هذا حظي ونصيبي .....

[sh3ollah]

روااااابي البارت حد امه مو صج
ترى قريته مرتين
نبي البارت الياي مبجر تكفيييين
فيني دودة بعرف شنو بيصير

 

[sh3ollah]

نسيت اقووووول
عسى جسوم وريمووووو المختله الكسر

 

[ZY.alSookR]

رواااااااااااابي نااااااااااطرينج على احرررررررر من الجمرررررررررررر

 

[AngelGirl]

روااابي وييينج!!!!!!!!!!!!!
بليييز حطيييه مبجر

 

[Sara.M]

ناااااااطرينج متى بتحطين لنا البارررررررررررت ؟؟؟

 

[عــاشــقــه]

روابي حبيبتي حطي بآرت آليييييوم بليييز

حدي متشوقه أعرف ششنو رآح يصير

قريت روآيتج آلأولى مشالله تهبل بس مآعجبتني آلنهآيــه << مآ أحب آلنهآيآت آلتعيسه

يلآ بنتظآرج :ggdw:

 

[rawabi]

هااااي بنات .... انا الحين قاعده اكتب البارت اليديد وانشالله اول ما اخلصه انزله ... يعني عالعصر او بالكثير المغرب

 

[UNiQe^PRiNceSs]

waiting

 

[rawabi]

البارت ال 17 :

صار اللي يبيه فواز ودشت شيخه المستشفى ... فواز كان يبيها تكون تحت عينه .. يطمن عليها .. كانت الافكار تلعب فيه وتيبه يمين ويسار شاللي صار خله جاسم يسوي جذي .. هو يعرف جاسم صج ان مايعرفه ذيك المعرفه القويه بس جاسم خوش ريال والكل يشهد له ... قعدت شيخه من نومتها اللي ماتدري شلون قدرت تنامها .. من قعدت وهي بس تبجي .. وامها تبجي عليها .
صقر دق على خالد اللي طار عقله لما درا باللي صار وعلى طول راح على بيت عمه بو جاسم وكلم صقر يلحقه هناك ... دخلوا خالد وصقر على عمهم وعلموه باللي صار
خالد: الحين انت ياعمي عرفت السالفه كلها وانت عم شيخه حسبت ابوها... اي شي تقوله وتسويه يرضينا بس احنا نبي حق اختنا من ولدك
بوجاسم : جاسم سوا جذي بشيخه ... اكيد انه ين هو وين فيه ؟
صقر : مادري انا رحت الشقه ومالقيته وجهازه مسكره
بوجاسم : والله لا اراويه ايده اللي مدها لا اقطعه له ... انتوا نطروا هني انا الحين ياي
خالد : على وين عمي ؟
بوجاسم : ادوره والله ماانام ولا يرتاح لي بال لينا القاه واعرف السالفه ... اكيد انه ماكان بوعييه
خالد : عمي لا تعب حالك .. وين ادوره بهالليل ... انشالله الصبح يصير خير .. تلقاه يفر بهالشوارع ...
بوجاسم : اقولك ماني نايم لينا القاه ..
وهم يتكلمون دخل جاسم ... من غير مايحس صقر ركض على جاسم وقام يكفخ فيه يالله فاججوهم بوجاسم وخالد
خالد : صقور بس وخر
صقر : والله لا اذبحه هالجلب
خالد : بس صقور .... عمي واقف ... عيب عليك
صقر استوعب ان عمه موجود وان الحشيمه مو ل جاسم الحشيمه لابوه
بوجاسم : جاسم شنو هالكلام اللي يقولونه عيال عمك ؟ ماد ايدك على شيخه ؟
صقر : ماد ايده ... عمي البنت بالمستشفى تقول شاحنه دايستها وانت تقوله ماد ايدك
خالد : صقر اسكت خل عمي يتكلم
جاسم : هي حرتني
صقر : حرتك تقوم تكفخها
خالد حس ان صقر ماراح يسكت وعلى كلمه بعلق
خالد : عمي احنا بنمشي وانشالله ناطرين حقنا منك ... وترا الوالد باجر الصبح راد
طلعوا خالد وصقر من بيت عمهم بوجاسم .... بيت بو جاسم شب نار بوجاسم ين شلون يمد جاسم ايده على بنت اخوه شقول حق اخوه وشلون يقدر يواجهه طال الكلام بين بو جاسم وجاسم .... بس ماقدر بوجاسم ياخذ حق ولا باطل من ولده

ام جاسم من درت وهي تبجي ماتدري قاعد تبجي على شيخه اللي عورت قلبها والا على ولدها اللي تحس ان ماعاد هو ولدها اللي تعرفه ... جاسم اللي ربته وتعرفه مستحيل يسوي جذي ... جاسم ولدها طيب حبيب مو مجرم يطق مرته ويدخلها المستشفى ... ساره عند امها تحاول تهديها
ساره : يما خلاص ... حرام عليج قلبج بيوقف
ام جاسم : ليته يوقف وارتاح ... جاسم العاقل اللي الكل يمدحه يسوي جذي ...
ساره : يماا انزين البجي بشنو بيفيد ... اكيد ان كان معصب حيل وماحس بنفسه
ام جاسم : معصب حيل يقوم يطق البنت .. انتي ماسمعتي اخوانها يقولون انها بالمستشفى ... اكيد ين مستحيل انه عاقل وسوا جذي
ساره : يماا لا تسوين بنفسج جذي ... انشالله باجر نروح لها ونطمن عليها ومايكون فيها الا العافيه
ام جاسم : وين اروح ... اروح لها المستشفى والله مالي ويه اشوفها واشوف امها ... ولدي مكفخها وازورها شنو ما استحي انا
ساره : يعني منتي رايحه ... مايصير يما لازم نروح ... هي بنت عمي قبل لا تكون مرت اخوي
ام جاسم : والله مادري خليني الحين ... بروح حق ابوج اشوف شبنسوي ؟

هالليله كانت طويله حيييييل على اهل جاسم واهل شيخه ... الممرضه طلعت شيخه من الطواري ودتها الجناح وام خالد وخالد وصقر وياها ... ودتها الممرضه سريرها كان بغرفه عمومي ماكان في غرفه خاص فاضيه ... شوي والا ايي فواز لان هو الدكتور اللي ماسك الخفاره بهاليوم ... سلم عليهم .. شيخه كرهت الدنيا لما درت ان فواز هو الدكتور اللي ماسك حالتها ... فواز بالغصب قدر يقنع ام خالد انها ترد البيت ترتاح شوي .. ام خالد كانت مو راضيه بس جدام تصميم خالد وفواز رضت ...
شيخه ( تبجي ): يما واللي يعافيج لا تخليني هني خذيني وياج
ام خالد : حبيبتي انتي والله.. ولا انا ودي اخليج ... فواز ماني ماشيه بنام هني
فواز : خالتي وين تنامين الغرفه عمومي ومافي لج مكان يعني حدج بتتعبين ... بعدين شدعوه مانتي واثقه فيني ... والله شيخه بعيوني ماراح اخليها ... وشيخه شفيج مانتي ياهل تبجين وتقولين ابي اروح البيت... انتي بتمين جم يوم بس تريحين ونطمن عليج
مشوا اهل شيخه وام خالد قلبها يتقطع على بنتها بس ما باليد حيله .. وصل فواز اهل شيخه للاصنصير وسوا جم شغله ورد حق شيخه .... شيخه منسدحه بفراشها تعبها من الهم والبجي اكثر من تعبها من العوار والطق اللي حاشها
فواز قرب من فراشها وجندس عليها شوي عشان يكلمها : شيخه شفيج ؟
شيخه ( وخرت شوي عنه لانها حست انه وايد مقرب ) : مافيني شي
فواز : ليش سواه فيج جذي؟
شيخه : -------------------- ودمعه نزلت من عينها
فواز : لا تبجين ... كل شي بينحل ... بس علميني شفيج ؟ شاللي خلاه يمد ايده ؟
شيخه : لوسمحت ابي انام تعبانه
فواز: على راحتج .... اذا تبين اي شي بس دقي هالدقمه وايي لج ... انا بروح اجيك على مرضاي
طلع فواز من عند شيخه اللي قعدت تبجي على عمرها حدها ماحبت ان فواز يشوفها بهالحاله من البجي نامت ... نومها كان راحه لها .. كان هروب من التفكير اللي حرمها راحت البال ... راحة البال اللي نستها من تزوجت جاسم .
فواز كان يجيك على مرضاه ويسوي فايلاتهم وكل شوي يطل على شيخه
شوي والا ايي له يوسف ( يستظرف ) : ازايك يادكتور ؟
فواز : هلا ... شنو منحاش من خفارتك ؟
يوسف : لا منحاش ولاشي ... قلت اريح لي شوي ... ماعندك قهوه ؟
فواز : تلقى المطاره داخل
يوسف : شلونها ؟
فواز : والله مادري وايد تعبانه بس تبجي
يوسف : الله يعينها .... فواز من هذه ؟
فواز : قلت لك وحده من الاهل
يوسف : بس ؟
فواز : شنو يعني بس ؟
يوسف : هي اللي كنت خاطبها اول؟
فواز : شدراك ؟
يوسف : شفيكم اليوم الكل عادني حمار مافهم ... شنو شدراني عرفتها من الاسم .. وصج انها مكفخه وشكلها تعبان بس هي اللي كانت ب سواح وخليتني ادفع الحساب لهم صح ؟
فواز : اي
يوسف : ترا للحين مارديت لي فلوسي اللي دفعتهم هذاك اليوم لها ... انشالله ماتقعد ترز عمرك على حسابي ... متى تعطيني فلوسي ؟
فواز : ماني معطيك شبتسوي ؟
يوسف : بقولها هي تعطيني ... والله هو يحب وانا ادفع
فواز : اقلب ويهك ... اشرب قهوتك واذلف خفارتك ... عندي شغل الدنيا اسويه
يوسف : انزين بروح ... اسمع البنت اللي كانت معاها هذاك اليوم اختها والا من اهلها
فواز : وانت شكو ؟
يوسف : لا بس بعرف ... قلت يمكن اصادفها وهي تزورها
فواز : مادري ... ترا مالي خلقك .
خلص فواز شغله بسرعه ووراح حق شيخه لقاها للحين نايمه ياب فايلاته وقعد عالكرسي اللي عندها يشتغل عالفجر قامت شيخه عطشانه .. اخترعت لما شافت فواز .... فواز : صح النوم
شيخه : شتسوي هني ؟
فواز : ماكو يت لنا شكاوي وايد من المرضى يشتكون من شخيرج عاد قلت ايي ادير بالي عليج لا ايي واحد منهم يذبحج والا شي
شيخه : اي شي اصلا انا ما اشوخر
فواز : اللي قايلج انج ماتشوخرين جذاب ... اصلا شويخرج واصل لاخر الممر انا اول شي عبالي عندنا حفله بالجناح
شيخه (منحرجه ) : صج ؟
فواز : شكيتي بعمرج ؟ ههه لا ماتشوخرين
شيخه : عيل ليش قاعد هني ؟
فواز : قلت لج عشان ادير بالي عليج
شيخه : مشكور
فواز : العفو
وتم يطالعها كان ناطرها تتكلم تقول شاللي صار فيها .. شيخه عرفت الهدف ورا نظرات فواز وقعدته بس ماتكلمت ولاقالت اي شي ... فواز كان يسولف معاها شوي ويقوم عنها شوي يروح يكمل شغله ويرجع لها تالي .... ماذاقت عين فواز النوم يومها مابين مجابل شيخه ومجابل باجي مرضاه
اليوم الثاني من الصبح ام خالد وابوخالد عند شيخه اختها نوره وفيصل ... نوره من درت وهي بس ادعي على جاسم ... شوي والا تيي ساره.... ساره اول ماشافت شيخه وهي بالفراش نزلت دموعها وركضت لها تبجي ... ماعرفت شتقول حست انها بموقف بايخ : شيوخ سلامتج ماتشوفين شر
شيخه : الشر ماييج
ساره : خطاكم السو خالتي
ام خالد : -----------------------
ساره حست باحراج كبير لان ام خالد ماردت عليها .
بوخالد : ساره شلونج ؟
ساره : بخير عمي ... حمد الله عالسلامه .
صقر اول مادشت ساره طلع على طول من الغرفه ... ساره اول مره تحس انها غريبه بين اهل شيخه ... اول مره تحس انها شخص غير مرغوب فيه ... حتى شيخه اللي ساره تعدها مثل اختها ما تكلمت معاها .... ساره عرفت شغله يومها انها الحين ماعادت اخت او بنت عم شيخه ... الحين هي اخت جاسم بس ... صارت مو اكثر من اخت الريال اللي طق بنت عمها .... ساره وقفت بتمشي : انشالله اجر وعافيه ... طلعت من الغرفه مكسوره ومفتشله ... لقت صقر يمشي بالممر ... صقر اللي اول ماشاف ساره طالعه من الغرفه صار يطالعها بنظرات ساره ماهمتها نظرات اول مره تشوفها بعين صقر .... رجع صقر الغرفه من غير مايقول اي كلمه حق ساره .
وقفت ساره تنطر الاصنصير وهي مكسورة الخاطر
دكتور يوسف : خطاكم السو
ساره ( اخترعت من كثر ماهي متضايقه ماانتبهت ان في احد يمها ... ما كانت بترد بس لما شافت ان اللي يتكلم دكتور ) : خطاك اللاش
يوسف : ليش ضايق خلقج جذي ... ترا مافيها الا العافيه
ساره : انت شفتها ؟
يوسف : انا اللي مسوي لها الدخول امس ؟ ترا جد مافيها شي جايد هم جم طقه على جم فلعه وبسرعه بيروحون انشالله .... انتي اختها ؟
ساره : لا بنت عمها
يوسف : انا اقول البوهه وحده .. انتي متزوجه ؟
ساره ( حدها استغربت السؤال اللي صج ماكان له داعي ... جاوبت بنفس ) : لا
يوسف : انشالله الله يرزقج بولد الحلال ومايطلع مثل المصرقع ريل بنت عمج... صج انه مايستحي
ساره : المصرقع اخوي
يوسف : نعم ؟
ساره : شيخه ماخذه اخوي
يوسف ( خاس بهدومه ) : اخوج ؟ ... يمكن هو كان معصب وماحس بنفسه حزتها ... البيوت اسرار ما يندرا شبينهم ( يرقع )
ساره لفت بتمشي ... قالت انزل الدرج وايد احسن
يوسف : وين رايحه ؟ ... كا الاصنصير وصل
ساره : هونت بنزل الدري
يوسف : من صجج ؟ احنا بالدور السابع ... تعالي ركبي الاصنصير
ساره : لا عادي ... مو مشكله
يوسف : تعالي ... انا ماني راكب الاصنصير انطر الاصنصير الثاني.. يالله بسرعه امشي قلت لج ماني راكب
ساره اركبت الاصنصير وتو الباب بسكر والا يوسف يمسكه بيده : اشرايج اركب بس مااتكلم .... لان الاصنصيرات وايد اطول على مااتيي وصج ابي امشي من امس مو نايم واليوم انحكرت هني اسوي جم شغله .. ادش ؟
ساره : انزين
يوسف سكت اول شي كان يطالعها ... بس ماعبر يتم ساكت مده :
تدرين انا شايفج قبل فتره بالافنيوز
ساره : ------------------------
يوسف : كنتي بسواح بروحج تالي يت لج شيخه ... كنت انا مع رفيجي دكتور فواز هو من جماعتكم
ارفعت عينها ساره تبي تشوفه عدل والا تتذكره هو رفيج فواز الحلو اللي كان مجابلها
يوسف : ذكرتيني ؟
ساره : لا ماانتبهت لك
يوسف : صج ... بس انا ثبتج يومها ... بس جنج الحين متغيره قاصه شعرج صح ؟
ساره : اي
يوسف : اول كان احلى
ساره ( انشالله ما يطقها سوالف معاي ... وبدال لا يمدح يقول اول احلى ) : ---
طلعت ساره من الاصنصير راحت حق سيارتها من غير ماتكلم يوسف اما يوسف راح مكتبه ياخذ اغراضه ومشى كل واحد على بيته .
خبر دخول شيخه المستشفى انتشر بكل العايله ... بس محد درا شسالفة دخلتها المستشفى ... اهل شيخه وجاسم قالوا انها سوت حادث وتعورت شوي وبلغوا ان ماله داعي احد يزور لانها تعبانه شوي وكلها يومين وتطلع يومين وتطلع... واذا صار واحد ياهم ام خالد ماادخله على بنتها تقول ان شيخه نايمه .
صار الليل مشوا اهل شيخه ردوا بيتهم يرحون شوي ابو خالد ببيته متيمع مع عياله واخوه ابو جاسم وجاسم ... جاسم للحين مو راضي يقول السالفه ولا راضي يريح بالهم ... وشيخه نفس الشي
بوخالد : اسمع يا جاسم بنتي مالها قعده عندك ... متى ماطلعت من المستشفى ترجع عندي وورقتها توصلها
جاسم : عمي اللي صار ممكن يصير بين اي اثنين متزوجين ماله داعي توصل السالفه للطلاق
بوخالد : من قالك هالكلام انا مع ام خالد اكثر من 30 سنه عمري مامديت ايدي عليها ... واللي اعرفه ان ابوك عمره مامد ايده على امك ... ياي انت تكفخ بنتي وتقول شي عادي يصير بين كل اثنين
بوجاسم : انا معاك ياخوي ان جاسم غلطان ويستاهل الذبح بعد ... بس ما توصل السالفه لللطلاق .... خل تطلع شيخه من المستشفى وصدقني مالها الا طيبة الخاطر
صقر : اللي يطيب خاطر اختي انها تتطلق
بوجاسم : صقور تراك من امس تتليقف ولا انت حاشمني ... عندك كلمة خيير قولها والا انجعم ... تسعى حق خراب بيت اختك
صقر : الحين لما ادافع عن اختي وماارضى عليها ... اصير ابي اخرب عليها
خالد: انا اقول خل ننطر شيخه تطلع من المستشفى تالي هي وجاسم يتفاهمون
صقر : انت بتجلطني ... شيتفاهمون عليه ... ترا اللي سواه جسوم مو شويه ... انت شايف شكل شيوخ شلون صاير ... انت شنو مو اخوها
خالد : لو اني مو اخوها وتهمني جان قلت خل تتطلق ولاهمني شي ... بس البنت توها 24 عمرها تتطلق شقولون الناس
صقر : واحنا شكو بالناس
بوخالد : هم انا اقول ننطر لينا شيخه تطلع من المستشفى
صقر (حده محتر ) : انتو من صجكم هذي بنتكم ... انتوا ماشفتوها وهي طايحه بالارض الدم يقطر منها جنها ذبيحة العيد
بوخالد : احنا ماقلنا ان بنعدي السالفه بس هم مانبي بنتنا تتطلق توها البنت صغيره ... وانا ادري ان جاسم ماراح يعيد هالغلطه وان بيتفاهم مع شيخه
صقر مااستحمل يقعد زياده حس ان اهله ظلمه ... طلع منهم ركب سيارته حده معصب .... دق على ساره .. ساره استغربت لما شافت رقم صقر داق عليها هو نادر حيل يدق ومايدق الا اذا في شي
ساره : هلا صقر
صقر : شفتي اخوج السنع شمسوي
ساره : -----------------
صقر : ليش ماتردين
ساره : ارد شقول ؟
صقر : اكيد ماعندج شي تقولين ... شتقولين عن سواد الويه اللي سواه الجلب جسوم
ساره : صقر عن الغلط ... احترم نفسك
صقر : الحين لاني قلت عنه جلب صرت اغلط ومو محترم نفسي .. وهو اللي ماد ايده على اختي والله ستر ان ماذبحها صار المسكين اللي ماقدر يمسك اعصابه لاني اختي حرته على قولته
ساره : انت الحين ... ليش داق ؟ داق تصرخ وتغلط علينا ... عندك كلام روح قوله حق جاسم مو حقي ... تبي شي غيره والا اسكره ؟
صقر : --------------
ساره : شكله ماعندك شي
صقر : تدرين اني احبج
ساره : --------------------
صقر : ردي علي انتي تدرين احيج وابيج ... كنت افرح بشوفتج ... بس اليوم لما شفتج يايه حق شيخه تمنيتج تكونين مكانها ... تمنيت لو اني اطيح فيج تكفج واحر جسوم مثل ماحرني على اختي ... عرفتي ليش جسوم حيوان وجلب لاني الحين حتى لو خذيتج ماراح انسى شكل اختي وانا شايلها داش فيها المستشفى ... ماراح انسى اللي سواه جاسم باختي ولا بنسى حرت امي عليها منه وبجيها تدرين ان امس طول الليل وانا بداري اسمع امي تبجي على شيوخ ... تدرين ان ابوي اللي عمري ماشفت دمعته شفت دموعه اليوم عقب ماشاف بنته مذلوله ومكسوره بالمستشفى وريلها حتى ماكلف حاله يدز مسج يسال شلونها

 

[MeeMeeYoo_2]

يعطيج العافيه

 

[[لين]]

مايندرى شبيصير

والله بعض المرات زواج الاهل مشكله

​

 

[النظره الصعبه]

مشكوووره حبيبتي على التكمله ننتظر الباجي

 

[rose red]

عشان جذي أنا ضد زواج الأهل!!
لو أيني أحد من أهلي خصوصاً عيال عماتي أو خالتي و خوالي ماراح أوافق صح كل واحد ياخذ نصيبه بس مشاكل زواج الأهل ما تخلص!
و وفواز مو خطب؟؟ شصار عليه؟؟ ناطرييينج روابي و شكراً على الإبدااااااااااااااااع

 

[north star]

حرااااااااااام عليه صقر
ساره مالها ذنب
روابي ناطرينج

 

[AngelGirl]

يعطيج العااااافية ناطرين التكملة

 

[ĈŵâįŽŶâ Мŕâβā]

البارت مو صج اينن وطويل حتى ابي اروح اشوف دراستي ماني قادره :*

يسلموو روابي بس آخر بارت رقم جم ؟ ومتى راح تخلص؟ وبليز طوليها مابيها تخلص

 

[~pYaar~]

مسكيينه شيوخ تكسر الخاطر ان شالله جسوووم يطلقها

مشكوووره روابي ع البارت

حده حده روووووووووعه :ggdw:

ناطرين البارت الياي على نااااااار

 

[3rbawia 7lwa]

اخيييييييييييه سارة مسكينة شنو ذنبها
كلا من جسوم الكلب

 

[UNiQe^PRiNceSs]

وووي عليج يا شيووووخ
ناطرين كملي بلييييز

 

[PorscheGirl3]

وااي هالجاسم يبط الجبد والله
اكيد بالاخير راح يخسر اثنتين ويندم
ياا رب تتطلق من جاسم وتتزوج فوااز
بلييز كملي