مع خبيره الاعشاب معلومات واساله واستفسارات حياكم

[كاشونه الاصليه]

اختي حبيت اسأل عن الزعفران صج يفتح الرخم لاني قريت بكتاب الاعشاب وحبيت اتاكد منج
وحبيت اسأل عن الخروع اشكثر المقدار غير ضرر
وحبيت اتأكد من حبه السوده صج تفتح الرحم ومشكوره

 

[خبيرة اعشاب]

كاشونه الاصليه​

هلا فيج اختي

بالنسبة للزعفران و الحبة السوداء مدران للطمث و يسببون تقلصات في الرحم لذلك يمكن استعمالهما لتسهيل الولادة

بالنسبة للخروع انتي تقصدين الزيت او البذور ؟؟

و تبينهم بالضبط حق شنو لان تختلف الجرعة حسب الاستعمال ؟؟

 

[كاشونه الاصليه]

بغيتهم حق تسهيل الولاده وقصدي زيت الخروع

 

[الكويت حياتي]

ياريت لو تدليني على اعشان تضعف سريع

 

[زيتونة]

السلااام عليكم ورحمة الله وبركاته

انا بغيت اعشااب او اي شي يشيل الانتفاخات والغازات بعد الاكل

لانها مسببه لي احراج

ويعطيج العافية

 

[tolip2tolip]

خبيره الاعشاب
انا قرات عن خلطه الذكاء للاطفال اللي ذكرها الدكتور عادل عبدالعال
وهي عباره عن:
3حبات عين الجمل
50جرام من الزبيب
10جرام من القرفه
3جرام من رويال جلي
10جرام من حبوب اللقاح
سوالي لج
س1:هل هذي الخلطه تفيد طفل عمره سنه؟
س2:رويال جلي نفسه ما يسمي بغذاء الملكات؟
س3:هل يفيدغذاء الملكات لطفل عمره سنه؟لاني سالت اللي عند العويد يقولا ما ينفع لهذا العمر فما هو رايك؟
س4:انا ابي اخلط هذي الخلطه مع الحليب نيدو اللي يشربه الطفل العلبه حجم الوسط هل هذا يكفي او ازيد عليه بعض؟
س5:جم مره اقدر اعطيه؟


وشكرا وادري طولت عليج بس ما ابي اعطي ولدي شي وما ينفعه اويضره

 

[خبيرة اعشاب]

كاشونه الاصليه​

اختي لتسهيل الولادة جربي عشبة كف مريم و التمر ...

اما زيت الخروع فهو مسهل و يستعملونه بعض المرات كمسهل للولادة لانه يساعد على انقباض عضلات الرحم

و كذلك لا تنسين اختي الدعاء لانه اهم شي و الاولادة ان شاء الله تساهيل من الله

و الله يهون عليج

 

[خبيرة اعشاب]

الكويت حياتي​

هناك تركيبه بسيطة لانقاص الوزن يمكن استعمالها لمدة شهر بدون اي اضرار جانبية

طبعا العلاج يختلف على حسب السبب الرئيسي للسمنة

اذا اتحسين ان زيادة الوزن ناتجة عن شهية مفرطة فهذه الوصفة للتخفيف من الشهية
2ملعقه كبيره قشر قهوة + 2 ملعقه كبيره اكليل جبل + 2 ملعقه كبيره شواش الذره+ 1 ملعقه كبيره عشبه رجل الاسد === تخلط المقادير و تطحن

الطريقه :

تؤخذ ملعقه صغيره من الخلطه و تنقع في كوب ماء مغلى ..تبرد ثم يضاف اليها ملعقه خل تفاح و تشرب 3 مرات يوميا قبل الوجبات ب 10 دقائق

في ناس اتكون سمنتهم ناتجه مو عن زياده في الاكل او اي شي ..انما عدم تصريف
في الحاله هاذي ممكن ياخذون شغلات مدره للبول

شاي اعشاب : ( طبعا كميات متساويه من كل نوع )

شواش الذره + ارقطيون+ هندبا+ اكليل+ ابره الراعي+ اخيليا +بذور السنامكي +اذريون+بابونج+جعده

هاذي تركيبه فعاله لادرار البول و تضعف نفس ما قلت الناس اللي عندهم خلل او عجز في التصريف فقط ..
و طريقتها انج اتخلطين الاعشاب و تطحنينهم و بعدين تشربين من الخلطه ملعقه شاي صغيره اتسوينها بكوب ماي نفس الشاي ..3 مرات باليوم بعد الوجبات مباشره

الحين في حاله ثالثه :
السمنه الناتجه عن خلل هرموني كالغذه الدرقيه مثلا او تكيس المبيض او السكري

فمن المفرووض علاج السبب الرئيسي للسمنه و تطبيق نظام غذائي متوازن مع رياضه خفيفه و من تم سيتعدل الوزن تدريجيا
و هناك ايضا خلطه تصلح للحالات الطبيعيه :

يعني بس تبي تتخلص من كيلو او 3 كيلو زياده بشكل طبيعي فممكن تستعمل التركيبه هاذي لمده اسبوع فقط و ان شاء الله اتشوف نتايج طيبه :

و الخلطه تتكون من :

6 ملاعق كبيره سندروس مطحون
10 ملاعق كبيره بابونج مطحون
10 ملاعق كبيره شومر
2 ملعقه كبيره بذور الكتان مطحونه
2 ملعقه كبيره بذر قطونا مطحون
4 ملعقه كبيره لوف الاسد

تنطحن الاعشاب هاذي كلها من بعد ما تتنظف ..و الطريقه انج تاخذين منها ملعقه متوسطه يوميا على شكل شاي اعشاب قبل الغداء مباشره ...

الخلطه هاذي لا بد من التعامل معها بحذر و عدم تجاوز الجرعه المقرره ..طبعا المرضعات و الحوامل ما ياخذون اي اعشاب بتاتا

 

[خبيرة اعشاب]

طبعا ان خلطات تخفيف الوزن لا تعني شيئا في حالة عدم الالتزام بنظام غذائي ...و النظام الغذائي لا يعني ريجيم او حرمان ..انما عن تنظيم للتغذيه يرافقنا طوال الحياة

- جعل طبق السلطة عادة يومية ..و انا لا اعني بالسلطة تلك الغنية بالمايونيز او الدهنيات او المقالي انما اقصد السلطة الخضراء البسيطة المكونه من خضرة ورقيه ( جرجير / هندبا / بقدونس ...خيار طماط خس ...)
و تناول السلطة قبل الاكل يخفف من الشهية للطعام

الغذاء ككل يوم و لكن كميات اقل ...و يكون متوازن يعني طبق من الكربوهيدرات + بروتينات ...الخ
ممكن تشربين بيبسي او تاكلين حلا ..و لكن ايضا بكميات قليله

الفواكه لابد ان ترافقك يوميا ...لانها اول شي مغذية للجسم و ثانيا اتكافح السمنة ..

يعني ممكن تاخذين تفاحة الصبح او العصر ...الخ

- الامتناع عن تناول الوجبات السريعه و اكل المطاعم لانه غني بالدهون المشبعه و في حاله كنتي خارج البيت و رغبتي بتناول شئ ممكن موز او خيار او فواكه ...او عصير الخ
في حاله رغبتي بشدة بوجبه سريعه ممكن تطلبين منهم ما يحطون مايونيز و كتشب و قطعه الجبن السلايس و يكثرون لج الخس

اجعلي المشي عادة يوميه ....شغلات بسيطة ممكن اتساعدج في فقدان الوزن
يعني بدل استعمال المصعد ممكن الصعود او النزول من السلالم العادية
بدل استعمال المكنسه الكهربائيه ممكن استعمال اليدويه
الاعمال المنزليه تكسبك لياقه جسدية
الاستيقاظ من النوم باكرا يمنح جسمك طاقه اكثر

و اكيد ان قوة الارادة و العزيمة رح اتساعدج بشكل كبير في فقدان الوزن فبالتالي حاولي اتشجعين نفسج اكثر و اكثر

 

[خبيرة اعشاب]

tolip2tolip​

اختي الخلطة الي ذكرتيها غير مناسبة لطفل عمره سنة او حتى 3 سنوات

الرويال جلي هو نفسه غذاء الملكات

و العسل عموما لا يصلح لهذا العمر

و عموما تطرح بعض الشركات عسلا خاصا للاطفال مخففا و مناسبا لجهازهم

الهضمي شوفي عسل العويد او المعجزة عندهم عسل للاطفال من سن سنتين

و نصيحة اختي لا تعطينه الخلطة هاذي بتاتا لا مع الحليب و لا غيره ...

الشئ الوحيد الي ياثر في نسبة الذكاء عند الاطفال هو الوراثة و بعدها

الرضاعة الطبيعية و التغذية السليمة و بعدهم الوسط الي يتربى فيه

الطفل ..يعني اتخلينه يستكشف العالم ...و اتطلعينه فالشي هذا ياثر عليه

مستقبلا

و حياج

 

[خبيرة اعشاب]

زيتونة​

اختي بالنسبة للنفخة و الغازات جربي الخلطة التالية و هي عبارة عن خلطة شاي اعشاب تتكون من :

فنجان من كل من :

- مسحوق العرقسوس
- مسحوق بزر الكتان
- مسحوق البابونج
- مسحوق الشاي الاخضر
- مسحوق الشمر
- مسحوق الكمون
- مسحوق المرقدوش
- مسحوق الزعتر


تخلط المكونات و تطحن و تحفظ في علبة

الجرعة : ملعقة متوسطة من الخلطة تستحلب في كوب ماء مغلي لمدة 10 دقائق , تصفى ..ثم تشرب كاحد اقصى 3 مرات يوميا بعد الوجبات مباشرة

 

[زيتونة]

يعطيج العافية

بس هالخلطة ما تسبب مشاكل للمعده ؟!!

وانا عندي ضغط وكان عندي مشاكل بالمعده .. ما تأثر عليها ؟!!

 

[tolip2tolip]

مشكورة ويعطيج العافية

 

[قشطة]

خبيره اعشااب

حبيت اسلج اختي اذا حطيت المرة في بطل ماي صحه وحفظتها بدرجه حراره الغرفه
راح يأثر عليها ؟؟
يعني الافضل اني احطها بالثلاجه او اخليها عندي بالغرفه حق الاستعمال اليومي للبشرة

 

[كاشونه الاصليه]

مشكوووووووووووره وما قصرتي

 

[نزف]

قوه خبيره

حبوبه بغيت أسألج عن صبغة دم الغزال

شنو استعمالاتها بالضبط ؟؟

انا قريت بمواضيعج أنها تصبغ الشفايف لون وردي

وبعد للجسم بعد الحمام المغربي


بس بعرف هل هي ماده سامه مثل ماسمعت ؟؟

وبعد نقدر نحطها على الحنه للراس ؟؟

يعني عشان تصبغ لون توتي

 

[خبيرة اعشاب]

زيتونة​

هلا فيج

اختي الخلطة مالها اي مضار على المعدة او الجهاز الهضمي
و يمكن استعمالها في اي وقت لانها خلطة امنة جدااا

و حياج

 

[خبيرة اعشاب]

قشطة​

اختي سواءا حطيتيها ذاخل الغرفة او برة عادي ..
بس اذا تبين اتحطينها في الثلاجة لازم اتكون ناقعة و متفككة في الماي

و احسن خليها عندج بالغرفة

و حياج

 

[خبيرة اعشاب]

نزف​

هلا فيج اختي
بالنسبة للعكر الفاسي المغربي فهو مستخلص من نبات الورد الجوري ..يعني طبيعي 100% و يستعمل للجسم و الوجه او مع الحنة لصبغ الشعر بلون قرمزي ..

اما المتوفر بالكويت فما ادري عن مكوناته لان العلبة مو مكتوب عليها شي ..و شكل البودرة مو نفس بودرة العكر الفاسي و ممكن تستعمل للشعر او الجسم و مالها اضرار ..

و حياج

 

[نزف]

يعني لو حطه على شفايفي مو سام ؟؟؟



ومشكوره مره ثانيه