كنت اتمنى

[flooonah]

حده البارت نته شنو هذا ام ريوووم؟؟؟؟

 

[zizo0ou]

البارت حده عجيييب و ناطرين البارت الياي

 

[ورده كويتية]

ناطرين

 

[أحبه موت]

البارت حده عجييييب والحقير عبدالله باط جبدي ليش وافق من البداية وعليا عليج يا منى وين ما اطقينها عوية خو كل منى حظها عوي اهي اهي اهي
بس في سؤال محيرني الحين لمن رفيج غانم دق على أنفال وكلم هيا وقالها عن نية غانم بأنفال وقالها عن نية ياسر بشهد صح؟؟؟
يعني شهد تدري بنية ياسر ليش دقت عليه واهيه تدري شنو اباله؟؟؟ ماادري مستغربة تستبعط يعني ولا شسالفتها

 

[UNiQe^PRiNceSs]

waiting

 

[أحبه موت]

سيدتي متى سوف تتعلمين تنزيل البارت باكرا
شكلي بشتريلج إياه من مكتبة العجيري قريبا ان شاء الله على هالنطره

 

[T-flower]

امبيه البارت اينننننننن
لا تطولين وعبدالله ارحم حالك

 

[توتا كويتيه]

حبيبتي ننطرج لاطولين
رووووووووووووعه

 

[T-flower]

waiting

 

[om reem 86]

البارت الواحد والعشرين


منى : شرايج البس هذا والا هذا
غزل : اثنيناتهم واايد حلوين
منى : اممممم شوفي اهو سيارته كحليه يعني اكيد يحب اللون الازرق عشان جذي بلبس هذا
غزل : والله انتي نكته
منى : والله احبه احبه امووووووت عليه
غزل : تعالي ما قتلج امس هدى وابوي كلموني وقالولي اليوم بييون الرياييل يتكلمون
منى : على شنو؟
غزل : تركي
منى : انزين انتي يعني خلاص مصممه؟
غزل : تبين الصج؟
منى : اكيييد
غزل : انا مو فارقه معاي ولاخر لحظه كنت بهون بس شفت امس ابوي شلون مستانس غيرت رايي وبرضى بنصيبي ويمكن انسى فيصل

*****
سامي كانوا حاطينه بغرفه عمومي بالرازي ومجبسينه وقاعد يبجي حيييل لان الموقف في باله وموته مساعد كانت حيل مو هينه والالم اللي اهو قاعد يحس فيه وما يقدر يتحرك تحسف على كل لحظه قضى فيها بالسيكل وقام يبجي زياده لان لي فات الفوت ما ينفع الصوت
ام فيصل : بسك يا يما والله العظيم قطعت قلبي
فيصل : خليه يما يبجي خليه يمكن يحس
ام فيصل : يما يا حبيبي روح طل على ابوك وشوف الدكتور شقال؟
فيصل : توني من شوي طليت عليه قالوا بس كان ضغطه نازل بس الحين الحمدالله وحاطين له درب قال الدكتور يبيله ساعتين بالدرب وبعدين خلاص الحمدالله يطلعونه
ام فيصل : ( طلعت المصحف من جنطتها وقامت تقرى ودموعها مو راضيين يقفون)
فيصل : اهل الولد اللي مات دروا اهله؟
عادل :اي دروا وما عندهم خبر ان سامي ورى اللي صار حق ولدهم
سامي : ( قاااام يصرخ والله مالي شغل اهو اللي تحرش )
ام فيصل : بس يما مصدقتك مصدقتك
فيصل : اوكي خلاص خلاص محد راح يدري بس انشالله ما يكون فيه شهود ... عادل؟
عادل : هلا امر؟
فيصل : ما ابي احد من العايلة يدري اليوم خلها عادي عقب فتره


*****

عبداللطيف : باباتي انتو اليوم روحوا مع امكم وين ما تروح انا بسافر السعوديه يوم واحد وارجع
نوار : بابا ما ابي اروح مع ماما
عبداللطيف : ليش حبيبتي؟
عيسى : اوش سكتي اذا قلتي امي قالت بنقص لسانج بعدين ما تقدرين تتكلمين
نوار : خلاص حلاص ماراح اقول
عبداللطيف : قولولي شصاير
سكتوا اليهال ومحد راضي يرد
عبداللطيف : (صرخ عليهم عبداللطيف ويمكن هذي اول مره يصرخ عليهم ) شفيكم تحجوا؟
نوار : اذا قتلك وامي قصت لي لساني اتركبلي غيره؟
عبداللطيف : اي حبيبتي اركب لج غيره قولي شفيكم
نوار : يبا احنا ذيك المره لما رحنا مع امي بيت رفيجتها امي دشت الدار وانا كنت حسرانه وما ادل الحمام وابي امي تساعدني عشان تفصخني وامي كانت قافله عليها الدار مع رفيجتها واحنا نطق الباب حيل امي تصارخ علينا تقول اوش ولا كلمه بعدين انا بلت على نفسي ولما امي طلعت طقتني طق
عبداللطيف : وليش امكم كانت قافله الباب
خليفه : مادري يبا بس يمكن امي كانت مفصخه لان لما طلعت لنا امي كانت لابسه روب
عبداللطيف : ( انصدم من اللي قاعد يسمعه ) انزين شوفوا لا تقولون حق امكم انكم قلتولي خلوه سر بيني وبينكم انزين؟
عيسى : انزين
نوار : انزين يبا
خليفه : انزين
عبداللطيف : انهار من اللي اسمعه واول ما يا في باله انها تخونه بس تعوذ من الشيطان وحب انه يتأكد بنفسه عشان يقطع الشك باليقين

*****
هدى : يالله تعالي تحت عبدالله قاعد مع ابوي تحت
منى : هدى ؟ شلون شكلي؟
هدى : والله العظيم قمر قمر
غزل : من يشهد للعروس ههههه
منى : ذابحتج الغيره
هدى : بلا هواش يالله نزلي تحت ... وشكه يا يبلج شي
منى : اااااخ فديت عمره والله ... نازلته طياره
*****
شهد : ( رن تلفونها وبسرعة البرق شالته ) الوووو هلا والله
ياسر : هلا فيج انا اسف اذا ازعجتج باتصالي بس كنت محتاج اسمع صوتج
شهد :ههه ... ممكن اسالك سؤال؟
ياسر : امريييييييني ؟
شهد : تدري لحد الحين انا ما اعرف اسمك؟
ياسر : الاسم اللي تبينه انا مستعد اتسمى فيه؟
شهد : ههه لا صج صج شنو اسمك؟
ياسر : اسمي حامد
شهد : عاشت الاسامي
ياسر : عاشت ايامج ... سولفيلي شوي عن نفسج؟
شهد : شنو تبي تعرف بالضبط؟
ياسر : انتي شلون نظام حياتج ؟ حبيتي من قبل؟ تدرسين؟
شهد : اوله اوله .. انشالله راح اجاوبك.. بس بشرط انت تقول بالاول
ياسر : انا موظف عادي اشتغل بوزاره ومعاشي على قدي الحمدالله مكفيني وزايد اصرف على امي عندي اخت وحده متزوجه وعندها ولد عمري 27 سنه ادري مو مبين علي الكل يقول شكلي اصغر ابوي متوفي شهادتي جامعية امي عندي بالدنيا ... هاااا بعد شنو بتعرفين بعد؟
شهد : كفيت ووفيت تقريرك شامل ههههه ... حمد امي تناديني بروح اشوفها
ياسر : دربالج على نفسج
*****
بالسياره
منى : عبدالله مشكور ..
عبدالله : على شنو؟
منى : على الهديه الحلوه ... ذوقك وايد حلو
عبدالله : قصدج ذوق مريم
منى : اهيا اللي نقتها
عبدالله : شدراني نادتنني وانا نازل وقالت لي عطها منى بس لا تقول انها مني ... انا اصلا ما ادري شنو فيها
منى : ( انصدمت من كلامه وخنقتها العبره ) عبدالله ؟
عبدالله : نعم ؟
منى : ممكن اسالك سؤال ؟
عبدالله : شعندج؟
منى : ( ودمعت عينها ) انت مغصوب على الزواج مني؟
عبدالله : ليش تسألين ؟ وليش هالدموع؟
منى : ممكن اتجاوبني ؟
عبدالله : ....
*****


انتهى البارت الواحد والعشرين وما راح اتأخر عنكم بالبارت الياي :RoadRunner:​

 

[ورده كويتية]

شكرا لج

بس مفروووووووووووض تنزلين واااااااااااااايد لأنج مطوفه بارتات لنا
وحرام عليج كل مره نقعد على اعصابنا تنزلين واحد

 

[UNiQe^PRiNceSs]

احسن عبداللطيف درا لان امير ما تستحي
وعبدالله حرام علييه ليش جذي :0bee2e8d89:

كملي حبيبتي ناطريينج

 

[om reem 86]

البارت الثاني والعشرون



عبدالله : ( كسرت خاطره منى وحس بتأنيب الضمير )لا مو مغصوب وما في شي يغصبني
منى : (ساكته وتسمع ) عيل ليش احس انك جاف معاي
عبدالله : هذي طبيعتي وانا اسف اذا ضايقتج
منى : ( استانست وحست ان ودها تقوم تحضنه حيل ) انا اسفه
عبدالله : ما راح اقبل اي عذر منج الا بشرط
منى : آآآآمر ؟
عبدالله : انتي تنقين المطعم اللي بنتغدى فيه
منى : ( ابتسمت ) اوكي
*****
عبداللطيف : وين على الله لابسة؟
اميره : مالك شغل
عبداللطيف : ( بنبره حاااده ) كلميني عدل
اميره : بروح حق رفيجتي ... ارتحت؟
عبداللطيف : اي رفيجه؟
اميره : وانت من متى تسأل عن رفيجاتي؟
عبداللطيف : من اليوم
اميره : ما تعرفها ... وشفيك اليوم؟
عبداللطيف : سمعيني يا اميره ... من اليوم وطالع ما تطلعين الا بشوري .. تفهمين والا لأ؟
اميره : ( باسلوب طنازه ) واااااي يما خرعتني؟ شبتسوي يعني؟
عبداللطيف : راح اطقج واكسر راسج بعد اذا مو عاجبج
اميره : ( خافت شوي ) عبداللطيف حبي شفيك اسم الله عليك؟
عبداللطيف : ( فكر فيها وشاف ان هذا الوقت المناسب اللي لازم ينكشف الصج ) لا ما فيني شي وخلاص خلاص توكلي على الله وانا بعد شوي بسافر
اميره : ( مو من قلبها ) حافظك الله يا نظر عيني
*****
انفال : بقولج شي بس مو اتطقيني
شهد : شنو بعد قولي يا كثر ما تقولين
انفال : امس رحت صوب بيت غانم
شهد : ( طلعت عيونها ) ليييييييييش؟
انفال : احبه والله احبه
شهد : حبج برص انشالله مالت عليج
انفال : انتي عمرج ما حبيتي .... ولا تعرفين معنى الحب
شهد : انشالله احب زوجي وعيالي
*****
عبدالعزيز : يما شصار على موضوعي؟
ام يوسف : اي موضوع؟
عبدالعزيز : هيا
ام يوسف : انشالله انشالله لا تحن
عبدالعزيز : الحين اهيا قاعده تمتحن الفاينل
ام يوسف : ادري لا تحن
عبدالعزيز : امبلى بحن
ام يوسف : الا تعال وين عادل
عبدالعزيز : لا تغيرين الموضوع
ام يوسف : هاااا شتبي شتبي
عبدالعزيز : اليوم اليوم اليوم تكلمين خالي بوناصر
ام يوسف : افففففف يا صبر ايوب ... انشالله
عبدالعزيز : وعد ؟
ام يوسف : انا بعرف انت ليش حنان؟
عبدالعزيز : وعد؟
ام يوسف : وعد وعد
*****

اميره : هلا جاسم ... اي فلم حجزت؟
جاسم : فلم رعب مو صج
اميره : وعاد ليش رعب
جاسم : عشان تلزقين فيني
اميره : اموووت على رومانسيتك
جاسم : بس ترى انا حجزت الساعه وحده بالليل
اميره : اي عادي لان عبداللطيف بيسافر وراح يرجع باجر
جاسم : وين الملتقى ؟
اميره : بالشقه
جاسم : متى ؟
اميره : انت متى تبي
جاسم : الحين
اميره : فديت روحك انا .... انشالله يا قلبي اللي تامر فيه .. بس امر ابوي شوي وعقبها اييلك
جاسم : ناطرج حبي
*****
في هاللحظه راح عبداللطيف حق شركه الاتصالات وخذه برنت برقم اميره وانصدم من اللي شافه ان في رقم متكرر وفي انصاف الليل فقرر ان يبدى بالخطوه الاولى يتصل على الرقم على اساس انه غلطان ويتأكد وفعلا دق وكانت المصيبه الادهى ان اللي رد صوت ريال (جاسم) واعتذر انه غلطان ... وكانت هذي صدمة عمره شلون اهو كان مخدوع طول الوقت )
*****
ام يوسف : وااااي ما صدقت على الله افتك من حنه هذاك
خليفة : منو بعد؟
ام يوسف : منو غير عزوز عندي انا حنان
خليفه : ههههه ليش شيبي؟
ام يوسف : يبيني اكلم بوناصر على هيا
خليفه : انتي لي الحين ما كلمتيه
ام يوسف : امبلى مكلمته من قبل بس قالي ان تخلص دراستها وعقبها نرد نتحجى مره ثانيه
خليفه : اي ما بقالها شي
ام يوسف : اليوم عقب المغرب بييون الرياييل عشان غزل وانا قلت حق عيالي الا عادل ما راح ايي لانه بالشاليه
خليفه : انا اعتذر لي بو فيصل يقول انه حده مشغول ما يقدر وبوناصر وناصر قالوا بييون قبل وعبداللطيف مسافر وبدر بعد بيي يعني العدد كمل
ام يوسف : واخيرا بنفرح فيها
*****
شهد : اليوم الرياييل بيتكلمون على غزل
فيصل : شهد الله يخليج .. صكري الموضوع بروح قلبي يعورني
شهد : انت تبيها؟
فيصل : انااا احبها احبها احبها احبها
شهد : ما راح تروح اليوم
فيصل : تصدقين شهوده اني سويت شي حدي ندمان علي
شهد : شنو شفيك؟
فيصل : رفيجي خلاني اكلم وحده بالغلط وكلمته مرتين بس وتخيلي ادق ادق ادق علي ما ارد عليها
شهد : ليش ما تكلمها
فيصل : لان قلبي كله لغزل
شهد : ودي اسوي لك شي بس لي فات الفوت ما ينفع الصوت
فيصل : ودي اكلمها بس عزت نفسي تمنعني
شهد : حبيبي فيصل الحب مافيه عزت نفس واذا ظليت على عزت النفس هذي راح تخسر حبك انت جلرب مةو خسران
فيصل : لا لا مابي
*****
انفال : شفيج .. شفي ويهج جذي؟
شهد : اااخ على فيصل معور قلبي
انفال : شبتسوين يعني
شهد : امشي الحين معاي بيت غزوله لازم تدري
انفال : يالله انا معاج باللي تسوينه ولا ارضى بعوار قلب اخوي
شهد : امشي بس محد يدري
*****
انتهى البارت الثاني والعشرين


شاكره متابعتكم لي للقصه وناطره ردودكم

 

[miss fa6om]

تسلميين ع البارتاااات
وااي الله يكون بعون عبداللطيف على منيرة معور قلبي
وانشالله يعني انفاال مو كل شوي لهاا راي مرة تحبه مرة ماتحبه > انفعلت انفعلت خخخخخخخ
يالله نبي خوش بارت

 

[UNiQe^PRiNceSs]

الله يعين عبداللطيف كاسر خاطري

كملي ناطرييين

 

[om reem 86]

اكثر من متابعه لقصتي فاقده رودودهم مثل t-flower و zizooou ... وينكم عسى ما عسى ماشر ؟

 

[T-flower]

بعد عمري ماتفقدين غالي ان شاء الله
انا كاني موجوده
مرات مادش لانه حزة امتحانات ومرات مايكون في بارت
موجوده ثم موجوده قصتج عجيبة وما تتفوت حبيبتي
وعبداللطيف صج كاسر خاطري لانه مو سهله الخيانة
ومنى اخييييه عليها
جانزين لو عبدالله يفتك من الساحره الثانية السحيلة
ويمكن يعامل منى عدل
وعليا تكسر الخاطر

 

[أحبه موت]

اكثر من متابعه لقصتي فاقده رودودهم مثل t-flower و zizooou ... وينكم عسى ما عسى ماشر ؟

انا أورييييييج وانا يعني مو فاقدتني هاااا ماااشي يا أم علي

 

[om reem 86]

احبه موت انا بعرف انتي ليش ما تيوزين عن سوالفج ههههههههههه

 

[T-flower]

waiting
waiting