غلطة امي(قصة واقعية)

[ورده الجهراء]

كملي القصه تشوق .....
ناطرينج لا تطولين..........

 

[الملالة]

اسفة على التأخير حبيباتي اشوي وانزل لكم جزء يديد واتمنى يعجبكم:rerrerek:

 

[الملالة]

حمود عقب ما وصل اخته البيت رجع المدرسة لانه كان وده يشوف لطيفة وكان عنده احساس انها ماراحت البيت للحين وفعلا كان احساسه بمحله ولقاها للحين واقفه عند الباب وكان وده يكلمها بس خاف يحرجها وتم واقف ينطرها لما ركبت التكسي واستغرب وقال بينه وبين نفسه( شلون تقول انه امها بتمرها)ولحقها ليما البيت وتاكد انها وصلت..

(( في بيت حمود ))
الام: دلال وين أخوج ؟.. دلال: ما ادري يمه قطني وقال بيرجع الدوام عنده شغلة ضرورية يلا ميته من اليوع حطو الغدا.. شويه ولا حمود داخل البيت ،،
الام: وينك يما ؟ وين رحت ؟
حمود: لايما سلامتج نسيت اوراق مهمة بالدوام ورحت اييبها يلا انا بغيير ملابسي وانزل اتغدى معاكم.
الام: شفيه اخوج.. جنه متضايق؟
دلال ؛ ما أدري انا بعد أحس جذي، ما علينا شلون الاستعدادات حق عيد ميلادي ترى عزمت كل رفيجاتي
الام: والله لنج متفرغة.
*******
دخلت لطيفة البيت وهي متضايقة من تحرشات راع التكسي فيها ودخلت سيده على امها ولقتها قاعده تزهب جنطة السفر
لطيفة: وين رايحة يمه
الأم:شتشوفين يعني ؟؟ بسافر مصر جم يوم مع رفيجتي وبرجع وحطيت لج فلوس عند الخادمة .
لطيفة:يما ليش تعامليني جذيوبينها وبين نفسها تقول (ياليت مابينت لها اني اعرف حقيقتها عالاقل قبل كانت تحاول تراعي مشاعري الحين كلش مو مهتمه فيني) يما انا مالي غيلاج اشلون تخليني بروحي وانا وتسافرين ؟ ما تخافين علي؟
الام: شوفي لطيفة ترى اللي فيني كافيني وما لي خلق حنه قلت لج كلها جم يوم وبرجع وانتي مو صغيرة وسيتا معاج بالبيت، واذا صارلج شئ دقي على شيخ الرياييل ابوج ويلا الحين وخري تاخرت.(وهي طالعة من الغرفة دق تلفونها )
ها خالد وينك .. أي انا جاهزة .. يلا الحين بنزل..
انصدمت لطيفة وقالت بينها وبين نفسها( اشكره امي قامت تكلم الرياييل جدامي لا وياي ياخذها من جدام البيت من غير حيا ما حسبت حساب الجيران يشوفونها وهم يدرون انها مطلقة) وطلت لطيفة من دريشة غرفتها وشافت امها تركب مع خالد بالسيارة . وقطت روحها على فراشها وقامت تبجي.

(( في الجزء اللي وراه بنعرف ليش ام لطيفة بتسافر مصر ، وشنو راح يصير بعبد ميلاد دلال ويغير حياة لطيفة)) .

 

[HYoOoN:*]

القصه تشووق ناطرينج

 

[الملالة]

أم لطيفة (عالية) في الطريج للمطار تكلم خالد اللي قاعد يمها: متأكد من الكتور اللي رايحين له؟
رد عليها بنفسيه: أي يبا متأكد جم مرة تسألين؟ انا مكلمه امس وموعد العمليه الساعة عشر بالعيادة وماكو الا العافية.
عالية: يعني سبيصير لو انك متزوجني حتى لو بالسر جان صار موضوع الحما ل عادي وما اضطرينا نسوي اللي بنسويه
رد خالد: ياحبيبتي جم مرة اقولج خل اخلص مشاكلي مع زوجتي وبعدين اتزوجج وبينه وبين نفسه يقول(تحلمين اتزوج وحده مثلج).يعني باختصار ام لطيفة كانت على علاقة غير شرعيه بخالد وحملت منه بالحرام وسافرت مصر علشان تسوي عملية اجهاض.

&&&&&&&&&&
في نفس الوقت كانت لطيفة تكلم رفيجتها دلال بالتليفون وتعتذر انها ما راح تقدر تيي عيد الميلاد ودلال تحاول تقنعها: تدرين انا الحين بخلي السايق يقطني عندج وباخذج غصب يلا زهبي اغراضج ولا تعطليني علشان يمدينا نكشخ قبل لا يوصلون البنات يلا با ي باي وصكرت التلفون بويه لطيفة،، وقفت لطيفة تفكر: ياربي هاذي بالها فاضي وما تدري عن اللي أمر فيه،، انا وين واعياد الميلاد وين؟
ونادت سيتا علشان تساعدها وخذت معاها نفنوف قصير لتحت الركبه لونه احمر مع الاكسسوارات وحطته بهاند باك وقعدت تنطر لطيفة بالصاله وفكرة تيبها ةفكرة توديها.
وصلت دلال مع السايق الساعة خمس ونزلت لطيفة وركبت معاها وراحو الصالون وسوو شعرهم وبسرعة رجعو البيت لانه ما باجي شي وييون البنات .. دخلت لطيف مع دلال بيتهم وهي حاسة بشعور غريب واحراج وكانت ام دلال مع الخدم يشرفون على الترتيبات الاخيرة للحفلة وسلمت على ام دلال وراحو فوق بغرفة دلال علشان يبدلون.. وكانت لطيفة بنفنوفها الاحمر وتسريحتها الناعمة تطير العقل جما ونعومة وحطت مكياج خفيف بعكس دلال اللي مكياجها كان فاقع ونفنوفها كشخة اكثر من اللازم ( لأنه عيد ميلادها) .
دلال:لطوف انا بنزل اوري امي كشختي واشوفها تبي شي وانتي اخذي راحتج بالغرفة لما يوصلون البنات وطلعت وخلتها بروحها بالدار... شوي اسمعت طق على الباب وقبل لا ترد انفتح الباب وكان حمود جدامها وشهق بصوت مسموع لما شافها وقال: انا اسف على بالي دلال بروحها بالغرفة، وبينه وبين نفسه يقول ( شنو هالجمال والرقة ما مرت علي بنيه جذي) شلونج لطيفة؟ ردت لطيفة: بخير الحمد لله
حمود: على فكرة انا زعلان منج.
لطيفة مستغربة( شنو بيني وبينه علشان يزعل مني): ليش شسويت؟
حمود: انا شفتج وانتي تركبين التكسي .
لطيفة حست ان ودها الارض تنشق وتبلعها.. انا ما كان ودي اضايقكم وانتو مو مكلفين فيني تودوني وتيوبوني .
حمود: منو قال لج ان احنا متضايقين ترى عادي الناس للناس.
وتم واقف ما وده يروح وبس قاعد ويخزها ،، وبيطول بالكلام باي طريقة لحد ما وصلت دلال: ابوي يبيك بالدوانية.
رد حمود: يلا عن اذنج لطيفة .

ونزل حمود وتمت لطيفة واقفة مبهورة باللي صار وحاسة بصداع براسها وعوار بقلبها من للي صار.

 

[MeeMeeYoo_2]

يسلموووووووووووووووووووووووو

 

[شيـري]

قصتك روعه
ناطرينج يا بعدي

 

[الملالة]

شاكرة متابعنكم :balo:شوي وانزل لكم جزء يديد

 

[رفيف الورد]

تسلمين حبيبتي ملاله على القصه الحلوه ويا رب يخليج لأهلج وأحبابج آمين يا رب العالمين

بس حرام مسكينه لطيفه انحرمت من حنان الامومه والأبوه والواحد ما يقول إلا ألف مليون الحمد لله اللي قاعده إتسويها أمها الله يستر عليها وصارت بحفره من النار ما تدري إن عشيقها الحمد لله لك يا ربي والعياذ بالله من هالناس بأن خالد يلعب عليها وما يحبها

الحمد لله لك يا رب وربي تستر على الجميع وتحفظهم من القلوب الضعيفه

 

[الملالة]

في عيد الميلاد هيصة وصراخ والبنات مفرفشين الا لطيفة تفكر بأمها وحالتها .. وتفكر بحمود اللي خلا قلبها يرقع لاول مرة بحياتها والصداع اللي ماسكها من كثر ما بجت استأذنت من دلال وقالت لها بتمشى بالحديقة اشم اشوية هوا فقالت لها دلال بمشي معاج فردت لطيفة:لا حبيبتي خليج مع ضيوفج انا يس اشم هوا وأصير زينة انشاء الله..طلعت تتمشى بالحديقةوكان الجو حده رووعة وكانت الحديقة تطل علي الدوانية لمحها حمود وطار قلبه من مكانه وقام طلع بره وكان واقف وراها وما حست فيه وفجأة حست انه احد يراقبها فالتفت ولا حمود بويها وما بينها وبينه الا شبر فشهقت من الخرعه..
حمود: اسم الله عليج .. اسف اني خرعتج وقام يبتسم وبينو غمازاته اللي تزيد جمال ويهه..
لطيفة: لا عادي بس كنت متضايقة وبشم اشوية هوا.
حمود: الله ريحتج وايد حلوة.. داشة بخشمي وذوقج باللبس وايد حلو وانتي كلج حلوة( وحاط عينه بعينها يبي يشوف ردة فعلها..
ارتبكت لطيفة وما عرفت شلون ترد عليه فقالت : عن اذنك برج داخل .
حمود: لطيفة... ردت عليه: نعم .. حمود: عندج موبايل
لطيفة: لا ما عندي ..ليش تسأل؟ حمود: في موضوع خاص ابي اكلمج فيه وما بي دلال تدري عنه.. شلون اكلمج؟
لطيفة استغربت من جرأته بس تذكرت انه ضابط والضباط اغلبهم جريئين .. عطني رقمك ان ادق عليك( كانت تبي أي أحد تتكلم معاه وتفضفض.. عطاها الرقم كان سهل وحفظته ومشت وهي رايحه ناداها حمود: لطيفة... وهو يبتسم ترى ناطرج.
في مصر وبعيادة الطبيب عاليه (أم لطيفة ) وخالد قاعدين وهي حدها متوترةوتدخن بعصبية جان تييها الممرضة: ممنوع التدخين بالعيادة يا مدام ،، ماردت عليها : متى بندخل على الدكتورما صارت صار لنا ساعة ناطرين هذا واحنا دافعين زيادة عشان تدخلينا مبجر.
الممرضة: الكتور قالي اخليكم اخر حاجة دقايق ويخلص اللي بيدو وتدخلو بس بلاش سجاير
ردت عليها عالية بنفسية: خلاص اوكي
بعد اشوي دخلهم الدكتور وكان شكله كريه وما ارتاحت له عاليه بس شتسوي مجبورة وخالد كان يهديها علشان يخلصون الموضوع.وسألها الدكتور..،،
كم عمرك؟ 38 .. حامل في أي شهر؟ الثاني.. بتشتكي من أي أمراض؟ لا بس خلصني ، خزها الدكتور وقال لها تفضلي الغرفة الثانية افحصك وانخلصك وطلب من الممرضة تسكر العيادة .
دخلت ام لطيفة الغرفة الثانية وهي تقول (حسبي الله عليك يا خالد اللي حطيتني بهذا الموقف) اهي كان على بالها انها لما تحمل خالد بيخاف ويتزوجها على طول،، لكن خالد اول مادرى بسالفة الحمال هددها يااما تطيح اللي ببطنها او يهدها
وانسدحت على الفراش والدنيا تفتر فيها وغزها الكتور ابرة وغابت عن الوعي....

 

[الملالة]

مشكورة حبيبتي رفيف الورد على متابعتج ويسعدني اعجابج بالقصة.ويخليج انتي بعد لهلج واحبابج
الدنيا ياما فيها بلاوي ومن هالبلاوي ام لطيفة حسبي الله عليها وين ما كانت ..دمرت حياة بنتها الوحيدة

 

[إيمي1987]

والله حراام تكسر الخاطر لطيفة


كملي متابعه بصمت ​

 

[شيـري]

يالطيييييييييف اش هذي الام
لا تطولي علينا ناطرين البارت الجي .. متحمسه اعرف اش راح يسير بين حمود و لطيفه

 

[الملالة]

الساعه 11 رجعت لطيفة البيت مع دلال واخوها حمود لان الام ما رضت ان السايق يوديهم وشافو البيت ظلمة ومبين ما فيه أحد ..
دلال: لطوف امج مو بالبيت؟
لطيفة: امبلا بس يمكن نامت؟؟ يلا تصبحون على
خير.
ردو مع بعض وانتي من اهل الخير. ودخلت البيت وكان حده ظلمة.. بطلت الليتات ونادت سيتا .. سيتا.. وياتها سيتا وشكلها كانت نايمه : لتوف انتي يجي ، انا يفكر انتي نوم بره؟؟
خزتها لطيفة وردت عليها : يعني وين بنام بره ؟ ماما ما يسوي تلفون؟ ردت الخادمة: لا مايسوي.
لطيفة: خلاص روحي نامي ولا تنسين باجر الجمعة يعني ماكو مدرسة مو تتليقفين وتطقين الباب علي .
دخلت لطيفة دارها وغيرت ملابسه وخذت لها شور وطول ماهي واقفة تردد رقم حمود بقلبها.. ولهت عن امها وبلاويها لما صارت الساعة 12 سحبت التلفون من الصالة ودقت على حمود( لا حسيب ولا رقيب في البيت) وبعد نص رنه رد حمود وقبل ما تتكلم قال لها هذا رقم بيتكم؟
ردت بصوت مبحوح: أي، حمود: شفيج خايفة احد يسمعج؟
لطيفة :أخاف امي تقعد،حمود: أنا مستغرب اشلون ما عندج موبايل؟ ، لطيفة: ما احس اني محتاجه له ،رد حمود: أي بس الحين حتى اليهال عندهم موبايلات وقام يضحك....
لطيفه: اقول حمود؟ حمود: الله يا حلاة اسمي بلسانج.قولي شبغيتي؟
لطيفة: ما قلت لي شنو السالفة اللي تبيني فيها؟
حمود: بدون لف ودوران؟ انا حدي معجب فيج وحبيت اتعرف عليج اكثر ، ردت لطيفة: يعني شنو؟ وحس حمود ان لطيفة مو من البنات المفتحين وانها على نياتها..
حمود: يعني ودي أعرف كل شي عنج ، وصدقيني ترى قصدي شريف ، لأنج حيل داشة مزاجي.وحبيت اعرف أشياء وايد عنج ،ممكن.
لطيفة: أشياء مثل شنو؟
حمود: كل شئ .. كل صغيرة وكبيرة بحياتج.. كل تفاصيل حياتج.
لطيفة: عيل ليما الصبح محنا مخلصين.
حمود: على راحتج أنا ما وراي شي ومو شرط تقولين كل شئ اليوم ، الايام جدامنا .. وحست لطيفة انه حمود يبي تكون في علاقة بينهم وتخوفت من الموضوع .
لطيفة :انا الحين تعبانة وبنام وانشاء الله باجر ارد على موضوعك.
حمود: وين رايحة تونا ما بدينا.. شفيج زعلتي ، لاتفهميني غلط ، انا قلت لج ترى قصدي شريف.
لطيفة: بس اللي قصده شريف ما يتكلم بالتليفون، يدش البيوت من بابها.
سكت حمود فترة وقال لها: معاج حق بس انا كان ودي اعرف عنج بعض الاشياء وانا بصراحة تعلقت فيج اول ما شفتج ، ومدام ما تبين تكلميني خلاص على راحتج ، وانا اوعدج أدخل بيتكم من الباب يلا تصبحين على خير وما عطاه فرصة ترد عليه وسكر الخط وتمت لطيفة تفكر بكلامه لحد مانامت... ( أنتظروني باجر انشاء الله بالفصل الثالث ومفاجآته المثيرة)

 

[إيمي1987]

بعطبج العااااافية

ناطررررينج

 

[بيبي ناز]

مشكورة اختي

كمل كملي

ناااااطرينج

 

[P!NKia]

قطعت قلبى لطيفه على نياتها ومسكينه
بس ياليت حمود يكون جاد ولا يلعب عليها

 

[الملالة]

***الفصل الثالث ***
الساعة كانت تقريبا ثلاث ونص الفجر قعدت لطيفة على صوت الباب والجرس بنفس الوقت وريال يصرخ: بطلي الباب ( عاليوه) انا ادري انج داخل سيارتج برة..
استغربت لطيفة منو هذا الريال ومبين من كلامه انه موطبيعي بالمرة،، فطلعت بالصالة والحمد لله توها سيتا رايحه بتبطل الباب فصرخت عليها لطيفة وقالت لها : لا تفتحين الباب رجعي دارج.. وما تدري لطيفة شلون طرى حمود على بالها .. وما لقت احد جدامها غيره وعلى طول اتصلت فيه ورد عليها وهو شبه نايم: الو
لطيفة : الحقني حمود مالي غيرك في واحد كسر الباب علينا وانا خايفة افتح له وما ادري شيبي بالضبط..
حمود: وين امج؟ لا تحاتين انا ياي بالطريق على طول ،بس ديري بالج لا تفتحين الباب وأنا بطرش دوريه قبلي لاتفتحين لما اقولج انا حمود اللي عند الباب.
لطيفة: حاضر بس الله يخليك لا تتاخر.
خمس دقايق والدورية كانت عند الباب ( المخفر كان قريب من بيتهم) ونزل منها الشرطي ومسك الريال اللي كان يطق الباب وما قاومهم لانه كان سكران،، وشافت لطيفة الشرطي يتكلم بالتلفون واستنتجت انه يكلم حمود.
شوي ولا سيارة حمود وصلت ونزل على طول وركب يم الريال ورى بالدورية ,, وتم فترة وبعدين نزل وحرك الشرطي وتم حمود واقف مكانه وصعد لشقة ام لطيفة وطق الباب وقال : فتحي لطيفة انا حمود.
فتحت لطيفة الباب وكان ويه حمود مو طبيعي حده معصب ومتنرفز وعلى طول قال لها : وين امج؟
ردت لطيفة: أمي مسافرة وانا بروحي بالبيت.
حمود: امج اسمها عالية؟
لطيفة : أي ليش؟
حمود: لطيفة الحين ابي اعرف كل شي عنج وعن امج واياني وياج تجذبين ، لان سوالف امج فاحت ريحتها
سكتت لطيفة وما عرفت شتقول: ادخل بالصالة ةانا بقول لك كل شئ بس أرجوك لا تفهمني غلط.
وما درت لطيفة ان هذا الاعتراف راح يدمر حياتها.

 

[إيمي1987]

لا حول والا بالله العلي العظيم


متابعة ​

 

[MeeMeeYoo_2]

يعطيج العافيه

ناطرين