تجمع امهات العالمية الامريكية

[mr000]

سلام أمهات اشلونكم..بيلا ماتشوفين شر وان شاءالله تتطمنين على روحج وعلى بنيتج ان شاءالله تتحسن بسرعه وتتقبل الأكل.. والله عيالنا ماعندهم مناعه من قلة أكلهم هذا واحنا الحمدلله يوميا بالجمعيه ونترس بهالثلاجات وعيالنا جذي شهيتهم وكله في بطون الخدم!!الله كريم ان شاءالله ماتطول بهالشده..الجو يبرد بالليل فجأه آنا أول مره ألبس بجامه مخمل اليوم.. أحس داخل البيت أبرد من بره!! مشكوره فوز عالعنوان.. عرفت مكانه ان شاءالله مانحتاج بس للطوارئ!!ريمان وكراميلا اشلونكم.. ديروا بالكم على عيالكم من البرد.. ياربي مادري لو عيالنا بكندا وألا روسيا اللي 25 تحت الصفر جان اشصار فيهم... كلش مايتحملون!!

 

[Fouz]

هلا والله مرو بشري شلون حفيدتج؟ ان شاءالله أحسن
يا ربي تحفظ عيالنا و علية عليهم ما فيهم صحة على قولتج الاكل كله حق الخدم و عيالنا كاكاو و حلاو
ان شاءالله ما تحتاجين الدكتور بس سجلي الرقم عندج حق العازة

كاراميلا سألت أخوي عن الدكتور قالي اهما اخوان ماشاءالله، عبدالله أطفال و محمد عناية مركزة

بيلا شخبارج و شخبار دلال ان شاءالله ما نسمع عنكم الا كل خير

ريمان شلونج مع البرد، لما الحين علاقتج حميمة بالدفاية

 

[Gipsy Queen]

salaam
ana wlde 3nda muqablaa
oho kan bgrade one biltakamul o bdasheshaa uas
o bswoonlaa ilmeeting o 3la asaasa eqreroon etha ekmil weyahum garade 2 aw e3eed one
mnu mr bhl tjrebh eqooli
thanx

 

[Fouz]

شلونكم أمهات
عسى ما شر اليوم ماكو أحد، موضوعنا صاير بالصفحة الثانية مو على العادة
ان شاءالله تكونون بخير

جبسي كوين حياج الله، بصراحة ما عندي فكرة بس ان شاءالله الخوات يفيدونج و الله يوفق ولدج ان شاءالله، اذا ممكن شلي خلاج تفكرين تنقلين ولدج من التكامل الى العالمية، ياريت تفيدينا

 

[mr000]

سلام أمهات اشلونكم.. شخباركم.. فوز شخبارج.. ماكو والله بس اليوم ويك اند وأبونا بالبر فطلعنا ...باقي البنات وينكم.. اشلون عيالكم.. بيلا طمنينا على بنيتج ان شاءالله صارت أحسن..!!

 

[mr000]

عفيه فوز أو بيلا انتوا وديتوا عيالكم عيادة دكتور شمساه بقيت أسألكم آنا باجر ان شاءالله بودي بنت ولدي بس لازم آخذ موعد قبل وألا سيده أوديها؟ اعتقد أنتوا قلتوا الصبح يداوم بمستشفى مبارك يعني ماراح أقدر أوديها ألا العصر؟؟أنزين تحصلون موعد بنفس اليوم عادي؟؟ عفيه جاوبوني باجر الصبح ضروري بوديها ماصارت أحسن والكحه زايده وايد متعبتها!!

 

[Fouz]

هلا مرو
انا وديت بنتي بدون موعد و كان ما عندها ملف و دخلنا على طول
بس انتي اتصلي أخاف يكون مسافر أو شي قبل لا تتعنين، دقي الصبح لان الريسبشن موجودين من الساعة 9 على الاقل تضمنين انه مو مسافر و تكونين هناك على فتحة العيادة

 

[bella bambina]

مساء الخير أمهات
تسلمون جميعا من الشر ومشكورين على السؤال دلول أمس كانت تشرب حليب بس اليوم ما شربت غير الماي وعلبة عصير مانجا وطبعا اليوم خامس يوم بدون أكل ويها شاحب ومستعسرة ومن نقول لها اكلي تبجي تقول لأ يعورني باجر بوديها المستشفى واشوف شيقول الدكتور الله كريم ادعو لها وآنا ظهري ذابحني من العوار
سلامتها حفيدتج ما تشوف شر

 

[mr000]

مشكوره فوز ماقصرتي باجر ان شاءالله أدق الصبح وأشوف !! بيلا سلامتها دلوله.. مسكينه ماسوى عليها هالألتهاب وديها باجر الطبيب شوفي شنو يعطيج لها والله يسلمج من الشر.. وطمنينا باجر لي رديتوا من الطبيب!!

 

[ملكة بيتها]

شلونكم مامات حبايبي ..مايشوفون شر عيالكم الجو جو مرض بس دفوهم وكثروا من فيتامين سين

 

[Fouz]

صباح الخير أمهات
بيلا ألف لا باس على دلال و عسى ربي يشافيها ان شاءالله، وديها اليوم الدكتور و قوليله ما تحسنت علشان يعرف شيسوي، بدال ما تودينها دكتور ثاني و كل واحد يعطيج كلمة، حبيبتي والله بروحها نتفة و الحين ما تاكل ان شاءالله أجر و عافية يارب

مرو العفو يالغالية و سلامتها بنيتكم، عسى الله يحفظ عيالنا

هلا والله ملكة احنا بخير و مشكورة على السؤال و النصيحة، صاجة الجو متقلب هالايام

ريمان و كاراميلا شخباركم

 

[mr000]

سلام أمهات اشلونكم.. بيلا اشلون بنتج طمنينا عليها..ملكه اشلونج شخبارج..مشكوره عالسؤال.. فوز اشلونج واشلون بنيتج توني دقيت عالعياده على أساس نوديها العصر فقالت هو بعد يداوم من ال11 الصبح قلت تمام نوديها.. بس المشكله أنها توها نامت قاعده من الصبح من الكحه مو قادره تنام فماودنا نقعدها.. ماكو ألا العصر أو باجر الصبح!!ريمان وكراميلا شخباركم!!توه ولدي دازلي مسج يقولي يابوا مدرسة ماث يديده بس مو أجنبيه.. بدون مبالغه هذي رابع مدرسه.. بس مايدري اذا بتدرسهم وألا لأ شافها تدرس الصف اللي يمهم.. عموما هم مومرتاحين من الهنديه اللي قاعده تدرسهم ألحين.. ان شاءالله يغيرونها!!

 

[Fouz]

هلا والله مرو، ما تشوف شر حفيدتج و ان شاءالله تحصلين العلاج عند هالدكتور
الله يعين هالطلبة على تغيير المدرسين، ما بيدنا الا نقول ان شاءالله اللي ياية تكون أحسن

بيلا شلون دلال اليوم، ان شاءالله تتعافى بأقرب وقت يا رب

كاراميلا اليوم دزوا ورقة فيها أسامي كتب حلوة حق الححضانة و الكي جي، صورت لج كي جي ون و تو، دامج بلندن روحي شارع المكتبات توتنهام رود و ان شاءالله تلاقينهم، المدرسة تطلبهم لج بس يحسبون الدولار ب 750 فلس
بيلا أخذي فكرة عن الاسامي بس اعتقد انج موفرتهم حق عيالج الكبار الله يحفظهم

 

[mr000]

سلام أمهات اشلونكم! أول شي الحمدلله حق الماث يتهم مدرسة العام اللي هي رئيسة القسم مس أسينبيرج.. واللي شافها الظاهر يايه احتياط حق صف! والله أخاف استانس ويردون يغيرونها باجر وألا اسبوع الياي.. بروح أقرا عليها يمكن تقعد بس تكمل هالكم شهر!!اليوم ولدي قالي خبر يضيق الخلق يقول في صبيان 2 من الهاي سكول متوفين بحادث سيكل.. الله يرحمهم ويصبر أهلهم.. ويحفظ عيالكم!!

 

[mr000]

سلام أمهات اشلونكم!! شخباركم مع المطر!بيلا طمنينا على بنيتج!!ريمان وفوز وكراميلا اشلونكم شخباركم! اليوم ولدي يايب ورقه عن الستاف اليديد اللي حطوه لهم حق المواد.. جنه يعني هذا آخر تغيير... عسى ان شاءالله يكونون ثابتين لي آخر السنه.. أهم شي غيروا الهنديه !!

 

[caramella]

السلام أمهات
إشلونكم وشخباركم
فوز حبيبتي مشكوره على هاللستة مالت الكتب و أول مره أسمع إن توتنهام شارع المكتبات يبيلي أمره على يوم إنشالله و إنشالله احصل من هالمجموعه بس أخاف همي قصصهم غير قصص أمريكا والله إذا حصلت من هالمجموعه آخذ له دام إني موجوده إهني
ذاك اليوم والله مريت أوت لت كان فيه مكتبه حلوه و مسويه خصومات على كتب اليهال
خذيت له من الكتب اللي جنهم وايت بورد wipe and clean حق تمارين ال phonics حق كيجي 2 و تمارين حق الرياضيات والله وايد عجبوني
بعد مره خذيت له من المكتبه اللي بالمثنى نفس نوعية هالكتب تمارين حق الأحرفabc
مشكوره فوز ما قصرتي
بيلا حبيبتي طمنينا على دلوووول إنشالله صارت أحسن
مرووو شلون حفيدتج إنشالله صارت احسن
والحمدلله على مدرسة الرياضيات صج إستانست إنج تطمنتي عليه الله يثبت الستاف اليديد ولا يغيرونه بعد لأن فعلا تعبوا من التغيير
ريمان شخبارج غطيتييي
ملكه حيالله من زارنا إشلونج و إشلون بنتج ؟؟

 

[mr000]

أهلين كراميلا..اشلونج شخبارج..مادري ليش استبرد وآنا اقرا مشاركتج..أتخيل ثلج وبرد..وألا ماعندكم ثلج؟بس والله فرصه تاخذين حق ولدج من هالكتب والقصص التعليميه..آنا أذكر هم كنت آخذ حق ولدي وايد من هالشغلات لما كان بالكي جي وحتى القصص! أي والله كراميلا ياريتهم بس مايغيرون المدرسين خاصة الماث... عاد هذي المدرسه زينه بس جنها هالسنه ماخذه راحتها من حطوها رئيسة قسم وريلها الناظر يعني صارلها قريب الشهر غايبه توها ردت..بعدين حاطين حق الساينس حق غريد 6 مدرسه عربيه اسمها أسيل.. مادري المفروض حق الميدل سكول يكونون أجانب علشان اللغه بعد!فوز وريمان وبيلا اشلونكم شخباركم..اشلون عيالكم...بيلا طمنينا على بنتج

 

[Fouz]

صباح الخير أمهات ،، شخباركم

مرو شلونج و شلون حفيدتج، وديتيها الطبيب؟ الحمدلله على تغيير المدرسة و ان شاءالله يثبتونها الى اخر السنة
اللي توفوا أعمارهم 16 سنة لاحول ولا قوة الا بالله، أظن واحد ولد الداهوم اهو اللي بنفس المدرسة وولد العصفور أمس شفت له نعي بالجريدة من مدرسته أعتقد فوزية السلطان، عسى الله يرحمهم و يصبر أهلهم و يكافينا شر الحوادث


كاراميلا شلونج و شلون ولدج ان شاءالله أحسن
أقولج عن توتنهام كورت رود، هذا اذا تمشيتي باسفورد الى اخر شي يعني عدي اكسفورد سيركس تالي روحي الناحية اليمين من الشارع الرئيسي اللي يقطع اكسفورد تلاقين مكتبات عجيبة و كذا دور، و كل مكان متخصص بشي، مثلا اكو مكتبة بوردرز باكسفورد بس كتبها محدودة أما فرعهم اللي بتوتنهام كل شي فيه
بقولج عن شغلة أمس اشوف الاسعار ترى فيها تفاوت كبير، اقولج مثال أكو كتب من السايت اللي دازينه المدرسة سعرهم ما يعدي 3 دولار، بأمازن لقيتهم على 12 !!! خليني أحط لج أسعار الكتب و السايت اللي دازينه علشان ما تشترينه بأضعاف سعره لان راح تحصلين كتب أمريكية بلندن بس اكيد السعر يفرق خصوصا اذا بتاخذين مجموعة كبيرة، خليني أشوف الورقة و اكتب لج البيانات

بيلا شلونج، بشري عسى دلال أحسن؟ و انتي شلونج و شصار على الدورة ؟ ما تشوفون شر ان شاءالله

ريمان شلونج و شلون ولدج ان شاءالله كل اموركم طيبة

 

[Fouz]

كاراميلا السايت اسمه
scholastic.com/bookclub
و هذي الاسعار بالترتيب حسب الورقة اللي حاطتها
#65 = 1$
#81 =4
#31 = 6
#1 = 3
#25 = 4
#41 = 12
# 88 = 7
#84 = 12
هذي أسعار كتب كي جي 1 أما أسعار كي جي 2 مو حاطينهم بالورقة أكيد موجودين بالسايت
مثال على فرق السعر أول كتاب حاطينه بدولار واحد بس بأمازون 8، ثاني كتاب ب 4 دولارات بس بأمازون 12.74 يعني تطلبينه من المدرسة أحسن لان سعر المدرسة شامل الشحن

 

[ملكة بيتها]

شلونكم مامات
مروو الحمد الله تطمنتي على مدرسه الماث والله يثبتها
كارميلا الله يحييج الحمد الله أنا وبنتي بخير وبنتي مستانسه من المدرسه وعلى الكورس الثاني حسيتها كبرت وبدت تفهم شنو يعني دراسه والحين بدت تنافس بصفها الله يثبتها ويزيدها من علمه ولكم ولعيالكم مثل هالدعوه