تجمع امهات العالمية الامريكية

[lyale]

الحمد الله مرووو تطمنتي علي ولدج وان شاء الله دوووم يتقدم والفال لعيالي

 

[mr000]

تونا شفنا ولدي وولد أخوي بالتلفزيون بلندن مع الكويتيين اللي متوهقين موقادرين يردون بس أشوه اليوم السفاره ودوهم فندق يم المطار علشان إن شاءالله لي فتح المطار يردونهم

 

[Fouz]

أهلين ليالي و عسى الله يوفق ولدج و يبرد قلبج بالريبورت العدل

مرو الحمدلله ان ريبورت ولدج كان زين و منها للاعلى ان شاءالله و عسى الله يطمن قلبج على ولدج اللي بلندن و يرده بالسلامة

 

[lyale]

الله يسمع منج فوز ويوفق عيالي
مروو الله يرده لكم بالسلامه

 

[mr000]

السلام عليكم اشلونكم ..فوز وليالي مشكورين ماقصرتوا ..والله يرد المسافرين بالسلامه..وينكم اليوم أمهات؟؟

 

[bella bambina]

صباح الخير أمهات
الحمدلله مرو ومبروك على درجات ولدج والله يرجع مسافرينكم بالسلامه
ريمان من جريد ون يبتدون يكتبون بالشهاده عن العربي و مس ماهي كانت قبل تدرس انجليزي
فوز اي عطوهم الشهادات سطرين مادحينها عن الفشله انها تناقش ولغتها زينه وتشارك بالقصص يعني باختصار تحب الهذره وباجي الحجي ذم ما يقدرون حتى يقعدونها وما تكتب واذا اكتبت كتبت حرف ال d ومقتنعه ان بس هذا اسمها وما ترضى بغير هالحجي وزبدة الحجي احنا مو قادرين عليها انتو يا أمها وأبوها دبرو نفسكم وحاولو تقنعونها تكتب

 

[mr000]

ياربي شنو سالفة عيالنا كله مايبون يكتبون آنا كانت هذي مشكلتي معاه من كان بالكي جي..ولي كبر ألحين كل شكوتهم منه إنه يكتب باختصار ماقل ودل وعيزت وآنا أفهمه وأخانقه وشايف بعينه اشلون درجات رايحه من هالسبب..بس ماكو فايده ماله خلق..تقولي مرت حماي النظام البريطاني يعلمونهم من يير1 إنه يكتب وايد والإجابات كامله..يعني بيير 2 لازم يكتب قصه صفحه كامله..مادري صج هذا السبب؟إنه ولدي تعود من صغره على طريقة اختبارات النظام الأمريكي ملتيبل جويس وبس آخر سؤالين فيهم كتابه.....بس هو طبعه جذي راسه يابس مايكتب وايد يعني مايكتب لما أسكر الدفتر وأقوله بالطقاق وكنت أتمنى يعاقبونه..بس ماأشوف هالشي..لما تعود..

 

[ReeMaN]

مرووو الله يرد وليدج وولد اخوج بالسلامه يارب ومبروك درجه ولدج والله يتمم عليه الى اخر السنه بالثانويه ....

بيلا تونى ادري منج انها كانت مدرسه انجليزي بس ماشالله شخصيتها وايد قويه ومتمكنه من اليهال حتى ولدي اسملله عليه يعرف يقرى الكلمات

البسيطه المكونه من اربع احرف ... ويحب العربي

اتصدقين بيلا لا مريت يم صفها مرات اسالها عن ولدي اذا كان معاي تمدح مدددددح فيه جدامه ومرات تمسكنى وانا بروح اخذه تقول ترا امزح

معاج ولدج فيه وفيه وفيه بس ماابي اجرح مشاعره وذيج مس غاده زينه وحبوبه بس عادي تطب فيه جدامه وان عاقبته يعنى مثل ماقلتى بيلا

انتو حاولو فيه بالبيت ....

 

[mr000]

ريمان حبيبتي الله يبارك لج ويوفق وليدج وتشوفينه ان شاءالله من المتفوقين..هو ولدي عنده السوشيال هالشهر مو شي بس الباقي الحمدلله أحسن أقوله يعني إنت لازم تنقص علي فرحتي ماتييب شهاده عدله يا ماث ياساينس ياسوشيال بس الحمدلله مو f والله آخر زمن اللي قمت أرضى بال d أول أنتفه لي ياب c ويصير عزا عندي ويضيق خلقي وأحرمه من هدية الريبورت..الله يستر من الثانويه..!!! فوز شخبارج..مالج حس..وإلا إنتي زامج بالليل مع السهره..كراميلا بعد مابينت..تعالوا صج طعمتوا عيالكم..احنا قلنا بنأجلها لي أسبوع الياي بس خايفين لاترد تمرض اسم الله عليها..ألحين بدت فيها نشله علشان سبحتها أمس..

 

[ReeMaN]

لا احنا ماوديناه التطعيم يمكن الخميس انوديه او الاسبوع الياي يوم الخميس عشان في مجال ان يرتاح بالبيت لا صخن لا سمح الله والا شي

والله يعينا على المعافر .....

مروو ماتشوف شر حفيدتج بنت رفيجتى نفس حالتكم كل ماسبحوها تمرض ... نصحوها تصكر التكيف قبل السبوح بساعه على مايدفا المكان

و تحط دفايه بالحمام عزج الله واول ماتخلص من السبوح تلبسها برنص وعلى طول تنشف شعرها بعدين تبدلها وطبعا هذا كله بالحمام

وانتى بكرامه بس واااااااااااايد ارتاحت من هالطريقه بس الحين لا ماقامت تبطل الدفايه بس تصكر التكيف قبل السبوح بساعه .....

 

[caramella]

السلام أمهات
إشلونكم و شخباركم إنشالله مرتاحين
مررو مبروووك تقرير ولدج و منها للأعلى والله يرد ولدج وولد إخوج بالسلامه إنشالله يارب
ليالي إنشالله تقرين تقارير عيالج و تتطمنين
فوووز مشكوره عالدلاله و إنشوف نمر ناخذ له واحد موتنا من الحنه إنام و يقعد ما عنده إلا سالفة هال آي فون
يحليله ولدج ريمان كرييييم عاد جان راعي البرد عطاه البرد إبلاش دام عطاه الهديه
آنا الصراحه ودي اشتكي على راعي البرد هذا حارني كل يوووم ولدي يشتري برد يسد جبده تالي ما يتغدى عدل لما يرجع البيت
بيلا إهو لازم اول سطرين يمدحون شوي تالي يعطونج جم كلمه تضيق الخلق
ياحليلها دلول مقتنعه تكتب اسمها باختصار
وأول مره اسمع سالفة كيفكم إنتوا عابلو فيها هذي سالفه بالله إشخانة المدرسه عيل
ريمان خوش فكرة سالفة السباحه هذي آنا والله اسكر السنترال بس مو قبل بساعه يبيلي اجرب هالطريقه لأن حتى آنا قمت اكره اسبح ولدي لأن لازم يستمرض لي بعد السباحه
وإنشالله تدرس ولدي السنه اليايه مس ماهي لأن بصراحه ابلته كلش مو حابها إنشالله يحب هالأبله و يرتاح معاها

 

[Fouz]

السلام عليكم
شلونكم أمهات مرو بيلا ريمان كاراميلا ان شاءالله بخير

بيلاالظاهر مس تارا ما تدري وين الله قاطها، أقولها وين ريبورت بنتي تقولي الياهل اللي ما عنده مشاكل ما نعطيه ربورت!!!!يعني الريبورتين اللي قبل لان عندها مشاكل؟؟ حسيت انها دايخة بنطر مس مروى ابرك لي

مرو ودي ادش المنتدى بس حايشني عوار بالجتف مو طبيعي يعني من اكتب سطرين يندح علي ، التطعيم يقولون ما وراه صخونة و العهدة على الراوي، احتمال كبير أوديها باجر لان اغلب الناس تبي تروح الخميس بحكم الويك اند و مو وقته تسمع صراخ اليهال عاد شيفكنا من العسارة

 

[Love \ Hate]

مرحبا بنات شلونكم ؟؟

انا يديده على التجمع

بنتي انشالله السنه اليايه نيرسري .. ومادري وين ادخلها محتاره ؟؟ شلون مدرسكتم ؟؟ وين مكانها ؟؟ واهيا ثنائية اللغه ولا لأ ؟؟

وجم تكاليفها .. وعيوبها ومميزاتها وسوري اذيتكم بس حدي متردده وحتاره مادري وين اودي بنتي

بصراحه انا كنت مفكر بالبرتش اللي بسلوى وبين منتسوري !! ليلحين ادور

 

[bella bambina]

السلام أمهات
أول شي أبي أبشركم التطعيم مو حق كل اليهال اختي سألت حق ولدها اللي عمره 4 سنين جيكو شهادة ميلاده قالو لها ما نطعمه لأنه ماخذ mmr مرتين اليوم أمي ودت شهادات ميلاد عيالي المستوصف جيكوهم وقالو ما لهم تطعيم لأنهم ماخذينه
:stars: والله وايد استانست كنت وايد محاتيه الحين يا حلوين ودو شهادات ميلاد عيالكم بدون لا تودونهم معاكم عشان لا يتصرقعون وان شاء الله ما يكون لهم تطعيم وطبعا انتو عارفين الباجي الحلاوة لي :jbdwjbd:

 

[bella bambina]

صح فوز الياهل اللي ما عليه مشاكل ما يدزون له بروجرس ريبورت بس الريبورت كارد ما أدري لأنهم عطوهم ريبورت كارد هالمرة مو بروجرس ريبورت تقول ان باجر راح تداوم مس مروى عاد تدرين بنتي تحب مس تارا الظاهر تعطيها ويه وما تحب مس مروى

 

[bella bambina]

فوز نسيت أقول لج I liked your new look :sfg: you look gorgeous

 

[mr000]

السلام أمهات اشلونكم..بيلا الله يبشرج بالخير..آنا قايله بودي شهادة ميلادها بدونها أسأل لأنه لما وديتها طعمتها الأسبوع اللي فات السستر قالتلي هي ألحين بتاخذ تطعيم الحصبه فماتدري اشلون عقب اسبوع يردون يعطونها تطعيم حصبه مره ثانيه وقالت لازم تسألين الدكتور ويشوف شهادة ميلادها قبل..ريمان والله كل اللي قلتيه آنا قاعده أسويه من كان عمرها شهر..وهالأيام ألبسها وأنشف شعرها بالسشوار داخل الحمام تكرمين..بس شنسوي مناعتها ضعيفه.. كراميلا مشكوره حبيبتي والله يوفق وليدج

 

[caramella]

فوووز شنو هذا حركات و نيو لوووك بعد
فووز حبيبتي صح كلام المدرسه
آنا مس ويندي قالت لي هذا التقرير ما ينعطى إلا اللي عنده مشكله لا تحاتين إحنا بنعطيج إياه مو عشان ولدج عنده مشكله إسم الله عليه بس عشان إهو ما خذا تقرير المره اللي فاتت بسبة سفره و غير جذي عشان يعرفج مستوى ولدج بعد فترة غيابه و عشان ابلة كيجي 2 يكون عندها خبر عن موضوع غيابه و تقيمي له بعد الغياب
بشرتي بخير بيلا آنا ولدي ماخذ mmr خل اودي شهادة الميلاد بدون لا اوديه عشان لا يتصروع
love hate هذا سايت المدرسه تمقلي فيه اغلب الإجابات عن المدرسه لأن التكاليف صراحه مالت النيرسري مو متأكده منها
http://www.uas.edu.kw
وبالنسبه لرايي بالمدرسه بالنسبه لولدي وايد مرتاح من المدرسه فمن راحته آنا مرتاحه بعد
و إنشالله تتوفقين و تلقين المدرسه المناسبه حق بنيتج لأن الله يساعدج راح يكون قرار صعب

 

[ملكة بيتها]

شلونكم أمهات عساكم بخير
مروو ..مبروك تقرير ولدج ومنها للأعلى إن شاء الله ..
فوز ..عليج بالعافيه اللوك الجديد ..
ريمان ..لا تكدرين خاطرج ولا تلزين عليه شوي شوي وبيتحسن
بيلا ..خوش بشاره بصراحه كنت أحاتي التطعيم ..وطلبي آمري تبين خداااااامه تبين سياره إنتي قولي وإحنا حاضرين هالمره الدفع على ريمان ..ياما طلبنا وتدللنا عليج بس هالمره على ريمان

 

[ملكة بيتها]

كراميلا ..شلونج حياتي