تبين عيالج يصيرون مميزين .. تعالي هني فيدي واستفيدي

[أمواج البحر]

بنات حبيت اشاركم بغيت اسال امواج البحر اتقول عن الاب خلهم يحترمونك مو يخافون منك فبغيت اعرف اشلون الاب يشارك بتربيه الاولاد ويخليهم يحترمونه ويحسبونله حساب ودي اعرف اشلون

لغة الحوار تخلق الاحترام بين الطفل والابو

دايما خلي الابو يقعد مع عياله ويسولف معاهم

حوار عفوي وعادي

يطالعون مباريات مع بعض .. يناديهم تعالو ولهت عليكم قعدو عندي

يلعب معاهم يطلعون مع بعض

خل يكون في ألفه بين الطفل والابو

اما اذا كان الابو مثل قالت اوبرا من يدخل البيت بس صراخ وزف وهواش

شي طبيعي الياهل يخاف منه وبتصير فجوه .. ويصير الياهل يطيع الابو مو احتراما له لا خوفا منه

يعني وقت الجد جد و وقت اللعب لعب

يعني مثلا الياهل لما تلعبين معاه خلاص تطيح الميانه فتلقينه اي تصرف يسويه ويمكن يطق بعد

اهني الميانه زادت بس بكلمة وحده الياهل راح يعرف ان الابو له احترامه

يقوله ( عيب بابا انا ابوك مو رفيجك ) مو بنزره لا بطريقة جدا هاديه

هالطريقه متبعتها مع عيالي والحمدلله صار الاحترام يغلب الخوف

 

[أمواج البحر]

الموضوع اينن وايد استفدت منه ..

انا بناتي 7 و4 سنين ..
معلمتهم اول ما نركب السيارة لازم دعاء الركوب نقوله جماعي واهمه يذكروني .. وبعدين لازم قرآن نحفظ شوية بالسيارة وبعدين نشغل ديفيدي او اي شي ثاني ..
طبعا شكرا ولو سمحت واسفة هذولي من صغرهم متعلمينهم ..
السلام اول ما ندخل مكان على الكل بس ليلحين مرات لازم اذكرهم ولا يلهون مع اليهال واللعب
معلمتهم ما يتقبلون اي كبير يمد ايده عليهم او يقولهم كلمة مو زينة مهما كان لأني انا وابوهم ما نمد ايدنا عليهم ولا نسبهم والله سبحانه وتعالى كرمنا لا احنا حيوانات ولا بهايم فما نتقبل احد يسمينا باسماء الحيوانات .. (مرة خالة ابوها سبتها قالت لها اسم من اسماء الحيوانات حشاكم جان تقولها هالكلمة عيب مو زينة ولو سمحتي انا الله خلقني انسانة مو حيوانة .. يعني ردت بأدب وخذت حقها)
معلمتهم ان المسلم من سلم المسلمون من لسانه ويده .. ما نمد ايدنا على احد بدون سبب .. ولا نقول كلام مو زين ما نسب ولا نعيب على خلقة الله ولا نجرح احد ..
معلمتهم ان ما نقول الله يقطك بالنار (مادري من وين متعلمينها عسى ما احد سوا شي الا قالوله الله يقطك بالنار) لأن الله سبحانه وتعالى خالقنا ويحبنا ما يقط الاطفال ابدا بالنار لأنهم احباب الله ..
لي بغينا نطلع اهمه يختارون ملابسهم ويشاوروني ويركبون عليها الاكسسوارات والشوز
علمتهم ان لهم راي ويناقشوني بحدود الأدب ..
علمتهم ان الام والابو اهم 2 في الدنيا .. وان كل وحدة مالها الا اختها صديقتها وحبيبتها واختها وعزوتها وما تبدي احد عليها ..
علمت الكبيرة تخاف على الصغيرة وتحاتيها ولما تعبر الشارع تمسك ايدها ولما تركب السيارة تركب اختها اول .. والصغيرة تطيع الكبيرة
علمتهم يتشاركون باغراضهم برغبتهم بس يبقى لكل وحدة خصوصيتها ...
علمتهم ناكل الاكل المفيد والصحي ..
علمتهم يعتمدون على نفسهم ويقررون قرارتهم بروحهم ويتحملون نتيجتها .. اللي ما تتغدا كيفها ماكو سناك .. اللي ما تلبس كيفها ما تروح معانا .. وهلم جرا ..
هذا اللي اذكره الحين

عسى الله يحفظهم ويبلغج فيهم يااااارب

طريقتج بالتربيه قريبه من طريقتي

واخر نقطه فعلا انا اتبعها ... ماتبي كيفك ما اضغط عليك هذا قرارك ولازم تتحمل النتايج

 

[قطورتي]

شلون نخلي الياهل عنده ثقه بنفسه وحتى لو لا سمح الله كان في عيب خلقي في جسمه او في ويهه لان اليهال على طول راح يسالونه او راح يتطنزون عليه .. وبعد شلون انعلم الياهل يرد على مدرسته او الاكبر منه بادب وبدون خوف لان اليهال يخافون من الي اكبر منهم .. يعني مثلا لو كنا برا وصادفوا ريال او مرة كبيرة اي شي بتقوله لهم راح يسوونه لانه في نظرهم اهم الصح لانهم كبار فشلون نعلمهم يميزون بين الصح والغلط وبين احترام الكبير وبنفس الوقت الرد على الكبار بدون خوف

 

[Q8_QT]

موضوع أكثر من رائع تسلمين حبيبتي وكل البنات اللي شاركوا استفدت منكم وايد
آنا ولدي عمره 4 سنين و9 شهور اهو اسم الله عليه شخصيته حلوة وحبوب وكلامه أكبر من سنه
أحاول أعلمه عالأمور الزينه بس مشكلتي ماأستمر بس بعد ماقريت تجاربكم شجعتوني
آنا معلمته يغسل أسنانه بالليل والصبح واكثر وقت أواجه فيه مشكله الصبح مايحب يغسل بس آنا ماأخليه وألزم عليه
بس أشوفه صارله فتره قام يغسل الحمدالله
أحاول دايما أصلي جدامه عشان يتعود يشوفتي ويفهم أهمية الصلاة طبعا اهوالمفروض يشوف ابوه بس لأن زوجي عنده دوام صبح وعصر ويرد متأخر فآنا قايمة بالمهمة بس يوم اليمعة كان يروح مع ابوه المسيد بس يتله فتره الابو ماقام يوديه يقول يحرجني وقت الصلاة يتكلم ومايقعد ساكت بس الحين بلزم عليه ياخذه وياه لأن أبيه يتعود على روحة المسيد وولدي في طبع حلو الله يحفظه إذا رحت آخذه من المدرسة واحنا طالعين دايما يسلم على حارس الأمن وآنا قمت إذا نسى أذكره أقوله يمه ماسلمت عالريال يرجع ويسلم عليه أحس هالشغله حلوة حق الصبيان
آنا كنت مدخله ولدي حضانة فكانوا محفظينه آيات قرآن وبحاول بالليل أخصص وقت قبل لاينام وأراجع وياه الآيات
وودي أعلمه شغله بعد قبل لاينام يدعي حق نفسه وأمه وابوه ويده ويدته آنا اشوف هالشغله مهمة إن نعلم عيالنا يدعولنا ونعلمهم يبرونه من واهمه صغار يعني مثلا إذا ابوه مرات تأخر بالدوام ومارجع البيت الظهر ويه وقت نومة ولدي واهوموشايف ابوه من الصبح أتصل فيه وأقوله كلم ابوك وقوله شلونك وتصبح على خير وريلي يستانس من هالشغلة
هذا اللي في بالي الحين وإذا تذكرت شي برد أذكره ومره ثانية أشكر صاحبة الموضوع ويعطيكم العافية

 

[أغلى حبيبه]

استفدت منكم بوايد اشياء ماشاءالله

انا علمت عيالي اول مانروح مكان يسلمون ع الكل

واحترام اللي اكبر منهم

وشكرا ولوسمحت ....الخ

واللبس اهما يختارونه ويوروني

وممنوووووع ياكلون من صح غيرهم

وممنووووع ياكلون عقب اي احد

وجبه الغدا ضروريه الكل قاعد ع السفره حتى لو شبعان يقعد وياكل سلطه ولا فواكه
ومحد يقوم قبل لا يقوم ابوهم

وتوني بديت ادخل الخضار الورقيه مع اكلهم واحببهم فيها

وبسم الله والحمدالله بعد وقبل الاكل

وبسم الله وتوكلنا على الله اول مانركب السياره بعدين سي دي الاذكار يقرون معاه وبعدين يشغلون الديفيدي

وقبل النوم كل واحد يسمع حق الثاني الايات اللي حافظينها بالمدرسه

بس اللي متعبني معاهم العناااااد

وايد يعاندون بس من اعد لهم ١.٢.٣ قبل لا اكمل ٣ اهما مسوين اللي ابيه

وان شاءالله اذا تذكرت شي برد لكم

 

[أغلى حبيبه]

اي تذكرت معلمتهم ع الصدقه

اذا صبيت بانزين ولا شريت اغراض من الجمعيه يعطون العامل فلوس ويتهاوشون منو يعطيه عشان الله يعطيهم حسنات

والحين بناتي اللي بالابتدائي اذا زاد من وجبتهم يعطون الفراشات يقولون عشان ناخذ حسنات والله يحفظنا

وبين فتره والثانيه ناخذ جيس اللجنه ونقعد ونحط فيه الالعاب ولا الملابس الي مانبيهم

عاد تعالي شوفي السباق

كل واحد يقول انا ابي حسنات اكثر عشان ساعدنا الفقراء

وتعلموا الشي الصغير ولا الالعاب اللي مايبونهم يخشونهم حق الفقاره

 

[بحرينيه كوول21]

يا حلات موضوعكم وتربيتكم
انشالله اذا الله عطاني وحملت راح اطبق
عبق البنفسج حبيبتي ماشاءالله عليج تربيتج واايد حلوه وذربه
الله يخليهم لج ويخليج لهم يارب

 

[روان_الكويت]

ماشالله الله يخليلكم عيالكم
عيالي معلمتهم على شغلات واهمها عندي انه اذا شي بيدهم وصخ يقطونه بزباله ماحب يقطون وصخ عالارض
وهم مابيهم يشربون بيبسي اطلب لهم عصاير بس مرات بالمطعم الابو لازم بيبسي يخرب علينا
ومرات يشوفون عيال عمهم معاهم ديو ولا شي يبون نفسهم هني المشكله
على قد ما اقدر احاول والله يصلحهم
اعلمهم يقولون دعاء الخروج من المنزل ودعاء ركوب السياره

 

[coralia]

موضوع روووووعة الله يخليلكم عيالكم

 

[جوري99]

تقدرون تحفظونهم القرآن الكريم بطريقة التكرار او طريقة معلم يتلو وطالب يرد عليه سووا بحث بقوقل قرآن كريم وشوفوا التلاوة اللى فيها تكرار ونزليها mp3 , وشغليها بالسيارة بفلاش ممورى جربوها وشوفوا النتيجة وبعدها ادعولى الله يسخر لى زوجى ويهدى عيالى اللهم آمين

 

[جلكسيه اس 3]

بنات بسالكم
اشلون اعلم اليهال ما يعفسون و يقعدون
عجال

 

[&&الجــــازي&&]

ماشاء الله مووضوع اكثر من رائع انا عندي ولدي عمره 3 سنين والثاني عمره سنه في اشياء كنت معلمتها ولدي لما كان صغير يقولها مثل اسف وشكرا اما اللحين لاخصوصا اسف مره فشلني كنا طالعين وطق ولد فمسكته وقلتله قول اسف تخيلوا قعدة اكررها وام الولد تقول خلاص عادي ماصارشي واهوا مارضى يقولها والمشكله هالطبع متعلمه من عيال عمته انا ساكنه ويا حمولتي اهما زينين بس فيه الطق والصراخ بس في اشياء زينه يعرفه مثلا الاغاني يقول صح ماما حرام عيب الله يوديه النار ويقول بسم الله والحمدالله واذا عطس يرحمك الله واذا طلعنا لازم اقوله توكلنا على الله بس للحين ماتعود يقولها بروحه وفي شي ثاني اهوا متعود يفرش اسنانه بس صار له فتره كلش مايبي نقعد انا وابوه نفرش قدامه واهو يبجي مايبي مادري شسوي ؟
في شي ثاني انا ابي ادخله روضه اجنيه(لان مافي روضة اقبلته يقولون لازم اربع سنين ) اهو واخوه في الحضانه بس خالتي تقول الكبير اوكيه بس الصغير لا دخلينه حضانه انتو شرايكم؟

 

[وحدة كويتية]

انا عيالي تقريبا
نفس الشي يقولون بسم الله قبل الاكل ويقطون القراطيس بالزباله بس يا بنات انا عقدتي ان تعلمين عيالج شي زين ويشوفون الجهال اللي حولهم ويبون يسوون نفسهم وخاصه اذا كنتي ببيت حموله وكله جهال صغار
والجدات الله يصلحهم اذا قلتي للجاهل هذا شي غلط لا تسويه لازم يعارضونج ويخربون طبع الجاهل عليج
هذه مشكله اللى ساكنه بييت حموله

 

[عبق البنفسج]

opera
في أبهات يقعدون ويسولفون مع عيالهم ويسوون الي قلتيه بس هم عياله يخافون منه .. مادري من شنوو هالخوف يصير
وصح المفروض الأم يكون لها دور وتخلي عيالها يستأذنون من الأبو بكل شي عشان يتعلمون هالشي من يوم هما صغار ..

وبنسبة شلون نخلي الياهل عيونه مليانة
بنسبة لي ما أقصر على عيالي بشي بس بالمعقول مو أصرف بالهبل ..
عالعموم انا الحمد الله بناتي ما يطلبون وايد .. يعني اذا طلعنا مايحنون علي ويقولولي نبي ونبي .. وولا مرة صادفتني هالمشكلة انهم يبون الي عند غيرهم ..

رفرف
الشغلات الي ذكرتيها حلوة وأكثرها معلمتها حق بناتي بس عجبتني شغلة وايد انج علمتيهم مانخلي أحد ينادينا بأسامي الحيوانات تصدقين احنا غافلين عن هالشغلة ومانعلمها حق عيالنا من الصغر ..
والشغلة الثانية الي علمتيهم ان لازم مانعيب على أحد .. لازم بعد أعلمهم هالشغلة أنا علمتهم شغلات بسيطة بس ما تعمقت بالموضوع معاهم

أمواج البحر
صاجة المفروض نعلمهم القناعة
ومشكورة وايد على توضيح طريقة احترام الأب

قطورتي
بنسبة لسؤالج شلون نخلي المعاق يثق بنفسه .. أنا ماعندي المام كامل بهالموضوع بس بعطيج شغلات طبقيها وان شاء الله تفيدج ..
أول شي حسيسيه انه شخص مهم بالعايلة وآراءه مهمة مثلاً اذا كنتو تسولفون بموضوع قوليله انت شرايك يا فلان ..
الشغلة الثانية مدحيه كثر ماتقدرين يعني أي شي زين يسويه مدحيه عشان ترفعين معنوياته وتحسسينه انه مو عاجز ويقدر يسوي أي شي مثل أي انسان طبيعي
عطيه عطف وحنان أكثر من باجي اليهال .. بس ماتوصل لدرجة التدليل زيادة عن اللزوم
لا تصارخين عليه لأن أكثر اليهال الي فيهم عيوب خلقية يكونون حساسين
خليه يعتمد على نفسه وتحسسينه انه قادر على كل شي
ودايماً شجعيه انه يختلط بالمجتمع واليهال ومايخاف أو يستحي من اعاقته
وعلميه اذا اليهال تطنزو عليه يرد عليهم برد يحرجهم ويكون الرد محترم بنفس الوقت ..
وبنسبة للسؤال الثاني قوليلهم ان الكبير لازم تحترمونه وماتخافون منه وعلميهم ان مو أي شي يقولونه الكبار هو الصح .. في ناس كبار بس مايسوون الشي الصح

Q8_QT
الله يخليلج ولدج وتفرحين فيه
نصيحة لج مدام ولدج ماشاء الله عليه كلامه أكبر من سنه ابدي معاه من الحين وعلميه كل الشغلات الزينة لأنه راح يتجاوب معاج ..
بنسبة للآيات بقولج طريقتي وطبقيها .. بنتي الكبيرة هي أكثر وحدة حافظة السور القصيرة والي أصغر منها حافظين بس شوية .. المهم قبل لا ينامون لازم يبوسوني ويبوسون أبوهم ويقولولنا تصبحون على خير وعقب يروحون الفراش وأقولهم شنوو لازم نقول فيقولون بسم الله الرحمن الرحيم وعقب كل وحدة اخليها تقول سورة قصيرة من الي حافظتهم ومرات الكبيرة تقول وهما يقولون وراها
وسالفة الدعاء عجبتني ومن اليوم بخليهم يدعون


لي عودة للرد على بقية الأخوات

 

[AVE.NJ]

اي تذكرت معلمتهم ع الصدقه

اذا صبيت بانزين ولا شريت اغراض من الجمعيه يعطون العامل فلوس ويتهاوشون منو يعطيه عشان الله يعطيهم حسنات

والحين بناتي اللي بالابتدائي اذا زاد من وجبتهم يعطون الفراشات يقولون عشان ناخذ حسنات والله يحفظنا

وبين فتره والثانيه ناخذ جيس اللجنه ونقعد ونحط فيه الالعاب ولا الملابس الي مانبيهم

عاد تعالي شوفي السباق

كل واحد يقول انا ابي حسنات اكثر عشان ساعدنا الفقراء

وتعلموا الشي الصغير ولا الالعاب اللي مايبونهم يخشونهم حق الفقاره

عجبتني الفكره

 

[AVE.NJ]

بنات شنو تسوون اذا الياهل شعره خشن واليهال يتطنزون عليه او متين واليهال يتطنزون عليه خصوصا بالروضه واشلون
يثقون بنفسهم ؟؟ويحولون هالشي عادي موعيب ؟؟

 

[ستانلي]

موضوع روووووعة الله يخليلكم عيالكم

 

[قطورتي]

جزاكم الله خير

الله يحفظ عيالنا ويبارك فيهم

 

[miss swan]

ام ممتازه

ياريت اللي حواليني يساعدوني انا اعلم بنتي والوع جبدها من الوجبات السريعه ايي الابو وياكل جدامها
والخاله والخال
بس انا قايلتلها فيه ازهيوي حتى لو تبجي احقرها واشتريلها من مكان ثاني اذا كانت كلش يوعانه وحنا بره البيت
معلمتها على روب الفواكه عشان يعطيها مناعه
بيبسي ماكو الا اذا كنا بالزواره والكل يشرب بس كله اقولها البيبسي يكسر الضروس والعظام
الحلاو لين رحنا الجمعيه وحده حدها مو اكثر
بس مشكلتها الوحيده انها عسماويه تاكل باليسار وقاعد اعلمها على اليمين انشالله اقدر

ولو ابيدي اسوي نفس الاجانب ماكو حلاو بالمره بس بسكوت وكيك حتى الكاكاو افيد من الحلاو بس شسوي
العايله خربانه هههه


​

 

[عبق البنفسج]

أغلى حبيبه
وايد عجبتني الشغلات الي معلمتها حق عيالج واستفدت منج وايد

بحرينيه كوول21
الله يخليج ويسلمج حبيبتي

روان_الكويت
لو يقطعون البيبسي مولية يكون أحسن .. بس اذا يشربون بفترات بعيدة عادي ميخالف خليهم عن خاطرهم بس هم فهميهم ان هالشي مضر .. انا ما أخليهم يشربون البيبسي وهالسوالف واذا طلعنا مطعم أخليهم يشربون ميرندا وبالفترة الأخيرة ماقمت أطلبلهم ميرندا وبدلته بعصير برتقال طازج

coralia
الله يخليج ويسلمج

جوري99
الله يسخر زوجج ويهدي عيالج ان شاء الله
مشكورة عالنصيحة ..
بجرب اشوف اذا في هالبرنامج بالأي بود لأنه يستخدمونه أكثر ..

سكرتير مستقبليه
انتي لازم تحكمين فيهم .. أنا قبل بناتي كانو يعفسون الصالة لما يلعبون فقمت أقولهم كل يوم اليوم اذا ماعفستوو الصالة أوديكم حولي بارك ومايعفسونه وصج أوديهم، واليوم الي عقبه أقولهم اليوم اذا ماعفستوو وقعدتوو عجال أعطيكم كاكاو وبطاط (على فكرة انا شايلة البطاط والكاكاو عندي وما أخليه عندهم على كيفهم ياكلون وقت مايبون) واليوم الي عقبه برد، ومرات أقولهم أحطلكم صبغ أظافر ومرات أقولهم ان البيت لازم يظل نظيف عشان يمكن فلانة (أقولهم اسم شخص يحبونه بالعايلة) يمكن فلانة تزورنا بالبيت وتلقى بيتنا وصخ ومعفس وبعدين ماراح تقعد عندنا وبترد بيتها فقامووو يحافظون عالبيت دايماً مرتب لأنهم يدرون اذا شفت البيت مرتب لازم أعطيهم شي ومرة على مرة تعودووو وصار عندهم عادة انهم مايعفسون وقت لعبهم واذا شفتهم على وشك يلعبون بالكوشيات أقولهم خلاص ماكوو طلعة أو ماكوو الشغلة الفلانية فتلقينهم على طووول يقولون خلاص بنقعد عجال ..

&&الجــــازي&&
بنسبة للأسف وايد يهال بهالعمر يعاندون ومايحبون يقولون كلمة آسف
عندي لج حل تحسسين ولدج عالأسف بالأفعال بدون لا يقولها .. مثلاً اذا طق واحد قوليله بوسه، أو اذا بسته أو قتله سوري أو آسف أعطيك الشغلة الفلانية .. واذا تأسف مدحي تصرفه

وحدة كويتية
حتى أنا أمنع بناتي من شغلة مثل جلد الدياي احنا ما ناكله ومعلمة بناتي ماياكلونه بس وحدة من الأهل تعطيهم ياكلونه فقالولي فلانة تقول اكلوه فرديت عليهم بس أنا أمكم وقتلكم لا تاكلونه فلازم تسمعون كلامي وماتعاندوني وثاني شي انا قنلكم لا تاكلونه عشان هو مو زين لنا ويخلي ايدنا يصير فيها شعر وايد نفس الرياييل .. انتو كيفكم اذا تبون تسمعون كلامي بتظل ايدكم حلوة بس اذا ماتسمعون كلامي وتاكلون الجلد بتصيرون نفس الرياييل .. وكذا شغلة نفس الشي أبين لهم ان انا الصح وأبين لهم الغلط وأقولهم كيفكم فيسوون الي انا أبيه
انتي حاولي تكلمينهم بروحج مو جدام أحد عشان لا يخربون عليج

لي عودة للرد على بقية الأخوات