الرضاعة الطبيعية .... جد واجتهاد

[مراسي الحب]

الحمدالله انا في طفلي الثاني قاعدة ارضعه صج تعب اكون مداومة والصدر ينتفخ بس تعب حلو اول جم شهر لوية بعدين تتعودين

طفلي الاول ماقدرت ارضعة الا 20 يوم كان فيني كابة نفاس ودراسة واول ياهل تعب وسهر شي يديد مو متعودة وكنت صغيرة وماتطلع حلمتي واسخن يعني كل الطرق ماقدرت شفطت الحليب مت من العوار شريت حلمات لوية وماكو فايدة اخر شي مارضعتها بس تحسفت


الحمدالله الحين لا ثاني ياهل عادي متاقلمة على السهر وعندي ياهل من قبل فعرفت ارضع

خالتي ام ريلي تقولي بسج لي الحين ترضعين صدرج قتلها اي برضع

أول شي ... يعطيج العافية انج حاولتي وحاولتي مرة ثانية

الشي الثاني والمهم واللي لازم نتكلم عنه ... اللي اهو الضغط النفسي اللي الناس راح اتسويلج اياه علشان مااااا اترضعين ... واعيدها ... يخلونج ما اترضعين ... يصير الموضوع صج جهاد

 

[مراسي الحب]

لكل اللي تواصلوا معاي .... مشكوريت واااااااايد

 

[مراسي الحب]

لقيت شوية صور ... قلت خل احطها علشان يصير الموضوع مفيد أكثر ...

هذي المسكة الأولى ... لما الإيد العكس تمسك البيبي والإيد الأقرب للصدر اهي اللي تكون فاضية

 

[مراسي الحب]

وهذي المسكة الثانية ... مسكة البيسبول ... ان شاء الله اللي فيهم توائم يستفيدون منها ... أنا حاولت ألاقي صور حق بيبي واحد بس ما لقيت .. قلت هذي اتفيد بعد ... ابيكم تنتبهون شلون في الوضعين المخدة لاعبة دور

 

[مراسي الحب]

ولما الواحدة تصير فلتة ... ودايخة تالي الليل بس ديري بالج لا تنامين على البيبي ... ممكن تستخدم هالوضع .. أنا بصراحة استخدمته بعد لأن مع القيصرية كان مريح ...

 

[ام عمار]

مشكوووووووووورة

 

[مراسي الحب]

مشكوره عالموضوع

انا ولدي عمره 8 شهور و مستمره بالرضاعه .. انا لمن ولدت النرسات ويابولي ولدي وقالولي رضعيه وطبعا اهي وقفت فوق راسي وعلمتني .. طبعا اول مره عذاب اهو يبجي واهي قاعده تعلمني وانا صراخ لانه مو راضي يمسك بس الحين كله تمام

بس في شي مومقتنعه فيه مع اني قاعده ارضعه وبستمر انشالله لي عمر سنتين . ان الطفل يكون اذكى من الي يرضعون صناعي

لاني شايفه وايد عيال الطبيعي والصناعي واحس الرضاعه مالها شغل بهالشي .. انا شايفه صناعي اذكى من الطبيعي

ومادري ياليت تثبتونلي عشان اطمن على مستقبل ولدي

ما شاء الله عليج

بالنسبة لذكاء الطفل ... طبعا الذكاء غير متوقف فقط على الرضاعة ... أكيد الجينات تلعب دور ، ودور الأم والأبو والبيئة المحيطة بالطفل له دور ... لكن الدراسات اتقول إن الأطفال اللي يرضعون حليب أمهم بشكل عام يسجلون نقاط أعلى في اختبار الذكاء من الأطفال اللي ما شربوا حليب الأم .. بس في شرط ... انه الطفل شرب الحليب لمدة 6 شهور بدون أن يتغذى على أي شي ثاني ....

والشغلة الثانية ... في دراسة اتقول انه ماله شغل ... لكن الطفل اللي شرب حليب أمه يكون ذكي .. لأن امه اصلا ذكية وتساعد الطفل على تعزيز ذكاءه ... يعني اذا مو البيبي ذكي انتي ذكية ... هم وناسة

والشغلة الثالثة ... شنو اهم العناصر اللي تساعد على بناء عقل الطفل ، لأن الطفل ينولد ومخه غير مكتمل النمو ، ويستمر في النمو لمدة سنتين أو ثلاث بعد الولادة ... فنرجع ونقول ... شنو أهم العناصر؟؟

في احماض دهنية اسمها dha و aa ... هذي الأحماض غير موجودة في معظم أنواع حليب الأطفال الصناعي ... ما عدا s-26 وسيميلاك ... هذي الأحماض يحتاجه الجسم لبناء ونمو المخ ... طبعا وين ممكن نحصلها؟؟ في حليب الأم ...
علشان جذي انا مقتنعة ان فعلا حليب الأم يساعد الطفل على زيادة معدل ذكائه ... واحط 10 خطوط تحت كلمة يساعد لأن أكيد جينات البيبي لها دور ... بس تخيلي ...

اذا عندج بيبي اصلا مولود وهو ذكي ... وتوفرين له عناصر بناء المخ .. ما تعتقدين يصير أذكى؟؟

واذا انولد بيبي ... معدل الذكاء ماله عادي ... وعطينها من عناصر نمو المخ ... مما اتهقين ان فرصته في التعليم والتحصيل العلمي اتصير أحسن؟؟؟ اهو الواحد يجتهد ... ويوفر ألأفضل .. اللي نقدر عليه ان شاء الله ...

بس أكيد ما يمنع انه في طفل يشرب حليب صناعي يكون ذكي لأن الله سواه ذكي

أتمنى اني فدتج

 

[مراسي الحب]

يالله انكمل ....

الحين جربنا مسكات مختلفة ... ومتأكدين ان البيبي والأم مرتاحين في القعدة ... وان البيبي التقط صدر الأم بطريقة صحيحة ...

انشوف البيبي شنو يسوي ... قلنا راح يشرب شوي وينام ... شاتسوين؟؟؟ اتقعدينه من النوم .... شلون؟؟

ممكن:
-اتحركين اذونه
-تلعبين ابحنجه
-تعصرين صدرج شوي داخل حلجه لأن سبحان الله ... البيبي لما يحس بطعم الحليب يمص ويبلع تلقائيا ...
-اتشيلينه من صدرج ... وتفتحين المهاد ... لأن المهاد ممكن يخدره فينام ...

ومن اجمل الأشياء اللي ممكن اتسوينها ... انج اتشيلين هدوم البيبي (بس خلي الغرفة شوي دافية علشان برد التكييف) وتحطينه على جلدج مباشرة ... Skin to skin contact .... هالتجربة سبحان الله لها مفعول وتاثير على الطفل .... اتخليه أهدى ... وتشبعينه احتايجاته النفسية والعاطفية

 

[مراسي الحب]

شوية صور عن البيبي وحلجه وشلون اتحطين الصدر داخل حلج البيبي

 

[أم رفيف]

يعطيك العافية حبيبتي
فعلا انا ولدي ساعات يرضع 5 دقايق و ينام و ما كنت أصحيه ؟أكرعه و هو نايم و احطه يكمل نوم بس 10 دقايق و يصحى يبي ثاني
و اليوم مادري شفيه عرفتي ياختي من الصبح يرضع مني ينام بس ربع ساع ولا نص ساعة و يصحى يبكيي و يدور على صدري و الله دبحني مادري شسوي فيه

 

[مراسي الحب]

مرة على مرة ... راح اتصير هالعملية سهلة ...

انزين أول ما تولدين ماكو حليب ... شدراج انه صار في حليب؟؟؟

اهم اهم اهم اهم شي ... انه من اول ما يطلع البيبي ... كل ما يصيح يبي يشرب ... اتحطينه على صدرج علشان يدر الحليب ... وراح اتكلم عن در الحليب في النقطة الياية ...

اليوم الأول ماكو حليب .. الاثني ممكن يبدي يطلع الحليب ... انا شخصيا ما طلع الحليب الا ثالث يوم بالليل ... شلون عرفت؟؟؟

فجأة ... قعدت من النوم ولا ما شاء الله ولا قوة الا بالله ... صدري مشدوووود حيل ... وحاااار ... اخترعت ... دقيت على النرس ... مخترعة ... شنو هذا قالت لي ... هذا الحليب ... ويابت لي جهاز الشفط وخخففنا من الحليب شوي علشان اقدر احط صدري داخل حلج بنتي ... وجذذي كانت البداية السعيدة

 

[مراسي الحب]

أم رفيف البيبي عمره 3 أسابيع ... هذي فترة نمو الطفل ... 3 اسابيع و 6 اسابيع ... فجاة البيبي يبي يشرب حليب اكثر ... ويجوع أكثر ... سبحان الله ... تكون فترة نمو مكثفة للطفل فيحتاج غذاء أكثر ... رضعيه وطولي بالرضاعة ... خليه يشبع ولا تخلينه ينام قعديه علشان يكمل رضعته ...

اللي انتي قاعدة تتكلمين عنه انه البيبي يشرب شوي وينام ويرجع عقب عشر دقايق يبي مرة ثانية اهو من اخطاء الرضاعة الشائعة ... ويصير البيبي بدل ما يشرب ويشبع ويصبر 2-3 ساعات على الأقل ... اتلاقينه يبجي كل ساعة ولا نص ساعة ... واللي ياكلها طبعا الأم المسكينة ... هذا يسمونه Snacking

الصح ... انج اتخلين البيبي على صدر واحد ... ايييييييييييييييي ... صدر واحد من 30 إلى 45 دقيقة ... يفضي الصدر كله ... اذا ما شبع ذيك الساعة انحول على الصدر الثاني .... وانا كنت كل رضعة من صدر ... يعني مرة الصدر اليمين .. واللي بعدها الصدر اليسار ...

وراح اشرح ليش ... بس أول ممكن اقول شنو علاقة المخ بالرضاعة؟؟

 

[أم رفيف]

مشكورة حبيبتي على الشرح
و اي كملينلنا و الله موضوعك شيق
>> طبقت أول درس ماسكة وليدي باليسار و اليد اليمين حرة و برد عليك و برجع أمسك الحلمة
هاا شرايك فيني شطوورة

 

[مراسي الحب]

الرضاعة ... مصدرها الأساسي المخ ... وجهازها الصدر

مع الحمل يبدي الجسم يتهيأ للرضاعة .... علشان جذي يزيد مخزون الدهون عند الأم ... خصوصا عند الصدر والحوض يا فرحتنا هاا؟؟

المهم ... الدهون الزايدة ضرورية لإنتاج الحليب ....

... المخ هو المنظم لإنتاج الحليب ... شلوووون؟؟؟

لما البيبي يطلع ... وينحط على صدر الأم ... في مجسات تشتغل من فم الطفل ... موجودة في منطقة الهالة ... ترسل رسالة إلى المخ ... اتقوله في بيبي قاعد يرضع ... اول يوم المخ يسجل شكثر البيبي شرب .. ثاني يوم ... اتلاقين الصدر انملا في نفس الوقت ... ويوم بعد يوم المخ يغير من تركيبة الحليب لتتناسب مع عمر الطفل واحتياجاته ... يعني الحليب اللي يطلع من صدرج وبيبيج عمره شهر غير في تركيبته عن الحليب اللي يطلع وعمر البيبي 4 شهور ... سبحان الله ...

وكل ما كبر البيبي .. المخ يسجل .. اليوم البيبي شرب الصدر كله .. يعني باجر احتاج انتج كمية أكبر ... علشان البيبي يحتاج حليب أكثر .. سبحان الله كل هذا يصير واحنا ما ندري

المهم ... لما الام اتكون مو مرتاحة من الرضاعة ... اتهقين المخ راح يرسل رسالة لأنتاج الحليب؟؟ اكيد عرفتي انه لأ ... علشان جذي ممكن الألم أثناء الرضاعة (الألم غير الطبيعي طبعا) يخلي الحليب يقل ...

ولما اتيين في النهاية تفطمين البيبي على مراحل ... لما البيبي اليوم ما يشرب حليبته في موعدها ... سبحان الله ... ثاني يوم الصدر ما ينترس مثل اليوم اللي قبل ...

لهذا السبب انقول ... في المستشفى لا تخلون أحد يعطي البيبي حليب صناعي ... خليه دايما من صدرج ... وعقب دايما من صدرج ... من اتدخلين الرضعة تتخربط الحسبة ولا ماي عقب .. ولا شاي اعشاب ... لأن معدة البيبي صغيرة وممكن شربة ماي ولا شربة اعشاب تشبعه ويروح عليج موعد الرضعة ...

سبحان الله الرضاعة ميزان حساس ... نظام رب العالمين ...زاد الطلب ... زاد الإنتاج ... قل الطلب ... قل الإنتاج ...

 

[مراسي الحب]

مشكورة حبيبتي على الشرح
و اي كملينلنا و الله موضوعك شيق
>> طبقت أول درس ماسكة وليدي باليسار و اليد اليمين حرة و برد عليك و برجع أمسك الحلمة
هاا شرايك فيني شطوورة

أم رفيف شطورة أكيد والحين خليه على نفس الصدر لا تغيريينه لين يشبع ... طولي بالج ... حتى لو مدة ساعة .. شوراج؟

 

[نيلفار]

يعطيج العافيه

وتعزيز موضوعج بالصور راح يفيدنا اكثر واكثر


بس عندي سؤال بعض البنات حلماتهم تكون صغيره مراح تدخل بحلجه كله وتوصل لي المنطقة اللينه عادي ؟؟

 

[مراسي الحب]

هلا نيلفار ... الحلمة صغيرة .. ولا منطقة الهالة؟؟؟ اهو ليش مهم تدخل داخل كلش؟؟ علشان المنطقة اليابسة اتعور لما البيبي يمص ... بس اذا دنا ليه ورا ... ما اتحسين بالعوار ... جربي ... اذا كان ما يعورج .. اذا انتي في المنطقة الصح ... واذا كان يعور .. حتى لو الهالة صغيرة ... دخليها كله

 

[أم رفيف]

و الله مو شطوورة و لا شي:ssssso:
خلينه على صدري بس شكله ما يطلعلو شي و قام يعصب و يبكي و يمممممممممممممصص و يممصصصصصصص و يبكي لين دبحني و أنا اصلا حلمتي مورمة و كسر خاطري فقمت سوتلو 60 ملم و الحين بس سكت و بينام :eh_s(22):

 

[مراسي الحب]

من اهم الأخطاء الشائعة في التطبيق .. نظام 10 دقايق على الصدر اليمين و10 دقايق على الصدر اليسار ... ويالله ... خلصنا ... خطأ

الحليب يطلع على مراحل ... وبحطلكم صورة الحين توريكم الحليب اول ما يطلع شلون شكله وعقب شلون يصير شكله ...

الحليب يطلع على 3 مراحل:

1. الحليب الخفيف : وهو حليب يتكون اغلبه من الماء ... يطلع اول شي علشان يروي عطش البيبي ... سبحان الله ... علشان جذي ما يحتاج البيبي اللي يرضع من امه ماي ... عكس البيبي اللي يشرب حليب صناعي ...

2. الحليب العادي: هو الحليب اللي فيه المواد الغذائية اللي يحتاجها الجسم ... ووقت الشفط يبين لونه ابيض عادي ... يطلع فترة ...

3. الحليب الدسم: وهذا الحليب اللي يشبع البيبي ... ويكون لنوه مصوفر شوية ... واذا خزنتي الحليب في الثلاجة بتشوفين طبقة دهنية تكونت فيه


اذا وانتي اترضعين حولتي على الصدر الثاني خلال المرحلة الأولى أو الثانية يعني البيبي ما شبع ... بس عادة لما يوصل للمرحلة الثالثة .. اللي اهي بعد حوالي 20-30 دقيقة من بدء الحليب ... راح يشبع البيبي ويصبر بين رضعة والثانية ... سبحان الله

 

[أم رفيف]

وطبعا حاسة اني فااااااااشششششششششششلة و نفسيتي زيروووووو