تجمع امهات العالمية الامريكية

[ReeMaN]

والله مروو اللي كلمتها اليوم مو مستغربه من المرض كلش .... اتقول انفلونزا عاديه ليش متخوفين منه .... جنها تقولج عن البوشنيتر العقنقز ..... و كل شو ي ماتخافي ماتخافي حقرتها قلتلها امر مره ثانيه انشالله .......

زين مروو بسالج المدرسه اتسوي حفله قرقيعان كل سنه والا لا ؟؟؟ لان اذا في حفله يبيلي ادور له لبس حلو حق القرقيعان وفرصه دام ماداومت بعد واسوي له شغل قرقيعان .....

 

[mr000]

أهلين ريمان أي يسوون حفلة قرقيعان بس العام مارحنا أو كان بس حق الروضه والأبتدائي والله ناسيه بس هو موجود بالكلندر أنه بشهر 9 فيه حفلة قرقيعان وبعد فيه يوم مفتوح شوفي السايت مالهم حاطين التاريخ

 

[Fouz]

السلام عليكم
ولهت عليكم وااااااااااااااااااااايد و عذروني على الانقطاع،، الحين لازم أقرا كل اللي فاتني
شخباركم ريمان كاراميلا مرو سارونة ملوكة ليالي و كل الامهات

 

[ReeMaN]

اي والله صاجه مرووو مشكوووره حبيبتى كل مره انسى اطالع بالكلندر .......

هلا حبيييييييبتى فوز شخبارج حبيبتى شبعتي من العطله طلعتى استنستي سافرتي يالله الحين بنتجابل كل يوم بالدوانيه انشاء الله وماكو عذر غياب الا بالويك اند ماولهتى على الهواش

 

[Fouz]

حبيبتي ريمان ولهت على التجمع و التطفر
والله ما تحركت بالمرة، ذابحتني النساة يوم زينة و عشرة متمددة بالفراش
تصدقون جنكم تقرون افكاري أمس قاعدة أحاتي هالانفلونزا عسى الله يستر
انتي شخبارج عسى استانستي بالعطلة

 

[mr000]

أهلين فوز أشلونج شخبارج ان شاءالله استانستي بالعطله محد فيكم سافر؟ وألا كلكم صامدين معاي؟

 

[caramella]

السلام أمهات
إشلونكم و شخباركم إنشالله بخير
أول شي ليالي مبروك قبول إعيالج بالمدرسه إنشالله يا ربي يرتاحون فيها
خل أقولكم قصتي اليوم مع روحتي للمدرسه
آنا مريتهم بالعشر وشوي
ما كان في أحد بالتسجيل إلا وحده إسمها هاله نفسيه و ما تدري وين الله حاشرها
أول شي سألتها الساعه جم الدوام موعارفه تقولي آنا اليوم أول يوم مداومه و باجي الإداره مو مداومين إتصلي قبل بيوم من الدوام إنقولج
قلت لها شنو جناسي مدرسينكم ردت بكل فخر أمريكان و قلت لها كنديين قالت لأ أمريكان من أصل كندي
سألتها عن إنفلونزا الخنازير بلمت إبويهي ووقالت آنا أول مرة أحد يسألني هالسؤال
قلت لها طبيعي مو إنتي اليوم أول يوم مداومه فعادي إني أكون أول وحده تسإلج بهالموضوع المهم الحين شنو إحترازات المدرسه خصوصا إن مدرسينكم وطلبتكم أمريكان و بيون قبل الدراسه بيوم
قالت المطار إفحصونهم قلت يا سلام سلم التربيه ما تبي تفتح مدارسها إذا ما وصل التطعيم وهذي تقولي يفحصونهم بالمطار
قلت لها إختي مسجله بناتها ويتنج إشصار عليهم
ردت قالت ما أدري عن شي آنا اليوم أول يوم دوام و آنا كنت طالعه إجازة قبل الموظفات اللي هني لا يطلعون إجازة فا ما أدري شنو كانو مسوين على الويتنج لست أو إذا فجو كلاسات يديده مدام ما دقو عليها يعني ما في خلاص
إهني حسيت إن ودي أقوم أفلعها عن جد
ما إستفدت منها إب ولا شي
ما أدري إشحقه مداومه كل شي ما أدري لوعت جبدي
سألت عن الباصات عشان إذا حدتني الظروف وقت ولادتي
الطامه الكبرى
تقولي 20 طالب بالباص الصبح ما معاهم مشرفه بالعربي خدامه مو مشرفه عقب ما سألتها عرفت إن الشرفه خدامه
و أقولها منو يدير باله على العيال بالباص قالت أهو الباص بالعاده ما يمر الصغار أول شي لازم إمر طالب ثانويه قبل
!!!!!!!!!!!!!!!!!!!!!!
قلت لها نعم
إنشالله ياهل بو 4 سنين مع بو 17 سنه بنفس الباص قالت إي والكبير إدييير باله عالصغار!!!!!!!!!!!!!!!!!!!!!!!!!!!
لا تعليق
قلت لها و الظهر قالت لا الباص ياخذ عيال ال كي جي لأنهم يطلعون قبل مع خدامه و يوديهم البيت قلت لها و ليش هالخدامه ما تيي معاهم الصبح قالت هذ سياسة المدرسه !!!!! أموت بالهاسياسه خلو باصكم لكم
إنشالله يا ربي ما أعتاز له
رحت حق مالت الملابس شريت حق ولدي ملابس زياده رديت البيت ولا الهنديه الدايخه مخربطه بواحد من القمصان معطيتني مقاس 5 سنوات و آنا أبي 4
بفلعها الهنديه ردي طقي طريج بس عشان أبدل القميص معنها حليوه بس بتمشورني و آنا بروحي ثقيله مالي خلق عمري
هذي زيارتي البائسه اليوم لمدرسة ولدي العزيز أدري ضيقت خلوقكم بس هذا اللي صار معاي
تحياتي

 

[Fouz]

هلا فيج مرو شخبارج
انا بخير الحمدلله و مآزرتج بالصمود

 

[caramella]

هلا والله فوز شخبارج
مبروووووووووووووووك الحمل الله يثبته لج و يتمم عليج إنشالله يا رب ولهنا عليج

 

[Fouz]

أهلين كاراميلا شخبارج
الله يعينج والله على هاليوم، بس الغريبة انهم مو معطين موضوع الانفلونزا أهمية، بصراحة شي غريب
و المشكلة انهم ما يعرفون شي اسمه تلفون يعني لو تدقين من الساعة 7 الى الساعة 2 ماكو أحد يرد عليج، يعني اكو ويب سايت شنو يضرهم اذا كان فيه متابعة، مواعيد رمضان، اجراءات احترازية بخصوص المرض و غيره
أما سالفة الباصات مصييييييييييييييبة هذي تعتبر من احسن و اغلى المدارس يهيتون يهال مع كبار بروحهم لامدرسة ولا مشرفة يعني لاقدر الله اذا طق السليق بريك و تعور احد من اليهال منو المسعف ان شاءالله؟؟ الله لا يعوزنا
أعتقد لازم في أحد مسئول نقدر نوصله هالملاحظات

 

[Fouz]

مشكورة كاراميلا و عسى الله يتمم عليج و تقومين بالسلامة
انا بعد ولهت عليج و على كل الامهات العسل

 

[ReeMaN]

هلا والله حبايبي شخباركم عادي والله كاراميلا شكلهم اليوم اول يوم لهم يداومون ..... لان حتى مالت الاستقبال ماعندها خبر بالموضوع بس ماتخافي انفلونزا عاديه ماتخافي ولا قدرت اخذ واعطي معاها لان وايد اتقوم واتسلم على موظفاتهم ........ يبيلي روحه ثانيه حق المدرسه الاسبوع الياي لان مثل ماقالت فوز محد يرد عليج بالتلفووووووون مادري شحقه هالبداله

 

[ReeMaN]

مبرووووووووووووووووووووك الحمال فوز الله يتمم عليج يارب ويسهل لج امورج .... صفوني معاكم بالصمووود اصلا احنا فينا ولاء حق ديرتنا مانساااااااااااافر ونخلي ديرتنا <--- ولحد يطالع عيونهها

 

[lyale]

شلونكم مامات
وتحملوني لزقه ما اقدر اهد هالتجمع
المهم ترااا الانفلونزا مرض عادي حاله حال الانفلونزا العاديه بس هم الانفلونزا العاديه كريههه شلون اهييي
كرميلا شلونج بخصوص الي قالت لج اجراءات المطار ويفحصونهم لاا ماكو هالشي اليوم اختي واصله مع عيالها من اوربا تقول بالمطار بس عطونا ورقه وفيها نحط صح يم الاعراض اذا فينا وبس بعدين نرووح المستوصف لو حسينا بهل اعراض

 

[mr000]

فوز مبروك عليج الحمال والله يتمم عليج! كراميلا هذي هاله آنا ماأبلعها وعموما آنا دايما أتعامل مع جيهان حتى لو أقعد أنطر أذا عندها ولي أمر خوش وحده وحليوه وتتعامل بضمير! الظاهر أنطر ماأروح ألا الأسبوع الياي علما يصحصحون من عقب الأجازه بس والله خايفه يكونون وزعوهم على الصفوف!من ناحية الباصات آنا لاحظت الصبح أنه الباص ينزلون منه يهال بعدين كبار بس ترى كل المدارس جذي آنا لما سجلت ولدي بالغانم بباص كان بالروضه بس معاهم خدامه حتى مو مشرفه أو مدرسه وهم كان معاه صبيان بالأبتدائي والمتوسطه بس المدرسه مافيها مرحلة ثانويه بس بصراحه ماطول يعني ماكمل حتى أسبوعين وهونا عن الباص لأنه الظهر يلف ويدور فيه ساعتين حاطين منطقتين مع بعض والصبح يمر عليه وايد مبجر!بس العالميه أشوف عندهم باصات أكثر حتى وأحنا رايحين المدرسه الصبح أشوف باصين معنا بنفس الطريج من منطقتنا!والله تصدقين هم أحنا مفكرين نسجل ولدي بالباص حق الرده الظهر مع أني مو حابه والظاهرآنا راح آخذه الظهر أبوه ماله خلق ينطره!!

 

[ReeMaN]

هلا ليالينا شخبارج قلبي من قالج هدينا؟؟؟؟ اصلا مانبيج اتهدينا خلج ويانا والله يكفينا شر المرض يا ليالي
موضوع موووو سهل حياتي

مروو انا مثلج احب جيهان خدومه واتساعد ونفسها ماشالله حلوه تاخذ وتعطي وياج .... والموظفات ماعندهم فكره عن الموضوع تلقينهم يمكن امس واصلين الكويت .... ننطر على الاسبوع الياي او اللي وراه وهجووووووووم على المدرسه نحقق معاهم باسالفه

 

[mr000]

ياربي ان شاءالله هالسنه تكون خفيفه وسهله على عيالنا ومايكون فيه أي نقص بالمدرسين وألا أي مشاكل عاد آنا حظي كلش مع المدارس الغانم اشكثر من أهلنا دخلوا عيالهم وخوش تدريس وتأسيس قوي ولما دخلت ولدي صاروا خواره واطلعوا من عندهم وايد مدرسات زينين تالي وديته التكامل وأكلنا تبن فيها جان تقولي مدرسه معاي لا التكامل اختربت من عقب ماهدها دكتور ابراهيم الخليفي والمدرسات ماكو تخصص مالت العلوم مره تدرس اجتماعيات ومره انجليزي وكله مدرسين عرب ألحين يبته العالميه عسى ان شاءالله تظل زينه ولايتغير شي بعد وتتخسبق!! لحد الآن هي أحسن من اللي جربتهم قبل وفي شغلات الظاهر هذي بكل المدارس يعني نقص المدرسين وتغيير المدرسين أكثر من مره ولازم يطلع لج مدرس عوي وألا طالب نزقه يأذيهم بالصف بعد شنسوي ماكو مدرسه بيرفكت 100%

 

[mr000]

هو شنو اللي خلي المرض ينتشر غير ان ماكو تدقيق بالمطار الكل يقول يطوفون عادي بدون فحص ومثل ماقالت ليالي بس يقولون لهم روحوا المستوصف أذا حسيتوا بأعراض! صبري بعد خل اييون المدرسين العرب من سوريا ومصر والأردن والمغرب وأيي الخير وياهم بس أشوه دوامهم متأخر يعني يالله بعد أسبوع من شهر9 انتوا من صجكم بيفحصون كل هالأوادم لما ايون جنهم ردة الحجاج المطار متروس بس يبون الفكه منهم ياخذون قشهم ويطلعون!

 

[ملكة بيتها]

سلام مامات .....فوزمبروك الحمال ....بديت أحاتي مثلكم الإنفلونزا من صجهم ما في إحترازات كلش ملش ..أنا ناطره دوام إداره مدرسه الخليج عشان أروح وأسألهم عن هالموضوع

 

[mr000]

سلام أمهات اشلونكم ملكه معقوله الخليج ماداوموا؟ اعتقد المدارس الخاصه كلها تداوم بشهر 8 أتأكد لج من جنة أختي؟ بس أنتوا أحسن لأن دوام الصغار بشهر 9