هلا بنات شلونك وشخبارك بصراحة ما سجلت بالمنتدي إلا عشان أشوف تجاربكم وأتشجع أسوي العملية لكن عقب ما تصفحت وشفت ردودك قلت
لا وألف لا خليني متينة ومبطوطة جبدي بس ما أتحمل كل اللي قلتوه
ترجع وألم لا وبعد ما أقدر آكل عشان :lololoe:يمكن من أول يومين أنا نائمة بصليبيخات تحت الرمل
كنت أشتغل بمستشفى السلام ثلاث سنوات مع مدير المستشفى وطوال هذه السنوات وأنا أقنع زوجي أني أسوي التحزيم لأن موظفين المستشفى لهم خاص وهذه كانت فرصة حلوة منها نوفر البيزات ومنها نصير رشيقات
لكن زوجي قال هيهات لك مادام راسي يشم الهوا لو تنقزين ما تسوينها لأنها خطرة وحرام خاف يصير فيج شي (قصده أموت ) حق منو تخلين عيالك وإنتي بعدج صغيرة
زعلت وطنقرت بس ماكوفايدة خواتي نصهم يشجعوني ونصهم ما يؤيدون وأمي الله يخليها طبعا على رأس قائمة المعارضين بشدة
لدرجة إني فكرت أسويها لما سافر العمرة وأسويله مفاجأة بس بعدين خفت وتطيح السالفة على دماغي غير الألم طلاق بعد الله لا يقول
الحين الوزن ماشاء الله 113 الطول 162
بس اللي آكله كله ما يفيد وبسرعة أمتن والضغط صار ملازمني وعلى طول من الولادة ليما الحين عالي مع إني أخذ حبتين باليوم صار علي من الدرجة الثالثة وبالعيد عشان عصبت شوي على الخياط خرب بدلتي الضغط طق بالعالي وحالتي حالة دربات وابر بالمواساة وحبوب تهدي الأعصاب يالله نزل
الحالة حالة والله العالم
لحم ودجاج ما أكل - عيش مو دايم - كنتكي يا سلام بالاسبوع مرتين
oster_av1:حركة طاف من الدوام للبيت وبعدين أجابل دراسة اليهال
اموت بشي اسمه كنافة الطيباوي
جربت رجيمات وايد مع حسين دشتي ويوسف الخضر وكنت من التسعينات بعيادة الرجيم بمستشفى الصباح
لكن ماكو فايدة حدي شهرين وبعدين أعطي الرجيم أبو الطاف
وأرجع دبل اللي نزلته
بصراحة العملية شكلها خطرة ومو أي واحد يتحملها وأنا من النوع اللي ما يتحمل الألم دخلت أولد الياهل الثاني من العوار خليت كل اللي معاي بالولادة يبكون من صراخي بمستشفى السلام وحاشني إكتئاب الله لا يوريكم عقب الولادة ومن يومها قصدي من قبل 5 سنوات عمر ولدي الحين وأنا ما أفكر بالحمال والعيال والسبة الألم اللي مو راضي يروح عن بالي
تقولون لي بعد تحزيم ؟؟؟وعوار وزواع واييييييييييييييي لا لا لا
خليني متينة أبرك :krkrkr::krkrkr:
أدري طولت عليكم ولوعت جبودكم بقصتي بس حبيت أشارك عشان ما تزعل الأخت " النية الصافية"
والله يعين المتحزمات :hjy5jewf::hjy5jewf:
