رد: // رؤآيــة // ♥ღ♥ღ نـآكـر آلــعـرؤف مـآ بـيـن بـعـيـنـه ღ♥ღ رؤـؤـؤعـه شـؤي عـلـيـ
شيخه
لبست عباتي وخذت جنطتي ونزلت بشويش على الدري مابي سارة تسمع .. وطلعت بعد ماقلت لروز ماتقول لسارة اي شي ..
طول ماكنا بالسيارة ومهاوي تحاول تكلمني وتقنعني ايي بيتهم .. وانا اضيع الموضوع ..
قعدت اتحرش فيها .. وهي تسولف لي عن حياتها مع خالد .. وعن حياتها بعد ماتولد ... وشكثر خالد كان مستاتس .. يوم درى عن حملها ..
كانت عيونها متعلقه بكل كلمه تقولها مها .. شعور حلو لما تدرين ان بعد جم شهر بتصيرين عمه .. الامومه شعور غير .. غيير صج ..!!
تمنت وقتها شيخه .. لو كان عندها بيبي مثل مهاوي .. تنطره و تخاف عليه وتحبه .. ويملا عليها وقتها ..
بيت بوناصر
نزلنا انا ومهاوي
وكانو خالاتي ينطروني .. سلمت عليهم وجني ماشفتهم شهر .. خالتي فاطمه كانت بس تسب وتلعن بسارة وعزوز ..
انا كنت ساكته .. شي فيني وده يصرخ فيها .. لاتقولين شي عن عزوز .. الا عزوز .. لاتدعين عليه .. ولا تسبينه ..
هذا حبيبي .. وحياتي وكل عمري .. مهما سوا .. ومهما افترقنا انا وياه . .بيظل عزوز بعيوني اهوا الريال الوحيد اللي حبيته ..
اما خالتي ناديه .. فكانت تحاول تقنعني اني اعيش معاها .. خاصه ان البيت فضى عليها .. ومافيه غير جراح ولد ناصر .. وناصر اللي اغلب وقته يكون بالشغل ..
بس انا ضيعت الموضوع .. وحاولت اسولف معاهم عن اشيا ثانيه .. اخبار البنات وكل شي صار بغيابي ..
بعد ساعه ونص تقريبا .. دخل جراح مع ناصر . . انا كنت ولهانه على جرااااح حييييل .. كبر شوي .. وطول ..
ضحكت بس شفته .. وهو على طول قرب مني ولمني بقوووووة
كانوا خالاتي يضحكون على اشكالنا ..
جراح : anti, i miss u too much dont leave us againe
شيخه وهي تلمه اكثر : هههههه .. زين مراح هدك .. بس انت مو عدتني تتعلم عربي عدل ؟؟
جراح : i try , belive me
شيخه : نصااااب ههه عيل مراح اعطيك العاب انا شريتهم لك
جراااح : no no pleease anti > i promise you
شيخه : ههه قول اوعدج بالعربي يله ..
جراح : اوع.. اوعدج
والكل ضحك على شكله وهو ينطقها .. رفعت راسي بويه ناصر وابتسمت
ناصر : الحمدلله على السلامه شيخه ..
شيخه : الله يسلمك .. شلونك ناصر ؟
ناصر : انا بخير ... وانتي ؟
شيخه تهز راسها : الحمدلله ..
ناصر : والكلب هذا صرفته عندي .. مو بناتنا اللي يتسوى فيهم جذيه ..
انقهرت حييل .. ليش يسب عزوز يدامي .. مهما سوا .. يظل الموضوع بيني وبينه .. وماله حق يسبه بهالطريقه تضايقت وغيرت الموضوع ..
وقعدنا نسولف باشيا كثيرة .. الين ماصارت الساعه 9 بليل .. تعشيت وقلت لخالد يوديني بيتنا ..
نزلت من السيارة بخووف .. وفتحت باب بيتنا وانا امشي على ريولي .. واول ماسكرت الباب ارعبني صوتها وهي تقول
سارة : لااا والله !!!! ومن قالج تين الحين ؟؟
شيخه : بسم الله ..
ساره : ليش شايفه يني ان شالله ؟
غمضت عيوني : خير ؟
سارة : مرة ثانيه . .لما اسمحلج تطلعين .. تطلعين .. البيت مو فندق تروحين وتسهرين ماادري وين ومع منو .. ترى مو ناقصين فضايح اكثر ..
ولعت .. الا شبيت نااار ... هذي شتخبرط .. بس مسكت روحي وخذت نفس وتكتفت
شيخه : والحين شتبين ؟
سارة خذت مفتاح كان على الطاوله يمها وقطتهاعلى الارض عند ريولي ..
سارة : هذا مفتاح المخزن .. روحي رتبيه .. بسويه مشغل . .
شفت المفتاح ورديت طالعت بويهها .. المخزن بره البيت .. صوب غرفة الفندق .. والخدامه نايمه .. وانا بروحي ..
شيخه : الحين ؟
سارة : لا باااجر .. اكيد الحين .. يله خلصيني .. وخليني اقوم باجر ومااشوفه مرتب .. ومنشاله منه كل الاغراض .. تدرين شسوي فيج .؟؟ انتي عارفه ..
وخلتني وراحت .. وانا عيوني على المفتاح للحين .. مصدومه .. عمري وحياتي اصلا ماطليت صوب المخزن .. لانه عتيج ومكانه يخوف .. وكله حشرات يمكن .. ومافيه لييت حتى ..
بلعت ريجي .. وخذته المفتاح .. وفصخت عباتي .. ورحت صوب غرفة روز ..
وطقيت الباب عليها
شيخه : رووووز ... روووووز !!!! قومي !!
بس ماردت علي .. شكلها نايمه .. اوووف .. شسوي ؟؟
مستحيل ادخل المخزن بروحي اخاااف .... حسيت روحي ببجي خلاص .. غمضت عيوين استرجع شوي هالقوة اللي عندي .. ونزلت الحوش اللي برى .. وفتحت باب المخزن وكل مافيني يرجف .. ميته خووف ..
لقيت ليت كشاف يم الباب .. خذته وفتحته .. كانت الغرفه ظلمه حيييييل .. وتخووف .. مشيت بحذور وانا الملم هدومي حواليني .. وباطراف ريولي ..
مررت الكشاف على ارجاء الغرفه .. كانت فيها صناديق وكراسي .. وخشف وجنط سفر .. واشيا وايد ..
لفت نظري كرتون مكتوب عليه شيخه باللون الاحمر .. قربت منه وفتحته .. كانت العابي وانا صغييرة .. ياني فضول اعرف اكثر واكثر شنو فيه الصندوق .. ركزت الكشاف على محتويات الصندوق .. لقيت العاب وااايد .. ولفتت نظري لعبه باربي بيضا وويها مشخبط عليه بالاسود وشعرها مقصوص ..
ضحكت حييل بس تذكرت قصه هاللعبه .. وردت فيتي الذاكرة الينيوم كانوا يايين اهلنا من الامارات بيتنا .. وبعدا ماطلعوا عطوني لعبه باربي .. كنت احبها حييل وانومها عندي .. وكل يوم اقولها قصه واسولف معاها .. حتى لما اتغدى اخذها معاي واقعده يمي ..
كنت عايشه معاها طول اليوم .. ومرة كان عزوز وخالد بالدوانيه .. وعزوز وخالد صاقطين بمادة العربي . . ويوم رحت الدوانيه شفت شهاداتهم وفيها دويرة حمرا على مادة العربي ..
شهقت بسرعه
شيخه : خلوووود ياويلك من ابوييي .. انتو صاقطين ؟
خالد اللي كان منسدح يم عزوز متابعين مبارة القاديسه والعربي : اششششششششش سكتي .. والله ياشيوخ لو دريت انج قايله لابوي شي .. ياوييلج فاهمه ؟؟
وكان كان وقتها عمري عشر سنين .. وخلود وعزوز عمرهم 14 سنه ..
شيخه : اييي لاتطق وخر عورتني ..
عزوز : خلود ترى هذي فتانه .. سكتها لاتفضحنا ..
خالد وهو ماسك اذوني : شيخووه والله ان فجيتي حلجج راح اشكه سمعتي ؟؟
قلت وانا اتألم : اايييي زيين مراح اقول وخر اوووف
وبس وخر عني وقفت عند الباب وقلت : بروح اقول لابوي يزفك وانت والبطه اللي يمك هيين
ونحشت بسرعه قبل لا يمسكني خلود .. واذكر وقتها فتنت عليهم عند ابوي وغسل شراعهم بالتكفخ والطق ..
وبعدها بيوم قمت الصبح لقيت لعبتي الباربي مقصوص شعرها ومشخبطين على ويهها .. وكاسرين ايدها ..
وتميت اسبوع ابجي ماسكت .. لما امي شرتلي لعبه ثانيه ..
ابتسمت اكثر وانا اشوف العروسه اللي كان شعرها طوييل .. وقعدت التلمس ويهها وجني اتلمس الماضي وذكريات الطفوله الحلوة ..
لميت العرووسه حييييل وقعدت ابجي .. كل ذكرياتي تضم عزوز .. كل شي حلو مع عزوز .. قعدت على الارض ابجي .. اشتقتلك .. اشتقتلك حييل .. انت مااشتقت لي ؟؟ ماتحبني كثر مااحبك ..
قمت بتثاقل وكملت شغل لما انهد حيلي .. تميت الين الساعه 1و نص بالليل .. وصعدت وانا اشيل ريولي شيل من التعب ..
سبحت وقعدت اتلقلب على السرير .. وغلبني الحنين .. حسيت كل مشكله بتصير تافهه يدام بعدي عن عزوز .. وتجرأت ومسكت التلفون ودقيت عليه ..
دقيت مرة ومرتين وثلاث .. بس مارد علي .. بجييت اكثر .. شيووخ مايبيج .. مايحبج .. خلاااااااص انسسسسييييه ...
يااارب نسيني عزوز .. يارب خلني انساه وانسى حبه .. يااارب
نفس الوقت بلندن
الساعه 7 ونص الليل
شقه عزوز
كنت مصدوم .. اطالع الملف اللي وصلني قبل شوي .. واقلب اللي فيه .. اكيد فيه شي غلط .. اكيييد ..
اكيد مو اهيا ... لاااا ... شلون .. ومتى ؟؟ وليش ؟؟
مستحيييل مستحيل ..
قمت وانا امسح ويهي بقوة ... لاااااااا .. لاااا ياربي .. الا اهي .. ماقدر اكرهها .. مااقدر ..
قطيت الملف من ايدي وحذفته على الارض ولبست جاكيتي ونزلت تحت عن الحارس .. اتأكد منو اللي سلم له الملف ووصله ..
تتمة الجزء
عزوز
حيوااااااااااااااااااااااااااااانه ... حقييييرة ... هيين ياشيخه .. هيييين ...
رجعت اتصفح الصور مرة ثانيه .. كل الصور معاه .. متى ووين ؟؟ وشلون .. طول ماكنا بلندن كانت معاي ... مستحيل ..
متى شافته ؟؟ ومنو هذا .. وليش قاتللي بروح مع البنات ؟؟؟ ومنو يطلع اللي معاها بالصورة ؟؟
كل الصور كانت تبين ان بينهم شي .. قاعد يمها .. وومبحلق عيونه فيها .. >> هذا نفس لبسها يوم كانت طالعه مع البنات نففسسسسه !!!!
ياااااااا الله .. معقووله !!! شيخه ..
لا مستحيل .. اكيد الصور فيها شي غلط ...
حسيت ان انفاسي صارت تتسارع .. وماني قادر اخذ نفس .. فصخت جاكيتي وقعدت على الكنب .. وعيوني تدمع ..
احس اني مقهوور .. بذبحها .. ودي اذبحها الحقيييرة ..
بالاول .. كانت مع نصور الجلب .. والحين هذا ..... منو هذا ؟؟ منوووو ..
رفعت التلفون ودقيت على مكتب سياحه وحجزت طيارة على اقرب رحلة للكويت .. خليني اعرف ادبج ياشيوخ .. هيين
اليوم الثاني
بيت بوخالد
اليوم طبعا يوم اليمعه .. قبل لا تكون شيخه هني .. كانوا الاخوان يجتمعون في بيت حصوص .. ويزورون ابوهم قطاعي .. متى ماقدروا .. بس الحين شيخه ماتقدر تطلع اي وقت على كيفها بسبب الشغل اللي على راسها .. ماتشوف حصه ومنور الا باليمعات .. او اذا اهما زاروها لانها هلكانه شغل .. والكل مستغرب من تصرفاتها ورضوخها حق سارة .. مو حاسين بانكسار شيخه .. وهي بينهم .. مو حاسين بدمعتها اللي تخشها عن الكل عشان كرامتها ..
مو حاسين انها تبجي كل يوم وتبلل مخدتها على حالها .. لا دراسه .. ولا ام ولا ابو .. ولا حتى رفيجات تقدر تتواصل معهم .. وعزووووز .. منو يقدر يحس بفقدان الزوج والاب والام .. فقدان الشخص اللي فتحت عيونها على الدنيا وهي معاه .. يمه .. تحبه من غير لا تدري .. ولا هو يدري ..
منو يقدر يحس بالنار اللي بقلبها .. شهر عسل مطعون بالخيانه .. ووين .. في شقتها .. وعلى صدر زوجها ..
هم اكبر من عمرها الصغير .. وتعب اكبر من انها تتحمله ..
الساعه 12 ونص ..
شيوخ بالمطبخ تساعد روز بالطبخ .. تعلمت اشيا وايد من روز .. المجبوس .. دقوس صبار اللي صارت تضبطه .. البرياني .. ومرقة لحم وباميا .. الا شي واحد للحين تنأرف منه .. السمج .. تحسه اصعب شي .. واذا سوته بتكون طبااخه صج ..
روز : انتي ليش يجي هني سيخه .. روهي بره الهين يجي ماما سارة سوي جنجال
شيخه : اووو رووز .. ماما سارة مستانس واجد عشان انا اعرف طبخ .. وبعدين انا يبي يتعلم .. الحين يجي حصه ومنيرة انا يبي سوي كيك .
روز : ههههه كيك .. انتي مايعرف يطبخ .. يبي يسوي كيك ؟؟
سارة دخلت على ضحكة روز .. وصرخت فيهم ..
سارة : والله خووووووش !!! شللي صاير بالمطبخ ؟؟؟
شيخه لفت عليه تفسر لها : ولا شي .. نطبخ ..
سارة : لمنو ؟؟
شيخه : خواتي بيون على الغدا ؟؟
تخصرت بطريقة قذرة ورفعت حاجبها المحفوف والمرسوم بقرف : ومن منو استأذنتي ان شالله ؟؟
شيخه : ابويــ ــ ــ
سارة بنبرة متعاليه امرة : انا اللي اسمح مو ابوج ..
ولفت على روز بزمجرة : وانتي يالزفته .. شيلي هالخرابيط .. ماكو غدا اليوم .. انا وعمج بنطلع نتغدا بره ..
شيخه بحلقت عيونها : بس انا بطبــ ــ
سارة : لما يصير البيت بيتج .. عزمي اللي تبين .. وطلعي الحين غسلي الحوش .. يلوع الجبد مثل ويهج .. خلصيييي !!!
شيخه عضت على شفايفها مقهوووورة ... هذي كل يوم تذلها اكثر واكثر .. لا لا ياشيخه .. جذيه وااايد والله واايد ..
طلعت وطق جتفي بجتفها .. بروح غرفتي .. ولا تمسكني من ايدي توقفني بدون رحمه ..
وقالت بهمس وعيونها بعيوني : والله .. والله ياشيوخ .. مثل ماذبحت امج .. قادرة اني اقطج بالسجون .. تسنعني .. ولا تلعبينها على .. فاهمه ..
انا قويه .. صح قويه .. بس مو قد ساره .. ساره بليس متلبس بانسان .. نظراتها .. كلامها .. وتهديداتها .. قادرة كل شي تسويه .. وابي يتبعها مثل الظل ..
رجعت منكسرة وطلعت من باب المطبخ اللي يطل على الحوش .. الساعه 12 ونص الظهر ..
والشمس تحرق .. الجو حاار والحوش مثل النار .. وقفت دقايق والعرق يتصبب من جبيني .. مسكت المخمه وقعدت اخم الغبره اللي تارسه الحوش .. كنت اخم وعيوين تدمع .. ماكنت عارفه من الغبار ولا من القهر .. حسيت بدوووخه مو طبيعيه .. الشمس قويه حييل .. كملت لما شفت الدنيا يدامي تدوووور ..
تدوووو ورتقلب .. والصوره مهزوزه .. حاولت اركز بشي ماقدرت .. تسندت على عصاه المخمه بتعب وانا اضغط على راسي .. وبعدها حسيت بظلاااااااااااام
نفس الوقت
كانت سارة لابسه عباتها وشعرها فاتحته على العباه بحرية .. اخذت جنطتها لويز فيتو .. ونظارتها دي ان جي .. وركبت مع السايق ..
ثواني ولا يدق عليها بوخالد
بوخالد : هلا سارة .. وينج ؟
سارة : هلا بروحي وحياتي وكل دنيتي .. انا حبيبي رايحه مشوار للصالون وراجعه ..
بوخالد : زين عيل .. ماني راجع البيت الحين .. بنطر لقح النخل وتالي برد .. شيخه وينها ؟؟
سارة : شيووخه فديتها هههه .. وصيت يسوون لها الغدا .. وعقب قالت بتطلع مع حصه السوق ..
بوخالد : زين طمنتيني .. خلاص حبيبتي .. اذا خلصتي دقي علي ..
سارة بمكر اكثر : زين حبيبي لاتتأخر .. ماقدر على فراقك ..
بوخالد تنهد وجنه مراهق : ان شالله ياقلبي ..
سارة : مع السلامه ..
سكرته منه وهي تضحك بمكر .. هههه صج شياب بسرعه ينقص عليهم ويعيشون احلام ورديه ..
قامت دقت على المحامي .. عشان العمارة اللي تبي تشتريها بالسالميه .. طبعا بفلوس بوخالد اللي باقتهم منه مكر وخداع ..
وعقب دقت على حبيبها .. ايه حبيبيها .. للاسف .. سارة بنت ليل .. وشقق الدعارة كانت تصرف عليها ..
وماتزوجت بوخالد الا قهر لمرته .. وفرصه لكسب الملايين .. ماتتطوف ..
ساره : هلا حبيبي .. وينك ؟
بوفاضل .. اكبر تاجر سيارات بالكويت .. وعايله معروفه ولها صيت : هلا ياقلبي وروحي انتي .. وينج تأخرتي علي ؟؟
ساره بضحكه عاهره تقزز : ههههههههههه ولهت علي ؟
بوفاضل : اذا مااوله عليج على منو اوله عيل ؟؟
سارة : يابعد روحي انت .. خلاص .. مسافه الطريج وانا يدام عيونك
بوفاضل : ياطول الطريييج
نعم .. هذي حياة سارة باختصار .. عهر وفسق وشقق .. وعلاقات مشبوهه .. وقدرت تقص على بوخالد .. وتستملك قلبه من غير لايحس .. او حتى يدري بسمعتها اللي مدفونه تحت اسامي مستعاره .. يغطيها الليل والحرام ..
حرمت عايله وذبحت اسم الامومه بيدها .. شتتت بيت طول عمره كان ملتم .. باقت وخذت اللي مالها حق فيه .. والباجي كبيير .. كبير ووايد .. لكن الظلم ماينجزى الا ظلم ..
وعقاب الظالم بالدنيا قبل الاخرة ..
الساعه 2 الظهر
بطلت عيوني وانا احس بثقل مو طبيعي .. احس براسي ثقييل حييل .. وجفوني اثقل .. شفت حواليني .. كنت بغرفه روز .. وراسي على ريولها وهي كانت تبجي ..
روز : سيخه .. انتي اكو قووووم !!! الحمدلله
وقعدت تبجي وهي تمسح على شعري .. غمضت عيوني ابي احاول استرجع شويه قوه امتلكها .. بس ماقدرت وقلت لها بضعف حيل وصوت مبحوح من التعب ..
شيخه : راسي يعورني ..
روز قامت ورفعتني من ريولها بمساعده ايدها السمرا .. وريحة العطر اللي عطيتها ياه بعيد الاضحى مالي هدومها .. وشربتني ماي فيه ليمونه واحس بطعم العسل ..
شربته كله .. كنت احس الشمس بخرت كل قطره ماي في جسمي ... وشوي شوي قدرت اقعد على السرير و روز يمي ..
راحت يابت علي بندوله وكوب حليب .. وقربته مني ..
روز : كلي هادا بندول سيخه .. وشربي حليب .. انتي يصير زين ان شالله ..
طالعتها وعيوني غرقت دموع .. كانت روز حنان الام اللي فقدته .. صرت اقعد معاها واساعدها واعيش وياها اكثر من اي شخص ثاني .. صارت قريبه مني حيل ..
لميتها حييل .. وقعدت ابجي .. احس روحي وحيده .. وحيده مالي احد ..
طلعت من غرفة روز وصعدت غرفتي .. حاولت ادق على حصه .. بس ماعندي رصيد .. ومامعاي فلوس ..
نزلت لتلفون البيت ودقيت عليها ..
حصه : اوو
شيخه : هلا حصوص .. وينكم ؟
حصه : انا وسلطان طالعين من البيت .. ماادري عن منور كلمتيها ؟؟
شيخه : لاا والله .. دقي عليها شوفي ..
حصه : اوكي ..
شيخه : ممم حصوص .. تقدرين تمرين على مطعم .. انا وروز ماخلتنا سارة نطبخ شي .. وتوها هي تطلع .. مايمدي نسوي شي على الغدا ..
حصه مسكت اعصابها ماتبي تزيد على شيخه كافي اللي اهيا فيه .. واذا وصلت بتربي هالجلبه عدل : خلاص ولا يهمج لاتحاتين ..
شيخه بتعب وارهاق :اوكيه .. يله باي
حصه : باي ..
صعدت غرفتي وغيرت هدومي .. لبست دراعه مشمسه واسعه ولفيت شيلتي وقعدت ورحت المطبخ ازهب اي شي حق الغدا .. واتسلى مع روز ..
لندن
سناء
قعدت من النوم مكسرة .. اليوم اول يوم بالدوام الصيفي .. وانا مالي خلق حدي ..
طول الاسبوع اللي فات وانا كنت بالمستفى عند محمد .. علاقتنا صارت متينه حيل .. وجنه روتين يومي اذا ماسويته يصير فيني شي .. انام وانا متشوقه اقوم الصبح واقضي اليوم كله معاه ..
حتى مرات احرجه عند ربعه اللي يبون يزورونه ويلقوني عنده .. ماقدر اوصف لكم شعوري شلون اوان معاه .. شي عمري ماحسيته .. مع ولا واحد من البوي فرييند اللي اعرفهم بالكليه وبره الكليه ..
ابتسمت لما تذكرت شلون كنت اهرب له غدا من بريت وبرجر كنج .. بدال اكل المستفى المقرف ..
اقضي اليوم كله معاه .. حتى اني مااحس بالوقت يمر وانا عنده ..
امس سافرت عبير النحس مع خالي .. كانت قاعده على قلبي .. وفهد هذا وطن علاقته فيها .. كنت اخاف عليها .. رغم خبثها ومكرها وتفكيرها .. الا انها غبيه وما تفكر بعاقبه اللي تسويه ..
تذكرت شلون كانت نظرات فهد لها . . كان يقابلها كل يوم تقريبا .. وانا مااعرف عنه الا انه اكثر طالب له علاقات بالجامعه .. وماصادقته الا حاله حال غيره .. ماكان يعجبني لان شخصيته مثل باجي الشباب .. يفكرون بالجانب القذر من هالصداقه .. وهدفه ورى هالعلاقه شي ثاني .. عشان جذيه كنت مااعطيه ويه علشان لا ياخذ حريته اكثر .. ويتجرأ على اشيا ثانيه ..
قمت من فراشي ودقيت على شهد اللي تمت بروحها بعد ماسافرت عليا قبل يومين .. وحطيته سبيكر ..
شهد : الوو
سناء وهي تفرش اسنانها : شهووووود حياااتي ..
شهد بدموع : مالي شغل تيين اليوم تنامين عندي .. مابي اتم بروحي انا بالسكن .. يابعد قلبي عليا والله مااتحمل السكن بلاها احس كل شي بايخ ..
سناء بعد حست بفراق عليا اللي كان مالي عليهم الدنيا ومنسيهم غربتهم .. بس قالت بضحك
سناء : هههه ماعليج منها تلقينها الحين تجهز مستانسه حق عريس الغفله .. الا صج هي قالت اي تاريخ عرسها ؟
شهد : مممم 22 -9 .. تو الناس باقي شهر تقريبا ..
سناء : انا مالي خص فيج ترى بروح ..
شهد : هههه انابعد بقول لخالي يوديني .. وان شالله يرضى ..
سناء : وليش خالج ؟؟ حجزي وروحي بروحج .. مايبالها خالج بعد ..
شهد شهقت : اروح بدون محرم ؟؟؟ ياعيني .. لاااا
سناء باستغراب : شنو يعني محرم ؟
شهد تقدر جهل سناء بالدين ووضحت لها : ممم يعني المرأة ماتقدر تسافر بروحها .. لازم معاها اخوها او ابوها او زوجها .. اي احد من محارمها ؟؟
سناء : بس هذيل محارمها ؟
شهد : لا .. ممم شقولج .. كل اللي يحرم عليها الزواج منهم .. اهلها ومحارمها .. فهمتي ؟
سناء تحس انها تستوعب شوي .. وشوي لا : يعني .. انتي لما ييتي لندن منو يابج ؟
شهد : ماكنت ادري انه مايجوز .. شدراني .. بس الحين ندري ..
سناء سكتت .. تستغرب من شهد شلون متمسكه باشيا وايد ناس نسوها واعتبروها عقد ..
سناء : بس انا بسافر بدون بويز ..
شهد : هههههههههه بويز بعينج .. ماكو سفر الا مع محرم مراح اخليج ..
سناء : ههههههههههه نشوف بعدين .. زوجيني خالج ويصير محرم ونروح العرس ..
شهد : هههههههههههههه حلوووة .. لايخوشك خاااللي خخخخ
سناء : زين انا ببدل واشوفج بالكليه .. سي يو سويتوو ..
شهد : اوكيه حبيبتي .. يله باي
سكرت سناء من شهد بعد ماانطق باب غرفتها : come
وكانت الخدامه مليسيا ( بعد الترجمه )
لقد نظفنا غرفه الانسه عبير والاستاذ ابراهيم .. ووجدنا هذا الظرف في احدى ادراج الانسه .. هل نرميه؟؟
سناء شافت الظفر بيدها .. ظرف مصور ..
فتحته وكان فيه نسخه افلام مصغره فيها صور وايد .. ماكانو واضحين الصور لانهم بالبني القاتم ..
حطتهم بجنطتها الديور الكبيرة بتحمضهم عند المصور بعد ماترد الجامعه وتشوف شنو فيهم .. هالبنت اكيد وراها بلوة ..
