تجمع امهات العالمية الامريكية

[mr000]

أهلين أم حمود آنا ذاك اليوم عقب الأجتماع كنت بقولج عن هالملاحظه سالفة كثرة الطلبه العرب مثل المصريين وغيرهم وماشاءالله الصبح يدشون 3و4 أخوان يعني مستحيل يدفعون من جيبهم 9آلاف أو 12 ألف السنه رسوم المدرسه هذا كله دوامات الأهل يدفعون لهم حتى الملابس والتقويه من كان ولدي بالغانم والتكامل كنت أشوف الموظفه بالمحاسبه تطبع لهم رسايل حق دوامات الأهل وتعالي شوفي 4و5 عيال والرسوم بالآلاف يقولي أخوي هو مهندس بشركه قطاع خاص يقول تصوري العرب والأجانب اللي معاه المهندسين والمدراء كلهم مدارس عيالهم الأجنبيه مدفوعه من الدوام ألا هو يدفع حق مدرسة بنته وكلمهم مارضوا قالوا الكويتي مايشمله وحتى اللي ساكنين بنفس المجمع معاه أغلبهم لبنانيين يقولي كلهم عيالهم بمدارس أجنبيه وتذاكر السفر كل سنه والسيارات كلها مدفوعه من الدوام يعني المعاش ماشاءالله يدش جيبهم صافي! والله كنت أفكر أقول ليش هالعباله صعدي ونزلي علشان تدفعين حق الملابس بس أكيد مايأمنون يخلون عندهم كل هالمبالغ!!

 

[bella bambina]

مساء الخير أمهات
اي والله مروو صاروخ :dddds: آنا أول السنه شريت حق عيالي من المخزن بلايز بولو فقالت لي وبعد لازم قمصان قلت لها عندي ملوت العام مع اني ما أشتري لهم قمصان لأنهم ما يرتاحون فيهم بس أبي أفتك من حنتها

 

[mr000]

ياريت والله أذا في أحد عياله بالهاي سكول يفيدنا في بعض الأمور آنا سنه اليايه ان شاءالله ولدي ب9 يعني هاي سكول ووايد قاعده أحاتي خاصه من قالتلي بنت عمي هي عيالها تخرجوا كلهم من العالميه بس آخر واحد على غريد11 قام يحن عليهم ألا بينتقل الأبداع قايلين له ربعه اللي انتقلوا هناك أنه واجباتهم وبحوثهم أقل وامتحاناتهم أسهل واشتغل عليهم بالحنه تقول عيزنا مو قادرين نقنعه غصب خلص 11 وحق غريد 12 لزم ينتقل وسوالهم سوالف وحركات وزعل لما نقلوه وكانت أمه متضايقه بس تقول شسوي الصبيان كل واحد يقول حق الثاني روحوا الابداع أو البيان أسهل بالثانويه!! قلت الله يستر عاد بروح اللي عندي مايحب الدراسه ويبي الشاره بس أحد يقول له هالمدرسه أسهل!!

 

[mr000]

أي والله بيلا هالهنديه خاصه مع اللي مايدري تقص عليه العام أول سنه ناقله ولدي ومادري عن لبسهم وقوانينهم خلتني شريت ب85 دينار ملابس ونصهم طاحوا بجبدي!!وبعدين صح ميخالف تبديل الملابس بس ذاك اليوم جدامي صبي يايبته الخدامه وتبي تبدل بنطلون الرياضه بشورت بس المشكله أنه الولد ياي لابس البنطلون وخلته يبدله دش غرفة القياس فصخ البنطلون ولبس شورت وراح صفه انزين اشلون جذي ترد تبيع شي ملبوس حتى لولابسه مسافة الطريج ماتدرين عن نظافة الولد!!

 

[bella bambina]

الظاهر الخدامة هنديه من ربعها فظبطتها ولا اللي أعرفه ما يصير

 

[umhomood]

مروو بصراحة ظلم المهندس لانه كويتى ما يدفعون له ويدفعون لباقى الجنسيات 0 اذا يحسبونها على الكفاءة ففى كويتيين وايد اكفا من غيرهم ويشتغلون بضمير00 والله الجنسيات الثانية يفكرون ان معاشات الكويتيين تكفى ما يدرون ان ولله الحمد الواحد تطلع عينه بالمصاريف بس يبى يطلع عياله بمستوى ومستقبل احسن 0 0 اما حجيك عن الهندية اللى رضت بالبنطلون الملبوس ما يهمها شىء عارفة انه محد راح يعرف وما فى رقابة عليها اهى اللى ماسكة المخزن بس مدام دريتوا بهالشىء شيكوا على اغراضكم قبل لاتاخذون منها00 وجان زين مثل ما قلتى نلقى احد عنده عيال بالهاى سكول 0

 

[mr000]

سلام أمهات اشلونكم!كراميلا وفوز وريمان اشلونكم شخباركم! كراميلا طمنينا عليج! ريمان اشلون وليدج مع المدرسه؟ قمر شخبارها من زمان مالها حس!!اليوم ولدي بدى التيوترينج عسى يطلع بفايده الله يعينا عالدوام لي الساعه 4!!اليوم ثانويه ولد أختي مادري شسمها بالقادسيه طالع عندهم كم واحد فيهم انفلونزا الخنازير بس آنا مستغربه لما يكتشفون حاله ليش يطلعون الطلبه كلهم من نص الدوام وفوضى ولد أختي داق على أمه بنص الدوام اتيي تاخذه طلعوهم مبكر انزين مردهم بيداومون الأيام اليايه!!

 

[mr000]

سلام أمهات اشلونكم! اليوم ولدي يقول خذوا حرارة الطلبه بصفهم كلهم! عادة هم مايسوون هالأجراء حق كل الفصول ألا الصف اللي يطلع فيه حاله الله يستر ولدي يقول عندهم ولد مريض وغايب وكان عندهم ولد هم غاب أسبوع وداوم! المشكله أن بأكثر من مصدر مكتوب أن مريض انفلونزا الخنازير يظل حامل الفيروس لمدة أسبوع بعد شفاءه يعني ممكن الطالب يعدي بعد مايشفى ويداوم وأكيد نفس الكلام ينطبق على هالناس اللي يشفون ويطلعون على طول يختلطون بغيرهم بالأماكن العامه علشان جذي المرض وايد قاعد ينتشر بالكويت!! الله يحفظ الجميع ويفكنا من هالبلاء!!

 

[caramella]

السلام عليكم أمهات
إشلونكم و شخباركم
والله مروو الحمدلله بخير
إشلونكم و إشلون عيالكم
أتوقع دوام اليهال كي جي 1 أول ديسمبر شكلهم المدرسه مو قادرين على إنهم يتخطون قرار الوزاره
صاجه مرووو مسوين إنفلونزا الخنازيير جنه إيدز أعوذو بالله
إشدعوا المدرسه كلها تطلع
اليوم بنت إختي مداومه فيها إحتقان و نشله و رايحه الطبيب قايلها ما فيج إنفلونزا الخنازير وداومت خايفه تطوفها دروس لأن إهي بالثانويه إسم الله عليها
إلعبوا في حسبتها الأبلات عصبوا عليها حيل واللي تحقق معاها إنتي شنو فيج و وخري إبعيد مناك وخلوها إتدق على إبوها ييه خذاها و قامت تبجي المسكينه من كثر ما زفوها المسكينه قايلين لها دكتورين ما فيها إنفلونزا الخنازير إشيبون بعد

 

[mr000]

أهلين كراميلا مسكينه بنت أختج ماتستاهل يسوون فيها جذي ألحين آنا من بدت المدرسه كله خايفه ولدي يمرض عادي يعني نشله وكحه من التكييف وتالي المدرسه علبالهم فيه انفلونزا الخنازير ويمنعونه أنه يداوم وخاصه أنه فيه ربو وأقل برد من المكيف يقوم يكح طول الوقت و آنا أصعب شي عندي الغياب لأنه مشكله لما تفوته دروس وامتحانات!

 

[bella bambina]

هاي أمهات اشلونكم واشلون عيالكم ؟
وحدة بصف بنتي وأمها مساعدة بالمدرسة بالكي جي قالت حق بنتي ان أخوها الصغير فيه انفلونزا خنازير وغايب وبعدها بيومين ارتفعت حرارة رفيجة بنتي وردوها البيت وصار لها كم يوم غايبة بس الأم مداومة وبنتي قاعدة توصل أوراق العمل حق صف الأم آنا خايفة تداوم البنت هالأسبوع وتكون ليلحين تعدي وبعدين اشلون يخلون الأم تداوم وعيالها بالبيت فيهم المرض يمكن تكون حاملة للمرض وتعدي عيال صفها ؟؟؟؟؟؟؟؟؟؟؟؟

 

[ReeMaN]

سلام امهات شخباركم عساكم بخير؟؟

اشلونكم مع الاجازه انشالله مستانسين ولدي صارله يومين مريض حراره خفيفه والله كريم
كاراميلا شخبارج حبيبتى ؟؟ ماتشوف شر بنت اختج اى مسكينه بروحها تعبانه من المرض وهم يلعوزونها الابلات والبنات ؟

 

[mr000]

سلام أمهات أشلونكم! ريمان مايشوف شر وليدج استغفرالله هالفتره جو مرض !

 

[mr000]

سلااام أمهات اشلونكم شخباركم!:eh_s(6): اشلونكم مع الويك اند واللويه! الأسبوع الياي كله امتحانات الله يعينا​

 

[mr000]

وينكم أمهات العالميه اشفيكم اختفيتوا؟؟؟ في مشكله بالماث مضايقتني وهي اللي مخسبقه ولدي مادري اشلون نظام المدرسه جذي وأفكر أني أتكلم مع الناظر بس أخاف المدرس علباله عنه أو المشكله بسببه! الله يسلمكم العام بغريد 7 كانوا الطلبه مقسمين على حسب المستوى بعضهم يدرس ماث عادي وبعضهم يدرس pre algebra وولدي كان يدرس ماث عادي لأنه ماكان مستواه زين بالماث من مدرسته الأوليه والحمدلله بالعالميه على أيد مدرستهم مس أسينبيرج ممتازه أخذ ولدي آخر السنه شهادة تفوق بالماث بس اللي صار هالسنه أن خلوا غريد 8 كلهم يدرسونalgebra فاللي مودارسين العامpre algebra مثل ولدي متخسبقين هالسنه وآنا كلمت كذا أم بالأجتماع كلهم قالوا نفس الشي ومسجلين عيالهم بالتقويه فمادري شالحل حرام الطلبه ضايعين وموقادرين ياخذون علامات زينه بالأمتحانات! اشرايكم أكلم الناظر؟؟

 

[bella bambina]

هاي أمهات اشلونكم ؟
الله يعين ولدج مروو ليش تكلمين الناظر بروحج؟لازم كل أولياء الأمور اللي متضررين يقابلون الناظر مع بعض لأنها مو مشكلة ولدج بروحه ولما تصيرون مجموعة راح يهتمون حق الموضوع أكثر
هالفترة كلها امتحانات الله يوفق الجميع

 

[mr000]

سلام أمهات اشلونكم! اليوم ولدي يقول بصفهم ولد يقول أخته فيها انفلونزا الخنازير انزين الولد قاعد يداوم لاسمح الله لو ينعدي من أخته أكيد بيعدي باقي الصف!! والله مادري شنسوي احترنا يعني كل طالب بيعديله عايله كامله علشان نسبة انتشار المرض كبيره بالكويت!!

 

[Fouz]

السلام عليكم
شخباركم أمهات، انا من بدا الدوام و كله مالي خلق لا و يوم الخميس الاصنصير خربان و مكتبي بالدور الثالث، سلامتكم هديت الدوام و رجعت وين فيني شدة أصعد دري
مرو كلمي مدرس الصف عن هالموضوع و شوفي شيقولج؟ و مثل ما قالت بيلا اذا الاهل متضررين هم أحسن الكل يتكلم
أما سالفة الانفلونزا والله تعقدنا، بنتي كانت معزومة الخميس اللي فات و ما كنت ناوية اوديها بس اختي قالت لي توكلي على الله و حصني البنت و انا اوديها ، تصدقيون ردت طااايرة من الوناسة حبيبتي والله متنا من الحكرة في البيت و التطعيم خرعونا منه مادري شنو الحل

 

[mr000]

فوز والله آنا أطلع مع عيالي الجمعه والسبت نروح مجمعات لأنهم طول الاسبوع مايطلعون حدهم المدرسه والبيت وصح ممكن الواحد ينعدي حتى من الأماكن العامه بس بالصف لما طالب قاعد معاهم طول اليوم وأخته مريضه بعد احتمال كبير لاسمح الله ينقل لهم المرض

 

[bella bambina]

هاي أمهات اشلونكم ؟
فوز والله آنا قررت ان ما أطعم عيالي مو عشان خايفة من التطعيم بس لأني حسبت ما شفت وعرفت ان المرض مو وايد مؤذي كثر ما اسمه يخوف