رد: // رؤآيــة // ♥ღ♥ღ نـآكـر آلــعـرؤف مـآ بـيـن بـعـيـنـه ღ♥ღ رؤـؤـؤعـه شـؤي عـلـيـ
الجزء الثاني عشر
شيخه
قاعدة امووووووووووووت من الحرة .. في واحد قاعد يتملق على راسنا .. اليوم امي عازمة عزوز المليق ومها وخلود وحصه اختي على الغدا .. طبعا انا ماكنت ابي انزل اتغدى .. لان بتلوع جبدي من مجابل ويهه .. بس امي زفتني وقالتي هذ اخوج .. وياويلج ان شفتج تتحجين عنه جذيه .. انقهرت .. ليش وايد حاطلته اعتبار .. والحمارة مهاوي تضحك اهي ومنور علي .. هييين
كنت قاعده وانا اكل مجبوس دياي .. مااحب المجبوس. . بس لان عزوز باشا يحبه امي سوته له على الغدا .. وانا بالطقاق اللي يطقني ان شالله مااكل ...
كنت اغرف لي وجني بكسر الصحن .. اشوف منور ومها يطالعوني كل شوي ويضحكون .. حصوص كلت بسرعه وقامت مالها خلق .. وانا نشبت فيني مريوم اوكلها
رفعت عيوني وانا اشوف هالبطه شلون ياكل .. وعقب نزلتها بسرعه .. عشتوا من متى ياكل بشوكه وقفشه .. خبري فيه ياكل بيده وريوله قبل .. لاشوريا ابتسمت وانا اتذكر شكله وهو ياكل يوم كنا صغار .. اووو كان يتهاوش مع الاكل ماياكل .. حتى لما يقوم تشوفون العيش مطشر كل مكاان ..ههههههه
مااقدر على الذرابه انا خخخ مصدق روحه والله
رفعت عيوني فجأة يوم تحجى خلود اخوي
خالد : هااا يما اعزم عزوز واعزم عزوز .. ذبحتيتي يلله كلميه
ام خالد : فدييته يعني مايصير يتغدى معانا ..الود ودي كل يوم يي
عزوز وهو يبعد صحنه : لاعاد كل يوم بخلص ماجلتة البيت .. وبعدين كل مرة بتسويلي مجبوس .. مراح ادش من الباب من المتن
خالد وهو يطلقه لى بطنه : انتا متنان شوي .. يبيلك مشي
عزوز يتصنع : ايييي
ام خالد : خلوووود ... قول ماشالله لااله الا الله .. وين متنان انا مااشوفه الا كل ماله ويضعف زود
عزوز ضحك اللي خلا كل عرج فيني ينط : ههههههههه يما عاد قلنا قصي علي بس مو جذيه
ام خالد وهي تزييد له العيش : زين حبيبي .. ماقلتلي شرايك بالبنت ؟
انا هني قطيت اذني ورفعت عيني ومالي شغل باحد .. كنت ابي اشوف قيس شيقول .. يمكن كنت ابي اقرى عيونه اكثر .. لان احساسي وعيونه مايجذبون
عزوز بابتسامه ونبرة غريبه مافهمتها : اخخخ يما ضربتي على الوتر الحساس
سلطان : ههههههههه عشق الولد خلاص
خالد : لا شكله غرقان لشوشته ههههههههه
عزوز وهو يبتسم ورفع عيونه صوبي بخطفه ووخر : لاتطلعون اشاعات .. الحين امي تروح تخطبها
ام خالد : وهذي الساعه المبار كه .. يوم السعد اللي تعجبك البنت .. وترى اهيا خوش وحده ومن الاهل .. ويابختها يوم ترضى انتا فيها
لا والله .. اخاف الملكه بلقيس وانا ماادري .. تدورن ياني شعور شنو ... ودي اكسر هالصحون كله على راسه .. سكت بس ماتحملت اكثر .. اقوم اقعد مع حصوص احسن لي
الجانب الثاني
عزوز
ماتدرون .. انا من داخل بنفجر من الضحك ... ههههههههههههااااااااي ... احس بنشوه مو طبيعيه .. شيوخ مو بتنفجر وبس .. الا بتنتحر .. ههههه
صج اني بلشت روحي .. بس لاتخافون بطلع منها .. اهم شي الانتصار عليج يالمغرورة
رفعت عيني يوم شفتها قامت .. ومنيرة ومها قاعدين يضحكون ..الله ياحلات الشماته ..
بيني وبينكم .. قلبي عورني شوي .. يعني .. يمكن اهي تحبني .. !!
هااا .. .عزوز .. ينيت اكييد .. شيووووخ تحبك !!!! لو العالم كله يحبك .. اخر وحده تفكر بهالشي شيووخ
وعيت على صوت امي
ام خالد : هاا شقلت .. اكلمهم خلاص ؟
عزوز : اووف طحت فيها ... خلود انقذني
سلطان : انتا بلشت روحك وتحمل ههههه
خالد يكلم امه : توكلي على الله الغاليه .. وانا من الحين بنادي الملاج
عزوز وهو يخز خلود بقهر : انتا جب .. لاتزيد رجاءا
سلطان : انت مو تقول عاجبتك
عزوز يبتسم : اضحك انتوا عاد ماتصدقون خبر .. لا يبا انا مابي اتزوج .. خلوني الحين احقق طموحاتي
خالد : يابو طموحات انتا ههههههههه
ام خالد اللي ضاق خلقها : ليش ياوليدي .. اذا مو عاجبتك ادور لك غيرها
عزوز : فديييتج صدقيني انا يوم اني افكر بهالشي .. بيي اقولج ولا تزعلين
ام خالد : على راحتك حبيبي ..
خالد : يما ابوي وصلاح وينهم ؟
ام خالد : ابوك بالمزرعه .. وصلوح معزوم عند رفيجه على الغدا وعقب بييهم مدرس
نفس الوقت
غرفة شيخه
كنت مسكرة على روحي الباب وابجي .. لاتسألوني ليش .. ماادري .. كنت مضايقه وبس .. ودي اعرف السبب .. كنت احس اني مخنوقه .. وللحظة بس .. كان ودي ناصر يكون هني .. بس لايروح بالكم بعييد .. ناصر الصغير .. ناصر يوم كان عمري 10 سنين .. كان اهوا الوحيد اللي كنت اسنانس معاه .. حتى قبل لا يسافر .. يوم كان بالثنوي ..
كنت بالساعات اقعد معاه ونسولف ونلعب ..
طلعت مذكرتي وكتبت بتاريخ اليوم
مشتاقة لناصر .. اهوا الوحيد اللي يفهمني ..
كتبت هالكلمتين .. وتوضيت وصليت العصر لانه توه اذن .. وقعدت على سيادتي افكر .. شللي مضايقج شيووخ .. الله وياه يتزوج اللي يبي ..
انا مومتاضيه علشان جذيه .. اكيد مو هالسبب .. بس شنو ماادري ..
اخذت قرأني .. وفتحته وقعدت اقرى .. ماادري شكثر .. ماحسيت بطقه باب غرفتي
سكرت القرأن وفتحته ولا الاقي منور ومها واقفين وبيدينهم صحن كيك ...
قلتلهم بانشراح : الله كيكة تمر ؟
مها : اييييييه عجيييبة شيووخ تعالي اكلي ؟
شيخه : منو يايبها ؟
مها تطالع منيرة ووفيها الضحكه عقب قالت : عزيز
لاشعوريا اعتفس ويهي .. بس بعدين فكرت بداخلي اني مالي شغل فيه خير شر من اليوم ورايح : زين يله افصخ ثوب صلاتي واييكم
فصخت الثوب ولبست التوينز الاحمر ولفيت شيلتي ونزلت تحت .. استانست ان الريايل راحوا الديوانيه وهالشي عطاني راحه مو طبيعيه .. قعدنا ناكل ونسولف على كيييفنا
بعد اسبوع
غرفة منيرة
حصه : يله منور .. ينطرونج تحت !!
منيرة بخوف : مابي حصه خاايفه
حصه : من شنو ..!! .. المرة مراح تاكلج .. وبعدين مراح تقعدين مع بدر بروحكم .. خلود وابوي معاكم يله عن الدلع
منيرة : زيين شكلي اوكيه ؟
شيخه : شوي ه تلوعين الجبد بس يمشي حالج
منيرة : اووف شيوووووخ يحماااارة .. لاتخليني اهون الحين
شيخه : ههههههه
حصه : شيوخ ويعه .. تهبلين منور .. يله
نزلت وانا ايدي على قلبي .. خايفة .. اليوم بشوف ام بدر واللي اصرت ان ولدها يشوفني مرة وحده .. عشان ماتطول السالفه لان الدكتور عنده دورة بمريكا وبيسافر بعد يومين
نزلت وانا ميته خوف وارتباك .. وحصوص نزلت وراي .. كنت اتمنى الارض تنشق وتبلعني من الفشلة .. قعدت يم امي بعد ماسلمت على ام بدر اللي هللت ورحبت فيني .. شكلها من حريم اول اللي تخز البنت من شباصتها الين دلاغها مكرم السامع .. وماتعطيج فرصه ترفعين عيونج .. تخيلوا طول الوقت راسي كان تحت .. حتى اني قمت اعط خيوط الزوليه من الملل .. وماوعيت الا على حصوص تناديني
حصه بابتسامه : منيرة .. يله لبسي ابوي يقولج .. عشان بتدشين الدوانيه
رفعت عيوني وجني استنجد بحصوص وبصوت واطي : بروحي !!
وام بدر تضحك مستانسه : أي يما بروحج .. ترى وليدي ماياكل مسالم هههههه
وع وع .. سخييفة .. وليش مستانسه واايد يعني ... اوف
صعدت ولفيت شيلتي السودا ونزلت تحت ووقفت عند باب الدوانيه
طقيت الباب وطلعلي خالد
خالد بابتسامه : حيااج
دخلت واحس الجو كله متكهرب .. ابي ارفع راسي اشوف الدكتور اللي خابيني عليه والكل يتمناه بس مااقدرت ..
تقولين هالريال عمره ماشاف بنت .. يعني ادبا نزل عيونك شوي . خلني اخذ راحتي
خالد : منيرة
رفعت عيوني صويه : هلا
خالد : هذا هو بدر .. اللي بقلبج قوليه .. تبين تسألينه شي ؟
عقبها تكلم الدكتور : منيرة شلونج ؟
منيرة : بخير الحمدلله
الدكتور : شكثر باجيليج وتخلصين ؟
منيرة : اخر كورس عندي الكورس الياي
الدكتور : وناويه تشتغلين ؟
منيرة باستغراب : ايه
الدكتور : ممم بس انا ماافضل المرة تشتغل ؟
استغربت اكثر : بس انا بشتغل ..
الدكتور وجنه حب الدور وصدق روحه : ماعلينا من هالاشياء نتفق عليها عقب .. انتي جم عمرج ؟
منيرة من غري نفس .. اللهم طولج ياروح .. يخطب ومايدري جم عمري : 21
الدكتور : اها .. عيل ليش قاوليلي 18 ؟؟
منيرة .. بقلبها .. الحمدلله والشكر : لا
الدكتور : زين انتي تعرفين اني دكتور
منيرة بقلبها : لا ياشيخ .. صج والله ؟؟ توني ادري .. بلا غرور
الدكتور : ودوامي شلون فيه سفر واجتماعات .. يعني ابيج تكوين داريه بالاشيا كلها
منيرة .. ترى ملييت ودي امشي
تخيلوا قع ربع ساعه بس يسولف عن روحه وعن رساله الدكتوراه اللي يبي يقدمها وعن الطب .. الظاهر غلطان بالعنوان .. هني مو منظمة الصحه العالميه
ابو خالد : ها منيرة .. يبا في خاطرج شي تقولينه ؟
ابتسمت غصب : لا .. يبا بمشي !!
خالد : يله منيرة قومي
قمت مع خلود وانا لاااايعه جبدي .. قالوله ابي اتزوج كتاب علمي انا .. اووف
صعدت فوق وخلود يتحرش فيني وانا مالي خلقة ... حدي لايعه جبدي واول مادخلت غرفتي شيوووخ كانت لي بالمرصااد
شيخه : هاااا بشري .. شلون العرييس ؟؟
منيرة: اووف سكتي بس .. ملييق وتافه واربع وعشرين ساعه يتحجى عن الطب
شيخه بتعفيسه ويه : يعني مو موافقه
منيرة : ماادري شيوخ .. طلعي مالي خلقج ترى
شيخه : انتي ماينوخذ منج حق .. اروح حق خلود وحصوص احسن
نزلت بعد ماسمعت ان ام بدر راحت وطيراااان على الصاله .. ابي اعرف اخر التطورات
حصه : والله المرة ماعليها كلام ..
ام خالد : شكلها منور مو مرتاحه انا حاسه جذيه
ابو خالد : لاحد يأثر عليها خلوها بكيفها تقرر
خالد : والله انا اشوفه خوش ريال .. ماادري مافيه شي يعيبه ..
ام خالد : خوها تفكر جم يوم وعقب حصوص كلميها وعرفي رايها بالموضوع
غرفة منيرة
الساعه 2 ونص
كنت منسدحه على فراشي افكر .. ماادري هالريال كرييه .. تعرفون .. طول عمري احلم بريال رومانسي وشكله هذا مايعرف شكل الرومانسيه
عالاقل .. يكون عنده اسلوب بالكلام .. يعني اهوا ياي يخطب مب ياي يدور وظيفه قاعد يعرفنا على سيرته الذاتيه وجنه مو مصدق انه دكتور .. لا ومن اسلوبه تحسون انه يتمنن علينا .. يعني تحمدون ربكم ان خاطب بنتكم
اووف .. انا ليش حظي جذي .. ياليت ييني واحد نفس سلطان ريل حصوص .. يحبها ويحطها بعيونه .. وعمرنا ماسمعنا حصوص اختي تشتكي منه بشي ..
قطع تفكيري صوت مسج ... استغربت حزته .. منو بيدزلي هالحزة .. فتحته وكان من رقم غاب عني شهور .. لكنه ماغاب عن خيالي ابد
(( منيرة .. اسف على الازعاج .. انا صح وعدتج اني ماازعجج .. بس سؤال واحد .. انتي مرتبطه ؟؟؟))
هذا شيبي الحين .. ناقصتك انا .. مسحت المسج .. وحطيت التلفون بالدرج مالي خلق شي .. حاولت انام .. تقلبت يمين ويسار .. بس ماياني النوم ..
لاشعوريا فتحت الدرج وطلعت تلفوني .. كنت مفكرة ارد عليه واقوله لا .. بس اكتشفت اني ماسحه المسج .. وماعرف الرقم عدل .. قلت بقلبي احسن .. وتوني كنت بحطه بالدرج ولا يوصلي مسج
(( بليز .. بس ابي اعرف هالشي .. واوعدج ماازعجج بعد ))
رديت عليه
(( لا ))
وسكرت التلفون وحطيت راسي ونمــــــــــــــــــــــــــتتتت
بعد اسبوع
طبعا بدت الدوامات وصلوح ماينشاف .. مسكيين خايف ومرتبك .. وان شالله تعبه مايروح بلاش .. اما منيرة فهي اكثر وحده فينا مرتاحه .. لان عندها ثلاث مواد بس ..
صح ماقلتلكم .. تم رفض الدكتور بدر من قبل السيدة منيرة .. ولاسباب مجهوله هههه
خبله منووور .. اكو احد يررفض دكتور .. بس بيني بينكم بعد الواحد مايقدر يعيش مع انسان مليق .. مم مثل عزوز مثلا
هههه دايما هالريال في بالي .. اضرب فيه امثله خخخ
المهم .. انا الحين بروح الجامعه وادعولي عندي امتحاان
الساعه 9ونص
كلية منيرة
كنت امشي مع ديمه طالعه من مبنى علم النفس .. وهالمبنى فيه ثلاث بيبان وكل باب بينه وبين الباب الثاني ممر .. يعني حوسه .. المهم .. سلمت على ديوم لان عندها محاضرة في هالمبنى .. ومشت
واول ماقربت من الباب بفتحه .. لقيت فيصل يركض ويفتحلي الباب وبابتسامه .. الصراحه تضحك ..
طلعت وانا رافعه راسي فوق وماسكه ضحكتي ومخبيتها ببتسامه غرور .. بالضبط مثل ماتسوي شيووخ هههه نتعلم منها
ويوم قربت من الباب الثاني .. هم فتحه لي فيصل .. رفعت عيني وطالته باستغراب .. وهو يبتسم ..
هههه مو صاحي هالريال .. ويوم قربت من الباب الثالث .. سرعت شوي وحطيت ايدي على ايده من غير لااحس ..
طالعني وهو يضحك .. ورفع ايده فوق وانا انحرجتتتتتتتت حدي ... انق ويهي الصراحه .. فتحت الباب بمشي ولا اهوا يناديني
فيصل : منيرة ؟
وقفت من غير ماالتفت : نعم ؟
فيصل : اذا خطبتج .. بتوافقين ؟؟؟؟؟
الساعه 4ونص العصر نفس اليوم
امي وابوي وشيوخ بالمستشفى ... حصوص دخلوها العلميات بعد مافضحتنا بالبيت .. وكلنا ناطرينها تولد .. انا اضطيرت اتم في البيت لان سلوم ومريومه عندي .. مهاوي كل شوي تدق تسأل وخلود عقب مارد من الدوام لبس وطلع يلحقهم
وانا تميت في البيت .. افكر بس بكلام فيصل .. يا الله .. كش شعر يمي وهو يقول هالكلمه .. احرجني .. ومن كثر ماكنت مرتبكه .. مشيت عنه ابي اوصل بس أي مكان اتم فيه بروحي ..
منور .. اذا خطبج بتوافقين ..!! .. لا
ليش لا ؟؟ ... هذا واحد راعي بنات شبي فيه ؟؟ .. أي صح لاتنسين منور .. لاتنسين
قطعت تفكيري بفيصل بقوة .. وقعدت مع مريوم وسلوم بالصاله اهما يشوفون توم وجيري وانا احس جنه انا وفيصل .. يطاردني بكل مكاان .. يه في بالي اكلم ديوم واقولها ..
اخذت تلفوني ودقيت عليها
ديمه : اهلا اهلا .. لاتقولين لي ماسويتي البحث
منيرة :لا والله ماسويته اختي حصوص بالمستشفى تولد وقاعده احاتيها
ديمه : صج ؟ الله يقومها بالسلامه ان شالله .. يله هاانت
منيرة : على قولتج
ديمه : منور ..!! في قلبج شي .. قولي قولي ادري ترى ؟
منيرة : هههههه دايما جاكتني
ديمه : شفتي شلون ههههه
منيرة سكتت تاخذ نفس عشان تنطق بهالاسم وعقب قالت : فيصل
ديمه باهتمام : شفيه بعد ؟
منيرة : اليوم بعد ماطلعتي مني .. قالي اذا بخطبج توافقين ؟؟
دميه بصراخ : هااااااااااا !! قولي والله
منيرة : والله العظيم
ديمه : وانتي شقلتيله ؟
منيرة : ماقلت شي .. انا زين قدرت امشي عقب كلمته .. احرجني
ديمه : وانتي شرايج ؟
منيرة : مايبيلها راي ديوم .. اكيد لا
ديمه : ليش ؟
منيرة : تبيني اتزوج واحد راعي بنات .. مابقى بنت بالجامعه ماكلمها .. ينيتي ؟
ديمه : منور .. اقولج شي .. لاتستعيلين بالرد .. فيصل من هذاك الكورس اللي شافج فيه واهوا متغير .. كل البنات يقولون .. حتى لاحظي انتي هالشي .. دايما قبل كنا نشوفه منزرع بالسكويرات حوالينه بنات الجامعه .. والحين مانشوفه غير داش محاضرته ولا طالع منها .. او ... يلاحقج من غير ماتحسين
منيرة : بس هذا مايمنع انه يسوي هالشي بس عشان يكسب رضاي .. ويمكن بعدين يرد لطبيعته
ديمه : مااقدر اجاوبج على هالشي .. لان مالي علم فيه .. انتي بروحج تقدرين تعرفين اذا يحبج ولا لا .. اذ اهوا صج يبيج ولا بس شي يحصل عليه وانتهينا
منيرة : مالت عليج .. خليتيني اشك اكثر ههههه
ديمه : ههههه منور .. لاتستعيلين وفكري زين ..
منيرة : ان شالله .. يله هذي شيوخ خط ثاني .. اكيد حصوص ولدت .. اشوفج باجر اوكيه
ديمه : اوكيي حبيبتي .. يله باي
منيرة : باي
شيخه : منو تحااجين صارلج ساعه
منيرة : بسم الله توج داقه .. ساعه شنو ؟
شيخه : هههه زين اتغشمر معاج يالخوافه .. يله قولي مبروك ؟
منيرة بفرح : ولدت ؟
شيخه : ايه وياابت ولد يهبل .. وبيسمونه يوسف
منيرة : صج .. وناااااااااااااسه باركيلها عفيه عني ..
شيخه : اوكي .. والله وزادت همومج هم .. وياج ياهل بتسهرين معاه الليل والنهار ههههههه
منيرة : ليش وانتي شمهنتج مو خالته بعد ؟
شيخه : لا يماما .. انا الياهل عدوي اللدود .. ههههههههه
منيرة : اقول مالت بس .. يله متى بتييون ؟
شيخه : انا برد مع خلود وامي بتم شوي .. اقولج حطي اغراص حصوه بجنطه عشان انتي دورج الحين تروحين
منيرة :اوكيه .. يله باي
شيخه : باي
بعد اسبوع
بيت ام خالد
الزحمه كل يوم .. حريم داشين وناس طالعين .. غير رفيجات حصوص يباركولها ورفيجات امي واهلنا وييرانا اوووو واهل سلطان .. بيتنا صاير ازعاج مو طبيعي .. والبشارة الاحلى .. ان مريوم وسلوم بينامون عندنا شهر كااااااامل .. ياحبيبي .. مو ناقصه ازعاج ولا لوعه جبد ..
بس صج صج .. يوسف طالع كله انا .. يههههبل .. فديييته ابيضاني وعيونه فاتحه علي احم .. وكلمن شافه قال عنه حلو .. لاتقولون مغرورة . .بس ياربي الصج ينقال هههه
الخميس
خالاتي كلهم كانو هني .. وعيالهم وحريم عيالهم والاحفاد .. باختصار .. كان بيتنا زلزال الا .. والبنات قاعدين برغفة حصوص اللي تطل على الصاله .. وطبعا الجاي والقهوو والحلو .. ولازم نكشخ ونلبس وانتمكيج وننرز معاهم ..
انا ومهاوي وشهد ومنيرة كنا بالمطبخ .. نسخن القهوة .. لان ناس مااعرفهم رفجات امي يايين
شهد : بنااااااات ادعولي مابقى شي على الفاينل
منيرة : يماا منج باجي شهر وشوي ..
مها : خليها مسكينه .. النسبة وماتسوي ..
شيخه : هههه حرام طلع فطر براسكم انتي وصلوح من الدراسه
شهد : اقول جب بس
الجميع : ههههههههههههههههههههههههه
خالد اللي دش من غير ماينتبه على شهد : مهااوي ..!!
شهد بسرعه نزلت تحت الطاوله وانخشت .. ومها تكلم خالد : اطلع خالد . فيه بنات
خالد للحين واقف : ماكو احد وين ؟
مها :شهد هني .. اطلع
خالد اللي كان مسطل : هاا .. اسف
ورجع ورى عند الباب .. وكمل : تعالي زين بكلمج
مها راحتله وهي تطلقه على جتفه : لاتدش مرة ثانيه من غير لاتطق الباب
خالد : ماادريت والله ..
مها : لا والله .. شايف عندنا حريم ؟؟
خالد بخبث : تغااارين ؟
مها قلب ويهها الوان : انا ...!! اغار عليك ؟؟
خالد : ايه وتموتين فيني .. وتحبيني وتعشقيني هههههههههه
مها : ههههههه لاتصدق روحك بس ..
خالد : يعني ماتحبيني ؟
مها وهي تنزل راسها : لا
خالد يرفعه : بس انا احبج .. واموت فيج .. واعشقج ياامغمازات
مها : هههههههههه .. حاط دوبك ودوب غمازاتي انتا ..
خالد : ههه شسوي .. قاهريني .. ودي اقرص فيهم بس اخاف انطق ههههه
مها : زين روح يله البنات ينادوني
خالد : زين بروح .. اقولج .. توه واحد داق علي .. يعرفني بنفسه يقول اسمه فيصل ..و يبيني بموضوع خاص .. ويوم سألته قالي يبي يناسبنا .. عاد انا فهمت منه انه يبي منور اختي ..
مها : صج .. من ولده ؟
خالد : والله ولد ناس وعايله زينه .. ولد الــ .......
مها : ماشالله .. زين وشنو قلتله ؟
خالد : قلتله خل الاهل يدقون ويصير خير ..
مها : وبعدين ؟
خالد : عطيته رقم بيتنا .. ابيج تقوليلي اذا دقوا وسألي منور من غير لاتلاحظ .. عن اسمه .. شكله وياها بالجامعه
مها : هاااا .. يعني حب من اول نظرة .. والله منور تنحب .. هههههه
خالد : اقول جب بس عن هالسوالف .. ماعندنا بنات يتزوجون عن حب
مها : وااااي بسم الله .. كليتني هههه حمش الريال
خالد بنبرة : اييه شعبالج . يله دشي داخل لاحد يشوفج .. بسرعه
مها تضحك : زييييييين ههههههه
الساعه 6 ونص
اغلب الحريم راحوا ومابقى احد .. غير مهاوي وخالتي ناديه كان ويهها معتفس طول القعده ماانددري شفيها .. شكلها متاضيقه بس ماادري شنو ..
امي قعدت يمها وبصوت واطي : شفيج ناديه عسى ماشر ؟
ناديه : الا الشر بعينه وعلمه ياام خالد
ام خالد : يخسى الشر .. قومي نقعد بالاستقبال وقولي السالفه
طلعت امي وخالتي ناديه وادخلوا دخل وانا مهاوي ومنيرة قاطين عيونا وواذونا وموفاهمين شي ..
شيخه : مهاوي شفيها خالتي عسى ماشر ؟
مهاوي : والله ماادري .. بس على مااظن .. زواج نصور
منيرة بتملل : مرة ثانيه .. هالناصر مايابلكم الا الهم
مهاوي : ماادري اقول يمكن .. لان مااشوفه ينام في البيت .. بيني وبينكم شكله متهاوش ويها زوجته
شيخه : وشنو السبب ؟
مهاوي : ماادري. . بس مثل هالزواج تزقعي انه مراح يستمر .. الله يستر .. والله محد كاسر خاطري غير جرااح
ضايع بينهم ..
شيخه : مسكين هالولد يعور القلب
مهاوي : أي والله
منيرة : وشنو الحل الحين ؟
مهاوي : والله علمي علمكم .. اصلا مو قاعدين نشوف نصور عشان نكلمه بالموضوع .. ونعرف شسالفه
سكت .. ليش نصور تسوي جذيه ليش .. ليش ماتفكر قبل لاتسوي أي شي بحياتك .. ليش تبهدل امك وابوك وولدك بالهطريقه .. تبون الصج . .قهرني .. وقهرني زياده برودة وعدم مبالاته .. مو هذي اللي يحبها ويبيها .. ليش قاعد يتهرب الحين لييش ؟؟!!!
دش علينا خلود فجأة : منور .. امي هني ؟
منيرة : امي تسولف مع خالتي .. بالاستقبال .. ليش ؟
خالد : عزوز يبي يبارك لها عن حصوص ..
منيرة : شكلهم العيايز عنده موضوع مهم
شيخه بقلبها .. مسوي روحه سنع ومسنع ..
خالد : زين سلطان وينه ؟
شيخه : داخل عند حصوص بالغرفه
راح خالد صوب غرفة حصوص وطق الباب ودش قعد شوي وعقب طلع
دقايق ولا يقولنا خلود : بنات دشوا داخل .. عزوز بيدش يله
طلعت وانا فارة بوزي كالعاده .. وقعدنا بالصاله الكبيرة .. ننطر عزوز يطلع
ربع ساعه ولا يصرخ خلود : طلعوا افرااااج .. ويبولنا جاي بالديوانيه يله
منيرة :مهاوي جنه ريج اليوم وايد ماخذ راحته
مهاوي : هههه زايد حبتييين
شيخه : انا بقوم اروح عند حصوص تعالوا
مهاوي امسكت منور من ايدها : لا انا بروح ويا منور نسوي جااي ونلحقج
شيخه : اوكي
رحت عند حصوص واسولف معاها شوي واول مادخلت قالتلي
حصه : تعالي شيوخ اوريج شنو يايب عزوز حق يوسف
حاشني الفضول عاد .. ابي اعرف شنو يايب بس سويت روحي مو مهتمه وقعدت عند سرير يوسف الاعبه
حصه : فاتحله حساب باسمه فدييته وحاطله فيه 500 دينار
بطلت عيوني : من وين له ؟
حصه : قالي سلطان انه يتاجر بالاسهم .. وماشالله الفلوس اللي عطته ياهم امي استثمرهم عدل ..
من يومه يفكر ويعرف يستثمر كل شي بحياته .. والدليل انه عرف يستثمر امي .. وياخذ منها ..
سكت ووقعد ت اسولف مع حصوص شوي واقولها عن نصور وامي وخالتي
الجانب الثاني
مها : منور .. تعرفيه ؟
منيرة ارتبكت : أي وياي بالجامعه .. بس مو تقولين حق خلود
مها : ليش ؟ ..
منيرة : اخاف يفهمني غلط .. مهاوي والله مااكلمه ولا عمري قربت صوبه .. اهوا !!
مها : اهوا .. مستلطفج ؟
منيرة : ماادري
مها بابتسامه : منور .. اهوا الظاهر ياي يخطبج .. يعني انتي شايفته وتعرفينه ..اذا موافقه مبدئيا اقول لخالتي تقولهم ييون .. شرايج ؟
منيرة : ماادري
مها : خلص فكري على راحتج .. وعطيني خبر ..
منيرة سكتت وهي تصف الستكانات بالصينيه
مها : منووووور .. قصص حب من ورانا هههههههه
منيرة : جب ههههه طلعي اشاعات ناقصه انا
في صاله الاستقبال
ام خالد : ولا تحطين ببالج ياوخيتي .. كلشي بيتصلح .. انتي كلمي نصور وقوليله خالتك تبيك باجر وخل يمرني وانا اشوف شسالفته
ام ناصر ببيأس : مااظنتي هالولد بيتسنع . الله يستربس
رن التلفون
ام خالد : الو
ام أحمد : الو السلام عليكم
ام خالد : وعليكم السلام والرحمه .. هلا والله
ام احمد : ام خالد موجوده ؟
ام خالد : معاج ؟
ام احمد : والله ياوخيتي انتي ماتعرفني .. انا ام احمد ناس دلونا عليكم .. وحابين نتعرف عليكم زيادة
ام خالد : الساعه المباركه ..ياام احمد .. تشرفنا فيج
ام احمد : مابي اطول في الكلام وازيد .. انا الصراحه يشرفنا انه نناسبكم ..ونخطب بنتكم منيرة لولدنا فيصل ..
ام خالد باستغراب : حياكم الله الغاليه .. بس من بيته انتو ؟
ام احمد : الصراحه انا عمته اخت ابوه .. فيصل امه متوفيه واحنا بيت الـ ,,,,,,,,,,,
ام خالد : والنعم والله .. ماعليكم كلام .. بس الولد يشتغل وجم عمره ؟
ام احمد : هذا اخر كورس له بالجامعه .. واعمره 23 .. واحنا شارينكم ونتمى قربكم والله
ام خالد : ماعليج شرهه ياام احمد .. انتوا عطونا فرصه نسأل عن الريال ونرد لكم خبر
ام احمد : صار يااوخيتي .. انا بدق عقب يومين جذيه ..
ام خالد تضحك : ههه يومين مايمدي ..!!
ام احمد : بيني وبينج نخاف البنت تطير من ايدنا والولد يبيها
ام خالد : خير ان شالله دقي بعد يومين ونعطيج الخبر
تتمة الجزء
الخميس
الساعه 8و45 دقيقة صباحا
رن تلفون الصاله في بيت بوخالد .. بس طبعا الكل نايم .. ولا احد رد .. ودق مرة ومرتين وثلاثه
ام خالد وهي تقوم مخترعه من نومها : بسم الله اللهم اجعله خير يارب ..
بوخالد : هذا التلفون يرن .!!
ام خالد : ايييه .. خير ان شالله من بيدق هالحزة ..!!
قام بوخالد من نومه والحقته ام خالد ونزلوا تحت الصاله
بوخالد : الو .. .. منو ؟؟ .. هلا والله .. شلون ؟؟ لاتقولين .. حسبي الله ونعم الوكيل .. ايه قاعده لحظة
ام خالد : خرعتني .. شصاير .. عسى ماشر ؟
بوخالد وهو يعطيها التلفون : هذي ام ناصر تبيج .. كلميها
خذت التلفون منه وهي ميته من الخوف .. ناديه ماتدق هالحزة الا اذا صاير شي جايد الله يستر : ها ناديه .. عسى ماشر شصاير ؟
ان ناصر : شينة الحلايا . بنت الاجانب سافرت يارضيه ؟
ام خالد : منو ؟!!!!
ام ناصر : مرت ناصر .. ماخذه كل اغراضها من البيت وطالعه ونصور حاول يتصل عليها مااحصلها .. كاتبتله ورقه تقول فيها انه يطلقها وماتبي تعيش معاه .. عسى ربي لا يوفقها قلبت مستقبل الولد فوق تحت
ام خالد اللي حست بضيق .. وطول عمرها شايله هم عيالها وعيال خواتها كلهم .. صح اهي مو الكبيرة بس اهي اللي قايمه في العايله كلها .. اهي اللي تجمعهم ووتصلح بينهم .. وحز بخاطرها اللي صار بناصر .. : لاحول ولا قوة الا بالله .. زين لاتبجين مو زين ياناديه البجي مايسوي شي ... وناصر وينه ؟
ام ناصر وهي تمش دموعها بطرف ملفعها : طلع من الصبح ماادري عنه .. شفتي يااوخيتي .. شفتي شقاعد يصير بوليدي وحيدي .. عين ماصلت على النبي .. وابوناصر متحلف مايبي يشوف ويهه بالبيت .. سود ويوهنا هالولد .. ماغير ياب هالجراح اللي مايدري عنه خير شر ..
ام خالد : خلص .. دقي عليه وانا يايتكم الحين .. قوليله خالتك بتكلمك .. فاطمه درت ؟
ام ناصر : لا والله ماقلتلها تدرين اختج ماتحمل .. وخفت يرتفع السكر عندها وتتعب
ام خالد : زين تسوين .. يله شوي واكون عندكم ان شالله
طلعت ام خالد مع بوخالد وراحوا بي ناديه .. ينطرون ناصر يي من بره .. والكل اعصابه متوتره . وام ناصر ماغير تلم جراح وتبجي على حظ ولدها بهالاجنبيه اللي هدته وراحت
ام خالد : تعوذي من بليس ياناديه .. مايصير جذيه البجي مابيرد شي
بوناصر : علميها ياام خالد .. وياليت اللي قاعده تبجي عليه يستاهل .. ذيحنا هالناصر ماادري شنسوي فيه .. قلنا الله رزقنا بولد يشيل اسمي ويشيهل هالحمل عني .. طلع اردى من البنات لا يتحمل مسؤوليه ولا يتحمل شي .. والله ان بناتي يسوونه ويسوون طوايفه هالهيس
ابوخالد : تعوذ من بليس يابوناصر .. هذا مهما يكون ودلك والظفر مايطلع من اللحم .. وترى ناصر للحينه طايش ومايعرف مصلحته وموعيب الواحد يغلط .. انتوا بس اقفوا معاه ولاتلومونه وان شالله كلشي بيتصلح
ربع ساعه ولا ناصر داش .. ووويهه كان صج تعبان وماله خلق
ناصر : السلام عليكم
بوناصر : وعليكم السلام .. هاا وصلت الاميرة المطار ؟
ناصر رفع عينه بعين ابوه وعقب نزلهم ماله خلق هواش
ام خالد : ناصر ؟
ناصر : هلا خالتي ..!
ام خالد : تعال ابيك شوي .. بكلمك
ناصر : ان شالله
ام خالد : لا موهني .. قوم ودي ريقني بمطعم جذيه انا وامك .. ونتحجى على راحتنا
ناصر اللي صج ماله خلق .. بس عاد مايقدر يرد خالته رضيه .. كلشي ولاخالته .. وعالاقل يفتك من معاير ابوه له
طلعوا الثلاثه بعد ماوصت ام خالد ناديه ماتقول شي .. ولاتبجي عشان يعرفون يتفاهمون مع ناصر
وبعد ماوصلوا مطعم حلو جذيه كان على البحر .. وهادي ومافيه احد .. قعدوا الثلاثه على الطاوله
ام خالد : الله شهالمطعم الحلو .. عاد ياويلدي .. احنا جنه قلنالك يواعه ومو متريقين .. مانبي نشوف المطعم بس .. نبي ناكل .. يعني ماني خابرتك بخييل
ناصر ماقدر يمسك روحه : ههههههههههههههههههههه من عيوني ياخالتي .. امروا ..!!
ام خالد : والله احنا مانعرف .. اطلب لنا على ذوقك .. بس هالله هالله بالجباتي والبيض والبلاليط والاكل الزين
ناصر بارتياح .. شكثر يحب خالته : خالتي .. ترى احنا بمطعم راقي مو بقهوة شعبيه
ام خالد : ههههههه .. زين يايما اطلب لنا على ذوقك من اكل هالانجليز اللي ماينبغى اللهم زيد النعمه
هني ام ناصر ماقدرت تمسك روحها : لاتييبين طاري الانجليز الله ياخذهم
ام خالد وناصر : هههههههههههههههههههههههههههه
وبعد ماكلوا وخلصوا وسولفوا ... حتى ان ناصر نسى بلوته مع جيني وامه كانت تضحك ومستانسه
ام خالد : شوف ياوليدي .. انا بقولك كلمه .. انتا تزوجت وحده على كيفك بارادتك .. وكنت تبيها .. ومحد فينا عارضك ولا وقف بطريجك .. قلنا هذا اختياره .. والحين بعد ماتركتك وسافرت ديرتها وطلبت الطلاق .. بعد محنا غاصبينك ولا بنلومك على شي .. بس ابيك تعرف شي واحد ياناصر .. عمرك لاتكون اناني وتفكر بروحك .. وقبل لاتتصرف أي تصرف .. شاور غيرك وادرس الموضوع زززين .. وشوف باجر شنو بتكون نتايجه وتوكل على الله ..
هالمرة اعتبرها تجربه فاشله وعدت على خير .. وانت العمر يدامك وتوك صغير والف بنت تتمناك ..
ناصر كان يسمع خالته بهدووء .. وارتياح عقب قال :فديتج ياخالتي محد يفهمني غيرج
ام خالد : وامك ترى ماتبي تشوفك الا مرتاح ومستانس بحياتك .. ترى امك ماتنام الليل ولا النهار اذا كان مزعجك شي .. ياناصر فكر بهالام والابو .. قبل لاتسوي أي شي ..
طالت الجسله مع كلام ام خالد اللي مثل العسل .. حتى نصور الخربان يحبها ويحب القعده معاها .. تريح الاعصاب وتهدي النفوس .. وبعدها قاموا اهما الثلاثه وكلن رجع بنفسية احلا
العصر الساعه 5 ونص
غرفة حصه
بيت بوخالد
شيخه : احلف ؟؟
خالد : والله العظيم .. هذا اللي صار
حصه : والحين شسوا ؟ طلقها ؟
خالد : اعتقد ..
منيرة : هالريال متى بيعقل ... والله كبر على هالسوالف
خالد : الله يهدي الجميع
صلاح يدش : مرحبا يااخواني الكرام
شيخه : احم .. اقووول .. شمطلعك من الكهف ؟
خالد : لا قولي شمطلع الحيه من وكرها اليوم ..!!!
منيرة : كح كح كح .. غبااااااااار يطلع منك صلووووح هههههههههههه
صلاح بكسرة خاطر : سكتوواا .. احس اني مو شايف الدنيا قروون هههههههه
حصه وهي تضحك : تعال بس شييل يوسف شوي ترى ماشافته زيين
صلاح وهو ياخذ يوسف من حصه ويضحك : فديييييييييييييييته شبييه خاله
ويعطيه بوسه قوويه على راسه
شيخه قامت وتخصرت على راسه : اووف لاتبوسه جذيه تقززه بلحيتك حراام .. وبعدين يايماما هذا شبيه خالته لاتلزق روحك رجاءا
صلاح يوخر يوسف عن ويهه ويأشر على التلفزيون اللي كان مطلع برنامج عالم الحيوان ويأشر عليه : شوووفي هذا شبييهج .. لاتتلزقين في بني البشر .. حدج شواذي
خالد وحصه ومنيرة ماقدروا يسكتون وضحكوا : هههههههههههههههههههه
شيوخ قامت تركض ورى صلاح وهذاك الثاني ينحاش وهو شايل يوسف ويركض
حصه : حسبي الله عليكم .. يييبو ولدي انتوا الاثنين .. شفيكم ينيتواا !!
منيرة : شششش بس سكتوا شنو هذا .. اقول خلود .. وشنو بيسون عشان جراح ؟
خالد مو قادر يسمع من صراخهم : هااا !!
حصه : شيووووووووووخ بس قعدي عن الخبال
شيوخ وهي معصبه : شمعنى تزفوني انا .. خلود زف صلاح !!!
خالد : صلوح عن الينون .. اعقل لاتحط عقلك بعقلها !!
شيخه شهقت : لييييش .. قالولك عني مينونه ؟؟
خالد بضحكه مكتومه : ولييييي .. شيفكنا الحيين .. لاحبيبتي منو قال .. قص لسانه اللي يقول عنج ميونه .. محشومه يالشيخه ههه
شيخه بنرفزة : تطنز هاا .. اييه كلنا انا اللي انزف .. وبالاخير صلوح يطلع الصح .. انا اقعد بغرفتي وايد ابرك
صلاح : كلولولولولوش .. من زماان جان رحتي وفكيتينا هههههه
حصه : اتوقع هالاجنبيه لو هامها ولدها جان عالاقل خذته معاها ولا طالبت فيه .. اصلا هذيل الاجانب مايهمهم عيالهم ..
منيرة : صح .. الله يعينه هالولد .. يكسر الخاطر
طلعت من غرفة حصوه . .وانا ميته قهر .. ليش كل الزف يصير على راسي انا .. اوووووووف
طلعت بويهي مريووم بنت حصوه وهي تمسح عيونها شكلها توها قاعده من النوم
مريوم : خالتي شيخه وين امي ؟
شيخه وهي تأشر : هناك روحي
مريوم اللي قاعده تبجي شكلها تعسرت : ابييييييييييييييييييييي اميييييييييييييييي
شيخه : اشششششششش بس بس صفارة انتي .. يبا بيتنا كله دورين مراح تضيعين لاتخافين .. روحي هناك امج بالغرفة من بيبوقها ..
مريوم اللي اذا افتحت حلجها شيسكره : واااااااااااااااااااااااااااااع
شيخه بقلبها .. ياحبيبي .. شهر بتمون هني .. ياسلااااااااام على الهدوء اللي بنعيش فيه .. اقول ذلفي عن ويهي مالي خلقج
وصعدت فوق غرفتي وانا لااايعه جبدي من كل شي .. مم من بدا هالدوام وانا مالي خلقه .. على كثر مااستانست بالجامعه اول مادشيت على كثر مااحس بالملل وضيقة الخلق الحين ...
طلعت دفتري وفكرت اكتب شي حق شخص .. أي شخص بخيالي .. يعني اتكلم فيه معاه بحريه ادري بتقولون مينونه بس شسوي .. ملل
كتبت بتاريخ اليوم :
الى من اهوى .. اليك حبيب قلبي .. ومالك احاسيسي ..
انني احتاجك .. واحتاج لقربك .. اتعلم كم اشتاق لك حتى وانت معي ..!!
اتعلم كم اسعد حين ترفرف بكلماتك حول اذناي .. كم اتمنى قربك جنبي .. ارجوك لاتغب
ضحكت بعد ماكتبت هالكلمتين .. الصراحه احس اني مينونه رسمي .. لاحد يققراهم بس يصدق ..
سكرت الدفتر وفكرت اكسر الروتين .. رحت غرفة منور اختي واخذت منها جم بلوزة وجيينز ولبستهم وتمكيجت وسويت شعري .. وشغلت تلفوني على الفيديوا وقعدت اقلد اصاله باغنيتها اليديده اكتر من اللي انا بحلم بيه . . هههه لاتشوفون شكلي ..يموت من الضحك .. حالوت اقلد بنرة صوتها بس والله صعبه .. نسيت اقولكم ترى انا بعد صوتي حلو .. مرات وايد امي تقولي تعالي غنيلي قومي ارفعي البوشيه ولا الاغاني القديمه حق ام كلثوم .. امي الوحيده اللي تحب تسمعلي وحصوص اختي .. والباجي يطفروني يقولون صوتج نشاز .. مع ان الكل يقول صوتي حلو .. ماعلي منهم .. اعرف ان صوتي حلو ..
مم بعدين رحت اخذت دشداشه وغترة من غرفة صلوح .. ولبستهم ورسمتلي شنب مثل راشد الماجد وقعدت اغني المسافر راح .. هههههههه
صج صج شكلي كاااااااااان نكته ماحصلش .. عقب رن تلفوني وكانت امل رفيجيتي
امل : مساااااااؤؤؤؤؤ ياحلوة
شيخه : هلا والله اموول .. شلونج ؟
امل : بخير الحمدلله .. اقولج سويتي الهوم ورك مال الادارة .. ترى مافهمته !!
تذكرت اني ناسيه الهوم ورك بكبره : امبييييييييي توني اتذكر ماسويت فيه شي ... متى تسليمه باجر ؟
امل : اييييه .. انتي وينج نايمه بالكلاس .؟
شيخه : وييي .. مايمديني الحين لازم اسهر عليه
امل : زين تعالي باجر مبجر عشان نتناقش فيه .. مو فاهمه شلون نحسب القيمه اخر شي ؟
شيخه : اوكي اوكي .. يله باي
سكرته من امل وانا محتاسه .. وديت دشداشه صلوح وغترته قبل لايطيح علي ويفضحني .. ومسحت ويهي وجابلت النت قعدت احل بالهوم ورك يمكن ثلاث ساعات .. ظهري تكسر اووف ارف هالماده
نفس الوقت
غرفة عزوز
احس عندي شغل وااايد وماعندي وقت حق كل هذا .. كانت الاوراق منثرة يدامي .. الشركه افتتاحها باجر .. لازم ابلغ خلود اني خليته شريك معاي .. ماقتلكم .. بالفلوس اللي عطتني ياهم امي رضيه .. استثمرتهم بالاسهم والحمدلله ربي وفقني .. ويمعت مبلغ حلو .. طبعا بتقولون اول مرة ادخل البورصه وتربح شلون .. !!
الله يسلمكم ابوي كان يشتغل بالبورصه قبل .. يعني على ايام امي وبعد ماتوفت الوالده الله يرحمها تم سنتين جذيه وعقب طاح بهالمشروب اللي خلاه مايدري عن حلاله اضيع فلوسه كلها عليه .. فاول مادشيت كنت اعرف بعض ربع ابوي القدامى .. ويوم دروا اني ولده وشافوا اني جاد بالموضوع وشاطر فيه ومتحمس ساعدوني .. وعلموني شوي عن الاسهم والبورصه .. والحمدلله مشت الامور .. وسالفه الشركه هذي .. اهي شركه جرافيكس واعلانات .. انا من زمان كانت تستهويني هالشغله وجم مرة دشيت انا وخلود دورات وعندي خلفيه حلوة عنها .. وباجر افتتاحها واللي بتكون صج مفاجأة حلوة حق خالد لان مايدري شي عنها ..
واول شي مانسيته هالورقة .. هذي ورقة فيها بيانات عن مدرسه في باكستان سويتها باسم امي رضيه وعلى نفقتها .. سبيل وان شالله احتسب اجرها لها عند الله ..
تبون الصج .. اول مرة احس اني ريال .. اقصد عندي حياتي الخاصه .. صار عندي حساب ومبلغ حلو بالبنك .. وماهديت البورصه بس بكون حذر اكثر وبتفرغ للشركه .. كلكم تدرون اني عسكري .. علشان جذيه خليت الشركه باسم ابوي والرخص وكلشي باسمه .. وان شالله يمشي الشغل مثل ماانا مخطط له
احس هالشهرين تعبت فيهم واايد .. محتاج لرااحه او سفرة يومين اغير فيها جو .. بس مافي مجال كلش ..
هديت الاوراق اللي حوالي .. وحطيت راسي على المخده وانا افكر .. ياترى بعد ماتتحسن حالتي الماديه .. اقدر .. اخطب شيووخ !!
لا لا .. عزوز لاتفكر جذيه انت ينيت !! .. وبعدين لاتنسى علاقتها بنصور .. حسيت اني اكره روحي .. اكره روحي حييل .. لاني للحين احبها حتى بعد ماشفتها مع هالخايس .. ودي اذبحه جليل الاصل
مسكت راسي بضيق وانا احاول اشيلها من بالي ماقدرت .. تدرون .. مشتاق لها .. من زمان ماشفت عيونها .. اخخ ياعيونها .. توديني بداهيه ههههه
ماادري ليش يت على بالي ذكرى يوم كنت انا باولى متوسط واهي كانت بثانيه ابتدائي والمدرسه كانت تعطيهم كاكاو بنجوم وانا كنت احبه .. وشيوخ النحيسه تقعد تاكله بروحها ويدامي .. كنت امووت من الحره ..
فمرة كانت رايحه المطبخ تييب لها عصير وبيدها الكاكاو .. ركضت صوبها جني ماشفتها لما طاح الكاكو من ايدها ..
شيخه : ااااااااااي يالبطه ماتشووف !!
ونزلت بتاخذ كاكاوها ..
عزوز : لااااا شيووخ لاتاخذينه !!
شيخه ببلاهه : لييش ؟
عزوز : لحسه الشيطان ماشفتيه !! وووع
شيخه بخوف : ماشفت ويينه .. اصلا مافي شيطان انتا تجذب علي
عزوز : امبلا .. انتي عشان بنيه ماتقدرين تشوفينه بس الصبيان يشووفنه .. كيفج بتاكلين كاكاوج ترى لحسه الشيطان واذا كليتيه بتصيرين شيطانه ويطلعلج قرون براسج
شيخه خافت وقامت تبجي : وااااااااااااااااااااااااع مابي اصير شيطااانه
عزوز : خلاص لاتبجين .. عطيني الكاكو انا بقطه بالزباله وانتي باجر اشتريلج واحد بس لايطيح منج على الارض ترى بعدين ماتقدرين تاكلينه
شيخه تهز راسها وجنها تسمع الدرس وتحفظه زين : هممم
عزوز بمكر : لاتبجين يله روحي الصاله وانا بروح اقطه
واول ماطلعت شيوخ قعدت اكل وانا ارقص .. يمممممم .. تصدقون اشتهيت الحين كاكاو بونجوم
ههههههههه
وعلى هالتفكير دق تلفوني وكان خلود
خالد : لا يبا ... هالريال نسانا بالمرة .. شوف حبيبي .. اليوم السهره عندنا احسب حسابك بجامتك معاك .. ولا اقولك مب لازم تعال بالمكسر والفنيله
عزوز : ههههههههههههههه تصدق عاد مشتاق لنومه دوانيتكم .. اوووف وطباخ امي بعد
خالد : خلاص يله عيل تعال .. شعدنك
عزوز : بيي بيي .. بس اول عندي لك خبر
خالد : قول .. بشر ؟
عزوز : احم .. انا فتحت شركه اعلانات وجرافيكس .. وانتا شريكي ومدير الاعمال
خالد بصدمه : هاااا ..
عزوز : هههههه شنو هاا .. لازم تكون لبق انتا الحين مدير شركه المركز الامريكي خلك راقي
خالد : اقول .. عن الغشمرة البايبخه بس وتعال خلصني ..
عزوز : هههههه صج مو كفو نعمه ... خلاص بيب الاوراق وبيي ؟
خالد : من صجك تتحجى ؟
عزوز : اتغشمر معاك عيل ..!! ..
خالد : انت قلتلي انك ماشي زين بالبورصه .. شللي خلاك تفتح شركه
عزوز : قلت اضمن الفلوس اللي يمعتها من الاسهم .. ماابي اضيعها وفكرت بهالفكرة .. خاصه احنا عندنا خلفيه بالجرافيكس .. وهالنوع من البزنس رائج الحين وتحتاجه الشركات الكبيرة ومايحتاج راس مال كبير ..
خالد : الصراحه .. عفيه عليك .. خوش فكره وانا اايدك .. عدل مو نفس اخوك طرق المعاش ههههه
عزوز : قلتك دش معاي بالاسهم مارضيت تقول تخاف
خالد : انا مااعرف شي بالاسهم .. انتا عندك خبره وبعدين دامك ناجح جني انا اللي ناجح
عزوز برضا : تهقى بنمشي زيين ؟
خالد : اكييد .. فكره ممتازة .. المهم جم راتبي ..؟؟
عزوز : ههههه هذا اللي يهمك بس ..اسمعني انتا راح تداوم العصر معاي .. واتفقت مع مهندسين من بره ومن هني وان شالله يمشي الشغل
خالد : طالع على ابوك التجارة تمشي بدمك ههههه اقووول شغل الرنج وتعالي مع اوراقك خل نطلع على مشاريعك ياسيد عزيز
عزوز : هههههههههههه يله يايك
سكرت من خلود وغيرت ملابسي وبلست جينز مع تي شيرت اصفر واخذت باجي الاوراق وركبت الرنج
كنت مستانس ماادري ليش .. فكرة ان خلود اييدني بالشغل ونستني .. او يمكن لان حسيت ان اوضاعي بدت تستقر شوي شوي .. او يمكن لان .. بروح بيت الغاليه
وانا اتوقع السبب الاخير اقرب شي لسعادتي .ههه
لاتطالعوني جذيه .. صحيح تبط جبدي .. وتقهرني بسوالفها .. بس احبها .. والحب مو بيدي
شغلت الرادوا وطلعت اغنيه عبد المجيد .. فوق هذا الحب
ومشيت وانا بافكاري توديني يمين ويسار
نفس الحزة
الساعه 8 ونص
غرفة شيخه
كنت بغرفتي اكمل الهوم ورك وراسي بينفجر مو فاهمه شلون ينحل .. كله مسائل رياضيات .. فكرت اروح عند خلود يساعدني بهالسوالف
اخذت لابتوبي ورحت غرفته ولقيته منسدح على فراشه ويكلم مها
شيخه : خلود ممكن تسكر شوي وتبطل مغازل وتساعدني
خالد يكلم مها : ها مهاوي .. شرايج اساعدها ام لسان
قربت واخذت التلفون منه : مهاوي .. بس بس اربع وعشرين ساعه تحاجينه شدعوه براد بيت بس .. قرب عرسكم وخروا شوي عن بعض
خالد يسحب التلفون منها بقوة وهو يتحلطم : الله لا يقوله ذلفي بس .. شيشيها علي عاد اهي تسمع كل شي تقولينه لو تقولين لها قطي روحج بالنار بتقط روحها
مها للحين تضحك على خبالهم
شيخه : كيفنا انتا شحارك .. محتر هاا .. ياحرام ماتحبك .. هههههههه لاتبجي خلاص .. هذا نصيبك خخخخخ
خالد يسوي روحه بيبجي : مها .. تحبيني ؟؟
ويحطه سبيكر
ومها وهي تضحك : لاااااااااا ههههههههههههههه
خالد : الله ياخذ بليسج فشلتيني روحي زين مو كفو واحد يكلمج
مها : لا خلص اضحك ..هههههه
خالد :ه ههههه زين اشوف ام لسان شتبي وارد ادق عليج
وهو يكلم شيخه : هااااااا !!
شيخه : عشتو .. الحين مها تقولها آمري .. وانا تقولي هاااا
خالد : سؤال انتي على منو طالعه هذرتج وايده .. الله يعينه اللي بياخذج .. والله امه داعيه عليه ههههه
شيخه : يبوس ايده ويه وظهر اني بارضى فيه اصلا ... اقول شوف هالمسأله مااعرفت احلها انتا شاطر بالرياضيات يله
خالد : زين ودي اللابتوب بالدوانيه ويايج .. ولاتبسطين عزوز بيي الحين .. اغير ملابسي واييج
شيخه : زيييييييييين
نزلت تحت ورحت الدوانيه وحطيت لابتوبي وعدلت الصاله شوي .. حسيتها حايسه .. ويبت معاي فراش عزوز من غرفة الغسيل وحطيته على صوب وطلعت رحت المطبخ الخارجي اللي يطل على الدوانيه وجهزت العصير والجاي والحب وباجي السوالف .. ماادري ليش كنت اسوي جذيه .. بس حسيتها فشله الريال بيي والمطبخ مافيه شي .. وامي مو هني يعني محد بيضيفه .. بيني وبينكم مرات يكسر خاطري .. يعني اتخيل روحي من غير امي .. امووت والله مااقدر اعيش .. بس يااخي يقهر .. تصرفاته ودمه ولزقة اربع وعشرين ساعه .. بس من تزوج خلود ماصرت اشوفه واايد .. ياني فضول اطل من المطبخ واشوف
وبعد ماخصت حوستي بالمطبخ سمعت صوت سيار برة وباب الدوانيه ينفتح .. على طول قربت صوب الدريشه وطليت من تحت عيوني .. يعني ودي اشوف بس ماودي .. ماادري شلون
شفته لابس تي شيرت اصفر .. وجينز ومخفف شعره مثل براد بيت ولحيه خفيفه ديرتي .. حسافه على شعره ليش مخففه .. شعره اسود حلو خخخخخ ..
المهم اني وخرت عيوني وطلعت بعد ماتأكدت انه دش الدوانيه ورحت اقعد مع حصوص وحماتها ومنوربالغرفه
الجانب الثاني
اول مادخلت الدوانيه لفت نظري لاب توب محطوط على الطاوله .. وفراشي بونجوم الازرق مسفط ...ضحكت الصراحه لان اول مرة خلود يسويها .. العاده ينقد علي وسبه هالسالفه
دقيت عليه وقالي دقايق وبينزل .. ومامرت دقيقه الا ونزل ..وهو يتحجى بالتلفون
خالد : منور يبولنا جاي بالدوانيه ... اووو حلفي ؟؟ .. شهالسنع .. لا .. خلص اوكيه .. يله باي
عزوز : هااا اشوف فراشي مسفط اليوم موعادتك هههههه
خالد شاف الفراش واستغرب : ههههه مو انا ترى هذي شيوخ بتمصلح عندي عندها هوم ورك وتبيني احله لها ..لا ومسويتلنا جاي بعد هههههههه خلبه هالبنت
عزوز بابتسامه وسعاده ماتوصف .. حتى لو ماكانت مسويه هالشي حقي .. بس على الاقل تذكرتني .. كان خلود يحاجيني وانا عيني على اللحاف .. ودي اخذه واشم ريحه اصابيعها فيه ..
خلود : اقولك .. شوف هوم وركها هذا .. يمكن تعرف تحله .. يااخي ماادري هالدكاترة شلون يفكرون .. بروح اييب لنا جاي من المطبخ .. زهب اوراقك
عزيز :اوكي
اخذت اللاب توب وشفت المسألة صح كانت صعبه شوي .. بس بالاخير حليتها لها .. وكان خلود يشوف اوراق الشركه ولاهي فيهم .. وانا فتحت سكرت لها الصفحه لفت نظري ملف باللاب توب اسمه الشيخه .. ياني فضول اني افتحه .. وقلت بقلبي اذا كان صور لها ماني شايف شي .. بس ان كان شي ثاني بشوف
فتحته وانا ضميري يأنبني شلون افتح شي مو لي .. بس ماقدرت امنع روحي
وانا في هالحاله والترقب .. تدرون شنو طلع لي .. الملف فيه رقم سري .. انقهرت .. وزاد فضولي اني اعرف شفيه .. وليش فيه رقم سري .. سكرت اللاب توب وانا ودي اكسره .. حاولت اشيل هالتفكير من بالي واركز مع خلود واشرحله باجي الاشياء عن الشركه بس حسيت روحي مشتت وعقلي وروحي كله بهالفايل ..
نهاية الجزء
