تجمع الامل

[¤§ زيتونة §¤]

صباح الخير


صباح الامل


صباح الورد حبايبي




شخباركم


................................

 

[ذكريات]

بنت الكويت و جارونة يعطيكم العافية انا كنت محتارة

بس شكلي خلاص ماراح اخذهم

زيتونة شخبارج

 

[¤§ زيتونة §¤]

هلا حبيبتي ذكريات
شخبارج

شلون وقتج الحين تقضينه بالرياضة ولا تمبلة؟ ههههههههههههههههههه





قلبي معاكم وربي يوفقكم

 

[bnt_kwt]

هلا زيتونه
اشلونج يا قلبي
عسا ربي يوفقج بكل طريج تمشين فيه يارب

 

[@ دهن العود @]

السلام عليكم

اشلونكم بنات

ها بشروا ما فى اخبار يديده نبى نفرح شوى

 

[¤§ زيتونة §¤]

صباحكم
ورد
وغلا





ان شاءالله الاخبار الحلوة مو بعيدة ونفرح بخواتنا ونسمع كل حلو عنهم يا رب

 

[-Bello-]

سلاااااااااااااااااااااااااااااااااااااااااااااااااااااااااااااااااام عليكم .. كلكم اشلونكم
شخباركم... انا على حطت ايدكم لا من جديد اللهم دقوا علي طفل الانبوب يقولولي تعالي بتاريخ 6\9 ومادري خايفه ... والله كريم الحين الحمدالله طاخه عن موضوع الحمال ومتفرغه حق مستقبلي ودراستي والله كريم ... انتوا اشلونكم كلكم ؟؟ وابي اسال بنات انا من تزوجت متنت قبل كنت ضعيفونه الحين انترست زدت تقريبا ثمان كيلوات تتوقعون اهو يمكن اللي مأثر علي وانا كله متخثله ومالي خلق اسوي شي تهقون من جذي؟؟ وهم سؤال ثالث اشرايكم اسوي حقن ولا تو الناس انا صارلي سنتين وشهر من زواجي والحين عمري 20 ونص انتوا شرايكم امي تقولي انتي وينج او وين المراجعه عند ططفل الانبوب توج صغيره ولاتلعبين بنفسج ريحوني ردوا على اسألتي

 

[LajoOona]

السلام عليكم ورحمة الله وبركاته
اشلوونكم بنات شخباركم غطيت عليكم جم يوم لهيت فيهم

بنت الكويت حبوبه تصدقين عاد اني مرتين الي بجيت فيهم من نتيجة الحمل واهي لما اكون مسويه الانبوب وابجي شوي مو علشان ما حملت ابجي على نفسي لاني تعبت بس ارجع واقوول الحمدالله كله اجر لكن من ناحية تاخير الدوره عادي يضيق خلقي صج بس ما ابجي واعور قلبي كل شي بيد الله الحمدالله

وتصدقوون ذاك اليوم سمعت بدرس ديني يقولون الي تعالج للحمل شنو لها اجر يعني تخيلي كل شكة ابره فيها اجر وكل تعب تتعبينه من الادويه وغيره هذا كله اجر تصدقوون استانست قلت الحمدالله ترى ما تدروون الله يحبنا علشان جذي ميزنا عن غيرنا انه صج ننحرم من نعمة الذريه لكن ما تدرين الخير وين كله اجر باجر والحمدالله على كل حال .

 

[LajoOona]

بنوته حبيبتي دام انج بادية بعالجج انا من راي توكلي على الله وما تدرين الخير وين
لكن حاولي انج ما يزيد وزنج وتحاولين تتحركين وتنزلينه احسن لج حق الحمال بعد, وصج انج عنوونه على هالسوالف بس قالت لي مره الدكتوره كل ما كنتي صغيره كل ما زادت نسبة نجاح اطفال الانابيب وتستجيبين للعلاج اسرع فتوكلي على الله وانشالله الله يرزقج وتفرحينا وصلي استخاره بعد والله يوفقج

 

[ذكريات]

بنوتة لازم البنت عقب الزواج تمتن على الاقل 5 كيلو بس حاولي تحافظين على نفسج << قولي حق نفسج:eh_s(3):

 

[¤§ زيتونة §¤]

صباح الخير حبايبي



شلونكم




ان شاءالله النفسيات فوووووووووووووق


الله يسهل اموركم ويرزقكم الذرية الصالحة ويبرد على قلوبكم


اللهم امين

 

[جارة القمر]

LajoOona


فديت الياهل اللي بالصوره

أشحلاته ماشاء الله


صح حتي انا سمعت أن كل شكت أبره فيه أجر

حبيبتي

والله يعطينا علي قد نيتنا يارب
==========================

البنوته

حبيبتي

طفل الأنابيب

إذا سويته ما تحركين لمدة اسبوعين

كله منسدح

أشلون مع دوامج إا أنتي تدرسين

باقي البنات الحلوييين

شخباركم

نبي نسمع اخبار حلوه

 

[أضوى1]

الســــــلام عليـــــــكم

صج اللي يشوف هموم غيره تهون عليه همومه

عسى ربي يرزق كل محروم بالذرية الصالحه المعافاه ياااااااارب العالمين ويرزقني معاكم.

انا يا بنات صارلي سنة بالتمام متزوجة وفحوصاتي وفحوصات زوجي كلها سليمة ولله الحمد ... بس سبحان الله ربي ماكتب لنا الذرية.
وانا جربت وسائل كثيرة علشان تساعدني بالحمل مع العلم اني مااشكي من شي ..

من الاشياء اللي سويتها :

1- اول شي كانت الفحوصات الطبية والحمدلله سليمة والدورة منتظمه ومافيه هرمون حليب ولا شي .

2- فحوصاتي سويتها عند الدكتورة ماجدة اليتامى بديت مراجعاتي عندها وبعدين وقفت لان زوجي ما كان يبيني اروح كان يقوللي انا واثق انه انتي ما فيج شي ... رحت لها مرتين بس مره للفحوصات ومره علشان اشوف نتايج الفحوصات واسوي سونار داخلي علشان تشوف الرحم والبلاوي اللي داخل وعطتني حبوب وأبرة تفجير مبياض ماادري ليش ؟؟؟ وحددت لي وقت الجماع .. مع انه ما فيني شي وتقولي تبين تحملين سوي اللي اقولج عليه ولا تسئلين .. ما عجبتني طريقتها هذي ... !!

((((( بنات الله يعافيكم اللي مجربة الدكتورة ماجدة اليتامى تقولنا رايها فيها ))

لاني افكر ارجع اكمل عندها لان فحوصاتي عندها مالي خلق اسوي فحوصات مره ثانيه . شوروا علي .

3- رحت عند حرمه شعبيه تمرخ وتعالج بالاعشاب مرختني مره وحده وتقولي الرحم عندج مرتفع .. بس انا مااقتنعت بكلامها .. وعطتني اعشاب اشربهم من ثاني الدورة ليما تخلص . ومر شهرين وماحملت .

4- حرمه ثانيه هم تعالج بكاسات الهوا وتحط لبخة من التمر عالبطن وتسوي بخار بالاعشاب .. وعطتني شغلات مثل لقاح النخل وعسل فيه ادويه .
استخدمتهم وماصار الحمل .

5- ومع هذا كله كنت اركز على ايام التبويض علشان يصير فيها الجماع بس مو دايما تصدف صح.

6- جربت شغلات من المنتديات ووصفات بالتمر والرشاد شغلات عاديه يستخدمونها وقت الدورة .. وما صار الحمل .

7- مع كل هاللي سويته كنت ادعي دايما بصلاتي ووقت السجود وبالذات بالليل لاني اسهر ليما الفجر وكنت اصلي صلاة الليل واقرا مرات القران وادعى واستغفر .. وكنت حزة المغرب اشغل سورة البقرة بالبيت وسورة مريم
ومرة وحده قريت سورة البقرة في جلسة وحده وسورة مريم يمكن 3 مرات
مع الفاتحه والمعوذات. وما صااااار الحمل وانا لي الحين سنة مع زوجي
وللعلم هذا الزواج الثاني لزوجي لان زوجته السابقة ما كانت تحمل كان عندها مشاكل بالحمل وانفصلوا .

واحس هالمشكلة مسوية أزمة عنده وصاير وسواسي لدرجة فظيعة وحيل متلهف عالحمل وكل ماقرب وقت الدورة يسألني ويأذيني بالاسئلة عن الدورة .. وكل شهر قبل موعد الدورة يبي يسويلي تحليل دم دوخني والله بسالفة الحمل .

بس احسن ما فيه مايتشكى ومن داخله عنده قناعه ان هالشي بيد رب العالمين بس الحنّه والوسواس لاعب فيه .
وكل ماتنزل الدورة يصيبه احباط لما يعرف والشهر هذا اكثر شي انحبط
وانا مثله بعد

بس الحمدلله طالما الواحد يثق برب العباد ماييأس والشي هذا هو اللي يقوي عزيمتنا ويخلي أملنا بالله كبير ... والحمدلله وضعي احسن من غيري بكثير ... ونحمد الله على كل حال.

دعواتكم يا بنات بان الله يرزقني ويرزق كل محرومة بالحمل والذرية الصالحة.

أدري اني مصختها وقلت قصت حياتي .... شسوي ابي افضفض واشارككم بآلامكم وآمالكم.

:eh_s(17): والشكر موصول لصاحبة الموضوع بنت الكويت عسى ربي يرزقها ويوفقها آآآآآآآآآآآآمين يارب العالمين :eh_s(17):

 

[مهرة العرب]

أضوى1


الله يرزقج ..... ويرزق كل محرومه وتترسون البيت فريخات وكتاكيت

اختى الغالية عانيت من مشكلة عدم الانجاب ست سنوات ولكن بعد ما انجبت بنتين واللي خلاني اعاني من هالمشكلة ........ اكلت حبوب مانع بدون انتظام يعني يومين وثلاث لا وبعدين اكلهم ........ وسبب لي عقم مؤقت

ماخليت لادكتورة ولا حرمه الا وحذفت فلوسي عندها وبنهاية لاشي


+

++

+
+
+
بس تعرفين شلون حملت ............. لا تضحكين ...........

+
+
+
+
+

اولا غيرت غرفة نومي

ثانيا نسيت الحمل قلت خلااااااااااااص مااابي احمـــــــــل

وسبحان الله رزقني ربي ........ انسي لا تحاتيت .......

ادري انها صعبة بس تسلي بشي ثاني ...... اذا موظفه اهتمي بوظيفتك

اذا طالبة اهتمي بدراستج ............................
وبعدين شي مهم ....................


زوجك سوي تحليل والا لاااااااااااااااا

لانه ممكن يكون معاه ضعف ...........


ودكتورة ماجدة دكتور ة ممتازة استمري معها ثلاث شهور متواصلة

والله يرزقج ويرزق كل محرووووووومه يووم الجمعه المباااااارك

قاال الله سبحانه ادعوني واستجب لكم


ولا تنسوني بالدعاااااااااااااء

 

[ذكريات]

اضوى الله يرزقج و يرزقنا و يرزق كل محرووووووووم يا رب

مهرة صح كلامج المفروض شوي ننسى لا ن النفسية وااااايد تاثر بس و الله صعب

نحس حياتنا فيها شي ناقص و لاااااااااا يطوفج لما اقعد بالشقة بروحي و تحوشني ضيقة الخلق

اقعد اقول لو الحين عندي ياهل و لو .... و لو.....و انواع التفكير

لكن الله كريم ان شا الله

 

[¤§ زيتونة §¤]

مساء الخير


شلونكم


ان شاء الله تفرحون وتشوفون الذرية الصالحة
بس لا تفكرون وايد وتخلون هالموضوع شغلكم الشاغل لا ترى جذي بتتعبون وايد ويتاخر العلاج ولا يفيدكم كانكم تبنون من صوب وتهدمون من صوب ثاني


ربي يبلغكم ويقويكم عالعلاج وبلاويه يا رب

 

[bnt_kwt]

بنات اشلونكم وشخباركم
انا الحمدلله تمام وعال العال باحسن صحه واحسن حال وهذا من فضل ربي علي

يت لي الدوره يوم الثلاثه اللي طاف والحمدلله من امس ثالث يوم بديت اخذ الابر والله كريم وكل تأخيره فيها خيره

 

[جارة القمر]

أضوى1

وعلييييييييييييكم السلام

حبيبتي

الله يرزقج يا قلبي

ويفرح قلبج

وأتقولين تحاليلج أنتي وزوجك سليمه بس يبيلج صبر

وأن شاء الله ربي يرزقنا جميعا يارب
================================

مهرة العرب


الله يخليهم لج يارب

وفرح قلبج فيهم
======================

زيتونه

هلا وغلا حبيبتي


أي والله العلاج يذبح الله كريم حبيبتي

أنتي شخبارج
=====================

bnt_kwt

الله يعطيج علي قد نيتج حبيبتي

ويرزقج ويفرح قلبج وقلبنا حبيبتي

 

[أضوى1]

مشكووووووووووووووووووورين حبايبي عالردود اللي تثلج الصدر

حلو لما الواحد يحس ان فيه من يحس بمعاناته ويشاركه همومه ويواسيه علشان مايضعف عند الوساويس .


((مهرة العرب)) الله يعطيج العافيه حبيبتي وعلى هالدعوة الحلوة عسى ربي يخليج لزوجج وعيالج ويرزقج بكل خير ..

بالنسبة لزوجي تحاليله اوكي مافيها شي وانا موظفه ومثل ما قلتلي كلامج صح انا لازم ما اشغل بالي بالحمل واوكل أمري لله ومو بس انا حتى زوجي هو بعد لازم يبطل وسوسه وتفكير بس هو يقول مو بيدي مااقدر .

وان شاء الله دامج مدحتي الدكتورة ماجدة راح اكمل عندها ويارب نشوف نتيجة قريب.

والله طريقتج بالحمل غريبه بس صج جذيه اثبتي ان التفكير والنفسية لها دور كبير بتأخر الحمل والحمدلله اللي ربي افرجلج وعساج تحملين وتجيبون لهم اخوان .

والدعاء ابد ما راح نيأس منه.


((ذكريات)) الله يرزقج يارب ويترس شقتج بالبنوتات الحلوات والصبيان بالقريب العاجل ان شاء الله ... تصدقين انتي نفسي مرات يطري علي هالطاري لما احس بالوحده.


((زيتونة)) عسى الله يتقبل منج يا قلبي .


((bnt_kwt)) احنا بخير دامج بخير .. يلا شدي حيلج نبي نفرح فيج الشهر الجاي

ان شاء تفرحينا وتبشرينا بالحمل الشهر الجاي وان شاء الله ما تشوفين الدورة الا بعد 9 شهور


((جارة القمر)) مااااااااااااالي الا الصبر وان شاء الله يجي الفرج .. وياربي يرزقني ويرزقكم كلكم حبايبي .

 

[ذكريات]

اضوى صدقيني بس تنسين السالفة راح تحملين انا اول مرة جذيه

نسيت سالفة الحمل لاني كنت توني ناقلة شقة يديدة و مستانسة طلعات مع رفيجاتي و بتخرج من المعهد

و كلش ماكان على بالي احمل لانها الشهر اللي قبله كانت متاخرة شهررررررررر كامل

بس الله ماكتب انه يستمر الحمدلله على كل حال

عاد انا بعد اسبوعين برد الكويت و ريلي بيظل في امريكا يعني خلاص لازم انسى هالسالفة شوي و اركز على دراستي