كريييييييم ، و قولي ربي إني اسألك الخيرة في أمري , ما تدرين يمكن يكون في طلاقج لا سمح الله خيره لج و لزوجج و عيالج ! الله اعلم بحالج صدقيني
كرري : حسبي الله و نعم الوكيل , و أكثري من الاستغفاااار ترى الاستغفار سحر والله سحر و عن تجربه
اسمعيني عدل مدل
روحي الحين توضي و استقبلي القبله و ارفعي ايدج و ابدي ادعي ربج
بس بشرط :
اخلصي بالدعاااء يعني ادعي و انتي متيقنه انه مالج غير رب العالمين
و اعترفي بذنبج لربج و استغفري منه و اعترفي جدام ربج
و اقطعي على نفسج عهد و انتي تدعين انج راح تتغيرين و ادعي ربي يعينج على الهدايه و يقوي ايمانج يعني قولي :
" ربي انا غلطت و انت تغفر.. رب اغفر لي ، ربي انت قلت " إني قريب أجيب دعوة الدعاي إذا دعاني " و هذا انا يا رب أدعيك فاستجب ، يا رب انا خلاص بتغير عشانك يا ربي و عشان نفسي مو بس عشان زوجي و يا رب تعيني و تهديني و انا راح أبذل الاسباب و الباقي عليك يا ربي وكلت امري لك فأعني على نفسي و على بلواي.
( هذا الاخلاص يا قلبي انج تكونين مثل ما يبيج ربج مو مثل ما يبيج زوجج ، و زوجج يبي اللي ربج يبيه و الحمدلله هو واضح انه رجل فيه خير و عارف طريج الصلاح , و يبيلج الخير بس انتي غفلتي عن هالشي و تصرفاتج كانت صبيانيه !!
).
نرجع لحديثنا
بعد الاخلاص و الاعتراف بالذنب ألّحي و انتي تدعين يعني بالعامي " حنّي حنّي " و انتي تدعين , و ترى الله سبحانه يحب العبد " اللحووح " اللي يحن بالدعاء
و انتي تدعين اذكري اعمالج الصالحه اللي سويتيها بدنياج ، " اذا اشتد على الانسان أمر يدعو بعمله الصالح "
والله انا أدرس و ايام الامتحانات كنت أتأزم لكن كنت أدعي ربي بحفظي لكتابه يعني كنت أقول :
" يا رب حفظت القرآن علشان أرضيك , يااا رب ترضيني " كل يوم كنت أقوله و كنت أكثر من الاستغفار كل يووووم و الحمدلله عدت على خير
و تحرّي يا حياتي أوقات الاستجابه يعني بين الأذا ن و الإقامه ، و بالسجود ، و لما تقومين من الركوع ، و صومي و لما تفطرين ادعي دعاء الصائم مستجااااب .
و ترى الدعاااااء سلاح المؤمن , مالج غير ربج و الدعااااء هو مفتاح الفرج و محد لج بهالمحنه غير رب العالمين
أدري انج عارفه كل هذا و لكني أذكرج و أذكر نفسي معااج
و أكرر كلامي صدقيني ربي عشانه يحبج بلاج
اذا أحب الله المؤمن ابتلاه
و جدتي الله يطول بعمرها دايما تقول : " الله أقوى "
يعني ربج أقوى من كل شي أقوى مني .. أقوى منج .. و أقوى من زوجج
هذا أولا
ثانيا : انتي اللي صار معاج من سوالف الشباب و المسنجر هذا كله من :
واحد : الفرااااااااااااغ
اثنين : ضعف الايماااااان , و لا تقولين لا , انتي بنفسج قلتيها ، قلتي " شيطاني كان أقوى مني " , انتي برايج ليش !!
شيطانج شافج ضعيفه و سهله فغلبج بسهوله
الحل انج تقوين ايمانج
و يا قلبي هذا الشي مو سهل والله مو سهل و يحتاج منج عزيمه قويه و إراده جباره على التغيير إلى الأبد و هالشي لمصلحتج انتي بالاول
اول شي قطعي النت و لا تستخدمينه الا للضروره القصوى و زوجج لا تكلمينه لا بالمسنجر و لا غيره
و مثل ما قالوا البنات ابتعدي عنه عطيه فرصه يستوعب السالفه و يركد و يفكر , و انتي تدرين اللي سويتيه مو شويه و ربي رزقج برجل عاااقل متفهم صدقيني ما راح يطلقج مني و الطريج راح يفكر بهالقرار الف مره قبل لا يقدم عليه و انشالله يتراجع و خصوصا اذا شاف منج تغيير و هذا المهم اللي احنا نتكلم عنه الحين
بعد ما تبتعدين عن النت مسحي ارقام الشباب اللي عندج و انشالله تكونين سويتي هالشي من غير نصيحه و تذكير مني
بعد هذا كله تحتاجين إنج تقوين ايمانج , بتقولين لي شلووون ؟
انا اقولج : اول شي احرصي على الالتزام بالصلاة و حاولي تصلين النوافل لانج محتاجه هالشي أكثر من أي شي ثاني و التزمي الاستغفاااار يعني خلي ذكر الله بلسانج على طول مثل ما قلنا قبل
بتقولين لي هذا يكفي ؟
اقولج أكيد لا , لانج تحتاجين يا حياتي اللي يثبتج على هالشي و يعينج
يتقولين لي منو بيثبتني و يعيني ؟
بقولج يا حبيبتي أكيد أهل الذكر و اهل الصلاة
بتقولين لي وينهم ؟
اقولج في مجالس الذكر يعني الدروس
وين مجالس الذكر ؟
في كل مكان .. في اللجان و المراكز و في ناس يسوون حلقات الذكر هاذي ببيوتهم
و اذا انتي فعلا مستعده انا ارسلج رساله اذكر لج فيها عدد من مجالس الذكر تقدرين تروحين لها
و اذا تبين يا قلبي احد ثقه تشكي له و ينصحج انا بحاول ادور لج اللي يقدر يكلمج مباشره و عنده خبره و مستعد يساعد انا اعرف وحده جزاها الله خير بفضل الله انقذت عمتي من الطلاق بعد مشاكل 5 سنين مع زوجها
هذا اللي عندي و انا ما ابي غير الاجر و بكلامي هذا يمكن أقدر أفرج عنج كربه عسى ربي يفرج عني كربه من كربات يوم القيامه
و بشريني يا قلبي بالتطورات و أي مساعده انا حاااااااااااضره و من عيوني بس اذا كنتي فعلا مستعده للتغيير و فتح صفحه جديده
و بعد كل هذا صدقيني زوجج ما راح يصدق ، و ربي بعينج
و اذا كنتي مثل ما يبيج ربج صدقيني ربج بيصير لج مثل ما تبين و أكثرررر
و لا تنسين على طول كرري
ياااااا هم عندي رب كبيييييييييير :tek:
