استضافة الدكتور بدر حسين كرم ..تخصص طب وجراحة الاسنان

[شمااايل]

السلام عليكم يعطيك العافيه دكتور


انا ولدي عمره خمس سنوات ونص واللحي باولى ابتدائي عنده عاده مص الاصبع حاولت معاه بكل الطرق بس مافاد فكه احسه تغير برز للامام شوي ضروسه احسها تفرقت عن بعض والله عجزت معاه ماينام الا واصبعه يمصها مدري شنو الحل وهل يلزم له تقويم وللحين الاسنان اللبنيه ماطاحت


ومشكور واسفه علي الاطاله

 

[د/ بدر حسين كرم]

الاخت
Ranona
بالنسبه للاسنان الاماميات اهم يطلعون على عمر 6 سنوات و بنتج الحين الله يحفضها 5 ف ماله داعي اي تدخل انشالله

 

[د/ بدر حسين كرم]

الاخت koko_2841
اولا يزاج الله خير على الاهتمام والحرص على الرضاعه الطبيعيه
اللي قاعده توصفينه اهو تسوس ولازم ينحشي حشوات تجميليه عشان نحافظ عليهم
واذا ماتنظفو السوس راح ياكل السن وراح نضطر انشيلهم بالمستقبل
وللعلم اختي اننه الاسنان الاماميات يتبدلون على عمر 6 الى 7 سنوات وولدج الله يحفظه 2 ونص يعني جدامهم باقل تقدير 4 سنوات فضروري انه تعالجينهم عشان صحته و نفسيته

 

[**سهام**]

يعطيك العافية دكتور
انا اشتكي من ألم بين الضرس السادس والسابع في الفك العلوي من الجهتين وهذا الالم يمتد الى الجيوب الانفية ويسبب لها التهاب صراحة جدا مؤلمة احيانا تقعدني من النوم فجأة وما أقدر ارجع انام بسبتهم . رحت الطبيب وقالي هذي بوكت بين الاسنان وان ما لها علاج وعطاني مضمضة ومضاد . المهم انا سويت بحث في الانترنت ووجدت ان علاجهم تنعيم الضرس وعملية لثة .
فأبيك تنصحني شنو اسوي ووين اروح لان الالم يهدي يومين ويرد مرة ثانية . مع العلم اني انظف بالخيط والمسواك والفرشة والمعجون بس احس ما كو فايدة واسناني كأنها ملمسها خشن يمكن لان فترة الوحم والحمل أثرت على اسناني او نقص فيتامين د اللي توني بديت اعالجه.

 

[د/ بدر حسين كرم]

الاخت
شمااايل
بداية لا بد من مناقشة هذه العاده مع الطفل (انها عادة مو زينه حبيبى و ابيك تصير شاطر من الاولاد الشاطريين الزينين .... واشاء من هذا القبيل) إذا استمر الطفل فهناك عدة خطوات للتخلص من العادة السيئه
اولا : دهن اصابع الطفل بمادة ذات طعم مر مثل الفانيليا أو الزنجبيل
ثانيا : ربط الاصبع بقطعه من الشاش ربط خفيف لتذكرة الطفل بعدم وضع اصبعه داخل الفم أو توجد بعض المنتجات الجاهزة التى تحيط بالاصابع لمنع هذه العادة قد تكون متوافرة فى الصيدليات الكبرى احيانا
ثالثا : فى حالة استمرار العادة يمكن وضع جهاز بسيط داخل الفم يحتوى على بروزات صغيرة تمنع الطفل من هذه العادة
ولكن اختى احيانا تكون هذه العادة للفت الإنتباه لشيء معين مثل تقليد طفل اخر او شىء من هذا القبيل.

 

[ام كوثر2007]

دكتوووووووور الله يعافيك ..


ولدي عمره سبع سنين ..


ضروسه الاماميه اللى فوووق مو متساوين وبينهم فتحات كبيره .. وضرس كبير وضرس صغير ..


متي اقدر اسويله الجسر ما ادري شيسموونه هذا اللى يساوي الضروس كلها ؟؟


ياليت تفيديني ما عليك امر .. وهل مراكز الاطفال مثل الصحه المدرسيه تتكفل بمثل هالاموور ..


وشاكرين جهودك ..

 

[الـــريـــم]

السلام عليكم
دكتور انا ولدي عمره 3 سنوات ونص
واسنانه اللي جدام صغار وبينهم فتحات (مفججين)
مع اني افرشهم له صبح وليل بس فيهم جير بالامام
شنو الحل!!

 

[د/ بدر حسين كرم]

الاخت**سهام**
الالم اللي يقعدج من النوم في الغالب عصب!!!
اما الجيوب يكون المها مثل الضغط
والجيوب علاجها تنظيف (عادي او جراحي) مع مضمضات
اما العصب فيحتاج علاج عصب كانل وبعدين تلبيس
راجعي مستوصف ويحولونج حق المراكز التخصصيه
والا حياج عندنا في العياده والله يقدرنا ونريحج من الالم
وسلامات انشالله

 

[د/ بدر حسين كرم]

الاخت ام كوثر2007
انتي تقصدين التقويم؟؟
ممكن انه الدكتور يبدي بالتقويم من عمر ولدج الله يحفظه خصوصا اذا كانت المشكله بالفك (نمو الفك)
والصحه المدرسيه مايفيدونج
روحي المستوصف وهم يحولونج
ب

 

[د/ بدر حسين كرم]

الاخت الـــريـــم
في الغالب هذا تسوس وحله الوحيد حشوات

 

[LuLiTa]

سلام عليكم دكتور يعطيك العافية ...


عمري 25 سنة و انا كان فيني لوكيميا قبل 20 سنة و تعالجت .. و الحمدلله الحين صحتي زينة ... لكن العلاج الكيماوي كان له اثار على عظامي و بالتحديد اسناني .... عندي القواطع الـ 2 الامامية العلوية جذورها ضعفية حيل و الاسنان نفسها تتحرك ..و دكاترة وايد ينصحون اني اخلعهم و ازرع عظم و اكمل زراعة الاسنان... فـ انا خايفة من فكرة خلع الاسنان و زراعة غيرها ... لاسباب منها :

تأثيره هـ الشي على مظهري العام + المدة الزمنية بين الخلع و الزراعة + خوفي من احتمال عدم نجاح عملية زراعة العظم لانه عظامي من نوع 4 حسب كلام اختصاصي الزراعة ...


فـ شنو الحل الامثل ؟ و هل في بديل يثبت اسناني الاصلية و يغني عن الزراعة ..يعني تلبيس او جسر مثلا ؟

 

[د/ بدر حسين كرم]

الاختLuLiTa
اولا الخيارات الثابته اما زراعه او جسر
بالنسبه للزراعه:
نوع العظم اللي عندج يبين وقت العمليه فقط الا اذا كان فيج هشاشه عظام فهذا قطعا نتوقع انه يكون نوع العظم A4
اذا الضرس موجود ف انشالله ماتحتاجين زراعه عظم (الغالب) و اذا احتجتي ف نسبه النجاح عاليه جدا ...و النسبه تقل اذا كان الضرس مشيول من زماان ..لكن مدام اننه الضرس موجود فهذا يرفع من التطلعات.
الوقت بين الخلع و الزراعه تحطين جسر مؤقت و شكله ممتاز و ماياذيج
اذا كان الضرس يتحرك في جميع الاجناب ف ماله حل الا الخلع
الحين...اذا كان الضرس لازم ينشال و قررتي زراعه فنصييييحتي سويها عند واح شااااطر(ولاتفكرين بجم)لانه الاسنان الاماميه شغلها دقيق جدا
القرار ادري صعب عليج بس درسي الموضوع عدل و توكلي على الله

 

[ام فوفو2]

السلام عليكم دكتور بنتي عمرها 3ونص
وطاحت وانكسرو اسنانها الاربعه الي فوق وظل تاج الاضروس الاربعه معلقه
وديتها الطبيب وحصل معاها خوف لانه كانت معاملة الدكتوره لها غير محببه للاطفال ولي انا شخصيا والحين ماني عارفه اشلون اوديها رافضه انها تروح واهيه الحين صارلها على كسر الاسنان سنه وتسع شهور

 

[amani]

السلام عليكم ورحمة الله وبركاته

دكتور بارك الله فيك الي حطيتوا عياده للأطفال

بنتي عمرها ثلاث سنين وعندها تسوس اربع ضروس وبقيت اعرف في ابره مخدره او في طريقه ثانيه للتخدير

ومشكوووووور

 

[كتكوته22]

السلام عليكم دكتور عندي استفسار بنتي عمرها سنه وخمس اشهر سننت عقب السنه بس ضرسين تحت وضرسين فوق والحين احط ايدي بحلجها احس ما في بوادر ان يبطلعون الباجي بالعمر طبيعي بس اربع أسنان وشكرا دكتور

 

[دارسين]

مرحبا دكتور بدر الله يعطيك العافيه

انا بودي اسألك عن الزريكون مع العلم بس اسناني الاماميه مافيها شي

والباقي حشوات وتقطيع عصب على مدى خمس سنوات بدت فجأه مع الحمال

تتأكل وتتكسر بعدين يصير سوس يعني نوعا ما اسناني ضعيفه

وانا سمعت ان الزريكون مايتهالك ويخرب على مدى عشرين سنه على الاقل

متردده اذا كان فعال لنفس حالتي او لا؟

 

[Mariam85q8]

بالتوفيق

 

[د/ بدر حسين كرم]

الأخت : ام فوفو2
أولا : علاج أسنان الأطفال يتطلب تعامل خاص يشترك فيه الطبيب والطفل والأهل لتهيئه جو مناسب للطفل يزيل الخوف والتوتر منه ( فمثلا الاهل يساعدون الطبيب عن طريق بعض التشجيع مثل هذا مو طبيب هذا عمك بفرشلك اسنانك وأشياء من هذا القبيل) ويبدا دائما العلاج بالتهيئه النفسية للطفل ثم يصعد العلاج خطوة خطوة من الأشياء البسيطه أولا حتى الأشياء الكبيرة بس اهم شىء عدم التثقيل على الطفل فى طول الزيارة والشغل الكثير.
ثانيا :بالنسبه لسؤالك عن الاسنان المكسورة فلها اكثر من طريقه علاج تختلف على حسب اختلاف حجم الكسر فبعض الاسنان قد تحتاج فقط حشوات تجميلية بيضاء وقد تحتاج الى سحب للعصب وإذا كان الكسر كبير(طايح معظم السن) فقد يحتاج السن الى وتد صغير لتقويته

 

[د/ بدر حسين كرم]

الأخت:
amani
طرقه تخدير الطفل ممكن تكون بالابرة العادية أو بالأبرة الألكترونية وهى أفضل إلا انها تحتاج الى وقت اطول من الابرة العادية ولكنها تمتاز عنها بانها بدون الم نهائيا
واحيانا مع بعض الاطفال يستخدم غاز النيترس ( الغاز الضاحك )ولكن ذلك لا يغنى عن استخدام الابره
وأهم شىء للطفل هو عدم اخافته نهائيا بالأبرة مثل قولنا (طرى الطبيب بيغزك ابرة ولا تتحرك عشان لا تتعور وأشياء من هذا القبيل)

 

[د/ بدر حسين كرم]

الأخت :
كتكوته22

كثير من أولادنا هذى الأيام يتأخرون فى التسنين هذا شىء عادى فأطفال كتيير يبدؤن بالتسنين بعد السنه الأولى و ترى حكاية 6 اشهر مو حج اولادنا بالكويت هذه دراسه قديمه على الأطفال بأمريكا فموشرط تنطبق على أطفالنا وزى ما قلت لك هذا شىء طبيعى جدا
وعن عدم احساسك بالاسنان لما تحطين اصبعك بحلجها مو معناه انو مافى اسنان لان السنان مغطاه بعده طبقات من عظم و لثه و تحتاج الىيد مدربه لتحس فيها
عموما الله يحفظهالك من كل شر وان شاء الله هى بخير وعافيه