تجمع امهات العالمية الامريكية

[حمرة الورد]

سلاااااام أمهات أشلونكم شخباركم ريمااااااااااااااااااااااااااااااااااان شخبارج حبيبتي زين تذكرتينا! نا والله زعلت بالبدايه وعصبت لما أنقطعتوا وقمت أشب وأطفي جني فحمة بخور لي انطفيت مره وحده وسكت! أي والله مابقى شي عالدوام بس تصدقين صج العالميه يداومون مبجر مو كل المدارس معانا وفي مدارس يخلون الصغار تالي مو مثل العالميه يعني الخليج اللي ورا ليلى غاليري عندهم الروضه والريسيبشن عقبنا ب10 أيام هذا حسب كلام وحده من أهلنا حتى بنت أخوي بالكويت الأنجليزيه أعتقد بأول 9!آنا ناويه أدق عالمدرسه لأنهم داوموا بسأل عن دوام رمضان الساعه كم ماشفت بالسايت مالهم وبشوف توزيع الصفوف مابي يحطونه مع الشياطين!! أم نيرمانا التكامل مختلط لي غريد 5 بس عندج الأمريكيه للبنات والأنجليزيه للبنات كلهم بسلوى!والابداع !!

تعرفين عن التكامل شي ............. انا ماعندي بنات

 

[caramella]

السلام أمهات
لا لا ماني مصدقه التجمع عامر عامر عسى دوم إنشالله
إشلونكم و شخباركم إنشالله بخير ؟؟
ما بقى شي عالدوام و صاجين مروو و ريمان مدرستنا أظن الوحيده اللي دوامها مبجر ما أدري ليش وايد وايد مبجر لو على أول9 أهون
بمر المدرسه إنشالله على الإسبوع الياي جني بغير اليونيفورم اللي ماخذته له و بالمره أقايس عليه لأن المره اللي فاتت شريت له بدون ما يكون معاي
الله يستر من الزحمه

 

[حمرة الورد]

بنات متى الدوام احنا الانجليزيه اول اسبوع من تسعه وانتحلطم بعد عيل انتو متى

 

[sara999]

كلي بوديه الانجليزيه الحديثه ..... لان راح يضيع عليه وايد بالنظام الامريكي حسبوها وياي
شلووون انا متشوشه والله .... سلوم مواليد شهر واحد يعني ما ياخذونه الا لما يصير 4 سنوات ويعتبر مو كي جي ون بعد اووووف ابتلشت

 

[ملكة بيتها]

سلام مامات ....شلونكم حبايبي منورين التجمع ....مرووو ... حياتي إنتي بغيت أسألج ( وإنتي سأليلي الناس اللي تعرفينهم و عيالهم بمدرسه الخليج اللي ورا ليلى جاليري) شلون المدرسه والمنهج وفيها نشاطات وكل شي كل شي عنها لأن سجلت بنتي فيها وأنا وايد مدحولي إياها بس ما عندي تفاصيل أدري بتعبج معاي بس ما لقيت أحد عنده عيال فيها عشان أسأله عنها وشكرا .

 

[mr000]

سلام أمهات أشلونكم! أم نيرمانا آنا ولدي درس بالتكامل 4 سنين قبل لاأنقله العالميه بس شنو أقولج عنها في ناس يمدحونها وراضين عنها آنا ماعجبتني وماحكمت عليها من أول شهر أو شهرين آنا تحملت 4 سنين ضيعتها على ولدي وألحين شفت الفرق لما نقلته العالميه! وبالنسبه حق الدوام أحنا ب26/8 كل المراحل تداوم !وصدقوني صج مو غشمره العالميه أول مدرسه تداوم لأنه صديقتي بناتها بالدوليه الأمريكيه العام كانوا عقبنا بأسبوع بس هالسنه مادري بس أغلبهم أول 9! ملكه اشلونج شخبارج بالنسبه للخليج والله وايد يمدحونها من كل ناحيه بنت صديقتي تخرجت منها وبنت ولد أختي بتروح الريسبشن وكانت منقوله من روضة حكومه وماتعرف ولاكلمه انجليزي استغربت اشلون قبلوها وألحين ماشاءالله تعلمت وايد وعيال حماي فيها والله أمهم تمدح المدرسه وايد كافي أنهم ماشاءالله بغريد 1 و2 ويسوون واجباتهم بروحهم وأمهم ما تدرسهم ألا نادر لأنها دكتوره ووايد تسافر وتهدهم أو مشغوله عنهم بالدوام!!

 

[mr000]

بالنسبه للأنشطه في الخليج أي فيها أنشطه بعد الدوام حق اللي يحب يشترك

 

[ReeMaN]

هلا والله برفقاء درب العالميه شخباركم حبيباتي ... كاراميلا انا نفسج بعد ابرد الملابس اللي اخذتهم حق ولدي بسملله عليه اتصدقين وايد فرق علي بالعطله طال وسمن اشوي واليوم قايست له الملابس طلع حده حده .... الاحد يداومون وانشالله بروح الاحد قبل الزحمه وقبل لا اداوم .... ومرووو جنى تعب الصيام على الكبار مساكين هم حر وهم يداومون مبجر ؟ وعندهم دوام الرمضان والا مايراعون صيامنا بعد؟

 

[mr000]

أمهات باخذ رايكم بموضوع شاغل بالي آنا ودي أكلم أحد مسؤول بالمدرسه وياريت أحصل نوره الغانم بنفسها بعرف شنو استعداداتهم حق موضوع انفلونزا الخنازير خاصه أنهم من أوائل المدارس اللي بتداوم يعني مع ردة المسافرين وكل مدرسينهم أجانب غير الطلبه الأجانب أقصد هل مكلمين وزارة الصحه عن تطعيم مثلا والله آنا مستعده أطعم ولدي حتى لو بمستشفى خاص قبل الدوام!!! يعني ماكان يضرهم الله يهديهم لو مأجلين الدراسه أسبوعين أو ثلاثه علما يشوفون وزارة الصحه شنو تقرر أو يوفرون تطعيمات كافي أنه رمضان وحر والله قاعده أحاتي ولدي مسكين صيام ودوام بهالحر!

 

[ReeMaN]

ماشالله عليج مروو بصراحه هالموضوع بالمره مايي على بالي كللللللللللللللشششش وموضوع مو سهل بالمره ..... وصح لازم في احد يبلغ اولياء الامور بهالموضوع وشصار عليه وشنو اجراءاتهم ..... راح نسال فيها انشالله وانتى مروو سالي وكل الامهات سئلو فيها لان صج عيالنا اول مدرسه يداومون ومانبي نقعد على اعصابنا نحاتي .... والله يعينه وليدج على الصيام وانشالله يلع القرار عقب العيد يداومون او على الاقل نص الرمضان يدامون

 

[mr000]

ريمان دوامهم برمضان بالنسبه حق الكبار من 8 ونص لي ال2 هذا كان العام بس أن شاءالله يوم الأحد بدق أسأل!! أي والله مساكين حر وصيام العام ولدي كان يرجع ناشف ريجه وتعبان واللي معاه نصهم ياكلون ويشربون عادي سواء أجانب وألا غيرهم وبصراحه الله يهديهم ماكانوا يراعون أو بعضهم موفاهمين شنو تأثير الصيام عليهم و من ناحية الدراسه والواجبات والأمتحانات من أول أسبوع سيده يدشون بالدروس وواجبات ويبونهم منتبهين ومصحصحين هذي الشغله بس اللي فرقتهم عن التكامل كانوا وايد مراعينهم بشهر رمضان! بس أذكر العام كان عندهم مدرس أجنبي قالهم آنا قاعد أحاول أصوم علشان أعرف شعوركم وشنو تحسون فيه بس بصراحه شي متعب وماقدرت أكمل كم يوم تعبت وحاشني صداع! وعليه على عيالنا!!

 

[ReeMaN]

واعليه عليهم الله يلطف فيهم انشالله ويمسح عنهم ويسهل عليهم الصيام ......

 

[mr000]

شوفي هو موضوع هالمرض موبس بالمدارس يعني المرض وايد قاعد ينتشر وكل يوم يكتشفون حالات يديده ولدي يقولي يابوا عندهم بالمستشفى كم حاله بس حولوهم بعدين الأمراض الساريه وأن نصحوهم أنهم يلبسون كمامات أحسن طول ماهم يتنقلون بالمستشفى بين المرضى والمراجعين وألحين بدوا يردون المسافرين فمتوقعين تزيد الحالات بس الله الحافظ ويقولي ولدي عادي اشفيج هو مثل الأنفلونزا العاديه حتى لو الواحد صار فيه بيمرض أسبوع يعطونه العلاج لما يطيب بعد شيسوونله! آنا بديت أوسوس أقول ماني رايحه المجمعات وايد ناس وزحمه مادري عن هالغرب والأجانب واللي رادين من السفر والله موخايفه على نفسي بس على العيال وبنت ولدي كله معاي بطلعاتي! عاد توني اليوم صارلي موقف خلاني أوسوس أكثر الله يسلمكم رايحه أزور خالتي بالأميري ومسكرين الأسنسيرات علشان الصيانه بس مخلين أسنسيرات اللي حق عمال النظافه والناس تستعملها بعد شيسوون فصعدت جان يصعدون معاي يمكن 10 رياييل وهنود انزين وصلت عقبها وآنا نازله صعدوا معاي عمال النظافه مع ممسحاتهم وتكرمون زبالاتهم وآنا قاعده أقول لاخلاص صار فيني انفلونزا الخنازير! وكملها علي ولدي لما قلتله قالي ليش صاعده بالأسنسير آنا كل يوم أصعد وأنزل الطوابق كلها بالدري لو شنو ماأستخدم هالأسنسيرات الوصخه:0bee2e8d89:!!

 

[lyale]

افااااااااااااااااااااااااا يا مامات اسئل عنكم ولا معبرينييي

 

[غردينيا2008]

مرحبا يا امهات
تنصحوني ادخل عيالي فيها توينز اولى ابتدائي؟؟ وكانو بروضه ثنائية اللغه
التسجيل متى يصكر

 

[lyale]

التسجيل سكر من زمان انا كنت ناويه عليها وسكر تسجيلهم ويوم سجلت عيالي بمدرسه ثانيه فتحو صفوف ودقو وما رحت لان بصراحه كنت حامل وتعبت من لوية المدارس (( كتبت لج قصة حياتي )) خخخ انتي جربي الحين اذا بتسجلين عيالج دقي عليهم انشاءالله تحصلين لهم مكان

 

[ReeMaN]

مساء الخير صديقاتي شخباركم عساكم بخير ......

مرووو الله يحفظج ماكو الا العافيه لاتوسوسين وايد وحياتي لاتخلين اذكار الصباح ودعاء المكان وين مارحتى تحفظ وتحصنج حتى من الامراض .... والف الحمدلله ان انفلونزا الخنازير لقو له علاج ابر ومضاد حيوي جم يوم ويقوم بالسلامه انشالله ..... بس اهو اسمه ايخرع وصح نفس ماقال ولدج اعراضه نفس الانفلونزا العاديه ... وحده انعرفها ولدها صار فيه هالمرض بلندن اسدحوه بالمستشفى ابر ومضاد وطلع عقب 3 ايام واستمر بالمضاد اسبوع والحمدلله طاب واهله خذو تطعيم ....بس احنا مثل ماقلتى لازم نسال الاداره عن اجراءاتهم
لان صج يمكن الاداره غافله عن هالموضوع يا يمددون العطله او يشوفون لهم صرفه

 

[mr000]

أهلين ليالي أشلونج شخبارج أشلون العيال والبيبي! ألحين خلاص استقريتي عالأمريكيه بخيطان والا الأمريكيه مالت السفاره؟ ريمان لا تخافين هذوله ماشاءالله عليهم مايغفلون عن شي بس علشان مايبون يخرعون الأهالي وهم لازم يتفقون مع المدارس الأجنبيه الثانيه اذا راح يصير فيه تأجيل للدوام آنا ماأتوقع يأجلون وهم ملتزمين بكلندر ثابت وعدد أيام دراسه معينه ياخذون عليه موافقه من بره مو بس من الوزاره هني! بس هم نسألهم ليش لأ!!بس آنا باطين جبدي على هالدوام برمضان لأن الكبار مو مثل الصغار يبيلهم دراسه ومجابل وهم بعد مايبطلون من هالأمتحانات والكويزات طول الشهر!! الله يعينا جنه آنا اللي بداوم مو ولدي صارلي كم يوم أتحلطم!!

 

[ReeMaN]

الله يعينا مروو على الدوام والتوصيل والقعده من صباح الله خير وهم يعتبر الدوام طويل بالنسبه حق الكبار الي يصومون ....

مروو مو معقوله من اول اسبوع يعطونهم امتحانات وكويزات بسم الله توهم مداومين بصراحه اجرام منهم اذا من اول اسبوع

 

[mr000]

ريمان اشرايج أنه العام استلم أول ريبورت قبل العيد فأكيد علشان ياخذ ريبورت لازم يكون ممتحن وهم نظامهم مو أمتحان واحد آخر الشهر مثل الحكومه لا أسبوعيا بكل جزء يدرسونه! بس تصدقين هالأيام ولدي مايبينا نييب طاري المدرسه وآلا نشتري أغراض حق المدرسه صج شايل هم الدراسه بصراحه العام تعبنا كراف كراف الدراسه غير البروجكتات! أوف قطع صج شايله هم! رديت أتحلطم!!