تجمع امهات العالمية الامريكية

[Fouz]

هلا والله كاراميلا، صاجة الحمدلله على كل حال و اكيد الدكتور ما فتح بطني الا شايف ان فيه مصلحتي انا و البيبي، بالنسبة للاكتيفيتي انا سألتها و قالت ابيهم اثنينهم واحد عن الطبخ و الثاني يسوون اشياء مفيدة من مخلفات البيت مثل قواطي او كراتين و اعتقد انهم يوم واحد بس لان الرسوم 5 دنانير و عشر دنانير ما اظن هالرخص حق اكثر من يوم
مشكورة حبيبتي و ناطرة ردج لان المنتدى يرفع الضغط، حطيت حق بنتي fork fish four five

مرو مت من الضحك على سالفة المصري الله يغربل ابليسه يموتون على البلاش، و ان شاءالله يخف عوار الخياط لان من غير شر زوجي بيسافر و لازم انا اييب بنتي من المدرسة ماعندي احد يقدر يروح لها يوميا وما ودي لثقل على احد اروح بالسيارة و انزل خدامتي تييبها من الصف
الحمدلله ان ولدج صار احسن و ان شاءالله تسجلين حفيدتج لان ماكو الا صفين بالحضانة فسجليها من اول شي

 

[caramella]

هلا والله فوز
أمس والله صج المنتدى رفع ضغطي قعدت لي ال 2 أحاول فيه ما رضى الحين إنشالله بحطهم لج
وزين تسوين حق بنيتج يحليلها خليها تقضي وقتها بالمدرسه وتييج ماخذين كل طاقتها بالمدرسه عشان لا تيننج
و ياحبيبتي الله يقوم عمج بالسلامه ولازم الإنسان يمر بظروف صعبه شوي و إن بعد العسر يسرى إنشالله
زين تسوين خلي الخدامه تنزلها و تيبها لج لي السياره اريح لج والله
إلا على طاري الوجبه ولدي مو طلع 9 ما عطوه وجبه أقول حق إخوي وين وجبته قال ما عطونا شي
مو بس من يه و قعد ساعه عطوه الوجبه لازم يقعد المده كلها نطلع دينكم و تقعدون هاليوم الرياضي كله ولا ماكو وجبه
تخيلي مروو ولدج يرووح و يقعد لي ال 1 بالحر عشان الوجبه لأن ما في وجبات قبل نهاية اليوم الرياضي

 

[eng-khadkhad]

بنات شلونكم بس بعرف هذي المدرسة اسمها ais والال aus ظروري بنات ابي اعرف

 

[caramella]

هذي الورقه الأولى
اتوقع ما راح تطلع واضحه بسبة الحجم اللي حاطينه شويه وايد قللت الريزولوشن عشان يصغر حجم الفايل سويلها زوووم إنشالله تبين

 

[caramella]

وهذي الورقه الثانيه
والأوراق الباجيه فيها احسن 100 قصه مصوره

 

[caramella]

واييي فتحتها تضيق الخلق ما يبين منها شي
بس لما تفتحين المرفق بس سوي كلك عالصوره تكبر و تبين
باجر الpuppet show يبون دينار حقه

 

[caramella]

eng khadkhad إسم المدرسه uas

 

[bella bambina]

بنات شلونكم بس بعرف هذي المدرسة اسمها ais والال aus ظروري بنات ابي اعرف

u a s universal american school

 

[caramella]

بيلا إشلونج و شلون وليدج إنشالله تحسن الحين

 

[bella bambina]

صباح الخير أمهات
اشلون ولدج مرو ؟ وديتيه الطبيب ؟
اشلونج كراميلا واشلون ولدج ؟ ريمان اشلونج واشلون ولدج مع القراءة ؟
هلا والله فوز ولكم باك النشاط مو حق يوم واحد الورقه مومعاي بس ما أفكر أدخل عيالي العام بنتي اشتركت بكل الأنشطه تعبت من الروحه والرده وما أحس انهم يستفيدون شي من النشاط باجر عندهم puppet show عرض عرائس اليوم دفعي لها دينار ورقة أسبوع القراءة بالبيت ناسيه باجي الأشياء

 

[mr000]

سلام أمهات اشلونكم.. الحمدلله ولدي خفت الحساسيه شويه بس مادري متى تروح هالحبوب اللي تارسه ويهها.. يقولي طول الوقت بالمدرسه يسألوني اشفي ويهك...كراميلا وبيلا اشلون عيالكم.. بيلا اشلون نتيجة تحليل ولدج عسى أحسن؟؟ فوز أشلونج الله يعينج توج عقب العمليه... بس عسى شقتج مو فوق ودري؟؟ ديري بالج على روحج من النزله والصعده وايد...أي والله فوز شفتي اشلون ماشاءالله عليهم هالمصاروه مايفوتون شي وولدي بس كله يدفع ومايرضى يروح .. ألحين يقولي عن حفلة تخرج غريد 8 أنه مايبي يروح.. بس بيدفع قلتله يلا عاد ترى مصختها...مادري ليش طبعه جذي سبحان الله من صغره أذكر يننا على حفلة تخرج الكي جي بالغانم هم ماكان يبي يروح وطول الوقت بالحفله عالمسرح عافس ويهه.. والله ليلحين عندنا شريط الفيديو.. فشلنا أخذ الشهاده من الناظره ومشى ماسلم عليها..لو ماهي سحبته ووقفته يمها حق الصوره وهو مبتسم بالغصب يعني مبتسم على عافس ويهه.. ههههه والله صورته تضحك!!

 

[Fouz]

شلونكم أمهات و شخباركم

مشكورة كاراميلا ما قصرتي، تصدقين ما وصلتني هالاوراق!!!! توني اشوف ان عندهم بيجامة داي و سالفة القصص القديمة شي غريب مادري ليش عندهم هالمشكلة دايما ، يعني الاوراق ما تتوزع على الكل بنفس الوقت

بيلا شبارج، انا قلت حق اختي تسأل مس مروة شلون يروحون صف الاكتيفيتي الظاهر المدرسات يودونهم فبدال ما اخذها الساعة وحدة اخذها 2 وربع يمديني ارتاح شوية اسم الله عليها يبيلها قلب، الورقة عندي بس مو كاتبين جم مرة، اللي محددين كلاساتهم السباحة و الكاراتيه و هالسوالف اما الباجي ماكو شي بخصوص عدد الكلاسات
انا عطيت مس مروة دينار الاسبوع اللي فات بس استغربت بنتي تقول ييبوا دينار الظاهر قايلين حق كل اليهال اللي ياب و اللي ما ياب، عموم انا بدز لها مسج و هم بودي مع خدامتي دينار باجر بعد ما يندرى عنهم

هلا والله مرو، عمليتي الله يسلمج تحت كلش بس احس ان بطني شاد علي و اسم الله عليها الصغيرة تبي الشيل ، صج اذا قالوا الجنة تحت اقدام الامهات عسى الله ياجرنا ان شاءالله، ما تقصرين على النصيحة علشان جذي اقولج انا بسوق السيارة بس بخلي الخدامة تنزلها المدرسة و تييبها لما يخف علي الجرح و اتعافى يارب، اذا علينا يا مرو بس ندفع و ما نستفيد مو مثل الاجانب كل فلس يعرفون وين يحطونه، طالعي ولد كاراميلا فقير هم راح و هم ما عطوه وجبته!!! بس حرصي على ولدج يحضر حفلة التخرج هالاشياء ما تتفوت حسافة

يا أمهات احد نده فكرة عن المرة؟؟؟ عبارةة عن دواء شعبي يقولون يخلي اجرح يبرى بسرعة،، تعرفون شلون، يعني اكلها و الا شنو لان قالولي مسحي على الجرح يعني لنفعها والا شالسالفة!!! اللي تعرف شي تقولي بالتفصيل لأن أمي الله يحفظها صار عندها ظرف طارئ و مسافرة يومين و ماكو مرجع نستفيد منه

 

[caramella]

فوز حبيبتي بيلا واصلتها الورقه و عيالكم بنفس الصف ليش بنتج ما عطوها؟
أو اخاف عطوها و طاحت منها ولا نسوا يحطونها بجنطتها !!! سألي المدرسه إستفسري منها عشان مره ثانيه يحرصون يعطون الأوراق كل اليهال و يتأكدون إنهم إنحطوا بجناطهم لأنهم يهالو ما يصيرون حريصين على الأوراق
فوزز ما عندي فكره عن موضوع السيزيريان بس قاريه جم موضوع فيهم فوائد المره للقيصريه دشي قسم النساء و الولاده في وايد من هالمواضيع اللي تفيد
الله يرجع الوالده بالسلامه
ومررررووو يالله عاد صج مصخها ولدج حتى حفلة التخرج ما يبي يرووح عيل خليه يلبس اليونيفورم طووول هالإسبوع ولا يدفع حق الحفله نص دينار كل يوووم عقاب له
فهميه إن هذي ذكريات ما تنسي احلى ايام عمره خل يعيشها
بيلا ومروو والله الحمدلله ولدي شوي تحسن

 

[Fouz]

أهلين كاراميلا
مادري ليش ما يتني هالورقة و باجر ان شاءالله اكلم مس مروة تحرص انها تحط اوراقها خاصة هالفترة، بس الجدول الحين:
الاثنين puppet show
الثلاثاء بيجاما داي و ييبون فلاش لايت و قصة علشان يقرونها، الثلاثاء المغرب المكتبة طبعا ماراح اوديها
الاربعاء ييبون قصة يتبادلون فيها مع اليهال
الخميس يلبسون ملابس كاركتر من قصصهم المفضلة يعني لازم سوق
اذا اكو شي ثاني بليز بلغوني

 

[bella bambina]

السلام أمهات
فوز يمكن الورقه عطوها اليهال يوم بنتج كانت غايبه بالنسبه حق النشاط كاتبين اليوم الاخير راح يعتمد على موعد بداية النشاط راح يبتدون من 21 مارس آنا أذكر يطول النشاط كذا اسبوع يبلغونج بعدين متى ينتهي
قالو لي عن المرة وايد حريم قالو احطها على الجرح من برة وانقعها بماي واشربه بس طبعا آنا من النوع اللي ما أحب أجرب هالسوالف ولا حتى لهوم او قبوط او حسو العصيده بس يمكن آكل شويه حق المتن بس والله هذا كله حطيه على جنب أهم شي الحركه عشان يبرى الجرح وتردين حق حياتج الطبيعيه آنا قعدت 6 أيام بالمستشفى ما أتحرك وبس أبجي من الألم بعد ما طلعت بيومين احتجت أغراض من الجمعيه وزوجي اليوم وباجر فركبت سيارتي وأمشي بالجمعيه وأتسند على الأرفف وأبجي شريت الأغراض بس والله ما أبالغ اني بعدها حسيت اني أحسن وتجرأت وحتى عيالي قمت أوصلهم المدرسه
مرو والله ما فضى زوجي يودي ولدي حق التحليل كل يوم عنده دوامين بالبنك وساعات حتى الظهر ما يرجع البيت وآنا ما أقدر أوديه بروحي

 

[caramella]

فوز شنو هذا فلاش لايت ؟ ما انتبهت له
بعدين قصص ولدي كلهم يدد إشحلاتهم شاريتهم له من برا ماني معطيته يتبادل مع اليهال لا و كاتبين لج إنها ما ترد له بعد بشتريله قصه عاديه يوديها يتبادل فيها مع اليهال
أما هذي لبس الكاركتر اللي عالقصه شي عجيب من وين القى لبس نفس القصه بالله

 

[mr000]

كراميلا قصص ولدج اللي من بره خشيهم حقه لاتسوين سالفتي آنا هم اذكر كنت يايبتله قصص من لندن لما كان صغير ووده منهم حق مكتبة الصف وسلامتج ماشفناهم.. ومره كنت رايحه فيرجن بالمارينا وتذكر إنه يبي قصه حق العربي مثل ماقلتي يتبادلون بس علبالي بيردونها واشتريها بدينار وشي تالي تبادل مع واحد سوداني قصته والله تقولين مالت السبعينات أوراقها صفر ذايبه مالت مكتبة سمير وسعيد هذا انتوا مالحقتوا عليها مطبعه بمصر.. والله مكتوب عليها 100 فلس.. مادري مالت أبوه خاشهم حق عياله ...اللي تالي قلتله ردها عليه قوله خلاص قريتها اخاف يبيها حق اخوه الصغير وإلا بيخشها حق عياله وآنا من صجي منكسر خاطري عليه طلع أبوه دبلوماسي بالسفاره..

 

[Fouz]

أهلين بيلا، والله الظاهر مثل ما قلتي ان وزعوا الورقة يوم الهاف داي لان كان ثاني يوم زلادتي و ما وديتها علشان الغبار، و صاجة الحركة ضرورية بس عيون الاوادم ما تخليج اذا شافوج طالعة من اول الايام

كاراميلا هذا الفلاش لايت


و لا تودين القصص السنعة لان انا بسوي نفس الخطة مالتج بشتري قصة بوطقة من المكتبة و خلاص، بالنسبة للبس اكو محل بالمهلب بدور السينما فيه هالملابس و بنتي تبي سليبنغ بيوتي باجر بوصي اختي توديها مالي خلق الحنة

مرو ضحكتيني على سالفة القصة ام الاوراق الصفر، افا عليج بشوف قصة اي كلام و اوديها عاد كل شي الا القصص السنعة وين تحصلين مثلهم، الا اذا بنطلع عذر لاااازم نروح لندن نشتري قصص شرايج بهالعذر؟؟

 

[bella bambina]

صباح الخير أمهات
فوز وكراميلا لا تدوخون راسكم بلبس الكاركتر أي لبس عندكم بالبيت آنا عندي لبس tinker bell و snow white
العام خبيت نفسي ودورت حق ولدي لبس حسبالي لازم من القصص لقيت له cat in the hat ولما رحنا المدرسه الا الصبيان لابسين سبايدر مان وبات مان والبنات لبس princesses

 

[mr000]

السلام أمهات اشلونكم..فوز أفا عليج اشدعوه ماقلت هالعذر حق ريلي هالسنه لي سافرت لندن ان شاءالله صج بييب قصص حق بنت ولدي بس ياريت أعرف شنواللي يطلبون حق الحضانه أو عموما باخذ لها شغلات تناسب عمر سنتين ونص و3 سنين...أي والله فوز ديري بالج على روحج.. مو بس عن عيون الناس.. هم علشان صحتج.. هي الحركه زينه.. بس هم ديري بالج علشان الجرح.. ان شاءالله ماعليج إلا العافيه.. كراميلا وبيلا اشلونكم.. ريمان مادري وينها تختفي..