تبين عيالج يصيرون مميزين .. تعالي هني فيدي واستفيدي

[kanary]

حبيبتي والله موضوعج وايد حلو وانا بصراحه مادري اشلون اعمامل اعيالي بصراحه مجنينيني مايسمعون كلامي كلش قليلين الادب مع اني والله اطقهم طق اليهد بس مافي فايده .
يعني ساعات لارحنا مكان اوصيهم طول الطريق صيروا عجال لا تشيطنون بس اخزكم يوزو لا قلتكم لا خلاص فجوا ..... يردون اي انشالله . لا وصلنا ولا جني متكلمه معاهم والله مفشليني مادري شسوي والله مو قصره معاهم
افيدوني جزاك الله خير

 

[أنا الأنوثه]

موضوع راائع تسلمي منكم نستفيد

 

[عبق البنفسج]

kanary
انزين شرايج تقوليلنا شوية معلومات عن عيالج شيحبون وشنوو مايقدرون يستغنون عنه .. عشان نقدر نفيدج شلون تعاملين معاه

أنا الأنوثه
حياج الله .. نورتي الموضوع

 

[alhnan]

ماشاء الله عليكم
قريت كلامكم و حسيت كثر انا مقصره مع بناتي
ما يفرشون اسنانهم والسباحه مره كل اسبوعين والخدامه تسبحهم مو انا ولا يغسلون ايدهم قبل الاكل ولا بعده
اصلا ما يعرفون ياكلون انا اوكلهم بنفسي اوكلهم
ما يعرفون يقولون قران العابهم مبعثره وما يرتبونها غرفتهم تسد النفس
وانا مو طايقتهم ليش بنات ورا بععض وتوام بناات مدري ما طقت مسؤليتهم وتعبهم مالي خلق لهم كلش وادري غلطانه
بنتي البجر اهي الوحيده لي اهتميت فيها ومع الوقت والاهمال كل اللي بنيته انهدم صارت مو شاطره مثل خواتها ونست القران ودعاء الحمام وهالسوالف

بناتي ما يسمعون كلامي ما ياكلون ما ينفذون اوامري
يمدي اصلح الوضع والا لا؟
وبشنو ابدي؟
ادري اني ببدي مع نفسي لكن معاهم اهم شلون؟

مثلا اقولهم اكلوا بعدين العبوا ما يسمعون الكلام اجرهم احطهم على السفره يعاندون و يحوسون شالحل؟؟

 

[alhnan]

على فكره احس بناتي ما يعرفون شنو الله شنو جنه شنو نااار مادري بناتي اغبيا عكس البجر والا شنوووو؟؟؟

 

[alhnan]

ويطقون بعض ويتهاوشون على الالعاب مع ان العابهم والله ترس الدار الا يتسلطون على شغله معينه ماكو منها وهات يا تمجع و تشمخ وتفال افففف وانا بس اكفخ واهبد اللي ايدي تعورني ومالي خلق اسمعهم واتحاور معاهم

 

[alhnan]

بس البجر ربيتها صح ومع الهمال جني ما ريييت
ساعدوني بموت
ودي استقيل واقعد بالبيت اجابل بس احتاج الراتب و الوظيفه تخليني مو طايقه نفسي وعيالي

اااه يا قلبي

 

[alhnan]

وعلى فكره الاب ماله دووور بالحياه انا احمل و اولد واربي واوكل واعلم والعب وكل شييييييييي
اهو مو موجود بحياتنا لا وقت الاكل ولا وقت النوم ولا شي
عايش عند ربعه بالقهاوي والاسطبلات.... كلش ما نشوفه يرد البيت متاخر حتى انا اكون نايمه

 

[Australia girl]

الله يعينج يارب الان

بس انتي قلتيها ابدي بنفسج ...

 

[الحلا مبتليها]

صرااااااااحة الموضوووع وااااايد حلو ومفيد الله يرزقج كل خير صاحبة الموضوع

وانا بس قريت الصفحة الاولى ما كملت الباجيات لاني بالفندق قلت اكتب رد عشان ارد للموضوع بعدين


وان شاء الله يكون لي عوده باذن الله

 

[عبق البنفسج]

alhnan
الله يعينج ويصلح عيالج ..
ان شاء الله أكيد في وقت عشان تصلحين الي طاف .. ويريت تذكرين دايماً ان هذيل بنات واذا ماعلمتيهم يهتمون بنظافتهم من يوم هما صغار إذا كبرووو بيظلون جذي وماراح تقدرين تغيرينهم

الحين خلينا نبدي خطوة خطوة كل اسبوع نعلمهم شغلتين أو ثلاث ..
طبعاً أكيد بالبداية انتي لازم تغيرين .. شوووفي أختي كلنا نشتغل وعندنا عيال ووقت الدوام شي وقعدتنا عند عيالنا واهتمامنا في بيتنا شي ثاني ولازم نشد على نفسنا شوي..
بالبداية لازم تشدين على نفسج ميخالف وعقب ان شاء الله تعودين على العيشة اليديدة ..
بنسبة للسباحة اذا انتي حابة تسبحينهم كيفج واذا تبين الخدامة تسبحهم فلازم تييبين الخدامة وتعلمينها ان من يوم ورايح النظام بالبيت لازم يتغير قوليلها نظام السباحة شلون تبينه (مثلاً انا أسبح عيالي يوم شامبو وصابون واليوم الي عقبه بس يروحون تحت الماي واليوم الي عقبه شامبو وصابون وبين فترة وفترة أحطلهم حمام كريم ومرات ملح اليوكوو ومرات بيبي اويل .. ولازم تحفظين بناتج هالشغلة ان السباحة نظامها جذي (النظام الي انتي حابته)..
عقب ني حق الخطوة الي عقبها ايدهم كل يوم لازم تنغسل قبل الأكل وعقبه ولازم تفهمين هالشغلة حق الخدامة ان اليهال مايقعدون عالسفرة إلا بعد ماتنغسل ايدينهم واذا خلصوو أكل تقوليلهم انتي أو الخدامة (يلا عالحمام وغسلوو ايدينكم وحلجكم بالصابون)
وتفهمين خدامتج وعيالج ان أول شي تسوونه الصبح أول ماتقعدون تفرشووووون أسنانكم وكل يوم نبهيهم على هالشغلة
ونصيحة خليج وراهم وراهم لمدة اسبوعين ونبهيهم على هالشغلات وعقب بتشوفينهم تعدلووو وقاموو يسوون هالشغلات بروحهم ..

الحين عندنا ثلاث شغلات لازم تعلمينها حق عيالج خلال هالاسبوعين
1- السباحة
2- غسيل الايد قبل الأكل وبعده ولما يروحون الحمام بعد
3- تفريش الأسنان

ابدي بهالشغلات وعلميها حق عيالج وان شاء الله عقب بقولج عن وايد شغلات تعدلين فيها عيالج وخاصة انج تشكين من انهم يهدون الأكل ويروحون يلعبون

يريت تكونين على تواصل معانا وتبلغينا أول بأول علي يصير معاج

Australia girl
نورتي الموضوع

الحلا مبتليها
ناطرين مشاركتج

​

 

[alhnan]

مشكوووره اختي عبق البنفسج على ردج و
انشالله بكون معاكم اول باول وهم الاسبوع الجاي بعلمهم على قطع الحفاظه نهاارا وبقولكم الاخبااار

الموضوع جدا مميز يعطيج العافيه

 

[كوووين]

الله يخليلكم عيالكم وهديهم انة ولله الحمد ولدى ربى يحفظة عمرة 6سنوات معلمتة يختار ملابسة بروحة ويلبس بروحة ومايتفصخ جدام احد والحمام ربى يحفظة يدش لحالة ونظف اعقب مايخلص واذا دخل او راح اى مكان يقول بسم الله ولازم شور بعد اللعب يعنى المساء وتفرش الاسنان وماكو اكل بعد الساعة 8وقت الاذان نردد ورا المؤذن وبعد صلاة المغرب مااكو صراخ عشان ما ياذيناا احد بليل وقبل لاننام نقرى المعوذات وسورة الكرسى ونتعوذ من الشيطان الرجيم اما الشى الى عيزت اخوفة وماكو فايدة الاكل السريع يمووت على الماكدونالد وتعود من ابوة واكل البرد يعنى بالدز ياكل شى صحى حتى الفاكة بالدز بس انشا الله يبطل هل العادة مع انى انة ما احب اكل المطاعم السريعة ممكن لبنانى مرة بالشهر بيتزا مرة بالاسبوع بس يوم وترك والمشكلة مايسمع الابو كلامى وانة اخااف علية يسمن الى عندهاا حل تسااعدنى

 

[بشاير الميموني]

لا اله الا الله..

اولا اشكر اختي صاحبة الموضوع الحلوووووو....

من ناحية التربية قبل التربية راح اقولكم شغلات لازم ان مانغفل عنها وهي الدعاء للابناء بصالحهم ((اللهم اجعلهم اماما المتقين واوفر عبادك رزقا في الدنيا والاخرة)) اكيد بتقولون طماعه عادي لكن الله الرازق عباده ولازم نتقرب من الله اولا عشان يستجاب الدعاء..

ثانيا الانسان يولد على طبعه ممكن يكون فيه رحمه طفل اكثر من الثاني مثلنا حنا بضبط بس مافيها شي انه نطبعه على الطباع الايجابي ونغير باذن الله للاحسن *...

تعلمين عيالج على العطى من هم صغار من بس هذي اغراضك انت بس لا عادي مرة اخوك يلعب ومرة ولد عم وجذي وعلى الصدقات اذا كان شوي كبير ..

ولي عودة ان شاء الله ....

 

[بدوية بملامح كشميرية 86]

امهات. انا. ولدي اسم الله عليه. ذبحني اذا بيدي شغله وخذته منه يقعد يفحط الا ياخذ الشغله

مثل الريمونت. او الموبايل


جنني


وشنو اقدرر. اعلمه. شغلات. مفيده. له

 

[عبق البنفسج]

alhnan
العفوو أختي
قوليلنا شيصر معاج أول بأول

كوووين
الله يخليلج ولدج
بنسبة للوجبات السريعة .. بصراحة أنا قدرت أكره عيالي بهالوجبات
بعطيج نصايح طبقيها وان شاء الله يتغير ولدج ..
أول شي لازم تكونين انتي وابوه قدوة له لأن مومعقولة الأبو ياكل جدامه وماتبونه هو ياكل .. يعني كثر ماتقدرين قوولي خق الأبوو ياكل هالوجبات بس من ورا ولدكم عالأقل .. يعني خل يطلب عقب مايتعشى الولد وينام
ثاني شي قعدي معاه وكلميه عن الأكل الصحي وشلون يخلينا نكون أقوياا ويعطينا صحة وتركيز ومضار الوجبات السريعة وشلون تخلينا نصير مرضى وبطنا يعورنا (دوري بقوقل عن فوائد الأطعمة الصحة ومضار الوجبات السريعة وقوليهم حق ولدج بطريقة يستوعبها)

الوجبات السريعة تغري اليهال لأن أشكالها تشوق وغير هذا تي ألعاب مع الوجبة .. فإنتي هني لازم تفنين بتزيين أطباقج وتقدرين تشترين ألعاب من بو 100 وكل مرة تحطيله لعبة مع وجبة الأكل..
اشتريله طقم صحوون وكوب على أشكال عشان يتشوق اذا أكل
شووفي هالموضوع
http://www.q8yat.com/t571263.html

وأنا الحين متبعة مع بناتي شغلة يديدة حلوة واستانسوو عليها .. اني أخليهم ايون معاي المطبخ ويشوفوني وقت الطباخ وأخليهم يساعدوني يعني عقب ما أقصقص الأكل أخليهم هما يحطونه بالجدر وأخليهم يحطوون البهارات ويحوسون الي بالجدر فتلقينهم يتشوقون حق الأكل الي هما مسوينه ..
وعلمتهم يسوون كريم كرمل وجيلي (طبعاً انا أكيد أكون معاهم)

بشاير الميموني
صح كلامج لازم ندعيلهم دايماً ونعلمهم عالصدقات
وأنا بعد اذا شريت شي حق بناتي اقولهم حقكم كلكم ..

بدويه ستايل 86
عادي اختي مرة على مرة اذا خذيتي الشغلة منه وصارخ أو عصب وانتي مارديتي عطيتيه بتلقينه بيتعود خلاص ..

 

[وسن 11]

في سلوكيات عجبتني
وفي سلوكيات كلش كلش مبالغ فيها وتعقد الجاهل

 

[عبق البنفسج]

وسن 11
مثل شنوو أختي السلوكيات الي تعقد الياهل

 

[zain-bh]

صباح الخير

استفدت من هالموضوع وايد وانشالله بطبقه مع بنتي والله يهديها ويهدي عيالنه كلنه

دايم ادعي لها ولنا بالهدايه واقرا لها المعوذات واية الكرسي يوميا من لمن كانت بطني

والحين عمرها قريب الخمس شهور ودايم اسولف وياها من لمن كانت ببطني ببعد والحين بزياده

 

[nazek_q8]

متابعه