السلام عليكم ورحمة الله وبركاته
خواتى الغاليات والحريم السنعات
بنات منتدي كويتيات الرائع
يطيب لى اليوم مشاركتكم
هذا القسم عل وعسي اكون ضيفه
خفيفه ومفيده لكم
من زمان وانا خاطري انزل لكم بعض
من طبخاتى واعلمكم اسرار من مطبخي
حق الغاليات اللى حابات يتعلمون الطبخ على اصوله
يا حبيباتى ابيكم تذكرون الله وتقولون ماشاء الله
هذا الموضوع الاول واتمنى الاقي تشجيع منكم
علشان استمر واطرح مواضيع اخري في هذا
القسم الخنين
طبقى الاول
النودلز الصينى " الاندومى"
بالبدايه احط لكم المقادير
شاورما دجاج ساديا
كيس خضار مجمده من مركز سلطان
واذا ما في حطي اى خضار تحبينها مثل
" الفطر- البصل الاخضر - الفلفل الحلو - البروكلي - الملفوف"
كيس اندومي بالنكهه الدجاج
بصل جوانح
جزر مقطع بالطول
ثوم ناعم
زنجبيل ناعم
كزبره للتزين
وكازو محمص للتزين
صلصه الصويا
واللى حابه تضيف اى نوع من الصلصات الاخري تقدر تضيف
فلفل اسود
ومكعب ماجي
اشويه ملح لان الصويا فيها ملح
الطريقه
المقلاه العريضه العميقة
واضع فيها زيت ذره
واحط البصل مع الدجاج والثوم والزنجبيل
وكيس الخضروات المجمده والجزر
واحمسهم عدل واحط لهم مكعب ماجي وايضا صويا صوص
واحمس فيهم لما يتجانسون
وتحسين انهم انسجموا مع بعض
وصاروا حبايب
الاندومي تعرفنه فيه داخله بهارات وفلفل
هم اخذهم واحطهم فوق الحمسه
الله يا الريحه تقول مطعم صيني في مطبخي
المهم يا حلوات
احط الاندومي في جدر فيه ماى حار على النار
واشوي ما تخلينه يطول لانه يستوى بسرعه
عقب اشخله من الماي واحطه في جدر
وايب حمستى واحطها فوقه
واخلطهم عدل واغطي الجدر
واخليهم على النار لمده 5 دقايق
وقت التقديم احط النودلز في صحن التقديم
وازينه بالكاجو والكزبره الناعمه
والنتيجه تطلع بهذى الطريقه
الشغل كله ما خذه منى وقت
غير نص ساعه تخيلي
اتمنى تطبقونه وتعلمونى عن نتايجكم
واهم شي يا الغاليات الطبخ من الاعماق
هى اللى تعطي الاكله طعم حلو واللى
حاب الشيء صدقونى راح يتقنه
وانا محد علمنى الطبخ من صغري من اتذوق اى شيء
اروح اطبقه بالبيت وابتكر شغلات تطلع حلوه
وتعجب كل من ذاق طبخي
ودايم يقولون لي طبخج يدوخ شنو حاطه فيه
وانا وبكل بساطه حاطه من روحي بالطبخه
وياريت البنات والحريم يفهمون هالنقطه عدل
عسي بس ما دوختكم في هذرتى
وعليكم بالعافيه يا الغاليات
