إذا تسألين ليش الناس عندهم إرادة و ينجحون وأنتي لأ؟ دشي

[free SpiriT]

أول شيء تخريب الدايت أنواع​

1.النوع الأول: نوع وقتي وحسب الموقف نفسه لما تضعفين قدام الأكل : هالنوع تقدرين تتداركين نفسج فيه ​

مثلاً كليتي شيء زايد ع الغدا ​

الحل: تداركي نفسج و قللي العشا أو اكتفي بسلطة ع العشا وخلاص أو زيدي مقدار الرياضة اللي تلعبينها عشان تحرقين اللي كليتيه​

خبصتي طول اليوم لأن عندكم مناسبة أو أو ... لأي سبب كان واصلي طول أيام الأسبوع صح ولا كأنج خربتي​

قولي أنا عندي هدف طووويل ويوم واحد خلاص مضى أنا راح أواصل صح لأن كل قرارتي بايدي, لا تقولين ببدأ من باجر وكأن الدايت انتهى وبتبدين من جديد لأ حطي في بالج مشوارج كله بطوله و عرضه و إن هذا مجرد يوم وراح تصححينه​

2. النوع الثاني أسميه الغفلة : رحتي مناسبة تجمع عزومة عرس نسيتي تمااااماً إنج بدايت و انجريتي للأكل جرررر​

كليتي ما لذ و طاب وما تدرين عن نفسج , مو عشان ضعف إرادةلأ من الغفلة و النسيان و يا كثر ما تصير​

الحل: سجلي كل وجباتج وامشي عليها عشان يكون في trackingسواء للسعرات أو لريجيم معين ​

أو : دشي بتجمع أو كتبي يومياتج أو دشي مسابقة هني أو مع صديقاتج المهم خلي لج تذكير​

3. النوع الثالث: هذا أخطر نوع لأنه طويل الأمد و أسبابه الاحباط او لما المحيطين فيج ما يشجعون و البيئة مليئة بالمغريات و الأكل أو اللي يقولج شلج بالريجيم أو اليأس أو أو أو .... و أهم سبب ( بوقف اليوم و ببدأ باجر أوالسبت أو الشهر الجاي أو تاريخ 1 ) هذا النوع من القرارات ممكن يطوول وياج و باجر تصير سنة , لما تبدأين ابدأي من اللحظة اللي انتي فيها ولما تخربين صححي الخطأ من اللحظة اللي أنتي فيها ومن الوجبة القادمة ​

الحل: ابتعدي عن الناس اللي يخربون عليج و ما يساعدونج لأنهم حتى لو ما كانوا يقصدون ما يحبون لج الخير,, ع الأقل لا تشاركينهم بالوجبات ,, لاتروحين عزومات ما تقدرين تقاومين فيها ,, لا تروحين عرس وتنطرين لين يفتحون البوفيه و انتين تدرين إنج ممكن تضعفين ,, لا تروحين مطعم و انتي تدرين إن الأكل بيناديج و راح تقولين له لبيييه ​

ردي على كل المحبطييين بقووة ​

وفكري بينج وبين نفسج : مو انتوا اللي عايشين حياتي, مو انتوا اللي تلبسون مقاسي و تعانون من الوزن و الثقل و انتظار الحلم , مو انتوا اللي دعيتوا و وحلمتوا و تمنيتوا و عانيتوا مثلي​

و أنتم مو أنا ,, أنا شخص يونيك وفريدة من نوعي​

لي أسباب خلت وزني يزيد و أنا بإمكاني أعكس اللي صار والله هو اللي يسندني​

خلي خبرتج السابقة دليلج , أكيد انتي الأدرى وين بالضبط التخبيص يصير​

عاهدي نفسج و احترمي العهد ​

ابدأي اليوم و الـــحـــــين ​

شنو المميز بيوم السبت عشان يكون هو البداية؟ أو بدايةالشهر؟؟؟؟​

ليش باجر؟ ليش مو اليوم ؟؟؟ جسمج و رشاقتج و صحتج وقتها الحين مو وقتها باجر​

تحتاجين الرشاقة و الصحة والخفة الحين مو باجر​

عمرج لازم تعيشينه الحين مو باجر​

اليوم خاطرج تلبسين و تكشخين مو باجر ​

مو الشهر الياي و لا السنة الياية​

((الوقت الوحيد الذي بإمكانك التحكم به و تغييره هو الآن))​

اكتبي يوميات​

دشي تجمع​

سجلي وجباتج​

شوفي لج مجموعة بنات لهم نفس الهدف و كل كلامهم بيكون تشجيع و إيجابي​

اقري عن الدايت و التغذية و الرياضة و شوفي بالنت أجسام تغيرت للأحسن​

شنو الشي اللي خلاهم ينجحون؟؟​

حطي لج تذكير بالفون من الصبح و ع أوقات متفرقة​

تذكيرات بأهمية إنج تكونين رشيقة وجسمج ثمين و غالي ولازم كل شي يدشه يكون صحي و محسووب​

حطي قدامج فستان أو بنطلوون أو قميص أو بدلة حابة تكون فت عليج وجسمج يطلع وااااااو فيها​

و شي مهم حبيت أذكره خصوصاً للي وزنهم أكثر شي بالساقين والفخذين : (( لا تظلين ع جلسة وحدة فترة طويلة , أحسن شيء لهالنوع من الأجسام إنج كل ثلث ساعة تقومين تحركين الدورة الدموية في الساقين و الفخذين, امشي بمكانج وسوي أي تمارين خفيفة كلش مجرد تحريك الساقين نط ركل كأنج ترفسين شي جدامج لكن ع خفيييف أو مجرد تحريك الساقين و القدمين يعطي نتيجة , هالمعلومة حطوا تحتها مليووون خط لأنها من عند معالجة خبيرةوفادتني وايد وصرت احط لي منبه تذكير كل ثلث ساعة في الأوقات اللي اعرف راح اكون قاعدة فيها لوقت طووويل ))​

في شيء ثاني مهم وااايد بعد : ((أهدافج لازم تكون محسوبة بالوقت و بالوزن و بالشكل والطريقة))​

شلون؟؟​

لما تيين تحطين لج هدف ,,​

اول شي لازم توصفين الهدف بدقة بالمعايير اللي كتبتها فوق​

بالوقت, مثال : في فترة 5 شهور راح ....​

الوزن : يكون وزني 65​

الشكل : و شكلي متناسق ومشدود ويحسسني بالثقة عشان ألبس الفستان الفلاني​

الطريقة : و عشان أحقق الهدف هذا راح ألتزم بالدايت اللي تعطيني إياه الدكتورة و راح أتمرن أربعة أيام بالأسبوع لمدة نصف ساعة​

خلاصة المثال : ((في فترة خمس شهور راح يكون وزني 65 وشكلي متناسق و حلو ويحسسني بالثقة و راح أقدر ألبس الفستان الفلاني و راح أحقق هدفي عن طريق الدايت تبع دكتورة التغذية و ألتزم بالرياضة 4 ايام بالاسبوع لمدة نصف ساعة))​

هذا هدف موزون ومعقول و ممكن التحقيق!​

كلما كانت أهدافج واقعية و ملموسة و محسوبة راح تكون نسبة نجاحج في تحقيقها أكبرررر​

حسب معرفتج بنفسج شووفي وين المواقف اللي تخليج تضعفين وتستسلمين للأكل؟ انتي الأدرى بنفسج و طبيعتها و نقاط ضعفها​

و آخر شيء أقوله Good Luck All​

و إن شاء الله أكون أفدتكم وكلنا نوصل للي نبيه بخيروسعادة​

دعواتكم ​

 

[بدويه برستيج]

مشكوره الصراحه موضوعج رائع ويضرب في الصميم والاغلبيه يعانون من ها المشكله ان شاء لله الكل يستفيد وما تقصرين يالغاليه ادعولي الله يثبتني وانزل من وزني

 

[دنيتى انا]

موضوع ممتع حييييل واعاد الثقة والتوازن لي شخصيا


الحياه حلوة ان شاء الله عمرنا بنعيشه بس نعيشه على صحة ورشاقه

 

[فيلسوفة تتفلسف]

كلامج 100%

يعطيج الف عافية ..

 

[ام حمد 85]

يسلموووووووو

 

[free SpiriT]

ثنننكس كل اللي ردوا و الله ينولكم اللي في بالك يا رب

 

[meee]

موضوعك مره حلو ومفيد كثير وان شاء الله يشجعهم ويحققون هدفهم

ويتركو السمنه لان السمنه مررررض ومافي احسن من الرشاقه

 

[سآق نملة]

اي والله صااااجة
يعطيج العافية يالغلا

 

[شربـــات لـــوز]

حلو الموضوووع
اب اب اب

 

[golnaz]

كلام في غاية الرووووووووووعة
و هاللكلام واااايد اثر فيني :

ليش باجر؟ ليش مو اليوم ؟؟؟ جسمج و رشاقتج و صحتج وقتها الحين مو وقتها باجر​

تحتاجين الرشاقة و الصحة والخفة الحين مو باجر​

عمرج لازم تعيشينه الحين مو باجر​

اليوم خاطرج تلبسين و تكشخين مو باجر ​

مو الشهر الياي و لا السنة الياية​

((الوقت الوحيد الذي بإمكانك التحكم به و تغييره هو الآن))​

صدقتي بكل كلمة قلتيها .. الله يقدرنا على تحقيق اهدافنا !!
يعطيج العافية مشكوووووورة حبيبتي ما قصرتي :*
موفقة..

 

[أحلى البشر]

موضوع روووعه ويستحق التثبيت

انا حطيته بالمفضله عشان اقراه كل ماضعفت ارادتي

مشكوووره ياقلبي كلامج حيل اثر فيني

 

[((shoOoshoOo))]

امبيه هالحجي بالذات هزني

((عمرج لازم تعيشينه الحين مو باجر




اليوم خاطرج تلبسين و تكشخين مو باجر





مو الشهر الياي و لا السنة الياية))


يعطيج العافيه ​

 

[داليلا]

خبصتي طول اليوم لأن عندكم مناسبة أو أو ... لأي سبب كان واصلي طول أيام الأسبوع صح ولا كأنج خربتي

هذه بالضبط مشكلتي
يعطيج الف عافيه بصراحه نصايح روووووووووووووووووعه

 

[فيروز خانوم]

خوش كلام

 

[Hello_kitty]

موضووووووووع رووووووووووعه

بدون مجامله من اروع ماقريت في هالقســــم

كلامج بالصميم

الله يوفقج ويرزقج الإراده والرشاقه وكل من يعاني من الوزن الزايد

 

[قيثارةالشوق]

مشكوووووووووووووووووووووووووووووووووووره حبيبتي راااااااااااااائع ماطرحتي

 

[مسك81]

مشكوووره حبيبتي موضوع جدا رائع الله يعطيج العافيه

 

[Pretty L@dy]

موووضوعج حللو

انا جذيه مرات اخربط باليوم بس اقلل سعرات العشااا

ومرااااات اجط يوم و فري ويريتني ما حطيته لان اكل فيه كل شي مشتهيته مطعم كاكاو برد بيبسي و ازيد باليوم كل اللي ضعفته
بالاسبوووع
و اسحبه اسبووع و بداااال لا اضعف يزيد وزني يعني لو مومسويه دايت احسن لي

 

[mumee]

گلامج 100/100
بس مشگلتي اذا خبصت شووي اتم طول اليوم اگل وانسئ الدايت

يعطيج العافيه

 

[اماراتيه 75]

كلام رووووووووعه والله وصحيح 100000000000%

انا باديه رجيم من 3 أشهور وياليتني كنت باديم من زمان :eh_s(22): شكل جسمي بالبس أختلف كليا وقلبي قبل دقاته سريعه والحين لا جدا مرتاحه والثقه صارت فوووووق والنفسيه أرتاحت

متعت الأكل وقتيه بس متعت الجسم و الصحه أدوم
جمله قريتها و حبيتها (( متعت الأكل لا تتجاوز الفكين بس متعة الجمال نرأها في عيون الأخرين))

قبل الحركه صعبه بس الحين لالالالا السمنه مرض الله يبعده عن جميع الناس يارب

تدرون بنات أنا شوه اللي خلاني أغير نظام حياتي أولا ما سميته رجيم لانه هذي الكلمه اتذكرنا بالحرمان من متعة الأكل سميته (( نظام صحي للحياه)) يعني ما أدخل في جسمي أي شب ايضره ابدا

وثاني شي كنت مره يالسه أطالع برنامج في قناة m tv وكان أسمه i used to be fat يعني كنت سمين والله ثم والله حلفت أنه اليوم ايكون اخر يوم في حياتي مع السمنه و في نفس الوقت أول يوم في طريق الصحه و الرشاقه وفعلا نويت وبفضل ربي كملت 3 شهور من غير تخريب في الاكل

ونقصت 15 كيلو بس بين على شكلي واااااااااااااايد:eh_s(9): والكل لاحظ
الاراده يا بنات منبعها المخ شهوة الاكل من المخ لازم انهذبه و نوجه صح الحين أشوف الاكل في كل مكان من حلويات و مغريات وأشوف الناس تأكل بس ما ايهمني لانه هدفي السعاده و الصحه و الجسم الحلو و خصوصا أني من عشاق الموضه واللبس

اذا حبيتوا راح أكمل و أقولكم نظام أكلي و طريقتي

والسموحه على الاطاله بس موضوع رائع من عضوه أروع
وكل اللي متردد يله أبدوا متعة الرشاقه أجمل بمليون مره من متعة الأكل الوقتيه ولو زادت المغريات نحن أشجع:rerrerek: