تجمع امهاات 2007 خلونا نستفيد من بعض

[كيت كات]

يالله هذي الصورة من اخراج ابوه
حمدالله والشكر الام والابو كلهم تيريلالي:eh_s(20):

 

[lolo77]

صباح الخير امهااات
شخباركم واخبار اعيالكم

كيت كات ها شالزين شالصور من الحين امعلمينه
هاها
الله يخليه لكم

 

[كيت كات]

لولو 77 هلا وصباح النوووووووور
شفتي شلون ؟؟
خخخخخخخخخ

 

[أم حيدر]

والله كيت كات انا على قولة امي صاير جني دياية بيت ما اطلع وايد - الحين موسم حساسية والفيروسات تحوووووووس بالجو الله يحفظهم مساكين

 

[lolo77]

ملاك الروح
تصدقين عاد ما ادري اشفيهم على قص شعر الياهل
انا ما قصيت شعرها بنتي وقتلهم ما راح اقصه بروحها قرعه وقاعد يطيح
متى ما كثر وحسيت يبيله تعديل اعدله بس

امس رحت طعمت بنتي صج تكسر الخاطر
انا اشوي بغيت ابجي
امبيه تخيلوا 3 ابر اثنين بريل وحده ووحده بريل الثانية
وغير النقط قامت تفحط مسكينه
لا اول شي قبل التطعيم قاعده تناغي وتضحك بعدين اصرخت

 

[كيت كات]

ام حيدر ياليت ما اطلع موعن شي بس انا قاعدة بشقة عند حمولتي ويضييق صدري واهلي ماشاء الله كله لويه بلويه يونسون احداث ومسلسلات ما اقدر يطوف يومين الا وانا طابه عليهم والحلو اكثر ان من ابوي وامي لي اصغر ياهل بالعايله من عيال خواتي واخواني يحبون حمودي ويطيرون فيه طيران عاد انا احب انكون نجوم الحفل خخخخخخخ
لولو 77 ماتشوف شر ياعمرييييييييييي حمودي هالاربعاء الله يستر عاد انا قبل كله اشوفهم يطعمون عيالهم بحكم عملي بس ما تصورت ان يعور القلب جذي

 

[malak_alroo7]

]السلام عليكم
تسلمون على الردود بنات
و انا الصراحه ما اقول ريلي لا اقول امى ما ترضى لانها صج اهي مو راضيه اقصه
بس بالنسبه حق حمولتي اكثر اللي يتدخلون اهم حريم حمواني يبيله على يوم اجعمهم عدل علشان ما يتدخلون بس عاد انا استحى لوول شلون بجعمهم؟
و خالتى ام ريلي فقيره ما تتدخل وايد

يا عيني على الصوره كيت كات الله يخليه لكم ان شا ءالله

لولو والله هاليهال يكسرون الخاطر .. انا اول ما طعمو نوره اهى تبجى من صوب و انا ابجى معاها فلم عندي لووووول

 

[أم حيدر]

ماكو أغلا منكم عشان احتفل معاه

انا بهالمشاركة راح أصير برونزيية

 

[أم حيدر]

الفال لج كت كات مو باقي شي وينصبغ لونج انتي بعد

 

[كيت كات]

مبرووووووووووووين تستاهلين ام حيدر كل الخير

 

[منورة الكويتية]

خخخخخخخخخخخخخخ ياحلاتج ياكت كات انتي وولدج من الحين معلمييينه وسلممممممممممممم قلبه الله يحفظه لج ولابوه يارب ويقر عينكم فيه وتشوفووونه شيخ لووووول مو بو بطل :d

الف مبرررررررررررروك ام حيدر انتي مفروض الماسيه والله مو بروزنيه


بنات جربت الفارليز امس مع الممية قبل النوم وعادي ماستنكرتها ولاا شيئ ونامت وراها لي الصبح


بنات انا احس ان نوره عصاقل ابيها تختوووخه شلووووووون؟

 

[رفرف]

شلونكم امهات ؟؟
انا حدي فاصلة اليوم كلش ما نمت الا ساعة الضحى والحين ساعة ومواصلة من امس ..
مسوكة بس اتصرررررخ طول الليل يا اتشيلوني والا ابجي !!
تنام على ايدي ومن احطها بالفراش اتصرخ ..
وطنقرت على امي واختي امحسسيني اني أم مجرمة مع اني والله خوش أم ضميري مرتاح من هالناحية انشالله بس كلما شافوها تبجي يحنون شيليها ..
والا يأذوني يوعانة ويوعانة ..
يبا والله مو يوعانة انا أدري متى رضعتها وشكثر شربت مو يوعانه !!


منورة اذا تبين بنتج تمتن عطيها تمر ومخفف مع ماي يتفخ الياهل ..
او غيري نوع الحليب ..
وعموما من تبدا تاكل بتمتن مع السيريلاك والفارليز والفاكهة وربعهم لا تشيلين هم ..

انا بناتي كلهم عصاقل لأني ارضعهم طبيعي على قولة خواتي حليبج خرطي خالي الدسم ..
وصبوية لما بديت اعطيها صناعي انتفخت بس كانت كبيرة شوي على ال8 شهور عطيتها نان2 صارت اتهبل خدوووود لأول وآخر مرة بحياتها هالعصلة ..


الا بنات الحبوب اللي بخدود البيبي من شنو تطلع ؟
مسوكة طالع لها حب شباب خخخخ مع اني ما اخلي احد يحبها ولا يجيسها لووول انا ام مفترسة ..

 

[لوكريسيا]

شلونج رفرف .. انا سامعة من دكتور ان الحبوب يطلعون يا من كثر ما تبوسونها أو من الرضاعة الطبيعية ( شي عادي يتعلق بمكونات حليبج شنو كليتي و شنو شربتي ) او شي يسمونه حرار تطلع هالحبوب من غازات بطنها و بسسسسسسسسسسسسس ..

لا تشيلين هم

 

[كيت كات]

اهلين بنات شلونكم
منورة مشكورة ياعمري ويخليلج نويرة
انا بديت احط حلبة بكوب عليها ماي حار واحليها بسكر نبات واخلي حمودي يشربها يقولون تمتن وتقوي العظام ...
رفرف انا مودي يا قلبي خدوده فيها حبوب بس انا ادري من شنو

من كثر التبوس
رحت اليوم سنتربوينت وااااااااااي شفت شغلات تزووووغ شريت مثلعلبة موسيقى نحطها على السرير مال البيبي ماركة ديزني بووو ونسكر الليتات وتشتغل موسيقى وثل سينما تعكس على السقف بصور باباي وورود وناااااااااااااسه

 

[nandoshia]

ألف مبروك للأخت أم حيدر ومنها للأعلى
اشلونكم ياامهات شخبار بيبياتكم ربي يحفظهم من كل شر يارب
باجر انشاالله تطعيم بنتي ثلاث شهووور (الدرن) ابره الروضة قبل ..... الله المعين
سلامي للجميع

 

[أم حيدر]

كيت كات- تستاهلين الطيب يا بعد قلبي

منورة - تسلمين يالغالية - من سار على الدرب وصل منور ترى حتى وليدي عصقول بس الحمدلله صحته زينة - خليها معصقلة احسن لا تجيب العين- واذا مصرة تبين تمتنينها فوحي عيش مصري وشربيها ماي الفوح بالممية هذا الوصفة تمتن

رفرف - السيريلاك صج يمتن على قولتج - بس مع ولدي بطل مفعوله لووووووووووول - بالنسبة حق الحبوب في كريم مرطب عطاني ياه الدكتور حق دوري لما كان صغير وقالي كل يوم حطيله بالصبح وبالليل خالارجع البيت واحطلج اسمه - لان هالحبوب لازم تتعالج عشان ما تصير اكزيما اسم الله عليها.
وبالنسبة حق بنتج وحنتها جربي قبل وقت نومتها تدهنين بطنها بزيت زيتون دافي ودفي فوطة صغيرة وحطيها على بطنها - بس لما تدلكين بطنها دلكيها باتجاه عقلرب الساعة - لانج لو دلكتيها العكس راح يصير فيها اسهال تدليك العكس ينفع حق اليهال اللي فيهم امساك
وجربي تنومينها على بطنها والله يعينج.

نندوشيا مشكوووووورة حبيبتي وتستاهلين الطيب - وما اوصيج هالله هالله بالكمادات الدافية والتدليك السنع ولا تنسين تعطينها ربع قطرة تايلنول على طول عقب ما تطعمينها- وما تشوف شر

 

[أمواج البحر]

منورة .. الفارليز وايد حلو حق الياهل ... واهم شي انه يشبعه قبل النوم

انتي ترتاحين و الياهل يرتاح ... واذا تبين بنتج تمتن ماي العيش المصريي

فوحي العيش و شربيها مايه عيالي على طول فقيرً ولدي الصغير سعودي عطيته لمااااا لاعت جبده خخخخخ

رفرف ... الياهل بهالعمر يحيَر و خو الامهات حدث ولا حرج

انا اسم الله عليهم عيالي اربع و امي لي الحين تقول ما تعرفون حق اليهال

ودام انج مرضعتها و مغيره حفاظتها خليها حتى لو تبجي شوي و تسكت

صدقيني بعدين انتي بتاذين اذا رديتي بيتج

والحبوب اللي في ويهها اعتقد عشان انتي ترضينها طبيعي و لابد يطلع

عادي بس اهم شي لا تخلينه ناشف

اكو كريم اسمه ديكوبال رهيييب هالكريم استعملته تقولين سحر و اهم شي مافيه كرتزون

nandoshia ان شاء الله ما عليها شر بنيتج و عموما ترى هالتطعيم ما يسخن البيبي

ومثل ما قالت ام حيدر عطيها تايلينول وما عليها الا العافية
.
.
اليوم الساعة 5 الفير ولدي حبيبي قعد و مستعسر عطيته رضعته و معصب عليها ما ادري اشفيه احطها بحلجه و يحذفها

لما اخر شي استسلم و رضع و ناام

وحدي الحين دايخه

 

[منورة الكويتية]

امواج البحر-ام حيدر-

عيل كلكم متفقين على ماي العيش
بجرب وبشووووف
ورفرف انا اعطيها مرات ماي التمر بس المشخال الي عندي بالبيت شوي كبير ف يطلع الماي ثقيل ولاا ينزل لها شيئ من الرضاعه ف بطلت الا اذا رحت لاهلي اعطيها هناك



كت كاات انا شريت اللعبه الي تدور فوق السرير من سنتربوينت والنصابين لمن رديت البيت ولاا قطعه ناقصه هذا ايام النفاس ف استثقلت اردلهم وكاهي مقطوووطه بس شكل الي خذيتيها حلوه من اي سنتر بوينت؟ وبجم؟

 

[كيت كات]

من سنتر بوينت فحيحيل رووووووعه احلى سنتر بوينت بالكويت والله متادري عشان عندهم هناك الامريكان
وعليها خصم كانت ب16 صارت ب13
وعندهم كياس البيبي الخام قممة ورخااااص

 

[Miss_Tiger79]

اشلونكم امهات
اول شي كيت كات اشحلات صورة ولدج اسمالله عليه بس لا اتعودونة على البطل حاولو تقطعونة عنه ههههه
وملاك الروح ترى اذا ما تبين اتقصين شعر بنتج قوليلهم مابي اقصه وعاجبني بعد وجذي ماراح يتكلمون (اتجعمينهم بأدب)
بس انا عكسج بنتي شعرها من فوق صار طويل ومن وا طول اشوي بس على الجناب وايد قصير فبوديها يرتبون شعرها عشان اتصير مرتبة عشان بصورها اييييي ولما اتعرق ايلف شعرها ويصير مو حلو عشان جذي بقصه
ومنوره ترى ماي ع\العيش المصري اييب امساك حق الياهل ديري بالج انا عيالي اذا صار فيهم اسهال اعطيهم ماي العيش المصري لانه فيه نسبة عاليه من النشا انتي عطيها ماي التمر وايد زين وفي ناس طبيعتهم جذي وانا اشوف انه حليب نان يتفخ الياهل حتى الكل قالي فجربيه لانه خفيف على الياهل

وبسالكم بنات ليش تطعيم الروضه ( الدرن) يعطونة حق الثلاث اشهر غريبه لانه قبل اسبوع طعمت بنتي وقالولي هذا تطعيم الروضه ليش ؟؟؟؟