رودي للاستشارات الهندسية

[الكيكة]

شوشا .. انا فصلت بنتي عن الصبيان
بنتي كانت 6 سنين .. و الصبيان 11 و 9... ماقدرت تنام بليل بروحها و كل يوم تنام عندهم.

انا اقول خليهم مع بعض دام انج بشقه على مايكبرون
حطي البنت و الولد الكبار بسرير طابقين علشان المساحه و الولد بو سنتين بكرفايه ام اصغر من نفر

 

[shusha]

رودي للاستشارات

مشكوره الكيكة وما قصرتي

بس انا ودي افصلها عالصيف الياي لان مافي مجال الا بعد 7 سنين واكثر ،عشان ابني بيتي ، صج شقة بس انا بانيتها في بيت اهل ريلي اول ماتزوجت، يعني مطوله :eh_s(11):

وبعدين ابي اغراض بنتي بروحها وتدرين اغراض البنات غير وخصوصا اللون الوردي

وحتى الصبيان ابي احطلهم اللون الازرق او شغلات الاولات مثل الكور وهالسوالف :eh_s(10):

شوفي صور الغرفة الحالية وحكمي عليها ، ويمكن تقدرين تقوليلي شسوي

ومشكوره

 

[rudy]

مرحبا شوشا شفت الصور ترا الغرفة تشوق الله يهنيكم بس الغرفة صغيرة اهي ممكن تنفصل بس صعبة شوي
شوفي اخذي مترين من صوب الدريشة وخليها سرير للبنت بالطول لازق بالطوفة وبعدها سرير دورين للاولاد يفصل بينهم خزانة واذا تبين توضيح اكثر فتحي مجلة ايكيا 2008 صفحة رقم 96و97 وشوفي شمسوين على فكرة الغرفة المعروضة عرضها تقريبا مترين ونصف او 3 امتار.
ارجو اني فدتك

 

[الكيكة]

لا اله الا الله محمد رسول الله ....الغرفة اتينننننن ماشالله تشوووووووووق
ذوق و ترتيب والوان .. حرام تعفسينها و تحوسينها

 

[shusha]

مشكورين رودي والكيكة
وهذا من ذزقكم
سمعوا رايي .. انا فكرت بالكرفاية اللي تنلصق بالطوفة وتيي على شكل صوفا(غنفه) وتنترس مخدات بجميع المقاسات ويي تحتها يرار كبير تقدرين تخلينه للتخزين او سرير ثاني
انا اخذ منه اثنين والصقهم بالطوفه مثل ماقالت رودي ومقابل الكرافي احط الكبت المكشوف اللي بايكيا واخلي الغرفه براحة .. والاثاث ابيض والورق الحائط والكماليات
شرايكم ؟؟

 

[rudy]

فكرتك حلوة بس كم سرير بتلصقينهم بالطوفه 3

 

[الكيكة]

الكبت المفتوح مو حلو .. حوسه

و الكرفايه اللي تقولين عنها عريضه و تاخذ مكان

انا اقول لا تغيرين شي .. دارهم اتينن و بنتج توها صغيره .. اذا صار عمرها 11 ولا 12 حطيلها غرفة ورديه ... ان شاء الله وقتها تكونين نازلة بيتج اليديد

 

[shusha]

رودي انا بحط سريرين واحد منهم اليرار بخليه سرير ويكون حق الصبيان والثاني حق بنتي واليرار اللي فيه بخليه تخزين . شرايج ؟

الكيكه ادري وانا معاج بس ولدي الصغير لازم اخذله سرير عالصيف الياي ومو ضروري افصل البنت الحين بس مضطره اغير عشان اخلي الغرفة تكفي 3 ( اسم الله عليهم )

والكبت المكشوف الحلو اللي فيه ان انتي تصممينه وانا امفكره اني احط من ضمنه التسريحة . شرايج ؟

 

[rudy]

آنا توني مصممه خزانه حق الأولاد يكون من ظمنها التسريحة والمكتب ترين الأولاد ملابسهم قليلة و4امتار خزانه وايد عليهم

 

[shusha]

ما تدرين شنو اغراضي يا رودي
انا عندي ضيم اغراض وكلهم ابيهم
وانا من النوع اللي يخش الملابس ( عندي ملابس نيو بورن ولدي الكبير)
تخيلي
والصراحه ما احب التفصال .. يا تفصال حسن ابل ومعرفي فيلاز يا بلا

 

[rudy]

نصيحة يا أختي لاتخشين شي وخاصة النيو بورن السوق مترووووووس من الملابس ولما يصير موسم الخصومات البجامات ولاوازم البيبي تصير برخص التراب خشي البدل الكشخة بس سألي مجرب الي خشيته طول هالسنوات كله توزع. وبالنسبة لخزاين ايكيا أنا مركبه منهم عبارة عن أرفف وعلاليق بدون أبواب ووايد عملة السالفة سهل تشوفين الملابس بس في مشكلة وحدة وهي ( الغبار) إذا مر شهر على البدلة ما تحركت من مكانها غبرت.

 

[shusha]

اي والله عيبها بس سالفة الغبار .. حتى لو التنظيف كان على طول .. تدرين جونا الله بالخير

 

[top 4 ever]

مرحبا اخت رودي
بغيت اسالك شرايك في الارضيات السوده للصاله الرئيسيه للبيت صراحه اهي حلوه مثل ارضيات محل فافافوم اللي تبرق انا متردده احطها اخاف توهقني بالتاثيث اوتصغر الصاله مع العلم انها جرانيت وهي غاليه نوعا ما ابي استشارتك كخبيره قبل لا اشتريها وشكرا مقدما

 

[rudy]

أنا أحب الأرضيات الغامجة بس أخاف أحطها وأتمنى تكون عندي الجرأة مثلك، ومرة زرت وحدة أرضية استقبالها رخام اسود أحس إن صالتها متميزة عن باقي البيوت تحسين الغرفة غنية ومتروسة أثاث وبعدين أنتي أول وتالي راح تغطين جزأ كبير من الأرضية بالسجاد يعني لا تخافين وتوكلي على الله.

 

[روزه]

شلونج رودي انا طلع عندي في البيت تقسيمات ما عرفتها شلون افصلها فابي مهندس اذا كنتي تعرفين احد يساعدني

 

[rudy]

انا خابرة دومين الي في سن ستي عندهم مصمم ديكور وفي بعض المحلات اذا شريتي منهم اثاث يساعدونك في تنسيقه ويعطونك استشارات مجانية​

 

[الكيكة]

توب فور ايفر

جونا مو مال ارضيات غامجه

مرة أجرنا بيت بالمانيا و كانت الارضيات غامجة .. لاعت جبدي من التنظيف ... كل ما انظف هم اشوف ذرات الغبار و اشياء صغيره ..

بصراحه مو عملي و موووو حلو .. قمته ... هذا رايي

 

[الكيكة]

ظبية .. محلات الديكور اللي بحولي عندهم مهندسين ديكور .. يطلع من المحل اب 30 دينار

أمي لما وسعت صالتها صار لها مثلج طلع لها جم عامود و ضاق خلقها
دقينا عليهم و يانا مهندس علمها شتسوي بديكور السقف و الاضاءة و العواميد .. و صالتها صارت عجيبه و العواميد ماجنهم موجودين لانهم ضاعوا بين توزيعة الاثاث

 

[rudy]

شلونك كيكة ولهنا عليك وعلى آراءك القيمة

تقصدين محلات الديكور الي مقابل البحر سنتر ... ميداس والي يمه ملوت ورق الجدران

 

[الكيكة]

هلا والله رودي توله عليج العافيه


اييي محلات ورق الجدران اللي بحولي و اذا تبين الرقم اللي دقينا عليه عندي