السلام عليكم بنات شلونكم؟ أنا الحين بنص الشهر الثامن وإنشالله ولادتي راح تكون قيصرية بشهر 9 ، هذه ان شاءالله ثالث ولادة وكلهم قيصرية لان الحوض عندي صغير.
اول ولادة لي كانت سنه 2010 كنت أتمشى مع زوجي في مرينا الساعة 8 بليل جان ادخل الحمام ولا تكرمون نقطة دم جان اطلع حق ريلي على طول، عاد قبل لا نروح مرينا كان عندي موعد مع دكتور جعفر قناوي في مستشفى السيف وسوالي فحص وقالي اي وقت ينزل عليك دم تعالي ، فلما طلعنا من المستشفى أنا وزوجي ورحنا مرينا قلتلكم نزل علي نقطة دم جان أقول حق ريلي وحدي مخترعة وأهو بعد اخترع طبعا ما ندري شسالفة وشنسوي لأَنِّي بجر. المهم دق زوجي على الدكتور جعفر وقاله جان يقول لنا أراجع المستشفى اليوم اللي بعده، طبعا أنا وزوجي راحت علينا نومة الصبح ورحنا المستشفى الساعة 12 ونص الظهر ولا الدكتور خلص دوامه وشافنا عند الباب جان يقولنا تعالولي الساعه 5 العصر، جان نرد البيت وارتزينا عنده من الساعه 4 ونص هههههه فحصني وانا صرااااااخ ومسكين ريلي يقولي ما عليه دلوله شوي شوي لا تخافين ، جان يقول الدكتور حق السستر يالله دخول ، أنا سمعت دخول وأموت من الخرعة وزوجي تصرقع هههه، جان يقوله الدكتور ولادة يا استاذ. اول ما طلعت من العيادة جان يقولي زوجي لا تدقين على أمج أنا بدق جان أقوله أنا اوكي، جان ادق على رفيجتي واقولها جان تقعد تدعيلي، جان يدخلوني غرفه الولادة ويعطوني طلق صناعي من الساعة 6 المغرب ويتني دكتورة بطتلي الماي وطبعا بعدها دخت ونمت ، قعدت بعدها ولا أمي وأختي يوني وامي تدعيلي وأختي تهديني وانا اصيح أقولهم اخاف اموت . وبعدين طلعو من الغرفة وبلش الطلق يزيد، ياني بعدين الدكتور جان يقولي ان النبض مال البيبي قاعد يقل وزوجي اخترع جان يقوله الدكتور لازم قيصرية، والله بنات من كثر ما الطلق تعبني لما سمعت كلمة قيصرية حسيت مثل كتو علي ماي بارد، استانست لأَنِّي راح افتك من عوار الطلق، بس حولوني العمليات ولبسوني اللبس الاخضر ودزوني بالممر شفت أمي وأختي جان ابتسم لهم ? المهم عطوني إبرة ظهر وبعدها كنت واعية يوم يفتحون بطني جان اسمع صوت ولدي حبيبي واه واه واه جان يحطون خده على خدي وبعدين خذوه نظفوه وودوه حق اهلي بره.
ولادتي الثانية كانت سنة 2011 بس حزتها أنا اللي قررت تكون قيصرية لأَنِّي جربت الطلق ومابي اعيده وثانيا لأَنِ بطني مشقوق فماله داعي إنشق من وفوق ومن تحت، المهم أنا الراهية قبل العملية بيوم حطيت صبغ اضافر ويوم العملية الصبح اكلت بيض عيون وشربت عصير جان اروح المستشفى عند دكتوري نفسه جعفر، ودرى أني ام بطين ماكله وما سوالي العملية الا عقب تقريبا 4 او 5 ساعات ههههه لان لازم أكون صايمه، اول ما دخلوني العمليات وبلّشوا فيني وقمت اتخضخض يتني لوعه لأَنِّي ماكله بيض من 7 الصبح، ولاعت جبدي جان اسمعهم يقولون : " أهو الفطار، أهو الفطار" ههههههه أنا هني مت من الضحك شوي ولا جان يطلعونلي بنيتي حبيبتي وودوها حق زوجي بره. طبعا الشيء اللي يلوع الكبد انهم شالو عني صبغ الإضافر العنابي اللي كنت حاطته ومستانسه عليه، وصار شكل أيدي ضيم وظلايم حتى بالإستون يا دوي يروح.
والحين ان شاءالله ولادتي راح تكون شهر 9 وماردي شراح يصير بس الحمدلله الحين عندي خبرة.
نصيحة حق كل وحدة مقبله على ولادة، أول شي الله يهون عليكم كلكم ولادتكم ولا تنسون تقولون "اللهم هون الطلق وحسن الخلق" و"اللهم أني أستودعك جنيني اللي في بطني، انك على كل شيء قدير"
شغلة ثانية لا تحاتون او تتأزمون اذا قالكم الطبيب قيصرية، ولا تَحُطُّون في بالكم ان الدكتور يحولكم قيصرية عشان الفلوس طز بالفلوس اذا كانت على حساب سلامتكم. أنا وحدة جربت القيصرية مرتين والحين انشالله الثالثة، يا حلوها والله ما تخوف، صح اول يومين المشية صعبة بس لازم تكون عندكم إرادة وتمشون، أهو مكان الجرح بعد العملية يعور بس والله العظيم انه من ثاني او ثالث مشية تتعودون على الوضع.
اللهم شافي وعافي كل مريض،،،،
