تجمع الامل

[LajoOona]

اشلونكم يا بنات
:eh_s(22): انا طبعا من زمان غاطه عن النت فما ادري عن الموضوع هذا
راح انظم لكم مع اني وانا اقرا الموضوع خانقتني العبره بس الله كريم

قصتي اهي اني متزوجه وصارلي 6 سنوات وما الله رزقني وولا مره حملت
عالجت من البدايه....
اول شي عالجت بالراشد بس علاجهم مو اوكي واذبحوني بالابر والمفروض انا شغلي حقن مجهري مو كلوميد لان مايصير تلقيح الا بالطريقه هذي
رحت عند معصومه مخصيدوحطمتني لما قالت لي انتي لازم حقن مجهري احس اصدمتني لاني ماكنت ادري وكانت جافه معاي فما تقبلت
بعدين رحت حق فوزيه القطان وسويت الحقن المجهري وما نجح
ورحت عند باتريك الي بمستشفى لندن طبعا اهو ممتاز وكان فرق عن فوزيه
بس صارت فيني كحه قويه واتوقع نزل وماصار حمل ولان الله مو كاتب
والحمدالله على كل حال
حاليا ناسيه فكرة الحمل لاني تعبت حيل والله كريم
والله يرزقني ويرزقكم الذريه الصالحه يارب:eh_s(8):

 

[ذكريات]

اهلا فيج لجوونة

احسن ريحي اشوي من فكرة الحمل و استانسي بباجي العطلة النفسية واايد تاثر

انا اول مرة حملت كنت قايلة خلاص ااجل فكرة الحمل شوي علشان ابي ريلي يسفرني و يونسني بامريكا بس حملت و ما استانس بالحمال و لا بالعطلة

و ان شا الله ما تخلص هالسنة الا كلنا حوامل

ياااااااااااااااارب

 

[¤§ زيتونة §¤]

صباح الخير



شلونكم حبايبي



ذكريات ها شخبار الفراغ وياج؟
ما تعرفتي على بنات مني مناك؟



لجونة حبيبتي
لا تفكرين وايد ترى كلنا بنفس الهم وانا قبلكم كنت 8 سنوات وانا كله بجي وضيق والحمدلله يت بنتي ونستني كل شي

الله يرزقكم يا رب وتفرحون قريب

 

[-Bello-]

بنت الكويت حبيبتي ماتشوفين شر وانشاءالله هالمره حامل واذا ماصار هالشهر عادي اليايات اكثر بابمبينا اجر وعافيه انشاءالله ..وزيتونه والله انج كل مالج وتكبيرين بعيني والله يزيدج ويوفقج ويخليلج بنتج على اللي انتي قاعده تسوينه معانا .. لجون الله كريم حبي انا ادري اشكثر تتعب نفسية الواحد مع العلاج انسي الحين اخذي فترة نقتهه وعلى الله انشاءالله ... ذكريات عمري انتي شنو رايحه امريكا حق العلاج ولا سياحه .. وانشاءالله الله يرزقنا كلنا... انا بالنسبه لي مساع موت نفسي من البجي الله يسلمكم اليوم كان موعدي بالولاده طبعا رحت وعطوني تحويل حق الطفل المجهري .. انا ماكنت ادري انه الطفل المجهري عند طفل الانبوب المهم انا قبل كنت مستعيله وشاده حيلي بس بسرعه ابيهم يحولون على الحقن المجهري الله وكيلكم بس وصلت عند الباب جان اقعد وابجي الحمدالله على كل حال ماتوقعت انه بيوم من الايام اني راح اكووون اعاني لهل درجه حق الحمال استغراللله والله كريم وكلت كل شي بيد رب العالمين .. وبسالكم شرايكم اكمل حق الحقن المجهري عندهم ولا اروووح خااص انا قبل جربت الخاص بس حق العلاج حق الحمال ولوعوا جبدي ورحت حق الحككومه بعدها :eh_s(14): ها اشرايكم؟؟

 

[¤§ زيتونة §¤]

البنوتة
الله ياجرج على تعبج وضيقتج ولا يخيب املج
انا اشوف انج تكملين المشوار حبيبتي والله صدقيني لو هونتي بتقولين لو و لو ... توكلي على الله وروحي كملي شغلج وقبل كل روحة لهم صلي ركعتين لله واطلبي فيهم التوفيق
صدقيني ربج ما يترك عبده لكن اهو اختبار منه ولا تسقطين فيه ابد ديري بالج..........

الله يفرحكم يا رب ويرزقكم كلكم وباقرب وقت وماكو شي بعيد على الله

 

[LajoOona]

تسلموو وما تقصروون والله يهونها علينا
يعني الكل يعاني مثلي من الضيقه والتعب النفسي ... تصدقوون كله احسب روحي بروحي جذي انا الي اعاني من هالشي اثاري كل بوضعي نفس معاناتي فراغ وملل وضيقة خلق بس الله كريم
وبنووته حبيبتي انا انصحج تكملين انتي شنو خسرانه ما تدرين الخير وين.... واليوم ضايق خلقي حدي... كانت متاخره علي وتوقعت انه في شي بس للاسف بينت علاماتها يالله عادي تعودنا تتاخر ونستانس وبعدين نتحطم ... الحمدالله على كل حال.

 

[ذكريات]

زيتونة الحمدلله انا الحين احسن لان صاير اكشنات هالايام و برد على تماريني و اشرطتي :eh_s(15):

بنوتة انا بامريكا مرافقة حق زوجي لانه يدرس لكن برد ان شا الله عقب 3 اسابيع لان انا بعد ادرس

و عندي موعد باجر مع دكتوري

 

[¤§ زيتونة §¤]

صباحكم خير حبايبي


شلووووووونكم

عساكم بالف خير يا رب









ما عندي غير اني اقول
تمسكوا بالامل وقوو ايمانكم بالله ترى ما في شي بعيد على الله ولا تياسون ولا تقولون نفسيتي ونفسيتي ديرو بالكم بنات على نفسكم ولا تخلون تاخر نتيجة العلاج لهالدرجة تسوي فيكم
اهم شي تذكروا اللي حرمكم الذرية عطاكم بديل بس مو شايفينه لان قلوبكم من العيال
والله لو تطالعون حواليكم بتلاقون اشياء وايد الله معوضكم فيها


الله يرزقكم ويفرح قلوبكم

 

[bnt_kwt]

لجونه حبيبتي حياج الله معانا بتجمعنا المتواضع
وما نبي الحزن والكآبه واليأس لالا نبي الامل برحمه الله
نبي التفاؤل وحالج ترا مثل حالي بالضبط بس انا ما قالوا حقن مجهري وماشيه بعلاجي

وترا كلنا نعاني من نفس الشي التعب النفسي والضيقه والفراغ والاحساس بالنقص بس الحمدلله
تدرين عاد انا اول مره يصير معاي هالشي اللي الحين بقوله لج

انا كل ما تغيب عني الدوره واروح احلل وتطلع النتيجه نيجاتيف اسوي مناحه يومها بجي وصياح وما انام الا وانا تعبانه من البجي وضيقه الخلق

بس الف حمد وشكر لك ياربي يوم الثلاثا اللي طاف اول مره اروح احلل وتطلع لي النتيجه نيجاتيف وعادي لا بجيت ولا تضايقت ولا اكتئبت لا بالعكس حمدت ربي وشكرته على كل شي وقلت الله يعوض وخيرها بغيرها
والله والله والله انه ريلي حده استغرب مني وكل ساعه يسألني اكيد ما فيج شي مو متضايقه يحاول يسحب مني حجي مسكين على باله اني متضايقه وحاطتها بقلبي لاته تعود مني هالشي عقب كل تحليل بجي وصياح

وكلي امرج لله وتفاءلي ترا حلو التفاؤل
والله يرزقج ويرزقنا بالقريب العاجل اللهم امين

 

[جارة القمر]

زيتونة

تسلميييييييييييييييييييين حبيبتي

والله يرزقنا جميعا حبايب قلبي

 

[ام شيخة]

مشكورة حبيبتي على هذا الموضوع
انا متزوجة صارلي 4 سنوات واول سنة كان حمل خارج الرحم وماكنت معتقده اني بحمل وما حسيت بشي اصلا سويت العملية بمستشفى الفروانية وتميت اعالج عند منتهى السالم زينة بس تعالج على البطيء المهم صارلي سنة ما حملت جان اروح عند فوزية القطان سوتلي تحليل وقالت عندج الغدة والله العظيم قعدت عندها شهر واسبوعين وحملت الحمد الله وعندي شيوخة والحين اتعالج عندها حق الثاني ..
زوجته خالي متزوجة 10سنين وراحت لها سوت لها تلقيح صناعي وتلقحت 7 بس قالت احطلج 4 لانج ماتحملين والحين على ولاده
والله معاكم لاني كنت مثلكم متشفقة على اليهال وادعي حق كل وحده تتمنى هذي النعمة والله لا يحرمكم انشاء الله

 

[¤§ زيتونة §¤]

هلا وغلا فيج يا ام شيخة
مشكورة حبيبتي على مشاركتج في التجمع والف شكر لج على هالكلام الحلوووو
والله كلنا مرينا بهالموقف بس ربج ما ينسى عبده ومهما طال الانتظار يا بنات لازم بيرزقج ربج

وان شاءالله نسمع اخبار خواتنا اللي ما حملوا ونفرح وياهم

ومرة ثانية يا ام شيوووخة حياج الله ولا تقطعين من هالتجمع ترى مشاركتنا تخفف عنهم ويتشجعون للعلاج مثل ما احنا تشجعنا والله رزقنا وبيرزقهم يا رب

 

[-Bello-]

مشكووووره وايد ام شيخه ويخليها لج انشاءالله ويرزقج وحياج الله

 

[جارة القمر]

شوفوا بنات أنا شخصيا

أشكثر راجعت عند دكاتره ما ارتحت لهم ولا تعاملهم أحسن بسرعه بسرعه

بس الدكتوره فوزيه القطان وايد ارتحت عنده وكل شي بهدوء

بدأت معاي بكل شي خطوه خطوه

مو مثل هالدكاتره علي طول ابر وحبوب ومصايب

خلتنا أنصير مثل البالونه


ألحين قاعده أسوي ريجيم أبي أضعف مااني قادره


وعلي طاري الدكتوره فوزيه

رفيجة أختي راحتله وقالتله أبي أحمل بتوأم وعطته علاج وقالتله إذا صار أكثر من أثنين أنا مالي شغل أنا قلتلج

وفعلا أحملت رفيجة أختي وطلع فيه ماشاء الله أربع توأم

وتعبت ودخلت المستشفي

وألحين عياله عمرهم 5 شهور

تبارك الرحمن

 

[bnt_kwt]

العفو حبيبتي ام شيخه هالتجمع حق كل وحده يائسه
علشان تزرع الامل من يديد بقلبها وما تيأس من رحمه الله
والله يخلي لج ابنيتج وياربي يرزقج باخو حقها

 

[bnt_kwt]

جارونه حبيبتي ليش ما تروحين حق دكتور تغذيه يساعدج بتنزيل الوزن
احسن انا ما نزل وزني الا لما رحت حق دكتور

 

[bnt_kwt]

وبعد يا بنات اشلونكم وشخباركم طمنوني عليكم وعلى احوالكم

 

[ذكريات]

بنات انا دكتوري اللي بامريكا عطاني حبوب تنظم الدورة (( حبوب منع حمل ))

و قالي اخذهم اول يوم من الدورة

بس انا الدورة عندي منتظمة لما ارجع الكويت و تنعفس بس لما اكون بامريكا مع ريلي << كله اقوله انت السبب :eh_s(3):

و انا برجع الكويت بعد 18 يوم و ودي اراجع هناك عند دكتورتي

فما ادري اخذ الحبوب اللي عطاني اياهم او لا

خصوصا انه اهو ما سوالي اي تحاليل حق هرمونات او شي

على طول قالي بنظم الدورة اول بعدين تعالي مرة ثانية علشان الحمل!!!!

شرايكم؟؟

 

[bnt_kwt]

هلا ذكريات حبيبتي
دام انج ماراح اتطولين بامريكا عل لا تاخذين الحبوب اللي عطاج اياهم الدكتور وخليج عند دكتور واحد لا تشتتين عمرج احسن
لانه كل دكتور طريقه بالعلاج تختلف عن الثاني

 

[جارة القمر]

bnt_kwt


هلا حبيبتي

شخبارج

أنا الحين قاعده أسوي ريجيم

أخاف يزيد وزني وتخربط عندي الدورة

وهذا الشي أنا ما أبيه




الله كريم حبيبتي



ذكريات


سبحان الله حبيبتي

الدورة منتظمه بالكويت وبأمريكا لا


انا رأي نفس رأي بنت الكويت

خصوصا مو مسويلج ولا تحليل

والله كريم حبيبتي

ويزرقج يارب