آكتبيـلنا قصـة ولادتـج هني ~شـآركينا بتجربتـج ~لرفـع معنويـات الحامل ^_~

[شوكلآته]

فديييتتج حبيبتي ماقصرتي

 

[~Rou7~]

الله يسهل عليج شوكلاته
عاد مو تنسونا نبي قصص الولاده

 

[~Rou7~]

شدعوة ولا وحده تبي تكتب قصة ولادتها
شلون يعني!!!!!

 

[-فلانة-]

انا بقول قصة ولادتي باختصار قبل لا بنتي تقعد من النوم..
أول شي انا بجرية.. و كانت تحوشني تجاديم و انا بالثامن و من دخلت التاسع ماكو شي..اختفت كل الأعراض و ضاق خلقي قلت بكمل شهري و زيادة..على بداية الأسبوع الثالث من التاسع وفجأة من غير مقدمات وانا نايمة حسيت إني بلت على نفسي وإنتوا بكرامة قمت من الفراش والا يخر الماي..طبعا شعور ما ينوصف.. خوف على رهبة بس الشعور الغالب كان الفرحة إني أخيرا بشوف بنتي..
قعدت زوجي بكل هدوء..قلتله يالله انا بولد..ودقيت على أمي قلتلها ترى انبط الماي..مسكينة اخترعت و كانت رايحة تودي أختي المدرسة الصبح,, قلتلها إخذي وقتج و تعاليلي عالراحة..لأني قريت وايد قبلها إن الطلق ما يبدي قبل ساعتين من ينبط الماي..
المهم..طبعا كنت وايد متماسكة الحمدلله و قمت خذيت شاور و سكرت جنطتي وقاعدة أشرب نسكافيه على ما توصل أمي.. ما كنت أبي أخرع نفسي عالفاضي..واللي ربي كاتبه بيصير فماله داعي التهويل..
المهم وصلت أمي عقب ساعتين تقريبا ويهها كان أصفر من الخرعة وجسمها يرجف مو قادرة تسوق بعد عمري..قلت حق زوجي انا بروح مع أمي و انت الحقنا..من زود البرود اللي انا فيه انا سقت السيارة بنفسي و أمي قاعدة يمي
المهم وصلنا مستشفى السلام..فحصتني دكتورة كويتية الله يذكرها بالخير نسيت اسمها بنت الغضبان..ايدها خفيفة حيل ما حسيت بشي..ونصيحة وقت الفحص حاولي تاخذين نفس عميق و ماتشدين نفسج من تحت وماراح تتألمين على ضمانتي..
المهم فحصتني طلعت مفتوحة 2 سانتي..نطرت على ما أمي وزوجي خلصوا معاملات الدخول..ما كان فيه إلا جناح اللؤلؤة..ليلته إذا ماني غلطانة ب 350..صعدت الجناح و قعدت شوي إلا تيني الدكتور نجمة..طبعا أول مرة بحياتي أشوفها لأن مراجعاتي كانت مع دكتورة مريم بيبي و كانت مسافرة و حولتني على دكتورة نجمة,,وسبحان الله يوم ولادتي كان المفروض يكون أول يوم مراجعة لي مع دكتورة نجمة..المهم يتني سولفت شوي وقالتلي بعد شوي بيعطونج حقنة شرجية و بعدها طلق صناعي..يابولي وجبة حيل خفيفة..توست و جبن على ما أذكر وقالولي متى ما خلصتي قوليلنا نعطيج الحقنة الشرجية..طبعا حاولت آكل بس سبحان الله من الوناسة اللي كنت فيها ما كنت مشتهية آكل شي كنت أبي أولد بسرعة و أشوف بنتي بحضني..المهم مالكم بالطويلة..ناديت النيرس ويت عطتني الحقنة الشرجية..طبعا إهيا اسمها يخرع..بس اهيا ما تخرع..اهيا مو حقنة..مثل أنبوب فيه جل يدخلونها ويفرغون الجل وبعدها تحسين إنج تبين تروحين الحمام مكرم القارئ..انا خذيتها مرتين لأن كان فيني إمساك عزكم الله و كنت حاسة إني ما فرغت بطني عدل بالمرة الأولى..خلصنا من الحقنة الشرجية قالولي يالله الحين نعطيج طلق صناعي..عطوني طلق صناعي عقبها بنص ساعة تقريبا اشتغل معاي عالخفيف حيل..مثل عوار الدورة يروح و يرد..و طبعا حاطين علي المخطط مال نبض البيبي و الطلق..و شوي شوي يزيد العوار..
انا كنت طالبة إبرة ظهر..فقالولي لازم تنزلين غرفة الولادة نعطيج إبرة الظهر قبل لا يزيد عليج عوار الطلق..طبعا السبب إنه إبرة الظهر يبيلها تكونين بوضعية ثابتة و الطلق إذا حمى ما تضمنين تمسكين نفسج من الحركة..فقلتلهم نطروا شوي للحين العوار اقدر أتحمله..طبعا الطلق يزيد ومثل ما قلت كان مثل عوار الدورة بس يزيد لدرجة إنج ما تقدرين تتنفسين من الألم..بس ثواني و يفج..ويرد مرة ثانية بعد دقايق..المهم شفت العوار قام يزيد قلتلهم يالله نزلوني الولادة عشان اخذ ابرة الظهر..
نزلوني الولادة و ركبولي بربيش وهذا بالنسبة لي أسوأ شي.. وعقبها دخل علي دكتور هندي عشان يعطيني ابرة الظهر..طبعا لازم تكونين قاعدة ولامة مخدة على صدرج عشان ما تتحركين..طبعا الأبرة ما تعور بس اللي ذبحني إني أغار صوب اللي الدكتور يغز الأبرة..بس حط ايده علي جان أنقز من مكاني و زفني زفة محترمة طبعا..المهم مسكت نفسي كثر ما أقدر لين قز الأبرة..قالي بروح و برد عقب 10 دقايق أشوف اشتغل مفعولها ولا لأ..أول ما طلع اشتغل مفعولها معاي بس من ناحية وحدة بس..يعني كنت أحس بعوار الطلق بفخذي اليمين و ما أحس بشي نهائيا بالفخذ اليسار..وقلتله هالحجي لما ياني ورد جيك على مكان الأبرة و وضعيتها قالي كل شي سليم..حاولي تقلبين على جنبج اليسار عشان يوصل المخدر حق اليمين..المهم تميت ساعة تقريبا على هالحال وماكو فايدة..أحس بالطلق بجهة وحدة..زادلي المخدر و هم ما كو فايدة..عطاني ابرة فخذ وهم ماكو فايدة
المهم عقب محاولات 3 أو 4 ساعات قلتلهم خلاص أمري لله عطوني كمام..عطوني كمام جان أتدروخ أذكر قلت حق أمي الله شعور حلو تبين تشمين شوية؟؟ وعقبها نمت..وبس تيني الطلقة أشم الكمام و أرد أنام..طبعا مع الكمام كنت أحس بالطلق بس عالخفيف حيل..وطبعا كل شوي دكتورة تدخل تفحص والرحم مو راضي يتبطل..وقف على 5 سانتي..لين ماصارلي 24 ساعة الماي منبط..والرحم للحين ما تبطل..دخلت علي دكتور نجمة قالت قيصرية..البيبي نبضها ضعف والماي قل عليها وايد..ما قلت شي طبعا بس دمعت عيني كان بخاطري أسمع صرخة بنتي أول ما تطلع للدنيا..دخلت العمليات يتني دكتورة مصرية قالتلي انتي طالبة بالملف إنج تكونين واعية حتى لو قيصري؟ قلتلها اي..بس ترى ابرة الظهر مو مأثرة معاي قاعدة أحس بالطلق..أعتقد لازم بنج كامل..قالتلي خنشوف..مررت على بطني من تحت مثل حديدة قالتلي حاسة فيها قلتلها إي..جان تقول معقولة؟؟ إنتي ماخذة ابرة ظهر المفروض ما تحسين بشي!!
المهم عطتني على طول كمام المخدر ثواني الا انا بسابع نومة..ما وعيت عقبها الا السسترات يقعدوني اول ما بطلت عيني قلتلهم ماي بيبي از اوكي؟؟ قالولي بيبي از فاين جان ارد انام..صعدوني غرفتي عقبها بس كنت ضاغطة على نفسي مابي أنام أبي بنتي..دقيت عليهم يابولي بنتي قمر الدنيا..والله و بسماه شفتها نسيت كل شي..نسيت البهذله و نسيت عوار جرح القيصرية..قمت من فراشي شلتها مابي النيرس تشيلها..وحطيتها على صدري ابي أرضعها بعد عمري..وطبعا اللي ناوية ترضع طبيعي ترى راح تحسين بعوار مثل عوار الدورة لأنج تساعدين الرحم يرد مكانه بطريقة سريعة..المهم..عمليتي كانت الصبح..انا بالليل أفتر بالغرفة مافيني الا العافية الحمدلله..ويا بنات ترى انا مو المرأة الحديدية..بس هذي غريزة الأم..لما تحسين إنه في ضنا إنتي مسؤولة عنه تنسين كل شي..
الحمدلله الحمدلله الحمدلله..قعدت ثاني يوم جني جذابة مو مسوية قيصرية و لا حتى والدة..مافيني شي..ومجابلة بنتي طول الوقت بس ياخذونها حزة اللي بيسبحونها..
خلاصة قصتي..
لا تخافون يا بنات..توكلوا على رب العالمين واللي ربكم كاتبه بيصير..وحطوا في بالكم جميع الإحتمالات قبل الولادة..يعني انا الدكتورة طول الوقت تقولي انتي بتولدين طبيعي لأن طولج و حوضج بيرفكت..بس ارادة الله فوق كل شي..
اخذوا الأمور بهداوة..لا تخرعون عمركم..ترى الخرعة بتزيد عواركم عالفاضي..
وطبعا من ناحية مستشفى السلام ما عليه كلام..رعاية واهتمام شي خيالي..بس طبعا كل شي بحسابه..واذا حابة ترضعين طبيعي راح يطرشولج ناني تعلمج شلون ترضعين..مممممممم..وبس ان شالله ما اكون نسيت شي..
عسى ربي يسهل على كل الحوامل و يارب يارب يارب يفرح قلب كل محرومة من الضنا مثل ما فرح قلبي إنه على كل شيء قدير..
وسلامتكم..​

 

[ام محمد @الغالي]

الحمد لله على سلامتچ يا فلانه و مبروك ما ياچ و الفال لي اولد و اكتب قصتي

 

[~Rou7~]

الحمدلله ع السلامه فلانه
قصتج اثرت فيني والله
مبروك ماجاج الله يخليها لج يارب

 

[الغـــــزال]

حمدالله ع سلامتك..والله يبارك لك في بنتك وتشوفينها عروس

 

[قمري]

قصتي باختصار

انا ولدت شهر 2 وكانت ثاني ولاده لي وقيصريه بمستشفى السيف والحمدالله على كل حال

كنت امشي كل يوم اقل شي ساعه ومابقى شي ماشربته من خروع وغيره وسبحان الله عديت شهري ولاكو طلق ولا اي بوادر ولاده فقررت الدكتوره روبينا قيصريه والحمدالله يبت بنت مثل القمر عسى الله يهون على كل حامل

 

[روح الأحزان]

الحمد لله على سلامتكم فلانه وقمري ومبروك مااياكم تتربى بعزكم ان شاء الله

 

[أم معاذ الكندري]

الحمدلله ع سلامتكم بنات ويتربون بعزكم يارب

 

[~Rou7~]

اب
اب
اب

 

[~Rou7~]

نبي قصص

 

[sosowaty]

الحمدلله ع سلامتج فلانه

و حيل طمنتيني

و انا بعد بولد بسلام ان شاء الله

 

[فديت من يشبهني]

الحمدالله ع سلامتج فلانه

واذا بخصوص البنج النصفي ماثر فيج
لانج ياعمري شاربه نسكافيه منبهات
تبطل مفعول البنج


نفسي انجرحت وكنت شاربه قهوه بنص ساعه
مانفع معاي البنج الموضعي كلشششش من الكوفي
ودكتور قال شاربه كوفي قلت يس قال هذا سبب





وارجع اقول الف حمدالله ع سلامتج
وفعلا من تشوفين ضناج تنسين التعب كله

 

[[[ عيون جابر ]]]

ياربي تسهل علينا
بنات عفيه ادعولي باقي على ولادتي اسبوعين واخلص شهري

 

[yoyo"s mam]

ربي يسهلها عليك عيون جاابر

حاسه فيك لاني باقيلي هم اسبوعين واولد


يااارب السهالات لنا ولجمييع الحواامل ياارب

 

[نسيم الأمل]

الله يسهل ولاداتنا جميعاً بكل خير إن شاء الله

متابعة معاكم بجر وبجمع معلومات وقصصكم فادتني وااااااااااااايد .

الله يعطيكم الصحة والعافية ويفرح قلوبكم يا رب

مبروك للوالدات مواليد الخير والبركة عليكم إن شاء الله

 

[نسيم الأمل]

هذا الموضوع مهم خصوصاً للبجريات
لو يتم نقله لقسم تجمعات حوامل كويتيات

أو يتثبت يكون أفضل

 

[[[ عيون جابر ]]]

ياااااااااارب سهل علينا

 

[Aloe Vera]

ولادتي الاولى في رويال حياة كان باقيلي 9 ايام و اكمل التاسع و بعد صلاة الفير ياني عوار خفيف مثل المغص و قام يتكرر كل عشر دقايق
دقيت على دكتورتي قالتلي اخذي شاور و روحي المستشفى

رحت خلال ساعة عشان قبل زحمة الدوامات و لا طلعت 5 سانتي عاد يت الدكتورة و عطتني طلع صناعي و فتحت الماي ولدت علطول و كانت سهالات

بس اللي ماعجبني اني كنت مخدرة ما فيني وعي مادري ساللي قاعد يصير جني في حلم و هالاحساس مو حلو


ثاني ولادة كان باقيلي اسبوع و اكمل التاسع قمت الساعة وحدة بالليل على الم قوييييييي كل عشر دقايق فجأة ما اقدر امشي لمن اييني ولا اقدر البس هدومي و طيران على رويال حياة ولا انا فاتحة وايد و ولدتني دكتورة الطوارئ عجيبة اسمها سوزان

بس كانت سهالات و من غير لا كمام و لا مهدئات كنت بكامل الوعي الحمدلله

بس على آخر شي دخت حيل من التعب

و الحمدلله