الرضاعة الطبيعية .... جد واجتهاد

[مراسي الحب]

أسماء وطموحي

مشكورييييييييييين على المتابعة

 

[om__jana]

انا بعد ابله قاعده امبققه عيني بالشاشه :dddds: وركضه اييبلي قلم اكتب بالنوته

 

[مراسي الحب]

اوكي ... عرفنا البيبي لازم ينحط على الصدر عقب الولادة على طول ... شنو بعد لازم انقوله ... والكويتيات ما يحبونه

الاستقبال في المستشفى ......................................

راح الواحدة اتبدي الناس على البيبي ... والناس اللي بتيي ما اتقدر ... تبي تقعد تهذر ما تبي تشوف الأم وهيا اتصارع مع البيبي علشان يرضع .... ويا ويل المستشفى اللي يخلي البيبي داخل الغرفة ... اتصير خدمتهم مو زينة وما يعرفون ....


ماشي بتسويين استقبال حق الناس ... لا تستحين اتقولين عن اذنكم برضع وسكري الستارة عليج ... وخلي امج وخواتج وحمواتج يجابلون الناس ....

ترى أهم شي اول فترة ... يعني أول جم يوم ....

 

[نيلفار]

متابعينج

 

[مراسي الحب]

أم جنى ... حبيبتي ... انتي ونيلفار سبب هالموضوع

 

[lailalaila]

يعطيج العافيه يا مراسي و جعله الله في ميزان حسناتج يارب الموضوع وايد مفيد

 

[مراسي الحب]

الحين عرفنا اول رضعة متى ... وشنسوي مع الاستقبال .... في نقطة مهمة لازم اقولها هني

سبحان الخالق ... البيبي أول يومين وعلى ما يطلع الحليب ... ترى ينام وايد ... وما يشرب وايد حليب شفتوا حكمة رب العالمين؟؟

يعني ماله داعي كل ساعتين اترضعينه اذا اهو نايم ... وكل ما يقعد حطيه على صدرج حتى لو مافيه حليب ... سبحانه يرزقه ... واذا كلش كلش ... عطي البيبي شوية (يعني مو اكثر من 30 مم) حليب صناعي ... وخليه حل أخير كلش ...

النرسات يحنون بس علشان يبون البيبي يسكت ...واهلج يبون البيبي يسكت بعد ... بس انتي تبين اترضعين ... فلازم تتحملين حنتهم وتقولين لا تعطون البيبي حليب صناعي خلوني أجرب

 

[ام فهودي دودي]

مشكورة يعطيج العافية

 

[مراسي الحب]

ليلي وام فهودي مشكوريييييييييين وايد على التشجيع

 

[نيلفار]

 

[مراسي الحب]

انزين ... انتي الحين شنو نفسيتج؟؟

تعبانة من الولادة ... والناس ربشة دار ما دارج ... وصل الشاي؟ الكاكاو اشصار عليه؟؟ التوزيعات؟؟ الكفر ... الورد ... هممم جنة الاستقبال صار وايد اولوية ...

واكو هذا النونو اللي صار له 9 أشهر داخل بطنج ... وتحاجينه ويلعب ويحوس ... كاهو اسم الله عليه برة ... يبي ماما ... تلتفت عليه واتجابله شوي

راح اتكونين مرتبكة ... أول مرة ما تعرفين ... عادي ... لا تخافين اتقولين حق الناس اللي يربكونج ... انه يخورون عنج ... ويكون معاج واحدة ... يمكن نرس تعرف حق الرضاعة ... علشان اتساعدج وبس ....

البيبي ترى بيصيح ... ويحوس ... وشكله يكسر الخاطر ... بس انتي امه ... انتي الملجأ ماله ... كوني قوية ... وسيطري على اعصابج ...وخليج هادية لأن أحلى تجربة بحياتج راح تبدي وسلاحج؟؟ انج اتعرفين شنو متوقعة ... وعندج خطوات تتبعينها

 

[om__jana]

ايييييييييييي خطوات ابله مرااااااااااسي :ggdw:

 

[نيلفار]

كملي حبيبتي

يعطيج العافيه

 

[مراسي الحب]

شنو اتسوين الحين ... البيبي عندج ... بحضنج ... ويبي حليب

اول شي : كوني هادية ...
- كوني قاعدة بجلسة مريحة .... يعني انتي اول شي كوني مرتاحة ....
- حطي لج مخدة بحضنج ... أو مخدة الرضاعة الخاصة (مشوار ثاني للسوق هههههههه) علشان البيبي ينحط عليها ... ترى مو صح يظل معلق على إيدج طول فترة الرضاعة .. خصوصا أول فترة على ما تتعلمين ... واذا بعد كنتي والدة قيصرية ...
- مسكي البيبي مسكة مريحة ... شنو اهيا؟؟؟


المسكة الكلاسيك ... اللي اهيا ... البيبي راسه عند صفطة كوعج ... وجسمه متسند على ايديج خل نقول اليمين ... وانتي بترضعينه من صدرج اليمين ... ماشي؟؟ ..................... أنا ما احب هالمسكة ههههههههههههه تلبك ... وتوهق وما تدرين انتي زانطة البيبي ولا متقلقصة وياه

انا جربت هالمسكتين ووايد حبيتهم ...

أول واحدة : اذا كنت بترضعين من صدرج اليمين ... حطي البيبي على ذراعج اليسار ... يعني انتي ماسكة راسه بايديج اليسار ... وجسمه مسنود على ذراعج اليسار ... اتمنى اتكون وصلت الصورة ... يبي لعبة وجربي عليها لوووووووووول

بهالطريقة ... ايدج ايمين اللي اهي يم الصدر اتكون فاضية ... وتقدرين تتحكمين فيها

 

[مراسي الحب]

والمسكة الثانية يسمونها مسكة البيسبول

بترضعين من صدرج اليمين ... حطي البيبي بين خصرج وذراعج اليمين ... ريوله ورا .. وويهه جدام ... ومسندته على ايديج اليمين ... جذي ... ايديج اليسار لها مطلق حرية الحركة ...

 

[مراسي الحب]

ليش مهم اتكووون عندج ايد فاضية؟؟

لأن البيبي اول شي لازم يكون جسمه كله لاف باتجهاك ... يعني مو منسدح ورقبته لافة عليج .. لأ ... بطنه على بطنج ... هذا في المسكة الأولى ... وفي المسكة الثانية ... يكون البيبي منسدح على جنب ...

اذا خليتي البيبي منسدح على ظهره ولاف رقبته ممكن يصير فيه شد عضلي في رقبته هههههههههههه حياتي والله اللي يصير فيهم شد ... جنه صج

ثاني شي ... الإيد الفاضية ... راح تمسكين فيه الصدر ... من وين؟؟؟ من منطقة الهالة ... مو من الحلمة ....

 

[نيلفار]

 

[om__jana]

 

[مراسي الحب]

انسوي زوووووووووووم على البيبي ....

لازم تنطرين لما يفتح حلجه على كبره ... يشرع حلجه ... ممكن اتحطين طرف الحلمة على شفايفه .. سبحان الله ردة فعل اتخليه يفتح حلجه حيييل ... من كبر حلجه عاد ههههههههههه

وبعدين ... اتسووين حرف ال c بالإبهام والسبابة ... وتمسكين الصدر من منطقة الهالة وابعد ما يكون عن الحلمة ... وحتى من ورا منطقة الهالة ... وتدخلين أكبر جزء ممكن داخل حلجه ... يعني الحلمة كلها واغلب الهالة .... الهدف؟؟

حطي لسانج الحين فوق عند سقف الحلج ... شاتحسين فيه؟؟ اللهاة ... يابسة مو صح؟؟ ايييي ... ردي بلسانج شوي لي ورا .. تكملة اللهاة بس مو يابسة ... صح؟؟ هم اييييي ... الهدف ان الحلمة توصل ذيك المنطقة .... فهمتيني؟؟؟ ليشششششش؟؟ صح؟؟؟

المنطقة لينة ... اذا البيبي قعد يمص فيها ... انتي ما تتعورين ... وبعدين المجسات مالت الرضاعة موجودة في منطقة الهالة ... فلما المنطقة تدخل داخل فم الطفل ... المخ يستلم الرسالة ان البيبي قاعد يرضع ...

التقاط الطفل لصدر الأم ... اهو أكبر سر من أسرار إدرار الحليب

 

[مراسي الحب]

اذا البيبي التقط الحلمة بس ... تذبح ... تعور ... وتشقق الحلمة ... وكلها جمم يوم ... ويخف الحليب ... وتقولين نشف الحليب

اذا البيبي التقط الحلمة بس أو حسيتي ان التقام الطفل للصدر مؤلم ، حطي صبعج الصغير ادخل حلج البيبي من الطرف وفتحي حلجه شوي شوي علشان يهد صدرج ... وجربي مرة ثانية ....

ترى الرضاعة نفسها ما اتعور ... يكون الوضع بس اهو اللي غلط ...

الحين حطينا الصدر داخل حلج البيبي ... شفتي المسافة اللي بين ويهج وويه البيبي ... في الفترة الأولى من حياته ترى هذي المسافة اللس يوشف فيها الأشيا واضحة ... استمتعي ... البيبي الحين قاعد يتأمل ويهج ويشوفه واضح احلى لحظة ... ولا يمكن أي شخص يشاركج فيها ...