آكتبيـلنا قصـة ولادتـج هني ~شـآركينا بتجربتـج ~لرفـع معنويـات الحامل ^_~

[روح الأحزان]

الحمد لله على سلامتكم واخيرا رجعت لكم بعد مدة طويله ١٠ شهووور

 

[zshto_girl]

احلى شي لمن الوحده تييها الولادة بالعيد الوطني :eh_s(1)::eh_s(9):
يوم 26 فبراير كنت قاعده بالبيت وحسيت نزل مني شي شويه وخفيف
تعوذت من ابلييس قلت ماكو شي بس احتياط خل اجيك
رحت مستشفى لندن وهنيي المأساااة eh_s(11):
قالتلي الماي شوية ويالله خل اسويلج فحص انا سمعت عن الفحص بس ماهقييته جذي
قعدت اصرخ من قمة راسي واطق الدكتورة طق مسكيينه ايدها زررقت قالتلي يالله انتي الحين ولاده
حسيت جنه انحكم علي بالاعدام قعدت الم ريلي وابجي جني مينونه قلتله طلعنيي من هني مابي اوولد عندهم مومرتاحة
طلعنا ورحنا المواساة وبما انه بالسالمية قعدنا بعزز المسيره وريلي حده خاق خفت اقوله فيني عوار يخاف اكثر
و كالعادة الشوارع كلها مصكرره وكلم ريلي الشرطة خل يفتحون الطريج في حالة ولادة بس مامن مجيب :eh_s(16):
وبعد عناء طويل وعلى اغاني العيد الوطني الجميله وصلت المستشفى والحمدلله على نعمة ابررة الظهرر ولدت ولدي حبيبي:eh_s(17):
وبصراحة تعاملهم كان جميل بس الخياط يمووت عقب مايروح البنج
وسوري عالاطاالة :eh_s(7):​

 

[حنووونه25]

هههههه خوش ولادة

 

[الـجـوري]

هههههه الموضوع عنوانه لرفع .. اي خييير ان شالله لووول

الا هدم معنويات الحامل << لوووول

كله قصص تخرع والبعض من اللَّہ سهالات


بس صج صج آحـبُ اقرى قصصكم .. مع اني نااسيه قصص وولادتي هههههه << ماتبي تخرعكم
اللي ولدوووو الف حمدلله علـّۓ سلامتهم
ۆاللَّہ يسهل علـّۓ بااقي الحواامل ياارب

 

[سوزي الشرقية]

اني كان تاريخ ولادتي 27رمضان ولدت 11_10شؤال وعيد زواجنا بعد المهم جا رمضان واليوم المحدد بدون تعب لولادة ولا شيء خديت العيد كله الحمد للله يوم الثلاثاء جلست اتغذا مع زوجي وعندي الم بظهري خلصا اكل وظليت منسدحه على الارض قمت نسدخت على الكنب معايالم قلت خل اقوم اكنس بييرح وكنست شوي اني تعبانه رحت ارتاح ع السرير لين الصلاة زوجي مسوي خفاره السبب يروح ويجي يشوفني تعبانه مره راح شرا لي عصير سن توب ولاشربته حده استغرب مع صلاة المغرب رواتبهم الله اكبر حسيت عوار بطني ورحت الحمام واذا به الدم شلال فورا خبرته وطلعنا المركزي وسواليف عاديه مره وتشجيع المم وصلت وكشفو علي فاتح 2خيروني بين اتنوم ولاطلع البيت لاني بجر المهم قررت تنويم وفعلا اني انتظر نزل مني الماي صعدت فوق كشفو فاتح 4مع صراع الطلق الحار والصراخ فتح 9واخرتها قررو لي عملية لان الحوض ضيق ووزنه كبير بس الحمدلله على كل حال

 

[روح الأحزان]

شلونكم ياحلوين

الحين بقوولكم قصتي



الله يسلمكم بالسلامه ومن دشيت التاسع وكله اييني الطلق ماكو رياضه ماسويت ومشي وشربت اشياء تساعد انه تفتح الرحم والنتيجه ولا شي سانتي وااحد بس على كثر ما كنت اتألم من الطلق وطبعا كنت اراجع عند دكتورة معصومه اللي بدار الشفا وكل مااروح موعدي تكون موموجوده فاضطريت ادش عند دكتوره زينب قالتلي كلشي اوكي بس حجم البيبي كبير امشي واايد عشان ينزل بالحوض وتولدين بسرعه قبل لايصير اكبر طبعا مشيت وماكو فايده وهذي حالتي اييني طلق ادخل المستشفى اسوي تخطيط في طلق خفيف بس الرحم مافتح اكثر ولا البيبي نزل وقالو حرام ندخلج طلق صناعي وتتعبين
لما رحت حق الدكتوره تاريخ ١٦/٧/٢٠١٢ اللي اهني كانت الصدمه الكبيره طبعا قالتلي انه الماي زايد وضغطج مرتفع والبيبي مونازل ولا راح ينزل لانه كبير وحوضج صغير وانا ماكنت حاطه هالاحتمال كلش لان قبلها والده طبيعي مرتين
وهي تقلب الوان وخفت قالتلي كيفج انتي قرري شنو تبين تبين ادخلج طلق صناعي ومن الاخراعطيج اياها ماراح تولدين طبيعي وانتي قرري بسرعه حدج هاليومين لان موزين زياده الماي والضغط المرتفع وكانت خايفه لايصير تسمم طبعا رحت لها ١٧/٧ ٩ الصبح وتقررت العمليه بنفس اليوم بليل
والحمد لله على كل حال خذيت بنج عام وتعبت واايد بس وعيت بس الحمد لله كانت عنايتهم لي واايد ممتازه


وتوته توته خلصت الحتوته وهذي قصتي

 

[نور دنياه]

مرحبا بنات ، انا والده صارلي 7 شهور وشوي
ولدت بتاريخ 26 اكتوبر يعني بيوم عيد الاضحى و قبلها ليله عرفه بتاريخ 25 كنت رايحه بيت اهلي افطر عندهم وريلي بالمزرعه رايح يفطر ويا ربعه . وبهاليوم كنا ندعي وندعي ودعيت انه الله ييسر لي ولادتي. وانا معطيني تاريخ ولاده 29 -10، المهم تفطرنا وقعدنا نتقهوى وشوي وياذن العشا وقلت بقوم اصلي وانا اصلي فجاه حسيت شي دافي نزل قلت بقلبي وانا اصلي اكيد هذي افرازات، واسلم واروح سيده الحمام والا جني فتحت هوز الماي قلت بقلبي لاااا هذا الماي !! ورحت اركض بالاصنصير غرفه خواتي اخذ كوتكس والا ماامداني احطه الا ينترس ماي وابي انزل لامي وامي عندها خالي جاي يزورها قلت ولييي شلون اناديها الحين ، المهم ناديتها والا اقولها بولد!! وبجييت وامي بجتت قالت يالله خذي خواتج وروحي بيتج تجهزي وانا لاحقتج.
رحت بيتي تسبحت واتصلت بريلي قلت له تعال بولد !! المهم قعدت على الكرسي والا ينترس ماااي فشيله واحط كوتكس مافي فايده تنترس المهم وصلت الطوارى وقعدت على الكرسي المتحرك، الا تقول السستر تعالي اقيس وزنج وطولج!! الا امي تهاوشها تقول الماي ينزل عليها وانتي تقولين وزنج وطولج! المهم عندت قالت ماتدخل ولاده ممنوع الا لمن اقيسها، قلت لامي خلاص بقوم خل نفتك من حنتها، ويوم قمت شافت الكرسي مليان ماي قالت خلاص قعدي قعدي مو لازم، امي هاوشتها قالت انا شنو قايله لج عبالج اقص عليج.
المهم دخلت عشان يفحصوني ، وقطيت الكوتكس والا تقول الدكتوره ويي الماي صفره! البيبي مخرج ببطنج وانتي واحد سانتي، مابننطر عليج مو زين بنعطيج طلق صناعي@@ انا سمعت صناعي تذكرت بنات المنتدى قلت لاااا قالت كيفج بتضيعين تعب ال9 شهور، توكلي على الله ودخلي ولاده. طلعت من غرفه الفحص والا ريلي جدامي واشوفه وانبط ابجي، والناس اطالعني قالي لاتخافين توكلي على الله.. وكلمت دكتوري قال باجيج ان شالله ، والله لايسامحه ماجاني ولا شي نكبني شكله كان يبي يعيد ويا اهله وماجا.
ودخلت ولبست اللبس الاخضر، وكانت الساعه 7 العشا وانا فيني التهاب ولازم درب مضاد قالت السستر بنبدى بالمضاد كل 4 ساعات دربين وتالي الطلق، وصارت الساعه 12 ونص واهني عطوني الطلق ومن اولها كل 3 دقايق، والسستر هنديه تقول انتي طالبه ابره الظهر يالله نعطيج؟ اقول لاا صبري بشوف يمكن اتحمله، قامت تضحك باستهتار قالت : انتي مايقدر كلو بكريه ياخذ ابره" وبعدها حسيت بدت الصجيه اقول لامي لااا باخذ الابره ماقدر ، قالت لالاااا انتي قويه وتقدرين بدونها كاا اسمعي الحريم يصارخون معناتها ماخذوها ، ليش هم قدروا وانتي لاء.. " طبعا احنا بقطر راس مالنا هالمستشفى الحكومي يعني تمسعين صراخ فلانه وعلانه وانا اسمع وابطل عيوني اقول انا بصير مثلهم!!!!" المهم بعدها قام يقل النبض والا اشوف السستر تركض عند جرس الانذار تنادي الدكاتره وكان الصوت سبيكر! واشوف الجهاز النبض يقل، اقولها شنو فيه؟ تقول لا مافي شي؟ قلت جذابه النبض يقل بتحولوني قيصريه ولا شنو؟ وفجاه مجموعه دكاتره ومتدربين فوق راسي وتقلبني الدكتوره يمين يسار تبي ترجع النبض وانا صببب قلبي، وبالاخير دخلت شي من تحت نفس الواير حق النبض والحمدلله رجع النبض...
وبعدها قلت لها ابي كمام، قالت مافي اهني قصت علي عطتني اكسجين، قلت لها مو هذا قالت مافي تبين خذي الابره!! الا جات الدكتوره قلت لها ابي كمام قالت حاضر حاضر افتحيه لها!! يعني السستر الحقيره ماتبي تفتحه لي جنها الا دافعه فيه ، المهم شفطت فالبدايه وماكنت اعرف وامي علمتني طريقه غلط ، عقب تذكرت كلام بنات المنتدى عن طريقته وسويتها والحمدلله شفطتين الا انا دايخه وجاو يفحصوني اخر شي وعيت عليه قالت انتي 3 ونص -4 سانتي وطلبت ابره الفخذ
ويوم كنت اشفط تقول السستر ماتشفطين الا لما يكون في عوار، فجأه قلت لها " ججججبببب" انتي ماتحسين فيني ماعلي منج ، وقلت لامي سكتوها لااجي اكفخها ههههههههه
وكنت نايمه على دايخه مادري شلون، كنت اسمع شنو يقولون واغفى جات الدكتوره قلت لها وانا دايخه ااشر على الكمام اقولها لو سمحتي زيدي الجرعه انا قاع احس بالالم.. قالت ان شالله
واغفى واقوم اسمع خواتي يقولون لبعضهم انا الحين اقدر الامهات اكثر لما دشيت اهني.. خواتي عزوبيات .. واسمع تجكجك الكاميرا اختي تصورني والسستر تهاوشها تقول لا مافي صوره، وترد اختي تقول شعليج هذي اختي وبصورها... وامي جنبي تقرا علي وكانت رجلي اليمين ترجف وامي فديتها تمسح عليها .. وكنت نص واعيه نص نايمه مادري شلون هالاحساس
والمهم كانت تقومني السستر تبي تسحب البول تكرمون .. وشوي الا اسمع صوت السستر تقول ليش وجها قلب حساسيه يمكن فيها حساسيه من الكمام ..

وبعدها قلت لامي كم الساعه قالت 5 ونص الفجر، واسمعها تكلم ريلي تقوله لاتجي الا لما نقولك، قال لا ماقدر اقعد فالبيت اكثر باجي وبقعد عندكم..
المهم بعدها جاتني هذيك الطلقه الي قمت من نومتي قعدت اتلوى جني ربيانه حسيت شي بيشقني شق، ورديت شفطت ونمت وقمت السستر تطق فخذي تقول نور نور يالله قومي انتي الهين 10 سانتي، وانا من الوناسه قمت عبالي خلصت ، الا حطوا السنادات عشان ارفع ريولي وتقول يالله سوي بوووش.. طبعا ماعلموني شلون البوش وانا تعلمته اهني من بنات المنتدى خذت نفس عميييق وعصرت بكل قوتي وتقول بعد مره ثانيه يالله يالله، ومره ثانيه سويت وطلعت بنتي فديتها..

عقبها طحت دايخه وحطوها على بطني كان شعوري بارد على تعبانه على مخدره نص عين مفتوحه ونص مصكره قعدت اشوفها قلت الحمدلله وعقب قلت ليش ماصاحت؟ وعقب صاحت نص صيحه وخذوها مني قلت جيبوها انا مابستها!! قالوا وديناها لطبيب الاطفال وخلصي خياطتج وبنجيبها وخلصت وجابوها لي فديتها وبستها وقالوا يالله رضعيها.. قلت لامي انا ماقدر تعبانه قالت السستر لا انتي يقدر يالله رضعي ورضعتها شوي وعقب حطوني بغرفه النقاها وودوني غرفتي وشفت ريلي باسني وباس بنتي وقال الحمدلله على سلامتكم.
اي نسيت اقول بنتي طلعت 6 وثلث بالظبط مع تكبيرة صلاه العييد ريلي يقول انا انطر بالغرفه واسمع تكبيرات العيد
شعوور حلوووو وماينوصف الله لايحرم هالاحساس لاي احد
ادري طولت بس حبيت اذكر التفاصيل للبجريات... :eh_s(17):

 

[روح الأحزان]

الحمد لله على سلامتج نور دنياه وتربى بعزج البنوته

 

[جوريه^الكتكوته]

انا قصت لادتي الاولى كانت 2010الحمدالله سهالات كنت بالشهر التاسع ثاني اسبوع بس كنت امشي يمكن بالاسبوع 3 مرات المهم كان يوم خميس رحت البحر وكان الجو عجيب وقعدت يمكن 4 او 5 ساعات شي جذي رديت البيت صليت الفير انا وريلي بعدها نمت يمكن ساعتين وقعدت على مغص بس احس اني ابي اروح الحمام تكرمون وكل دقيقه اروح ومافي شي ويروح العوار احط راسي على المخده ويزيد علي الطلق المهم قمت احوس بالبيت لى الساعه 9 ونص الصبح قلت ادق على امي ولا خالتي خايفه اخرعهم المهم رحت حق امي ولا ينبط الماي واروح المستشفى علطول كانت تقريباا الساعه 11 قالت مفتوحه 4 سانتي ولاده ونطرت ليمن فتح الرحم كل شوي يسون فحص وولدت الحمد الله بولد سميته عبدالعزيز

 

[نور دنياه]

الحمد لله على سلامتج نور دنياه وتربى بعزج البنوته

الله يسلمج حبيبتي

 

[عاشقة هواك]

امبي اخترعت زيادة اهىء اهىء

 

[نورة حسام 2]

ولدت تاريخ 2 شهر 5 سنه 2012
دشيت التاسع ولدت بنفس اليوم اللي معطيني اياه
حسيت بالام بس قلت ماكو شي عادي بعدين حسيت بالام وانا ماعرف احد اهني الا خالتي وزوجي كان محد دقيت عليها قلت لها بولد
رحت المستشفى قالو لي خلاص ولاده دخلت ودخل ريلي معاي كنت ابي امي تدخل بس امي ف الامارات ماقدرت تي الدكتورة تقول لي يلا تنفسي اقول لها خلاص مابي اولد رجعوني البيت هههه المهم ولدت الساعه 10 الصبح يبت ولد سميته حمد بس ب هاللحظه صج ودج امج تكون موجوده معاج انشالله بولاده الثاني راح اخليها تجي عندي

 

[مــتــنــحــة]

اب اب اب

 

[انصاريه قمره]

دااام انه التجمع صخه خل اكتبلكم قصه ولادتي في بنتي البجر الله يحفظهاا

موعدي كان 16_8 _2009
وطبعا كنت بجريه قلت ما راح اروح الا بيوووم الموووعد نهائيا اللهم قعد ت من النووم مو حاااسه بشي اللهم ثقل وعوار بالعظام االلي تحسين فيه انه عظامج متفججه رحنااا بيت خالتي ام ريلي وتغدينا تقوولي انتي ما تحسين بعوااار ما تحسين بشي قلت لها لا خالتي عادي تقولي ويهج منصفق ويه وحده تبي تووولد لازم نوديج اقولها لا ما فيني شي المهم عقب الغداا قعدت شوي وسوتلي دارسين جزاها الله خير وشوي ولا احس بعوار مثل عوار الدوووره ايي ويروووح اقص على نفسي اقول مافيني شي عوار عادي المهم تقولي هااا ما تحسين بشي اقولها لا خالتي انا حاسه بالعوار بس مابي اتكلم كنت خااايفه من الولاده ههههههههههه بل لا مفر المهم قالت حق ريلي مرتك ويها مو طبيعي صاير اصفر ودهاا الطوارئ يفحصونهااا وانا لا ما فيني شي قالت ميخالف يمه نتطمن عليج المهم قلت حق ريلي لا تدق على اهلي تبلغهم نهائياااا اللهم عمتي علشان توصي علي بالولاده المهم دشيت طوارئ الفروانيه العصر يوم يااا دوري رحت ولا الدكتوووره تقولي فحص انا خوووو سامعه قصص تصرقع عن هالفحص اقووولها لا دكتوره دخلوني بدوون فحص ماااابي تقول ما يصير شلون نعرف رحمج مبطل ولا لاء لااااازم الفحص المهم بعد المساحل والدكتوره يحليلها كانت معطتني ويه لاني بجر المهم فحصتني طلع الفحص ماااا يعووور كل اللي عليج انج ما تشدين صج شعور مقزز لمه احد يدخل اصابعه لكن عادي مو العوار اللي البنات يتكلمون عنه قالتلي انتي ولاده مفتوحه 3 لي 4 سانتي انا هني بجيييت واقولها انزين اروح البيت اتسبح وارجع قالت لي ما يصيرررر الوكااد انهم فصخوني ملابسي حتى دبلتي خلوني افصخهاااا انا تصرقعت قلت يااااا ربي ليش جذي قعد يسوون اكيد بيصير فيني شي ومخي كان كله افكار سلبيه المهم عطيت ريلي الاغراااض وقلت له دق على عمتي قولها دخلوني ومسكين اهووو خانقته العبره لكن ما يبيها تنزل جدامي دخلت الولاده وعقبهااا هطوني الحقنه الشرجيه المؤرفه وقالولي روحي الحمام فضي بطنج طلعت وركبولي الدربات وجهاز على بطني حق نبض البيبي وطلوقي ما حمت كانت لله الحمد خفيفه شوي ولا اسمع صوووت عمتي ولا داااشه توصي علي وقالت لي في ابرة ظهر تبينهااا وما تحسين بشي ومن هالكلام انا ما صدقت على الله بزهب الدوا قبل الفلعه اقولها ايي عميمه ابيها احس بعوااار مادري انه لازم ياخذون مني تحليل وبعدها بساعتين يعطوووني المهم انا كنت هاااديه حيييييل بالجناح من جذي السسترات كانوا اييوني بس في حريم الله يهداهم شايلين الجناح بصراخهم يخلووون اللي ما تتصرقع اتصرقع خوو في كمام في ابرة ظهر شماااله كل هالصيحه والعذاااب واللي تقول خطره اقولها بأمريكا معتمدينها بأغلب عملياتهم ما قاموا يسوون بنج عااام المهم انام شوي واقعد وكل شوي اسأل عن ابره الظهر يقولولي شوي وايي دكتور التخدير اخر شي قمت على عوار شوي قوي قلت لهم ابي كمام ابي مخدر عطوووني كمام اهوو ما يخفف العوار وايد لكن يخليج ريلاكس وجنج بعالم ثاني وانا مجلبه فيييه المهم بعدها نمت وقعدوني قالولي دكتوره التخدير موجوده جهزت نفسي حق الابره ولا الدكتوره كويتيه وصغيرره تهبل مشالله ونفسهاااا حلوووووه الله يذكرها بألف خير قعدت تسولف معاي وتطمني وعقبهاااا يووووم غزتني مشالله ايدهاا خفيفه وعارفه شغلها عدل مو نفس الدكتووور اللي بالصباح عاااار فيني دخلها مرتين غلط حسبي الله ونعم الوكيل المهم بعدها قالت ما راح تحسين بالجزء اللي تحت ومن الكلام وفعلا تخدرت وما قمت احس بشي ونمت مرتااااااااااحه مشالله وكل شوي داشين علي مقعديني حق الفحص وما قمت احس حتى الفحص
وفحصوني قالولي زين 6 سانتي اخر شي شفت السستر يايبه ابره بتحطها بالدرب قلت لها شنووو هذاااا تقووولي هذا دوا قلت لها طلق صناعي مابي قالت لازم انتي يطووول لازم هذا علشااان يفتح رحم قلت لها اوكي المهم حطته شوي ويمسكني الطلق السنع ومع كل طلقه انقز من مكاني قلت لهااا تعاااالي ابي ارة ظهر انا مادري انه مفعول الدوه كل ساعتين يروووح فحطولي جرعه والحمدالله خف عوار الطلق لكن مو وايد لانه الطلق الصناعي حااامي وانا ابجي بصمت واقرا قران وادعي الحمدالله فحصوني قالولي 8 لي 9
شوي ولا اييبون الحدايد علشان ارفع ريلي واقووولهم ابي حمام يقولولي ما يصير واقولهم في شي يبي يطلع يقولولي هذا بيبي المهم سويت يصرخوون يلا شاطره بوووش انا يشوووف راااس وانا اسوي ماكو فايده المهم قالولي اخذي نفس وسوي اخذ ت نفس وبعدهاا سويت مره مرتين ثلاث اخر شي شقوني وطلع بنتي فديييتهااا انا هني قعدت ابجي من الفرحه الله لا يحرم كل ام من هاللحظه الحلوه وبعدهاا بدقايق طلعواا المشيمه وقعدت انطر حضرت دكتوره الخياط طولت وانا عاد ولدت وتفرعت يننتهم هههههههه وين الدكتوره ويلااا خلصواا انا ما اقعد جذي الناس تولد ترتاح تهداا انا استلمتهم اخر شي يت ولا الاظافر شطووولهم قلت لها انتي بالله شلون بتخيطيني قالت عادي زي الناس قلت لها اظافرج قالت متخفيش المهم غزوني ابره الفخذ علشان تخيطني وقعدت تخيط وعقب طلعت وبعدهااا طلعوووني من غرفه الولاده حطوني بالممر يقولون في وحده بتدش تولد قلت لهم ودوني الجناح يقولون ما يصير لازم تقعدين هني ساعتين قلت لهم ما اقعد بالممر يلاا وابي اقوم من السرير ولا تييني ذيييك الدوووخه السنعه المهم يابولي ماي ويت سستر مصريه الله يجزاها خيييير تهديني وتسولف معااي وتقول ميخالف شوي ونطلعج تحملي اخر شي رضيت بالامر الواقع واستسلمت وبعدهااا طلعوووني وكان مافي ولاغرفه خصوصي كلهم فل حطوني بالعمومي وانا استخفيت الا ابي اطلع على مسؤوليتي ما رضوا قالوا ما فحصناج عدل ولا فحصنا البيبي علشان البيبي قعدي لي باجر وقعد لي الصبح وفحصوا بنتي وبعدهاا طلعنااا بس للامانه ما قصروا معاي بالولاده الله يجزاهم الف خييييييير اهتموا فيني راعوني صج غرف العمومي ارف لكن الخصوصي مو نفس الصباح بينج وبين اللي تولد ستاره كل ثنتين بغرفه بالفروانيه كل وحده بغرفه بروووح الله يستر هالمره ولادتي بالصباااح لاني غيرت البطاااقه يقولون عاد مسنعين الاجنحه ومسوين اجنحه خاصه للكويتيات ما يندرى

 

[زبــــــــدة]

انصارية قمرة

واااااااي قصتج خففت علي التوتر والخوف اللي انا فيه لووووووول

حسيت ان سهالات الحمدالله ...

ياااارب الله يسهل على الكل

 

[lawyara]

Up up

 

[قرة عيونه]

هالموضوع من زماااااان ببالي

حتى فكرت انزل موضوع بهالخصوص بس تكاسلت

بقعدله قعده هالموضوع وشكرا بصاحبته ??

 

[قرة عيونه]

اخيرررراً خلصت الموضوع وقريت كل القصص المشوقه

وصج تحمست للولاده ان شاء الله اذا ولدت اكتبلكم قصتي

وبنات صج الموضوع قديم بس حلو

ياليت تردون تدخلونه وتكتبون قصصكم لان اكيد صارت ولادات واجد ماشاء الله خلال هالسنه

ف ياليت تجددون الموضوع

وشكراً

 

[قرة عيونه]

اب

اب

 

[لوولوو_88]

عجييبه القصص

اب اب اب

عفيا بنات كتبو قصصكم