تجمع امهات العالمية الامريكية

[ReeMaN]

سلاااااااااااام امهات
شلونكم شخباركم عساكم بخير مايشوف شر عمج فوز الله يقومه بالسلامه يارب

ياربي شكلي على يوم بودعكم بكسر جهااااااازي ...بسبة هالمنتدى طفششششششششششنى كل ماشبكت يعلق الاشتراك لا اقدر اعلق ولا اقدر اشيل النك نيم او يطلع لى ايرور مادري شسالفته مع التعلق وماشالله من اشبك الصبح اشوف اللي علقو البارحه حزه اللي يعلق معاي

المهم شخباركم؟؟؟ طبعا الرد بيكم بعد اسبوعين ... او عطوني عناوين صندوق البريد مال بيوتكم ارد على وحده وحده بظرف فيها رساله معطره وبوسه حمره ههههههه نفس الافلام الهنديه

 

[mr000]

أهلين ريمان ..أي والله الظاهربنرد عالطرق البدائيه رسايل مثل السيلانيات وألا حمام زاجل!وإلا شكلي بروح لندن لأن كراميلا تقول هي يفتح معاها المنتدى من هناك عادي...(خوش عذر)!! بيلا ولدي ماقال عن معرض الكتاب الظاهر هالشغلات حق الصغار بس قلتله يسأل علشان ياخذ معاه فلوس احتياط!!

 

[N0oNa]

مشكوره حبيبتي بيلا
انا ولدي الحمدلله اعاقته مو حركيه
ولدي عنده ضعف سمع شديد و سويتله عمليه الحين و قام يسمع بس ابجهاز على راسه
العمليه سويتها قبل سنه تقريبا
يعني صارله سنه بس يسمع و اهوا عمره الحين 3 سنوات بس محصوله اللغوي اقل من عمره
هذا الي مخليني احاتيه و مخارج الحروف مو كلها عدله للحين يعني مو نفس الطفل الطبيعي
انشالله اليهال يكونون متفهمين مع الجهاز الي اباذونه انشالله

 

[caramella]

السلام أمهات
إشلونكم وشخباركم
مروووو والله لو تيين بهالبرد تكرهين حياتج تقولين ما ابي لا منتدى ولا ربعه
إنشالله قربنا نحجز حق ردتنا يببو لي
ريمان حبيبتي والله حاسه بمعاناتج صج شي يطفش بس هم البرد يطفش اللي ما يطفش لا تفكرين بفكرة مروووو هاهاها\
فوز حبيبتي الله يهون عليج بالسلامه إنشالله يا رب ويقوم عمج بالسلامه إنشالله يا رب
الله يساعدج حبيبتي ديري بالج إنتي ترى معذورة من روحة المستشفى وإسمالله عليج ديري بالج على عمرج لي رحتي مكان عام لبسي كمام والله ترى الأم بالشهور الأخيره من الحمل مناعتها تضعف ومو زين عليج
نوونا حبيبتي آنا والله شايفه جم حاله إعاقه بالمدرسه و إن شاء الله يا رب ينقبل ولدج وتفرحين فيه معرس لا تحاتين إنشالله

 

[caramella]

أم لولو لا تحاتين مو لازم يكون بيرفكت في كل شي عشان ينجح عادي آنا ولدي غلط بلون البني يقول بلاك و إنقبل الحمدلله
إهم اهم شي عندهم السلوك و يشوفون ذهنه و قدراته
مرووو إي مريت المكتبه إسمها waterstone شريت له منها سوالف
مالي خلق أدور قصص scholastic ما عندي وقت والله ما ادري المدرسه حاطين متى آخر وقت نطلب فيه إذا يمدي اطلبهم منهم و خلصنا
قاعده أقفض الأغراض ياربي مهما ارتب ينبعون الأغراض
بيلا مشكوره عالحرف خل أطبع له أوراق على حرف العين

 

[bella bambina]

صباح الخير أمهات
كلولولولولولولوش كراميلا ان شاء الله توصلون بالسلامه ويعطيج العافيه زين الشغل يدفي :weight_lift:
ريمان ومرو سوو نفسي قعدو الصبح مبجر المنتدى يفتح بسرعه (ماكو شغل )
فوز miss u

 

[bella bambina]

نونه آنا مدرسه بمدرسة معاقين اعاقه حركيه ومرو علي طلبه مسووين زراعة قوقعه بس مسوين العمليه بعمر أكبر من عمر ولدج فظلو مو متكيفين مع باقي الطلبه لأنهم كبار فعندهم أخصائيات تخاطب فما أدري ولدي الله يسلمه هم عمليته زراعة قوقعه ؟وان شاء الله يندمج مع الطلبة لأنه اسم الله عليه مسوي العمليه صغير فراح يتأقلم بسرعه والله يوفقه

 

[mr000]

سلام أمهات اشلونكم.. أيوا كراميلا هذي هي المكتبه.. عاد لوتشوفين الكتب اللي كنت شاريتهم حق ولدي العود وشلتهم على قلبي من برايتون لأنه قالي مو موجودين بفرع لندن والله يمكن هم اللي سووا علي وزن.. بس خوش قصص أطفال عندهم...آنا راح أصبر عالمنتدى لي شهر 4 أذا ماتعدل بهاجر لندن( صج متسببه)..كراميلا والله مصدقتج عالبرد لأن ولدي يقولي هناك برد بايخ ماتشتهين حتى تطلعين..!!بيلا شخبارج واشلون عيالج.. عاد تدرين آنا صديقتي أخصائيه وحطت واسطه حولت تدريس وأعتقد عندكم بالأعاقه الحركيه.. بس الحين بتاخذ الماستر فتداوم عندكم وتطلع تروح الجامعه تخلص دبلوم عالي علشان يطرشونها بريطانيا حق الماستر وبتاخذ عيالها معاها!والله حلو الوحده تكمل بس يبيله ريال يسانع!!

 

[mr000]

فوز شخبارج ..طمنينا عليج.. ريمان اشلونج شخبارج.. صج أحسن شي دشي المنتدى الصبح

 

[bella bambina]

هلا والله مرو الحمدلله حبيبتي كلنا بخير قاعده أعد العد التنازلي حق الدوام يوم الاحد أداوم وبرد حق التحضير والتدريس الله يعيننا آنا العام انتقلت حق هالمدرسه زين ماشاء الله لها خلق تدرس والله من كثر ما ادرس بالمدرسه والبيت بس خلاص مخي فضى ساعات أقرا بالجريده جمله أعيدها جم مرة عشان أستوعبها :eh_s(6):

 

[omlolo]

قوه امهات شلونكم وشخباركم

امس قلتلكم مقابلة ولدي وقالولي ندق عليج عقب يومين وطلعت احاتي

تصدقون وانا نايمه الظهر ماأوعى الا المدرسه يدقون علي قالولي ترى ولدج انقبل وتعالي باجر (عن اليوم) دفعي الفلوس (كلووووووش)
وترى اذا خلص دوام باجر وماييتي ينشال اسمه من اللسته

وطير اليوم من فير الله وادفع الفلوس

وين اللي يومين ونرد عليج وخرعوني والله والتيتشر امس اسألها شلون مستواه تقولي مااقولج رايي اكتبه بالورقه والادارة اهي اللي تقرر
والله لعبوا بأعصابي

بس الحمدالله انقبل وليدي هذا اهم شي
وراح اكون عضوه نشيطه وياكم ياأحلى امهات

 

[a7la2006]

ابي سايت المدرسه لو سمحتوا

 

[mr000]

أم لولو..ألف مبروك قبول وليدج الله يخليه لج وان شاءالله تعجبج المدرسه وترتاحين فيها وولدج يرتاح فيها بعد.. وخلاص من اليوم أنتى وحده من أمهات العالميه لي مادشيتي التجمع كل يوم بنسجل عليج غياب.. لا اتغشمر معاج.. بس لاتقاطعينا.. وترى اهم هذا أسلوبهم يعني مايعطونج كلمه أكيده عن القبول آنا لما بقيت أنقل ولدي أول مره ردتني السكرتيره بالمره مارضت حتى تستلم أوراقه بس علشان شافت بشهادته c بالرياضيات وأراويها باقي شهاداته أنه كله ماخذ b من قبل قالت لاأحنا يهمنا آخر شهاده وطلعت ووديته مدرستين وقدم فيهم اختبار وانقبل بس أشوه قبل لاأدفع له فلوس يعني الأسبوع الثاني دقوا علي من العالميه قالتلي ييبي أوراقه خل نسويله اختبار يمكن نقبله والحمدلله انقبل لأنه كان توه مستلم شهاده يديده وماخذ b بالرياضيات فهذا اللي سكتهم!!

 

[mr000]

عفيه أمهاتنا اللي تدش تحط السايت لأنه تدرون أختكم مروو بالتكنلوجيا سلامتكم.. مادري اشلون تنسخونه وتحطونه.. ولافي رجا إني أتعلم!!

 

[حضاره]

سلام امهات العالميه اشلونكم00مرووو شخبارج يالغاليه

 

[mr000]

أهلين حضاره والله قاعده أكتبلج وآنا مندعسه تحت الكنبل شابكه بالنقال من العيز لاأطلع إيدي بالبرد أشبك باللاب توب!

 

[bella bambina]

السلام أمهات
أحلى 2006 سايت المدرسه www.uas.edu.kw
مرو شاطرة تعرفين تشبكين بالموبايل آنا حتى هذا فاشله فيه :dddds:

 

[bella bambina]

هلا والله أم لولو ألف مبروك قبول وليدج الله يخليه وحياج الله معانا حبيبتي

 

[bella bambina]

فوز اشلونج واشلون بنيتج واشلون عمج ان شاء الله صار أحسن ؟
ريمان اشلونج واشلون وليدج واشلون المنتدى معاج ؟ قاعده أحرج
كراميلا اشلونكم مع البرد ؟ الأسبوع الياي راح يعطونهم حرف ال r
أمهات الكي جي مو تنسون يوم الأحد يلبسون اليهال لون أحمر ( لون علم هاييتي ) يعني مو عشان الفالنتاين وتييبون تبرع أقل شي دينار
أمهات فيه أحد راح معرض الكتاب بالمدرسه ما صار لي مجال أروح اليوم
مو تنسون باجر اجتماع أولياء أمور و اليهال يعطلون

 

[omlolo]

أم لولو..ألف مبروك قبول وليدج الله يخليه لج وان شاءالله تعجبج المدرسه وترتاحين فيها وولدج يرتاح فيها بعد.. وخلاص من اليوم أنتى وحده من أمهات العالميه لي مادشيتي التجمع كل يوم بنسجل عليج غياب.. لا اتغشمر معاج.. بس لاتقاطعينا.. وترى اهم هذا أسلوبهم يعني مايعطونج كلمه أكيده عن القبول آنا لما بقيت أنقل ولدي أول مره ردتني السكرتيره بالمره مارضت حتى تستلم أوراقه بس علشان شافت بشهادته c بالرياضيات وأراويها باقي شهاداته أنه كله ماخذ b من قبل قالت لاأحنا يهمنا آخر شهاده وطلعت ووديته مدرستين وقدم فيهم اختبار وانقبل بس أشوه قبل لاأدفع له فلوس يعني الأسبوع الثاني دقوا علي من العالميه قالتلي ييبي أوراقه خل نسويله اختبار يمكن نقبله والحمدلله انقبل لأنه كان توه مستلم شهاده يديده وماخذ b بالرياضيات فهذا اللي سكتهم!!

مشكورة ياقلبي ماقصرتي والله