أقولك شي وماتزعل ""كاملـ ـ ـ ـه""

[ضوى العيون]

موزة:آه ليتنا صدق نرد صغاااار
هدى:آه اتذكر يوم نروح لغيط يدتيه ونتسبح بالفوز
هند:والحين خلاص كبرتن وماترومن صح؟؟
موزة:عاادي بنروح باجر وبنتسبح
هدى:والشباب؟؟
موزة:أي شباب؟؟
هدى:فهد ولامحمد اخوج
هند:انا استحي منهم ولاتنسن خليفة وخلفان
موزة:ييييه ماعليج منهم عااادي
هند:الله يعيني منج كله عادي عندج؟؟
هدى:اقول عن الحشرة خلنا نخلص قبل لايطلعون الشباب
"في الحوش"
قامت اليازي تسوي القهوة ليدتها اما فاطمة تمت عند روضة
فاطمة:رويييض
روضة:هلا
فاطمة:ابا اقولج شي بس اخافج تفهميني غلط
روضة:لاعادي قولي
فاطمة:بس ماباج تزعلين ولاتفهميني غلط
روضة:اوكيي شو؟؟
فاطمة:اممم احس ان شي بين يزوي ختج وفهد
روضة:أأأ؟
فاطمة:انا قلت لاتفهميني غلط
روضة:شو يعني"مع انها تعرف ان اليازي تمووت في فهد"
فاطمة:احس انهم يبون بعض
روضة:شو؟؟
فاطمة:يعني يحبون بعض
روضة:لا لا ماظني
فاطمة:وليش واثقة؟؟
روضة:لوهي تحبه جاان قالت لي بس ماقالت
فاطمة:وليش بتقولج؟؟
روضة:لأنها اختيه وماتجذب عليه وماتخلي شي ماتقوله اليه
فاطمة:بس اليوم شفتهم في الميلس
روضة:وشفتيهم سوو شي غلط؟؟
فاطمة:لابس احس انهم كانوا يتكلمون وانا اللي خربت عليهم
روضة:لا لا اكيد كانوا يتكلمون عادي مثل ما اكلم سيف
يعني بتشكين وبتقولين اني احبه؟؟
فاطمة:لابس
روضة:اقول خلينا نغير السالفة واتأكدي ان اليازي ماتحب فهد وماشي بينهم
فاطمة:انزين..بس لاتفهميني غلط
روضة:خلاااص
واسكتت فاطمة مع انها تحس ان بينهم شي وودها تعرف شو هو وبيي اليوم وبتعرف شو صاير
"في الميلس"
كانوا الشباب مستانسين ويلعبون "كيرم" اما خليفة مشغل التلفزيون وقعد خلفان عداله
خلفان:اقوول
خليفة:شو؟؟
خلفان:ملان وهذا فهد ماراح مزيرعة اييب بترول
خليفة:ماعليه باجر
خلفان:دخيلك ناد حمد خلنا نلعب سبيت
خليفة:انا مالي مزااج
خلفان:افا؟؟
خليفة:راسي يعورنيه بروح ادور بندول عند البنات
خلفان:تبى تروح المستشفى؟؟
خليفة:لا لا بس احس بصدااع خفيف
خلفان:اروح معاك؟؟
خليفة:لا
وطلع خليفة للبيت اما خلفان راح لحمد وقعد يسولف معاه
"نزجع للبنات"
بعد ماخلصن تمن يمشن شوي ع الشارع بس اللي خرب علهن"كانت سيارة مارة واول ماشاف البنات قحص ويل وسوى حركااات الشباب اللي اطفر بالبنات فقررن يرجعن للبيت احسن ولقن خليفة طالع من الميلس
خليفة:موزوة عندكن بندول؟؟
موزة:مادري ليش؟؟
خليفة:اباه راسي يعورنيه
موزة:اظني عند رويض
وراح خليفة لروضة اللي كانت قاعدة في الحوش وتسولف مع يدتها واتييهن اليازي بالقهوة
روضة:يزوي وانتي رايحة البيت اعطي خليفة بندول من شنطتيه
خليفة:لا مب لازم انا بسير
اليازي:لا انا برد اتوضا للصلاة
خليفة:اذن؟؟
اليازي:الحين بيذن
خلفية:خلاص يالله عشان اخبر الشباب
وراحوا للبيت
اليدة:عيل وين فاطمة؟؟
روضة:احيدها تكلم امها
اليدة:امج ماتصلت؟؟
روضة:كلمتنيه العصر
اليدة:والحين اشو؟؟
روضة:المغرب
اليدة:جذابه عدة مأذن
روضة:الحين بيذن
اليدة:ماعليه اباكن تسيرن لمطبخ الطباخ وتغسلنه تراه خااايس
روضة:والطباخ شو شغلته؟؟
اليدة:امحق شغله؟؟ مايعرف
روضة:ماعليه بنخلي الخدامة
اليدة:وانتي؟؟ بلاج متعايزة؟؟
روضة:انا بقعد فيا البنات
اليدة:لا البنات كلهن بينضفن فياج هاه واباكن تغسلن المواعين
روضة:يالله تعيييينا
موزة:اقووول هدى وهند قوومن بنروح البيت
هدى:ليش الجو حلو
موزة:بس مانظفنا حجرتيه
هدى:روحي انتي وهندووة ونظفن
هند:ياسلام وانتي ؟؟
هدى:انا الشيخة ماسوي شي
موزة:اقوول مغترة قومي جدامي احسن
هدى:ماريد
موزة:خلاص عيل دوريلج مكان تباتنين فيه الليله
هدى:يوووة خلاص روحن وبلحقكن
موزة:ماعليه بس والله ان مايتي ومابتباتين معانا
هدى:انزززززززيييييين
اليدة:والخييبة شبلاج؟؟
هدى:يدتييييييييه
اليدة:هاه
هدى:طالعي موزة تشغلني مثل الخدامة عندها
اليدة:يزاج يوم انتي يايه ليوا وتدرين ان محد بيشتغل غيركن
موزة:ههههه عاااااشت يدتيه عندج اياها
هدى:لاحووول خلاص بروووح
وقامن البنات وهن يضحكن على هدى وموقفها وراحن للبيت شوي واذن المغرب وراح خليفة للشباب عشان يروحون ويصلون المغرب في المسيد"

 

[ضوى العيون]

"في لندن"
كانت نوف ملانة وقاعدة في الشقة كالعادة عمتها راحت المستشفى مع اخوها وخلتها بروحها
راحت للمطبخ عشان تسوي لها ريوق..
حمدة ربت ويابت ولد وطبعا سمته منصور"مثل ماقلت لكم قبل"
حمدة قررت تسافر للندن مع اخوها منصور من بعد مايطلع جواز منصور"الصغيروني"
بتروح تتطمن على ريلها وبالمرة بيقضون اجازتهم..كانت بتسافر بروحها بس منصور اصر انه لازم يروح معاها لأنه مستحيل ريلها يخليها تسافر بروحها
اما منصور كان مستانس للسيرة واللي زادة فرحة ان ولد اخته مسماي عليه
وقفت نوف تتأمل المنظر الحلو من الدريشة "طبعا لابسة البجامة وفاجة شعرها"
"آه هدى وييينج؟؟ والله تولهت عليج بطريقة فضييعة
ليش انتي جيه حكمتي عليه قبل لا تعرفين اللي صار؟؟
بس اكيد قرت الرساله..آه لو عندي لاب توب جان اتصلت بس صبر هنيه في كوفي نت..يمكن تكون مب موجودة
ياربي ليش جيه حظي؟؟
هـــــــــدى
آه ياهدى..احبج والله احبج ماتخيل حياتي من دونج
انتي امي وابويه واختيه واخويه وربيعتيه وكل شي في حياتي
ليتج تعرفين بكير قدرج
من كثر حبي لج وغلاتج في قلبي ماقدر صدري يحمله
آه"ونزلت دمعة من عيونها وتعدت خدها"
دمعتـــــــــــــــــــــــــــــــي
دمعتي شاهدة عليه ان مالي ذنب في سالفت بطي من وين طلع اليه هذا؟؟
وع صوت الجرس انقطع حبل افكارها بس استغربت منو اللي بيدق الجرس عمتها واخوها عندهم مفتاح"غريبة"
راحت تشوف منو ع الباب"بـــــس ماصدق......"
حمدة:غريبة محد في الشقة؟؟
منصور:صبر يمكن حد فيها
ورجعت نوف لغرفتها عشان تلبس شيلتها
حمدة:الحين انته بتم اسبوع وبترد؟؟
منصور:هيه لأن عليه امتحانات ثنويه عامة ولا نسيتي؟؟
حمدة:لا مانسيت بس خربت عليك
منصور:لا عادي هاي فترة نقاهه من قبل الامتحانات
حمدة:ازين بس اخافك ماتخلص دراست الكتب كلهن
منصور:حمدة...حمدووووة عااادي انا عني دارسنهن من قبل
حمدة:الله يستر
منصور:مب واثقة؟؟
حمدة:لا ابد واثقة
وفتحت نوف الباب من بعد ماتحجبت
نوف وهي فاجة الباب:حمدة؟؟
حمدة:هلا نوف
واول ماشافت ولد اخوها منصور:منصووور؟؟
منصور العود:هلا
نوف:هههه لاقصدي منصور الصغيروني..خليني اشله
حمدة:دوج
وعقب دخلوا للشقة وهنيه استذهنت نوف انها بالبجامة اما منصور استحى وكان منزل عيونه ويحاول انه مايشوفها
في هاللحطة راحت نوف تبدل ثيابها
"في ليوا"
كانت موزة تخم حجرتها من بعد مارتبنها اما هند تغسل الحمام"حليييلها"وهدى قعدت ع الكرسي وطبعا ماسوت شي غير انها بدلت كيس الزباله"وايد عليها"
وشوي الا يسمعن زعيق اليدة في الصالة ويتراكضن صوبها
موزة:يدتيه شبلاج؟؟
اليدة:آه يا قلبيه بسم الله الرحمن الرحيم اعوذ بالله منك يا بليس
هدى:يدتيه شبلاج؟؟ ليش متروعة؟؟
اليدة:منو منكن خلت الباب طلق؟؟
هدى:طلق؟؟
موزة:يعني مفتوح..يدتيه أي باب؟؟
اليدة:كم باب عندكن ؟؟ باب البيت
موزة:مادري ليش؟
اليدة:عنبوة توها القطوة ظاهرة من حجرتيه زيغت بعقليه
موزة وهدى:هههههه
اليدة:ضحكتن بليا ضروس
موزة:انزين خلاص ماصار شي
اليدة:الحين تروحين وتيبين الخمامه تخمينها
موزة:بس نحن نظفنا حجرتج
اليدة:لا اكيد القطوة خيستها
موزة:بـــس
اليدة:يا تخمينها ولاتسيرين تفازعين ختج وتنظفين المطبخ
موزة:خلاص اخم احسن
"وراحت موزة تييب الخمامه اما هدى كانت بتروح بس"
اليدة:هدى وانتي سيري غسلي المواعين فياهن
هدى:بس يدتيه ظهريه يعورنيه من التنظيف
اليدة:يالله لاتتعذرين جداميه
هدى"شو جيه من ييت وانا انظف؟؟":ان شاء الله
"في الميلس"
خلفان:قوووووووووووووووووووووووووووووووووووووو ول
فهد:صمخ
خلفان:الله طالع عجيييييبة
خلفية:قل والله انته
فهد:لا لا قولك غمط
خلفان:لاوالله؟؟عيل هذا شووو؟؟
فهد:عد المباراة مرة ثانيه
خلفان:يعني ذليييت
فهد:لا بس انته ماتلعب عدل
خلفان وهو يفر الجهاز:خلاص مب لاعب
فهد:افا زعلت؟؟
خلفان وهو طالع من الميلس:زعلت
محمد:اركز ابعرة ع خشمك
ولف خلفان وهو صدق معصب بس ماعطاهم ويه وراح
طلع من الميلس وهو يشوف السما.. القمر طالع والجو بارد "خلني اروح للبنات واشوف شو يسون"
دخل من البوابة الرئيسية شاف الكشرة عند النخل وفيه اعشاب انزرعت بروحها ومخربه بمنظر النخل
"باجر ان شاء الله بنظف هنيه مادام مالي شغله"
وكمل طريقة للبيت بس شدة شكل هدى وهي تغسل المواعين برى من الفوز وشاف روضة واليازي وفاطمة يغسلن المطبخ العود ففكر يخوف هدى لأنها مب ماخذة بالها
قرب منها ومسكها من ارقبتها"يعني كأنه بيخنقها"
ضربته بالجدر الصغير ع راسه وهي مب قاصدة"تتحسبه حرامي"واول مالفت وكانت بتكمل الباقي عليه
خلفان:هاه صبر انا خلفان
موزة:خلفاااااانوة؟؟
خلفان:موزوة؟؟
موزة:بااااااايخ انته وحركااااتك
خلفان:سديتي انتي وحركاتج
موزة:جب انته البادي
خلفان:اتحسبج هدى
موزة:البس نظارات
خلفان:مفلس ولاجان اشتريت
موزة:خلاص بتصدق عليك
خلفان:هه هه هه ضحكتيني
موزة:حيواان

 

[ضوى العيون]

خلفان:ايييه احترمي نفسج تراج تعديتي حدودج
وكانت هدى طالعه من المطبخ والصحون في ايديها
هدى:موزوة خلصتي من غسل الجدر؟؟
موزة:والله ماشوف حدود جدامي
خلفان:يوم بعطيج كف ع ويهج بتشوفين عدل
موزة:جرب انته وشووووف
هدى:خلفان..موزوة شبلاكم؟؟
خلفان:والله روعتها اتحسبج انتي وقعدت تسب
موزة:انا اللي بديت ولا انته
خلفان:اقووول جب ولاتزعقين
موزة:والله كيفي بزعق وبصااارخ ع كيف كيفي والبيت بيتنا
خلفان:تخسين سويها وبتشووفين
هدى وهي تتدخل:موزوة قومي ادخلي ولاتتواجعون على شي مايسوى
موزة:لا؟؟ هذا شي مايسوى؟؟
هدى:موزوة خلاص عااد
لفت موزة لهدى وهي معصبة من الخاطر ودخلت للمطبخ
خلفان:وين يدتيه؟؟
هدى:أظني في البيت
خلفان:شو العشى اليوم؟؟
هدى:عيش شيلاني وصالونة دال"عدس"
خلفان:اممممم
هدى:شو؟؟
خلفان:ماشي بروح اسولف على يدتيه
هدى:اوكييي
وشوي طلعت هند من البيت ولقت خلفان استحت لأن هاي اول مرة تلاقيه صح انها كانت معاه في السيارة بس كانت متغشية والحين لا؟؟
هند:يوووة هدى والله استحي
هدى:ردينا ع طير ياللي؟؟
هند:شو اسوي
هدى:تعالي خلينا نروح لموزة توها متواجعة مع خلفان
هند:لا؟؟وليش؟؟
هدى:يقول روعها يتحسبها انا,......."وكملت لها السالفة"
خلصن البنات تنظيف المطبخ بس اللي باقي انهن يحطن المواعين في السدات
روضة:افف تعبت
فاطمة:انا عني بروح اتسبح
روضة:انا بروح ارتاح
اليازي:خلاص انا برتب المواعين
روضة:خلاص نحن بنروح البيت وانتي بعد ماتخلصين تعالي
اليازي:اوكييي
وراحن البنات للبيت
"في الجانب الاخر"
طلع فهد من الميلس لأنه يسولف مع مطر اللي من زمان ماكلمة "لأن مطر انشغل شوي عن فهد"
وبعد ماخلص حس بالعطش وراح للمطبخ دخل ولقى اليازي
فهد:اليازي؟؟
اليازي:هلا
فهد:الله زين نظفتن المطبخ؟؟
اليازي:من بعد ماهزبتنا يدتيه
فهد:ههههه هاي يدتيه لازم تحتشر عليكن
اليازي:بس باقي المواعين وبخلص
وراح للثلاجة وخذ له ماي وبعد ماشربه كان يطالع اليازي وهو محتار"اقوولها الحين ولا؟؟ يوووة"
اليازي"اممم اسأله ولا؟؟ يمكن يستحي يبتدي قبل..بس لا هو اليوم كان بيقولي شي وخربت علينا فطووم والحين انا لازم ابتدي والله ضاربني فضوول ابا اعرف شو يبى"
اليازي:فهد
فهد:هاه
اليازي:انته اليوم كنت بتقول شي بس ماقلته
فهد:هيه..امم
اليازي:شو؟؟
فهد:اليازي انا بقولج هالكلام بس احس انه بـــ ـ ـ ـ
وتدخل فاطمة المطبخ لأنها نست تلفونها ع الطاوله وتفاجأت بوجود فهد مع اليازي
فاطمة:أأأأ
"وتمت تطالع فهد واليازي وحسوا انها مستغربه من اللي يصير وهاي ثاني مرة تلاقيهم مع بعض"
فهد:لاتنسين عقب صلاة العشا تحطن العشى في الميلس
اليازي:اوكي
وطلع فهد وهو متضايق خلاص يبى يقول للبنت ويخلص لين متى بيتم ساكت؟؟
اما فاطمة اقتنعت هالمرة لأنه قال يحطن العشى في الميلس
"بس بعد احس ان شي بينهم"
"بعد صلاة العشى"
كانن البنات "كالعادة" قاعدات برى واليدة روضة مشغله الراديو "ع قناة كله فيها قصايد"وقاعدة برى ع راس احدبة جدام البيت
روضة:شو رايكن نقعد مع يدتيه؟؟
اليازي:بس الشباب الحين بيون من الصلاة مافينا محمد يختاض
هدى:يووووة وين مانروح شباب؟؟
هند:لازم يسوون لنا عالم للبنات فقط
موزة:تأثرتن بسبيس تون كوكب زمردة للفتات فقط؟؟
فاطمة:بس هذا من سابع المستحيلات
روضة:ياحظ يديته ...هندووووة
هند:شو؟؟
روضة:أخبااار نهيااان؟؟
هند:نهياااان أخوية؟؟
موزة:لا ولد اليرااان
هند:ههههه
روضة:صدق امج ماكلمتة؟؟
هند:يقول عدة بيطول في مصر شوي
روضة:ليش؟؟
هند:مادري
روضة:انتي كل ما اسألج ماتدرين؟؟عيل شو تعرفين؟؟
هند:اعرف اني هند وبس
هدى:وليش انتي ماتسألين امه عنه؟؟
روضة:لاوالله اقولها علوم نهياان؟؟حلوة هاااي
موزة:عادي والله لوخطيبي مسافر وابا اعرف اخبارة للأتصله بالمرة واسأله مباشرة
روضة:بنشوووف..احيدة بيسافر...
موزة حست ان روضة تقصد مبارك:يخسي الا هو اسأل عنه
البنات:منو هذا؟؟
موزة:وااحد الله يستر عليه..
روضة:اقولهن منو؟؟
موزة:بذبحج والله مابكلمج
روضة:بس مصيرهن يعرفن
موزة:بس كل شي في وقته حلو
هدى:حرااااااام والله ضاربني فضووول
موزة وهي تغير السالفة:بنادي الخدامة عشان تييب العشى برى..شو تبن ولا؟؟
اليازي:لا خليه داخل احسن
روضة:لا بس الجو برى احلى
اليازي:كيفكن

 

[ضوى العيون]

"برى"
كانوا الشباب توهم طالعين من المسيد ورايحين للميلس ولقوا يدتهم منسدحه ع التراب وتقصد مع الراديو
خلفان:الله الله على يدتيه
اليدة:بسم الله..
خلفان:حووة روعتج؟؟
اليدة:ياولديه ارمس قل شي هب تروع العرب
خلفان:ان شاااء الله هووووووود ياعرب
الشباب:هههههه
اليدة:هاه صليتوا العشى؟؟
محمد:هيه تونا طالعين من المسيد
اليدة:ياعياليه ابا واحد منكم باجر يصبحبيه المزرعة
فهد:وشو تبين بها.؟.؟
اليدة:واااايه حد مايبى حلاله؟؟
محمد:ان شاء الله بنوديج
فهد:لاخلاص انا اللي بوديج
محمد:خلاص فهووود بيوديج
اليدة:منو فهوود؟؟
محمد:هههه فهد
اليدة:قل فهد ولا لاتناديه بهذاك الاسم امحق هب زين
خلفان:ماعليج يدتيه ندلعه
اليدة:اخ الدلع للبنيه هب للريال
محمد:ها يدتيه بتروحين فيانا الميلس؟؟
اليدة:والرياييل؟؟
خليفة:محد الا نحن عيالج
اليدة:يعلني ماخلوا منكم انتوا كلكوا اعياليه مافرق بينكم
خلفان وهو يحب راسها:فديتج انا
محمد:عيل وين البنات عنج؟؟
اليدة:مادري وين دارهن اظني في الحووش
محمد:خلفان سر طالعهن
خلفان"تذكر انه متواجع مع موزة":واشمعنى انا؟؟
محمدخلاص خليفة سر انته
خليفة:ان شاء الله
وبعد ماراحوا للميلس راح خليفة يشوف البنات شو علومهن
خليفة:انتن هنيه؟؟
روضة:هيه ليش؟؟
خليفة:لابس محمد يسأل عنكن
هدى:هيه خليفة ابا تلفونك
فاطمة:وليش ماتاخذين تلفوني؟؟
موزة وهي تغايضها:لاتلفون خليفة غييير
هدىوهي معصبة:خلااااااااااااااص ماريدة
خليفة:افا ورفجة تشلينه
هدى:احم احم دقايق وبييبه
خليفة:بس هاه امانه ماتفجين الرسايل
هدى:لابس ابا اكلم عرب
موزة:ممكن اروح معاج؟؟
هدى:لا
"وراحت هدى"
اليازي:عيل يدتيه برى؟؟
خليفة:هيه مرينا عليها ودخلت فياهم الميلس
"واتي الخدامة شاله العشى برى"
خليفة:حووة ماتعشينا؟؟
روضة:يالمفجوووع
اليازي:هههه عشاكم في الميلس
خليفة:اها بس والله ايعاان من العصر ماكلت شي
فاطمة:خلاص رح كل الله الله في عمرك
خليفة:انزين ترى زايد يسلم عليج
فاطمة:متى كلمك؟؟
خليفة:قبل صلاة العشى
فاطمة:أها الله يسلمه
خليفة:ويمكن ايي هو ودانة
فاطمة:واميه تم بروحها؟؟
خليفة:يقول ان شموة بتروح ابوظبي عند اميه
فاطمة:هييه صح عليها امتحانات
روضة:اقووول خليفة رح اتعشى وخلنا نتعشى
خليفة:يالمفجوووووووعة
روضة:هههه وحدة بوحدة؟؟
خليفة:يالله اجلبي ويهج"منقووول"
روضة:ادري انها منقووله
خليفة:خلاص يالله مليت منج
روضة:صبر صبر شو رايكم اليوم نسهر برى؟؟
خليفة:والله انا ماعندي مانع
روضة:ولا لا مافينا ع محمد اكيد مابيطيع
خليفة:عادي بنسهر هنيه في الحوش
روضة:خلاص خير لين عقب
"وراح خليفة يتعشى والبنات من راح وهن يتعشن ونسن يخلن عشى لآنسة هدى"
هدى شلت التلفون واتصلت ع البيت
ام سيف:السلام عليكم
هدى:هلا والله وعليكم السلام اسفرت وانورت يا هلا
ام سيف:هدى؟؟
هدى:لبيه
ام سيف:لبيتي حايه ووويييينج؟؟
هدى:والله هنيه في ربوووع ليوااا
ام سيف:ليوا؟؟ شو اللي وداج؟؟
هدى:والله يدتيه احضرت ليوا والبنات كلهن سارن
ام سيف:عاد وحد فياكن
هدى:هيه اخويه فهد ومحمد وخلفان وخليفة
ام سيف:يا حليلكم عيل منو رقمة هذا؟؟
هدى:رقم خليفة..المهم علوومكم وعلوم عوييش؟؟
ام سيف:والله اعلومنا طيبة وعوشة احيدها في حجرتها تدرس
هدى:أها بس ماعليج امر اباج تنادينها برمسها
ام سيف:ماعليه سكري وبخليها تدق لج ع هالرقم
هدى:خلاص ارقبها
ام سيف:يالله في امان الله
هدى:الله يحفضج
"تمت هدى تتمشى ع بال ماتتصل عوشة تمت تلعب في التلفون ودخلت ع الرسايل بس وقفت"لا حراام هو قالي امانة"

 

[ضوى العيون]

ردت وسكرت الرسايل وفتحت الاستيديو وكان فيها صور شباب وسياايير شافت صورة خليفة منسدح ع الكرسي وكان تعبان وشكله يضحك"بس مب واايد تراه خليفة ومارضى عليه" تمت تتأمله"باين ان خلفان هو اللي مصورنه وهو مايدري"
موزة:باتأمل فييييك
هدى:بسم الله فقدتج يالخاااااااايسة
موزة وهند:هههههههه
هدى:آه ياقلبي والله بموووت
موزة:سوووري
هدى:شوووو سوري؟؟ انتي كنتي بتجتليني من الروع
موزة:هالكثر التفكير والتأمل في تلفون روميو ينسيج الدنيا؟؟
هدى:جب عااد كيفي
هند:شو السالفة ومنو روميو؟؟لايكوون خليفة؟؟
موزة:فهمتيها ما شاء الله عليج
هدى وهي تغمز لموزة:بس عاااد
"ورن التلفون"
هدى:هلا والله مليووون بعوووووش
عوشة:هلا والله
هدى:اهلين اخبااارج عووش والله تولهت عليج
عوشة:لا لا ماصدق هدى تتوله عليه؟؟
هدى:صدق والله ماجذب عليج
عوشة:علومكم يا اهل ليوا؟؟ احيدكم في المدينة
هدى:والله سبحان مغير الاحوال
عوشة:هيه صح تسلم عليج نوف
هدى بلهفة:صدق متى اتصلت؟؟
عوشة:تعالي ليش ماقلتيلي ان اخوها مريض وراح يتعالج؟؟
هدى:مادري بس كنا متواجعات وماكان فيه وقت بس تعالي متى كلمج؟؟
عوشة:يوم كانت مسافرة وقالت لي اسلم عليج
هدى:آه الله يسلمها
عوشة:بلاج؟؟
هدى وهي خلاص بتصيح:دوج موزوة بتكلمج..
"وتفر التلفون على موزة وتركض للبيت"
موزة:الو عووش بلاها؟؟
عوشة:مادري اكيد متولهه
موزة:صدق؟؟
عوشة:ههههه والله
وكملت موزة سوالفها مع عوشة وهي مستغربه تصرف هدى
"اما هدى حست بالضيق ماقدرت تستحمل"
"نووف آه يا نوف اتصلت عليه وهي هناااك فديتهااااا
ليش انا جيييه ليش زعلت عليها وقاطعتها مرة وحدة انزين اسأل منو هذا وشو سالفته؟؟
نـــــووووف
آه..فقدت الدنيا فقدت الشيطان اللي لعب في راسيه
كله من شكي وظنوني فيها
والحين شو؟؟
متى بشوفها..متى بنتلاقا؟؟
آه الله يسامحني على اللي سويته فيها
"
"في لندن"
بعد مابدلت نوف ثيابها والبست تنورة سماويه وقميص اصفر وكان مطرز وبشكل رائع والبست شيله سودا مطرزة بالسماوي وكان مناسب واايد ع لون لبسها
تجحلت وحطت قلوس خفيف وطلعت لهم
حمدة:شحالج نوف؟؟
نوف وهي تقعد عدال حمدة:بخير وانتوا؟؟
حمدة:بخير الا عمتج وين؟؟
نوف:عند اخويه في المستشفى
منصور:وانتي بروحج؟؟
نوف:هيه بس انا تعوت في هالوقت اقوم واروح لهم في المستشفى
حمدة:ياربي والله متولهه عليكم
نوف:فديت منصووور عطيني بشله
"فز قلب منصور "ع باله تتفداااه"
نوف وهي شاله منصور:بس كيف عرفتوا انا ساكنين في هالشقة؟؟
حمدة:انا من قبل سألت عن مكان الشقة
نوف:عيل انا بروح المستشفى وبرجع لكم
حمدة:ليش اقعدي
نوف:اخافهم يخافون عليه..هم يدرون انكم بتيون؟؟
حمدة:يعرفون بس مب اليوم
نوف:خلاص انا بطلع وبعد نص ساعة برجع
حمدة:منصور رح مع نوف
منصور ونوف في نفس اللحظة:لا...
حمدة:بسم الله
نوف+منصور:ههههه
حمدة:انته رح معاها عشان تدل مكان المستشفى وبس
منصور:خلاص يالله
ومن بعد ما اطلعوا استحت نوف بس خلت كل شي عادي
"في ابوظبي"
كان ابو سيف داخل البيت ولقى عوشة وسيف في الصالة يسولفون
ابو سيف:السلام عليكم
الكل:وعليكم السلام:وقاموا يسلمون عليه"
ابو سيف:شحالج عوووش؟؟
عوشة:طيبة..
سيف:ابوية الاسبوع الياي بروح الفجيرة عندي شغل
عوشة:الفجيرة مرة حدة؟؟
سيف:شغل مهم وبرد
ابو سيف:كم يوم يتقعد هناك؟؟
سيف:حوالي اسبوع تقريبا وبرد
عوشة:الله بسير فياك
ابو سيف:انتي خلصتي امتحاناتج؟؟
عوشة:لا عدني
ابو سيف:خلاص وعد يوم بتخلصين بوديج
عوشة:صدق؟؟ بس خلاص ماريد الفجيرة ابا..امممم دبي
ابو سيف:اللي تبينة
سيف:انته اليوم رحت ل"فلان بن فلان"؟؟
ابو سيف:هيه سرت عندهم الغدى اليوم
سيف:البارحة اتصلي وقال ان اليوم الغدى عندهم وقلت اني في الدوام ومابخلص الا الساعة 3 الظهر
ابو سيف:اقوول وين امج؟؟
عوشة:اميه في بيت عميه
ابو سيف:حد هناك؟؟
عوشة:عندهم حرمة ماعرفها
ابو سيف:عوشة
عوشة:لبيه
ابو سيف:يا بنتيه انتي الحين حرمة وبتخلصين دراستج
عوشة وهي تقاطعة:هيه خلصت وبكمل في الجامعة ان شاء الله وباخذ الشهادة
ابو سيف:ولازم هذا كله؟؟ الحرمة الحين من تخلص تعرس وتقعد في بيت ريلها شو فايد الشهادة؟؟
عوشة:ابويه انا قلت لك ماريد اعرس الحين والله اريد اكمل دراستيه
سيف:ابوية في حد خطبها؟؟
ابو سيف:عوشة يابنتيه محمد ولد عمج من زمان وهو يباج انتي مادريتي من يوم درى ان واحد خطبج ين الريال
سيف:الله ين مرة حدة؟؟من قدج ياعووووووش
عوشة:بسس
ابو سيف:يا عوشة الحرمة مصيرها لبيت ريلها وانتي الحين هب صغيرة ماتفهمين الرمسه ولد عمج وشارنج يباج
عوشة:انزين اذا خذته بكمل دراستيه انزين عندهم جامعة هناك؟؟عندهم تقنيه؟؟ ماعدهم غير المدارس
سيف:ماعليه ينتقل ابوظبي
ابو سيف:بكيفة اهو؟؟
عوشة:انا ماريد اعرس
ابو سيف:يابنتيه انتي وافقي ويحلها الف حلال عقب
عوشة:لا ماريد انتوا كلموة وقولوله جانك تباها ارقبها لين ماتخلص
سيف:يا سلام يرقبج 4 ولا5 سنين؟؟
ابو سيف:يا عوشة انتي صااحية؟؟ اقولج الريال الحين بيتخرج وبيشغلونة ويبى يكمل نص دينة واذا انتي ماتبينه الحين خلاص بيلقى الف بنيه غيرج
عوشة:بس
ابو سيف:شوفي هو مكلمني من قبل وام سعيد مكلمتنيه من يوم درى انج انخطبتي وقالت انه يباج والحين اباج تفكرين وتردين عليه انا برقبج
عوشة:انزين ماعرف يكلمك الا قبل امتحاناتي؟؟ يرقب لين ماخلص
سيف:يقولج الريال شارنج ويباج
ابو سيف:المهم تصبحون على خير وانتي اتصلي لأمج خليها تضوي البيت
عوشة:ان شاء الله

 

[ضوى العيون]

"وبعد ماطلع ابو سيف"
عوشة:سيف ردوا عليك اللي خطبت عندهم؟؟
سيف وهو مرتبك:أأ؟؟
عوشة:شو؟؟ردوا؟؟
سيف:والله البنيه تبى تكمل دراستها باقي لها سنتين
عوشة:شو يعني؟؟
سيف وهو شبه حزين:ارفضت
عوشة:افا ماعاش اللي ترفضك ولايهمك بتلاقي لك وحدة غيرها..
سيف:ان شاء الله ..الحين بروح ارقد
عوشة:سواااااف لا تزعل
سيف:صدق ان البنات بطرانات..مع اني مارفضت انها تكمل دراستها عقب مانعرس بالاصل هي ماتبانيه
عوشة:وانته شو دراك؟؟
سيف:مادام انتي وافقت انها تكمل دراستها انزين ليش ترفض؟؟
عوشة:امممم مادري
سيف:انتن يا البنات ماتراعن شعور غيركن
عوشة:لا شو دراك حتى انتوا يا الشباب ماتراعون شعور البنيه
سيف:الريال غير عن البنت البنيه تبى كل شي لعمرها تقول ابا ريال طويل ومزيون وماعرف شو..وفي النهايه تاخذ واحد ومايكون من نفس المواصفات اللي تباه
عوشة:انزين شو نسوي؟؟هاي الحياة
سيف:عيل هدى راحت المدينة؟؟
عوشة:ولا راحت ليوا بعد
سيف:وفهد راح معاهم؟؟
عوشة:هيه هو اللي مودنهم
سيف:اكيد مستانسة؟؟
عوشة:هيه وصيحتها اليوم
سيف:ليش؟؟
عوشة:الظاهر انها تولهت علينا
سيف:وحد يتوله ع هالاشكال؟؟
عوشة وهي تفرة بالمخدة:شو قصدك انته؟؟
سيف:سلامتج
"في ليوا"
ع الساعة 11 ونص
روضة:شو ارقدت يدتيه؟؟
هدى:الظاهر جذية
روضة:عيل روحي خبري البنات وانا بروح المطبخ اييب غرشة ماي
هدى:اوكي والشباب؟؟
روضة:برايهم مسؤولين عنهم نحن؟؟
هدى:خلاص دقايق وبنطلع
"راحت هدى تنادي البنات عشان يطلعن يتمشن ع الشارع اما روضة مثل ماتعرفون راحت تييب الماي يمكن يعطشن
"في الميلس"
محمد وخلفان كانوا يلعبون بالسوني"ماعندهم شغله" اما خليفة كان منسدح ع الكرسي وبيرقد
رن تلفون فهد وشاف انه مطر
فهد:مرحبا
مطر:هلا والله
فهد:هاه غيربه الا قبل ساعة داق عليك
مطر:اقول عندكم مكان ارقد فيه؟؟
فهد:شو؟
مطر:شو بعد الحين انا واصل ليوا
فهد:انته هنيه؟؟
مطر:هيه
فهد:يا مرحبا والله انا ماعندي مانع لو مايشلك المكان عيوني تشلك
مطر:ههههههه تسلم الا وين محضركم؟؟
فهد:*.....
مطر:هيه عدال محضر*....
فهد:هيه هو
مطر:كم رقم بيتكم؟؟
فهد:...
مطر:خلاص انا هنيه عدالكم دقايق وبوصل
فهد:ترى الا كم بيت حاضرين مب الشعبية كلها
مطر:هيه خلاص انا دليت محضركم
فهد:خلاص نرقبك
"عند البنات"
بعد ماتطمنن ان اليدة ارقدت طلعن يتمشن وهن واثقات ان محد بيي لأن الا كم بيت في هالشعبية ومحد بيطلع "وثقااات"
الجو كان بارد وروعة الشارع هادي ومافيه حد ع اليمين النقيان وع اليسار البيوت والقمر طالع
روضة:عيل وين فطوم؟؟
موزة:قلنا لها انا بنسبقها وبتي
اليازي:هي شو تسوي؟؟
هدى:تتسبح
هند:حد ياب الماي؟؟
روضة:هيه يبته
اليازي:شو رايكن نقعد على هاذاك النقى؟؟
روضة:نحن يايات نمشي ولا نقعد؟؟
هدى:الله ليت شي سيكل
موزة:كااان عندنا
هدى:كاااان وكان فهل ماضي مرفوع بالضمة
اليازي:اسمعوا امحق اعراب
موزة:ليت معلمة العربي تسمعج
هدى:ههههه عادي
هند:بنات جني اسمع صوت سيارة؟؟
هدى:هيه صح
روضة:تعالن على يمين الطريق وماعليكن منها
اليازي:منو اللي بيي نص الليل؟؟
روضة:اخافهم شباب وماعندهم شغله
اليازي:يمكن..
واتي السيارة واول ماشاف البنات بند الليتات ومشى عدالهن وهو مار كانت فاطمة توها طالعه من البيت واول ما انتبهت من السيارة ماكان فيه مجال انها ترجع كملت طريقها لين البنات
وقفت السيارة عند الميلس
روضة:الحقن منو هذا؟؟
فاطمة:جني سفت هالريال من قبل
هدى:منو؟؟
فاطمة وهي تدقق فيه:هيييه هدى تذكرين مطر ربيع فهد؟؟
هدى:شو اللي بييبه ليوا؟؟
هند:يمكن فهد عازمنه
روضة:بس تعالي شو عرفج به؟؟شو؟؟"وتغمز لها"
فاطمة:انا قبل قد شفته
روضة:المهم وين تبن تروحن؟؟
وشوي الا يسمعن صوت دراجة وان فيها ريالين وماعرفن غير انهن يدخلن في السكة لأن فيه باب للبيت من ورى
وكانت الدراجة تمر من عدالهن وتسوي حركاات شباب واول مادخلن السكة
هدى:افففف منهم خربوا علينا
موزة:انتي امشي وخلينا ندخل البيت قبل لايسون لنا مشكله
اليازي:بناااات طاح تلفون فطوم عند الليت
فاطمة:شو اللي عقة؟؟
اليازي:رويض انتي حطته في ثبانيه وانا قمت وطاح
روضة:انتي خبله الحين شو اللي بيردنا.؟
موزة:عادي انا بروح اييبه
روضة:لا لا مابخليج بروحج والرياااييل اللي في الدراجة؟؟
موزة:ماعليه منهم بشل حصااة عودة واذا قربوا بفلعهم بها
هدى:مقوى قلبج انا بموووت
روضة:صبر بروح معاج وبنييبه بسرعة
وقفن البنات في السكة ويراقبن اما موزة وروضة راحن اييبن التلفون"هذا وقته يطيح؟؟"

 

[ضوى العيون]

"عند الشباب"
كان مطر نازل من السيارة وهو يشوف فاطمة وهي رايحة للبنات وقال اكيد هاي خت فهد ولا محمد "بس ماجن مشيتها مب غريبة عليه؟؟ اكيد هاي فاطمة خت خلفان لأن هالطول وهالعرض مب غريب عليه هيه اكيد هيه بس شو اللي بييبها ليوا؟؟"
وبعد مادخل عليهم وسلم انصدم بخلفان وخليفة وقال اكيد انها يايه معاهم المهم كملوا سهرتهم"
"عند البنات"
وصلت موزة وروضة لمكان لليت ولقن التلفون وشلنه بسرعة بس الدراجة مرت عدالهن بسرعة وكانت بتدعم موزة
موزة:الله يغربلك يا الحيووووواااااان قليل ادب:وكانت بتفر الحصاة اللي في يدها"
روضة وهي تمسك يدها:اقول اسكتي مافينا له يالله جدامي
موزة وهي تمشي:يخسي الا هو الحيوااااان
ووصلن للسكة والحمد لله
الموقف الثاني
مشت هدى اولهن وكانت بتوصل للباب بس طلع لها هندي من السكة الثانيه وطار عقلها
هدى:آآآآآآآآ
البنات:بسم الله
وقفن يطالعن الهندي
موزة:ماعليكن منه بعد هذا خليه يقرب والله لراويه
اليازي:دخلج روييض سكتيها بتفش غيضها فيه
ومشن البنات لين البيت اما هندي تروع تم مكانه واقف لين مادخلن وكمل طريقة
"عند الشباب"
فهد:خلفان رح للبنات وخلهن يسون شاهي احمر
خلفان وهو يلعب:خل خليفة
محمد:خليفة راقد
خلفان:يوووة ان شاء الله
وطلع خلفان للبيت وسمع صوت ضحك وسوالف ورى البيت وتروع"منو؟؟ يمكن حرامي بس لا يمكن البنات؟؟ ههههه خلني بروعهن..شو اسوي؟؟"
وتم يتلفت يمين ويسار ماعرف غير انه يوقف عجال الساس واول ما اين يطلع لها ويروعهن
موزة:والله انهم حيوانات عيل شباب يسوون جيه؟؟
هدى:انتي ماعليج منهم
اليازي:الحمدالله ان اليوم ماصار شي
روضة:الله يستر
كانت موزة تمشي جدامهن وتوها طالعه ان خلفان يروعها
خلفان:حرااااامي
كان قرييب وايد من موزة ودفرته بقوة وطاح
البنات:ههههههه
خلفان:والعثرة مقواااج
موزة:خلفااان؟؟
هدى:اسميج قويه ما شاء الله
روضة:الله يستر جان ماتفش غيضها في خلفان
موزة:انته بلاك الا تروع الواحد؟؟ ماعندك شغله غير هاي الشغله؟؟
خلفان وهو قايم وماعطى موزة ويه:روضة ولا فطوم ولا أي وحدة منكن تسوي شاهي احمر
روضة:انا مافيه
فاطمة:خلاص انا بسوي
تمت موزة واقفه مكانها وباين انها مختاضة من خلفان وانه ماعطاها ويه
خلفان:خلاص يوم بتخلصين هاتيه المطبخ العود وانا بطلع لج
"لأنه عدال الميلس"
فاطمة:اوكي
"وراح..راحت فاطمة تسوي شاهي اما روضة قعدت ع دري الباب واليازي عدالها اما هند واقفه مع هدى وموزة"
"موزة:حقيييير حيوااااااااااااان افففففففف منه والله انته صدق حقيييير "
هد:موزوة شبلاج؟؟
موزة:ماشفتي الحيوان؟؟
هدى:يا موزوة هاذي حركات خلفان
موزة:بس غلسة
هند:موزوة انتي شعليج منه خليه يولي
موزة:انزين انا بروح ارقد
هدى:ليش؟؟ خلينا نسولف؟؟
موزة:مالي نفس
وتروح موزة وهي معصبة اما هدى وهند راحن للبيت وقعدن يشوفن التلفزيون
"عند الدري"
روضة:يزوي..شو قالج فهد اليوم؟؟
اليازي وهي مرتبكه:شو؟؟ فهد؟؟
روضة:يزوي ترا قعدتكم مع بعض مب زينه وفطوم بدت تشك
اليازي:وتشك انا شعليه منها ماسويت شي غلط
روضة:انزين شو قال لج؟؟
اليازي:ماشي هو كل مابيقولي ان فاطمة داخله علينا
روضة:انزين لازم يكلمج هو اذا يباج يخطبج ونخلص لازم يلف ويدور؟؟
اليازي:بس انا ماعرف شو يريد
روضة:انتي لا تعطينه ويه
اليازي:ماقدر
روضة:شو ماتقدرين؟؟شوفي نحن باجر بنروح المزرعة واكيد هو اللي بيودينا ف لا تعطينه ويه سولفي ع كيفج وبعدين هو بيعرف انج ماتهتمين له
اليازي:بس انا مهتمه له و..
روضة:خبلا والله لو انا عنج مابعطيه ويه وهو بيتعلق فيج اكثر
اليازي:بس رويييض اصلا لو هو يباني جان رمس من زماااان مثل محمد ماتشوفينه كيف متعلق في عووووش؟؟
روضة:عاااد حموووود غير يعطي في الويه ويقول اللي في خاطرة لكن ولد عمج شخص ثاااااني
اليازي:يعني ما اعطيه ويه؟؟
روضة:ولاتعطينه مجال يكلمج وقوليله لو يباج يروح لأخوج ويكلمه
اليازي:لا شو هالكلام يمكن عنده موضوع ثاني وانا اكلمه عني؟؟
وتوها روضة بتتكلم الا فاطمة طالعه
فاطمة:تلفوني وين؟؟
روضة:هاذوة
فاطمة:بتصل على تلفون خليفة
اليازي:تلفونة ع التعبة وهنيه في الصاله
فاطمة:خلاص بروح اوديه
وراحت فاطمة للميلس
اليازي:تصدقين روويض بديت اغاار من فطووم احسها دوم مجابله فهد ودومها تكلمه عااادي جنه اخوها
روضة:من الحين بديتي تغارين؟؟
اليازي:والله قلبي يطاوعني اني لازم اعرف شو يبى
روضة:كيفج عقلج براسج وتعرفين خلاصج
اليازي:آآآآآآه
"مطعووون قلبي في الهوى كله جرااح
ودواه عندك عالجة لا تزيدة
طعانات ماهي من سكاكين ورماح
من سيف حبك من مسافة بعيدة"
"في الميلس"
كان مطر عطشان فراح للمطبخ"لأن له باب داخلي "
ووقف جدام الثلاجة في نفس هاللحظة دخلت فاطمة"سبحان الله"وقفت فاطمة ولاحظت وقفته انه فهد بس ترددت شوي
"هذا فهد؟؟ لو يكون مطر؟؟ لا شو بييبه المطبخ؟؟"
فاطمة:فهد؟؟
"مطر وهو مستغرب ولف لها"
فاطمة"مطر؟؟؟؟؟؟!!!1 فشله"تغشت على
طوول:آسفة مادريت انك هنيه
مطر:لا عادي
وحطت الصنيه ع الطاوله:هذا الحاهي
وطلعت من المطبخ وهي خلاص ذااايبه "ما شاء الله عليه مزيوووون بس لو يدري خلفان اني لقيته؟؟ والله ليجلب الدنيا"
دخل مطر وهو شال الصنيه
خلفان مستغرب:من وين يبتها؟؟
مطر:لقيتها ع الطاوله
خلفان"اكيد فطوم يابتها":اها زين عيل

 

[ضوى العيون]

"اليوم الثاني"
دخلت اليدة ع البنات ولقتهن راقدات اللي ع الشبرية
روضة وفاطمة اما تحت هند وهدى وموزة متجاتلات ع اللحاف
واليازي راقدة ع الكرسي اللي في الحجرة
اليدة:يالله يابناتيه قووومن صلاة الفجر يالله
"لاحياة"
اليدة:وااااايه صلات ربكن ماتبنها يالله قووومن
اليازي:انزين يدتيه بنقووووم
اليدة:بسم الله وينج انتي؟؟
اليازي:ع الكرسي
اليدة:شله ماييتن ترقدن عنديه؟؟
اليازي:مادري شفناج رقدتي وقلنا مابنوعيج
اليدة:انزين قومي صلي ووعي خاواتج انا بسير للعيال بوعيهم
اليازي وهي قايمة:ان شاء الله
وراحت اليدة روضة توعي الشباب"ماكانت تدري ان مطر فياهم
دخلت الميلس بس محد فيه وراحت لحجرة ناصر لقت خلفان وخليفة ارقوود ووعتهم وراحت لحجرة محمد واللي ع الشبريه محمد ومطر اما فهد ع الارض واللي كان قريب عليها مطر وكانت تتحسبه محمد
اليدة:محمد يالله قم للصلاة يالله.. ياعياليه بتفوتكم صلاة الصبح
وتهزة من جتفه..نقز مطر من الروع
مطر:بسم الله منو انتي"لاتنسون ان كانت الحجرة مطلمة شوي
اليدة:انا يدتك يالله قم
مطر يتحراه يحلم:يدتيه؟؟احيدها متوفيه متى حيت؟؟
اليدة:انا مت؟؟ حموووود اكيد دهمان يالله قم
ويقوم فهد:هاه يدتيه
اليدة:بسم الله انتي هب محمد وفهد بس؟؟منو الثالث؟؟
فهد:يدتيه هذا مطر
اليدة:منو ولدة؟؟ ومتى يا؟
مطر وهو قايم:انا مطر سعيد
اليدة:هيه يامرحبا بك سامني ياولديه انا عيووز والنظر الحين بدى يخترب ..يالله صلاة الصبح بتفوتكم
فهد:ان شاء الله الحين بنقوم
قاموا الشباب وراحوا يصلون في المسيد..
عند البنات"
هدى الوحيدة للحين ماصلت"الكل نساها الا موزة"
موزة:هدى قومي الصلاة
هدى:zzzzzz
موزة:هــــــداااااااااااااااااااااااا
هدى:شوووووووووووو
موزة:قومي الصلاة
فاطمة وهي معصبة:موزوة عن الزعيق خلينا نرقد
روضة وهي قايمة:انتن حد يرقد عندكن؟؟ اروح ارقد في حجرة يدتيه احسن اففف
موزة:يعني انا الغلطانة الحين؟؟
اليازي:اشششششششششش
موزة:هداااااا
اليدة وهي عند الباب:شعندج؟؟
موزة:يدتيه هدى ماطاعت تقووم
اليدة:هاتيلي العصا بضربها بها
هدى:يووووة خلاص قايمة قايمة حشى
وقامت هدى وهي متعايزة وراحت للحمام اما موزة ردت ترقد
اليدة:موزة وين خاواتج؟؟"لأن الحجرة مضلمة شوي"
موزة:ارقدن
اليدة:شو ارقادة عقب الصلاة؟؟ يالله قومن سون القهوة والمحلى"الخبز"
موزة:انا ماعرف
اليدة:يالله قوميهن وانتي فياهن يالله
موزة:بس يدتيه
اليدة وهي توعيهن:فاطمة يالله يابنتيه منو اللي بيسوي الريووق..اليازي..روضة..قومن
اليازي:يدتيه خلي الخدامة تسوي لج
اليدة:اخ انا ماداني خدمة الخدامة
فاطمة:يدتيه انا تعباانة
اليدة:قومي وسوي القهوة وشمي ريحتها وبيخوز عنج التعب
ومن درن البنات ان مالهن مفر غير انهن يقومن ويسون اللي تباه يدتهن قامن بكرامتهن قبل لاتهزبهن
البنات:ان شااء الله
قامت فاطمة تسوي القهوة والجاهي اما اليازي تحط المحلى اللي يابه الطباخ وتحط الاكواب والصينيه ووو...
اما موزة قعدت تهمز ريول يدتها
واللي سلمن من الشغله هدى عقب ماصلت ارقدت..روضة راحت لحجرة يدتها وارقدت
اما هند نست اليدة انها موجودة "لأنها ارقدت تحت على الجنب الثاني من الشبريه وهي ماتبان وايد"
"في ابوظبي"
كان سيف توة واعي لصلاة الصبح من بعد مافاتته فصلى في البيت وكان بيطلع يتمشى في الحوش وهو شبعان رقاد
كان يفكر في الحياة يفكر في كل الناس ماخلى حد مافكر فيه
"عوووش والحين هي تدرس وبتخلص وان شاء الله بتعرس وبتروح عنا..آه شو البيت من عقبها؟؟
هدى عدها صغيرة وما احتكيت معاها وايد..
دانة ههه فديتها هي وشواقي صح انها اصغر مني وعشت معاها اكثر بس هي بعد لها حياتها ومابتفضى اليه
منو اللي بيبقى؟؟
آه بس اللي قاهرني البنيه ليش ارفضتني؟؟
انا فيه عيب؟؟
شكلي؟؟
عمري ؟؟
حياتي؟؟
شووووووووووووووو؟؟؟
ليش افكر فيها باجر الله يعوضني باللي احسن عنها
فهد..
واليازي؟؟
متى بيتكلم وبيقول انه يباها؟؟
صبر يمكن اكون انا السبب
بيقول اخوي اكبر عني وللحين ماعرس انا اعرس قبله؟؟
صح ليش لا يمكن يكون تفكيرة جذيه
الصراااااحة
مليت من الفكير ومثل ما قلت ان شاء الله بيعوضني باللي احسن منها "
ورجع البيت لقى الخدامة حاطة الريوق في الصالة وكانت الساعة حوالي 5 ونص يعني باقي له نص ساعة ويروح الدوام
"الله يعيني والله تعبت من هالدواام بس لو يعطوني اجازة؟؟"
"في ليوااااا"
ع الساعة 7 الصبح..كان خلفان داخل البيت واول ماشاف منظر البنات ماااات من الضحك
اليدة قاعدة في وسطهن..موزة مجابلتنها وفاطمة قاعدة عدال الصنيه عند دله القهوة"لأن يدتها كل شوي تقولها صبيلي قهوة"اما اليازي مسينده راسها ع الساس ومغمضة عيونها
ويدتيه تسووولف عليهن ولو تسألهن عن شي مابيعرفن لأنهن تعبانات ويريدن يرقدن
خلفان:ههههههههههه ط ويوهكن
اليدة:يامرحبا هاه وينكوا انتوا؟؟
خلفان:هنيه ليش؟؟
اليدة:وين سرتوا عقب مايتوا من الصلاة؟؟
خلفان:مارحنا مكان ردينا ورقدنا
اليدة:اخ عليكوا الرياييل عقب ماردون من الصلاة ايون ويتقهون ويسولفون شو رقادة هذا عقب صلاة الصبح؟؟
خلفان:آها..عشان جيه اشوف ويووهن مغورات وتعبانات ثرهن مارقدن؟؟
فاطمة:خلفان دخيلك سولف عليها اريد ارقد تعبت

 

[ضوى العيون]

وقامت فاطمة للحجرة
قعد خلفان مكان فاطمة وهو يسولف على يدته ويضحكها اما اليازي وموزة مكانهن
لف خلفان لموزة ولقاها مربعه ريولها ومسيندة راسها على يديها كأنها تشوف التلفزيون بس مغمضة عيونها وهي مب حاسة بالدنيا
تم خلفان يضحك بس بصوت واطي
رن تلفون اليدة وقعدت تسولف معاها"خطر في بال خلفان فكرة وهاي اخطر فكرة"
مسك الكيلنكس ودار بها لين ماغدت مثل العود وتم يدخلها في خشم موزة بس بطريقة تنرفز الواحد
كشت موزة ويهها وحجت خشمها وفجت عيونها
خلفان:خخخخخخخخخخخخخخخخخخخخخخخخخخ
موزة وهي تفج عيونها بصعوبة:شو استوى؟؟
خلفان:هههههه لا ردي ارقدي ما استوى شي
واول ما انتبهت انه خلفان درت انه مسوي شي وقامت
موزة:اففف منك ماتخلي الواحد في حاله
خلفان:افا ردي كملي ارقادج
موزة:اكمله في الحجرة احسن"ودخلت للحجرة"
رجع خلفان للميلس ولقى الكل راقد فشغل التلفزيون عشان يشغل نفسه..
"في ابوظبي و ع الساعة 8 ونص
قامت عوشة من رقاادها بسرعة لأنها كانت متواعدة مع معلمة الانجليزي اليوم ع الساعة 8 بالضبط والظاهر انها ارقدت
"يوووووة اكيد الحين هي ترقب في بيتها يالله بنزل اشوف الدريول يروح لها وبرد اتلبس"
لبست عوشة شيلتها واتصلت على الدريول وعقب خلت الخدامة تسوي لها عصير برتقال فرش"طازج" وراحت تتلبس
"في ليواااا"
ع الساعة 9 بالضبط
اليدة محتشرة"كالعادة"قاعدة عند باب الحجرة وتنادي البنات عشان يقومن من الرقاد لأنها تبى تسير المزرعة
قامت روضة وطلعت للصالة
روضة:يدتيه شبلاج؟؟
اليدة:روييض وعي خاواتج ويالله بنسير المزرعة
روضة وهي تتمتح:منو معاه؟؟
اليدة:مع اخوج ولا فهد
روضة:ان شاء الله
اليدة:يالله تراكن كلكن بتسيرن انا مابخليكن في البيت بروحكن
روضة:انزييين خلاص
وطلعت اليدة للميلس عشان"تكمل حشرتها عند الشباب"
دخلت الميلس ولقت خلفان راقد"الظاهر انه تعب ورد يرقد"
دخلت لحجرة محمد ومالقت الا فهد ومطر"عيل وين محمد؟؟"
وعت فهد وطلعت للبيت"
طلع محمد من حجرة ناصر ولقى فهد يلبس سفرته
محمد:وين؟؟
فهد:هلا..وينك انته؟؟
محمد:خلاني مطر ارقد؟؟ يشاخر طول الليل
فهد:ومارقدت؟؟
محمد:لاهذا عقب ماردينا من الصلاة وكملت رقادي في حجرة ناصر
فهد:بتسير المزرعة؟؟
محمد:لا مافيه
فهد:خلاص لي قمتوا خل الخدامة تحط لكم الريوق ولاتروحون لمكان
محمد:وين بنروح يعني؟؟ بنطير؟؟
فهد:هههه لا بتحلوون
محمد:هه هه هه"ويضربه ع راسه"
فهد:يالله سي يووو
محمد:الله ع الثقافة يالله قبل لاتحتشر يدتيه تراني اعرفها
فهد:خلاص جب
وطلع فهد عشان يقرب السيارة لباب البيت وتم يصيح
طلعت يدته واركبت السيارة..توة بيريوس
اليدة:صبر
فهد:ليش؟؟
اليدة:البنات بين
فهد:وشو اللي بيوديهن؟؟
اليدة:وااايه اخليهن بروحهن في البيت؟؟لا هاذيلا امانة
فهد:وكلهن بين؟؟
اليدة:هيه
فهد:عيل يالله وينهن؟؟"ونزل عشان ينزل الكراسي اللي ورى في الدبة
طلعت روضة وهي شاله دلت القهوة والفناييل "لازم هالاشياء تييبهن معاها ولابتمومت يدتها"واليازي وفاطمة وهدى وموزة وهند واركبن السيارة
"في الطريق"
روضة:فهد خطفنا الدكان
فهد:عندكن فلوس؟؟
هدى:هيه انا عندي
اليدة:وشو تبن منه
روضة:نحن ماتريقنا قمنا وركبنا السيارة
فهد:عيل اشوف ويوهن مغورة
اليدة:لا لاتخطف يوم الريوق في البيت ومابغنه
روضة وهي مبققه عيونها:يدتيه الله يسامحج انتي وعيتينا وركبنا السيارة
فهد:خلاص يالله شو تبن؟؟
روضة:شبس بفك عمان وعصير مانجو
هدى:اممم ابا بيبسي وسنكرس وو
فهد:حوووة هذا ريوقكن؟؟
اليازي:هيه من اني ليوا ريوقنا من الدكان
فهد:الله يعين يالله اخلصن وقولن شو تبن
"وقفزا عن الدكان حوالي نص ساعة وهن يطلبن اللي يبنه ويدتهن محتشرة عليهن متى بيخلصن
"في لندن"
كان الكل مجتمع في الشقة وسوااالف عبيد بخير "ريل حمدة"
كان قاعدة ع الكرسي وهو شال ولدة منصور عداله حمدة وعمته اما منصور ع الكرسي اللي عداله ومقابلتنه نوف
عبيد:آه الحمدالله ان ربي خلاني اشوف ولديه
حمدة:الحمدالله وبعده عمرك طويل ان شاء الله
الكل:ان شاء الله
عليا"عمت نوف":هاه متى نويتوا الردة؟؟
نوف:مب بدري شوي؟؟
حمدة:بس منصور عليه امتحانات
منصور:لا لا عادي خذوا راحتكم عدها امتحاناتي
عبيد:لا لازم ترد وتدرس عدل نبا نسبه ترفع الراس
حمدة:اكيد
عليا:خلاص مادام ان نوف تبى تقعد شوي شو رايكم نقعد لنا يومين او ثلاثة ونرجع
منصور:يكون احسن بعد اتجهز شوي قبل الامتحانات
حمدة:الله يوفقك
الكل:آمين
وهنيه قعد الكل يسولف الا نوف ومنصور كانوا ساكتين رفعوا عيونهم والتقت ببعض نوف استحت ونزلت عيونها

 

[ضوى العيون]

منصور تم يطالعها كان ودة يناديها عشان ترفع راسها ويشوف عيونها كان يشوف بريق في عيونها حس بشي اتجاهها
خلاص هالريال مب قادر من شافها اول مرة وهو ميت عليها
وودة من الحين انه يكلم اخوها ويخطبها
من الحين يبى يعلم الكل ان منصور لنوف ونوف لمنصور
"عشان مايتجرأ واحد ويخطبها"
"فلم هندي هو؟؟"بس طريقة تفكير منصور هي الصواب انه يدخل البيت من بابه مب من دريشته ونيته شريفة
استرخص وطلع من الشقة للكوفي وقعد يفكر
"في ليوا وعند الشباب"
كانوا كلهم قايمين ويسولفون ويتريقون في الميلس
خلفان:اقول حمووود متى بتعبون الدراجة؟؟
محمد:والله لين مانروح مزيرعة ونييب بترول
خلفان:خلاص خلنا نروح الحين والله ودي اركب دراجة
محمد:خلاص بالمرة نروح كلنا مزيرعة ونعبيها بترول ونروح للمزرعة
خليفة:مزرعة منو؟؟
محمد:مزرعة يدتيه وراها نقى عجيب وبنستانس بدال اللعب هنيه..هاه شو رايكم
مطر:ووين المزرعة؟؟
محمد:مب بعيدة قريبة من محضرنا
خليفة:وفهد وين؟؟
محمد:راحوا لمزرعة يدتيه
خلفان:خلاص يالله
محمد:وانته؟؟
مطر:انا عني بسير لواحد من الشباب كلمني البارحة انهم حظروا ليوا وبسير عليه
خلفان:أفا مابتروح معانا؟؟
مطر:لا مرة ثانيه ان شاء الله
محمد:خلاص عقب ماترد من عندهم لاترد ابوظبي
مطر:تبى فهد يذبحنيه؟؟
خلفان:هههههه ثرك تتروع منه؟؟
مطر:اكيد
وبعد ماركبوا السيارة راحوا لمزيرعة عشان يعبون الدراجة وعقب يروحون لمزرعة يدتهم..اما مطر راح للريال اللي عزمه
"في المزرعة"
بعد مانزلت اليدة بند فهد السيارة وراح يتحوط مع يدته في المزرعة اما البنات قعدن تحت شيرة وقعدن يتريقن
هدى وهي تتثاوب:آه والله اريد ارقد
اليازي:ياحيج انتي ماقعدتي مع يدتيه لين الصبح
هدى:صح سمعت حشرتكن شو استوى؟؟
موزة:الله يسلمج يدتيه احتشرت عقب ماصلينا تبانا نسويلها قهوة وغير هذا ماتبانا نرقد عقب الصلاة على قولتها هب زين
هند:ههههه حليلكن
فاطمة:اظحكي شعليج؟؟ انتي مندسة ورى الشبريه وماشافج
هند:الحمدالله
روضة:خلنا نتمشى شويه في المزرعة
اليازي:مسرع خلصتي اكلج؟؟
روضة:باكله وانا امشي
فاطمة:عيل يالله معاج
وراحن يتمشن
موزة:شو رايكن نلعب بالماي؟؟
هند:يالله احس الجو شوي حار
اليازي:ليت يدتيه تسمعكن والله لتهزبكن
هدى:عادي عيل ليش يابتنا معاها؟؟
وقامت هدى وموزة وهند يلعبن بالماي واليازي تضحك عليها
واللعبه هي اللي تخيس ماي هي الخسرانة وعاد يالله اركضن في المزرعة جنها "مجرى لسباق الهجن"
اما اليازي قامت تدور روضة وفاطمة عشان تمشي معاهن
تمت تمشي وتتلفت تشوف المزرعة وكانت وااايد حلوة
مشت بين النخل وكملت طريقها لآخر نخله ومالقت حد هنيه ضربها خوف لأنها بروحها ومحد عندها
وفي آخر النخل يكون فيه بيت عبارة عن ميلس عود للشباب وحمام"هذا كل مايون ليوا يجتمعون الشباب فيه"
تمت تتفحص المكان شافت الباب مفتوح
"بسم الله اكيد الهندي هنيه خلني ارد ابرك اليه"
ورجعت تكمل طريقها بســـــــــ ـ ـ ـ
"عند البنات"
مسكت روضة اللقن"مثل المله"وفاطمة تخرف الرطب ويدتهن اشرفت عليهن
اليدة:شوي شوي بلاج مستعيله
فاطمة:انا مب مستعيله بس الدبور بغى يلدغنيه
اليدة:ماعليج منه وانتي روييض امسكي اللقن عدل عن لاينجب
روضة:يدتيه وين راعي المزرعة خليه ايي ويخرف لازم نحن؟؟
اليدة:وانتي شو تعرفين؟؟ تعلمي جيف تخرفين ولاباجر ريلج يوم بيقولج اخرفي مابتعرفين
روضة:بسم الله على نهيان هب مودني المزرعة وبيخليني اخرف رطب
اليدة:شو؟
فاطمة:ماشي بس تقول بتحط 10 بشاجير يخرفون لها هب هي اللي بتخرف
اليدة:يييه هذا نكر البنات باجر بيحطن اكثر عن خدامة في بيتهن..زمانا غير عن زمانكن يالله يالله خلصن خلنا نعطن
شوي الا يسمعون صوت سيارة بس عند باب الزراعة وقف محمد يشغل الدراجة وخلفان ع راسة اما خليفة دخل المزرعة عشان يشوفهم وين..
اركضت هند واندست ورى النخله عشان ما تشوفها هدى اما موزة تركض وتركض وراها هدى عشان ترشها بس موزة سريعة واسبقتها وماقدرت هدى ترشها واول ماشافت خليفة
مالقت حد غيرة رشته بالماااي
خليفة:طااالع انا شو سويت؟؟
هدى:ماشي بس مالقيت حد جدامي
خليفة وهو يطالع ثيابه:لا والله والحين وين ببدل ثيابي؟؟
هدى:ورى النخله
خليفة:هه هه هه سخيفة لا طلعتي اسخف عن خلفانوة السخيييف الغلس
هدى:خلاص الا شويت ماي زعلتك؟؟ مايسوى عليك
خليفة:آه منج وين يدتيه؟؟
هدى:مادري
وتروح تدور البنات اما خليفة ضحك عليها"هاي بتم طول عمرها ياهل وحركاتها حركات يهااااااال"
اجتمع الكل برى المزرعة والكل يريد يلعب بالدراجة اما اليدة محتشرة وخايفة عليهم من الدراجة
في مكان ثاني
تمت تتفحص المكان شافت الباب مفتوح
"بسم الله اكيد الهندي هنيه خلني ارد ابرك اليه"
ورجعت تكمل طريقها بســـــــــ ـ ـ ـ
فهد:اليازي
اليازي وهي قابضة قلبها:بسم الله
فهد:شبلاج؟؟
اليازي:هاه ماشي بس روعتنيه
فهد:وين البنات عنج؟؟
اليازي:الحين قاعدة ادورهن
فهد:لاتمين تحوطين بروحج
اليازي:ان شاء الله"ولفت بترجع"
فهد:صبري عندي لج كلمتين وعقبها روحي
اليازي وقلبها يدق:شو؟؟
فهد:اليازي..انا من زمان واريد اقولج هالكلام وسامحيني عليه وارجو انه مايزعلج وترضين باللي بقوله لج
اليازي وهي خايفة:اكيد برضى بس خوفتنيه شو؟؟
فهد:يزوي"وهاي اول مرة يقول لها يزوي" انتي من زمان..يعني من وكنا صغار كنا مع بعض واعرف صفاتج وتصرفاتج واعرف اللي في قلبج
كنا صغار وانا اغايضج واصيحج وماخليج ف حالج
وكنت استانس وانا اشوفج تصيحين
وكبرت وانا احب هالشي
بس من كبرنا وصرنا اكبر بعدتنا الدنيا انتي في المدينه وانا في ابوظبي..بس قلبي "معاكم"
انا ما انكر انج في يوم من الايام عجبتيني و"سكت"
بس مرت عليه ايام كنت احس انج مثل اختي واكثر
ما كنت احس بشي غير الاعجاب وقلت يمكن تكونين حرمتيه اللي بعيش معاها طول عمري بــــس
الحين تغير كل شي وفهمت الدنيا عدل
"وقف قلب اليازي وشافته بنظرة غريبه كأنها ماعرفت شو قال"

 

[ضوى العيون]

انتي تعرفين باللي صار قبل وهو ان سيف يباج ومن درى اني اباج خلاج ووووووووو اشياء وايدة صارت
بس كنت معجب فيج لا اكثر وانا كنت مسرع في اتخاذ قراري
اليازي:شو يعني؟؟
فهد:يعني خلاص انتها اللي بينا..واصلا كان في بينا شي؟؟
ماغير علاقة الاخوة؟؟
اليازي:لا والله؟؟ فهد انته ماتدري اني؟؟
وكانت بتكمل كلامها بس
فهد:ادري بس حبج لي وهم في حياتج اليازي اسمعيني عدل لو خذتج والله بتندمين وحياتنا بتكون تعيسة
اليازي:وانته شو دراك؟؟
فهد بس خلاص انا ما بسكت بس عليه سكت المرة الاولى وهي يوم قلت اليه ان سيف يباني
لا هالمرة وبقولها لك فهد انا اريدك انته وماريد غيرك
ليش ماتفهم؟؟
فهد:بس حياتي معاج مستحيله؟؟
اليازي:ليش؟؟ انته الحين شي ناقصنك؟؟
المشي ومشيت والحمدالله مافيك الا العافيه
فهد:اليازي ماريد اطول معاج خلاص انسيني انسيني من حياتج..خلاص ليش مصرة؟؟
اليازي:كيف انسااااك؟؟ علمني؟؟ وانته اللي كنت احلم بك طول عمري وسامحنيه على هالكلام"وبدت عينها تدمع"
كنت احبك والله..يوم كنت صغيرة كنت اشوفك جدامي واقول في خاطري هذا انا اللي باخذة
كبرت وانا اعد الايام والسنين اللي بخلص دراستيه وانته بعد تخلص وتشتغل
قلت الحين مابيتكلم مابيرمس لين مايشتغل ويعتمد على عمرة وذيج الساعة بيتحقق اللي كنت احلم فيه
فهد:اليازي سامحيني بس ربي ماكتب اني اخذج وتكونين آخر شخص اعيش معاها حياتي
اليازي:انته شو دراك بالغيب؟؟ هاه قلي
فهد:قلبي كان يقول انج انتي وعقلي يقول فطوم
اليازي:فطوووم؟؟
فهد:اسمعيني انا كنت محتار بين قلبي وعقلي ودانة لقت اليه الحل اني استخير ربي
بــــــــــــس ماحسيت بالراحة لامن صوبج ولامن صوبها
اليازي:بس انا...
فهد:ادري والله ادري بس ربي بين اليه اني ما اقدر اعيش لامعاج ولا معاها خلاص افهمي افهمي
اليازي وهي لافه بتروح:يعني افهم انك ماتباني
فهد:انا ما ريدج كزوجة..اريدج كأخت اليه وبس
اليازي وهي تمشي:مشكوور
"
"
لاتقول ابعد دخيلك ياحبيبي لاتقول
مستحيل ابعد وانسى قصة الحب الجميل
حبك اللي وسط قلبي كيف يا الغالي يزول
راسخ في لب يوفي وله بعد عمر طويل
لاتخليني متيم في غرامك ومهبول
ولاتخليني حكاية بين لي قايل وقيل
......
لاتقول ابعد دخيلك ياغناتي لاتقول
قلتها لك الف مرة مستحيل....مستحيل
القصيدة لـ حميد الدرعي
"
"
اباا ارحل واترك احساسك واوادع عشرتك مجهول
بسافر عنك مابسأل وبنسى باقي احساسي
عساك تحقق احلامك وتبقى بعدنا مسرور
اخاف اليوم تتندم ترى هذا الزمن قاسي
اخاف يضيق بك قلبك ويصبح خالي مهجور
تمل العمر ويملك تعيش في حرة انفاسي
"
"
النهايـــــــــــــــــــــــــــــــــــــــ ـــــ ـــــة

 

[ضوى العيون]

ملخص الجزء الاخير
كملت اليازي طريقها وماحاولت تذرف أي دمعه او انها تحاول تفكر في الموضوع او في الحوار اللي صار بينها وبين فهد
اما فهد حس بشويه تعب مع حزن كان يحس ب اليازي ويدري انها بتتأثر في اللي صار
في ذاك اليوم وصلت عليا وعيالها وكملت شلتهم واليوم اللي بعدة يت دانة وقعدت كم يوم وارجعوا
"لأنها تعبت شوي وهي في ايامها الاخيرة"
وهذا اللي صار والحين بقولكم بختصار عن كل الشخصيات اللي مرت في قصتي وشو صار له
{ابتدي بدانة وزايد اللي ابتديت بهم قصتي}
تغيرت حال دانة وصارت احسن عن قبل بوايد كبرت شوق وصارت مشاغبه "لازم طالعة على عمها خلفان"
والله يعين بيزيد واحد في صف شوق وبيساعدها
زايد عايش حياته من احلى مايكون مع عايلته الصغيرة
"عوشة"
ادرست واجتهدت وقدمت امتحاناتها وعقب مدة طويله من انتظار ظهور النتايج كملت فرحتها بنسبتها اللي هي
95,9% وهي كانت متوقعه اكثر بس الحمدالله
الكل فرح لها ولنسبتها اللي ترفع الراس وما ننسى محمد اللي ماصدق الخبر وعقب قرروا يعلنون خطوبتهم وفي هالشهور بيزدهبون والعرس ع شهر 1 اللي بيكون عقب عرس روضة ونهيان بأسبوعين
وع دراسه عوشة"دبرتها بنت ابوها" محمد شغله في ابوظبي فيضطر انه يقعد في ابوظبي طول الاسبوع ويرد لأهله الاربعاء يعني ع مواله المعتاد
"سيف"
اخطبتله امه بنت عرب محشومة ومزيونه بس بيأخرون العرس شويه لأن يدها توه متوفي ف يراعون ظروفهم وهو مستاااانس بالحيل
"هدى"
على حالها ومخروشة شوي"بس يوم تشوف خلفان لأنها تغايضة"وتحاول انها ماتلاقي خليفة يعني تقلل سيراتها لبيت عمها لأنها عرفت باللي صار بين اليازي وبين فهد ف ماحبت يصير بها مثل اللي صار باليازي
وصلت نوف من السفر وراحت هدى لبيتها ومن بعد غيبة طويله تلاقن وقوت علاقتهن اكثر من قبل
"فاطمة"
خطبها مطر من بعد ماعرف كل اللي صار بين فهد واليازي"مثل ماتعرفون انهم ربع وفهد مايخلي شي مايقوله لمطر"فحب انه يتقرب اكثر من هالعايله وخطب بنت عم فهد
والحمدالله فاطمة ماردته لأنها قد شافته قبل
"شما وعبدالله"
عايشين حياتهم حلوة بوجود ولدهم سعيد اللي زاد فرحتهم بس شما للحين بمستحاها اللي ينن عبدالله
"خلفان"
عقل شوي"واذا مل بيجن اكثر"وماننسى انه ثانويه عامة هالسنة عشان جيه يحاول انه يتعود على جو الدراسة
وعنده طموحات انه يكمل دراسته بس في الكليه العسكريه
لأنه يعرف انه مابييب نسبه تدخله الجامعة بس ان شاء الله بيشد حيله وبيني وبينكم تراه حاط العين ع موزة بنت عمه
"خليفة"
من زمان وهو عاقل يدرس اول بأول وهو مايفكر في شي غير الدراسة لأنه بدري شوي على السوااالف الثانيه
وهو متفاأل بنسبته وبتكون اكثر من نسبة عوشة ان شاء الله
ويفكر يكمل في جامعة بتخصص تقنية المعلومات
"هو يحب هالمجال اكثر شي"
وكلم اخوه زايد عشان يكلم عمة ابو سيف عن هدى وهو ان اول مايخلص خليفة الثانوية بيخطبها والكل بيدري انها لخليفة وعقب مايدرس ويشتغل ذيج الساعة بيعرس
"نوف"
حست انها استقرت شوي وامتلى البيت عليها بوجود حمدة ومنصور"الصغيروني"وهي تعلقت فيه وااايد وحست ان الجو تغير عليهم "لأنها كانت تحس بالوحدة ومحد معاها بس الحين تغير الوضع بوااايد"
ومنصور"اخو حمدة"كلم حمدة طبعا من بعد ما كلم اهله عشان تشاور نوف اذا هي تقبل به ولا لا بس بيكمل دراسته ومن بعد مايخلص ويشتغل بيعرس
في بدايه الموضوع استحت نوف وماتخيلت انها تكون مخطوبة لمدة 3 او 4 سنين تقريبا بس من بعد ماكلمت هدى واشارت عليها بأنها تستخير ربها
والحمدالله حست بالراحة والطمأنينه وماردته
"روضة"
كل أسبوع او اسبوعين تروح لأبوظبي وتجيك على فستانها "لاتنسون ان عرسها شهر واحد"
والبنات معاها يفصلن فساتين
"موزة"
حياتها عااااديه واااايد ودومها هايته في بيت خالتها
مبارك اشتغل من بعد طول انتظار وهو يدور شغل واعلن خطوبته لموزة بس هي رفضته "وماتدري ليش هي ماتباه
نقول"لأسباب شخصيه"حاولت امها تعرف ليش رافضتنه بس لا اسباب واخوانها ماحاولوا يضغطون عليها لأن هاذي حياتها وهي حرة في اختيار اللي بتعيش معاه حياتها
اما خلفان من درى ان مبارك خطبها بغى يموت وذاك اليوم كلم عمه ابو سعيد ان ولد العم اولى ومادري شو
في البداية قاله خلاص مبارك خطب وخلفان مافقد امله حشر الكل انه يبى موزة وقال اذالا ما خذ موزة مابياخض غيرها اونه بينتحر اذا خذت غيرة"خلاص خذوا الدرو عن هدى وخليفة روميو وجولييت"
ومن بعد مادرى ان موزة ردت مبارك سوى عزيمة عووووودة وعزم الاهل كلهم والحين الكل يعرف ان موزة لخلفان وخلفان لموزة ومحد بيتجرأ وبيخطبها
بس مبارك حس بالغيظ وكان يريد يعرف سبب رفض موزة له بس لا جوااااب
"هند"
حياتها مثل حياة موزة لأنهن مع بعض بس فيها اختلافات شوي وهي معجبة وااايد بولد عمها ناصر اللي نجح بنسبة 77% وهي اول وحدة باركت له بالنجاح وحس ناصر انها معجبة فيه بس مثل ماتعرفون انه مايحب يبين لحد شعورة او شو يحس به..والله يعينها هالسنة اول ثانوي ولازم تدرس اول باول
ونسينا اهم شخصية في القصة وهي
اليدة روضــــــــة
للحين على عادتها الجديمة وهي راسها في راس خالد ومحتشرة مع الخدامة وماخلت حد في البيت وماواجعته
وع سالفة ليوا قعدوا اسبوع وارجعوا لأن البنات ملن ومحد عندهن وناصر عدة ماخلص
ف اصرت اليدة انها تقعد هناك بروحها مع الخدامة
وعقب امتحانات ناصر على طول الكل حضر ليوا
"بس عشان خاطر اليدة"
"
منو بعد؟؟
هييييييه نسينا فهد واليازي
مثل ما نهيت القصة بهم فبنتهي بهم
"اليازي"
كملت دراستها وصارت معلمة للصف الاول وكم واحد تقدم لها بس هي تعلثت بالدراسة وتحاول انها تنسى فهد وان شاء الله في يوم من الايام بتشوفونها عروس
"فهد"
هالسنة خلص دراسته مع مطر واشتغلوا في مكان واحد وهو يحاول يتأقلم مع حياته وينسى اللي صار بينه وبين اليازي
ويحاول انه يتقبل وحدة غيرها في حياته ويفكر انه يفاتح امه في الموضوع"يعني تدور له عروس بس مب الحين"
يعني عقب سنة او سنتين لين مايعرس سيف
النهايـــــــــــــــــــــــــــــــــــــــ ـــــ ـــــــــــــــــــة
"اقولك شي وماتزعل ولا تاخذ على الخاطـــــــــــــــر"

 

[&&بروق&&]

آآآآآآآآآآآآآه طاااحت ايدي وانا انسخها عالوورد عشان اقراها على راحتي


تسلمين ياااقلبي والله يعطيج الف الف عااافيه

سلمت الايادي

 

[ضوى العيون]

الله يسلمج ويعافيج يارب مو مشكله ليش ماتقرينها على المنتدى احسن لك موجودة القصه مكانها

 

[بنوته كيوت]

مررررررسي خووش قصه

 

[***ريماس***]

روووووووووووووووووووووعه
يسلموووووووووووو حبيبت قلبي
على هالقصه

 

[نااناا]

يعـطــيج العـــــــــــــــــافيــــه خيتــــــــــووو

صج القصـه حـــلوووه .. بس فهـد رفـع ضغـطي

حــرام كسـر بخــاطر المسكينـه اليــازي ..!!

<<---- حيـل متأثره بالقصـه ^_^