البارت ال 18 :
عدى اليوم الثاني على شيخه بالمستشفى مثل اليوم الاول ثقيل وطويل ومتعب ....
عالساعه 10 بالليل شيخه ... بفراشها تحاول ان تفكر باي شي الا جاسم ومشاكلهم .. كانت قاعده تتعبث بتلفونها ... والا تسمع صوت تنحنح من ورا الستاره
فواز : لبسي حجابج يا مرا
بسرعه لبست شيخه ملفعها ولبست توينز فوق بيجامتها
فواز : ياللللله شدعوه عروس
شيخه : خلصت حياك
دخل عليها فواز كان لابس كاجوال شورت وتيشرت ... شيخه استغربت ان فواز مو لابس بالطوه ... وماسك صحن مغطى وجيس
فواز : مشالله الويه رد لونه ... شلونج ؟
شيخه : الحمدالله بخير ... انت شلونك ؟
فواز : عال العال ... تعشيتي ؟
شيخه : اي
فواز : بس اكيد ماشبعتي ... الاكل هني مايشبع
شيخه : الحمدالله
فواز : عاد مسويلج لازانيا
شيخه : ليش مكلف على حالك ؟
فواز : لا كلافه ولاشي ... طلعت من الخفاره على طول رحت البيت نمت تالي قعدت ماعندي شي ويوعان قلت اسوي لازانيا بس مالقيت احد ياكل معاي قلت مالي الا شيخه ايي ازورها واكل معاها
شيخه : يعني انت اليوم مو خفاره ؟
فواز : انشالله مو كل يوم اكون خفاره ... لا انا اليوم زاير ... واذا مو قابله زيارتي عيل انا ياي امسك الخفاره يعني مالج فكه مني
شيخه : لا شدعوه حياك الله .... اقدر اسال سؤال شخصي شوي ؟
فواز : اخذي راحتج
شيخه : ليش ماوديت الازانيا حق زوجتك وكليت معاها ؟
فواز : للحين ما تزوجتها
شيخه : صج ... جنكم طولتوا بالخطبه
فواز : لا وانتي الصاجه فلينا الخطبه
شيخه ( لاشعوريا ابتسمت ) : صج ؟
فواز (متعمد يحرجها ): لهدرجه الخبر ونسج
شيخه : لا شكو بالعكس والله .... اصلا اتمنى لك الخير ... بس انا ذكرت شي وضحكت
فواز : شذكرتي
شيخه : شي ..... ليش فليتوا ؟
فواز( يبرطم شوي ) : ماتقولي شلونك ؟
شيخه : اي شي .. صح ؟
فواز : اي اي شي .... والله ماكو بس مالله كتب نصيب بينا
شيخه : الله يعوض عليكم
فواز : اميين .... انزين يالله اكلي ... الاكل طسس
شيخه : ماني مشتهيه
فواز : مو الا تشتهين ... اكلي غصب .... انشالله مااطق درب من بيتنا عشان هم ايي هني اكل بروحي
شيخه : عيل بس حطي لي شوي
فواز : نعم يماااااا ... من قالج اني انا اللي بنجب شمهنتج كافي انا اللي طابخ ... والا يكون صدقتي انج مريضه
شيخه : بس انا صج تعبانه
فواز : بلا عياره ... ترا انا اللي ماسك حالتج وادري ان مافيج شي ... اصلا انتي اصحى مني
شيخه : لو مافيني شي جان دكتور يوسف مادخلني المستشفى
فواز : مو دكتور يوسف اللي دخلج .. اللي دخلج دكتور فواز ... وهو دخلج لان كان يبي يسويلج لازانيا مو لانج تعبانه.... عرفتي
شيخه : ---------------------------------------
فواز : شيخه ... اذا طلبتج ترديني ؟
شيخه : لا امر
فواز : ليش طقج ؟
شيخه ( حيل ضاق خلقها من هالسؤال ) : تهاوشنا
فواز : الهواش مو سبب كافي انه يطقج جذي ... على شنو كانت هوشتكم ؟
شيخه : شي خاص بيني وبين جاسم
فواز: يعني منتي معلمتني
شيخه : لوسمحت فواز ماحب احد يدخل بمشاكلي مع ريلي
فواز : على راحتج .. بس اذا تبين اي شي تراني بالشوفه
شيخه : تسلم ماتقصر
--------------------------------------------------------------------------
جاسم كان ماله خلق احد ولا له خلق نفسه ...من شيخه دشت المستشفى ياب اغراضه ورجع ينام ببيتهم .... وهو قاعد بداره يفكر بحل او طريقه تليين راس شيخه ... دشت عليه امه
ام جاسم : شلونك جاسم ؟
جاسم : هلا يما .. حياج
ام جاسم (قعدت يم ولدها بالفراش ) : شوف جاسم انا ماني سالتك ليش سويت اللي سويته بشيخه لانك لو تبي تتكلم جان قلت حق ابوك وعمك ... بس اسمع يا يما ترا اللي سويته مايرضي الله ولا خلقه ... حتى لو ان البنت غلطانه ماكان لازم انك تتصرف جذي عمره الطق ماكان حل ... لو نفرض ان البنت ماكانت زينه معاك او مقصره وياك مااطقها كنت تقدر تكلم اهلها او تكلمنا نكلمهم مو تسوي جذي
جاسم :يما شيخه ماقصرت بشي وماشفت منها الا كل خير
ام جاسم : عيل ليش طاقها ؟
جاسم : يماا ماله داعي اقولج لانج ماراح تفهميني ودام انكم شايفيني غلطان يعني مهما اقول ماراح اغير شي
ام جاسم : شوف ياجاسم لو شنو ماكان سببك انت غلطان لان مافي شي بالدنيا يخلي الواحد يطق مرته جذي ... بس قولي افتح لي قلبك انا مو يايه احكم عليك .. انا يايه ابي اريح قلبي ابي اعرف ولدي الطيب شصار فيه ريحني حبيبي
جاسم ( انكسر خاطره على امه ) : يما والله اني اعز شيخه حيل واحبها ... يما شيوخ من نولدت هي جدام عيني حالها حال ساره ما كان مفروض اتزوجها والله اني حاولت اكون زين معاها حاولت احبها بس صج ماقدرت ... بالعكس بدال لا احبها كرهتها كنت كل مااشوفها زينه معاي اتنرفز من داخل كنت احس اني قاعد اظلمها واظلم نفسي معاها ... لما كنت اسمع مدح فيها اتضايق لاني مو قادر احس بسنعها وزينها بس كنت ادري اني مستحيل اطلقها عشان ابوي وعمي ... يما انا ما كنت ابي شي بس كنت ابي زوجه احبها وتحبني ... زوجه انا اختارها
ام جاسم : جسوم ش هالكلام محد جبرك على شيخه .... انت اللي ييت وقلت ابيها لا اتيي الحين وتركبنا الغلط وتحسسنا ان احنا اللي غصبناك
جاسم : انا ماقلت انكم غصبتوني ... هي اللي غصبتني حبها لي هو اللي غصبني اخذها ... ماكو واحد بالدنيا يدري ان في بنت تحبه وماتفكر بغيره ماياخذها انا هقيت اني بقدر احبها بس ماقدرت ماكان بيدي .... ادري اني غلطان والله ادري والغلط راكبني من راسي للساسي بس يما مو هي الزوجه اللي ابيها
ام جاسم : الحين هالكلام ما يفيد ... اسمع باجر منت رايح الدوام خل نروح حق شيخه المستشفى .... روح لها طيب خاطرها ترا البنت اول تالي منك وفيك مايصير ماتسال عنها
جاسم : يما انا بطلقها
ام جاسم : شنووووووووووووو ... والله لو ابوك درا يذبحك شيل هالفكره من بالك لا ابوك ولاعمك بيرضون
جاسم : بس ماني قادر يما .... مابي طول عمري اكون مع وحده وافكر بغيرها ... يما انا ابي زوجة احبها ابي وحده مااخونها ... والله مليت من اللي انا فيه
ام جاسم : انت اللي اخترت شيخه البنت مو لعبه عندك تاخذها وقت ماتبي وتقطها وقت ماتبي ... باجر الصبح نروح لها
طلعت ام جاسم من عند ولدها عقب مازادت همه هم ... هو كان يظن ان خلاص بيرتاح وبيشوف حياته من يديد ... حياة بعيده عن شيخه وعن ريم ... حياة يديده فيها راحة بال ومافيها خيانه .
اليوم الثاني الصبح راحت ام جاسم وجاسم حق شيخه المستشفى ..
دخلت ام جاسم الغرفه عند شيخه والا تلقى ام خالد عندها
ام جاسم : السلام عليكم
ام خالد : وعليكم السلام ... هلا ام جاسم حياج
ام جاسم : شيوخه شلونج حبيبتي
شيخه : بخير خالتي الحمدالله
ام جاسم : سامحوني توني ايي بس والله والله يشهد اني مالي ويه اقابلكم حدي مفتشله منكم .... والله اني يومها ما نمت من الحره عليج ... وادري اني مهما اقول مااقدر اني اصلح اللي صار ولا اقدر ارقع حق ولدي لان مهما كان السبب ماكو شي يعذره او يغفر له ... بس احنا اهل وعمر الظفر مايطلع من اللحم ... وجاسم واقف برا يبي ايي يتسامح منج وصدقني اللي يرضيج بسويه
شيخه : خالتي والله ان ييتج عزيزه وغاليه بس خلاص مافي كلام يصلح اللي صار والحمدالله ان هالشي صار ببداية حياتنا مو تالي واحنا عندنا عيال ودام ان للحين مافي شي يربطني بجاسم ... انا ابي اطلق
ام جاسم : لا شيخه الا الطلاق ... انا قلت لج هو متحسف وندمان
شيخه : خالتي الحسافه والندم ماراح يفيدوني بشي انا مو طالبه الطلاق لان طقني ... خالتي جاسم قبل لايطقني ذبحني ... ذبح داخلي كل احساس حلو ناحيته ذبح اي شي يربطني فيه ... ولدج ياخالتي كسرني هز ثقتي بالناس وقبل لايهز ثقتي بالناس هز ثقتي بنفسي ..... خالتي اذا اصج انتي تحبيني وعادتني مثل ساره بنتج قولي له يطلقني بهدوء وبلا مشاكل لان خلاص عافه الخاطر وانا الطلاق من زمان كنت ابيه بس كنت متخوفه منه بس الحين انا ماني خايفه من شي ولا مستعده اضيع من عمري زود
ام جاسم (تلفت على ام خالد) : يرضيج كلام بنتج يا ام خالد ؟ اشوفج ساكته ماتحجيتي
ام خالد : والله انا مااقدر اقول شي لاني للحين ماني عارفه شاللي خله جاسم يسوا جذي وشاللي بينهم .... انا كنت ناويه اول ماتطلع شيخه من هني اتكلم معاها ... بس اللي انا اعرفه ان بنتي عاقل ماهي ياهل او سفيه وما طلبت الطلاق الا اكيد انها هي مالقت غيره حل
ام جاسم ( وخاطرها مكسور ) : عن اذنكم انا امشي الحين ... وانشالله متى ماطلعت شيخه تفاهمنا .... وعموما جاسم يسلم عليج وتراه واقف برا بس دام هذا كلامج انا اقول ماله داعي يدش
شيخه : خالتي سامحيني والله ان ماودي ازعلج وترا انا اعدج حسبت امي بس كل نصيب
ام جاسم : على قولتج كل شي نصيب .... الله يقومج بالسلامه
جاسم حيييل ارتاح لما قالت له امه ان ماراح يدخل عند شيخه .. كان وايد شايل هم شنو بقولها وشلون بيقعد معاها .... اول ماطلعت ام جاسم ... قعدت ام خالد عند شيخه
ام خالد : سمعي شيوخ .... ترا انا صبرت عليج وايد ومن دخلتي المستشفى وانا ماسكه اعصابي وماتكلمت .... بتقولين لي شبينج وبين جاسم لا صدقيني مثل ماجسوم دخلج الاميري ... دخلتج مستشفى العظام بتكون على ايدي....
قالت شيخه حق امها السالفه كلها من اول يوم تزوجت فيه جاسم
ام خالد : كل هذا وساكته ماتكلمتي .... ليش ماني امج .. ماعندج اهل والا مقطوعة من شجره
شيخه : انا كان عندي امل ان يتعدل وينصلح حاله
ام خالد : حتى لو كان لازم تتكلمين .... وهالوسخه ريم حظها قايم مطلقه وتاخذ لها مثل جاسم عرفت اتييب راسه .. ريلها الله فكه منها يوم ان طلقها بس والله مااخليها تتهني ان ماقلبت حياتها
شيخه : يما شبتسوين ؟
ام خالد : مادري ... بس اكيد اني ماني ساكنه ... انتي عندج رقمها والا مسحتيه ؟
شيخه : لاعندي
ام خالد : عطيني اياه ... وانتي ماقالج الدكتور متى بتطلعين ؟
شيخه : لا بس امس فواز عندي وقال ان مافيني شي
ام خالد : متى مرج فواز ؟ طول اليوم انا عندج
شيخه ( توهقت ) : عقب ماطلعتاو ؟
ام خالد: ليش دوامه كان ليل ؟
شيخه : مادري
ام خالد : دام يقول ان مافيج شي خل ادق على صقور ايي يطلعج .... صقر كان توه طالع من الامتحان اللي ماعرف يحله عدل من التفكير ب ساره والكلام اللي قاله لها ... كلمته امه ان ايي يطلع شيخه وياخذهم .... صقر اول ماركب سيارته دز مسج حق ساره : ترا صج اسف عالكلام اللي قلته ماكنت اقصده
ساره ردت عليه : حصل خير
صقر : زعلانه ؟
ساره : لا
صقر: اذا صج مو زعلانه تعالي بيتنا اليوم ... رخصوا شيخه
ساره ( كانت ميته انها تزور شيوخ ... بس الموقف اللي صار لها بالمستشفى والاحراج اللي حسته خلاها ماتقدر تزورها ... كانت تبي تنطر تشوف شصير بين جاسم وشيخه عشان تعرف وضعها وموقعها ..) ردت عليه ساره : والله ودي بس مااقدر محاضراتي تخلص متاخر وعندي باجر امتحان انشالله وقت ثاني
صقر ( حس انها قاعد ترقع لانها ماتبي تيي ) : على راحتج
وصل صقر امه وشيخه البيت وكان بيرجع كليته
ام خالد : وين رايح ؟
صقر : راد الكليه
ام خالد : انزل ابيك شوي
دخل صقر مع امه الصاله وشيخه راحت دارها كانت تبي تسبح وتغير
ام خالد: صقور ابي اطلب منك شي
صقر : امري
ام خالد : رفيجتي عندها ولد مطلق قاعد ادور له عروس عاد لقت له خوش بنت بس مانعرف بياناتها الكامله مانعرف الا رقم تلفونها واسمها تقدر اطلع لي بياناتها منو اهلها وين ساكنه ... ابيك اطلع لي كل اللي تقدر عليه
صقر : ياحليلج يما اشتغلتي خطابه
ام خالد : لا والله بس الولد كاسر خاطري من زمان يدورون له مرا والبنت اللي لاقيتها رفيجتي هم مطلقه .. عاد قلت اسعى لهم
صقر : ما يصر خاطرج الا طيب انشالله يومين بالكثير واييب لج بياناتها كامله ... بس جم رقمها وشسمها ؟
ام خالد : اسمها ريم وهذا رقمها
