الى كل من تنوي الزواج بغير كويتي ..والنعم بالكل بس فكري شويا .. او لا تتشكين بعدين ..

[حنين قلبي]

صح لسانج والواحد فينا لازم ما يفكر بلحظة بس يفكر لجدام علشان يرتاح ويحسن بالامان ...

تحياتي ...

 

[فديت عيالي]

صح كلامج وعين العقل

والله يوفقج يارب

وماقصرتي على النصيحه

 

[في بحرهم عذبوني]

سلام كلامج صح
انه بقولكم انه بحرينيه و متزوجه كويتي بس والله مو ذابحني غير الغربه صج صعبه ..
و ندماانه و الله ..

 

[مستقبلي احلى]

يعني المسكينه الكويتيه اذا اصبرت وما ياها الكويتي شتسوي بعد اهيا بشر تحس تاكل تشرب تحتاج للعاطفه

بعد ما يصير والدنيا فتنة وتخاف على نفسها

ولقت واحد زين غير كويتي تتنازل وامرها لله

 

[حسينه حلوه]

كنج قاعده معي في البيت
امس انا وزوجي قعد نتناقش بهالموضوع في ناس قعد تقول ليش الكويتي لما يتزوج غريبة عيالها ياخذون كل حقوق الكويتيين والعكس لا؟؟!!
انا استغربت شلون العيال ما ياخذون هالحقوق وهم كويتيين ابوهم كويتي ومهما كانت جنسية الام شكو الام
ذكرتيني بموقف صار بالمستوصف الحكومي قدامي بالطابور
واحد كويتي زوجته مو كويتية جنها بدون المهم اهو ماخذ زوجته وبنته حق الطبيب وطلع بطاقه الزوجه فالكاتبه شافت البطاقه ودرت ان المره مو كويتيه
وجا بياخذ ورقه حق بنته وطلع بطاقته اهو طبعا اهو كويتي وطلبت بطاقه البنت والبنت ماعندها بطاقه الظاهر عشانها توها مولودة
ولا تقوله الكاتبه يعني شنو بنتك شنو اسجلها كويتيه ولا بدون؟
اهو عصصصصصصصب حده وسوا سالفه وتهاوش يقولها شهالسؤال؟؟!! اقولج انا ابوها كويتيي تقولين شنو جنسيه البنت
يعني العيال في الاول والاخر تابعين حق الابو وبس اذا كويتي كويتيين واذا مو كويتي مو كويتييين
وشكرا عالموضوع كنت بطرحه وسبقتيني حبيبتي

انا معاج ميه بالميه الام شكواهم يتبعون الاب يعنى كويتين وكل جنسيه فيها الزين والشين بس اذا بياخذ عندى العربيه افضل بالنسبه للدين والعادات والتقاليد وايد متشابهه العرب مع بعض يعنى العيب والحرام اهنى عند الزوجه العربيه هم عيب اما الاجنبيه مختلفه تماما والكلام عن تجربه واحد من اخوانى ماخذ فرنسيه وولدعمى امريكيه واخوى العود ماخذ مصريه من 20 سنه بس بنت عايله من اصلها فالتربيه اختلفت مع اليهال عيال العربيه حدهم زربين ومؤدبين وعيال الاجنبيه حريه زايده واى كلمهيعتبرونها تدخل فى شؤنهم وعلشانلا تقولون احنا ترا مقاطعين مرت اخونا المصريه من زمان بس الحق ينقال عيالها غيييييييير

 

[حسينه حلوه]

زربين (ترا مقصوده موبدليه ) على طارى المصريه

 

[سعودية!!!]

موضوع حلو... يشار له بالبنان اشكر صاحبة الموضوع ع الطرح الرائع...

وجهة نظري...راح اقسمها ل3 نقاط باختصار

النقطة الاولى

الحقوق والواجبات...اي كانت

الكويتية لها حقوق وواجبات في ديرتها حالها حال الكويتي... تختلف بعض هالحقوق والواجبات كون اختلافهم في الخلقة بما حدده الشرع "الانثى والذكر"يعني بموجبه تختلف ذي الحقوق والواجبات ... في واجبات تجب ع المراة ماتجب ع الرجل والعكس وكذلك الحقوق... الانفاق واجب ع الرجل لاااا المراة اين كانت جنسيته... واجب الرضاعة ع المراة مو ع الرجل اي كانت جنسيته ياااحلاااته وهو يرضع لوووووووووووووووول امثلة بسيطة عشان بس ااوصل فكرتي

ذي نقطة يعني "هي وهو" في الكويت واحد دامهم كويتيييييييييييييييييييييين


النقطة الثانية...

النظرة المادية...اقصد فيها الماكل والمشرب والمسكن والملبس فهي ووواجب ع الزوج بحق زوجته شرعاااا اي كانت جنسيته يعني الكويتية اللي ماخذه كويتي... او الكويتية اللي ماخذه غير كويتي ...ذا حقها ع زوجها اذا تنازلت عنه برضاهااا ...يعني ماتالزم ديرتها به ...ماتلزم ديرتها بذا الحق الانفاق ع اسرتها اي كانت جنسيتها لانه بالاساس موواجب عليها شرعااا... يعني مو حقهااا ...وكون الدولة تقدم تسهيلااات مو لانوه كويتي وهي كويتيه لان الانفاق في الزواج واجب ع الزوج اذا كان كويتي صار ع الدولة تقدم له هالتسهيلااات اذا صار غير كويتي ماصار ع الدولة تقدم له هالتسهيلااااات لانه مو من ديرتها وحق عليه ع زوجته

النقطة الثالثة...

النظرة العاطفية...الاحقية بالجنسية يحق للكويتية ان تلحق الجنسية لابنائها كما يحق للكويتي وفي حال الاسقاط كذلك ...لان الجنسية ليس حالها حال النسب...تختلف ... في السعودية السعودية اقصد الام يمكنها اعطاااء ابناااائها الجنسية اذا كان الاب غير سعودي اما الزوج الغير سعودي يختلف الوضع في له شروط وقوااانين متى ماصارت تنطبق عليه صار ممكن ياخذ الجنسية يعني هنا لهااا حق ترفع صوتها وطالب فيه لانو الشرع معها هنا ومو معها في النقطة المادية اللي هي الانفاق


وجههه نظري ممكن تكون جهلت بعض الجوانب لاني بنيتهااااااا ع الشرع والحاصل بالسعودية الحمدالله ابناء السعودية من اب غير سعودي بما فيهم البدون يعاملون معاملة السعودييييييييييين تمام وممكن ياخذون الجنسية من امهم بس ابوهم لاااا عليه قوانين ولاوااائح وكذا الدولة انصفت مواطنيهااا بغض النظر عن جنسه ذكر ولا انثى

ردي لفظ الخلاااف لانوه متى ماوقع الخلاااف في مسالة ردوه للكتاب والسنة لقوله تعالى

 

[^Um M3touq^]

مساء الخير على الجميع
موضوع ماله نهايه مره يمين ومره شمال
والاجر على اللله
الحمداللله على كل حال
موضوع جميل وطرحج للموضوع اجمل واشكرج على هالمشاركه
وبالنسبه حق صاحبه الموضوع قالت رايها باسلوب محترم بعيد عن التجريح والاساءه ومافيها زعل
نحترم جميع الاراء المعارضه والمؤيده وتبقى وجهه نظر ورأي شخصي
ماراح تنطبق على ارض الواقع ....

ادخل بالموضوع
بصراحه انا لا مع ولا ضد
لانه يبي دراسه شامله من جميع النواحي عشان ماتصير السالفه اخذوه فقلووه ولاسمردحه
واذا بطبقون هالشي (اعطاء المرأه حقوقها) اعتقد بشروط وضوابط معينه عشان ما تعم الفوضى

عندي وحده من اهلي متزوجه من ايراني وعايشه بالكويت معاه
وعندها منه عيال والحمدالله الله ميسر امورهم
يصرفون على قدهم وعيالهم داشين بمدارس الكويت ولا عليهم قصور
الكويت ماتبخل على مواطن ولا على مقيم
حتى بنفسها تقول الحمدالله اللله رزقني بريال عوضني عن الكويتي (زوجها الاولي كويتي) كان محسر فيها

وما انكر في حالات تعور القلب من زوجات كويتيات
لكن ما باليد حيله
اللله موجود الرزاق الكريم
والله يفرجها عليهم
والحمداللله الكويت ديرة كرم والخير ماتلقون في بعض الدير هالشي​

 

[ريماس 89]

رد : الى كل من تنوي الزواج بغير كويتي ..والنعم بالكل بس فكري شويا .. او لا تتشكين بعد

استووووووووووووووووب. انا ما ابي اهاجمج ياصاحبة الموضوع بس امبين انج محتره ولا اشحقه قلتي هالشي على الاقل احسن من فلبينيه تتزوج ولا كلام عيالها مكسر وفوقها ماخذين من امهم ولا وفوقها تاخذ الجنسيه على شنو ما ادري بعدين تتطلق منه وتروح ديرتها اتعيش ملكه مع عيالها ادري مو اكثرهم.واللي تقول دهنا في مكبتنا لحظه لحظه خل نكون صريحين مع بعض اشدعوه اللي بالكويت كلهم الكويتيين ثلاث اربتعهم متجنسين وفوقها موكلهم كويتيين اصيلين اغلبهم على الاقل لمن تتزوج من غير كويتي العيال يحنون على امهم اكثر ويتعلمون منها وعيالها ماخذين وااااااااااايد على امهم ابكل شي وعلى فكره انا اعرف ناس تزوجت ولد خالها وعمتها لان موكويتي واهي كويتيه شتسوي هذا نصيبها وثانكس على الموضوع

 

[ريماس 89]

رد : الى كل من تنوي الزواج بغير كويتي ..والنعم بالكل بس فكري شويا .. او لا تتشكين بعد

ادري الموضوع قديم بس شدني

 

[اليكسا]

كلااااااااااامك في محله

ويقول المثل اللي مايخذ من ملته يمووت بعلته !

 

[فديت حبوبي]

رد : رد: الى كل من تنوي الزواج بغير كويتي ..والنعم بالكل بس فكري شويا .. او لا تتشكين

اب اب اب

 

[نسايم عود]

رد : رد: الى كل من تنوي الزواج بغير كويتي ..والنعم بالكل بس فكري شويا .. او لا تتشكين

صاجه مليوووووووون %
وانا معاج

 

[LuLiTa]

انا اقووول دهنا في مكبتنا 100000% الكويتي ما ياخذ الا كويتية ,, و الكويتية ما تاخذ الا كويتي ,,, و انتي قلتي ,,
((علاوة على ذلك البنت الكويتيه وقتها تستهين بالموضوع وتقبل من جميع الجنسيات على اساس ان السكن والقرض والاجار و50 دك على كل طفل وغيره من الحقوق متوفره سواء اخذت كويتي او غير كويتي وفي هذي الحاله يختلط الحابل بالنابل وتفقد الكويت هويتها والكل يصير كويتي ...))

انتي ما تهقين انه هالشي قاعد يصير لما يتزوج الكويتي من غير كويتية ؟؟؟؟؟؟ ما اتلاقين انه في فلبن و هنوود نسايبهم كويتيين؟؟ ,,القصد اهوو انه القانون الكويتي بنص على المساواة بين الجنسين في كل شي ,,,لكن مجتمعنا ذكوري و حيييل ظالم للحقوق الجوهرية للمرأة ,,,, و الكويتية المتزوجة من غير كويتي محرومة من ابسط حقوقها و اهوو وجود ريلها و عيالها معاها بالديرة ,,, تخيلي عقب ال 18 سنة عيالها يتسفرون لانهم طلعوو من حضانتها و لازم تكفلهم و اتييبهم حق الديرة مدة شهر واحد بالسنة !!! و ريلها اذا بيي الديرة ما تقدر تكفله و لازم كفالة عقود و شركات طووووووول فترة زواجهم !! كفالة الريل توها انحلت بقرار و طلعو قرار انها تقدر تكفل ريلها لكن العيال وين اتوديهم ؟؟؟ ,,,

و انا شوي بطلع عن الموضووع و اييبلج شي يبين انه مجتمعنا ظالم لحقوق الحريم ,,, الكويتية المتزوجة من كويتي اسمها ما يتسجل بوثيقة البيت ,, يعني الريل يقدر يطلقها و يقط عيالها و اييب مرة يديدة بدالها و لا حد يقدر يحاجيه و لا يناقشه لانه بالقانون البيت باسمه اهوو رب الاسرة ,,,, و يقدر يخلي مرته الكفيل ماله بس هم ممكن انه يطلقها و اييب وحده غيرها و اهي تتدبس لا من فلوسها و لا من بيتها ,,,

 

[بنت-دشتي]

آنا أتكلم عن نفسي
حبيت واحد إيراني وكلمني من البداية وقالي يا بنت الحلال آنا مابي ألعب آنا أبي الزواج، المهم دردشنا مع بعض وقالي كل شي وصدمني بإنه إيراني، عموما قلت حق نفسي أبيه وهوا أكبر مني ب 3 سنين عموما كلمت إختي الكبيره وخالتي وقتلهم هذا اللي يعيشني ويريحني أبيه كلمو الأهل بهالموضوع .. عموما كلمو أمي طبعا ما كانت راضيه وآنا كلمت أبوي وصارحته بالموضوع كله عموما أبوي وقف معاي ورضى وقالي يبا فكري بالموضوع عموما ورضو الأهل بالموضوع من بعد معاناة طبعا معاهم ... تقدملي ومهري كان 5 حاضر و 5 غايب والشبكه عليهم والعرس عليهم ولي دور كامل في بيتهم لين مني كلامي حلو وطبعا كان كلامه لي قبل الزواج كل شي يبي يسويلي ويشتريلي .... ماعليه عموما ملجة بالمحكمه عشان ماكان يبي الملاج يقول جدام الناس انج متزوجه من إيراني الجنسيه فرحنا المحكمه وعطاني مهري عطيته حق أمي ردت البيت مع ابوي وانا وياه طلعنا ... وبالسياره يقولي ليش عطيتي أمج المهر وعصب علي وقالي باجر تعطيني اياهم علشان أسويلج عرس وبعد جم شهر أرجعلج المهر أوكي ألحين صارلي سنتين ولا شفت دينار ... عموما ورحنا بيتهم نسلم طبعا انصدمت انه مو دور كامل لي غرفه صغيره وفيها عزكم الله حمام مسكرب شافني انصدمت وقالي السنه اليايه راح نهدم البيت ونبني طبعا كان زواجي بشهر 9/2011 وعلى اساس 2012 يشتغلون بالبيت وليلحين هذا البيت على حطته وسكت بلعت موس وانطميت .... أوكي وبعدين رحنا حق الكوشه تخيلو بس آنا وياه محد ويانا كان والمفروض خواتي يكونون وياي وهذا اللي أعرفه آنا ... مومشكلة حجزنا كل شي وكان عرسي راح يكون شي خيال بالكوشه راح ينصدمون فيها عموما وإختي قالتلي أبي أيبلج هدية زواجج قتلها خاطري بفندق ميسوني 3 أيام قالتلي تم عموما وقلت حق ريلي أبي ملابسك حق 3 أيام بنروح فندق 3 أيام هدية إختي قالي أي فندق عموما وذكرتله إسم الفندق قالي بنت إختي حاجزه بنفس الفندق جان أدق على إختي وقتلها غيري هديتج قالتلي أوكي وإصدمتني بهديتها وكانت لبنان أسبوع كامل عموما وفي يوم عرسي وآنا بالصالون دقت بنت اخته وانا مستانسه اني بروح ميسوني جان تقولي ترا الحجز راح خذوه ناس وانا حجزتلج نفس الفندق اللي كنت فيه مع ريلي ونفس الغرفه تخيلو وابجي بجي والمكياج اخترب وضغطي ارتفع وتاخرت على الصاله منها عموما وقلت الله يستر من تدخلها بحياتي عموما وتضايقت حيل والله العظيم .... عموما ورحت الصاله وانصمت انها مو كوشتي ولا الديزاين اللي انا ابيه ولا شي وكل شي غير مو انا مختارته عموما ونفس اليوم اللي رحت فيه الفندق الخايس مال بنت حماتي الله يسامحها ماسكت قلت حق ريلي قالي امبله هذا كل اللي اخترتيه عموما ودارت الايام وحملت وشرطت عليه في بداية حمالي اني اولد بأمريكا عشان بنتي ورحت والحمدلله طبعا انا اول حمال هذا لي تخيلو ولا خذيت امي ولا احد وكان يبي ياخذ امه قتله امي بعد تيي قال ماله داعي وعصب علي وكان طول فترة حمالي يزفني ودايما من يصير سوء تفاهم بينا يسبني ويقولي انتي مو متربيه ... فالكلام كان يأثر فيني وايد وكنت دايما أبجي والله العظيم ورديت من أمريكا بسوي إستقبالي في بيت أمي على يومين وهمن عصب علي مو بكيفج تسوين استقبال بيت أمج سويه بيت أمي قتله مابي همن أمي مو حاضره ولادتي وهمن ماتبيها تسويلي استقبال ... عموما مشيت كلامي غصبا عليه طبعا وزعل وطول فترة الأربعين آنا بهم وزعل وكنت تعبانه منه والله ولا كان يسأل عني ولا حتى عن بنته عموما ورديتله البيت ومرت الأيام بحلوها عشان بنتي وبمرها معاه هوا طبعا .... وتصالحنا وردينا البيت وانصدمت انه لي عزكم الله حمام وغرفه وصاله ومطبخ طبعا كل واحد فيهم قرقور عن الثاني ورضيت بأمر الله وقدره لي وقلت بقلبي لأني غصبت أهلي على هالزواجه فخل أسكت أحسنلي .... ودارت الأيام وإكتشفت عنده سوالف وبلاوي وسكت علشان بنتي وإحنا بالفراش يقولي تبيني أكرهج إنصدمت عموما صار ثاني يوم الصبح وقتله انته ويهك كان جبالي بالفراش وتقولي جذي ليش شفيك؟ عموما قالي ويهي ماكان مجابل ويهج وانا اقولج قتله والله العظيم أمبله "وطبعا كله أهوا اللي صح وآنا اللي غلط بكل حياتي معاه كان يغلطني ويعصبني ويطلعني من طوري لدرجة اني أقعد أبجي قبل الحمال ومع الحمال وبعد الحمال" عموما قتله آنا آسفه بقولك شي آسفه إنته جذاب وهمن آسفه آسفه جان يعصب علي ويصرخ ويسبني ويغلط وكنت لابسه قميص نوم جان أعصب وألبس عباية راس مو مصكره وأقط الشيله على راسي وقتله خل البيت لك جان أنزل ولا أمه وأبوه تحت مع بنتي جان أقولهم آنا ماراح أرجع البيت بعد مع السلامه ومن ذاك اليوم لين اليوم آنا في بيت أهلي تقريبا صارلي 6 أشهر ولا يسأل عني ولا شي وبنته ياخذها يمعه اي ويمعه لاء وبس وألحين أنا مادري شنو أسوي فيه .... مو قادره أرجعله ولا أبي أرجعله ولا ودي فيه ...

 

[نـعـومـه]

انا اول كنت اتمنى اخذ واحد جنسيته من بلاد الشام احب ستايل شكلهم وطريقتهم وبيئتهم وكان عادي عندي اخذ منهم ولما يالي نصيب من ولد ديرتي قلت الحمدلله مااخذت منهم لانه الحياة غاليه الكويتي ويالله يلحق شلون الوافد

موبس جذي حتى على موضوع البيئه ازور أهل زوجي واهوه يزور اهلي بصراحة مااناسب اني ازورهم واكون معاهم علاقه ولا اهمه يناسبوني

فرق البيئه والمعيشه بتكون صعبه علي

وكل شي نصيب

 

[Bio_reem]

هو من ناحية زين ومو زين ماله علاقة بالجنسية
بس اشوف مافيها ظلم لما تتزوج واحد وافد تعيش معاه قابله بوضعه مثل ما الكويتي ممكن تاخذ مهندس بالنفط وممكن تاخذ كاتب بالصحة، اللي تاخذ كاتب ماتقول والله عطوه مثل المهندس لانه حالي من حال زوجته كلنا كويتيات.
حياتهم المادية مو نفس الشي ، لكن اللي انا ضده سالفه التجنيس شنو مشكله الناس اذا ماخذه مصري ان عيالها يطلعون مصريين وين المشكله؟
دام تقولون جنسيه الريل مو عيب ولا هو اقل من الكويتي بشي نفس الشي الولد وهو مصري مو اقل من الكويتي هذي جنسيته مافيها عيب
الشي الوحيد اللي اتمناه انه العيال مايحتاجون اقامة وهالسوالف وشخصيا ما ادري اذا يحتاجون او لا ، وبنفس الوقت ضد تجنيس زوجه الكويتي هذي العن عندي مليون مره، عيال الكويتيه على الاقل خوالهم كويتيين ولدوا هني عاشوا كبروا هني بس هالاجنبيه ولدت وكبرت بديره ثانية تصير كويتيه ليش؟؟ عيالها وبيلحقون ابوهم ... اصلا بتقل مشكله اللي تتزوج عشان الجنسيه وتاليتها تتطلق وتتزوج غيره

 

[دنيا الصدمات]

انا مو كويتيه بس حبيت اعلق كونه ديرتي قاعده تجنس المترديه والنطيحه
في بداية الموضوع ما ايدتج بس لمن قلتي انه باجر اشذنب الكويتي بدال لا ينط 10 سنين عشان بيت باجر ينطر 20 سنه
فعلا انا اقول كلامج عين العقل وسليم

ليش الدوله تعطي جنسيه لابناء اب غير مواطن وبكره يناشب عيال الديره الاصليين في ديرتهم
وباحر يحقدون عالديره الي خذت حقوقهم وكل من هب ودب خلته مساوي لحقوقه
انا اقول الي يتبرا من اصله ماله اصل
اذا هيا رضت بغير الكويتي ترضي بجميع السلبيات والايجابيات

احنا ديرتنا المواطن ينطر فوووووق 20 سنه عشان يحصل ما يسمونه بيت
وايييج بو شعر مصوووفر ياخذ البيت في سنه مع كامل حقوق المواطن وهو ما يعررف يخط اسمه لاسباب سياسيه
قليلا من العقل الدوله عليها تعز المواطن عشان المواطن يعزهاا
مو اتييب الي تبرا من اصله وتنتظر منه الولاء والطاعه

 

[دنيا الصدمات]

اتمنى محد يفهم كلامي غلط بس كل واحد خل يفتخر بجنسيته
ليش الواحد يتبرا من اصله والله فشيله
كل ديره تعطي ميزات لمواطنيها بس ما يعني انها تتكفل بموطنين الدول الثانيه

انا باجر لو سكنت بديره غير ديرتي مثلا الكويت وسالوني شنو اصلج بقول كوييتيه طبعا لاا بحرينيه ما اقبل اغير جنسيتي لو شنو صار
ياريت احنا عندنا قانون مثلكم جان مو هذي وضعنا
وياريت كل شخص يفتخر باصله ولا يقبل ع روحه يتجنس ولاء لديرته الي يابته

 

[دارسين]

شوفو حبايبي كلامج عين العقل انا سعوديه ومتزوجه كويتي من 2001 وماغيرت جنسيتي

مو لاني مابي الكويتيه لا بس مو مقتنعه اغيرها وبالنسبه لي مابي جنسيه وكتبت هالشي بكذا موضوع ابي بس وظيفه اغير فيها جووو

خاصه ان النصيب لاحكم حتى لو ثري مو مهم المهم الوناسه والناس اللي حولج

بالنسبه لللكويتيه المفروض ماتفكر تجنس زوجها ابدا بس عيالها بالعكس لاتلومونها هم الوحيدين اللي ممكن يبقون لهاا

وبعدين الجنسيه مو كل شي يعني لو يوظفونهم ويعاملونهم معامله حلوة بس كافي

يعني تكون الاولويه لهم بعد الكويتين وبس