قصة حماتي وخشها للحمل

[ghadeer212]

هلوو بنوتات طبعا من العنوان الموضوع باين وانا وايد مستغربة من الوضع واللي قاعد يصير بس ودي افضفض لان حدي مستغربة انا والدة لي اربعة شهور لله الحمد وكل اسبوع عندنا زوارة في بيت اهل زوجي ف ما التقي بمرت حماي وحماتي الا مرة في الاسبوع وطبعا في المناسبات بس في هالزمن مرة وحده بالاسبوع كافية توطد العلاقة بين الاهل على العموم ذاك الشهر لاحظت بطن حماتي ف ما سالتها بس اتصلت فيها بعدين وسالتها قالت لي اي انا حامل ومابي احد يعرف ابي اسوي مفاجاة انا سالتها باي شهر وما رضت تجاوب قالت لي مفاجاة مع العلم يوم كنت حامل كل من عرف واهي ما تم سؤال ما سالتني وانا على نياتي اجاوب ما كنت اعرف لان اول بيبي لي ومستانسة مع العلم مو اول بيبي لها عندها ولد 9 سنوات وكان عندها ولد بس توفى 8 شهور!!

وامس بطنها وايد نازل وعلى وشك ولادة وابدا ما تطري انها بتولد ولا كانها حامل وعلى وشك ولادة.

ابي اعرف مرت عليكم مثل هالسالفة وشلون تعاملتو معاها. لان احس نفسي وايد متضايقة لان كنت اعتبرها مثل اخت!

 

[أم عزيـز]

ياااااااااااااااكثرهم والله ما اري على شنو بيخشون
خو يا بتيبين بنت يا ولد شنو الشي اليديد ؟؟

انا مرت اخوي جذي ساكنه معانا بنفس البيت وما قالت انها حامل الا بآخر الخامس ؟؟
حتى امي ما تدري ؟؟

بس هالنوعيه لازم تعاملينهم بالمثل انا صراحه اللي يجذب وما يقولي ما اقوله
لان ما احب احد لما احمل ما يبقى سؤال ما يسئلة ولما اهي تحمل ما تقول شي وتخش

فغنتي لا تعورين راسج مع هالنوعيه لا تسئلينها ولا تبين روحج مهتمه لها واذا حملتي مره ثانيه سوي مثلها اذا سئلتج قولي لها مفاجأة

ما ادري كندر سبرايز مو بطن لووووووووووووووول

 

[the_stylista]

حبيبتي انا نفسج لما حملت قلت حق الكل من لما حللت بعدين ولدت و مرت حماي سوت فيني نفس الحركة حامل و لحد تكلم حتى خالتي تدري ماقالتلي لما بين عليها سالتها متى الولادة ان شاء الله جان تقولي شهر 6 ادش شهري اخر شي شهر 3 دازة مسجات استقبالها انا قلبي عورني عليها عبالي ولادة مبكرة اخر شي اطلعت معوشرة الحلوة طبعا انصدمت مادري ليش هالاسلوب و الطبع الغريب صراحة شي يفشل ​

 

[ghadeer212]

اهم ماعرف ليش يسون هالحركة شنو يعني اول وحده تولد ولا مادري شسالفة

بالعكس حلو لما عنندج خبر حلو تفرحين اللي معاج بنفس البيت والله وايد تضايقت من الحركة وقلت اذا الله عطاني مرة ثانية ما بقول حتى ام ريلي ما راح اقول لها عشان لا تقول لبنتها وانا و وياهم والزمن طويل

 

[Om boosha]

نفس السالفه لاتستغربين عادي
مادري يعني بنحسدهم ولا شنو
والمشكله اذا هذا اول حمل لج وخايفه من عين الناس كيفج
بس عندهم عيال ٥ او ٦ قبل
لاتحرقين اعصابج عادي حبيبتي

 

[ghadeer212]

انا اللي حاز بخاطري اني كنت حامل واهي حامل وتسحب مني اسئلة وانا خبر خير وام ريلي تيي عندي فوق وتطالع الاغراض وتسالني عن تجهيزاتي وانا اجاوب ولا عندي مشكلة

بالله مو شي يحر ويبط الجبد؟

 

[أم عزيـز]

عندنا وعندج خير في جم وحده من معارفنا جذي
تسحب مني حجي وتقولي تراجعين عند منو وتحسين بشنو
وفجاة اكتشفت انها بالرابع وساكته ؟؟

والحين قاعده تحسب مني حجي من وين تشترين وشنو تطلبين من النت ؟
بس انا صراحه ما عطيتها لا حق ولا باطل لاني ما احب اللي يسوي نفسه ما يعرف شي
وبالاخير قاعد يسحي حجي مني وخاش على نفسه ؟؟

الله يهديهم
مالهم الا انج تعاملينهم بالمثل واللي بيزعل ما يشوف شر

 

[كريستال]

عادي حبيبتي انا مثلج اعلم الكل ومب اول طفل

واعرف ناس تخش الحمل وتلقينها في شهورها الاخيره

عادي حبيبتي الكويت محكومه وقطر والسعوديه وكل البلادين

حماتج يمكن خايفه من العين بحكم انه لها مده طويله ماحملت وطفلها الاخير مات عذريها

 

[الجوهرا]

انا صارلي نفس الموقف اشوف مرت حماي سمنانه واسالها تقولي من دق لعيوش وسألت حمواتي ونفس الكلام لااني كنت اسقط وكانوا يخافون مني حتى كانت حماتي والده ةياخذون بنتها ةيخشةنها والله يابنات اني اصعد وابجي يحطونج بمواقف محرجه بس لما حملت ماقلت لهم اني حامل لما صارلي 8شهور لااشوفون ردت فعلهم اهني فشيت حرتي فيهم حتى لما يسولوني كنت اقولهم سمنانه ودق العيوش حتى مرت حماي انصدمت لما درت اني حامل واللحين بعد مايدرون وناويه اخليهم يعرفون لمن اولد

 

[كريستال]

تصدقين في ناس معاي نفس شهري ولاعرف بحملهم الا لما يولدون وتكون غرفتهم يم غرفتي هههههههه


شتسوين الحمدلله مب اكبر همنا هم

 

[كريستال]

وااي الجوهرا صج موقف يحر

ماعندهم ذوق كلش زين سويتي فيهم ولاتعلمينهم هالمره

شدعوه حتى القطاوه تحمل على شنو بتحسدينهم *

 

[خذاني الشوق]

عامل الناس مثل مايعاملونك دامهم يخشون خل اسكت ولاسالوا قلت اي حامل

 

[الجوهرا]

كريستال والله العظيم عبارتج هذي قالتها حق زوجي حتى هو احتر لما درا وقالي اذا حملتي ماراح اعلمهم بس لما دروا قالهم زوجي والله تشرهون وماتشرهون بكيفها ماتبي تعلم حتى امه تقوله انت ولدي ليش ماعلمتني قالها سوالف حريم والله كل محللت رحنا نعلم ماكو شغل والله يطلعون لج قلب ماني فاهمه ليش هالحركات الماصخه انا اللحين صرت اعاملهم مثل ماعاملوني

 

[ام بيان]

كلامكم صح في ناس ماتدرين عنهم الا اذا ولدو
طرشوا لج مسج حق الاستقبال

 

[أم عزيـز]

الجوهرا زين تسوين فيهم والله
شدعوه لا اول ورحده ولا اخر وحده تحمل بيحسدونج على شنو مثلا ؟؟
على قولتكم حتى القطوه تحمل وتولد مو شي غريب الحمل ؟

بس المهم ان هالنوعيه من الناس نعاملهم بالمثل وما نخليهم اكبر همنا
واذا زعلوا طقيها بويهم قولي لهم اشدعوه انتوا تعلمون ؟ حالي من حالكم
انا لما مرت اخوي خشت حملها هالمره عناد قلت حق اخواني كلهم الا اخوي ومرت اخوي

لين كبر بطني وصرت بأخر الخامس وبين الكرش اخوي عرف من نفسه قالي خاشته عنا !
قلت له اي خاشته مثل ما غيري يخش ههههههههههههههههههههههه

وامي فقيره على نياتها يقصون عليها خالاتي يقولون لها بنتي توها محلله حامل
وتطلع بنتها بالخامس مو توها محلله ههههههههههههههههه
قلت لها وانتي تركضين تقولين لهم بنتي حامل ؟ لا تقولين هالمره وفعلا هالمره ما قلت لهم الا بنص الرابع
ومحد نقد علي لانهم عارفين نفسهم عدل

 

[مشتاقة الى الله]

في وضعي انا من حملت ما خبرت احد غير زوجي وجلست لمدة 3 اشهر داخلة على الشهر 4 يالله وتكلمت

ليش؟

لان الناس يلي معي الله يهديهم ما يسكتون يقعدون على القيل والقال والسالفة تنتشر عند كل العائلة وفوق كل هذا ما يباركون بالعكس يذمون ويقولون خطيرة مبدعة هيا وريلها يعني المكينة شغالة وشيء من الكلام البايخ لا من الكبير ولا من الصغير كلهم سواء

فقررت ان ما اتكلم والحين داشة ال8 ومحد يعرف بعد وعسى الله يسهلي ولادتي بإذن الله

 

[ورده عنابيه]

ناس مريضه ليش الخش الله يرزق كل محرومه ياااارب

 

[زين ودلال]

استغفر الله

الله لا يبلينا يارب ناس مريييييضه

 

[*kim*]

يمكن خافت من العين من كلامج المرا لها ولد واحد بس عمره 9 سنوات ولما جابت الثاني توفا
يعني 9 سنين وماعنده اخووو ترا شي يعوور القلب بصراحه انا اللتمست لها عذر مثل ماقال رسول الله اللتمس لاخخيك سبعين عذر

لو قلتي عندها عيال او جايبه ورا بعض مالها حق
اما اذا من زمان يمكن شافت شي احنا ماشفناه

 

[نور الفجر2]

حبيبتي عذرها معاها صراااااااااااااااااحه

تري اللي تحمل وتولد عادي تعلم الكل
لاكن اللي تمر بظروف الاجهاض المتكرر او موت الطفل من ابسط حقوقها انها تخش عن الناس

لانه هالعالم عيونها ضيقه حتى اللي عندها عيال ما احد يسلم منها المجتمعات تختلف واذا انتي ع نياتك فيه ناس تحسد ع كل شي

التمسوا العذر ولا بالله فيه واحده ما تبي اللي حولها يدرون بالعكس تلاقينها بعذاب لاكن تتحمل عشان ضناها