فرحه و مرحه و ترحه ^_^

[ررروووان]

ثانكس البارت عجيبه

 

[أحلامي يقظه]

ولكم رواان وحياج معانا ^_^

بنات اللي يتابعون ردو بعد كل بارت بعرف معاي ولا لا :/ .. !

 

[عالمي مدهش]

معاج حياتي

 

[انجاد الكويت]

مشكورة حبيبتي عالبارت بس جنه قصير <<< طماعه

كملي كملي لا يوقف لا يوقف:ggdw:

 

[أحلامي يقظه]

سوري بنات بس المنتدى مو راضي يفتح ولا يفتح شوي ويسكر..
الحين اوكيه معاي .. بحط البارت قبل لا يعلق ^_^
فديت متابعتكم

 

[أحلامي يقظه]

والله العظيم ما أحلل أي شخص ينقل هالقصه والجزء من غير ما يذكر معاه نكي
(أحلامي يقظه).
فرحه و مرحه و ترحه
البارت السابع
شخصيات البارت​

بمكتبه جرير عواشه وريومه وفطومه..مدت ايدها ريوم بتاخذ الكتاب..فجأه.. واحد مستعيل مد ايده وخذا الكتاب ومشى..ريوم تطالعه واهو يروح مستغربه..وقف..لف ويها..طالعها..
علي : اووه..سوري :/

ريم : ما عليه أنا بس كنت بتصفحه شوي..
علي (منحرج) : لا اخذيه عادي في وايد نسخ..
ريم : دام في وايد نسخ أنا باخذ من النسخ
علي : ( خذا نسخه بسرعه وراح بسرعه )
ريم تطالعه واهو يروح .. بينها وبين نفسها : كيوت ..

ابيت فطومه اللي من دورين وسرداب..الدور الأول برا حوش وداخل صالة معيشه كبيره وطاولة الطعام بالصاله ومطبخ وغرفة الخدامه..بالسرداب ديوانيه كبيره وصالة استقبال..الدور الثاني جناح ابو وام فطومه وغرفة حمد وفهد وغرفة فطومه..
عند سيارة فطومه..
فطومه : وي يا حلاتي و ياحلات سيارتي وياحلات سواقتي..
ريومه : وي فطيم مو قلتلج لا تدوسين على الماي اللي مساع حيل..طاع طشر على سيارتج..
عواشه مندمجه بتلفونها اطقطق فيه..
فطومه ( تطالع سيارتها ) : واااي..بقول حق ميلا تغسلها..بدخلها الحوش عشان تغسلها..
اركبت سيارتها ودخلتها..دشو الصاله..وأم فطومه قاعده مع حمد وفهد تلون معاهم بالكراسه..لما شافو فطومه وريومه وعواشه داشين..اركضو لهم وكل واحد ماسك رسمته..
حمودي (نط على فطومه) : طوم شوفي هذا أسد..عووو
فطومه : وااااي لا يعضنا انحاش انحاش .. (تشيله وتدور فيه واهو يصارخ)
فهودي (مسك ايد ريومه ويسحبها) : ليم ليم..قطوه (ويرفع الرسمه عندها)
ريومه : الله وشنو تقول القطوه..فهودي ؟.. (تأشر ع الرسمه)
فهودي : أعرف اعرف تقول ميوووووو..
عواشه (تصفقله) : صح شاطر (تبوسه) .. يا حلات هالحلو والله..
أم فطومه : هلا فيكم والله ..
ريومه وعواشه سلمو عليها وفطومه باستها على راسها..
أم فطومه : ها شلون سواقة فطومه ؟
عواشه :ستري عليها الله يستر عليج خالتي..
فطومه (تدز عواشه وتسحب ريوم وتلمها) : يمه يمه لا تسئلين عواشوه الهبله.. سئلي ريوم حبيبتي فديتها..
ريومه (كانت قاعده تلون مع حمد وفهد) : لا خالتي..سواقة فطومه هاديه ماشاء الله..
أم فطومه : الله يحفظكم..يلا لما تسوقين كل مره راح تتعودين وتتعدل سواقتج أكثر..
فطومه (تمسك ايد ريوم وعواش) : ايه ان شا ءالله تتعدل..ميلااااا ميلااااا !!
ميلا : نعممم..
فطومه : روحي غسلي سيارتي.. يمه أبوي هني ؟
أم فطومه : لا يمه ابيت رفيجه ..
بغرفة فطومه..
تطل فطومه من الدريشه على ميلا واهي تبي تغسل سيارتها..
فطومه : واااااااااااي طاع شلون بتغسل..اففف حاطه الماي بالتب..لازم اعلمها.
عواشه : واااي خليها مو أول مره تغسل سيارة.؟!
فطومه (تطلع من الغرفه) : لا بعلمها.
نزلت فطومه..وعواشه وريومه يشوفونها من الدريشه ..
قعدت فطومه تزف ميلا..وميلا تهز راسها جنها تقول اي اي وساكته..
ريوم (متضايقه من زف فطوم) : وااي حرام ترا خدامه..ما عندها جذي بديرتها..مو جذي تقعد تزفها عاد؟!..بروحه الجو حر..
عواشه : ايه ليش ما تعلمت هني؟!..
ريومه : اممم..تعالي تعالي..بعلم فطومه مو الخدامه..لبسي لبسي هذا البرمودا مال فطيم وأنا بلبس الثاني..
خذت كامرة الفيديو مالت فطوم وطلعو من الغرفه..نزلو الصاله..وفطوم للحين معصبه وتتحلطم على ميلا..
ريوم (شافت ام فطومه بالصاله) : خالتي ما عليج أمر صوري هالموقف
أم فطومه : وي شنو بتسوين؟..بس عطيني يلا خلينا نصوركم..
حمد وفهد يناقزون عند أمهم مستانسين على الكاميره..
عواشه وريومه طلعو الحوش..
ريومه: عواشه ييبي الهوز وفتحي الماي ^_*
عواشه : اهااااااا..صااار ههههااااي
ريومه (واقفه ورا فطوم) : ايه فطوم لازم تعلمينها عدل..طقيها طقيها..
لفت فطوم وتاخذ نفس عشان تكمل التحلطم..عواشه عطت ريوم الهوز.. رشت ريوم الماي على فطومه أول ما لفت..
فطومه (تلف وتحاول توخر ومغمضه عيونها) : يا الخاااااااااايسه..بس بسسسس
انخشت فطومه ورا السياره..ام فطومه تضحك واهي تصور..حمد وفهد قامو يصارخون مستانسين..
ريوم (واهي ترش على فطومه) : عشان تتعلمين شلون تحاجين الخدم عدل..
عواشه (ورا ريوم) : ايوووه ريووم..عاشت ريوم عااشت ريوم..
ريومه لفت على عواشه وقامت ترش عليها..وعواشه قامت تركض..خذت فطومه التب اللي فيه الماي وكتته على راس ريوم..
فطوم : بغسلج بدال سيارتي..
دشت ميلا عند أم فطومه..
ميلا (تضحك) : ماما شنو يسوي انا الحين..
أم فطومه : لا خلاص خليهم ..
حمد وفهد : ماما ماما حتى احنا ببح طوم..
أم فطومه : يلا روحو بس شوي لا تزلقون..تعالو افصخكم بلايزكم..
قعدو يلعبون البنات وحمد وفهد بالماي لي قبل المغرب..دشو كلهم داخل ومتبللين من فوق لي تحت.. عند باب الصاله..
ام فطومه: يمه حبايبي اخذو فوطكم وبسرعه روحو بدلو..أنا قصرت على التكييف.. حمودي وفهودي امشو خلوني ابدلكم..فطومه يمه اذا خلصتو لبستو تعالو تحت سويت لكم كيكه وجاي..
فطومه وعواشه وريومه: ان شاء الله ..حمود وفهود مندمجين يقولون حق امهم اللي صار..
ام فطومه: لحظه لحظه بنات!!..غسلتو السياره؟؟!!
عواشه وفطومه وريومه يطالعون بعض ويضحكون..
عواشه: لا خالتي ههههه..
ام فطومه : الله يغربل بليسكم..كل هذا وما غسلتو..خلاص يمه فاطمه باجر راجو يوديها غسيل السيارات..يلا روحو بدلو بسرعه لا تستمرضون..
بدلو البنات..وقبل لا ينزلون ياه مسج حق عواشه..امسكت التلفون وقاعده تقراه..
فطومه: شسالفه المسجات معاج اليوم عواش!​

نهاية البارت السابع

والله العظيم ما أحلل أي شخص ينقل هالقصه والجزء من غير ما يذكر معاه نكي
(أحلامي يقظه).​

 

[ررروووان]

ثانكس البارت حده تينن
واتوقع عواش تكلم

 

[انجاد الكويت]

مشكورة حبيبتي عالبارت ..

 

[أم حيدر]

صج جو قصتج وناسة

سبحان الله امس كنت قاعده تقرا قصة وفكرت بفكرتج ان لو في صور ممثلين مع القصة الواحد يندمج اكثر

متابعتج للنهاية وعفية عليج بس لو كانت عواشة اهي العوضي جان أحلى

 

[أحلامي يقظه]

روان
ثانكس ع المتابعه عسوله ^_^..يمكن تكلم .. ماراح اقولج

انجاد الكويت
هلا فيج حبوبه..ولكم عسوله..ثانكس على متابعتج ^_^..على طول خلينا نشوف ردج وايد يشجعني

ام حيدر
ثااااااااانكس
وسالفة الصور انا حطيتها ابالي من اول شي .. وكنت حاطه ابالي مواصفات حق كل شخصية وما لقيت اللي ابي .. كلما الاقي وحده ما يكون عندها صور وايد..يعني عواشه كنت ابي شعرها بوي واخترت نوره عبدالله بس صورها مو وايد..لاني كل بارت احط صور عواشه وفطومه وريومه لايقه على البارت.. وهم اخترت صور بيوت كل وحده منهم وغرفهم بس قلت لا وايد مالهم داعي ..
مشكوره حبوبه استانست على تعليقج ^_^ .. بليز لا تحرمينا من ردودج بعد كل بارت ^_^

 

[أحلامي يقظه]

بنات سوري غصب يفتح الموقع.. راح انزل البارت ان شا ءالله ..

 

[أم حيدر]

حياج الله توتة بس ها لا تطولين علينا بالبارتات ترى نشيل قشنا وننحاش

 

[أحلامي يقظه]

والله العظيم ما أحلل أي شخص ينقل هالقصه والجزء من غير ما يذكر معاه نكي
(أحلامي يقظه).
فرحه و مرحه و ترحه
البارت الثامن
شخصيات البارت​

بدلو البنات..وقبل لا ينزلون ياه مسج حق عواشه..امسكت التلفون وقاعده تقراه..
فطومه: شسالفه المسجات معاج اليوم عواش!

عواشه (ارفعت راسها عن التلفون) : هذا موضوع صارله فتره..بقولكم اياه بعدين..
فطومه وريومه يطالعونها مستغربين..
انزلو عند أم فطومه وحمود وفهود بصاله المعيشه وقاعدين يم بساط بالارض عليه جاي وكيك..اقعدو معاهم..
ام فطومه : يلا ماما..حمودي فهودي امشو عشان نقول قصه وتنامون وتقعدون الصبح وتلعبون بالروضه مع الأطفال..
حمودي : ماما نبي قصة توم وجيري..
فهودي : انا جيري وحمودي توم..
حمودي : ايه انا توم عشان آكلك..
فهودي : بس انا صغير انخش عنك..
ريومه تقرص خدود فهود..وعواشه تبوس حمود..فطومه تضحك عليهم..
ام فطومه : خلاص بعد .. سويتو قصه بروحكم ليش اقولكم ههههه..
قامت ام فطومه مع فهود وحمود وماسكين ايدها وكل واحد يتثاوب من صوب..
فطومه (تحط الكيكه بالصحن) : يلا عواشوه ترا ما نسينا شسالفة المسجات اليوم؟..
ريوم (تمسك الكوب بايدينها الاثنين وتطالع عواشه) : يلا ناطرين الرد!..
عواشه (تطلع تلفونها وتطالعهم) : ماكو..هذا واحد من زمان يدزلي مسجات..ويقول انه يعرف كلشي عني ويبي يهتم فيني وكل يوم يطمن علي مع اني احقره..انا كنت احقره لانه ماله داعي ارد عليه.. بس اليوم ما قدرت ما ارد عليه بعد ما اعترفلي انه عــ....
رن تلفون ريوم..
ريوم (تشوف تلفونها) : أمي!!..
عواشه وفطومه اسكتو..
ريوم (ترد) : ألو..هلا يمه!..
ام ريومه (صوتها ينسمع من التلفون عالي) : تعالي شوفي ابوج ين ين..مو راضي يخليني اروح عيادتي مو راااضي..
ريوم (تسند راسها على ايدها) : ان شا ءالله يمه الحين يايه..(سكرته) فطومه عفيه وصليني بيتنا..
فطومه: خير شسالفه ريوم ؟!..
ريوم (قامت وتلبس جوتيها بتطلع) : عفيه فطيم بسرعه..خايفه أبوي يتعب..
عواشه وفطومه قامو..
فطومه : نطروني عند السياره بس اروح اييب المفتاح واقول حق امي اني بوصلج..
طلعو عواشه وريومه..وفطومه اصعدت فوق..
عواشه (تمسك ايد ريومه) : حياتي هدي نفسج..كل شي بينحل ان شا ءالله نفس كل مره لا تحاتين قلبي..
ريومه (تطالعها وخانقتها العبره) : بس اول مره أمي تتصل علي وقت المشاكل.. اهي كله تتصل على بدر..لإنه دايما تقولي مامني فايده..
عواشه: حبيبتي ريومه انتي عارفه امج..ويمكن بس الحين فتره معصبه وعادي بعدين..
ريومه (ارفعت راسها تشوف السما وخذت نفس عميق) : لي متى عواش..تكفين لي متى على هالحال؟..من كنت صغيره واشيل اهمال امي وارقعه بحياتنا..وأكثر من هذا كله..أبوي..مرض منها (تشوف عواشه وعيونها انترست دموع).. لإنه طول عمره معاها واهو يحط بقلبه..قلبه اللي حبها قبل لا تشتغل وعشانا سكت..
عواشه اسكتت وتطالع الشارع..
فطومه طلعت واركبو السياره..مشت..
فطومه : ريوم أمي تقولج انتي وعدتيها تهتمين بنفسج..تذكري انج ما تتحملين اي انفعال قوي ولا بصير فيج ضيق تنفس..
ريومه ساكته..
عواشه: احنا موجودين تذكري..دقي علينا..
نزلت ريوم البيت..فطومه وعواشه يشوفونها لما دشت..وأول ما افتحت باب الصاله اسمعو صراخ..وطلع بدر وكلم ريوم ع السريع وريوم دشت بسرعه..بروح بدر سيارته ..لما شاف فطومه وعواشه وقف وراح لهم..
بدر (ينزل راسه عند دريشة السياره) : شلونكم؟..
عواشه وفطومه : تمام..وانت شلونك؟
بدر : مثل ما انتو شايفين بمليون خير (خذا نفس)..الحمدلله (يطالع فطومه) الحين ارتحت شوي..
فطومه (تطالع باب البيت) : احاتي ريوم..
عواشه : بدر وانت ليش ما تقعد عندهم..اخاف ريوم تتعب..
بدر (يوقف عدل ويطالع بيتهم) : بس تعبنا..لي متى نحل مشاكلهم من كنا صغار واحنا شايلين هموم..أنا باجر وراي امتحان وتعرفون الطب يبيله مجابل وصراحه انا بشوف مستقبلي وبهتم بنفسي دامهم مو مهتمين .. وما بقى شي على تخرجي..
فطومه (رن تلفونها..ردت) : هلا يبا..ايه كاني راده البيت بس أوصل عواشه.. أوكيه.. باي (سكرته)..
بدر : يلا يبا عشان لا تتاخرون..ألحين الساعه بتصير ثمان ونص..
عواشه : عفيه بدر..رد امبجر عشان ريوم..
بدر يهز راسه يعني اوكيه..
فطومه : اوكيه..يلا مشينا..باي بدر..
بدر (يبتسم) : باي
داخل بيت ريومه..
ريومه قاعده على القنفه وامها يمها حاطه ريل على ريل وحاطه ايدها على خدها ومعصبه حدها..وتطالع ريوم..ومعطيه بو ريم ظهرها واهو واقف وراها يدور..
ريوم : يمه..كلنا عارفين انه ابوي يحبج..وانتي تحبــ..
أم ريوم: ذبحتينا يحبج ويحبج..مادري شفايدة هالحب بس كبرنا عليه..
بو ريوم : عمر الحب ما يموت وكل سنه لازم يتجدد..
ام ريم (تأشر بإيدها) : فكنا فكنا زين..طوفت علي مواعيد مهمه بسبت حبك وخرابيطك..
بو ريوم : الحب اهو اللي كون لج هالاسره..
ام ريوم (قامت من مكانها وجابلت بو ريم) : هالاسره ما يابت لي الا الهم (أشرت بإيدها بويه جاسم بو ريم)..
ريم (عصبت من حركة امها) : يمه عفيه كفايه..بس يمه خلاص كلنا تعبنا..انا حدي تعبت..
ام ريوم (لفت على ريوم وحدها معصبه) : انتي..انتي ولا شي..ما منج فود..انتي اصلا موتج ارحم..
ريم حطت ايدها على حلجها ودموعها قامت تنزل..
حط جاسم ايده على جتف سوسن وبكل عصبيه لفها حيل عليه وعطاها كف......

​

نهاية البارت الثامن

والله العظيم ما أحلل أي شخص ينقل هالقصه والجزء من غير ما يذكر معاه نكي
(أحلامي يقظه).​

 

[ررروووان]

ثانكس
بس ام ريوم حرام ليش جذي تسوي

 

[أحلامي يقظه]

ولكموو روان
في وايد ناس مثلها ما يهتمون الا بشغلهم..ونفسهم..

مشكووووووره ع المتابعه والرد :eh_s(9):

الحين بحط البارت..

 

[أحلامي يقظه]

والله العظيم ما أحلل أي شخص ينقل هالقصه والجزء من غير ما يذكر معاه نكي
(أحلامي يقظه).
فرحه و مرحه و ترحه
البارت التاسع
شخصيات البارت​

أول مره جاسم يطق سوسن من بعد زواج حب اللي عاشه أو جم سنه بحب وبعدها....
جاسم (ويها أحمر من العصبيه) : انتي اللي موتج أرحم لي ولريم ولبدر..انتي (خذا نفس عميق وحط عينه بعين سوسن) طالق طالق طالق..
ريم غمضت عيونها جنها كانت عارفه انه هاللحظه راح اتيي..سوسن واهي حاطه ايدها على خدها من بعد الكف..انهارت بالارض وعيونها بعيون جاسم..مصدومه..
جاسم (للحينه ماشال عيونه عن عيون سوسن) : استمرت حياتنا عشان الحب اللي بقلبي لج..واللي ثمرته أغلى اثنين بحياتي بدر وريم (ريم افتحت عيونها تطالع ابوها) استمرت غصبن على الظروف والمشاكل..كافحت عشان أعيشج أحسن عيشه بأول سنه اكون فيها نفسي..وكنتي تطلبين وتطلبين وأنا ألبي بفرح لإني مابي اقصر عليج بشي..ماكان يعجبج العجب تبين أكثر وأكثر وما اقتنعتي باللي سويته لج وبحبي معاه..بس يا حسافه مع السنين مات الحب عندج لإنج قمتي بس تشوفين نفسج وبهالسنين زاد الحب عندي بعد ما يبتيلي أغلى اثنين بحياتي..واول طلب مني لج انج تخلين وظيفتج اللي حسيت انها خذتج مني ومن عيالج بس تكابرتني وهنتي الحب اللي بينا وسكت وصبرت..خليتي قلبين صغار يشيلون الهموم من صغرهم وانا أطالعهم وأسكت لإنه ما همني الا رضاج..بس لأ..لي متى؟! (سوسن قامت تنزل دموعها) ايه بس خلاص مو لي درجه تتمنين الموت للي عايش انا عشانهم وراح اعيش عشانهم فيج ولا من غيرج..
تحس ريوم بخنقه وموقاره تتنفس..حطت ايدها على صدرها..بو ريم طاف ام ريم اللي على الارض تبجي ومسك ريم..
بو ريم (يقعد ريم على القنفه) : قعدي بابا اسم الله عليج..ريحي بابا..
صوت بجي ام ريم زاد...
بو ريم (يقعد يم ريوم ويطالع ريم) : هه حسافه..حتى لما بجيتي..بجيتي عشان نفسج.. ما بجيتي يوم عملية بدر وكنتي مشغوله بعيادتج..ما بجيتي يوم عرفتي انه ريم فيها القلب هه على قولتج عادي كل الناس فيهم امراض!..حتى دموع فرح ما شفتها بعيونج لنا!..
ريم (تمسك ايد ابوها) : يبا لا تحاتي انا بخير..
سوسن (تطالع الارض وتبجي) : جاسم جاسم يطلقني أنا!!..أنا..جاسم يطلقني!!
جاسم : ايه جاسم..جاسم اللي حطج بعيونه..جاسم اللي ضحى بكلشي عشان رضاج..
سوسن (بصوت متقطع) : بس .. بس!..انا كنت واثقه..ايه واثقه انك ما تقدر تطلقني .. ما تقدر..انت تموت بالتراب اللي امشي عليه..
جاسم : الحين بس عرفتي!..مابي اشوفج بعد ما ارد البيت..
قام باس راس ريم..طلع من البيت..
ريم قامت..طلعت بدون لا تشوف امها اللي ع الارض..ركبت سيارتها..

ابيت ماما مريم..عواشه عند باب السكه..
عواشه : يلا ماما مريوووم..ألحين يطردونه من الجمعيه..
ماما مريم (تعدل عبايتها) : يلا يمه يلا ..كاني خلصت..
عواشه: وييي مريوم كبرتي..عيزتي
ماما مريم (تعفس ويها على عواشه): عواشوه يوزي عني.. (تدزها لي الباب) امشي امشي..

ابمكتبة جرير..ريوم ماسكه كتاب عن الاسترخاء وقاعده على كرسي وتحاول تندمج بالكتاب..وماسكه دموعها..
علي يدور على كتاب..طاح كتاب..نزل مسك الكتاب ولما بقوم جان يشوف ريم واهي قاعده وشكلها تبي تبجي..اكسرت خاطره..
المكتبه مافيها ناس وايد لإنه باقي نص ساعه وتسكر..
علي يحوس حوالين ريم..قرر انه يقعد..قعد على الكرسي الثاني اللي يم ريم وبصوت عالي: شي يضحك صراحه ههه (يتصفح الكتاب..ويحاول ما يطالع ريم).. شريت كتاب بالغلط من العيله (تبتسم ريم).. يعني حدي كنت منحرج من جذي خذيت الكتاب الثاني (حط الكتاب بالكرسي اللي بينهم ولف ويها على ريم)..عاد انتي شريتي الكتاب ولا نفسي شريتي واحد ثاني :d ؟.
ريم (تاخذ نفس عميق وتبتسم) : لا ما شريته (تحط الشعر اللي ياه على ويها ورا اذونها)..بس أحب أيي هني لما امممم..ترتاح نفسيتي بين الكتب وأحب هالمكان..ههه
علي (يطالعها بنظره جانبيه) : ايه صح..أنا وايد ايي هني وحتى برا الألعاب..تحبين تلعبين؟..
ريم : لا .. مو زين لي اركب أي لعبه..
علي (يدور سالفه) : امممم..ترا الوقت متأخر! :d
ريم (تنزل راسها وانترست عيونها دموع) : عادي..
علي : ما تخافين بروحج بالليل..أنا أخاف..مره ضعت وصلت منطقه اول مره أشوفها..
ريم تضحك..
علي : :/ .. ليش تضحكين..ايه بعد شنو ضعت خو ظلمه بالليل..
ريم : ايه يقولون بالليله ظلمه..
علي : قاعده تتطنزين :/..
قامت تضحك ريم بصوت عالي وخاصه لما شافت ويها من صجه..
ريم : انته مرهف الاحساس..بس شكلك تخاف من كلشي..
علي : :d .. عادي كل الناس تخاف..انتي ما تخافين من شي!!؟..
ريم (تطالع الكتاب اللي بإيدها) : أكثر شي كنت أخاف منه صار..ماراح اخاف من شي ألحين..
علي : أها (يحاول يرقع).. بس عادي للحين الدنيا بخير :d..زين يلا يلا قومي بتسكر المكتبه ولا بتنامين هني :d..
ريم تضحك وتسكر الكتاب وترده مكانه..علي راح الكاشير يحاسب ويسوي روحه مو قاعد يطالع ريم واهي تطلع من المكتبه..
علي (عند باب المكتبه يمشي جدام ريم ويلف عليها) : أخاف تخافين من الظلمه تبين اوصلج سيارتج؟ :d
ريومه (تضحك واهي منحرجه ) : لا مشكور ..
علي (تحبط..وأشر بإيده لها) : بااي..ديري بالج من الظلمه..
ريم تبتسم نص ابتسامه وتمشي شوي شوي سرحانه لي سيارتها.. لما وصلت سيارتها شافت عليها كتاب و فوقه ورقه على شكل بطه..امسكت البطه ولمحت شي مكتوب.. بطلتها وقرت اللي فيها :
شريتلج نفس الكتاب اللي شريته..يمكن مره ثانيه أشوفج ونتحجى عنه.. ترا حلو.. فرصه سعيده..
ابتسمت وعرفت انه من علي..خذت الكتاب واركبت السياره..

ماما مريم بتاخذ الشامبو..جان يطيح الشامبو اللي يمه..بتنزل تاخذه ولا ايي واحد ويشيله ويحطه مكانه..
ماما مريم (ارفعت راسها بتشكره) : مشــ... (خزته عدل) انت ســ... انت اهو؟!!​

نهاية البارت التاسع

والله العظيم ما أحلل أي شخص ينقل هالقصه والجزء من غير ما يذكر معاه نكي
(أحلامي يقظه).​

 

[أحلامي يقظه]

سوري بنوتات ترا تاخرت لانه المنتدى فيه صيانه
يعني مو مني ..

 

[أحلامي يقظه]

بنااات بحط البارت اللي وراه بس ابي ردودكم ^_^

 

[miss 3yara]

الروايه موووصج كملي حبيبتي

 

[ررروووان]

والله على طول رديت البيت بدلت
وشغلت الا بس علشان اشيك اذ منزله بارت ولالأ
ادري كتبت قصه حياتي