رباب : رقية في رقم غريب دق علي اقول الو ما يرد
رقية: ممم اخاف شهاب يبي يجس نبضج
رباب: شكو ؟؟ وشعرفه برقمي ؟؟
رقية: ابوي عطاه
رباب: ما شاء الله وايد راهية
رقية: شكو شكو
رباب: شنو اللي شكو ابوي شلون بيعطيه رقمي من صجج انتي مستحيل
رقية: تهقين
رباب: الا متأكدة ان ابوي مستحيل يعطيه رقمي
رقية: عيل منو
رباب: مادري يمكن احد غلطان ..
رقية: يمكن .. خلاص دام ان ما دق مرة ثانية خلاص يعني غلطان
رباب: على قولتج.. وين اليهال ؟
رقية: ليش
رباب: بدرس احمد
رقية: ويييييييي ربوب خل نقعد بروحنا شوي خل نسولف
رباب: واي عليج طول اليوم نسولف ونقرق شتبينا نسولف فيه بعد
رقية: عن مهرج
رباب: شفيه
رقية: متى يعطونج ياه ؟؟
رباب: مادري بس امس سمعت الهامو يختي تخطط للسفر والمشترى
رقية: شنووووووو لا يكون من مهرج
رباب: مدري بس اهي من وين لها شكلها بتاخذ منه
رقية: حريمتها .. اقص ايدها ان لمست منه شي
رباب: الله كريم
رقية: مممممممم تبين اقول حق ابوي
رباب: شتقولين له يالمينونة
رقية: اقوله عن المهر شنو جدام الله وبالشرع المهر من حقج ولا احد له الحق يصرف دينار منه ...
رباب: مادري بس لا تقولين له فشلة ..
رقية: يصير خير
رباب: انزين ما شفتي زيد ما كلمتيه ؟؟
رقية: لا ولا ابي اكلمه هالخروف .. خروف امه
رباب: رقية !!! احنا شقلنا
رقية: لا قلنا ولا حجينا خلاص عافك الخاطر عقب كلامه وحركته الاخيرة
رباب: بهالسهولة ؟؟
رقية: لا ربوب بس اهو جرحني .. يعني ما يصير انا البنية اصبر واهو باردة مبردة امي ما ترضى .. اكبر شي سواه يروح يكلمها
رباب: شتبينا يسوي ؟؟ يذبحها
رقية: جان زين وافتك منها ..
رباب: استغفري ربج يا بنت وعقلي لا تصيرين مثلي
رقية: واي جان زين اصير مثلج ولج ادوس على قلبي بريولي وانادي اليهال يطامرون عليه .. مو هالقلب اهو اللي خلانا نتحمل الظيم والتبن
رباب: رقية شفيج ؟؟
رقية: تعبت يختج والله تعبت يمكن انا مستانسة بملجتج اكثر منج .. ابي اطلع ابي اغير جو حتى الدمعه نشفت مافي دموع لان القلب مات والعين نشفت .. شوفي اشكالنال خدامة بيت بو بداح جيرانا اكشخ منا
رباب: هههههههههههههههههههه صدقتي تصدقين شكله بو بداح متزوجها
رقية: مااستبعد الله يهديها ام بداح مادري شفيها ما تجابل بو بداح ولا تعتني بنفسها
رباب: في رياييل عيونهم وصخة .. تصدقين اتمنى ان يكون شهاب مو من هذا النوع .. لاني وقتها ما راح اعرف شلون اتصرف ..
رقية: الله لا يقوله ... (( سرحت ))
رباب: هيييييي وين رحتي ؟؟
رقية: اخيه تذكرت زيود شلون يحاميني بالفرع ما يخلي احد يطالعني ويخز الكل جنه بودي قارد
رباب: الله يصلح بالكم وتصيرون من نصيب بعض
رقية: ربوب تهقين لو صرنا من نصيب بعض بقدر اعيش مع امه
رباب: ما تدرين تغيرينها مع الايام
رقية: ماعتقد اهي ام عيد نسرة الخسة تسري بدمها ولا ما جان خلت ولدها جذي .. زيود اخر مرة شفته فيها جنه مسواج
رباب: ههههههههههههههههههههههه واخيرا اقتنعتي ؟؟
رقية : ههههههههههههههههههههههههههههههههههههههههههههههه
سعد: امي تبيكم
رقية: وي بس مالله الرحمن الرحيم وعلة تعل اللي في بالي خرعتنا تنحنح طق الباب مو جذي
سعد: امي تبيكم ...
رباب: انزين انزين روح كانا يايين
قامت رباب ورقية وراحو الصالة ..
رقية: نعم
الهام: ونعامة
رقية: ترفس اللي يكرهونا ..
الهام: انزين روحوا بدلوا و تسنعوا وجهزوا الضيافة
رباب: ليش ؟؟
الهام: اهل رجلج بيجون ..
رقية: انزين اهي اهل رجلها بيجون وانا شكو
الهام: يمكن يشوفونج ويخطبونج ويفكوني منج
رقية: (( ترفع ايدها للسما )) وي جان زين احلى دعوة دعيتيها لي والله زين يطلع منج يا مرت ابوي
الهام: وين ابوج يشوفج يالبيعارية ..
مشت رقية ورباب وخلت الهامو تتحلطم بروحها
رباب: احلى مافيج لما تحقرينها جنها مو موجودة
رقية: تستاهل خل ينحرق دمها يا مال ال ..
رباب : بس بس بسج دعاوي مو زين
رقية: استغفر الله محد مدخلني جهنم الا اهي السعلوة
رباب: مممم ماتدرين ليش يايين
رقية: لا وانا شدراني ما حصل وانخطبت من قبل ..
رباب: اها .. انزين شنسوي ؟؟
رقية: مادري .. نسوي حلو تمر ؟؟
رباب: مادري والله
رقية: اف خل نطلب خو .. طاحت ايدنا طول اليوم نشتغل .. اليوم شطفت هدوم اليهال كلهم ولا صراويل سعد سوولي ازمة عما بعينه ما يغسل عدل ..
رباب: هههههههههههههههههههههههههههههههههههههههههههههه يعلج حرام عليج
رقية: خيولي بو صراويل معفنة .. صبري خل ادق على ابوي جود اييب لنا شي
رباب: صبري شنو بتقولين له
رقية: بقوله جايين لنا ناس ونبي نطلب لهم شي من برة يمكن يطرش فلوس
رباب: اوكي بس لا تقولي نله ام شهاب بتجي
رقية: اوكي .. (( طلعت التلفون تدق )) : الو قوة يبه
بومحمد: هلا ..
رقية: .. يبه ما عليج امر لو سمحت يعني اليوم بيجونا بيت ام شهاب ونبي فلوس نشتري ضيافة
رباب: (( تدزها )) وثول انا قلت لا تقولين يالصخلة
بو محمد: جم تبون ؟
رقية: مادري يبه انته ومدة ايدك
بو محمد: انزين طرشيلي محمد ديوانية بو سعد
رقية: مشكور يبه ما قصرت
بو محمد: مو ناقصكم شي ثاني من الجمعية ؟؟
رقية: لا كل شي عندنا .. بس نبي حلو وموالح ..
بو محمد: خلاص يالله طرشوه ..
رقية: اوكي يبه مع السلامة
بو محمد : (( سكره من غير باي ))
رباب: الحين انا مو قلت لج لا تقولين
رقية: واي تخزبقت خو منفس مادري شفيه
رباب: يعني شفيه توه قاعد من النوم وتعرفين ابوي بنومة العصر ..
رقية: اي صدقتي .. بس اشوه لما درا انهم بيون وافق من غير ولا شي وبعدين شفيها ان قلناله انهم بيون
رباب: مافيها شي بس استحي ..
رقية: اقول خلج مستحية خل اروح اطرش حمود .. (( تنادي حمود )) حمووووووووووود .. حموووووووووووووود
زهبوا الجاي والقهوة وبخروا البيت لبست رباب قميص طويل وبنطرون كانت امل شاريتهم لها هدية .. وسوت شعرها كبة بالاول بعدين رقية فلتها لها وخلتها تسويه عنقوص .. طلبوا الضيافة وقعدوا ينطرون وبما ان الضيوف طولوا قعدوا رقية ورباب واليهال بالصالة يطالعون تلفزيون والهام بالدار وفجاة دخلوا عليهم بالصالة
ام شهاب : السلام عليكم ..
رباب: (( فزت من مكانها )) وعليكم السلام
رقية: هلا والله خالتي ام شهاب تفضلي .. حياكم
انتصار : الله يحييكم .. شلونكم ؟؟
سلموا وقعدوهم ونادو الهام .. دخلت تتمخطر الهام .. سلمت وانثبرت
الهام: بالمبارك عليكم بنتنا يا ام شهاب
ام شهاب : يبارك بعمرج وان شاء الله بنتكم في عيونا .. زينة البنات والله ربوبة
الهام: حبيبتي ما قصرتي والله هذا العشم فيكم يا ام شهاب ..
انتصار: تعال يقعدي يمي يا مرت اخوي ..
ام شهاب : انزين يا ام محمد .. انا ادري ان ربوبة يتيمة وانا ان شاء الله مثل امها .. ونتي فيج الخير والبركة ..
الهام : (( مو عاجبها الحجي )) ما عليج زود
ام شهاب : بو شهاب اتفق مع بو محمد على ان المهر 6 الاف ان شاء الله ..
الهام: ان شاء الله ..
ام شهاب : بس احنا طبعنا نشتري ذهب للعروس ..
الهام: يعني شنو بتتخصمونه من المهر
ام شهاب : : ) ما نقول نخصمه بس احنا ناخذ العروس ونشتريلها ذهب والباجي نعطيه نقدي يعني اهي تختار واهي تشوف
الهام: لا لا احنا نروح نشتري لها ذهب ..
ام شهاب : هذي طبايعنا وما نغيرها .. وبعدين خلاص البنت صارت بنتنا .. ولا شرايها العروسة
رباب: .... (( مستحية )) اللي تشوفونه
كانت رقية تغلي بمكانها ودها تقوم تصب مطارة الجاي على راس الهام الغبية .. كانت الهامو تساوم على اختها وتكاسر الاوادم .. والناس خووش ناس .. زين منهم يعني وهذي تتفلسف ..
ام شهاب : خلاص دام بنتي قالت اللي تشوفونه يعني خلاص على بركة الله
الهام: بس ابوها ما يرضى تطلع مع رجال غريب عنها
ام شهاب: منو بيطلع ؟؟ لا سلامتج يا قلبي هم احنا بناتنا ما يطلعون الا عقب العرس بس هو بيودينا انا والبنات السوق يعني بيقطنا بس واذا انتي زعلانة وما يعجبج اخلي السايق يودينا شتبين بعد يا ام محمد ..
الهام: يصير خير كل شي بيد ابوها ..
قعدت ام شهاب وانتصار وام فلاح يسولفون ويضحكون .. وقبل لا يطلعون عطوا جيس هدايا حق رباب .. سلموا عالكل وطلعوا واهما مستانسين لمجرد شوفة رباب ..
