تعالو اقروا معاي ذكرياتي مع التخرج

[.]

لو مو مدخلته احسن خخ ..

الله لايبلانا يارب..

والبنات ساعات يمصخونها الله يهداهم يارب..

ناطرين الباجي

 

[ReMaaas^MLS]

لو مو مدخلته احسن خخ ..

الله لايبلانا يارب..

والبنات ساعات يمصخونها الله يهداهم يارب..

ناطرين الباجي

اي والله صاجه اختي ومشكوره علي مرورج الحلو عندي

 

[بلووونه]

الصراحة بارتات وايد حلوة وإنشاء الله ناطرة البارتات الياية وانشاء الله راح اكون من متابعينج ويعطيج العافية حبيبتي واكيد تكونين متخرجة صح مبروووووووووووووووووووك ماخراااااااااااا

 

[خاشووقه]

يا سلااااااااااااام

 

[جرجيره]

ههههههههههههههههههههه مسكين.... وهالبنات صج مايستحون!!!

 

[أدووويا]

كملي متابعة و يعطيج العافية

 

[Stylist]

ياحلاااااااات هلأيام وهالذكريات
بس هم ودي اتخرج بسرعه

 

[paco de lucia]

عاد تدرين انا بهالمواقف ابجي جان انا ولا غيري

اغبيا صج اغبيا ع قولتج مصاخه .. غصب بيلفتون النظر


في انتظارج

 

[ReMaaas^MLS]

الصراحة بارتات وايد حلوة وإنشاء الله ناطرة البارتات الياية وانشاء الله راح اكون من متابعينج ويعطيج العافية حبيبتي واكيد تكونين متخرجة صح مبروووووووووووووووووووك ماخراااااااااااا

الله يبارك فيج حبيبتي وحياج بينا ومشكوره على متابعتج

 

[ReMaaas^MLS]

ياحلاااااااات هلأيام وهالذكريات
بس هم ودي اتخرج بسرعه

صج ايام ظل ذكرى وياحلاته من ذكريات
وانشاء الله تنجحين وتتخرجين بسرعه وتكتبين ذكرياتج لنا

 

[ReMaaas^MLS]

مشكورين بنات على مروركم ابموضوعي وصج ردوتكم تشجعني اني اكتب لكم اكثر وتسلمون لي على ردودكم

 

[ReMaaas^MLS]

امتحاناتي

كنت بالسنه ثالثه ومثل ما قلت لكم هالسنه واااايد ثقيله:cxxxp: تعتبر اصعب سنه اذا عديتيها خلاص تعتبرين نفسج شبه متخرجه
المهم صادف عرس اخوي فواز مع امتحانات الاشهرMidterm وانا اهني توهقت وكان عرسنا يوم الاربعه وكان عندي امتحان يومها من 9 لل4 العصر نظري وعملي وعرس اخوي يبدا ساعه7 يعني ما يمديني اروح صالون واصلا بالي كان مشغول وقتها ماراح اقدر احل او ادرس خاصة العرس كان علينا وانا واختي متكفلين بتجهيزات كلها وكان اول عرس لنا لازم يعني نطلع فيه بشي حلو ومرتب لانه اخوي مابغى عرس وعلشاني وعلشان اختي سوى العرس فكنا مانبي يطلع العرس مو حلو فكنت متحمله المسؤوليه وقتها ما اقدر اركز بدراستي كلش والمشكله امتحاناتي صادفت بنفس اسبوع عرس اخوي وانا حدي اكتأبت وصكت فيني الدنيا
المهم قلت حق امي ما اقدر امتحن يوم عرس اخوي انا بأجل الامتحان بس المشكله ماعندي عذر طبي وما يقبلون اي عذر لازم يكون شي جايد وانا ياربي عذري يضحك شسوي واحنا اذا بنأجل اي امتحان بالكليه لازم توافق مساعدة العميد الكليه مو دكتور الماده فتوهقت قلت ياربي شسوي شسوي؟؟ قلت كافي اني زفت بالامتحان الي قبله ما ابي ازفت بعد بالماده هذي قلت ماكو الا اروح اكلمها شخصيا واقول الي عندي واذا وافقت الحمد الله اذا لا بعد امري لله ادرس وامتحن
رحت حق مساعدة العميد كليه دشيت عندها قلت لها دكتوره انا بأجل امتحان ما أبي امتحن قالت لي ليش مريضه فيج شي؟ قلت لها لا دكتوره انا مافيني الا العافيه ( وانا مبتسمه ومادري شلون بقولها الموضوع ) قلته لها الصراحه دكتوره بدون جذب (اهم شي ) ترا عرس اخوي باليوم الفلاني(......) ووانا ما اقدر امتحن تدرين العرس ولويته وخاصة هذا عرس اخوي ولازم يعني اجيك على كل شي ولازم اروح صالون فما اقدر امتحن
ردت علي وقالت لي مو مشكله امتحانج الصبح وعرس اخوج بليل عادي ما فيها شي امتحني وروحي بعدين، قلت لها مايصير دكتوره احنا انخلص من الامتحان اقل شي 3 او 3ونص وانا وقتها وين اقدر اروح بروحي راح اكون تعبانه مافيني شده اكون قاعده من صبح لل2 بليل حرام عليج قدري ظروفي شوي وعطيتها شوي نظراتي الي تكسر خاطرها :0bee2e8d89: وارد اقولها الله يخليج ادري عذري مو عذر بس صج انا ما ابي ازفت واقدم اي شي وانا اصلا ماراح اركز عدل خليني أجله بليييييييييز
طالعتني ولا تبتسم وتضحك شوي ولا تقولي اول مره اشوف وحده بصراحتج وجرأتج وعلشان انج ما جذبتي علي وقلتي موضوع لي بصراحه مع انه مو سبب علشان تأجلين بس لانج كنت صريحه معاي فجذي راح أجلج الامتحان بس لا تقولين حق اي احد وانا راح اكلم دكتورتج وراح اتفق معاه اوكي ولا اقولها اوكي ومشكوره وماقصرتي ولا اشق الحلج لوووووووول :dddds:
فطلعت وانا الفرحه مو شايلتني وقلت الحمد الله على كل حال واركض اروح ابشر امي لانها كانت المسكينه تحاتيني وضايق خلقها علي بس استانست اول مادرت والحمد الله رحت عرس اخوي واستانست كل شي فات على خير وطلع العرس حلو والكل استانس ( اشوه تعبنا مااااااااااااا رااااح بلاش لووووووول) وقدمت امتحان بعد العرس تقريبا باسبوعين ويبت فيه B :ggdw:

للحديث بقيه..

 

[.]

اشوه..

هالبارت حلو..

والله يوفقكم يارب..

 

[ReMaaas^MLS]

اشوه..

هالبارت حلو..

والله يوفقكم يارب..

مشكوره حبيتي ويسلمووو على مرورج

 

[ReMaaas^MLS]

تأجيل الثاني
بعد عرس اخوي بيومين كان عندي امتحان ثاني وانا كنت دارسه شويه منه قبلها باسبوع بس كانت كميه وايد كبيره وكان دكتور الله يهديه نوتاته (NOTES) مو واضحه بس فيها جم كلمه وكلها اسهم يعني يبيلج تدرسين من الكتاب وتتفججين الحجي بهاليومين كلش مايمدي لانه صج الكميه كبيره متى ادرس ومتى اراجع وقلت ياربي شنو هذا قمت ادرس وادرس مع انه المعلومه دش وتطلع مادري ليش يمكن لاني كنت تعبانه من العرس ولويتها ويمكن بالي مشغول بألي قاعد يصير بيتنا لاني انا رحت بيت اختي وقعدت ادرس هناك يعني اهدا لي واركز اكثر لانه بيتنا زحمه وازعاج وطقطقها تدرون صباحية العروس وحوستها
المهم بقى يوم واحد على امتحان وانا للحين ما وصلت نص الكميه للحين افجج بالحجي، ادري اني غلطانه لاني مادرست اول باول بس شسوي انا عندي 5 مواد وهذا غير تقارير الي لازم انقدمها يوميا حق كل ماده يعني انا بالخصب قدرت ادرس لي مادتين وباجي ادرس منهم شوي شوي كانت صج سنه لووووووووعه
امي دقت علي وقالت لي لازم اتيين عندنا غدا تغدي وروحي وقعدي شوي وسلمي على اخوج قبل ما يسافر وبعدين روحي بيت اختج وكملي دراستج قلت اوكي يالله خلينا انروح.. وبيني وبينكم كان ودي اروح اغير جوي مليت من دراسه والحكره بروحي :cxxxp:
فرحت هناك وتغديت واستانسنا وطقطقنا وسلمت على اخوي فواز الغالي احس اني خلاص بفقده وبروح حق زوجته وتصير زوجته كل شي بحياته وماراح يهتم فيني ولا يجابلني مثل قبل :0bee2e8d89:
المهم قعدنا انطالع الشريط العرس وصارت سالفه بسيطه بيني وبين اختي بس اشفيني وقتها مره وحده عصبت ولا اصارخ على اختي وابجي واصعد غرفتي واقعد ابجي ..ابجي ولا دش علي بنت خالتي واهي اعز بنات خالتي وصديقة دربي وطفولتي ولا اقعد احضنها حيل وابجي واهي تحضني واتقولي اشفيج اليوم مو طبيعيه وكله امعصبه قلت لها مادري بس انا مو دارسه للحين وماخلصت ما ابي اكمل دراستي ابي اطلع من الجامعه ابي احول ابي اروح تطبيقي (الله اكبر منج جمااانه من جامعه الى تطبيقي صج ماعندي سالفه ) ملييييت خلاص ليه متى وانا جذي دافنه عمري بدراسه واخر شي درجاتي خايسه ما ابي اكمل ابي اطلع.. ولا تهديني واتقولي ميخالف طولي بالج وانا ابجي حيل حاسه نفسي مخنووووقه حدي.. حاسه بضيقت خلق مادري من دراستي لاني مو دارسه او انه علشان اخوي بروح مني مادري اشفيني مع انه عندي خوان غيره ومتزوجين بس ماحسيت جذي مثل مع اخوي فواز
بنت خالتي ما قصرت هدتني وقالت لي لا تقدمين امتحان باجر شكلج تعبانه وماراح تقدرين تدرسين فكلمت اخوي الكبير وقال راح يكلم ارفيجه لانه يعرف دكتور واتفق معاه انا راح يسويلي مرضيه حق امتحاني فهديت شوي ورحت بيت اختي وانا للحين ضايق خلقي قعدت امسك الكتاب قلت خلني ادرس شوي بس مو قادره واقعد ابجي ابجي فرحت قطيت الكتاب ورحت نمت قلت يمكن اهدا شوي، نمت شوي وقعدت من نوم ورحت درست ماده ثانيه الي حق امتحان الي وراه فظليت ادرس للفير تقريبا فصليت ونمت علشان اقعد صبح اروح مع اخوي حق مريضيه

يتبع....

 

[ReMaaas^MLS]

قعدت صبح وانا كل ساعه متفززه من نوم افكر شلون راح ترضى العميده مره ثانيه وشلون راح اقنعها هالمره واذا مارضت راح اخذ F كانت افكار ماخذتني وشاغله بالي، المهم تواعدت مع اخوي عند مستشفى مبارك ورحنا ودشيت عالدكتور وكشف على وعطاني بندول وشغله حق نشله لانه كان فيني نشله شوي و بلاعيمي ملتهبين عالخفيف وكتب مرضيتي ورحت اوديها حق العميده ما لقيتها كان عندها اجتماع وقلت يالله باجر عقبها اوديها لما اخلص امتحاني اروح عندها ورديت البيت نمت شوي والحمد الله كنت احسن فقعدت ادرس حق امتحان
وصار اليوم الامتحان وامتحنت والحمد الله كان زين ورحت حق مساعدة العميد علشان اعطيها المرضيه علشان تأجيل، دشيت عليها ولاتقولي ها جمانه خير ولا ابتسم شوي واعطيها مرضيتي وتقولي ليش هالمرضيه احنا اتفقنا وانا كلمت دكتورتج علشان تأجيل ليش هالمرضيه انا اهني حسيت نفسي منحرجه وماني عارفه شقولها فرديت وقلت لها هذي حق امتحاني ثاني لانه ما امتحنت كنت تعبانه شوي وهذي مرضيتي ، اهني صار علامة !!! ابويها وقالت قبلها عرس اخوج والحين مريضه مايصير جذي مو اي احد يبي يأجل على كيفه قلت لها ظروف وتعبانه شوي وقالت لي عادي لو فيج انفلونزا اخذي بندول وتعالي امتحني خو اهي مو قصه ولا فيج شي علشان ما تقدرين تمتحنين.. شوفي جمانه هذي اخر مره فاهمه وراح اطوفها لج بس مره ثانيه ماراح ارضى لو يبتيلي اي مرضيه او عذر فاااهمه:eh_s(14): (بصراخ شوي) قلت لها انشاء الله دكتوره
والحمد الله وقعت وعادولي امتحان بنفس الاسبوع الي امتحنت فيه هذاك الامتحان والحمد الله نجحت ويبت فيه B- وعدت على خير وقلت بقلبي هذي اخر مره أجل وماراح اعيدها بعد، وصج كانت بنسبه لي اول واخر مره أجل فيها بحياتي الدراسيه كلها من ابتدائي للجامعه.. من يومها ماشافت ويهي الا لما وقعت لي استمارة تخرج :ggdw:

للحديث بقية...

 

[ReMaaas^MLS]

حبايبي المتابعين قصتي اولا :
اشكركم على متابعتكم لي وثانيا:
انا نزلت لكم بارتين قبل ما اسافر وعذروني يمكن راح اطول بس اتمنى انكم ما تنسوني وانشاء الله اذا قدرت اني اكتب لكم بسفر راح اكتب لكم واذا لا فسامحوني وانشاء الله اذا رديت بسلامه راح اكتب لكم واعوضكم
يالله اشوفكم على خير

 

[تيقوره]

يسلمووووووووووو حبيبتي ..
وتردين بالسلامه ان شاء الله ...
واحناا بانتظاااارج

 

[noorq8]

توني اطييييييح على هالمذكرات السنعة
يالله نااااطرييييينج تكملييييييين :ggdw:

 

[ReMaaas^MLS]

يسلمووووووووووو حبيبتي ..
وتردين بالسلامه ان شاء الله ...
واحناا بانتظاااارج

الله يسلمج حبيبتي